KHENPI 1
A Lungnuam Nupa Suak Nading Pasian Muang In
“A kipat cil-in a Piangsak pa in numei le pasal a bawl hi.”—Matthai 19:4
Jehovaha Pasian in a masa pen nupa kitenna na bawl hi. Amah in numei masa bawlin “mipa kiangah tua nu a paipih hi” ci-in Lai Siangtho in hong gen hi. Adam pen lungdam lua ahih manin: “Tu petpetin hih pen keima guhte le keima sate ahi hi” ci hi. (Piancilna 2:22, 23) Jehovah in tu ciang dong a kiteng nupate na lungnuamsak nuam hi.
Pasal ahih kei leh zi na neih ciang na khempeuh kitangcing khin dingin um thei kha ni teh. Aman takin gen leng, khat le khat a ki-it nupate zong buaina nei uh hi. (1 Korin 7:28) Hih laibu-ah Lai Siangtho lamlahnate na mu ding a, tuate na zuih leh na innkuan le no nupa hong lungnuamsak ding hi.—Late 19:8-11.
1 JEHOVAH HONG PIAK PANMUN LA IN
LAI SIANGTHO GENNA: Pasal in innkuan lutang hi.—Efesa 5:23.
Nang pen zi nei pasal na hih leh, na zi nem takin na don ding Jehovah in lamen hi. (1 Peter 3:7) Pasian in numei pen nang hong huh dingin bawl a, amah zahtak bawl ding le na it ding deih hi. (Piancilna 2:18) Nang ading sang na zi phattuam nading na thupisak zawk dongin na zi na it mahmah kul hi.—Efesa 5:25-29.
Nang pen pasal a nei zi na hih leh, Jehovah in na pasal na zahtak mahmah ding le ama panmun kicing taka na huh ding lamen hi. (1 Korin 11:3; Efesa 5:33) Na pasal khensatnate thukimpih inla lungsim khempeuh tawh na panpih in. (Kolose 3:18) Tua bangin na sep leh na pasal le Jehovah mai-ah a etlawm numei na hi ding hi.—1 Peter 3:1-6.
NA SEP THEIH DING:
Zi hoih ahih kei leh pasal hoih koi ci piang thei ding cih na innkuanpih kiang dong in. A thu gen limtakin ngai inla tua banga na sep theih na’ng hanciam in
Lungduai in. Na nupa un hun kipia a, khat le khat koici kilungnopsak thei ding cih na theih nading hanciam un
2 NA LAWM LUNGSIM TATZIA LIMTAKIN DON IN
LAI SIANGTHO GENNA: Na innkuanpih ii kisapnate na vil kul hi. (Filippi 2:3, 4) Na lawm thupi ngaihsut inla Jehovah in ama mite “mi khempeuh tungah lungsim nem” dingin deih hi cih na phawk in. (2 Timoti 2:24) Ngaihsun lo-a kampauna in tem hiam bangin mi liamsak thei a, mipilte’ kampauna in tua bang liamna damsak thei hi.” Tua hi a, na kampau ding limtaka na teel kul hi. (Paunak 12:18) Jehovah’ kha siangtho in it takin le hehpih taka na kampau theih na’ng hong huh ding hi.—Galati 5:22, 23; Kolose 4:6.
NA SEP THEIH DING:
Innkuanpih tawh a thupi thute na kikup ma-in lungsim daih nading le lungsim picin nading thungen in
Bang gen ding, bangci gen ding cih hoih takin ngaihsun in
3 KIPAWL KHAT BANGIN NGAIHSUN IN
LAI SIANGTHO GENNA: Na kiten’ khit uh ciang nang pen na lawm tawh “pumkhat” nasuak uh hi. (Matthai 19:5) Ahih hang note pen nih mah na hi lai uh a, muhdan zong kibang lo thei ding hi. Tua hi a, na ngaihsutna uh le lungsim pai ziate kithutuak nading na sin kul hi. (Filippi 2:2) Kithutuakna pen thu i khensat ciang na thupi mahmah hi. Lai Siangtho in: “Hoihtakin geelna tawh nasepna tangtung hi” ci hi. (Paunak 20:18) Lai Siangtho thubulte kilamlaksak lecin, a thupi khensatnate bawlkhawm thei ding hi uh teh.—Paunak 8:32, 33.
NA SEP THEIH DING:
Innkuanpih kiang na haksatnate le na muhnate bek gen kei in, na lungsima na thuakte zong gen in
Thu khat peuhpeuh na khensat ma hoih takin innkuanpih tawh kikum un
a Pasian min pen Jehovah hi ci-in Lai Siangtho in gen hi.