Ed dimoun pour ekout Bondye
1. Ki brosir ki ti ganny lanse dan Lasanble Distrik “Ki ou Rwayonm i vini!” e kwa ki fer zot sitan itil?
1 Dan Lasanble Distrik “Ki ou Rwayonm i vini!,” de nouvo brosir ti ganny lanse, Ekout Bondye e viv pour touzour ek son versyon pli senp Listen to God an Angle oubyen Franse. Vi ki napa bokou fraz pour lir ladan, sa bann brosir i kapab ganny tradwir pli fasilman e vit. Anfet, Ekout Bondye e viv pour touzour ti ganny aprouve pour ganny tradwir dan 431 langaz pour son lansman.
2. Lekel ki pou benefisye avek sa de brosir?
2 Lekel ki pou sirtou benefisye avek sa de brosir? Reflesir lo sa bann sityasyon ki souvan arive dan lemonn:
• En proklanmater pe koz avek en met lakour, swa lo en premye vizit oubyen lo en retourn vizit, i remarke ki sa met lakour pa konn lir ditou oubyen i konn lir zis en ptigin.
• En proklanmater i pres avek bann dimoun ki koz en langaz kot napa bokou oubyen ditou piblikasyon ki’n ganny tradwir dan sa langaz. I kapab osi ki laplipar dimoun dan sa teritwar pa kapab lir dan sa langaz ki zot koze.
• En proklanmater i servi langaz siny pour pres avek bann sourd dan son teritwar.
• En paran i anvi ansenny laverite son zanfan ki pa ankor konn lir.
3. Ki mannyer sa brosir Listen to God in ganny fer?
3 Lafason ki zot in ganny fer: Listen to God an Angle oubyen Franse i napa bokou fraz pour lir. An zeneral i annan zis en fraz ek en verse Labib ki’n ganny site anba lo sak paz e ki met lanfaz lo bann pwen enportan. Akoz? Fer konmsi en dimoun i ofer ou en brosir dan en langaz ki ou pa konn lir, petet avek bann let alfabet ki ou pa konnen. Eski i ti pou enteres ou, menm si i ti annan bann zoli portre ladan? Posibleman non. Pareyman, dimoun ki pa konn lir i kapab fasilman dekouraze pour pran en piblikasyon ki annan bokou lekritir ladan. Alor, lo sak paz i annan bann portre avek bann lendikasyon pour montre konman pour diskit bann portre annord.
4. Ki mannyer sa brosir Ekout Bondye e viv pour touzour in ganny fer?
4 Sa brosir Ekout Bondye e viv pour touzour i annan menm portre ki dan brosir Listen to God. I’n ganny fer pour etidye avek bann ki pa tro konn lir oubyen ki pe aprann lir. Si en dimoun pe etidye dan brosir Listen to God, sa enn ki fer li letid i kapab servi sa brosir. I annan en kestyon anler dan kote gos pour sak leson. Apard ki bann portre, i osi annan bann komanter ek verse Labib. Lo laplipar paz anba dan kwen i annan en bwat avek bann pwen adisyonnel ek bann verse Labib ki kapab ganny diskite, depandan lo abilite sa etidyan.
5. Kan e konman nou kapab ofer sa de brosir?
5 Konman pour servi zot: Ou kapab ofer enn ant le de brosir ler ou pe pres portanport kan ou santi i pou itil pour sa dimoun menm si brosir pa pe ganny ofer pour sa mwan. (Vwar bwat: “Konman pour ofer zot.”) Ou kapab entrodwir sa brosir lo en retourn vizit par dir sa dimoun ki ou annan en keksoz pour montre li e donn li sa brosir.
6. Ki mannyer nou kapab kondwir en letid Labib par servi sa de brosir?
6 Vi ki napa kestyon dan sa brosir Listen to God, sa letid pa pou enn kot i annan kestyon ek larepons parey ler ou pe kondwir letid dan liv Ki Labib i dir. Dan tou kiltir, dimoun i kontan ekout zistwar. Alor servi bann portre pour rakont sa bann zistwar ki sorti dan Labib. Eksplik sa ki dan portre. Demontre lantouzyasm. Demann sa etidyan pour dir ou sa ki li i vwar. Lir sa bann verse Labib ki a lafen paz e rezonn avek li lo la. Demann li kestyon ki pou enplik li dan diskisyon e pour fer sir ki i’n konpran. Si i pe servi Ekout Bondye e viv pour touzour, lir sa bann fraz ek verse Labib ki koresponn avek sak portre ansanm avek li.
7. Ki mannyer nou kapab ed nou etidyan Labib progrese?
7 Ed sa etidyan pour progrese: Petet sa letid pou fer sa etidyan anvi aprann lir pour ki i kapab ganny plis konnesans lo Zeova lo li menm. (Mat. 5:3; Zan 17:3) Alor si ou pe servi sa brosir Listen to God, avek letan petet ou kapab ofer pour montre ou etidyan konman pour lir e kontiny son letid dan sa brosir Ekout Bondye e viv pour touzour. Nenport ki brosir ki ou servi pour letid, sa etidyan pa pou ankor pare pour batenm menm si i konplet enn ant sa de brosir. Ou merit kontiny son letid swa dan liv Ki Labib i dir oubyen dan en lot piblikasyon apropriye ki pou donn li en pli bon konprenezon lo Labib.
8. Akoz ou rekonesan pour sa de zouti ki nou’n gannyen pour predikasyon?
8 Dimoun i bezwen ekout Souvren liniver si zot pou viv pour touzour. (Iza. 55:3) Lavolonte Zeova se ki “tou [“sort kalite,” NW] dimoun,” enkli bann ki pa konn lir, i aprann ekout li. (1 Tim. 2:3, 4) Pa nou vreman rekonesan ki nou annan sa bann nouvo zouti ki nou kapab servi pour ansenny dimoun pour ekout Bondye!
[Bwat lo paz 3]
Konman pour ofer zot
Montre sa met lakour paz 2 ek 3 e dir: “Eski ou ti pou kontan viv dan en lemonn ki koumsa? [Les sa dimoun reponn.] Labib i promet [oubyen sa liv sen i promet] ki Bondye pou byento fer sa lemonn vin en zoli landrwa ki anpe, kot pou napa personn ki pou pov oubyen malad. Remarke ki nou devret fer pour viv laba. [Lir Izai 55:3, ki’n ganny site anler lo paz 3.] Sa verse i dir nou ‘vin kot’ Bondye e ‘ekout’ li. Me ki mannyer nou kapab ekout Bondye?” Vir lo paz 4 ek 5 e diskit sa larepons avek li. Si i napa letan, kit sa brosir avek li e fer laranzman pour retournen pour diskit larepons.