5 Bia bedʼea kʼawuaibara

¿KʼÃRẼTA OIBARA?

Yibarirata yi warrarabawara bia bedʼea kʼawuaita jaraibara ãyi sãwũãbʉta akʉza kʼãrẽta krĩchabʉta.

¿KʼÃRẼA YIBIA?

Edaude wiña zareabʉ yibarira yi warrarabawara bedʼeaita. Libro karta Tú no me escuchas, yo no te entiendo maʉ̃ba jara ũrĩbibʉ yibarira sãwũãbʉta. Nããrãra yibarirabara yi warrarãra wikabasi baera kʼaidu akʉpanasi kʼãrẽ kãgabʉta, mamina atia yi warrarãra arabia warikʉasi baera, zare yi warraraba kʼãrẽ obʉ kʼawuaita. Wãrĩnu bʼaira mawũãbʉ ẽ, maʉ̃ ewaridebʉrʉ bʉ warrarãra bʉa audre bedʼeakĩrãbʉ.

¿KʼÃRẼTA OSEABɄ?

Iyibʉ kĩrãkʼa krĩchara. Maʉ̃ta ora iyiʉ̃me diamasibasidu bedʼeaimina.

«Edaude mʉ̃a naʉ̃ bedʼeata jarakĩrãbʉ: «Dayirã idira ewari jõmaʉ̃nẽ ãbapanasi ¿kʼãrẽa yate bedʼea ẽ basi bʉra?». Mamina ¿kʼãrẽa bʉa maʉ̃ra mawũã jaraipe bʉ warrarata bʉme bedʼeakĩrãbʉbʉrʉ? ¿Maʉ̃ta kãgabʉ ẽka dayirã yibarirabara dayi warraraba maʉ̃ta omarẽã? (Lisa).

«Mʉ̃ra kʼãĩ wãkĩrã diamasira, mamina mʉ̃ warrarabawara diamasi 12debaeda bedʼeabaside audre yibia ãyirabawara bedʼeaita» (Herbert).

DAIZEZE BEDʼEABA JARABɄTA: «Aba abakaʉba jʉrʉidua, bʉyikʉza krĩcha ẽã, awuarabʉrʉ jʉrʉda awuru ẽbẽraita» (1 Corintios 10:24).

Kĩrãkita ũrĩdua. Zeze abaʉba jarabʉ: «Edaude mʉ̃ warrara mʉ̃a bedʼeabʉdera, mʉ̃ra aña krĩchanʉmʉ. Maʉ̃ba ãyara kʼawuabʉ mʉ̃a ũrĩ ẽãta ãyi bedʼeara».

Bʉta mawũã abarika krĩchabʉbʉrʉ, kiara telebisorta akʉza bʉ nekʼãrẽ audubʉta. Kĩrãkita ũrĩdua bʉ warraraba jarabʉta, maʉ̃ta mawũã obʉbʉrʉ ũdubiyi wãrĩnu krĩchabʉta bʉ warrarãra, maʉ̃ kʼãrẽ ẽ kĩrãkʼabʉmina.

«Audre yibia dai warraraba kʼawuamarẽã daiba kãgabʉta. Maʉ̃ta mawũãbʉ ẽ bʉrʉ ãyara kʼarebara jãpe jʉrʉseabʉ» (Maranda).

«Kĩrʉrãra bʉ warraraba bʉmabʉta jara ẽ bʉrʉ» (Anthony).

DAIZEZE BEDʼEABA JARABɄTA: «Mʉã jara bʼʉta kĩrãkuita ũrĩdua» (Lucas 8:18 Daizeze Bedʼea, Wycliffe Inc.).

Badu ewaride bedʼeara. Edaude warrarãra bedʼeakĩrãbʉ iyi aduʼa bedʼeaseabʉmae.

«Dai paseade wãbʉrʉde audre yibia ode bedʼeaita. Dai jewedabʉde ãyi kʼawa, ãyibawara audre yibia bedʼeaita kĩrãbita bedʼea ẽ baera» (Nicole).

Ãba nekobʉrʉdebida audre yibia bedʼeaita.

«Dai ãba nekopanʉne bedʼeapanʉ. Maʉ̃ oita audre yibia ãba babibʉ baera adewara bedʼea zroma zebʉrʉde dobabʉta krĩcha ẽ bayi» (Robin).

DAIZEZE BEDʼEABA JARABɄTA: «Kʼawuabeaidua naʉ̃ta, mebẽrã mʉ̃ ne kãgara. Ẽbẽrarã jõmaʉ̃ba ũrĩbara, kʼawua ẽã bedʼeabe ẽ, mesera kĩrʉbe ẽ» (Santiago 1:19).