Jeowade Kĩrãkʼa kĩrãdua kʼawuabaibara

1, 2. (1) ¿Sõbede zareabaseabʉ kĩrãduaita? (2) ¿Deniseʼba sãwũã ũdubisi iyi zʉbʉria odapeada kĩrãduasita?

ẼBẼRA abaʉba nekʼãrẽ bʉma bʉẽãta obʉrʉdera, ¿bʉitara zareabʉka iya oda kĩrãduaira? Ẽbẽra mejãchaʉita zare kĩrãduaita maʉ̃ra, audre ãya jaradaba mawũã ẽ bʉrʉ odaba dayita mejãcha zʉbʉriabibʉbʉrʉ, mawũãsidu dayirãbara nekʼãrẽ oseapanʉ mawũã iyiʉ̃me kĩrʉbʉta idubʉita akʉza kĩrãduaita iya kʼãrẽ odata. Bari jaradaita, akʉdaya mebẽã Denisea sãwũã berabaridata, iyara ũdubisi wãrĩnu jipa kĩrãduabʉta. Poaga 2017de Deniseʼba akʉza iyi mebẽrãbawaraʉba akʉ wãsida sentral mundial ʉ̃rabʉrʉ parãnapeadata, ãyi maʉ̃ akʉ wãnata jẽda deda wãne karru abaʉta ãyi karruma deguesi. Maʉ̃neba ʉ̃tara Deniseʼbara kʼãrẽ kʼawua ẽ totosi, maʉ̃ta iyi ʉrʉmabʉrʉdera kʼawuasi yi wũãwũãrãra mejãcha posidata akʉza yi kima Brianʼra beisita. Maʉ̃ ʉ̃rʉ krĩchada tẽã Deniseʼba jarasi: «Mʉ̃ra mejãcha sopʉasi akʉza kʼawua ẽ basi yi kʼãrẽsida oita». Tẽã iya kʼawuaside yumakẽrã ãyi asidentabidara ituadoba ẽ basita, mia chirua kayirua doba ẽ basita akʉza nekʼãrẽ awuru akʉnʉmʉ kʼarea mawũã berabari ẽ basita, mia selular akʉnʉmʉ kʼarea, iyira Jeowa yiwidʼisi kʼarebamarẽã iyi aduʼa bʼaita.

² Maʉ̃ne yi yumakẽrãra jidasida akʉza tẽã juez kĩrãbita edesida Denise kimata beasi baera iya maʉ̃ta krĩña oẽ basimina. Iya maʉ̃ oda kʼareara karsel eda edeseapanasi iyira, mamina Deniseʼa jarasida jõma iyi juwadebʉta, iya kʼãrẽ jarabʉrʉdeba naʉ̃ yumakẽrãra karsel eda edeseabasi baera mawũã ẽ bʉrʉ ededa ẽ bakʼasita. Deniseʼba jarasi: «Mʉ̃aʼa maʉ̃ jarasidadera dayi kõ wãnata bedata jẽda ewara kʼãrãpe tãba mejãcha pobari kĩrãkʼa sentisi, jẽda akʉza maʉ̃ ʉ̃rʉ bedʼeaibara baera». Maʉ̃ tẽã Deniseʼra tribunalʼidu jʉ̃ẽsi, maʉ̃ yumakẽrã kĩrãbita jʉ̃ẽ kʼãrãpe jaraita kʼãrẽ berabaridata, maʉ̃ tẽã Deniseʼba juezʼa jarasi maʉ̃ yumakẽrãra kʼãrẽ oda ẽ marẽã, idubʉdamarẽã.b Denise bedʼea berabarida tẽã juezʼra jẽgasi, iya jarasi: «Mʉ̃ nama trajabʉta 25 poaga ba, mamina maʉ̃ne ũdukabasi ẽbẽra abaʉba kʼãwũã iyi zʉbʉria odapeada ʉ̃rʉ jarabʉta kʼãrẽ oda ẽ marẽã».

3. ¿Kʼãrẽba kʼarebasi Deniseʼba kĩrãduamarẽã?

³ ¿Kʼãrẽba kʼarebasi Deniseʼba kĩrãduamarẽã iyi zʉbʉria odapeadata? Iyara krĩchasi Jeowaba sãwũã kĩrãduabʉ ʉ̃rʉ dayirãba nemitia obʉrʉde (Miq. 7:18). Jeowaba dayirã nemitia sãwũã kĩrãduabʉ ʉ̃rʉ krĩchaiba, kʼarebabʉ dayirãbida wuabemaraba aña obʉrʉde kĩrãduaita.

4. ¿Kʼãrẽta omarẽã kãgabʉ Jeowabara?

⁴ Jeowabara kãgabʉ dayirãba awururaba nemitia obʉta kĩrãduadamarẽã iya dayirã nemitia kĩrãduabʉ kĩrãkʼa (akʉra Efesios 4:32). Iyara jʉ̃ãbʉ dayirãba awururaba nemitia obʉrʉde kĩrãduaya awa bamarẽã (Sal. 86:5; Luc. 17:4). Naʉ̃ artikulode akʉdayi bedʼea ũbea, mawũã kʼawuaita kʼãrẽta oibarata audre kĩrãdua kʼawua bʼaita.

DAYI ZɄBɄRIABɄTA KʼÃRẼ Ẽ KĨRÃKʼA AKɄ Ẽ BAIBARA

5. Proverbios 12:18ba jarabʉdera, ¿awururaba zʉbʉriabibʉrʉdera sãwũãpanʉ dayirãra?

⁵ Dayirã zʉbʉria obʉdadera mejãchade pʉ, audre pʉabʉ dayi neũdukʼawuaba mawũã ẽ bʉrʉ dayi mebẽãba zʉbʉriabibʉrʉde (Sal. 55:​12-14). Edaʉde dayirã sãwũã zʉbʉriabʉra kucho zakeba subari kĩrãkʼabʉ (akʉra Proverbios 12:18). Edaʉde daya krĩchakĩrãbʉ dayi awuruba mawũã zʉbʉria odara dayitara pʉ ẽ basita, maʉ̃ta mawũã odara kucho zakeba sudapeadata ãĩ bʉe ẽã ariwia pẽĩ abai kĩrãkʼa bayi. Maʉ̃ kĩrãkʼa dayi zʉbʉriabʉta dayirãba kʼãrẽ ẽ kĩrãkʼa akʉdara dayi pʉabʉra taʉ ẽ bayi.

6. ¿Awuruba dayima ẽãbʉta obʉrʉdera dayara kʼãrẽta obʉ?

⁶ Ẽbẽra abaʉba dayima ẽãchuta obʉrʉdera dayirã kĩrʉdogo. Daizeze Bedʼeade jarabʉ dayirã edaʉde mawũã sentiseabʉta, mamina jarabʉ dayirãra maʉ̃ kĩrʉbia yi edebi ẽ baibarata (Sal. 4:4; Efes. 4:26). ¿Kʼãrẽa? Dayi sãwũã sentibʉde nekʼãrẽ obʉ, wãrĩnubaira dayita kĩrʉbʉbʉrʉ naʉ̃bara nebiata we ẽ (Sant. 1:20). Jõmaʉ̃ta kĩrʉbari mamina ewari jõmaʉ̃nẽ kĩrʉ kikibarira dayidebʉ.

7. Awuruba nekʼãrẽ dayima ẽãbʉta obʉrʉdera, ¿sãwũã sentipanʉ?

⁷ Awuruba nekʼãrẽ dayima ẽãbʉta obʉrʉdera dayirã sopʉabʉ. Bari jaraita, mebẽã Annba naʉ̃ta jarabʉ: «Mʉ̃ wĩkakirʉeda mʉ̃ zezeba mʉ̃ papara idubʉsi mʉ̃ akʉbadaʉ̃me wãña, maʉ̃nera mʉ̃a krĩchasi mʉ̃ra abapaibidata. Adewara mʉ̃ zeze maʉ̃ ẽbẽra wẽrãʉ̃me wũãwũã barabʉrʉdera mʉ̃a krĩchasi mʉ̃ zezeba mʉ̃ra kãga ẽãta, maʉ̃neba ya krĩchasi mʉ̃ra mia abaʉba kãgada ẽãta». Kõbe mebẽã Georgetteʼba jara ũrĩbibʉ yi kima ãĩbasidera iyi sãwũã sentisita, iya jarabʉ: «Mʉ̃ra mejãcha sopʉasi, daira wiñabʉdeba yi neũdukʼawuarabasi baera akʉza yi nãã edebarita ãbaʉba opanasi baera». Adewara mebẽã Naomiba jarabʉ: «Mʉ̃a krĩchakabasi mʉ̃ kimaba mʉ̃ mejãcha sopʉabira, mamina iya mʉ̃aʼa jaraside mĩrʉ akʉbʉta ẽbẽrarã ãkadabeta, naʉ̃ba mʉ̃ra mejãcha sopʉabisi akʉza krĩchasi iya mʉ̃ra sewabʉta».

8. (1) ¿Kʼãrẽ kʼarea kĩrãduaibara awuruba aña odara? (2) ¿Kʼãrẽ nebiata ũdupanʉ awururaba aña oda kĩrãduabʉrʉdera? (Akʉra rekuadro «¿Awuruba nekʼãrẽ aña odaba mʉ̃ta ewari jõmaʉ̃nẽ zʉbʉriabisibʉrʉ?»).

⁸ Wuabemaraba kʼãrẽ jarabʉra mawũã ẽ bʉrʉ kʼãrẽ obʉra dayirãnebʉ ẽ, mamina dayirãnebʉ ãya kʼãrẽ obʉta kĩrãduaita mawũã ẽ bʉrʉ kĩrãdua ẽ baita. Wãrĩnubaira audre biga bayi kĩrãduaita ãya kʼãrẽ aña odara, ¿kʼarea? Jeowata kãgapanʉ baera akʉza Jeowaba kãgabʉ baera dayirãba kĩrãduamarẽã awuruba aña odara, adewara dayirãba kĩrãduada ẽ bʉrʉ nekʼãrẽ aña oseapanʉ akʉza dayisida kayaseabʉ (Prov. 14:​17, 29, 30). Mebẽã Christineʼba jarabʉ: «Mʉ̃ kĩrʉbia yi edebibʉrʉdera, ipida ẽ, bia kãĩ ẽ akʉza bia neko ẽ. Mʉ̃ mawũã sentibʉa yi edebibʉba mʉ̃ kimaʉ̃me biabʉ ẽ akʉza wuabemaraʉ̃me».

9. ¿Kʼãrẽa ewari jõmaʉ̃nẽ kĩrʉ kiki kʼawua ẽ baibara?

⁹ Ẽbẽra dayi ʉ̃rʉ nemitia odaba jara ẽ bʉrʉ maʉ̃ta kĩrãduamarẽã, dayirãra nekʼãrẽ odaibara ewari jõmaʉ̃nẽ kĩrʉ ẽ baita akʉza dayirãta aduʼa babimarẽã. Georgetteʼba jarabʉ: «Mʉ̃ kima badaba nekʼãrẽ oda kʼarea mʉ̃ mejãcha kĩrʉbʉta taʉbira ewari bio berabarisi. Maʉ̃ berabarida tẽãra mʉ̃ra aduʼa besi». Awuruba aña oda kʼarea dayita kĩrʉ kiki kʼawua ẽ bʉrʉ, naʉ̃ba kʼarebabʉ dayi sode aduʼa bʼaita, adewara naʉ̃ra dayirãita nekʼãrẽ bia, nãã bada kĩrãkʼa aduʼa sobia babibʉ baera (Prov. 11:17). Bʉa kʼawuasibʉrʉ bʉ sãwũã sentibʉta mamina wuabida kĩrãdua ẽ bʉrʉ, ¿bʉara kʼãrẽta oseabʉ?

EWARI JÕMAɄ̃NẼ SOPɄA BA Ẽ BAIBARA

10. ¿Kʼãrẽa idu ewari berabaribibara dayi sopʉabʉ taʉbira? (Akʉra potota).

¹⁰ ¿Kʼãrẽta oibara ewari jõmaʉ̃nẽ sopʉ ba ẽ baita? Ewari berabaribibara. Krĩchadaya ẽbẽra asidentada ʉ̃rʉ, iyira maʉ̃ kʼarea medikoeda wãbʉrʉdera aramaʉ̃ta mesera betoto ẽ, awuarabʉrʉ iyara ewari berabaribibara mawũã bemarẽã. Maʉ̃ kĩrãkʼa dayirã sopʉabʉra mesera taʉ toto ẽ, awuarabʉrʉ idu ewari berabaribibara pʉabʉ taʉbita. Maʉ̃ba kʼarebayi dayirãba kĩrãduaya awa bʼaita (Ecl. 3:3; 1 Ped. 1:22).

11. ¿Yiwidʼiba sãwũã kʼarebabʉ kĩrãduaita?

¹¹ Adewara dayirãbara Jeowaʼa widiseapanʉ kʼarebamarẽã dayirãbida iyide kĩrãkʼa kĩrãdua kʼawuabaita.c Annʼba jara ũrĩbibʉ Jeowaʼa yiwidʼiba sãwũã kʼarebasita iyita, iya jarabʉ: «Mʉ̃a Jeowaʼa widisi daiba kʼãrẽ jaradata mawũã ẽ bʉrʉ kʼãrẽ odata kĩrãduamarẽã, tẽã mʉ̃a kartata bʉ diabʉesi mʉ̃ zezeʼa akʉza iyi kima jara ũrĩbita ãya kʼãrẽ odara mʉ̃ara kĩrãduasita». Iyita maʉ̃ oira zarebasi mawũãsidu iya jarabʉ: «Mʉ̃a jʉ̃ãbasi mawũã Jeowade kĩrãkʼa kĩrãduabʉ baera mʉ̃ zezeba yi kimaʉ̃meba Jeowa ʉ̃rʉ audre kʼawuakĩrãnamarẽã».

12. Dayira sãwũã sentibʉ ʉ̃rʉ krĩchai kaʉde, ¿kʼãrẽa Jeowa ʉ̃rʉ ĩjãibara? (Proverbios 3:​5, 6).

¹² Ĩjãra Jeowa ʉ̃rʉ, bʉ sãwũã sentibʉ ʉ̃rʉ krĩcharãra, maʉ̃ ʉ̃rʉ ĩjãrãra (akʉra Proverbios 3:​5, 6). Jeowabara ewari jõmaʉ̃nẽ kʼawuabʉ dayirãita kʼãrẽta audre yibiata (Is. 55:​8, 9). Jeowaba dayirã nekʼãrẽ omarẽã jarabʉrʉdera iyara jara ẽ nekʼãrẽ dayirã sopʉabiseabʉta omarẽã, maʉ̃ba iya dayirã wuabemaraba aña obʉta kĩrãduamarẽã jarabʉbʉrʉ kʼawuapanʉ maʉ̃neba nebiata ũdudaita (Sal. 40:4; Is. 48:​17, 18). Mamina dayirã sãwũã sentibʉ ʉ̃rʉ krĩchapanʉbʉrʉ akʉza maʉ̃ ʉ̃rʉ ĩjãpanʉbʉrʉ awuruba nekʼãrẽ aña odara kĩrãduabeda ẽ bayi (Prov. 14:12; Jer. 17:9). Naomiba jarabʉ: «Nawedara mʉ̃a krĩchabasi neẽbasita kʼarea kĩrãduaita mʉ̃ kimaba odara, iyara ẽbẽrarã ãkadabeta akʉbasi baera, mʉ̃ra mejãcha perabasi iya akʉza jẽda zʉbʉriabi kʼarea mawũã ẽ bʉrʉ iya krĩchamarẽã iya mʉ̃ sãwũã odara mʉ̃itara pʉ ẽ basita. Mʉ̃a krĩchabasi Jeowaba mʉ̃ sãwũã sentibʉta kʼawuabʉ baera nesida ẽãta iya aña oda kĩrãduaira, mamina tẽã biʼia ũrĩsi Jeowaba mʉ̃ sãwũã sentibʉ kʼawuabʉba jarakĩrãkʉ ẽãta iyitara bigata mʉ̃a mʉ̃ kimaba sãwũã oda kĩrãdua ẽ baira. Jeowabara kʼawuabʉ mʉ̃ sãwũã sentibʉra mamina iya kãgabʉ mʉ̃a ewarita berabaribimarẽã mawũã mʉ̃ sopʉabʉ taʉita akʉza kĩrãduamarẽã mʉ̃ kimaba aña odata». d

BIA KRĨCHABARA

13. Romanos 12:​18-21ne jarabʉdera, ¿kʼãrẽta odaibara?

¹³ Awuruba dayi ʉ̃rʉ nemitia odata kĩrãduaibara jarakĩrãkʉ ẽ maʉ̃ ʉ̃rʉ badua bedʼea ẽ baibarata, nekʼãrẽta oibara, mebẽã abaʉ̃me mawũã berabarisibʉrʉ krĩchaibara kʼãrẽ oita jẽda ibiade bʼaita (Mat. 5:​23, 24). Audre biga bayi mejãcha kĩrʉi kaʉde so zʉbʉria akʉita wuabemarata akʉza mejãcha kĩrʉ kikibari kaʉde biga bayi kĩrãduaita wuabemaba nemitia obʉta (akʉra Romanos 12:​18-21; 1 Ped. 3:9). ¿Kʼãrẽba kʼarebai dayirãba maʉ̃ta ũdubita?

14. ¿Dayirãbara kʼãrẽta odaibara akʉza kʼãrẽa?

¹⁴ Dayirãbara ẽbẽrarãra akʉibara Jeowaba akʉbʉ kĩrãkʼa. Jeowabara akʉkĩrã ẽbẽrarãba ãyi sode kʼãrẽ nebia erbʉta (2 Crón 16:9; Sal. 130:3). Wãrĩnubaira dayirãba akʉdara mebẽrãba ãyi sode kʼãrẽ nebia erbʉta mawũãra mejãcha nebiata ũdudayi, mamina ãyi sode kʼãrẽ mitia erbʉta akʉdara maʉ̃sida ũdudayi. Dayirãba mebẽrãba ãyi sode kʼãrẽ nebia erbʉtrʉ akʉpanʉbʉrʉ, naʉ̃ba kʼarebayi ãya aña obʉrʉde dayirãba kĩrãduaita. Bari jaradaita, akʉdaya mebẽã Jarrod yizata, iya jarabʉ: «Mebẽrãba nekʼãrẽ mʉ̃ma ẽãbʉta obʉrʉdera, mʉ̃itara zare ẽ ãya maʉ̃ oda kĩrãduiara krĩchabʉbʉrʉ ãya sode kʼãrẽ nebia erbʉta».

15. ¿Kʼãrẽa yibia yi ẽbẽra jaraita bʉa iya aña odara kĩrãduasita?

¹⁵ Jipade yibia yi ẽbẽra nekʼãrẽ aña oda jaraita kĩrãduasita iya odara, ¿kʼãrẽa? Akʉdaya Naomiba kʼãrẽ jarabʉta: «Mʉ̃ kimaba mʉ̃aʼa jaraside ‹¿kĩrãduasika bʉara mʉ̃a odara?› Maʉ̃nera mʉ̃a iya jarakĩrãbasi kĩrãduasita, mamina jaraʉ ẽ basi. Mama kʼawuasi mʉ̃a iya nekʼãrẽ aña odara waidide kĩrãdua ẽ basita, ewari berabarida tẽã kĩrãduasi mʉ̃a iya nekʼãrẽ aña odara, mamina krĩchakabasi kʼãrẽãba yibiabaibasita mʉ̃a iya kĩrãduasi jaraira iyitara. Mʉ̃a iya maʉ̃ bedʼea jaraside iyira jẽgasi, mʉ̃sida maʉ̃ jarada tẽãra audre aduʼa besi. Maʉ̃neba ya mʉ̃ara audre ĩjã wãsi iyi ʉ̃rʉ, idira daira jipade neũdukʼawua biara».

16. ¿Kʼãrẽta kʼawuabʉda kĩrãduai ʉ̃rʉ?

¹⁶ Jeowabara kãgabʉ dayirãba wuabemaraba nekʼãrẽ aña odata kĩrãdua kʼawua bamarẽã (Col. 3:13). Mawũãsidu dayirãitara zareabaseabʉ awuruba nekʼãrẽ aña oda kĩrãduaira. Mamina naʉ̃ta oseabʉ: Nããra, dayi zʉbʉriabʉta kʼãrẽ ẽ kĩrãkʼa akʉ ẽ baibara. Ũmeta, ewari jõmaʉ̃nẽ sopʉa ba ẽ baibara. Yi ũbeata, bia krĩcha bʼaibara. (Akʉra rekuadro «Nekʼãrẽ ũbeabʉ dayirãba kĩrãdua kʼawuabaita»).

KRĨCHARA KʼÃRẼ NEBIATA ŨDUITA KĨRÃDUARA

17. ¿Kʼãrẽ nebiata ũdupanʉ kĩrãduabʉrʉdera?

¹⁷ Dayirãbara nekʼãrẽ bio kʼarea kĩrãduaibara. Nããra, mawũã opanʉbʉrʉ Jeowade kĩrãkʼa kĩrãdua kʼawuapanañi, Jeowabara so zʉbʉria akʉbʉta ũdubibʉ baera (Luc. 6:36). Ũmeta, dayirãba kĩrãduadara ũdubidayi Jeowaʼa biga diapanʉta, iya dayirãba nekʼãrẽ aña obʉta kĩrãduabʉ baera (Mat. 6:12). Yi ũbeata, dayirãbara neũdukʼawua biarata erpanañi akʉza kayada ẽ bayi.

18, 19. ¿Deniseʼba iyi ʉ̃rʉ aña odapaeadata kĩrãduasi baera kʼãrẽ nebiata ũdusi?

¹⁸ Dayirãba awururaba nekʼãrẽ aña oda kĩrãduabʉrʉdera edaʉde kʼawua ẽ maʉ̃neba kʼãrẽ nebiata ũduseapanʉta. Bari jaradaita, akʉdaya kʼãrẽba sãwũã berabarisita Deniseʼta, iyara kʼawua ẽ basi naʉ̃ yumakẽrã ãyi asidentabidara juez kĩrãbita jʉ̃ẽi nããra, iyikʉza beita krĩchabasita. Mamina Deniseʼba naʉ̃ yumakẽrãba odata kĩrãduasi baera naʉ̃ba iyi sota tõbarisi akʉza naʉ̃ yumakẽrãbara tẽã jʉ̃neane Daizeze Bedʼea kʼawua jʉ̃drʉsi Jeowa ʉ̃rʉ Kʼawuabipanʉrãbawara.

¹⁹ Dayirãsi Denise kĩrakʼa berabariseabʉ, awururaba nekʼãrẽ aña oda kĩrãduaira dayirãitabida zareabaseabʉ. Mamina dayirãba awuruba nekʼãrẽ aña odata kĩrãduara, nebiata ũduseabʉ (Mat. 5:7). Maʉ̃ba dayirãbara zarea odaibara Jeowade kĩrãkʼa awururaba nekʼãrẽ aña obʉ kĩrãduaita.