Kitenna —Pasian Hong Piak Letsong

1, 2. (a) A kiteng cil nupa kopte in bang lamen uh hiam? (b) Hih khenpi sungah bang dotnate kikum ding ihi hiam?

MOPAWI-A mopa le monu lungnuam mahmaha a om laitak uh na mitkha tawh bawl in. Mailam hun ding a ngaihsut uh ciang, lametna le geelna tampi nei ahih manun lawp mahmah uh hi. A nupa-un khantawna lungnuam dingin lamen uh hi.

² Ahih hang, nupa a tamzaw pen a kiten tungin nuamsa mahmah hi napi, tua bangin nuamsa tawntung lo uh hi. Khantawna a lungnuam nupa a suah nading Pasian lamlahna kisam hi. Kitenna pan a kingah phattuamna pawlkhat in bang a hiam? Zi nei, pasal nei ding na hihleh na tenpih ding koi bangin teel ding na hiam? Zi hoih, pasal hoih koi bangin hithei ding na hiam? Kitenna a kip nading bang in hong huh thei ding a hiam? Hih dotnate tawh kisai Lai Siangtho in a dawnna thu kikum ni.—Paunak 3:5, 6 sim in.

ZI NEI DING, PASAL NEI DING KA HIAM?

3. Mi khat in lungnopna a neih nadingin zileta neih a kul hiam? Hilhcian in.

³ Mi pawlkhat in zi nei, pasal nei kei leng lungnopna om lo dingin ngaihsun uh hi. Tua pen man lo hi. Jesuh in tanggawla omna pen thupha khatin gen hi. (Matthai 19:11, 12) Sawltak Paul in zong tanggawla omna pen phattuamna om hi ci-in gen hi. (1 Korin 7:32-38) Zileta neih ding le neih loh ding pen eima’ teel ding ahi hi. Lawm le gualte, innkuanpihte le ngeinate hangin zileta neih ding hi lo hi.

4. Kitenna ii a phattuamna pawlkhat in bang a hiam?

⁴ Kitenna pen Pasian hong piak letsong hi a, phattuamna pawlkhat zong om hi, ci-in Lai Siangtho in gen hi. Jehovah in mihing masa, “[Adam] amah guak a om ding hoih lo hi. Ama ading a kituak a huh ding ka bawlsak ding hi,” ci hi. (Piancilna 2:18) Jehovah in Adam’ zi dingin Eve bawl a, a masa pen mihing innkuan hong suak hi. Ta a nei nupate in a tate uh hoih taka a khankhiat theih nading a nuam mahmah innkuan a suahsak ding uh kisam hi. Ahih hang kitenna ii ngimna pen ta neih ding bek hi lo hi.—Late 127:3; Efesa 6:1-4.

5, 6. Kitenna khat pen koi bangin “zang thum a kiheek khauhual” hong suak thei a hiam?

⁵ Kumpi Solomon in: “Mi khat sangin mi nih hoihzaw hi; amau’ sepna thaman a tamzaw ngah uh hi. Bang hang hiam cih leh khat cimawh leh a khat in huh a, mi khat guak pen cimawh zenzen leh a huh ding om lo ahih manin a dahhuai pha mahmah ahi hi. . . . Zang thum a kiheek khauhual bawhsat hak hi,” ci hi.—Thuhilhna 4:9-12.

⁶ Kitenna in a kipanpih, a kihehnem le a kihun khawm mi nihte’ kikalah a ki-it pen lawmta suaksak thei hi. Itna in kitenna kipsak thei a, a nupa-un Jehovah bia hileh a kitenna uh kip semsem ding hi. Tua ciangin innkuan pen “zang thum a kiheek khauhual” bangin kho mahmah ding hi. Tua khau pen zang nih a kiheek khauhual sang khozaw hi. Innkuan sungah Jehovah kihelsak leng hong kipzaw sem ding hi.

7, 8. Zi neih, pasal neih ding tawh kisai Paul in bang hong theisak a hiam?

⁷ Numei le pasal a kiten khit ciang, lumkhawmin cilesa lunggulhna bangin om thei ding uh hi. (Paunak 5:18) Ahih hang mi khat in cilesa lunggulhna hang bek tawh zi nei, pasal nei ahihleh, a tenpih ding pilvang takin teel thei lo ding hi. Tua ahih manin Lai Siangtho in “nungakpi,” ahih kei leh cilesa lunggulhna a nasiat hun a kheng khinte bek in zi neih, pasal neih ding kilawm hi ci-in gen hi. (1 Korin 7:36, ZSV) Tua bang lunggulhnate a kiam ciang dong ngak phot leh hoihzaw hi. Tua hun ciang hoih takin ngaihsun thei ding a, a tenpih ding zong hoih takin a teel theizaw ding hi.—1 Korin 7:9; James 1:15.

⁸ Zi neih, pasal neih ding a ngaihsun na hih leh a piang thei thute san siam ding kisam a, innkuan sungah buaina le haksatnate piang thei ahihlam phawk in. Sawltak Paul in “zi nei, pasal neite in leitung lungkhamna tampi thuak” ding hi ci hi. (1 Korin 7:28) Innkuan nuam nangawnah zong a haksat hun om thei zel hi. Tua ahih manin zi neih, pasal neih ding khensat na hihleh na tenpih ding pilvang takin teel in.

KUA TENPIH DING KA HIAM?

9, 10. Jehovah a bia lo mi khat tenpih leng bang piang thei a hiam?

⁹ Zi ding, pasal ding i zon ciang: “Thu-umlo mite tawh a kituaklo hakkol puakhawm kei un,” cih Lai Siangtho thubul i phawk den ding thupi hi. (2 Korin 6:14, ZIV) Hih gentehna in lokhawh nasepna a kibulphuh ahi hi. Lokhopa in gan kap a kituak lote le thatang a kikim lo ganhing nih pen hakkol bulhin lo kaisak lo hi. Lokhopa in tua bangin hakkol bulhin hileh a gante a nihin gimtuak ding uh hi. Tua mah bangin Jehovah a bia mikhat le a bia lo mikhat kiteng hileh a innkuan sungah buaina tampi hong piang thei hi. Tua ahih manin Lai Siangtho in “thu um mi bek tenpih ding hi,” ci-in hong gen hi.—1 Korin 7:39.

¹⁰ Khat veivei, Khristian pawlkhat in khat guak lungzuanga om sangin Jehovah a bia lo mi khat peuhpeuh tenpih leng hoihzaw ding hi, ci-in ngaihsun uh hi. Ahih hang Lai Siangtho lamlahna thusim lo ihih leh lungsim natna le lunggimnate i thuak ding hi. Jehovah a bia mite adingin Jehovah’ biakna pen nuntakna-ah a thupi pen ahi hi. Na zi ahih kei leh na pasal tawh nuntakna-a a thupi pen nate hih khawm thei kei lecin na lungsim bangci ding hiam? Mi tampi in Jehovah a it lo, a bia lo mite tawh kiten sangin tanggawla om ding khensatzaw uh hi.—Late 32:8 sim in.

11. Tenpih ding zi hoih, pasal hoih koi bangin teel thei ding na hiam?

¹¹ Jehovah a bia mi khat ahihna bek tawh zi hoih, pasal hoih hi pah cihna hi lo hi. Zi nei, pasal nei dinga geel na hih leh na it takpi ding, na kilempih theih dingte bek teel in. Na deih dan kibatpih le Jehovah deihna a thupisak mi na muh mateng ngak hithiat in. Innkuan tawh kisai lamlahna hoihte, a pil a citak nasem in a hong vaihawmsak laibute-ah hun pia-a simin, limtakin ngaihsun in.—Late 119:105 sim in.

12. Nu le pate’ vaihawmsak zi ding, pasal ding zonna tawh kisai Lai Siangtho pan bang sin thei i hiam?

¹² Ngeina pawlkhatah, nu le pate in a tate ading zi le pasal zonsak uh hi. A tate’ tenpih ding zi hoih, pasal hoih pen nu le pate in thei hi ci-in ngaihsun uh hi. Lai Siangtho hun lai-in zong hih bang ngeina na om hi. Tua bang ngeina na innkuan sungah zang ding na hih uhleh a kisam lamlahnate nu le pate in a theih nading Lai Siangtho in huh thei hi. Gentehna, Abraham in a tapa Isaac’ zi ding a zonsak ciang, sumlepai le nuntakzia a thupi penin koih lo a, Jehovah a it numei bek na teelsak zaw hi.—Piancilna 24:3, 67; Ciaptehna 25 en in.

ZI NEI, PASAL NEI DINGIN KOI BANGIN KITHAWIKHOL THEI KA HIAM?

13-15. (a) Mi khat in pasal hoih ahih nading koi bangin kithawikhol thei a hiam? (b) Numei khat in zi hoih a hih nading koi bangin kithawikhol thei a hiam?

¹³ Zi neih, pasal neih ding ngaihsun na hih leh kithawikholsa-a na om kul hi. A kithawikholsa-in om ing, ci-a kingaihsun zong na hithei hi. Ahih hang zi nei, pasal nei dinga kithawikhol cih in bang a cihnopna hiam cih kikum ni. Hih i kikupna pan na theih thute hangin lamdang sa ni teh.

¹⁴ Lai Siangtho in innkuan sungah zi le pasalte ii panmun a kibat lohna hong lak hi. Tua ahih manin mi khat zi nei, pasal nei dinga kithawikholsa-a om i cih ciang pasal maw, numei maw cih tungtawnin panmun kibang lo hi. Zi neih ding a ngaihsun pasal khat in innkuan lutang hi dingin ka kicing ta hiam ci-in a kidot ding kisam hi. Pasal in a zi le a tate’ pumpi lam le lungsim lamah kem a, a vak ding Jehovah in lamen hi. A thupi pen in biakna lamah a innkuanpihte a makaih ding kisam hi. A innkuan a don lo, a vak lo mi pen “thu um lo mite sangin siazaw lai hi,” ci-in Lai Siangtho in gen hi. (1 Timoti 5:8) Tua ahih manin zi neih ding na ngaihsut leh: “Na nuntakna ding zong masa inla, na an nek ding a kicin ciang bekin na inn ding lamin zi le ta nei pan in,” cih Lai Siangtho thubul na nuntakpih theih dan ngaihsun in. Thu dangin gen leng, zi le ta na neih ma-in, Jehovah in pasal khat tunga a lamette na cin lam kiciansak in.—Paunak 24:27.

¹⁵ Pasal neih ding a ngaihsun numei khat in zong, zi le nu’ panmun ka len zo ding hiam cih a kidot ding kisam hi. A pasal le a tate thudon a, a kep dan ding pawlkhat Lai Siangtho-ah kigelh hi. (Paunak 31:10-31) Tu-lai mite in, a zi ahih kei leh a pasal in amau tungah a bawlsak dingte bek ngaihsun uh hi. Ahih hang Jehovah in i zi ahih kei leh i pasal tungah i bawl theih ding nate i ngaihsut zawk ding a deih hi.

16, 17. Zi neih, pasal neih ding ngaihsun na hih leh bangteng limtaka na ngaihsut ding kisam a hiam?

¹⁶ Zi ahih kei leh pasal na neih ma-in, zite le pasalte tawh kisai Jehovah in bang gen hiam cih ngaihsun in. Innkuan lutang cih pen pumpi lam hitaleh, lungsim lam hitaleh zawhthawh bawl thei cihna hi lo hi. Innkuan a makaih siam pasal in, ama kepcinna nuai-a omte tungah a tawntunga itna le hehpihna a nei Jesuh a etteh hi. (Efesa 5:23) Zi in zong, a pasal’ khensatnate panpihna le thukimpihna in bang a cihnopna hiam cih a ngaihsut ding kisam hi. (Rom 7:2) A cingtaak lo pasalte’ makaihna thukimpihin ka zui zo ding hiam ci-in a kidot ding kisam hi. Amah in thukimpih zo kei ning ci-a a kingaihsut leh tawlkhat sung tanggawla om ding hoihzaw hi ci-in khensat thei hi.

¹⁷ Zite le pasalte in amau sangin a tenpihte ii lungnop nading a kinpih zawk ding uh kisam hi. (Filippi 2:4 sim in.) Sawltak Paul in: “Note khatpeuh in amah le amah a ki-it bangin a zi it henla, a zi in zong a pasal zahtak hen,” ci-in gelh hi. (Efesa 5:21-33, ZSV) Nupate in khatlekhat tungah ki-itna le kizahtakna a neih ding uh kisam hi. Ahih hang innkuan nuam ahih nading a diakin pasal in a zi a it mahmah ding, zi in zong a pasal a zahtak mahmah ding kisam hi.

18. A kiheel hun sungteng nungak tangvalte in bang hang a kidop ding uh kisam a hiam?

¹⁸ A kingai nungak tangvalte khatlekhat a kitheih cian semsem nadingin a kiheel hun sung pen a nopci mahmah hun ahih ding kisam hi. Tua hun pen khatlekhat tungah ahi banga kimu-in, thuman taka gamtat ding hun hi a, tua hileh bek kitenpih dingin hoih maw, hoih lo cih khensat thei ding uh hi. A kiheel hun sungteng khatlekhat kihopih dan a sin theih banah a lungsim taktak uh a kitheih nading a hanciam uh kul hi. A kitheih cian semsem uh ciang, khatlekhat hong kilunglut semsem ding uh a, tua pen a ngeina ahi hi. Ahih hang a kiten mateng tua bang lungsim pen a kidek zawh ding uh kisam hi. Tua hileh nulepa mawhna taisan thei ding uh hi. Itna man in khatlekhat tungah kidek zawhna neih nading, khatlekhat kizopna le Pasian tawh kizopna a sukha thei ding gamtatnate pel dingin a huh ding hi.—1 Thesalonika 4:6.

INNKUAN KOI BANGIN KIPSAK THEI DING?

19, 20. Khristiante in kitenna pen bangci muh uh a hiam?

¹⁹ Laibu le video tampi-ah a tangthu pen a nopci mahmah kitenna tawh mansak uh hi. A taktakin cileng, kitenna pen a kipatna bek hipan hi. Jehovah ngimna-ah kitenna pen khantawn ading ahi hi.—Piancilna 2:24.

²⁰ Tu-lai mi tampi in kitenna pen hun tomno sung ading bekin ngaihsun uh hi. Kiten ding baihsak uh a, kikhen ding zong baihsak uh hi. Mi pawlkhat in innkuan sungah buaina hong pian ciang, a zi ahih kei leh a pasal a nusiat ding le nupa kikhen ding hun hi, ci-in ngaihsun uh hi. Ahih hang zang thum a kiheek khauhual tawh kisai Lai Siangtho gentehna phawk in. Tua bang khauhual pen buaina lianpi nuai-ah zong kitat lo hi. Jehovah huhna ngen lehang innkuan a kip tawntung ding hi. “Pasian in a gawmsa mite, kuamah in khen kei ta hen,” ci-in Jesuh in gen hi.—Matthai 19:6.

21. Nupa kopte khatlekhat a ki-it nading bang in huh ding a hiam?

²¹ I vekpi-in thahatna le thanemna i nei ciat hi. Midangte’ thanemna, a diakin i zi ahih kei leh i pasal ii thanemna ki-en phadiak hi. Tua banga i et leh lungnopna kingah thei lo ding hi. Tua bang hizaw loin, i koppihte ii hoihnate enzaw leng innkuan nuam i nei thei ding hi. A cingtaak lo nupate in a hoihnate bek a ki-et ding uh ahi thei takpi ding hiam? Hi thei mah hi. I vekpi-in a cingtaak lo mi ihihlam Jehovah in hong thei a, amah in i hoihnate bek hong en hi. Tua bangin hong en lo hileh e? Late a atpa in: “TOPA aw, nangmah in mawhneite ciamteh lecin, TOPA aw, kua in thuakzo ding ahi hiam?” a ci hi. (Late 130:3) Zi le pasalte in Jehovah ettehin a hoihnate uh kizonsakin, khatlekhat khialhnate a kimaisak ding uh ahi hi.—Kolose 3:13 sim in.

22, 23. Abraham le Sarah in nupate ading a hoih mahmah etteh ding bang hong nusiat uh hiam?

²² Kum a hong sawt tektek ciang, innkuan hong kip semsem thei hi. Abraham le Sarah in a kip mahmah innkuan nuam a nei uh hi. Ur khuapi-a a tenna inn nusia dinga Jehovah in Abraham kiangah a gen lai-in, Sarah pen kum 60 val bang hita ding hi. A nuam mahmah inn lianpi nusia a, puanbuka ten ding pen Sarah ading bangzah takin haksa ding hiam cih ngaihsun in. Ahih hang Sarah in a pasal ading lawm hoih le koppih hoih khat ahih banah a pasal zahtak mahmah hi. Tua ahih manin, amah in Abraham’ khensatnate a thukimpih banah a tangtun theih nadingin a panpih hi.—Piancilna 18:12; 1 Peter 3:6.

²³ Innkuan nuam ahih nadingin vai khempeuhah nupate a kithutuak den ding cihna hi lo hi. Khat vei, Abraham zong Sarah tawh kithutuak lo hi. Jehovah in Abraham kiangah: “Ama hong gen bangin gamta in,” ci-in gen hi. Abraham in tua bangin gamta ahih manin phattuamna a ngah hi. (Piancilna 21:9-13) Nupate in a kithutuak loh uh ciang lungkiat ding hi lo a, khatlekhat ki-itin, zahtakna tawh a kihopih ding uh thupi hi.

24. Innkuan in Jehovah koi bangin pahtawi thei a hiam?

²⁴ Khristian pawlpi-ah innkuan nuam tampi om hi. Koppih ding zong na hih leh, zi ding, pasal ding teelna pen a thupi pen khensatna khat ahihlam phawk in. Tua khensatna in na mailam nuntakna khempeuhah hong sukha thei ding hi. Tua ahih manin Jehovah’ lamlahna zong in. Tua hileh zi hoih, pasal hoih na teel thei ding hi. Innkuan ading hoih takin na kithawikhol thei ding a, Jehovah a pahtawi, itna tawh a kidim innkuan kip na nei thei ding hi.