Servi Lenformasyon dezinyen

LABIB i konpar kongregasyon Kretyen avek en lekor imen. Sak manm i neseser, me “sak manm i ranpli en fonksyon diferan.” An armoni avek sa, nou devret servi byen nenport loportinite servis ki’n ganny konfye avek nou. Sa i egzize ki nou konpran e desarz byen nenport ekspoze ki nou resevwar olye ki diminyen lenportans serten topik parski nou panse ki lezot topik pou pli enteresan. (Rom. 12:4-8) Lesklav fidel e pridan i annan sa responsabilite pour fourni nouritir spirityel “kan i ler.” (Mat. 24:45) Ler nou servi nou abilite personnel pour devlop bann ekspoze dapre lenstriksyon ki nou’n resevwar, nou demontre lapresyasyon pour sa laranzman. Sa i kontribye pour ki kongregasyon antye i fonksyonn byen e annord.

Ki ou pou enkli. Ler ou ganny en serten tenm dan lekol, fer sir pour devlop sa tenm e non pa en lot keksoz. Dan laplipar ka, bann referans spesifik pou ganny fourni. Si i pa ganny endike ki lenformasyon enprimen ki ou devret servi konman baz pour ou ekspoze, ou kapab rasanble lenformasyon dan bann sours ki ou menm ou swazir. Toutfwa, ler ou prepar ou ekspoze, fer sir ki sa prezantasyon an antye i ganny devlope otour sa tenm ki’n ganny dezinyen. Ler ou pe deside ki pour enkli, ou pou osi bezwen pran an konsiderasyon ou lodyans.

Etidye byen sa lenformasyon ki ou’n ganny demande pour refer avek, analiz bann verse ki enkli ladan. Apre egzamin konman ou kapab pli byen servi li pour ki ou lodyans i benefisye. Swazir de oubyen si i posib trwa pwen dan sa lenformasyon enprimen pour servi konman bann pwen prensipal dan ou ekspoze. Pareyman, swazir dan sa lenformasyon dezinyen bann verse ki ou deside pour lir e diskite.

Ki kantite sa lenformasyon enprimen ki ou devret servi? Zis lakantite ki ou kapab prezante avek efikasite. Pa sakrifye bann bon metod lansennyman zis pour enkli en kantite lenformasyon. Si serten sa lenformasyon pa adapte avek lobzektif ou ekspoze, konsantre selman lo bann porsyon ki pou ed ou atenn sa lobzektif. Dan sa lenformasyon dezinyen, servi bann pwen ki pou pli enformatif pour ou lodyans e sa ki pou pli itil pour zot. Lobzektif ki ou devret annan ler ou travay lo sa pwen dan sa Letid se, pa pour vwar ki kantite ou kapab kouver, me pour servi sa ki’n ganny dezinyen konman baz pour ou ekspoze.

Ou ekspoze pa senpleman vedir rezim sa lenformasyon dezinyen. Ou devret prepare pour eksplik serten pwen, elabor lo zot, klarifye zot, e posibleman donn en legzanp son bann laplikasyon. Bann lide adisyonnel i devret ganny servi pour devlop sa bann pwen enportan dan ou lenformasyon dezinyen olye ki pour ranplas sa lenformasyon.

Bann frer ki annan kalifikasyon neseser konman ansennyan i kapab avek letan ganny envite pour donn lenstriksyon dan Renyon Servis. Zot konpran sa nesesite pour servi byen lenformasyon dezinyen olye ki ranplas li avek en lot keksoz. Pareyman, bann frer ki prezant bann diskour piblik i ganny bann plan pour swiv. Sa bann plan i permet serten fleksibilite, me zot klerman endik bann pwen prensipal pour devlope, bann largiman segonder pour servi, ek bann verse ki fourni baz pour sa diskour. Aprann konman pour ansennyen par servi lenformasyon dezinyen konman en baz i en laspe enportan pour prepar pour lezot privilez.

Sa formasyon i kapab osi ed ou pour kondwir bann letid Labib kot lakour progresivman. Ou pou aprann pour fikse latansyon lo sa topik olye ki retir latansyon lo la par fer resorti lezot keksoz ki kapab enteresan me ki pa neseser pour ed sa dimoun konpran li. Toudmenm, si ou byen konpran vre bi sa leson, ou pa pou vin tro strik pour swiv sa letid ki ou pa arive fourni leksplikasyon anplis ki en etidyan i kapab bezwen.