ARTIKULO KʼAWUAITA 7
TRÃBI 15 Alabemos al Primogénito de Jehová
Bʉara kʼãrẽ nebiata ũdubʉ Jeowaba bʉ nemitia kĩrãduabʉdeba
«Bʉde bʉ wãrĩnu kayirua kĩrãduaira» (SAL. 130:4).
KʼÃRẼTA ŨDUDAITA
Naʉ̃ne akʉdayi sãwũã Daizeze Bedʼeaba yizaraneba ũdubibʉta Jeowaba dayirã nemitia kĩrãduabʉra jipade awuarabʉta wuabemaraba obʉira. Adewara naʉ̃ artikuloba kʼarebayi audre biga diaita Jeowaʼa dayirã nemitia kĩrãduabʉ kʼarea.
1. ¿Kʼãrẽa zareabʉ kʼãrẽta krĩchabʉ kʼawuaita ẽbẽra abaʉba dayirã nemitia kĩrãduaya abʉrʉde?
ẼBẼRA abaʉba jarara: «Bʉa nekʼãrẽ aña odara mʉ̃ara kĩrãduayi», bʉa maʉ̃ bedʼea ũrĩbʉrʉdera bʉra aduʼa sentibʉ. Mamina dayirãba kʼawua ẽ iya mawũã dayirã nemitia kĩrãduaya asidera iyi sode kʼãrẽta krĩcha kʼãrãpe mawũã jarasita. Iya krĩchasibaibara nãã bada kĩrãkʼa jẽda neũdukʼawua bia bʼaita, mawũã ẽ bʉrʉ krĩchasibaibara maʉ̃ ʉ̃rʉ wua bedʼea ẽ baita akʉza nãã neũdukʼawua bada kĩrãkʼa ba ẽ baita.
2. ¿Daizeze Bedʼeaba jarabʉdera Jeowabara sãwũã kĩrãduabʉ? (Akʉra notata).
2 Jeowaba dayirãba nekʼãrẽ aña oda kĩrãduabʉrʉdera jipade awuarabʉ ẽbẽrarãba obʉira, iyara wãrĩnu kĩrãduabʉ baera. Salmistaba Jeowaba sãwũã kĩrãduabʉ ʉ̃rʉ naʉ̃ta jarasi: «Bʉde bʉ wãrĩnu kayirua kĩrãduaira akʉza mawũã bʉta wawiadamarẽã»a (Sal. 130:4). Jeowaba dayirã nemitia kĩrãduabʉrʉdera jipa kĩrãduabʉ, mia abaʉba iyide kĩrãkʼa obe ẽ, maʉ̃ba dayirãba awʉrʉraba nekʼãrẽ aña obʉrʉde jipa kĩrãduakĩrãpanʉbʉrʉ Jeowade kĩrãkʼa odaibara. Escrituras Hebreasde zokʼabʉ bedʼea aba jaraita Jeowaba sãwũã wãrĩnu kayirua kĩrãduabʉ ʉ̃rʉ, mamina naʉ̃ bedʼeara zokʼada ẽ ẽbẽrarãba sãwũã kĩrãduabʉ jaraidera.
3. ¿Kʼãrẽne awuarachu Jeowaba sãwũã kĩrãduabʉra ẽbẽrarãba obʉira? (Isaías 55:6, 7).
3 Jeowaba dayirãba nemitia oda sãwũã kĩrãduabʉra jipade awuarabʉ ẽbẽrarãba obʉira. Iya dayirãba aña odata kĩrãduabʉrʉdera maʉ̃ra wua kĩrãbe ẽ akʉza iyara iduaribibʉ dayirãta jẽda iyi neũdukʼawua bia bamarẽã nãã bada kĩrãkʼa. Dayirãra mejãcha sobiapanʉ Jeowaba kʼãwũã dayirãba nekʼãrẽ aña odata kĩrãduada ʉ̃rʉ kĩrãduabʉ baera (akʉra Isaías 55:6, 7).
4. ¿Kʼãrẽta osi Jeowaba dayirãba audre bia ũrĩmarẽã iya sãwũã kĩrãduabʉta?
4 Jeowaba dayirã nemitia sãwũã kĩrãduabʉra ẽbẽrarãneira jipade awuarabʉ baera dayirãbara jõma biʼia ũrĩ au ẽ iya sãwũã mawũã obʉta, mamina maʉ̃ kʼarea Jeowaba iyi Bedʼeade amaesi yizarata dayirãba bia ũrĩnamarẽã iya dayirãba nemitia obʉrʉde sãwũã jipa kĩrãduabʉta. Naʉ̃ artikulode akʉdayi maʉ̃ra yizadebema ʉ̃kʉrʉta, mawũã kʼawuadayi Jeowaba kʼãrẽta obʉta dayirãba nekʼãrẽ aña oda jipa kĩrãduaita akʉza kʼãrẽta obʉta dayiraʉ̃me jẽda neũdukʼawua bia bʼaita nãã bada kĩrãkʼa. Dayirãba naʉ̃ra yizara ʉ̃rʉ kʼawuabʉrʉde audre kãga ũdubidayi Jeowa akʉza biga diadayi iya dayirãta bia edabʉ baera akʉza dayirãʼa so borekea ũdubibʉ baera.
JEOWABA EDEBɄ DAYIRÃ NEMITIARA
5. ¿Jeowaba dayirãba nemitia oda kĩrãduabʉrʉdera kʼãrẽta obʉ kĩrãkʼabʉ?
5 Edaʉde Daizeze Bedʼeaba jarabʉ dayirã kayiruara ne zʉgʉa zroma kĩrãkʼabʉta, bari jaraita nokʼo Davidba jarasi iya kayirua odara ne zʉgʉa zroma kĩrãkʼabasita (Sal. 38:4). Mawũãsidu Salmo 25:18 akʉza 32:5ba jarabʉ dayirãba kayirua oda kʼarea jẽda krĩchadara Jeowabara kĩrãduaita maʉ̃ra. Ebreo bedʼeadera naʉ̃ra bersikuloraba «kĩrãduai» jarabʉbara jarakĩrãbʉ «jiraedaita» mawũã ẽ bʉrʉ «edeita». Jeowaba dayirãba kayirua odata kĩrãduabʉrʉdera dayirã okiwade ne zʉgʉa zroma abʉta ãĩ bʉebʉrʉ kĩrãkʼabʉ.
«Kĩrãduasi» (Sal. 32:5).
6. ¿Jeowabara sama edebʉ dayirã nemitiara?
6 Daizeze Bedʼeade awuru yizata jarabʉ mawũã ũdubita Jeowabara dayirãba kayirua odara sãwũã jĩga edebʉta. Salmo 103:12ba jarabʉ: «Ũmadaʉ ʉ̃tʉ zebʉra jĩgabʉ ũmadaʉ baebʉmaebara, maʉ̃ kĩrãkʼa jĩgabʉ kʼãrẽ dayirã nemitiara». Diapedarera bisiara jãpe ʉ̃tʉ zebʉ, kewararera jãpe baebʉ, maʉ̃ba iyabaʉ ũmadaʉ̃de diapeda ẽ mia kewara ẽ. Naʉ̃ba jarakĩrãbʉ Jeowabara dayirã nemitiara jĩga edebʉta dayirãba ũdu ẽ baide. Naʉ̃ba dayirã kʼawuabibʉ Jeowabara dayirã nemitiara wãrĩnu kĩrãduabʉta.
«Ũmadaʉ ʉ̃tʉ zebʉra jigabʉ ũmadaʉ baebʉmaebara» (Sal. 103:12)
7. ¿Jeowabara kʼãrẽta obʉ dayirã nemtiaʉ̃me? (Miqueas 7:18, 19).
7 ¿Jeowaba dayirã nemitia jĩga edebʉrʉdera iyara maʉ̃ra wuaga erbidaka? Mawũã ẽ, nokʼo Ezequíasba jarasi iya nemitia odara Jeowabara iyi ẽkarrabʉde balbʉebʉta (Is. 38:9, 17). Mamina maʉ̃ kʼarea soidʉba jẽda krĩchapanʉbʉrʉ Jeowabara maʉ̃ nemitiara jĩga balbʉebʉ kĩrãkʼabʉ iya ũdu ẽ baimae. Maʉ̃ bedʼea Ezequíasba jaradara iyaba jaraseabʉ: «Bʉara mʉ̃ra akʉbʉ nemitia oka kĩrãkʼa». Miqueas 7:18, 19de ũdubibʉ awuru yizata (akʉra). Mama jarabʉ Jeowabara dayirã nemitiara pusa ẽsadra balbʉebʉta. Nawedara nekʼãrẽ baduta pusa ẽsadra baebasibʉrʉ maʉ̃ra wua ũdu ẽ basi.
«Mʉ̃ nemitia jõma bʉ ẽkarra ãbʉdeare balbʉesi» (Is. 38:17).
«Dai nemitia jõma pusa ẽzadra balbʉeyi bʉara» (Miq. 7:19).
8. ¿Kʼãrẽta kʼawuabʉda nainʉbayeda?
8 Naʉ̃ra yizaraneba Daizeze Bedʼeaba ũdubibʉ Jeowabara dayirã nemitiara jipa kĩrãduabʉta, mawũã dayirãta aduʼa panamarẽã. Davidba naʉ̃ta jarasi: «Sobiapanʉ yi ãya kayirua oda kĩrãduadapeadara akʉza ãyi kayirua jẽda kĩrãbeda ẽãrata, sobiabʉ yumakẽrã Jeowaba iyi nekayirua jẽda widi ẽãne» (Rom. 4:6-8). Maʉ̃ba jarakĩrãbʉ wãrĩnu jipa kĩrãduabʉta.
JEOWABARA DAYI NEMITIARA JIPA ÃĨBɄEBɄ
9. ¿Daizeze Bedʼeaba sãwũã ũdubibʉ Jeowabara dayirã nemitiara jipa kĩrãduabʉta?
9 Atia akʉdayi awuru yizarata, mawũã audre bia ũrĩnaita Jeowaba sãwũã jipa ãĩbʉebʉta dayirã nemitia yi Warra dayirãbari beimarẽã zokʼaside. Bari jaraita, Daizeze Bedʼeaba jarabʉ Jeowabara dayirã nemitiara sʉgʉbʉta akʉza jarebʉ mawũã kʼãrẽ jaigʉa ne ẽ bamarẽã (Sal. 51:7; Is. 4:4; Jer. 33:8). Jeowaba jara ũrĩbibʉ kʼãrẽ nebiata ũdupanʉta maʉ̃neba, iya jarabʉ: «Mara nemitiara purru eskarlata kĩrãkʼabʉmina, torro bayi niewe kĩrãkʼa; wua karmesi kĩrãkʼa purrubʉmina lana kĩrãkʼa bayi» (Is. 1:18). Kolor purru eskarlata mawũã ẽ bʉrʉ kolor purru karmesi ʉrabʉeira jipade zare. Jeowaba naʉ̃ yizata zokʼabʉ mawũã dayirã kʼawuabita iya dayirã nemitiara jipa kĩrãduabʉta.
«Mara nemitiara purru eskarlata kĩrãkʼabʉmina, torro bayi niewe kĩrãkʼa» (Is. 1:18).
10. ¿Kʼãrẽ yizadeba ũdubibʉ Jeowaba dayirã nemitiara jipa kĩrãduabʉta?
10 Nããbema artikulode jarada kĩrãkʼa dayirã nemitiara debe kĩrãkʼabʉ (Mat. 18:32-35). Dayirãba nemitia obʉrʉdera dayima Jeowaʉ̃me debe barabʉ kĩrãkʼabʉ mamina Jeowaba dayirã nemitia kĩrãduabʉrʉdera maʉ̃ debe jõma ãĩ bʉebʉrʉ kĩrãkʼabʉ, adewara Jeowabara jʉ̃ã ẽ iya dayirã debe kĩrãduasimina dayirãba pagamarẽã maʉ̃ta. Sobiapanʉ kʼawuapanʉ baera Jeowaba dayirã nemitia jipa kĩrãduabʉta.
«Mʉ̃ara debeta jõmaʉ̃nẽbara bedʼea ne ẽãbʉsia» (Mat. 18:32)
11. ¿Daizeze Bedʼeade dayirã nemitia jarei jarabʉrʉdera kʼãrẽta jarakĩrãbʉ? (Hechos. 3:19).
11 (Akʉra Hechos 3:19). Naʉ̃ bersikulora griego bedʼeadera kĩrãduai jarai kʼaude jarabʉ jarei. Jeowabara dayirã nemitiara bari kĩrãduabʉ ẽ awuarabʉrʉ jipa jarebʉ. Maʉ̃ra debe barabʉta jipa ãĩ bʉei kĩrãkʼabʉ, maʉ̃ bia ũrĩnaita naʉ̃ ʉ̃rʉ krĩchaseapanʉ, ẽbẽra abaʉba kʼaiba debe barabʉta akʉira kartade bʉ erbʉ kʼairaba debe erbʉta. Mamina iyaʼa maʉ̃ debe pagabʉdadera iyara X bʉebʉ kʼawuaita maʉ̃ debera pagasidata, mamina naʉ̃ne Jeowaba dayirã debe jarei jarabʉbara maʉ̃ta jarakĩrãbʉ ẽ. Maʉ̃ bia ũrĩnaita kʼawuadaya naweda kʼãrẽta opanasita kartade nebʉita, ãyara yi tintara ãba pʉerabasi karbonta, gomata baniaena. Maʉ̃ba naʉ̃ra mesera jarebʉeseabasi, maʉ̃ kʼarea ẽbẽra abaʉba iyaʼa kʼaiba debebʉta bʉ erbasibʉrʉ akʉza maʉ̃ta wua sʉrrʉakiruba jarebasibʉrʉ wua ũdu ẽ bakasi maʉ̃ kartade bʉbadara jipa ʉra wãsi baera akʉza maʉ̃ba debe neẽ bada kĩrãkʼa bakasi. Mejãchade sobiapanʉ dayirãba nemitia odara Jeowabara maʉ̃ kĩrãkʼa jipa jarebʉebʉ baera (Sal. 51:9).
Dayirã nemitiara jare wãñi (Hech. 3:19).
12. ¿Kʼãrẽta kʼawuapanʉ jãrãrã zroma yizadeba?
12 Isaías 44:22de Jeowaba awuru yizata zokʼabʉ ũdubita iya dayirã nemitiara jipa kĩrãduabʉta, nama jarabʉ: «Bʉ nemitiara mʉ̃ara jipa ãĩ bʉeyi jãrãrãba ara anabari kĩrãkʼa, bʉ kayiruara jãrãrã zromaba ara anabari kĩrãkʼa jipa ãĩ bʉeyi». Jeowaba dayirã nemitia kĩrãduabʉrʉdera dayima jãrãrã zromaba ara anabʉ kĩrãkʼabʉ, mawũã mia abaʉba wua ũduda ẽ marẽã.
«Bʉ nemitiara mʉ̃ara jipa ãĩ bʉeyi jãrãrãba ara anabari kĩrãkʼa» (Is. 44:22).
13. Jeowaba dayirãba nekʼãrẽ aña oda kĩrãduabʉrʉdera, ¿sãwũã sentipanʉ?
13 ¿Kʼãrẽta jaradiabʉ naʉ̃ra yizara jõmaʉ̃ba? Dayirãbara krĩchada ẽ baibara Jeowaba dayirã nemitia kĩrãduabʉrʉdera iya maʉ̃ra tẽã kĩrãbeita. Dayirã nemitiara Jesús beidaba jõma pagasi baera maʉ̃ra jõma jipa jare wãbʉ akʉza dayima maʉ̃ kayiruara oka bada kĩrãkʼabʉ. Jeowaba dayirã nemitia kĩrãduabʉrʉdera maʉ̃ta obʉ, iyara dayirã nemitiara jipa kĩrãduabʉ.
JEOWABARA JẼDA IYI NEŨDUKʼAWUA BABIBɄ
Jeowaba dayirã nemitia kĩrãduabʉba kʼarebabʉ iyiʉ̃me neũdukʼawua bia bamarẽã. (Akʉra parrapo 14).
14. ¿Kʼãrẽa ĩjãseapanʉ Jeowabara dayirã nemitiara jipa kĩrãduabʉta? (Akʉra potota).
14 Jeowaba dayirã nemitia kĩrãduabʉrʉdera dayirãbara kʼawuabaseabʉ jẽda iyi neũdukʼawua bia baseabʉta dayirãra. Naʉ̃ kʼawuaiba kʼarebabʉ dayirãba krĩcha ẽ baita Jeowabara dayirã kayiruara waidide jõma kĩrãdua ẽãta akʉza Jeowaba jʉ̃ãnʉmʉta sõbede dayirãba aña oita mawũã jẽda kĩrãbebita dayirãba kʼãrẽ aña odata. ¿Kʼãrẽa mawũã jarapanʉ? Jeowaba Jeremíasʼa naʉ̃ta jarasi baera: «Mʉ̃ara kĩrãduayi ãyi kayiruara akʉza jẽda kĩrãbe ẽ bayi ãyi kayiruara» (Jer. 31:34). Pabloba jaraside Jeowaba dayirã nemitia wua kĩrãbe ẽãta maʉ̃ bersikuloba jarabʉta jarasi (Heb. 8:12). ¿Kʼãrẽta jarakĩrãbʉ maʉ̃ba?
«Jẽda kĩrãbe ẽ bayi ãyi kayiruara» (Jer. 31:34).
15. ¿Kʼãrẽta jarakĩrãbʉ Jeowaba dayirã nemitia wua kĩrãbe ẽ bai jarabʉbara?
15 Daizeze Bedʼeade «kĩrãbei» jarabʉbara ewari jõmaʉ̃nẽ jarakĩrãbʉ ẽ naweda kʼãrẽ berabaridata jẽda krĩchaita. Edaʉde jarakĩrãbʉ nei oita, bari jaraita yumakẽrã Jesús kʼawa ʉ̃tʉ kachi jirabadaba, Jesúsʼa jarasi iyita kĩrãbemarẽã Jesúsba Daizeze Nokʼo zokʼabʉrʉde (Luc. 23:42, 43). Naʉ̃ yumakẽrãba maʉ̃ jarasidera jarakĩrãkʉa ẽ basi Jesúsba ʉ̃tʉ zokʼabʉrʉde iyita bari krĩchamarẽã, awuarabʉrʉ iyita kʼarebamarẽã kãgabasi akʉza Jesúsba jaradaba ũdubisi maʉ̃ ẽbẽra wãrĩnu kʼarebakĩrãbasita, iyara jẽda piradrʉbi kĩrãbasi. Maʉ̃ kʼarea Jeowaba dayirã nemitia wua kĩrãbe ẽ baita jarabʉbʉrʉ, naʉ̃ba jarakĩrãbʉ iyara badua dayirã jaranʉma ẽ baita dayirãba kʼare aña odata akʉza jʉrʉ ẽ baita dayirã sãwũã zʉbʉria oita akʉza jipa kĩrãduaita dayirã nemitiara.
16. Daizeze Bedʼeaba jarabʉdera, ¿Jeowaba dayirã nemitia kĩrãduabʉrʉdera sãwũã sentipanʉ?
16 Jeowaba dayirã nemitia kĩrãduabʉrʉdera nekʼãrẽneba ẽdrʉbʉ kĩrãkʼabʉ. Daizeze Bedʼeaba awuru yizata zokʼabʉ dayirã maʉ̃ta biʼia jara ũrĩbita, dayirãra nemitia omiara baera nemitiama kadenaba jʉ̃bʉ kĩrãkʼabʉ mamina Jeowaba dayirã nemitia kĩrãduabʉrʉdera maʉ̃ kadenaneba ẽdrʉbʉrʉ kĩrãkʼabʉ (Rom. 6:17, 18; Apoc. 1:5). Ẽbẽra aba kadenama jʉ̃bʉta maʉ̃neba ẽdrʉbʉrʉdera mejãcha sobiabʉ, abarika Jeowaba dayirã nemitia kĩrãduabʉrʉdera dayirãra mejãcha sobiapanʉ.
«Ẽdrʉsida baera nemitiadeba» (Rom. 6:18)
17. ¿Kʼãrẽa jaraseapanʉ Jeowaba dayirã nemitia kĩrãduabʉra kayabʉta bebʉ kĩrãkʼabʉta? (Isaías 53:5).
17 (Akʉra Isaías 53:5). Daizeze Bedʼeaba jarabʉ dayirãra nemitia omia baera ẽbẽra abaʉba kaya kayirua erbʉ kĩrãkʼabʉta, maʉ̃ba dayirãba nemitia obʉrʉdera Jeowaʉ̃me neũdukʼawua bia badata aduabʉ. Mamina Jeowaba dayirã kayabadara bebibʉrʉ kĩrãkʼasi yi Warrata dayirãbari beimarẽã zokʼaside, iyara ẽdrʉbisi maʉ̃ kayiruadeba akʉza dayirãra jẽda iyi neũdukʼawua baseapanʉ (1 Ped. 2:24). Ẽbẽra aba kayabʉta bebʉrʉdera mejãcha sobiabʉ, dayirãsida abarika sobiapanʉ Jeowaʉ̃me neũdukʼawuabadata jẽda ara obʉrʉdera akʉza Jeowaba dayirã jẽda bia akʉbʉrʉde.
«Iyi mejãcha zʉbʉriada kʼarea dayirãra besi» (Is. 53:5)
JEOWABA KĨRÃDUABɄBA SÃWŨÃ KʼAREBABɄ
18. ¿Yizara Daizeze Bedʼeadebʉba kʼãrẽta jaradiabʉ Jeowaba sãwũã kĩrãduabʉ ʉ̃rʉ? (Akʉra rekuadro «Jeowaba sãwũã kĩrãduabʉ dayirã nemitiara»).
18 ¿Kʼãrẽta kʼawuasida Daizeze Bedʼeade yizara jara ũrĩbibʉdeba Jeowaba sãwũã kĩrãduabʉ ʉ̃rʉ? Kʼawuasida Jeowabara dayirã nemitiara jipa kĩrãduabʉta akʉza ewari jõmaʉ̃nẽ, adewara iya dayirã nemitia mawũã kĩrãduabʉba kʼarebabʉ jẽda iyi neũdukʼawua bʼaita, mamina kĩrãbedaibara Jeowabara dayirã nemitiara kĩrãduaibara ẽãta. Iya dayirã nemitia mawũã kĩrãduabʉra nekʼãrẽ bari diabʉ kĩrãkʼabʉ iyi biadeba mawũã obʉ baera (Rom. 3:24).
19. (1) ¿Kʼãrẽa biga diadaibara Jeowaʼa? (Romanos 4:8). (2) ¿Kʼãrẽta kʼawuadai yi wuarebema artikulode?
19 (Akʉra Romanos 4:8). Mejãchade sobiapanʉ Salmo 130:4ba jarabʉ kĩrãkʼa Jeowaba dayirã nemitiata jipa kĩrãduabʉ baera. Mamina kĩrãbedaibara Jesúsba jaradata, iya jarasi: «Maraba kĩrãdua ẽ bʉrʉ wuabemaraba nemitia odata, mawũãra Daizezebida kĩrãdua ẽ bayi maraba nemitia obʉra» (Mat. 6:14, 15). Maʉ̃ba jipade yibia dayirãbida Jeowade kĩrãkʼa kĩrãduaita. Yi wuarebema artikulode kʼawuadayi sãwũã oseapanʉta iyide kĩrãkʼa.
TRÃBI 46 Gracias, Jehová
a Testo ebreoba zokʼabʉ bedʼearata mawũã ũdubita Jeowabʉrʉ abapaiba wãrĩnu kĩrãduaseabʉta dayirã nekayiruara. Mamina awuru Daizeze Bedʼearabara biʼia jara ũrĩbi ẽ naʉ̃ bersikuloba maʉ̃ jarabʉra.