LO KOUVERTIR | OU KAPAB KONPRAN LABIB
Akoz nou bezwen konpran Labib?
“Labib i en vye liv ki popiler, me pa pour bann Sinwan.”—LIN, LASINN.
“Mon pa ni menm konpran sa liv sakre dan mon larelizyon Endou. Alor ki mannyer mon kapab konpran Labib?”—AMIT, LENN.
“Mon respekte Labib konman en vye liv e mon’n tande ki i sa liv ki’n vann plis, me personnelman mon pa’n zanmen vwar enn.”—YUMIKO, ZAPON.
Bokou dimoun atraver lemonn i annan en profon respe pour Labib. Par kont, zot konn en ptigin oubyen pa konn nanryen lo sa ki i annan dan Labib. Sa i leka pour plizyer milyon dimoun ki reste Lazi, me i osi vre pour bokou dimoun dan bann pei kot en kantite Labib in ganny distribye.
Me ou kapab demande, ‘Akoz mon bezwen enterese pour konpran Labib?’ Letan nou konpran mesaz ki annan dan sa liv sakre, sa pour ed nou fer sa bann keksoz swivan:
Trouv boner ek lakontantman
Fer fas avek bann problenm fanmir
Fer fas avek lenkyetid
Amelyor ou relasyon avek lezot
Byen konn servi larzan
Pran par egzanp, Yoshiko sorti Zapon. I pa ti konnen ki ti annan dan Labib, alor i ti deside pour lir pour li menm. Ki ti rezilta? I dir: “Labib in ed mwan pour annan en bi dan lavi ek lespwar pour lavenir.” I osi azoute: “Mon nepli santi mwan vid.” Amit ki’n ganny mansyonnen pli boner ti deside pour personnelman egzamin Labib. I dir: “Mon ti sirprann ki Labib i annan bann lenformasyon ki pratik pour tou dimoun.”
Labib in sertennman annan en gran lefe lo lavi plizyer milye dimoun. Akoz ou pa egzamin Labib pour ou menm e vwar ki mannyer i kapab benefisye ou?