YI 37
¿Mʉ̃ra atiara buru kʼoeseabʉka?
Jidara wãrĩnu kʼawuaita mawũã ẽ bʉrʉ sewa nebʉrʉ kʼawuaita:
Kristianora jõmaita buru kʼoe zeibara.
□ Wãrĩnu
□ Sewida
Dayirãra buru kʼoeibara nekayirua oze ẽ baita.
□ Wãrĩnu
□ Sewida
Buru kʼoeiba Daizeze ode ʉ̃ra jʉ̃drʉdogo.
□ Wãrĩnu
□ Sewida
Mʉ̃ta buru kʼoe zera, Daizezebara mʉ̃ara kʼãrẽ jara ẽ bayi mʉ̃a kʼãrẽ obʉ kʼarea.
□ Wãrĩnu
□ Sewida
Mʉ̃ neũdukʼawuarata buru kʼoesi baera mʉ̃sida buru kʼoe zeibara.
□ Wãrĩnu
□ Sewida
DAIZEZE Bedʼeaba jarabʉ kĩrãkʼa, ¿bʉka bʉra? ¿Zarea obʉka Daizeze neũdukʼawua ba zeita? ¿Bʉa ĩjãbʉ ʉ̃rʉ wuabemara ẽbẽrarã bedʼeabʉka? Bʉa naʉ̃ bedʼeata ãjã asibʉrʉ, maʉ̃ba jarakĩrãbʉ bʉra yi buru kʼoemata. Mamina, bʉta wabida buru kʼoe ẽ chubʉrʉ maʉ̃ta krĩchanʉmʉbaibara. Mamina, buru kʼoe zei nãã krĩchaibara wãrĩnu buru kʼoekĩrãbʉta. Bʉa kʼawuakĩrãbʉbʉrʉ bʉ buru kʼoeya awabʉta akʉibara bedʼea ʉ̃trebʉrata sãwũã panʉnata.
● Kristianora jõmaita buru kʼoe zeibara.
Wãrĩnu. Naʉ̃ta zokʼasi Jesuba omarẽã iyi kʼaidupanʉra (Mateo 28:19, 20). Jesusida buru kʼoe zesi. Bʉ Jesu kʼaidu babari zeira buru kʼoeibara. Nãã bia krĩchaibara bʉa maʉ̃ta okĩrãbʉ kʼawuaita akʉza oseabʉ kʼawuaita.
● Dayirãra buru kʼoeibara nekayirua oze ẽ baita.
Sewida. Buru kʼoeiba ũdubibʉrʉ jõmaʉ̃ra, bʉ bebʉra Jeowaʼa diabʉrʉta. Dayi bebʉta Jeowaʼa diabʉbʉrʉ, maʉ̃ba jarakĩrãbʉ bakĩrãbʉta Jeowaba jarabʉrʉde, mawũã buru kʼoe ze ẽ oẽ bʼaita nekayirua dayi sodebʉta.
● Buru kʼoeiba Daizeze ode ʉ̃ra jʉ̃drʉdogo.
Wãrĩnu. Daizeze bedʼeaba jarabʉ kĩrãkʼa dayirã buru kʼoeiba kʼarebabʉ ẽdrʉita (1 Pedro 3:21). Maʉ̃ mawũãbʉmina bari maʉ̃ kʼarea buru kʼoeibara ẽ akʉza maʉ̃ba jarakĩrãkʉ ẽ bei ẽãta. Buru kʼoeibara wãrĩnu Jeowata kãgabʉ baera akʉza iya jarabʉta okĩrãbʉ baera soiduba ewari jõmaʉ̃nẽ (Marcos 12:29, 30).
● Mʉ̃ta buru kʼoe zera Daizezebara mʉ̃ara kʼãrẽ jara ẽ bayi mʉ̃a kʼãrẽ obʉ kʼarea.
Sewida. Santiago 4:17ba jarabʉ: «Abaʉba kʼawuabʉbʉrʉ kʼãrẽ nebiata mawũãsidu oẽbʉrʉ, nekayiruata obʉ». Maʉ̃ra mawũã berabaribʉ krĩcha ẽã yi ẽbẽra buru kʼoebʉta, mawũã ẽ bʉrʉ buru kʼoe ẽãbʉta. Maʉ̃ kʼarea naʉ̃ ʉ̃rʉ krĩchara: ¿Bʉara kʼawuabʉka Daizezeba bʉa kʼãrẽta omarẽã jʉ̃ãbʉta? ¿Bʉara bia kʼawuabʉka bʉ bebʉde nekʼãrẽ oita? Naʉ̃ neẽ bʉrʉ bʉra bedʼeaseabʉ bʉ yibariʉ̃me mawũã ẽ bʉrʉ kristiano Daizeze ʉ̃rʉ audre bia kʼawuabʉme. Bʉra ãya kʼarebaseabʉ audre bia oita akʉza mawũã buru kʼoe zemarẽã.
● Mʉ̃ neũdukʼawuarata buru kʼoesi baera mʉ̃sida buru kʼoe zeibara.
Sewida. Bʉta wãrĩnu buru kʼoe kĩrãbʉbʉrʉ bʉ sodeba oibara (Salmo 110:3). Adewara buru kʼoe zeibara wãrĩnu kʼawuabʉrʉde kʼãrẽta jarakĩrãbʉta Jeowa ʉ̃rʉ Kʼawuabipanʉrã ba zeira, adewara wãrĩnu ĩjãibara bʉa oseabʉta Jeowaba zokʼabʉra (Eclesiastés 5:4, 5).
Buru kʼoeiba bʉ bebʉra awuarabida.
Buru kʼoeiba bʉ bebʉra awuarabida akʉza nekʼãrẽ biata mejãcha ũduseabʉ. Bʉa jaraside Daizezeʼa bʉ bebʉ diaita maʉ̃ra wãrĩnu oũdubibara.
¿Bʉ buru kʼoeira ara baka? Maʉ̃ kʼarea sobiabʉbaibara. Jeowa ode bʼai kĩrãkʼara jipara jãpera neẽ akʉza ewariza Jeowaba jarabʉ kĩrãkʼa bʼaira neẽ (Mateo 22:36, 37).
WUAREBEMA KAPITULODE AKɄDAYI Kʼawuara kʼãrẽta oibarata bʉ bebʉde audre nekʼãrẽ owãita.
TESTO YIBIATA
«Mara kakuara diadamarẽã sakripisio kĩrãkʼa Daizezeita, neneẽã iya kãgaide; mawũãtrʉ iyi bedʼeara aribaedaya krĩcha biadeba» (Romanos 12:1).
ŨRÃGʼATA
Bedʼeara bʉ yibarirabawara mawũã ẽ bʉrʉ mebẽrã kongregasionebemabawara bʉ kʼarebaseabʉta audre Daizeze kʼawa bʼaita (Hechos 16:1-3).
¿KʼAWUABASIKA?
Buru kʼoeira yibia maʉ̃ra marka kĩrãkʼabʉ baera dayirã ẽdrʉbita (Ezequiel 9:4-6).
OJɄ̃DRɄITA
Mʉ̃ buru kʼoei nããra kʼãrẽ Daizeze Bedʼeadebemata audre bia ũrĩbara: ․․․․․
Mʉ̃ yibarira kʼãrẽta widikĩrãbʉ maʉ̃ ʉ̃rʉ: ․․․․․
¿BɄMARA?
● ¿Kʼãrẽa yibia buru kʼoeira?
● ¿Kʼãrẽa ʉ̃kʉrʉ warrarãra wabida ẽ nãã buru kʼoebʉ?
● ¿Kʼãrẽa ʉ̃kʉrʉ warraraba ewari mejãcha jʉ̃ãbʉ Daizezeʼa iyi bebʉ diaita akʉza buru kʼoeita?
[Komentario]
«Mʉ̃ kʼãwũã buru kʼoebʉba kʼarebasi nekʼãrẽ bia jidaita mawũã oẽ baita nekʼãrẽ mitia mʉ̃ zʉbʉriabiseabʉta» (Holly).
[Rekuadro/Poto]
¿kʼãrẽta widiseabʉ buru kʼoei ʉ̃rʉra?
¿Buru kʼoeibara kʼãrẽta jarakĩrãbʉ? Bʉ doeda joaedabʉdade maʉ̃ta beibʉ kĩrãkʼabʉ, amaebʉrʉ baera bʉa nãã nekayirua obadata akʉza bʉ krĩchama zebadata. Akʉza banianeba jẽda jiraedabʉdadera jẽda zokʼaibʉ kĩrãkʼabʉ, maʉ̃neba ʉ̃ta Jeowaba kãgabʉta okĩrãbʉ baera.
¿Kʼãrẽta jarakĩrãbʉ bʉ bebʉ Jeowaʼa diaita? Jarakĩrãbʉ bʉ bebʉra Jeowaʼa diabʉrʉta, mawũã oẽbayi bʉa kãgabʉ awa (Mateo 16:24). Maʉ̃ba buru kʼoei nãã Jeowa yiwidʼibʉde jaraibara iya kãgabʉta oita ewari jõmaʉ̃nẽ.
¿Kʼãrẽta oibara mʉ̃ buru kʼoei nããra? Bʼaibara Daizeze Bedʼeaba jarabʉ kĩrãkʼa akʉza jaraibara awuruʼa bʉa ĩjãbʉ ʉ̃rʉ. Adewara Jeowa neũdukʼawua bʼaibara, maʉ̃ra oibara iyi ʉ̃rʉ akʉbʉde akʉza yiwidʼibʉde. Arigʉ yibia Jeowaba kãgabʉ oita bʉ krĩchadeba zebʉ baera, mawũã awuruba jarabʉ kʼarea oẽ baibara.
¿Kʼãrẽ poagababidade buru kʼoeseabʉ bʉra? Krĩcha ẽ baibara bʉ kʼãrẽ poagababidade buru kʼoeita. Mamina kʼawuabaibara kʼãrẽta jarakĩrãbʉta bʉ bebʉ Daizezeʼa diaita.
Mʉ̃ buru kʼoeikĩrãbʉde mʉ̃ yibariraba jʉ̃ãmarẽã jarabʉdabʉrʉ, ¿mʉ̃ara kʼãrẽta oseabʉ? Ãya krĩchabʉbʉrʉ wabida waebʉta Daizeze Bedʼeaba jarabʉ kĩrãkʼa oita, ũrĩda ãyi bedʼeata, maʉ̃ena zarea ora audre Jeowa kʼawa bʼaita (1 Samuel 2:26).
[Rekuadro]
Naʉ̃ta
¿bʉra buru kʼoeita krĩchanʉmʉka?
Naʉ̃ra widiba kʼarebayi bʉa bia obʉ kʼawuaita. Testota akʉra panʉi nãã.
¿Bʉara sãwũã ũdubibʉ wãrĩnu Jeowade ĩjãbʉta? (Salmo 71:5). ․․․․․
¿Bʉara bia kʼawuabʉka saʉ̃ta nebiata akʉza saʉ̃ta nekayiruata? (Hebreos 5:14). ․․․․․
¿Bʉra badua yiwidʼibʉka? ․․․․․
¿Bʉ yiwidʼibʉrʉdera kʼãrẽ ʉ̃rʉ yiwidʼibʉ? ¿Bʉ yiwidʼibʉdeba ũdubibʉka Jeowaʼa kãgabʉta? (Salmo 17:6). ․․․․․
¿Kʼãrẽba kʼarebai audre bia yiwidʼita? ․․․․․
¿Badua Daizeze Bedʼea akʉbʉka? (Josué 1:8) ․․․․․
¿Bʉyidobaʉba estudiabʉrʉdera kʼãrẽ ʉ̃rʉ estudiabʉ? ․․․․․
¿Kʼãrẽta okĩrãbʉ bʉa bʉyidobaʉba estudiabʉrʉdera? ․․․․․
¿Bʉa jaradiabʉrʉdera bia obʉka? (Bari jaraita: ¿Bedʼea zare ẽãta Daizeze Bedʼeadebemata jara ũrĩbiseabʉka? ¿Jẽda akʉ wãbʉka Daizeze Bedʼea ʉ̃rʉ audre kʼawuakĩrãbʉa? ¿Zarea obʉka ẽbẽrarã jaradiaita Daizeze Bedʼea ʉ̃rʉ?)
□ Mawũã □ Mawũã ẽ
¿Bʉara jaradia wãbʉka bʉ yibariraba oẽmina? (Hechos 5:42)
□ Mawũã □ Mawũã ẽ
¿Kʼãrẽta oita krĩchabʉ Daizeze Bedʼea jaradia wãbʉrʉde? (2 Timoteo 2:15). ․․․․․
¿Semanaza ãba yi jʉrebarieda wãbʉka, mawũã ẽ bʉrʉ edaʉde wã ẽka? (Hebreos 10:25). ․․․․․
¿Bʉara kʼãrẽta obʉ mama eda bʼaita? ․․․․․
¿Bʉ yibarira ãba yi jʉrebarieda wã ẽ mina bʉra wãbʉka?
□ Mawũã □ Mawũã ẽ
¿Bʉra sobiabʉka Daizezeba jarabʉta obʉ baera? (Salmo 40:8).
□ Mawũã □ Mawũã ẽ
¿Edaʉde bʉ neũdukʼawuaraba nekayiruata omarẽã kãgabasika, mamina mawũãsidu bʉra kʼẽrẽpabasika? (Romanos 12:2). ․․․․․
¿Kʼãrẽta oita krĩchabʉ iduaribi ẽ baita bʉa Jeowa kãgabʉta? (Judas 20, 21). ․․․․․
Bʉ yibariraba mawũã ẽ bʉrʉ bʉ neũdukʼawuaraba Jeowata amaera, ¿bʉra Jeowa ode bʼaika? (Mateo 10:36, 37).
□ Mawũã □ Mawũã ẽ
[Poto]
Jʉwa jidaita buru kʼoeiʉ̃mera abarikabʉ, bʉ bebʉ awuarabida baera. Maʉ̃ kʼarea maʉ̃ jidai nãã bia krĩchaibara