KHENPI 2
Khat Le Khat Tung Citak Un
“Pasian’ gawmsa mite, kuamah in khen kei ta hen.”—Marka 10:9
Jehovah in “itna kip nei tawntung” dingin hong deih hi. (Mikah 6:8) Hih thu pen no nupa ading thupi mahmah a, ba’hang hiam cih leh itna kip i neih kei leh lungmuanna om thei lo hi. Lungmuanna in itna a khantoh nadinga a kisam mahmah khat hi.
Tu hunah nupa kikala itna kip pen simna thuak hi. Nupa sung kidal nading nangh thu nih khensat a, na sep ding kul hi.
1 NA INNKUANPIH THUPI NGAIHSUT MASA IN
LAI SIANGTHO GENNA: “A hoih pen na teeltheih nading uh hi.”(Filippi 1:9) Na innkuan pen na nuntakna-ah a thupi pen nate lakpan khat ahi hi. Tua ahih manin na innkuanpih na thupi ngaihsut masak ding kul hi.
Jehovah in na innkuanpih kin a, amah tawh “a nuam theithei-in” na nuntak khop ding deih hi. (Thuhilhna 9:9) Na innkuanpih pampaih loin khatlekhat na kilungnopsak theih nading lampi na zon ding uh Pasian in kician takin gen hi. (1 Korin 10:24) Nang ading na innkuanpih manpha in kisam hi cih amah theisak in.
NA SEP THEIH DING:
Hunpia-in na innkuanpih tawh kiho den in. Na semkhawm unla limtakin don in
“Kei” cih sangin “Ei” ci-in ngaihsun in
2 NA LUNGSIM KEMCING IN
LAI SIANGTHO GENNA: “Mawhpih nopna lungsim tawh numei khat a en mi peuhmah in a lungsimah tua numei tawh a mawh ahi hi.” (Matthai 5:28) Mi khat peuhpeuh in gamtatsiatna a ngaih sutsut leh a lungsim sungah a innkuanpih tungah cihtakna a neilo mi ahi hi.
Jehovah in “na lungsim kem in” ci-in na gen hi. (Paunak 4:23; Jeremiah 17:9) Na lungsim na kep nading na mit na kidop kul hi. (Matthai 5:29, 30) Nungak khat lunggulhna tawh cikmah hunin a et khak loh nading kamciam a bawl tanglai pu Job ii gamtatzia na etteh in. (Job 31:1) Numei paktat pasal paktatte lim le laibu cikmah hunin na et khak loh ding khentat in. Tua khit teh na innkuanpih ahi lo mi dang tawh lawm ngaihna hong piang thei na khempeuh na pelh ding khensat in.
NA SEP THEIH DING:
Innkuanpih tungah na cihtak lam midangte theisak in
Innkuanpih ii lungsim ngaihsut pih in, innkuanpih ahi lo midang tawh na kikholhna na zi ahih kei leh na pasal in a lungnop kei leh tua na kikholhna manlang takin khawl in