Fasil pour lezot konpran

LER ou koze, pa zis prezant lenformasyon. Esey fer sa bann ki pe ekout ou konpran sa ki ou pe dir. Sa i kapab ed ou pour kominik dan en fason efikas, ki swa ou pe koz avek kongregasyon oubyen avek bann ki pa Temwen.

I annan bokou diferan laspe ki enplike pour ou kapab koz dan en fason ki lezot i kapab konpran. Serten i ganny kouver dan Letid 26, “Devlop Lenformasyon dan en Fason lozik.” Lezot i ganny konsidere dan Letid 30, “Demontre Lentere dan lezot Dimoun.” Dan sa letid, nou pou diskit detrwa pwen adisyonnel.

Servi bann Mo senp, prezant dan en Fason senp. Bann mo senp ek fraz kourt i bann zouti pwisan dan kominikasyon. Sermon Zezi lo Montanny i en legzanp ekselan konsernan en diskour ki tou dimoun i kapab konpran, san pran an konsiderasyon ki zot ete oubyen kote zot reste. Bann konsep i kapab nouvo pour zot. Kantmenm sa, zot kapab konpran sa ki Zezi ti dir parski i ti koz lo bann keksoz ki konsern nou tou: konman pour trouv boner, konman pour amelyor relasyon avek lezot, konman pour fer fas avek lenkyetid, e konman pour trouv sans dan lavi. E i ti eksprim son bann panse dan en fason senp. (Mat. sapit 5-7) Byensir, Labib i fourni bokou diferan legzanp lo konman pour varye longer ek laranzman bann fraz. Ou lobzektif prensipal i devret pour eksprim bann panse dan en fason kler e fasil pour lezot konpran.

Menm ler ou diskit bann lenformasyon profon, en stil prezantasyon senp i kapab ede fer li pli fasil pour konpran. Konman senplisite i kapab ganny akonpli? Pa anvai ou lodyans avek bann detay ki pa neseser. Organiz ou lenformasyon afen ki i konplemant ou bann pwen prensipal. Swazir ou bann verse kle avek swen. Olye ki vitman pas lo en verse pour en lot, lir e diskit sa bann verse. Pa fer ou bann lide difisil pour konpran par koz tro bokou.

Ler ou kondwir en letid Labib kot lakour, aplik sa bann menm prensip. Pa esey eksplik tou bann detay. Ed sa etidyan konpran klerman sa bann lide prensipal. Plitar, dan letid personnel e dan bann renyon kongregasyon, i kapab aprann lezot detay.

Pour kapab prezant lenformasyon dan en fason senp, bon preparasyon i neseser. Ou menm ou devret klerman konpran ou topik si ou anvi fer lezot konpran li. Ler ou vreman konpran en keksoz, ou kapab fourni rezon akoz i leka. Ou osi kapab eksprim li dan ou prop mo.

Eksplik bann Term ki pa familye. Parler pour fer lezot konpran keksoz ou bezwen eksplik sinifikasyon bann term ki ou lodyans pa familye avek. Pa prezimen ki ou lodyans i neseserman konn sa term, me anmenmtan pa sou estim zot lentelizans. Konman en rezilta ou letid Labib, ou kapab servi bann term ki paret etranz pour lezot dimoun. San serten leksplikasyon, sa bann ki pa asosye avek Temwen Zeova pa pou konpran ki “restan,” “lesklav fidel e pridan,” “lezot mouton,” ek “gran lafoul” i idantifye serten group dimoun spesifik. (Rom. 11:5; Mat. 24:45, NW; Zan 10:16, NW; Rev. 7:9) Pareyman, amwen ki en dimoun i familye avek lorganizasyon Temwen Zeova, i probab ki i pa pou konpran ki savedir bann term parey “proklanmater,” “pionye,” “sirveyan rezyonal,” ek “Memoryal.”

Menm serten lekspresyon Biblik ki ganny servi par bann ki pa Temwen i kapab bezwen serten leksplikasyon. Pour bokou dimoun, “Amargedon” pour zot i en lager nikleer. Zot kapab asosye “Rwayonm Bondye” avek en kondisyon dan en dimoun oubyen avek lesyel me non pa avek en gouvernman. Ler fer referans lo “nanm” zot kapab imazin sa swadizan parti spirityel imen ki sirviv apre ki en dimoun in mor. Dapre sa ki plizyer milyon dimoun in ganny ansennyen, “lespri sen” i en dimoun ki form parti en Trinite. Lefe ki i annan telman bokou dimoun ki’n abandonn standar moral Labib, petet zot bezwen led pour konpran ki Labib i oule dir par: ‘Elwanny zot avek fornikasyon.’—1 Kor. 6:18.

Amwen ki dimoun i lir Labib regilyerman, zot kapab mal konpran ou si ou senpleman dir, “Pol ti ekrir . . .” oubyen “Lik ti dir . . .” Petet zot annan zanmi oubyen vwazen ki annan menm non. I kapab ki ou bezwen azout serten lekspresyon pour idantifye sa dimoun konman en zapot oubyen en ekriven Labib.

Bann lodyans letan modern i souvan bezwen led pour konpran bann verse ki enkli bann mezir oubyen koutim dan letan ansyen. Par egzanp, sa deklarasyon ki lars Noe ti 300 koude longer, 50 koude lo larzer, ek 30 koude oter i kapab pa fer okenn sans pour zot. (Zen. 6:15) Me si ou ti dekrir serten keksoz familye ki menm grander avek sa bann dimansyon, toudswit ou lodyans pou imazin groser sa lars.

Fourni Leksplikasyon neseser. Pour fer en keksoz kler pour ou lodyans, petet ou bezwen dir plis ki zis definir en serten term korekteman. An Zerizalenm dan letan Ezra, lektir Lalwa ti ganny akonpannyen par leksplikasyon. Pour kapab ed dimoun konpran son sinifikasyon, bann Levit ti donn enterpretasyon ensi ki laplikasyon Lalwa an akor avek sirkonstans ki dimoun ti pe fer fas avek a sa moman. (Nee. 8:8, 12) Dan menm fason, pran letan pour eksplik e aplik bann verse ki ou lir.

Apre son lanmor ek rezireksyon, Zezi ti eksplik son bann disip ki sa ki ti’n fek arive ti lakonplisman Lekritir. I ti osi aksantye zot responsabilite konman bann temwen sa bann keksoz. (Lik 24:44-48) Ler ou ed dimoun pour vwar konman sa ki zot in aprann i devret enfliyans zot prop lavi, zot pou pli fasilman konpran ki sa keksoz i vreman vedir.

Konman ki Leker i enplike. Byensir, menm si ou leksplikasyon i kler, pour ki sa dimoun i konpran oubyen non i kapab annan lezot fakter ki enfliyans sa. Ler leker en dimoun i pa sansib, sa i en lobstak pour li kapab konpran sa ki’n ganny dir. (Mat. 13:13-15) Pour sa bann ki determinen pour vwar keksoz strikteman dapre en pwenn-vi fizik, bann keksoz spirityel i bet. (1 Kor. 2:14) Ler en dimoun i demontre en tel leta lespri, i kapab saz pour senpleman termin sa diskisyon—omwen pour lemoman.

Toutfwa, dan serten ka, leker i pa sansib parski bann sirkonstans difisil dan lavi. Ler zot ganny loportinite pour antann laverite Labib pour enpe letan, leker en tel dimoun i kapab vin sansib. Ler Zezi ti dir son bann zapot ki i ti pe al ganny maltrete e met amor, zot pa ti konpran sa. Akoz zot pa ti konpran? I pa sa ki zot ti pe ekspekte e sertennman i pa sa ki zot ti anvi! (Lik 18:31-34) Sepandan, avek letan, 11 zapot ti konpran, e zot ti demontre sa par azir an armoni avek sa ki Zezi ti’n ansenny zot.

Lefe en bon Legzanp. Dimoun i ganny ede pour konpran pa zis par nou bann parol me osi par nou aksyon. Konsernan zot premye vizit kot en Lasal Rwayonm, bokou dimoun i dir ki zot rapel sa lanmour ki ti evidan, me non pa sa ki ti ganny dir. Pareyman, sa boner ki nou demontre in ed bokou met lakour pour annan en lespri ouver anver laverite Labib. Vwar labonte leker ki pep Zeova i demontre anver kanmarad ek konsiderasyon zantiy pour kanmarad dan bann moman difikilte in fer serten konklir ki bann Temwen i annan sa vre relizyon. Alor anmezir ki ou esey ed dimoun pour konpran laverite Labib, reflesir byen lo lafason ki ou eksplik laverite Labib e lo ou legzanp.