Jeowaʼa biga diapanʉ dayirãba nemitia odata kĩrãduabʉ baera

1, 2. ¿Kʼãrẽa dayirãra kʉ̃ra aba berabarida kĩrãkʼa panʉ?

KRĨCHARA naʉ̃ta, ewari aba basi kʉ̃ra aba yibarirã plata mejãcha erbʉta, maʉ̃ta ewari aba yibarirãra asidenta kʼãrãpe beisi. Adewara ãya plata erbadara jõma gastasida, mamina maʉ̃ awa ẽ basi, yibarirabara mejãcha debebara amaesi, maʉ̃ kʼarea iyaʼa jarapanʉ mesera pagamarẽã maʉ̃ debeta. Mawũẽra yibarirãba iyita nekʼãrẽ bia amaei kaʉde debeta mejãcha amaesida, maʉ̃ba maʉ̃ra jõma paga au ẽ mejãcha baera.

² Abarika berabarisi dayirãta. Dayirã yibari Adán Evaʉ̃mera ãyira neneẽã panasi akʉza ẽjũã kĩrãwarẽãnẽ panasi adewara kʼãrẽba zʉbʉria ẽã ewari jõmaʉ̃nẽ baseapanasi (Gén. 1:27; 2:​7-9). Mamina atiaʉde jõma awuara besi, aduasida ãyi ewari jõmaʉ̃nẽ bʼaita. Mawũẽra, ¿kʼãrẽ nebiata amaesida ãyara dayirãitara? Daizeze Bedʼeaba jarabʉ: «Yumakẽrã abaʉdeba nekayiruara zesi naʉ̃ drʉa jõmaʉ̃nẽ, mawũã nekayiruadeba jõmaʉ̃ta beibarita amaesi akʉza maʉ̃neba ẽbẽrarã jõmaʉ̃ta beipanʉ, jõmaʉ̃ta nekayirua omia baera» (Rom. 5:12). Mawũẽra Adánbara dayirãita nemitia zromata amaesi, maʉ̃ nemitiara debe zroma kĩrãkʼabʉ, maʉ̃ba mapaga auda ẽ dayirãbara (Sal. 49:8).

3. ¿Kʼãrẽa dayirã nemitiara debe kĩrãkʼabʉ?

³ Jesúsba jarasi dayirã nemitiara dayirãba debe zroma erbʉ kĩrãkʼabʉta (Mat. 6:12; Luc 11:4). Dayirã nemitia obʉrʉdera Jeowaʉ̃me debe barabʉ kĩrãkʼabʉ. Mamina Jeowaba nekʼãrẽ oẽ basibʉrʉ dayirã nemitia kĩrãduaita dayirã beibʉrʉde maʉ̃ nemitiara pagabakasi akʉza jʉ̃ã ẽ bakasi tẽãne jẽda piradrʉita (Rom. 6:​7, 23).

4. (1) Kʼareba ẽ basibʉrʉ, ¿kʼãrẽta berabarikasi dayirãra? (Salmo 49:​7-9). (2) Daizeze Bedʼeaba nemitia omia jarabʉrʉdera, ¿kʼãrẽta jarakĩrãbʉ? (Akʉra rekuadro «Nemitia omia»).

⁴ Dayirã dobaʉbara jõma jẽda ũdu ẽ Adánba Evaʉ̃meba aduadara (akʉra Salmo 49:​7-9). Kʼareba neẽãra dayirãra jipa beikasi akʉza jẽda bʼaita krĩcha ẽ bakasi, nedʉwʉrʉ kĩrãkʼa (Ecl. 3:19; 2 Ped. 2:12).

5. ¿Kʼãrẽ nebiata diasi Jeowabara dayirã nemitiadeba ẽdrʉbita? (Akʉra poto yi nããrabemata).

⁵ Jẽda krĩchara kʉ̃ra nããra bedʼeadapeada ʉ̃rʉ. ¿Sãwũã sentikasi plata mejãcha barabʉba iyaʼa jarara iyi debe jõma pagaita? Iyira mejãcha sobiabakasi akʉza ĩjãkasi maʉ̃ba pagaya abʉra. Abarika Jeowaba dayirãta mejãcha kãgabʉ baera dayirã nemitia bari nebiata diasi. Maʉ̃neba kĩrãduabʉ iya dayirã kayiruara. Jesúsba jara ũrĩbisi kʼãrẽta maʉ̃ nebiara. Iya jarasi: «Daizezebara ẽbẽrarã mejãcha kãgabʉ baera diasi yi Warra aba bʉta iyidebema ĩjãbʉra bei ẽ bamarẽã, awuarabʉrʉ ewari jõmaʉ̃nẽ bʼaita» (Juan 3:16). Maʉ̃ nebiabara audre Jeowa neũdukʼawua babibʉ.

6. ¿Kʼãrẽta kʼawuadai naʉ̃ artikulodera akʉza kʼãrẽa?

⁶ ¿Kʼãrẽta odaibara dayirãba naʉ̃ nebia ũduita? Naʉ̃ bedʼea panʉnaita naʉ̃ artikulode akʉdayi ʉ̃kʉrʉ bedʼea Daizeze Bedʼeaba jarabʉta akʉza maʉ̃ba kʼãrẽta jarakĩrãbʉta.Naʉ̃ bedʼeara naʉ̃: jẽda ibiade bʼaita, espiasion, propisiasion, ẽdrʉbita, ẽdrʉsida akʉza Jeowaba neneẽãbʉta akʉbʉ. Dayirãba atia bedʼea kʼawuaita biʼia krĩchadara naʉ̃ba kʼarebayi Jeowaʼa biga diaita, iya dayirã nemitia kĩrãduabʉ baera.

KÃGABɄ JẼDA IBIADE BʼAITA

7. (1) ¿Kʼãrẽta aduasida Adán Evaʉ̃mebara? (2) Adánʼneba zedarabara, ¿kʼãreta odaibara? (Romanos 5:​10, 11).

⁷ Adán Evaʉ̃mebara bari adua ẽ basi ãyi ewari jõmaʉ̃nẽ bʼaita maʉ̃ awuara aduasi Daizeze Jeowaʉ̃me neũdukʼawua biata. Ãyi nemitia oi nããra Jeowa mebẽrã basi (Luc. 3:38). Mamina ãya Jeowa bedʼeata ũrĩ ẽ basi baera wua Jeowa mebẽrãne ba ẽ basi. Maʉ̃ra berabarisi ãyi wũãwũãra barai nãã (Gén. 3:​23, 24; 4:1). Maʉ̃ kʼarea ãyideba zedarãra Jeowa mebẽrãne eda babe ẽ basi, maʉ̃ba nesidapanasi kʼarebata, mawũã Jeowaʉ̃me jẽda ibiade bʼaita (akʉra Romanos 5:​10, 11). Maʉ̃ba dayirãbara nesidabasi wua Jeowa nejʉra ba ẽ baita, awuarabʉrʉ iyi neũdukʼawua bʼaita. Mamina maʉ̃ra nããra Jeowarebʉrʉ jʉrʉ jʉ̃drʉsi dayirã iyiʉ̃me ibiade bʼaira, ¿sãwũã osi iya maʉ̃ra?

ESPIASIONEBA

8. (1) ¿Kʼãrẽta jarakĩrãbʉ espiasion bedʼeabara? (2) ¿Kʼãrẽta jarakĩrãbʉ propisiasion bedʼeabara?

⁸ Espiasion. Naʉ̃ bedʼeabara jarakĩrãbʉ Jeowabara nekʼãrẽ jõma osita, mawũã ẽbẽrarã jẽda iyiʉ̃me ibiade bamarẽã. Maʉ̃ oira nekʼãrẽ iyaba balebʉta diaibara. Mawũã obʉrʉba jẽda erbaseabʉ nekʼãrẽ ãrĩnara, mawũã ẽ bʉrʉ jipa aduadara. Adewara Escrituras Griegaba zokʼabʉ bedʼea propisiasionta naʉ̃ra wĩña abarikabʉ bedʼea espiasionʼʉ̃me (Rom. 3:25). Propisiasionbara jarakĩrãbʉ Jeowaba kʼãrẽta osita ẽbẽrarã iyiʉ̃me neneẽã panamarẽã akʉza jẽda iyi neũdukʼawua bamarẽã.

9. ¿Kʼãrẽta osi Jeowaba israelitaraba nemitia obʉ kĩrãdua bʼaita?

⁹ Israelitara ewari baside Jeowaba nekʼãrẽ osi mawũã israelitaraba nemitia obʉrʉta kĩrãduaita akʉza Jeowata ãyibawara neũdukʼawua bia bamarẽã. Israelitarabara poaga abaʉde ewari aba opanasi Espiasion Ewarita. Sumo saserdotebara beabasi nedʉwʉrʉta pʉwʉrʉ nemitia obʉ bari. Mamina wãrĩnubaira naʉ̃ra nedʉwʉrʉrabara israelitaraba nemitia obʉra jõma ãĩ bʉeba ẽ basi, nedʉwʉrʉra edabʉ baera ẽbẽrarãira. Mawũãsidu, israelitaraba ãya nemitia obʉta jẽda krĩchabasibʉrʉ akʉza nedʉwʉrʉrata sakripisio diabasibʉrʉ, Jeowaba kĩrãduabasi ãyi nemitiara (Heb. 10:​1-4). Espiasion Ewaride akʉza awuru ewaride sakripisio obʉba israelitara kĩrãbebibasi ãyira nemitia omiata akʉza nesidabʉta nekʼãrẽ ʉ̃tabʉta mawũã ãyi nemitia jõma taʉbita.

10. ¿Kʼãrẽta osi Jeowabara ẽbẽrarã nekayirua kĩrãduaita?

¹⁰ ¿Jeowabara kʼãrẽta osi mawũã dayirãba nemitia obʉ jipa kĩrãduaita? Jeowabara zokʼa bʉesi yi Warrata dayirã nemitia bari beimarẽã. Maʉ̃ tẽãra wuara zokʼa bʉe ẽ basi (Heb. 9:28). Mawũã Jesúsʼra zesi «iyi bebʉ diaita wuabemara ẽdrʉbita» nemitiadeba (Mat. 20:28). ¿Kʼãrẽta jarakĩrãbʉ ẽdrʉbibara?

DIASI JESÚSTA

11. (1) ¿Kʼãrẽta jarakĩrãbʉ ẽdrʉbibara? (2) Dayirã ẽdrʉbi yumakẽrãra, ¿sãwũã baibarabasi?

¹¹ Daizeze Bedʼeadera ẽdrʉbibara jarakĩrãbʉ nekʼãrẽ diaita debebʉta pagaita, maʉ̃me ibiade bʼaita akʉza jipa wua kĩrãbe ẽ baita iya aña odata. Jeowaba maʉ̃ kĩrãkʼa osi dayirãba aduada jẽda erbaita. ¿Sãwũã? Kĩrãbedadrʉ Adán Evaʉ̃mebara aduasidata ãyi ewari jõmaʉ̃nẽ bʼaita akʉza nekayirua oka bʼaita. Maʉ̃ kʼarea Jeowaba dayirã ẽdrʉbira maʉ̃ kĩrãkʼabʉta diaibarabasi (1 Tim. 2:6). Dayirãra ẽdrʉbiseabasi yumakẽrã naʉ̃ nekʼãrẽ ũbea ũdubibʉba: Aba, nemitia okabaibarabasi. Ũme, ewari jõmaʉ̃nẽ baseabaibarabasi naʉ̃ Egorode. Ũbeata, iyi bebʉta dayirãbari diakĩrãbaibarabasi. Yumakẽrã mawũãbʉ beibʉrʉba ẽdrʉbiseabasi dayirã nekayiruadeba, dayirã debeta pagabʉrʉ kĩrãkʼa basi baera.

12. ¿Kʼãrẽa Jesúsbʉrʉ ẽdrʉbiseabasi dayirãra?

¹² Akʉdaya bedʼea ũbea kʼãrẽa Jesúsbʉrʉ dayirãra ẽdrʉbiseabasita nemitiadeba. Aba, iyira nemitiata okabasi baera (1 Ped. 2:22). Ũmeta, ewari jõmaʉ̃nẽ baseabasi naʉ̃ Egorode. Ũbeata, dayirã jõmaʉ̃bari beikĩrãbasi (Heb. 10:​9, 10). Jesúsʼra nemitia okabasi Adán nemitia oi nãã bada kĩrãkʼa (1 Cor. 15:45). Mawũã Jesús beibʉrʉba Adánba aduadata jẽda ũduseabasi (Rom. 5:19). Mawũã Jesúsʼra awuru Adán basi. Maʉ̃ba nesida ẽ awuru yumakẽrã nemitia okata zeita Adánba aduada jẽda ũduita, Jesústa jõmaʉ̃bari beisi baera akʉza maʉ̃ta wua oẽ bayi (Heb. 7:27; 10:12).

13. ¿Kʼãrẽne awuarabʉ ẽdrʉbita espiasionʼʉ̃mera?

¹³ ¿Kʼãrẽne awuarabʉ ẽdrʉbita espiasionʼʉ̃mera? Espiasionbara jarakĩrãbʉ Jeowaba nekʼãrẽ jõma obʉta ẽbẽrarãta iyibawara bia bʼaita mawũã ãyita iyi neũdukʼawua badamarẽã. Ẽdrʉbibara jarakĩrãbʉ nekʼãrẽ diaita mawũã dayirã nemitiadeba ẽdrʉbita. Jesúsʼra jõmaʉ̃bari beisi dayirã debe pagaita, mawũã dayirã nemitiadeba ẽdrʉbita (Efes. 1:7; Heb. 9:14).

ẼDRɄSIDA AKɄZA NENEẼÃ AKɄBɄ

14. ¿Kʼãrẽta kʼawuadai naʉ̃arera akʉza kʼãrẽa?

¹⁴ ¿Kʼãrẽ nebiata ũdupanʉ dayirãbara Jeowaba dayirã kʼarea odaba? Naʉ̃ bedʼea panʉnaita akʉdaya Daizeze Bedʼeaba bedʼea ũme jarabʉ ʉ̃rʉ akʉza maʉ̃ba kʼãrẽta jarakĩrãbʉta. Maʉ̃neba kʼawuadayi kʼãrẽ nebiata ũdupanʉta dayirãba Jeowaba dayirã nemitia kĩrãduabʉdeba.

15, 16. (1) Daizeze Bedʼeadera, ¿kʼãrẽta jarakĩrãbʉ bedʼea ẽdrʉsidabara? (2) ¿Sãwũã sentipanʉ ẽdrʉsida baera beideba akʉza nemitiadeba?

¹⁵ Daizeze Bedʼeaba ẽdrʉsida jarabʉdera jakirabʉ dayira debebʉdeba ẽdrʉbisidata Jesústa dayirã jõmaʉ̃bari beisi baera. Apostol Pedrobara naʉ̃ta jarasi: «Marabara kʼawuapanʉ nekʼãrẽ ãrĩbariba (plata oro) ẽdrʉbi ẽ basita mara yibarira nabemaneba diamenanebara. Awuarabʉrʉ mejãcha yibia basi iyi wara, neneẽã basi kordero neneẽãbʉ kĩrãkʼa, Jesús wara» (1 Ped. 1:​18, 19).

¹⁶ Jesústa dayirãbari beisi baera ẽdrʉsida beideba akʉza nemitia omianeba, maʉ̃bara mejãcha zʉbʉriabibʉ dayirãra (Rom. 5:21). Jeowaʼa Jesúsʼa biga diapanʉ Jesústa beisi baera dayirã jõmaʉ̃bari, mawũã ẽdrʉbita nemitiadeba (1 Cor. 15:22).

17, 18. (1) ¿Kʼãrẽta jarakĩrãbʉ neneẽã baibara? (2) ¿Kʼãrẽ nebiata ũdui neneẽãbʉ bara?

¹⁷ Jeowaba dayirãra neneẽã bʉta akʉira, naʉ̃bara jarakĩrãbʉ dayirãba obadata jare wãsita akʉza nemitia oka kĩrãkʼa beita. Naʉ̃bara jarakĩrãbʉ ẽ Jeowaba nekʼãrẽ omarẽã jarabʉra iyara aripe oẽãta. Jeowabara dayirãra neneẽãbʉ aẽ dayirãta zarea osi baera mawũã bʼaita. Adewara maʉ̃ba jarakĩrãbʉ ẽ Jeowabara kayiruara bia akʉbʉta. Jeowabara kĩrãduabʉ dayirãba nemitia obʉra ĩjãpanʉ baera Jeowaba akʉza yi Warraʉ̃meba nekʼãrẽta osita maʉ̃ nemitiadeba ẽdrʉbita (Rom. 3:24; Gál. 2:16).

¹⁸ ¿Kʼãrẽ nebiata ũdupanʉ Jeowaba dayirã neneẽãbʉta akʉbʉ baera? Ʉ̃kʉrʉ kristianorãra jidasida ʉ̃tʉ Jesúsʼʉ̃meba zokʼadamarẽã, mawũã Daizeze warrara basi (Tito 3:7; 1 Juan 3:1). Daizezeba ãya nemitia obʉta kĩrãduasi baera maʉ̃ba nemitia oka kĩrãkʼabʉ akʉza iduaribibʉ Daizeze Nokʼota zokʼadamarẽã (Rom. 8:​1, 2, 30). Ʉ̃kʉrʉ kristianora nama egorode bairasida, ãya nemitia obʉra Daizezebara kĩrãduasi, mawũã ewari jõmaʉ̃nẽ baseapanʉ naʉ̃ Egorode, adewara Daizeze neũdukʼawua baseapanʉ (Sant. 2:​21-23). Ẽbẽrarã mejãcha Armagedónʼne bei ẽã berabaridara ãyira ewari jõmaʉ̃nẽ baseabayi (Juan 11:26). Ẽbẽrarã «bia obeta» akʉza «bia ẽã obeta» jẽda piradrʉyi (Hech. 24:15; Juan 5:​28, 29). Mawũã ẽbẽrarã Drʉa biade panairãra Daizeze wũãwũãra bayi (Rom. 8:21). Maʉ̃ ewari zeita jʉ̃ãpanʉ mawũã Jeowaʉ̃me aduʼa bʼaita. Maʉ̃ra kʼãrẽ yibia.

19. Jeowaba Jesúsʼʉ̃meba oda kʼarea, ¿dayirãra sãwũã panʉ? (Akʉra rekuadro «Jeowaba kĩrãduabʉ nemitia odara»).

¹⁹ Dayirãra nemitia omia baera samare ẽdrʉira neẽ basi, abarika kʉ̃ra aba yibariraba debe mejãcha amaena kĩrãkʼa. Mamina Jeowaba nekʼãrẽ osi dayirã nemitiadeba ẽdrʉbita mawũã jẽda iyiʉ̃me bia bʼaita. Dayirãba ĩjãpanʉ baera Jesústa dayirãbari beisita, maʉ̃neba Jeowabara ẽdrʉbibʉ beideba akʉza nemitia omianeba. Adewara Jeowabara akʉyi dayirã kʼãwũã nemitia omiara nemitia okabada kĩrãkʼa. Mamina naʉ̃nebema yi audre yibiara dayirãra Jeowa neũdukʼawua baseabʉ.

20. ¿Wuarebema artikulodera kʼãrẽta kʼawuadai?

²⁰ Dayirãba bia krĩchabʉdade Jeowaba Jesúsʼʉ̃meba nekʼãrẽ mejãcha odata dayirãbari, ãyaʼa biga diapanʉ (2 Cor. 5:15). Jeowaba Jesúsʼʉ̃meba dayirãta kʼareba ẽ basibʉrʉ dayirãbara kʼãrẽ nebiara jʉ̃ã ẽ bakasi. Wuarebema artikulode kʼawuadayi Daizeze Bedʼeade ʉ̃kʉrʉ yizara bʉta, naʉ̃ba kʼarebayi Jeowaba dayirãba nemitia obʉ kĩrãduabʉrʉdera krĩchada ẽ baibarata jipa kĩrãdua ẽãta dayirã nemitiara.