Kote ou kapab vwar bann bon konsey ki pou ed ou annan en meyer lavenir?

Parey nou’n vwar dan bann lartik avan, dimoun in esey met zot konfyans dan bann keksoz parey desten, ledikasyon, larises e esey vin en bon dimoun pour zot kapab ganny en meyer lavenir. Par kont, sa bann keksoz pa neseserman garanti en meyer lavenir. Me eski sa i vedir ki napa okenn keksoz ki kapab ed nou pour annan en meyer lavenir? Non!

KONSEY SORTI KOT SA ENN KI PLI SAZ

Ler nou pe fer desizyon, normalman nou rod konsey avek en dimoun ki pli aze e pli saz ki nou. Pareyman, nou kapab trouv bann bon konsey pour nou lavenir sorti kot sa Enn ki pli ansyen e bokou pli saz ki nou. Nou kapab trouv Son bann konsey dan Lekritir Sen ki osi apel Labib. Labib ti konmans ganny ekri apepre 3,500 an pase.

Akoz nou kapab annan konfyans dan Labib? Akoz Labib i sorti kot sa Personnaz ki pli ansyen e pli saz dan liniver. Sa Personnaz i ganny dekrir konman “Ansyen bann zour” ki egziste “depi touzour e pour touzour.” (Danyel 7:9, NWT; Psonm 90:2) I “Kreater lesyel, sa vre Bondye, sa Enn ki’n form e fer later.” (Izai 45:18) I dir nou son non i Zeova.—Psonm 83:18.

Vi ki Labib i sorti kot sa Enn ki’n kree tou imen, i pa konsider en kiltir oubyen en ras pli enportan ki en lot. Son konsey i toultan marse e bokou dimoun dan plizyer pei in ganny bokou byenfe ler zot in aplik sa bann konsey. Labib i disponib dan plizyer langaz e i’n ganny distribye plis ki okenn lezot liv.a Sa i vedir ki dimoun partou lo later i kapab lir Labib e zot kapab benefisye avek son bann konsey. Sa i annakor avek sa ki Labib i dir:

“Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.”—AKT 10:34, 35.

Zis parey bann paran i kontan e pare pour ed zot zanfan, Zeova Bondye i en Papa lanmour ki ofer nou son led atraver son Parol, Labib. (2 Timote 3:16) Nou kapab annan konfyans dan son Parol akoz Li ki’n kree nou e i konnen kwa ki pou fer nou ere.

NOU KAPAB ANNAN KONFYANS DAN LABIB

Nou kapab annan konfyans dan sa ki Labib i dir konsernan lavenir akoz ozordi nou pe vwar bann keksoz ki pe arive ki Labib ti predir apepre 2,000 an pase.

SA KI LABIB TI DIR POU ARIVE

“Nasyon pou lager kont nasyon e rwayonm kont rwayonm. I pou annan bann gran tranblemandter, i pou annan mankman manze ek lepidemi dan en landrwa apre lot.”—LIK 21:10, 11.

SA KI LABIB TI DIR LO KONPORTMAN IMEN

“Bann dernyen zour pou en letan vreman difisil. Parski dimoun pou egois, kontan larzan, vantar, arogan, zot pou koz an mal lo Bondye, zot pou dezobeisan anver zot paran, zot pa pou rekonesan e zot pa pou fidel. Zot pou napa lanmour pour kanmarad, zot pa pou tonm dakor avek kanmarad, zot pou malparl lezot, zot pou napa en kontrol lo zot lekor, zot pou kriyel, zot pa pou kontan sa ki byen, zot pou tret, antete, orgeye, kontan plezir plito ki kontan Bondye.”—2 TIMOTE 3:1-4.

Ki ou pou dir ler ou vwar ki depi byen lontan, Labib in predir egzakteman sa ki pe arive ozordi? San dout ou pou dakor avek sa ki Leung, en msye sorti Hong Kong i dir: “Bann profesi dan Labib in ganny ekrir depi byen lontan. I enposib pour en imen predir sa bann keksoz dan en fason sitan egzakt. Labib i bezwen sorti kot en personnaz ki bokou pli saz ki nou.”

Dan Labib i annan plizyer santenn profesi ki’n ganny akonpli.b Sa i prouve ki Labib i vreman Parol Bondye. Zeova i dir: “Mwan mon Bondye e napa . . . personn parey mwan; Depi o konmansman, mon predir konklizyon.” (Izai 46:9, 10, NWT) Alor nou kapab depan lo sa ki Labib i dir konsernan lavenir.

BANN KONSEY KI POU ED OU LA KONMELA E POUR TOUZOUR

Ler ou swiv konsey ki ganny trouve dan Labib, ou pou ganny bokou byenfe. Annou vwar serten legzanp.

EN BON PWENNVI LO LARZAN EK TRAVAY

“Pli vomye en pe repo ki en kantite travay dir, akoz sa i parey tay deryer divan.”—EKLEZYAST 4:6, NWT.

LAVI FANMIR

“Sakenn ant zot i devret kontan son madanm parey i kontan son lekor e en madanm li, i devret annan en gran respe pour son msye.”—EFEZYEN 5:33.

EN BON RELASYON AVEK LEZOT

“Aret ankoler e rezet firer, pa bezwen ankoler ziska ki ou fer sa ki mal.”—PSONM 37:8, NWT.

Si ou obei sa ki Labib i dir, ou pou annan en bon lavi la konmela e en lavenir ere. Dan Labib nou vwar promes Bondye konsernan en lavenir merveye ki enkli

LAPE EK SEKIRITE

“Zot pou trouv bokou plezir dan labondans lape.”—PSONM 37:11, NWT.

LAKAZ EK MANZE POUR TOU DIMOUN

“Zot pou konstri lakaz e zot pou reste ladan. Zot pou plant pye rezen e zot pou manz son fri.”—IZAI 65:21, NWT.

PERSONN PA POU MALAD OUBYEN MOR

“I pou nepli annan ni lanmor, ni dey, ni leokri, ni douler ankor.”—REVELASYON 21:4.

Ki ou bezwen fer pour ou ganny sa kalite lavenir? Annou vwar sa lot lartik.

a Pour plis detay konsernan tradiksyon ek distribisyon Labib, al lo www.jw.org e get anba BIBLE TEACHINGS > HISTORY & THE BIBLE.

b Pour plis detay vwar sapit 9 dan sa liv The Bible—God’s Word or Man’s? pibliye par Temwen Zeova. I disponib lo Enternet, lo www.jw.org. Get anba LIBRARY > BOOKS & BROCHURES.