Servi trak pour propaz sa bon nouvel
1. Dan ki fason trak in ganny servi par pep Bondye?
1 I fer en kantite lannen depi ki pep Zeova pe servi bann trak baze lo Labib pour propaz sa bon nouvel. An 1880, Charles Russell ek son bann asosye ti konmans prodwir Bible Students’ Tracts, e sa ti ganny donnen avek bann dimoun ki ti lir magazin Watch Tower pour zot distribye avek manm piblik. Bann trak ti annan en sitan gran lenportans ki an 1884, ler Charles Russell ti legalman anrezistre Zion’s Watch Tower Tract Society, ki aprezan i apel Watch Tower Bible and Tract Society of Pennsylvania konman en lorganizasyon saritab avek bi pour propaz lentere Rwayonm, sa mo “tract” ti ganny enkli dan sa non. Ver 1918, plis ki 300 milyon trak ti’n ganny distribye par bann Etidyan Labib. Trak i ankor en zouti efikas dan nou minister.
2. Akoz trak i efikas?
2 Akoz i efikas: Trak i zoli e atiran. Sa mesaz bref ki ladan i enformatif e vreman enteresan. I atiran pour bann met lakour ki pa sitan enterese avek en magazin ouswa liv. I fasil pour ofer en trak, menm pour bann nouvo proklanmater ek zanfan. An plis ki sa, trak i ptipti e fasil pour mars avek.
3. Rakont en leksperyans personnel ouswa enn ki’n ganny pibliye ki demontre valer bann trak.
3 Bokou dimoun in konmans aprann lo laverite atraver en trak. Par egzanp, en madanm Ayti ti vwar enn nou bann trak lo semen. I ti anmase, lir e dir: “Mon’n trouv laverite!” Finalman, i ti al Lasal Rwayonm, konmans etidye Labib e batize, tou sa la gras a pouvwar Parol Bondye ki ti dan sa trak.
4. Ki nou bi kan trak ki pe ganny ofer pour en mwan?
4 Kaz an kaz: Vi ki trak i en zouti efikas pour rann temwannyaz, zot pou ganny ofer tanzantan konmansman Novanm. Nou bi se pa zis pour donn bann trak, me plito pour servi zot pour konmans konversasyon. Si lo premye vizit ouswa retourn vizit, en dimoun i enterese, nou kapab montre li konman en letid Labib i ganny fer an servan liv Ki Labib i dir? ouswa lezot piblikasyon letid. Ki mannyer nou kapab ofer trak dan predikasyon? Sak trak i diferan, alor nou bezwen konnen ki i annan dan sa ki nou pe al ofer.
5. Ki mannyer nou kapab ofer trak kaz an kaz?
5 Nou prezantasyon i devret adapte avek teritwar ek sa trak ki nou pe servi. Nou kapab konmans konversasyon par donn sa met lakour en trak. Lapo atiran sa trak i kapab evey lentere sa dimoun. Ouswa nou kapab montre li detrwa trak e demann li pour swazir enn ki enteres li. Kan nou pres dan teritwar kot dimoun i ezite pour ouver laport, nou kapab tyonbo sa trak dan en fason ki sa met lakour i kapab vwar ouswa nou kapab demann li si i oke pour nou met enn anba son laport e ki nou ti a kontan konn son lopinyon lo la. Si tit sa trak i deza en kestyon, nou kapab demann li pour dir nou son pwennvi. Ouswa nou kapab demann li nou prop kestyon ki kapab evey son lentere e ankouraz li pour partisip dan sa konversasyon. Apre sa, nou kapab lir en porsyon dan sa trak avek li, fer en poz kan ou ariv kot en kestyon dan sa trak e ankouraz li pour eksprim son lekor. Bann verse prensipal i kapab ganny lir dan Labib. Apre ki serten lenformasyon in ganny kouver, nou kapab termin sa konversasyon e fer laranzman pour retournen. Si kongregasyon i normalman kit piblikasyon kot lakour bann dimoun ki pa la, nou kapab kit en trak kot lezot dimoun pa pou vwar.
6. Dan ki fason trak i kapab ganny servi pour rann temwannyaz lo semen?
6 Temwannyaz lo semen: Eski ou’n deza servi trak pour fer temwannyaz lo semen? Serten dimoun i prese e zot pa oule arete pour koz avek nou. I kapab difisil pour vwar si zot vreman enterese. Olye donn zot bann magazin pli resan san konnen si zot pou vreman lir, akoz ou pa senpleman donn zot en trak? Vi ki lapo sa trak i atiran e son mesaz i kourt, zot kiryozite i kapab pous zot pour lir sa trak ler zot ganny en pti letan. Byensir, si zot pa pe prese pour ale, nou kapab diskit serten pwen dan sa trak avek zot.
7. Rakont bann leksperyans pour montre konman servi trak pour fer temwannyaz enformel.
7 Temwannyaz enformel: I fasil pour servi trak pour fer temwannyaz enformel. En frer i met detrwa trak dan son pos sak fwa ki i kit kot li. Kan i zwenn en dimoun, tel ki en anplwaye dan magazen, i senpleman demann li si i ti a kontan en keksoz pour lir e i donn li en trak. Kan en koup ti al pronmnen dan lavil New York, zot ti mazinen ki zot ti pou zwenn bann dimoun sorti dan diferan pei. Alor, zot ti anmenn zot liv Nations avek zot e detrwa trak diferan langaz. Apre sa, kan zot ti tann en dimoun ki koz en lot langaz pe vann bann keksoz dan kwen semen ouswa ki ti pe asiz o bor zot dan en zarden ouswa dan restoran, zot ti ofer zot en trak dan zot langaz.
8. Dan ki fason trak i parey lagrenn?
8 “Senm ou lagrenn”: Trak i kapab ganny konpare avek en lagrenn. En fermye i normalman senm en ponnyen lagrenn akoz i pa konnen lekel parmi ki pou zermen e pouse. Eklezyast 11:6 i dir: “Dan bomaten senm ou lagrenn e ziska aswar pa les ou lanmen repoze; parski ou pa konnen kote i pou reisi, si isi oubyen laba, ouswa si tou le de pou bon menm.” Alor, annou “kontinyen senm konnesans” an servan sa zouti efikas.—Prov. 15:7.
[Ekstre lo paz 3]
Vi ki trak i en zouti efikas pour rann temwannyaz, zot pou ganny ofer tanzantan konmansman Novanm