1 Jipa ãba bʼaibara

¿KʼÃRẼTA OIBARA?

Juwa jidapanʉrabara akʉibara ãyi kʼãwũã mia kʼãĩnara biʼia akʉza jipa ãba bʼaibara, maʉ̃ba kʼarebayi aduʼa bʼaita. Kʼãrẽ berabribʉmina ãyara kʼawuachu ewari jõmaʉ̃nẽ bʼaibarata.

Ʉ̃kʉrʉ juwa jidapanʉrãra ãbapanʉ yi mebẽrã kʼarea mawũã ẽ bʉrʉ yi neũdukʼawuara kʼarea. Mamina audre yibia ãyi ãba bʼaita yiya kãgabʉ baera akʉza wawia ũdubibʉ baera.

DAIZEZE BEDʼEABA JARABɄTA: «Yumakẽrãbida idubʉbe ẽ yi kimara» (1 Corintios 7:11).

«Jipa ãba bakĩrãbʉ baera maʉ̃ba kʼarebayi mesera kĩrʉ ẽ baita. Awuarabʉrʉ maʉ̃ba kʼarebayi nemitia obʉra jipa kĩrãduaita akʉza bedʼea zroma erpaninane krĩcha ẽ bayi wãña yi idubʉdaita» (Micah).

¿KʼÃRẼA YIBIA?

Juwa jidapanʉrata jipa ãba bʼaita krĩcha ẽ bʉrʉ, bedʼea zroma ũdubʉrʉde ãya jaraseabʉ, «bʉra mʉ̃ita ẽ», maʉ̃ba jʉrʉseabʉ ãyi yi idubʉita.

«Ʉ̃kʉrʉba krĩchapanʉ ãyi juwa jidabʉrʉde, ãyita bia wã ẽ bʉrʉ idubʉita iyi kimara, bʉta mawũã krĩchabʉde mia kʼãĩra, wãrĩnu kãgarata ũdubi ẽ basi» (Jean).

¿KʼÃRẼTA OSEABɄ?

KRĨCHARA

¿Bʉra kʼãrẽta obʉ bʉ kimaʉ̃me bedʼeakabʉrʉdera?

• ¿Sobia ẽ bʉka juwa jidada kʼarea?

• ¿Bʉara krĩchabarika awuruʉ̃me juwa jidasibʉrʉ audre bia bakasita?

• ¿Bʉara jarabarika naʉ̃ bedʼeara, «mʉ̃a idubʉyi bʉra» mawũã ẽ bʉrʉ «mʉa jʉrʉyi ẽbẽra wãrĩnu mʉ̃ kãgabʉ ũdubibʉta»?

Bʉa maʉ̃ra bedʼeadebemata mawũã asibʉrʉ, zarea oibara bʉ kimaʉ̃me jipa ãba bʼaita.

YIYA BEDʼEAIDUA

• Jipa ãba bʼaira ¿bʉitara idi ewadera yibia ẽka? ¿Kʼãrẽa mawũã krĩchabʉ?

• ¿Kʼãrẽta oibara jipa ãba bʼaita?

ŨRÃGʼA

• Bʉra karta zakerata bʉ kimaita mama ũdubita bʉa kʼãrẽaba kãgabʉta.

• Bʉ trajabʉmae erbara bʉ kima potota.

• Bʉta trajabʉbʉrʉ ewariza trʉ̃ibara bʉ kimara, mawũã ẽ bʉrʉ jĩgabʉmina.

DAIZEZE BEDʼEABA JARABɄTA: «Maʉ̃ kʼarea Daizezeba ãbabʉdara, mia abaʉ yumakẽrãba yi idubʉbi ẽ» (Mateo 19:6).