PWEN 10

Varyasyon dan lavwa

Matye 10:27

KI OU BEZWEN FER: Sanzman volim, ton ek vites lavwa i ede pour fer bann nide pli kler e tous leker bann ki pe ekout ou.

Varye ou volim. Koz pli for pour met lanfaz lo bann pwen prensipal e pour motiv ou lodyans. Fer parey ler ou pe lir en mesaz kondannasyon dan Labib. Ou kapab koz pli dousman pour ki ou lodyans i port plis latansyon pour konn sa ki ou pe al dir apre oubyen ler ou pe sey eksprim lafreyer oubyen lenkyetid.

Pa bezwen koz for tro souvan akoz ou lodyans pou ganny lenpresyon ki ou pe dispit avek zot. Ler ou pe koze, pa met tro bokou lanfaz oubyen tro egzazere akoz sa pour atir tro bokou latansyon lo ou.
Varye ou ton lavwa. Si i aplikab dan ou langaz, ou kapab sanz ton lavwa pour eksprim diferan santiman. Par egzanp, pour montre ki en keksoz i vreman gro oubyen lwen. I osi posib pour servi en pli gro lavwa oubyen en pti lavwa (en ton ki pli o ouswa pli ba) pour montre lantouzyazm, sagrinasyon oubyen lenkyetid.
Varye ou vites. Koz pli vit pour montre leksitasyon. Koz pli lant ler ou pe mansyonn bann pwen enportan.

Pour anpes ou lodyans sote, pa koz vit en sel kou. Pa koz tro vit akoz i pou afekte ou prononsyasyon.