Ed bann ki pa ankor pare pour etidye dan liv Ki Labib i dir?
1. Eski sa liv Ki Labib i dir? pou enteres tou dimoun ki nou zwenn pour premye fwa? Eksplike.
1 Pour ki en dimoun i vin en adorater Zeova, i devret aprann sa ki Labib i dir. Me, serten i dan en larelizyon ki pa Kretyen e zot pa konsider Labib konman Parol Bondye. Lezot pa krwar ditou dan Bondye e zot mank respe pour Labib. Ki bann piblikasyon ki’n vreman itil pour bann ki o konmansman pa ti pare pour aksepte sa liv Ki Labib i dir? Sa bann sizesyon ki swiv i baze lo bann komanter ki bann proklanmater in fer sorti dan 20 diferan pei.
2. Si en dimoun i dir ki i pa krwar dan Bondye, ki nou devret esey rode e akoz?
2 Bann ki pa krwar dan Bondye: Si en dimoun i dir ki i pa krwar dan Bondye, i pou pli byen pour rode akoz. Eski akoz i krwar dan evolisyon? Eski i’n perdi lafwa dan Bondye akoz lenzistis dan sa lemonn oubyen lipokrizi dan larelizyon? Eski i sorti dan en pei ki anpes dimoun krwar dan Bondye? Petet i pa kategorikman refize krwar dan legzistans Bondye, me i pa’n zanmen santi sa nesesite pour krwar dan Li. Bokou proklanmater i remarke ki ler zot demann sa kestyon, “Eski ou’n toultan santi koumsa?”, sa i motiv sa dimoun pour eksplik son rezon. Ekoute e pa enteronp li. Kan nou konpran akoz sa dimoun pa krwar dan Bondye, nou pou konnen konman pour reponn e ki piblikasyon pour ofer li.—Prov. 18:13.
3. Ki mannyer nou kapab demontre respe pour sa dimoun e son krwayans?
3 Kan ou pe reponn, vey byen ki ou evite fer sa dimoun santi ki ou pe atak son pwennvi. Sa sizesyon swivan i sorti Leta-z-ini: “I vreman enportan pour respekte liberte ki sak dimoun i annan pour deside ki zot pou krwar. Dan plas argimante pour ganny rezon, i pli bon ki nou demann bann kestyon pour fer zot reflesir e tir zot prop konklizyon.” Apre ki i’n tann en met lakour eksprim son lekor, en sirveyan rezyonal i souvan konmans son larepons par demann sa kestyon, “Eski ou’n deza konsider sa konman en posibilite?”
4. Ki mannyer nou kapab ed bann Boudis?
4 Bokou Boudis pa familye avek sa konsep konsernan en Bondye. Serten proklanmater Langleter i kontan servi sa brosir Lasting Peace and Happiness—How to Find Them kan zot pe rann temwannyaz avek sa bann dimoun. Apre ki zot in egzamin son lentrodiksyon, zot diskit lo sa seksyon “Is There Really a Most High Creator?” e apre sa seksyon “A Guidebook for the Blessing of All Mankind.” Apre sa, zot kapab entrodwir sa liv Ki Labib i dir? avek sa met lakour e dir: “Menm si ou pa krwar dan Bondye, me si ou etidye Labib ou pou vwar li itil akoz i annan bokou gidans pratik.” En pionye Leta-z-ini ki pe servi dan en teritwar Sinwan ti dir: “Bokou dan nou teritwar i kontan lir. Souvan zot in fini lir sa piblikasyon an antye avan ki nou retournen. Me zot pa vreman konpran ki savedir en letid Labib. Alor, mon plifere ofer sa brosir Bon Nouvel lo premye vizit akoz i’n ganny fer dan en fason pour kapab konmans en diskisyon.” En sirveyan rezyonal ki pe servi dan en rezyon kot zot koz Sinwan, Leta-z-ini, i dir ki i posib pour entrodwir sa liv Ki Labib i dir? lo premye vizit. Me selman, i kapab pli byen pour konmans letid dan sapit 2 kot i entrodwir Labib olye sapit 1 ki koz lo Bondye.
5. Akoz annan pasyans i enportan?
5 I pran letan pour en dimoun devlop lafwa dan Bondye, alor i enportan pour demontre pasyans. I kapab pa posib pour fer en dimoun aksepte ki Bondye i egziste lo premye vizit. Me petet avek letan i pou aksepte ki i kapab posib pour krwar dan en Kreater oubyen i kapab dir ki i konpran akoz en dimoun i kapab tonm lo sa konklizyon.
6. Akoz ki serten dimoun napa lentere dan Labib?
6 Bann ki napa lentere oubyen konfyans dan Labib: Souvandfwa, en dimoun ki aksepte ki Bondye i kapab egziste i pa vreman enterese dan sa ki Labib i ansennyen akoz i pa krwar ki i Parol Bondye. Petet akoz i reste dan en landrwa kot laplipar dimoun pa Kretyen e zot asosye Labib avek bann legliz Kretyen, oubyen i kapab pe reste dan en landrwa kot laplipar dimoun i swadizan kretyen me zot konsantre zis lo bann keksoz materyel e sa dimoun i kapab krwar ki Labib pa itil pour li. Ki mannyer nou kapab ed sa bann dimoun pour devlop lentere dan Labib e aksepte en letid dan liv Ki Labib i dir?
7. Ki sa bon fason pour stimil lentere pour Labib?
7 Biro brans Lagres ti ekrir: “Sa pli bon fason pour ed sa bann ki napa lentere dan Labib se senpleman ouver Labib e montre zot ki i dir. Bokou proklanmater in remark lefe ki mesaz Labib i fer dan leker en dimoun ki i pli pwisan ki sa ki zot ti a kapab dir. (Ebr. 4:12) Ler dimoun i vwar non Bondye dan Labib sa i ed zot pour devlop en dezir pour egzamin Labib o profon.” Biro brans Lenn ti ekrir : “Laverite konsernan lavi ek lanmor in vreman enteres bokou Endou, enkli promes Labib konsernan en lemonn san diskriminasyon.” Ler zot koz lo bann nouvel lokal ki pe trakas dimoun, bann proklanmater i souvandfwa ganny loportinite pour montre ki Labib i dir lo fason ki Rwayonm Bondye pou rektifye sa bann problenm.
8. Ki nou ti kapab dir avek bann ki annan en pwennvi negatif lo Labib akoz bann legliz Kretyen?
8 Si en dimoun i annan en pwennvi negatif konsernan Labib akoz bann legliz Kretyen, fer li konnen ki bann legliz Kretyen in mal reprezant Labib ek son bann lansennyman. Biro brans Lenn ti ekrir: “Parfwa, nou bezwen ed dimoun pour vwar ki bann legliz pa’n promot Labib.” Zot in dir ki bann Endou i souvan enpresyonnen avek seksyon 4 dan sa brosir What Is the Purpose of Life? How Can You Find It?, ki eksplike konman bann legliz in esey diminyen valer e detri Parol Bondye. En pionye sorti Brezil i dir avek bann dimoun: “Akoz zot pa esey rod plis lo sa ki i annan dan Labib? Bokou dimoun pe fer sa avek en lespri ouver san afilye zot avek okenn larelizyon. Ou kapab etonnen par sa ki ou pou aprann.”
9. Akoz nou pa devret dekouraze si en dimoun pa deswit montre lentere dan sa ki Labib i dir?
9 Zeova i egzamin leker sak dimoun. (1 Sam. 16:7; Prov. 21:2) I pe atir bann ki annan en bon kondisyon leker ver vre ladorasyon. (Zan 6:44) Bokou sa bann dimoun pa ti zanmen ganny ansennyen konsernan Bondye oubyen zot ti napa bokou loportinite pour lir Labib. Nou predikasyon i donn zot en sans pour “ganny sove e ganny konnesans laverite.” (1 Tim. 2:4) Alor, si serten pa deswit enterese avek sa ki Labib i dir pa bezwen dekouraze! Servi enn parmi bann piblikasyon ki disponib dan ou langaz pour evey zot lentere. Avek letan, ou pou kapab fer en diskisyon baze lo sa liv Ki Labib i vreman dir? pour konmans en letid.
[Bwat lo paz 4]
Si sa met lakour i dir i pa krwar dan Bondye, esey sa:
• Pour konnen akoz, demande, “Eski ou’n toultan santi koumsa?”
• Si i en Boudis, servi sa brosir Lasting Peace and Happiness—How to Find Them, paz 9-12.
• Si i krwar dan evolisyon, sa bann referans pou kapab ed li:
Sa seri lartik “Was It Designed?” dan Awake!
Sa video The Wonders of Creation Reveal God’s Glory
Seksyon 4 dan sa brosir A Satisfying Life—How to Attain It; brosir Was Life Created? ek The Origin of Life—Five Questions Worth Asking
• Si i’n perdi lafwa dan Bondye akoz lenzistis ek soufrans, sa bann referans pou kapab ed li:
Sapit 10 dan sa liv Is There a Creator Who Cares About You?
Sizyenm parti dan brosir Does God Really Care About Us? ek seksyon 6 dan brosir What Is the Purpose of Life?
• Al dan liv Ki Labib i dir? dek ki i aksepte sa nide ki Bondye i egziste. I ti a byen konmans avek sapit 2 oubyen en lot size ki apropriye pour sa met lakour.
[Bwat lo paz 5]
Si sa met lakour pa krwar dan Labib, esey sa:
• Egzamin sapit 17 ek 18 dan liv Life—How Did It Get Here? By Evolution or by Creation?
• Pour bann Endou, servi sa brosir Why Should We Worship God in Love and Truth?
• Pour bann Zwif, servi sa brosir Will There Ever Be a World Without War?, paz 3-11.
• Diskit lo byenfe ki nou gannyen ler nou swiv bann prensip Labib. Bann piblikasyon ki nou kapab servi pour montre bann valer pratik dan Labib i:
Sa seri lartik “Help for the Family” dan Awake!
Sa video The Bible—Its Power in Your Life
Leson 9 ek 11 dan brosir Bon nouvel sorti kot Bondye!; paz 22-26 dan brosir A Book for All People ek seksyon 2 dan brosir A Satisfying Life—How to Attain It
Pour bann Boudis, servi sa brosir The Pathway to Peace and Happiness, paz 3-7.
Pour bann Mizilman, servi sa brosir Real Faith—Your Key to a Happy Life, seksyon 3.
Si ou pe pres dan en landrwa kot bann dimoun i kont Labib, i kapab pli bon pour pa mansyonn sa mo Labib ziska ki ou’n fer detrwa vizit.
• Eksplike ki mannyer bann profesi Labib in vin vre. Bann piblikasyon ou kapab servi i:
Sa video The Bible—Accurate History, Reliable Prophecy
Sa brosir A Book for All People, paz 27-29
• Al dan liv Labib i dir? dek ki sa dimoun i demann sa ki Labib i ansennyen lo nenport topik.
[Bwat lo paz 6]
Si en dimoun i dir: “Mon pa krwar dan Bondye,” ou kapab dir:
• “Eski mon kapab eksplik ou kwa ki’n konvenk mwan pour krwar dan en Kreater?” Apre sa, diskit bann pwen dan liv Reasoning paz 84-86 an Angle e paz 72-74 an Franse oubyen fer laranzman pour anmenn en piblikasyon ki ou’n lir.
• “Me si i annan en Bondye, ki mannyer ou ti pou kontan i ete?” Laplipar bann met lakour i dir ki zot ti pou ganny atire par en Bondye lanmour, lazistis, mizerikord e ki pa fer lapliferans. Apre sa montre li dan Labib ki Bondye i annan sa bann kalite. (I kapab posib pour konmans avek paragraf 6 dan sapit 1 dan liv Labib i dir?)
Si en dimoun i dir: “Mon pa krwar dan Labib,” ou kapab dir:
• “I annan bokou dimoun ki santi koumsa. Serten i dir ki Labib pa annakor avek lasyans oubyen son bann standar i pa pratik. Eski ou’n deza lir Labib? [Les sa dimoun reponn. Apre montre li sa lentrodiksyon lo paz 3 dan brosir A Book for All People e ofer li sa brosir.] Bokou i mank respe pour Labib akoz larelizyon in mal reprezant son lansennyman. En lot fwa mon ti pou kontan diskit lo sa legzanp lo paz 4 ek 5.”
• “Bokou dimoun in annan menm pwennvi. Eski mon kapab montre ou kwa ki enpresyonn mwan avek Labib? [Lir Zob 26:7 ouswa Izai 40:22 ki montre ki Labib i annakor avek lasyans.] Labib i osi annan bann konsey saz pour ed bann fanmir. En lot fwa mon ti pou kontan montre ou en legzanp.”
• “Mersi pour dir mwan sa. Si Bondye ti ekrir en liv pour bann imen, ki ou panse ti pou annan ladan?” Apre, montre sa dimoun en verse dan Labib ki annakor avek son komanter.