4 Yiya kĩrãdua kʼawuaita

¿KʼÃRẼTA OIBARA?

Wãrĩnu kĩrãduaibara wuabemara ẽbẽraba nekayirua obʉta. Maʉ̃ba jarakĩrãbʉ ẽ mawũã jaradara bari kʼãrẽ ẽ kĩrãkʼa akʉita mawũã ẽ bʉrʉ kʼãrẽ berabarida ẽ kĩrã.

DAIZEZE BEDʼEABA JARABɄTA: «Yiya jʉ̃ãbeidua akʉza ibiade kĩrãduaidua bʉ ʉ̃rʉ nemitiata osidamina» (Colosenses 3:13).

«Bʉa ẽbẽrata wãrĩnu kãgabʉbʉrʉ akʉ ẽ iyi nemitiata awuarabʉrʉ akʉbʉ iyi sãwũã mejãcha zarea obʉta» (Aaron).

¿KʼÃRẼA YIBIA?

Ewari jõmaʉ̃ne krĩchabʉbʉrʉ iyi nemitia odapeadata kayaseabʉ akʉza ãyi mawũã juwa jidapanʉra ãrĩseabʉ.

«Ewari aba mʉ̃ kimaba mʉ̃a jarasi iyi nekayirua odata kĩrãduamarẽã. Mʉ̃a maʉ̃ kĩrãduaira nããrãra zareabasi, mamina mʉ̃a kĩrãduasi tẽã. Mamina mʉ̃ra edaude sopʉabidabari waña kĩrãdua ẽ basi baera. Maʉ̃ta waña kĩrãduasibʉrʉ dai kʼãwũã juwa jidapanʉra audre bia wãkasi» (Julia).

¿KʼÃRẼTA OSEABɄ?

KRĨCHARA

Bʉ kimaba bʉ sopʉabibʉrʉde krĩchara naʉ̃ta:

• ¿Bʉra kʼãrẽ wikaʉ jarabʉdaba waña sopʉa totochuka?

• ¿Kãgabʉka bʉidu zemarẽã iya nekayirua odata kĩrãduaita mawũã ẽ bʉrʉ bʉara waña kĩrãduabʉka?

YIYA BEDʼEAIDUA

• ¿Kʼãrẽ ewari ababayeda jʉ̃ãpanʉ yiya kĩrãduaita?

• ¿Kʼãrẽta oseapanʉ maʉ̃ nemitia oda waña kĩrãduaita?

ŨRÃGʼA

• Bʉ kimaba bʉ ʉ̃rʉ nekayirua obʉrʉde, krĩcharãra iya kriña obʉta.

• Kʼawuara bʉ kimara nemitia omia baera aña oseabʉta (Santiago 3:⁠2).

«Dai ũmeta nemitiata osibʉrʉ kĩrãduaseapanʉ dayi nemitia odara, mamina abaʉba nemitiata osibʉrʉ zarekʉ maʉ̃ nemitia kĩrãduaira. Wuabemara nemitia kĩrãduaira edabʉta krĩchabaibara» (Kimberly).

DAIZEZE BEDʼEABA JARABɄTA: «Bʉa bĩ ẽã odʼadʼeba bʉ jura ũme kʼadrʉabai krĩcha araa zerua» (Mateo 5:25 Daizeze Bedʼea, Wycliffe Inc.).