Na Innkuan A Lungnop Theih Dan​—Khen 1

A kiteng cil nupate in a kiten ni-a kipan a tawntunga lungnuam dingin kilamen uh hi. A tawntunga lungnop pen hi thei mah hi. Kum sawtpi a kiteng khinte le Lai Siangtho thuhilhna hanciam a, a zui Khristiante in zong a tawntunga lungnop pen hithei hi cih thei uh hi.

1. Lai Siangtho in pasalte bang thuhilhna pia a hiam?

Jehovah in pasalte pen innkuan lutang dingin tavuan pia hi. (Efesa 5:23 sim in.) Innkuan adinga thu khensatna hoih bawl dingin deih hi. Lai Siangtho in: “Na zite uh na it un,” ci-in pasalte thuhilhna pia hi. (Efesa 5:25) Bang a cih nopna hiam? A zi a it pasal in mi’ muhna-ah hitaleh, mi’ muh lohna-ah hitaleh a zi hehpih hi. A lauhuainate pan kem in, pumpi lam le lungsim lamah ahih theih zahin panpih hi. (1 Timoti 5:8) A thupi pen ahi, Pasian’ thu lamah zong panpih hi. (Matthai 4:4) Gentehna in, a zi tawh thu ngenkhawmin Lai Siangtho simkhawm uh hi. Itna tawh hoih taka a zi a don pasal in Jehovah tawh kizopna hoih nei hi.​—1 Peter 3:7 sim in.

2. Lai Siangtho in zite bang thuhilhna pia a hiam?

Lai Siangtho in zite pen a “pasal zahtak” dingin thuhilhna pia hi. (Efesa 5:33, ZSV) Koi bangin zahtak thei ding a hiam? A pasal’ pianzia hoihte le innkuan kemin a vak dante ngaihsunkik thei hi. A pasal pen thu um lo mi ahi phial zongin a thu khensatnate thukimpihna le kam khum tawh hopihna tawh zahtakna lak thei hi.

3. Innkuan a nop nadingin nupate in bang hih thei uh a hiam?

Lai Siangtho in nupate pen: “Pumkhat a bang ding uh hi,” ci-in gen hi. (Matthai 19:5) Tua in ki-itna a kiamsak thei khempeuh a pelh ding uh kisam cihna hi. Tua bang ahih theih nadingin, hun pia a kikhawl khawm zel in, lungsim ngaihsutnate siang tak le itna tawh a kipulak ding uh kisam hi. Jehovah longal kuamah ahih kei leh bangmah thupi ngaihsut zaw lo uh hi. Midang khat peuhpeuh tawh kimaingapluat loh nadingin nakpi takin kidawm uh hi.

ZON BEH INLA, MUH BEH IN

4. Pasalte aw​—na zite uh it-in don un

VIDEO: Pasalte Aw, Nomau Pumpi Zahin Na Zite It Un (9:53)

• Pasal in a zi it-in a donlam koici lakkhia thei a hiam?

Kolose 3:12 sim in. Tua khit teh hih dotna kikum un:

• Nupa kikalah pasal in hih pianziate koici lakkhia thei a hiam?

5. Zite aw​—na pasalte uh it-in zahtak un

Jehovah a bia zongin, a bia kei zongin zi in a pasal zahtak dingin Lai Siangtho in hanthawn hi. Peter Masa 3:1, 2 sim in. Tua khit teh hih dotnate kikum un:

• Na pasal pen thu um lo mi ahih leh Jehovah biasak nuam ding hi teh. Koi bangin huh lecin bunzaw dingin ngaihsun na hiam? A tawntunga thuhilhna tawh maw? Ahih kei leh gamtat hoih le zahtakna lahkhiatna tawh? Bang hang hiam?

Nupate in thu khensatna hoihte bawl khawm thei uh hi. Ahih hang, na pasal’ thu khensatna thukimpih loh hun zong om thei hi. Tua hun ciangin na ngaihsutna pen dam takin le zahtakna tawh gen thei hi teh. Ahih hang, innkuan adingin thu khensatna hoih bawl dingin pasalte tungah Jehovah in tavuan pia hi, cih pen mangngilh kei in. Na pasal’ thu khensatna pen ahi thei zah a na thukimpih ding kisam hi. Hih bang dan tawh innkuan a nop nadingin na huh thei hi. Peter Masa 3:3-5 sim in. Tua khit teh hih dotna kikum un:

• Zi in pasal a zahtak ciangin Jehovah lungsim bangci om dingin um na hiam?

6. Innkuan sung buainate vengsak thei hi teh

VIDEO: Nupa Ki-itna Kipsak Theih Dan (5:44)

• Hih video sunga nupate’ a ki-itna uh a kiamlam bang thute in lak a hiam?

• Nupa ki-itna a kip nadingin bangteng sem uh a hiam?

Korin Masa 10:24 le Kolose 3:13 sim in. Lai Siangtho mun khat ta sim khit ciangin hih dotna kikum un:

• Hih thuhilhna zuihna in nupate koi bangin lungnuamsak thei a hiam?

Khatlekhat kipahtawi dingin Lai Siangtho in hong hanthawn hi. Itna le zahtakna lahna tawh kipahtawi uh hi. Rom 12:10 sim in. Tua khit teh hih dotnate kikum un:

• Na zi ahih kei leh na pasal in a hong pahtawi masak ding ngak pen a kilawm ding hiam? Bang hang hiam?

TOMLAKNA

Nupate khatlekhat ki-it a, kizahtakin Lai Siangtho thubulte a zuih uh ciang lungnuam thei uh hi.

Kikupkikna

• Nupa lungnop nadingin pasal in bang hih thei a hiam?

• Nupa lungnop nadingin zi in bang hih thei a hiam?

• Zileta nei khat na hih leh bang Lai Siangtho thubulte in na innkuan hong huh ding a hiam?

THEIH BEH NADING

Innkuan lungnuam na neih theih nadinga a hong huh thei a zat taak lamlahnate zong in.

Na Innkuan Lungnuam Thei Hi (brochure)

Nupate in Pasian’ lamlahna a zuih uh ciangin thupha a ngah dan pen hih music video-ah en in.

Itna Man (4:26)

Pasal ii makaihna mang, cih a khiatna sim in.

“Numeite Aw, Bang Hangin Makaihna Man Ding Kisam A Hiam?” (Vilnatausang, May 15, 2010)

Nupa kop khat in kimak nading zah donga haksatna lian koici gualzawh uh a hiam?

Pasian Huhna Tawh Innkuan Nuam Ka Nei Kik Uh Hi (5:14)