YI 35

¿Mʉ̃ra sãwũã Daizeze neũdukʼawua baseabʉ?

Gabrielbara kʼawuasi kʼãrẽaba yibiata Daizeze neũdukʼawua bʼaira kʼãwũã bedʼea zromane nʉminane. Iya nebʉrabʉ: «Mʉ̃ 12 poagabʉde mʉ̃ zezebara daira amaesi, mʉ̃ta ewari aba diamasi mʉ̃ kʼãĩbarimae, Jeowa soiduba jẽga widisi mʉ̃ zezeta jẽda zebimarẽã»

Gabrielbara iyi sopʉabasimina akʉsi Daizeze Bedʼeara, mama ũdusi naʉ̃ bedʼeata: «Yi zʉbʉriabʉra bʉaʼa kʼareba widibʉ, bʉa kʼarebabʉ yi jẽrãmarara» (Salmo 10:14). Gabrielba jarasi: «Mʉ̃a Daizeze Bedʼea akʉsidera, maʉ̃ra mʉ̃ soidu zesi. Mʉ̃a maʉ̃ra testora lebaside kʼawuasi iya mʉ̃ra kʼarebakĩrãbʉta. Iya mʉ̃a kĩrãbebisi iyira mʉ̃ Zezeta, naʉ̃ Zeze kĩrãkʼara jãpera neẽ».

¿BɄRA Gabriel kĩrãkʼa berabaribarika? Berabaribari kĩrã mawũã ẽ bʉrʉ berabarika mamina Jeowara wãrĩnu bʉ neũdukʼawua bakĩrãbʉ. Daizeze Bedʼeaba jarabʉ: «Daizeze kʼaita bʼaidua, mawũãra iyira mara kʼaita baya» (Santiago 4:8). ¿Bʉara ũrĩsika? Iyira yi zromamina akʉza dayirãba ũdu ẽ mina iya jarabʉ dayi neũdukʼawua bakĩrãbʉta.

Dayirãta Daizeze neũdukʼawua bakĩrãbʉbʉrʉ zarea odaibara. Bari jaradaita, dayirãba ne uta erbʉbʉrʉ bari akʉda ẽ baibara, awuarabʉrʉ baniata weaibara, mawũã biʼia pãwãnamarẽã akʉza bei ẽ marẽã. Maʉ̃ kĩrãkʼabʉ daya Daizeze ũdukʼawuaita. ¿Kʼãrẽta oibara iyi audre ũdukʼawa wãita?

Daizeze Bedʼea kʼawuaira yibia

Daya neũdukʼawua bia erbaira yiya bedʼeapanaibara. Maʉ̃ kĩrãkʼabʉ Daizeze ũdukʼawuaita. Mamina ¿Dayirãba maʉ̃ra sãwũã odai? Iyi bedʼeata akʉ bʼaibara (Salmo 1:2, 3).

Mamina bʉra krĩchaseabʉ Daizeze Bedʼeata akʉ kʉidabʉrʉ ma sẽseabʉta, mawũã ẽ bʉrʉ krĩchaseabʉ telebisor akʉbʉrʉde, selular akʉbʉde audre yibia bʼaita. Mamina bʉra wãrĩnu Daizeze neũdukʼawua bakĩrãbʉbʉrʉ akʉibara iyi Bedʼeara, mawũã audre iyi neũdukʼawua bʼaita.

Bʉara krĩchaseabʉ Daizeze Bedʼea akʉira bʉre ẽãta, ma sẽtotoita, mamina ewariza akʉ wãra audre akʉkĩrã akʉ wãñi. Nããra jʉrʉibara Daizeze Bedʼeara kʼãrẽ ũmadaʉde akʉita. Laisba jarabʉ: «Mʉ̃ara Daizeze Bedʼeara akʉbʉ diapeda kʼãrẽ oi naweda». María, 15 poagabʉba jarabʉ: «Mʉ̃ara Daizeze Bedʼeara akʉbʉ mʉ̃ kʼãĩnaweda diamasi».

¿Bʉitara kʼãrẽ ũmadaʉde audre yibia Daizeze Bedʼea akʉita? Rekuadro pagina 292ba bʉta kʼarebaseabʉ. Maʉ̃ akʉ kʼãrãpe bʉra nama Daizeze Bedʼea kʼãrẽ ũmadaʉ aba bayeda akʉseabʉta.

․․․․․

Bʉa kʼawuabʉrʉde Daizeze Bedʼea kʼãrẽ ũmadaʉde akʉita, jʉ̃drʉseabʉ. Mamina bʉita Daizeze Bedʼea akʉ jʉ̃drʉbʉrʉ tẽã zarea baseabʉ, Jezreel berabarida kĩrãkʼa bʉsida mawũã berabariseabʉ, iyira 11 poagabʉ. Iya jarabʉ: «Edaʉde Daizeze Bedʼeade edabʉta ʉ̃kʉrʉ bedʼea ũrĩta jipa zareabʉ». Mamina bʉita maʉ̃ra zaremina mapaerãra, bʉa Daizeze Bedʼea akʉbʉrʉdera bʉ neũdukʼawua, Jeowaʉ̃me bedʼeabʉ kĩrãkʼabʉ. Bʉa maʉ̃ta obʉbʉrʉ ewariza akʉkĩrã akʉ wãñi akʉza kãgayi. Daizeze Bedʼearadebemaba mejãcha kʼarebai baera.

Yiwidʼi bʼaita iduaribirãra

Yiwidʼibʉdeba Jeowaʉ̃me bedʼeaseabʉ. Mawũã oira audre yibia, Jeowabara kãgabʉ dayirãbara iyaʼa bedʼeamarẽã badu ũmadaʉde, diapeda mawũã ẽ bʉrʉ diamasi, akʉza iyara kãgabʉ dayirãba krĩchabʉta adewara dayirã sode jõma edabʉta jaramarẽã iyaʼa. Mõbe «Nekʼãrẽ badu» ʉ̃rʉ «yiwidiʼdua» Jeowaʼa akʉza «bika diaidua» (Filipenses 4:6).

Bʉara nekʼãrẽ baduta jõma jaraseabʉ Jeowaʼa, bedʼea zroma ʉ̃rʉ, bʉ kʼãrẽ krĩcha obibʉ ʉ̃rʉ, mamina maʉ̃ awa ẽ, bʉara bika diaseabʉ iyi nebia diabʉ ʉ̃rʉ. Dayi neũdukʼawuaba nebia obʉrʉde daya biga diabʉ kĩrãkʼa, Jeowaʼa biga diaibara. Jeowaba dayi kʼarea obʉ kĩrãkʼara miõba oẽ (Salmo 106:1).

Nekĩrã bio bʉra bʉa Jeowaʼa biga diaseabʉta..

․․․․․

¿Bʉa oẽãsidu mejãcha weta bidabʉrʉ bedʼea zromata akʉza bedʼea puata kʼãrẽta oseabʉ? «Bʉ zʉgʉara Jeowa ʉ̃rʉ bʉra, iya kʼareba atʉya. Akʉza iyara idu baebi ẽ bayi ẽbẽra biara» (Salmo 55:22).

Nama bʉra kʼãrẽ bedʼea zroma ʉ̃rʉ jaraita Jeowaʼa yiwidʼibʉrʉde.

․․․․․

Kʼawuara bʉ sãwũã berabaribʉdeba

Dayirãta Daizeze neũdukʼawua bakĩrãbʉbʉrʉ, nãã kʼawuaibara Jeowaba kʼãrẽta osita dayirã kʼarea. Salmo 34:8 Davidba bʉsi trãbita, jarabʉ: «Mayikʉzaʉba akʉidua Jeowara ẽbẽra biata» (Salmo 34:8). Davidba naʉ̃ bedʼea zroma ũduda tẽã naʉ̃ trãbita bʉsi. Iyira Saúlba beakĩrãbasi, mamina iyi mawũã beada ẽ bamarẽãra wãibarabasi iyi nejʉrara pʉwʉrʉma, filisteoidu. Mama eda maʉ̃raba beada ẽ bamarẽã kĩrãnemabʉ kĩrãkʼa bʼaibarabasi (1 Samuel 21:10-15).

David iyi mawũã ẽdrʉsidera jara ẽ basi iyi buru bia kʼarea mawũã basita, maʉ̃ba iya maʉ̃ trãbi bʉdade jarasi Jeowaba iyita ẽdrʉbisita (Salmo 34:4). David sãwũã berabaridadeba kʼawuasi Jeowara wãrĩnu iyi neũdukʼawuabasita. Maʉ̃ kʼarea iya bʉsi: «Mayikʉzaʉba akʉidua Jeowara ẽbẽra biata».a

Krĩchara akʉza bʉra Jeowaba bʉra sãwũã kʼarebasita. Bʉara bʉseabʉ bʉ kʼãrẽ zromane iya kʼarebada ʉ̃rʉ mawũã ẽ bʉrʉ bʉseabʉ bʉ kʼãrẽ wĩkabʉde kʼarebadadebida.

․․․․․

Bʉara bʉyidobaʉba audre Daizeze neũdukʼawua ba wãita, maʉ̃ta oseabʉ bʉ yibarirata Daizeze ode kʼẽrẽpabʉbʉrʉ mawũã ẽ bʉrʉ bʉ yibarirata Daizeze ode kʼẽrẽpa bʉ ẽ mina. ¿Bʉara atiara maʉ̃ta onʉmʉka Daizeze neũdukʼawua bʼaita? Maʉ̃ta onʉmʉ ẽ bʉrʉ, ¿kʼãrẽta oseabʉ audre Daizeze neũdukʼawua bʼaita? Maʉ̃ oita naʉ̃ kapituloba kʼarebayi bʉra. Daizeze Bedʼeaba jarabʉ: «Wididua mawũã maraʼa diaya, jʉrʉidua mawũã ũduya» (Mateo 7:7).

BɄARA AUDRE KʼAWUAYI KAPITULO 38DE AKɄZA 39DE LIBRO NÃÃRABEMANE

[Nota]

TESTO YIBIATA

«Sobiapanʉ Daizezedebema audre kʼawuakĩrãpanʉta» (Mateo 5:3).

ŨRÃGʼATA

Bʉa Daizeze Bedʼeadebemata ewariza pagina kimare akʉbʉbʉrʉ poaga aba babʉrʉde jõma maleyi.

¿KʼAWUABASIKA?

Wãrĩnu baira bʉara lenʉmʉ naʉ̃ librora akʉza Daizeze Bedʼeara, Jeowaba kãgabʉ baera bʉta iyi neũdukʼawua bamarẽã (Juan 6:44).

OJɄ̃DRɄITA

Mʉ̃a audre Daizeze Bedʼeata kʼawuakĩrãbʉ baera, naʉ̃ta oyi: ․․․․․

Mʉ̃ Jeowaʼa badua yiwidʼi bʼaita, naʉ̃ta oyi: ․․․․․

¿Mʉ̃ara kʼãrẽta widiseabʉ mʉ̃ yibariraʼa naʉ̃ bedʼea ʉ̃rʉ?: ․․․․․

¿BɄMARA?

● ¿Bʉara kʼãrẽta oseabʉ Daizeze Bedʼea akʉbʉdera masẽ ẽ baita?

● ¿Kʼãrẽa Jeowabara kãgabʉ iyaʼa yiwidʼidamarẽã dayirãba edaʉde aña opanʉmina?

● ¿Kʼãrẽta oseabʉ audre Jeowaʉ̃me soiduba bedʼea wãita?

[Komentario]

«Mʉ̃ wĩkakẽrãside mʉ̃a iyabaʉ bedʼeata jarabasi yiwidʼibʉrʉdera. Mamina mʉ kʼãwũã yi zromachudade mʉ̃a idi ewade Jeowaʼa jarabʉ awuru bedʼeata, kʼãrẽ bedʼea zroma erbʉta akʉza mʉ̃ kʼãrẽ sobiabibʉta, maʉ̃ ewarira iyabaʉ ẽ baera» (Eva)

[Rekuadro akʉza Dibujo]

Daizeze Bedʼeata biʼia ũdukʼawuara

1. Jʉrʉda Daizeze Bedʼeadebema nebʉrata bʉa audre kãgabʉta. Bʉa maʉ̃ audre biʼia ũrĩta Jeowaʼa widira iyi jaure zareata.

2. Ũrĩne lera. Mesera lerãra, awuarabʉrʉ kĩrãkita krĩchara maʉ̃ yiko warra kobʉta, ʉ̃ra kʼãrẽ tũãpuabʉta, akʉra kʼãrẽta berabarinʉmʉta eda, sama berabarinʉmʉta. Bʉa maʉ̃ta ora bʉa Daizeze Bedʼea akʉkĩrã akʉyi akʉza bʉ burude bayi.

3. Naʉ̃ ʉ̃rʉ widira bʉyikʉza. Naʉ̃ nẽbʉra jõma maakʉ berabaribʉrʉde, naʉ̃ta krĩchara:

● ¿Jeowabara kʼãrẽa bʉbisi iyi Bedʼeadera maʉ̃ nebʉrara?

● ¿Naʉ̃ nebʉradebemara saʉ̃ta yizabia mʉ̃itara akʉza saʉ̃ta yizabia ẽ?

● ¿Naʉ̃bara mʉ̃ara kʼãrẽta jaradiabʉ mʉ̃ bia wãita?

● ¿Kʼãrẽta jaradiabʉ Jeowa ʉ̃rʉ akʉza iya kʼãrẽta obʉ ʉ̃rʉ?

4. Yiwidʼira. Jarada Jeowaʼa bʉa kʼãrẽ kʼawuadata, sãwũã maʉ̃ta o ũdubita. Akʉza bika diara iyi Bedʼea kʼarea.

[Dibujo]

«Bʉ bedʼeara mʉ̃ ʉ̃na teibabari kĩrãkʼabʉ akʉza ʉ̃nabʉ mʉ̃ oita». (Salmo 119:105).

[Rekuadro akʉza Dibujo]

nããra oibara yi audre yibiata

¿Bʉra ewari neẽka yiwidʼita akʉza Daizeze Bedʼea akʉita? Bʉara nããra kʼawuaibara kʼãrẽta audre yibiata oita.

Naʉ̃ta odaya: Baldede eda nãã bʉeyi mõgarara ariguidebʉta, maʉ̃are ibʉba maʉ̃ birayieda. Mõbera, ¿kʼãrẽta ũdupanʉ? Bʉmabida eda baldede ũdupanʉ mõgarata ibʉʼʉ̃me, maʉ̃raba birabʉta.

Atia nãã ibalbʉera ibʉta, maʉ̃are mõgarata. Bʉmabida ara ẽ, nããra ibʉta ibalbʉesi baera, maʉ̃are mõgarata.

Daya kʼawuabʉta: Dayirãba nãã nekʼãrẽ jemeneita bʉera Daizezedebema oita ewari neẽbayi. Daizeze Bedʼeaba jarabʉ kĩrãkʼa, wuagaibara nekʼãrẽ audre yibiata (Filipenses 1:10). Dayirãba maʉ̃ta ora, iyidebemata nãã bʉera nekʼãrẽ baduira, mõbemata ewari erbayi dayirã wĩña jemeneita akʉza nekʼãrẽ wuabemara oita. Kĩrãbera: nããra oibara yi audre yibiata.

[Dibujo]

Daizezeʉ̃me neũdukʼawua bʼaira ne u kĩrãkʼabʉ, biʼia warimarẽãra biʼia akʉibara.