BIOGRAFI
Mon santi mwan an sekirite parski mon annan konfyans dan Zeova
LER dimoun i demann mwan konsernan mon lavi, souvandfwa mon dir zot, “Mon parey en valiz ki Zeova i kapab anmenn nenport landrwa kot i anvi ale!” Zis parey mon anmenn mon valiz kot mon anvi ale, mon anvi ki Zeova ek son lorganizasyon i fer menm parey avek mwan. Mon anvi ki zot gid mwan kote pour ale e kan. Mon’n aksepte bann responsabilite kot mon’n bezwen fer bann sakrifis e kot parfwa mon lavi ti an danze. Me mon’n aprann ki ler mon met konfyans dan Zeova, sa i ed mwan pour santi mwan an sekirite.
MON TI APRANN KONN ZEOVA E ANNAN KONFYANS DAN LI
Mon ti ne an 1948, dan en pti vilaz dan sid was Nizerya. Sa letan, mon tonton, Moustapha ki pti frer mon papa e mon gran frer Wahabi ti’n batize konman Temwen Zeova. Ler mon ti annan ne-v-an, mon papa ti mor. Sa ti fer mwan vreman sagren. Wahabi ti dir mwan ki nou ti pou vwar papa ankor ler i ganny resisite. Sa ki i ti dir mwan ti rekonfort mwan e ti motiv mwan pour etidye Labib. An 1963, mon ti batize e pa bokou letan apre, trwa parmi mon bann frer ti batize zot osi.
An 1965, mon ti al Lagos kot mon gran frer Wilson e laba mon ti pas bann bon moman avek bann pionye dan kongregasyon Igbobi. Zot lazwa ek devouman ti motiv mwan pour vin en pionye e an Zanvye 1968, mon ti fer sanmenm.
En frer ki apel Albert Olugbebi e ki ti servi dan Betel, ti organiz en miting spesyal pour bann zenn pour koz avek nou konsernan lefet ki i ti annan bezwen pour pionye spesyal dan nor Nizerya. Mon ankor rapel sa ki Frer Olugbebi ti dir: “Zot ankor zenn e zot kapab servi zot letan ek lenerzi dan servis Zeova. I annan en kantite travay pour fer laba!” Mon ti anvi vin parey profet Izai e al kot Zeova i anvi mon ale. Alor mon ti fer laplikasyon pour vin en pionye spesyal.—Iza. 6:8.
An Me 1968, mon ti ganny anvoye konman en pionye spesyal dan lavil Kano, ki dan nor Nizerya. Sa ti pandan Biafran War (1967-1970). En kantite dimoun ti soufer e mor pandan sa lager dan nor Nizerya avan ki sa lager ti bouz dan les Nizerya. En frer ti esey konvenk mwan pour pa al dan nor Nizerya. Me mon ti dir li: “Mersi pour mazin mwan. Me si Zeova i anvi ki mon servi li dan sa landrwa, mon asire ki i pou avek mwan.”
MON TI MET KONFYANS DAN ZEOVA LER MON TI DAN EN LANDRWA KOT I TI’N ANNAN LAGER
I ti vreman fer lapenn pour vwar sityasyon dan lavil Kano. Lager ti’n fer bokou dega dan sa gran lavil. Parfwa dan predikasyon nou ti vwar lekor bann dimoun ki’n ganny touye dan sa konfli. Menm si i ti annan plizyer kongregasyon dan lavil Kano, laplipar bann frer ek ser ti’n kit sa landrwa. I ti annan mwens ki 15 proklanmater ki ti’n reste e zot ti per e dekouraze. Sa bann frer ek ser ti kontan ler sis pionye spesyal enkli mwan, ti ariv dan sa landrwa. Nou ti ankouraz sa bann proklanmater e sa ti fer zot dibyen. Nou ti ed zot pour reorganiz zot bann renyon ek predikasyon. Nou ti osi ed zot pour konmans anvoy zot bann rapor predikasyon kot biro brans e pour fer rekomann pour ganny bann piblikasyon.
Mwan ansanm avek lezot pionye spesyal, nou ti konmans aprann koz langaz Hausa. Ler bann dimoun ti tann sa mesaz Rwayonm dan zot prop langaz, en kantite parmi zot ti ekoute. Me bann manm sa larelizyon prensipal Kano, pa ti kontan sa travay predikasyon ki nou ti pe fer. Alor nou ti bezwen fer byen atansyon. En fwa, en zonm ti tay avek mwan ek mon konpanyon predikasyon avek en kouto. Erezman nou ti tay pli vit ki li e i pa ti reisi zwenn nou! Malgre sa bann danze, Zeova ti fer nou “viv an sekirite” e lakantite proklanmater dan sa landrwa ti konmans ogmante. (Ps. 4:8) Ozordi, i annan plis ki 500 proklanmater Kano, ki pe servi dan 11 kongregasyon.
NOU TI GANNY PERSEKITE AN NIZER
Ler mon ti pe servi konman en pionye spesyal Niamey, Nizer
Pli tar, an Out 1968, apre ki mon ti’n fer zis detrwa mwan Kano, mon ti ganny anvoye Niamey, kapital Larepiblik Nizer, ansanm avek de lezot pionye spesyal. Nou pa ti tarde pour aprann ki Nizer ki dan was Lafrik, i enn bann rezyon pli so lo later. Nou ti bezwen aprann viv avek sa lasaler me osi aprann Franse ki langaz ofisyel dan sa landrwa. Menm si i ti difisil pour nou fer sa, nou ti met nou konfyans dan Zeova e nou ti konmans fer predikasyon dan sa lavil ansanm avek detrwa proklanmater ki ti reste laba. Dan zis en ptigin letan, tou dimoun Niamey ki ti konn lir ti’n ganny enn sa liv letid The Truth That Leads to Eternal Life. Dimoun ti menm vin rod nou pour ganny enn sa liv!
I pa ti pran bokou letan pour nou aprann ki bann lotorite pa ti kontan Temwen Zeova. An Zilyet 1969, nou ti fer premye lasanble rezyonal dan sa pei e apepre 20 dimoun ti asiste. Nou ti vreman anvi vwar sa moman kot de nouvo proklanmater i pran batenm. Me lo premye zour lasanble, lapolis ti vini e fer nou aret sa lasanble. Zot ti anmenn bann pionye spesyal ek sirveyan rezyonal kot stasyon lapolis. Apre ki zot ti’n kestyonn nou, zot ti donn nou lord pour retourn kot stasyon lapolis son lannmen. Nou ti realize ki bann lotorite ti kapab fer problenm, alor nou ti fer laranzman pour fer diskour batenm kot en lakour prive e batiz sa de proklanmater dan en larivyer an kasyet.
Detrwa semenn pli tar, gouvernman ti donn mwan ansanm avek senk lezot pionye spesyal lord pour kit Nizer. Zot ti donn nou 48 erdtan pour kit sa pei e nou ti bezwen fer nou prop laranzman pour ale. Nou ti obei e nou ti al direkteman kot biro brans Nizerya. Laba nou ti ganny bann nouvo responsabilite.
Mon ti ganny anvoye dan en vilaz Nizerya ki ti apel Orisunbare. Laba mon ti pas bann bon moman dan predikasyon e kondwir bann letid Labib ansanm avek en pti group proklanmater ki ti reste laba. Me apre sis mwan, biro brans ti envit mwan pour retourn Nizer mwan tousel. O konmansman, mon ti sirprann e mon ti en pti pe per me apre mon ti eksite parski mon ti pou revwar bann frer ek ser Nizer.
Mon ti retourn Niamey. Son lannmen apre ki mon ti’n ariv Niamey, en biznesmenn Nizeryen ti remarke ki mon ti en Temwen Zeova e i ti konmans demann mwan kestyon konsernan Labib. Mon ti fer son letid. Apre sa, i ti aret fimen e aret bwar bokou lalkol e pli tar i ti batize. Mon ti vreman kontan pour anons sa bon nouvel ansanm avek bann frer ek ser dan diferan parti Nizer e pour vwar ki mannyer dimoun in aksepte laverite pandan bann lannen ki’n pase. Ler mon ti fek arive, i ti annan 31 Temwen Zeova dan sa pei e ler mon ti kit sa landrwa i ti annan 69.
“NOU PA KONN BOKOU KEKSOZ KONSERNAN SA TRAVAY PREDIKASYON GINE”
Ver lafen 1977, mon ti retourn Nizerya pour ganny en formasyon. Ler sa trwa semenn formasyon ti fini, frer Malcolm Vigo ki ti kordinater Komite Brans, ti fer mwan lir en let ki ti sorti kot biro brans Sera Leonn. Bann frer ti pe rod en frer selibater ki en pionye e ki kapab koz Angle ek Franse, pour li vin sirveyan rezyonal Gine. Frer Vigo ti dir mwan ki mon ti’n ganny formen pour sa responsabilite. I ti osi dir ki sa pa ti en responsabilite fasil. I ti donn mwan sa konsey: “Mazin byen lo la avan ou aksepte.” Deswit mon ti reponn li: “Vi ki i Zeova ki pe anvoy mwan, mon pou ale.”
Mon ti al Sera Leonn e laba mon ti zwenn bann frer kot biro brans. En manm lo Komite Brans ti dir mwan: “Nou pa konn bokou keksoz konsernan sa travay predikasyon Gine.” Menm si biro brans Sera Leonn ti responsab pour travay predikasyon Gine, zot pa ti kapab kominik avek bann proklanmater Gine parski i ti annan bann problenm politik dan sa landrwa. Plizyer fwa, zot in esey anvoy en frer dan sa pei pour vizit bann frer ek ser me zot pa’n reisi. Alor mon ti ganny demande pour al dan kapital Gine, Conakry, pour esey ganny permisyon avek gouvernman pour mwan reste Gine.
“Vi ki i Zeova ki pe anvoy mwan, mon pou ale”
Ler mon ti ariv Conakry, mon ti al kot lanbasad Nizerya e laba mon ti zwenn lanbasader. Mon ti koz avek li konsernan mon dezir pour fer sa travay predikasyon Gine. I ti sipliy avek mwan pour pa reste Gine parski mon riske ganny arete oubyen en keksoz pli grav i kapab arive avek mwan. I ti dir mwan: “Retourn Nizerya e al fer predikasyon laba.” Mon ti reponn: “Mon pou reste.” Alor i ti ekri en let pour gouvernman Gine pour ed mwan e zot ti ed mwan.
Pa bokou letan apre, mon ti retourn kot biro brans Sera Leonn e fer bann frer ek ser konnen ki desizyon gouvernman in pran. Bann frer ek ser ti kriye avek lazwa ler zot ti tande ki mannyer Zeova in beni mon bann demars. Gouvernman ti’n donn mwan permisyon pour reste Gine!
Ler mon ti sirveyan rezyonal Sera Leonn
Depi 1978 ziska 1989, mon ti servi konman sirveyan rezyonal Gine, Sera Leonn e konman en ranplasan pour sirveyan rezyonal Liberya. O konmansman mon ti malad souvan. Sa ti arive parfwa ler mon ti dan bann landrwa izole. Me bann frer ti fer zot mye pour anmenn mwan lopital.
En fwa mon ti ganny malarya e osi lever. Sa ti fer mwan vreman malad. Ler mon ti rekipere, mon ti aprann ki bann frer ti krwar ki mon ti pou mor e zot ti pe rode kote pour anter mwan! Menm si mon ti pas dan sa bann sityasyon danzere, mon pa ti zanmen mazinen pour kit mon servis. Mon asire ki zis Bondye ki kapab donn nou sa pli bon proteksyon parski menm si nou mor i kapab resisit nou.
MWAN EK MON MADANM, NOU TI ANNAN KONFYANS DAN ZEOVA
An 1988, zour nou maryaz
An 1988, mon ti zwenn en ser ki apel Dorcas. I ti en pionye ki ti kontan Zeova en kantite e ki ti annan en kantite limilite. Nou ti marye e i ti vin mon konpanny dan mon travay konman sirveyan rezyonal. Dorcas ti travay vreman dir ansanm avek mwan e i ti pare pour fer en kantite sakrifis pour Zeova. Nou ti mars en zistans apepre 25 kilomet avek nou bann bagaz pour al vizit diferan kongregasyon. Pour nou al vizit bann kongregasyon pli lwen, nou ti pran nenport transpor ki nou ti gannyen pour voyaz lo bann semen kot i ti annan labou ek en kantite trou.
Dorcas i annan en kantite kouraz. Par egzanp, parfwa nou ti bezwen travers bann larivyer kot i ti annan en kantite krokodil. En fwa nou ti bezwen vwayaz pour senk zour e nou ti bezwen travers en larivyer dan en pti bato parski bann pon dibwa ti’n kase. Ler Dorcas ti debout pour debarke dan pti bato, i ti tonm dan delo ki ti vreman fon. Ni mwan, ni Dorcas pa ti konn naze e dan sa delo, i ti annan krokodil. Erezman bann garson ki ti la, ti sot dan delo e anmas li. Pour en pe letan, nou tou le de nou ti ganny kosmar lo sa ki ti arive me nou pa ti aret nou servis.
Nou de zanfan, Jahgift ek Eric, i vreman bann kado sorti kot Zeova
An 1992, nou ti sirprann ler nou ti aprann ki Dorcas i ansent. Eski nou ti pou kapab kontinyen dan nou servis a plen tan? Nou ti dir: “Zeova in donn nou en kado!” Alor nou ti deside pour apel nou fiy Jahgift. Kat-r-an apre ki Jahgift ti’n ne, son frer Eric ti ne. Tou le de nou zanfan i vreman bann kado ki sorti kot Zeova. Jahgift in servi pour en pe letan dan lofis tradiksyon Conakry e Eric i en serviter kongregasyon.
Menm si avek letan Dorcas ti bezwen arete konman pionye spesyal, i ti fer pionye ordiner an menm tan ki i ti pe okip nou bann zanfan. Avek led Zeova, mon ti kontinyen dan servis a plen tan. Ler nou bann zanfan ti’n gran, Dorcas ti kapab servi ankor konman en pionye spesyal. Aprezan nou tou le de nou pe servi konman misyonner Conakry.
ZEOVA I SOURS VRE SEKIRITE
Mon’n toultan al partou kot Zeova i anvoy mwan. Souvandfwa, nou de mon madanm, nou’n santi ki Zeova pe protez e beni nou. Par met nou konfyans dan Zeova olye dan keksoz materyel, nou’n evit en kantite problenm ek traka. Nou de Dorcas nou’n aprann ki vre sours sekirite i “Bondye nou sover.” (1 Kron. 16:35) Mon asire ki tou bann ki met zot konfyans dan Zeova, ‘Zeova pou protez zot dan son sak lavi.’—1 Sam. 25:29.