¿Siniaˈ Jlamtis janoyeˈaˈm tˈeti ja toˈm iliaˈm na inlaye?

Siniaˈ Jlamtis isiul apeˈe

Jiyi. Dios jijliakˈali yiˈne siunapo jikawos ti itsˈiuye seki ti jiliaye poyeta. Siniaˈ Jlamtis ijwiˈil apeˈe napoka ti Jiowa janˈyenaˈaseˈm ti inlayeyiˈaseˈm ti jleˈajowetˈe (Salmo 41:3). Poˈ niwa najape siuniwa janoyeˈaˈm ti jlaj jikieye na siliaye, kiak niwonayi pet:

1. ˈAjle na Siniaˈ ti janoyeˈaˈm ti ja toˈm iliaˈm. “Siunie inkamankiye (tajle na Siniaˈ), ti lajkˈipa ka ijnojliji, ti ˈyakaˈm apeˈe ni siunie iyo ni iˈnioˈ ti ˈyijeˈen” janoyetsˈeˈm ti ja ikajmak seki janwo sijweyejaˈ ti ja kinie sitieyiji (Filipenses 4:6, 7).

2. Ja ka aleyi ti janiˈnet ti atankiujnieyejes ti isis yeta. Siniaˈ Jlamtis iyoˈate: “siuti ˈotale ja inkˈajni janwo ˈate jana inkakie, jlampet ti je inkˈajni jeˈ iyo ajweyejaˈ” (Proverbios 17:22). Ti inkˈajni seki ja esie pa ka wo siuti ja ajalas ja akalakijieˈn seki jaskiˈni pet.

3. Japoye japa jikiujwen kiyeˈe. Ti je kas tsˈesni, siojona akiukin kiyeˈe niwa jlomas ti naˈam sitieyiji, ja inkˈajni pet ti jitienkiuniape (Romanos 12:12). Siniaˈ Jlamtis ijwiˈil ti jane kisieˈe ti japoye na jloma ti ja lajakˈi pa ti janwo ˈate “jeˈ tsˈesni” (Isaías 33:24). Dios jantejwkˈiˈni pajlat niwa inlayejes ti jlaj jikieye. Dios iyo ˈate japoye na jloma ti ja ke iyok kijilasˈye, kepa Siniaˈ Jlamtis ijwiˈil ti tajwes janapili ti jijweye janwo ˈate napo jwemik (Job 33:25).

Nota: Siunapo ijwiˈil na Jiowa jitiej iyoma ti Dios janoyeje seki ti je kas tsˈesni kiak iyo awokˈijiˈn napo inkakie jiwos ti kanoyetsˈeˈm pet (Marcos 2:17). Ja ke ijwilajam pa ka iniwone, ja jlama jlaˈam ka yejniˈjin pa ka janiwone na tˈajwes ti je ˈesni.