Enero

Yibarirãra mejãchade sobiabʉ ãyi wũãwũã zake kʼarea, mamina ãya kãga ẽ ãyi wũãwũãrãra ewari jõmaʉ̃nẽ wũãwũã zakede bamarẽã akʉza iyita wari ẽ bʉrʉ yibarirãra krĩcha odogo. Maʉ̃ kĩrãkʼa Jeowara sobiabʉ dayirã iyi ode jʉ̃drʉbʉrʉde, mamina Jeowabara kãga ẽ dayirãba kʼawuadabitapei aribia beira (1 Cor. 3:1). Awuarabʉrʉ kãgabʉ Daizeze Bedʼeadebema sãwũã oita audre biʼia kʼawua wãmarẽã. Daizeze Bedʼeade zokʼabʉ bedʼea, zõrãrã bia krĩcha kʼawuabʉ kĩrãkʼabʉ, naʉ̃ bedʼeara griego bedʼeadera edaʉde jarakĩrãbʉ biʼia kʼawuabʉta nebia Daizeze Bedʼeadebema sãwũã oita (1 Cor. 2:6). Wũãwũã zakerãra wari wã zõnabayeda abarika dayirãbida audre kʼawua wãibara Daizeze ʉ̃rʉ, mawũã ũdubiyi biʼia kʼawuabʉta Daizeze Bedʼeadebema sãwũã oita, mamina mawũã kʼawuabʉta iduaribi ẽ baibara awuarabʉrʉ ewariza audre kʼawua wãibara (1 Tim. 4:15). w24.04 2 parr. 1, 3

Ẽbẽra baduba bʉaʼa wididara kʼai Jeowara, ¿bʉa sãwũã panʉi? Bʉa panʉseabʉ Jeowara mʉ̃ Zeze, mʉ̃ neũdukʼawua akʉza Daizeze. Edaʉde bʉa krĩchabaribaibara sãwũã jara ũrĩbita kʼaita Jeowara. Mamina, ¿bʉa kʼawuabʉka Jeowabara trʉ̃bʉta iyi deda zemarẽã ẽbẽraba obʉ kĩrãkʼa? Ẽbẽra abaʉba iyi deda kʼãĩ wãmarẽã trʉ̃bʉrʉdera naʉ̃ba ũdubibʉ maʉ̃ ẽbẽrarã iyi neũdukʼawuaʼarata. Abarika Davidba jarasi Jeowabara dayirãta iyi deda trʉ̃bʉta Davidba jarasi: «Jeowa, ¿kʼaita bʉ karpa dede baseabʉ? ¿Kʼaitrʉ baseabʉ bʉ katʉmanera?» (Sal. 15:1). Naʉ̃neba dayirãbara kʼawuapanʉ Jeowa deda baseabʉta. Maʉ̃ba jarakĩrãbʉ iyi neũdukʼawua baseapanʉta. Jeowaba nekʼãrẽ parãi nããra iyira abapai basi, maʉ̃ tẽã iya nãã parãsi yi Warrata. Maʉ̃ne iyira yi dekaʉ kĩrãkʼa besi, yi Warrara iyi deda trʉ̃na kĩrãkʼabasi. Jeowaba mawũã yi Warra iyi deda trʉ̃bʉrʉdera Jeowara mejãcha sobiabasi. Daizeze Bedʼeabara jarabʉ Jeowabara mejãcha kãgabasita yi Warrara akʉza yi Warrabida jarabʉ «mʉ̃ra ewari jõmaʉ̃nẽ sobiabasi iyi nãã» (Prov. 8:30). w24.06 2 parr. 1-3

Krĩchara naʉ̃ta, 340.000 ẽbẽrarã ãba yi jʉrepanʉ David nokʼo babidaita. Yumakẽrãra katuma Hebrón kʼawabʉmae panasi ewari ũbeabayeda, mama bedʼeapanasi akʉza trãpanasi trãbira Jeowa ʉ̃rʉ ibia bedʼeabʉta (1 Crón. 12:39). Maʉ̃rane edabasi yumakẽrã warrarata, iyira Sadocbasi. Ẽbẽrarã mejãchaʉba ũduadua basi iyira, mawũãsidu Jeowaba kãgabasi iyira wuabemarabida ũdukʼawuadamarẽã (1 Crón. 12:​22, 26-28). Sadocʼra saserdotebasi, iyira ãba trajabasi sumo saserdote Abiatarʼʉ̃me. Jeowabara Sadocʼara buru biata diasi mawũã iya bia ũrĩmarẽã Jeowaba kʼãrẽta oita krĩchabʉta (2 Sam. 15:27). Iyira zowaĩnĩgʉabasi. Naʉ̃ ewari jõbodoarera Diarubara audre jʉrʉbʉ sãwũã zʉbʉria oita Jeowa odepanʉrãra (1 Ped. 5:8). Jeowaba Diaru beaita akʉza nekʼãrẽ kayiruara naʉ̃ drʉadebʉ jõbita jʉ̃ãpanʉenara, dayirãbara nesidayi zowaĩnĩgʉa erbʉ ũdubita (Sal. 31:24). Mawũã ora Sadocde kĩrãkʼa zowaĩnĩgʉa erbayi. w24.07 2 parr. 1-3

Jeowaba Adán Evaʉ̃me parãsidera kãgabasi ãyira mejãcha sobiapanamarẽã maʉ̃ kʼarea ẽjũã biʼiakirude bʉsi ãyira, adewara juwa jidabisi akʉza nekʼãrẽ omarẽã jarasi, ãyaʼa jarasi naʉ̃ drʉata ẽbẽrarãba biradamarẽã akʉza naʉ̃ drʉa jõma ẽjũã kĩrãwãreã babidamarẽã. Jeowabara ãyaʼa jarasi nekʼãrẽ aba oda ẽ marẽã akʉza Jeowabara ãyaʼa jarasi iyi bedʼeata ũrĩna ẽ bʉrʉ beibasita. Diaruba sewasi ãyira. Diarubara kãga ẽ basi Daizezera, mia ãyisida kãga ba ẽ basi, mamina ãyara Jeowa bedʼeata ũrĩ kaude ũrĩsida Diaru bedʼeata, maʉ̃ tẽã aripe berabarisi Jeowaba jaradata, ãyira zõnabape, kayape beisida (Gén. 1:​28, 29; 2:​8, 9, 16-18; 3:​1-6, 17-19, 24). w24.08 3 parr. 3

Jeowaba yi warra Jesúsʼʉ̃meba kãgabʉ dayirãra ewari jõmaʉ̃nẽ sobiapanamarẽã. Salmo 119:2ba jarabʉ naʉ̃ta: «Sobiapanʉ iya jarada aripe opanʉrãra akʉza iyita soiduba jʉrʉpanʉrãra». Adewara Jesúsbida jarasi: «Audrera sobia bʼeaidʼe bʼʉa Daizeze bedʼeata ũrĩpe aribʼae bʼeta» (Luc. 11:28). Jeowa odepanʉrãra mejãcha sobiapanʉ Daizeze Bedʼeata ewariza lepanʉ baera akʉza mama jarabʉta oũdubipanʉ baera (Sant. 1:​22-25). Naʉ̃ba kʼarebabʉ Jeowata sobiabita (Ecl. 12:13). Adewara Daizeze Bedʼeaba jarabʉde oũdubipanʉbʉrʉ, naʉ̃ba kʼarebabʉ dayirã mebẽrãbawara audre bia panaita akʉza mebẽrã kongregasionebemarabawara audre neũdukʼawua bia bʼaita. Adewara dayirãba Daizeze Bedʼeaba jarabʉde oũdubipanʉbʉrʉ naʉ̃bara mejãcha kʼarebabʉ bedʼea zroma ẽbẽrarã Daizeze odebʉ ẽãraba ũdubʉta ũdu ẽ baita. Naʉ̃ra nokʼo Davidba jarada kĩrãkʼabʉ. Iyi trãbide Jeowa ley ʉ̃rʉ, Jeowaba sãwũã zokʼabʉ ʉ̃rʉ akʉza Jeowaba sãwũã kʼawua obʉ ʉ̃rʉ bedʼeaside, iya jarasi yi maʉ̃ta wuagabʉbara nebia zromata erbaita (Sal. 19:​7-11). w24.09 2 parr. 1-3

Jeowabara dayirã aba abaka bia akʉbʉ. Iya kʼawuabʉ dayirã aba abaka sõbede sobiabʉta akʉza sõbede zʉbʉriade berabarinʉmʉta (Sal. 37:18). Iya ũdubʉrʉde dayirãba bedʼea ũdubʉmina iyi ode kʼẽrẽpa bakĩrãpanʉta, naʉ̃nera mejãcha sobiabʉ dayirã kʼarea. Adewara Jeowabara dayirã zʉbʉriade berabaribʉrʉdera kʼarebakĩrãbʉ, dayirã so zarea diakĩrãbʉ maʉ̃neba ẽdrʉita. Salmo 147:3ba ũdubibʉ sãwũã mediko abaʉba ẽbẽra bebibari kĩrãkʼa, Jeowaba abarika akʉbʉta ẽbẽrarã zʉbʉriade berabaribʉrata. Maʉ̃ bia ũrĩta naʉ̃ ʉ̃rʉ krĩchaseapanʉ. Ẽbẽra aba medikoma wãbʉta, naʉ̃ medikora mediko bia, mõbe iyaʼa jaraseabʉ kʼãrẽta oita iyi bia beita, mamina naʉ̃ ẽbẽraba medikoba jaradade obʉ ẽ bʉrʉ, be ẽ bayi, mamina iya medikoba jaradade obʉbʉrʉ beyi. Abarikabʉ Jeowaʉ̃me, Jeowabara dayirãra kʼarebakĩrãbʉ akʉza iya jarabʉ kʼãrẽta oseabʉta iya kʼarebabʉdeba nebia ũduita. Mamina dayirãta iyaʼa yi kʼarebabida ẽ bʉrʉ, iya kʼareba diabʉta oda ẽ bʉrʉ, dayirãsida aduʼa ba ẽ bayi. Jeowaba iyi bedʼeadeba kʼarebabʉ ẽbẽrarãra zʉbʉriade berabaribʉrata akʉza ũrãgʼa biata diabʉ ẽbẽrarãra. w24.10 6 parr. 1, 2

Nawedara dayirã kartaranera jarapanasi kʼãrẽta berabaribasita ẽbẽrarã bia ẽã obʉra Jeowaba kʼawua obʉrʉdera, maʉ̃ba jarapanasi ẽbẽrarã jẽda piradrʉ ẽ baibasita. Daizeze Bedʼeade mejãcha jara ũrĩbibʉ nebʉrara ẽbẽra bia ẽãta obera Jeowaba sãwũã kʼawua oda ʉ̃rʉ. Bari jaraita, kue zroma zesi ewaridera, Jeowabara ẽbẽrarã jõma makenasi, mamina Noéta akʉza iyi mebẽrãra makena ẽ basi akʉza Jeowaba israelitara ẽjũã bia diaya adamae pʉwʉrʉrata 7basi, maʉ̃ra ẽbẽrarã makenaira Jeowabara israelitarata zokʼasi adewara Jeowaba 185.000 asiriora makenasi angel abaʉdeba (Deut. 7:​1-3; Is. 37:​36, 37). Mamina Daizeze Bedʼeabara jara ẽ Jeowabara maʉ̃ra ẽbẽrarã jipa makenasita akʉza wua piradrʉbi ẽ baita. Dayirãba kʼawua ẽ Jeowaba ẽbẽrarã aba abaka sãwũã kʼawua odara, adewara biʼia kʼawuada ẽ maʉ̃ra ẽbẽrarãba Jeowa ʉ̃rʉ kʼawuapanasi kʼawuaita akʉza ãya kayirua oda kʼarea jẽda krĩchasida kʼawuaita. w24.05 3 parr. 5-7

Jesúsba yiza abaʉde nebʉrasi sãwũã pẽdra abaʉba juez abaʉʼa widibasita kʼarebamarẽã awururaba iya oẽ bada kʼarea zʉbʉriabipanʉ baera. Jesús kʼaidubemarabara maʉ̃ yizara biʼia ũrĩsidabaibara, ãyi ewaridera ãyara badua ũdubasi baera ãya kʼãrẽ oẽ bada kʼarea awururaba zʉbʉriabibʉta (Luc. 18:​1-5). Dayirãba kʼawuapanʉ maʉ̃ yizadebema pẽdrara sãwũã sentibasita, dayirãbida badua ũdupanʉ baera maʉ̃ta. Idi ewadera ẽbẽrarãbara kãga ũdubida ẽ naʉ̃ drʉa jõmaʉ̃mae, ʉ̃kʉrʉbara awurura ãyi ʉ̃rʉ sãwũãbʉ kʼarea bia edada ẽ, adewara ãya erbʉde wũẽta erbakĩrãpanʉ, maʉ̃ kʼarea dayirãbara kʼawuapanʉ edaʉde zʉbʉria odaita dayirãra (Ecl. 5:8). Mamina dayirãitara audre pʉ mebẽrãba dayirãba oẽ bada kʼarea zʉbʉriabibʉdade, ãyira nemitia omia baera edaʉde nekʼãrẽ aña opanʉ, mamina dayirãbara kʼawuaseapanʉ kʼãrẽta oita dayirãba oẽ bada kʼarea awururaba zʉbʉriabibʉrʉde kʼawuabʉrʉde Jesúsba akʉza awuru ẽbẽrarãba kʼãrẽta osidata ãyi abarika zʉbʉriabisidade. Wãrĩnubaira dayirãra zarea opanʉ dayirã nejʉraraba dayirãba oẽ bada kʼarea zʉbʉriabibʉrʉde mejãcha kĩrʉ ẽ baita, maʉ̃ba audre biga dayirã mebẽrãba dayirãba oẽ bada kʼarea zʉbʉriabibʉrʉde kĩrʉ ẽ baita. w24.11 2 parr. 1, 2

Ẽbẽrarã Daizeze Bedʼeaba jarabʉraitara panʼra jipade yibiabasi, ãyara naʉ̃ra mejãcha kokĩrãbasi (Gén. 14:18; Luc. 4:4). Naʉ̃ panʼra jipade yibiabasi baera edaʉde Daizeze Bedʼeabara yiko ʉ̃rʉ bedʼeaita zokʼabʉ bedʼea panta (Mat. 6:11). Ẽbẽrarãba panta audre ũdukʼawuabʉ baera Jesúsbara naʉ̃neba miõba okata osi dos bese (Mat. 16:​9, 10). Naʉ̃ra nebʉradebemata aba Juan yi zroma 6de jarabʉta. Jesús kʼaidubemaraba Daizeze Bedʼea jaradiapanʉta jõma aribaebʉrʉdera ãyira mejãcha mapaesida, maʉ̃ kʼarea Jesúsba ãyira edesi jãbade pʉwʉrʉ Betsaida kʼawa miõ neẽãbʉma (Mar. 6:​7, 30-32; Luc. 9:10). Ãyi mamapanʉne ẽbẽrarã mejãcha jʉ̃ẽsida. Ẽbẽrarã mawũã ũdui Jesúsbara bia edasi, ãyaʼa kãga ũdubisi akʉza jaradia jʉ̃drʉsi Daizeze Nokʼo ʉ̃rʉ, adewara yi kayabʉrata bebikʉasi. Ẽbẽrarã mamapanʉne ewari kiʉi Jesús kʼaidubemaraba ãyirai widisida kʼãrẽta kobigaita maʉ̃ra ẽbẽrarã. Ʉ̃kʉrʉ ẽbẽrarã jʉ̃ẽnapeadarabara ãyi kʼaidu abasi yikota, mamina ʉ̃kʉrʉbara jʉrʉ wãibarabasi (Mat. 14:15). w24.12 2 parr. 1, 2

Dayirã yibari Adán Evaʉ̃mera ãyira neneẽãpanasi akʉza ẽjũã kĩrãwãreãnẽ panasi adewara kʼãrẽba zʉbʉria ẽã ewari jõmaʉ̃nẽ baseapanasi (Gén. 1:27; 2:​7-9). Mamina atiaʉde jõma awuara besi, aduasida ãyi ewari jõmaʉ̃nẽ bʼaita. Mawũẽra, ¿kʼãrẽ nebiata amaesida ãyara dayirãitara? Daizeze Bedʼeaba jarabʉ: «Yumakẽrã abaʉdeba nekayiruara zesi naʉ̃ drʉa jõmaʉ̃nẽ, mawũã nekayiruadeba jõmaʉ̃ta beibarita amaesi akʉza maʉ̃neba ẽbẽrarã jõmaʉ̃ta beipanʉ, jõmaʉ̃ta nekayirua omia baera» (Rom. 5:12). Mawũẽra Adánbara dayirãita nemitia zromata amaesi, maʉ̃ nemitiara debe zroma kĩrãkʼabʉ, maʉ̃ba mapaga auda ẽ dayirãbara (Sal. 49:8). Jesúsba jarasi dayirã nemitiara dayirãba debe zroma erbʉ kĩrãkʼabʉta (Mat. 6:12; Luc 11: 4). Dayirã nemitia obʉrʉdera Jeowaʉ̃me debe barabʉ kĩrãkʼabʉ. Mamina Jeowaba nekʼãrẽ oẽ basibʉrʉ dayirã nemitia kĩrãduaita, dayirã beibʉrʉde maʉ̃ nemitiara pagabakasi akʉza jʉ̃ã ẽ bakasi tẽãne jẽda piradrʉita (Rom. 6:7). w25.02 2, 3 parr. 2, 3

Dayirãbara nebiata erpanʉ, Daizeze Nokʼo ʉ̃rʉ jaradiaita wuabema ẽbẽrarã. Maʉ̃ oira jõmaʉ̃ba obeda ẽ, bari jaradaita Jesús nama egorode basidera iyara iduaribi ẽ basi angel kayiruaraba iyi ʉ̃rʉ jara ũrĩbidamarẽãra (Luc. 4:41). Idi ewadebida abarika opanʉ, badu ẽbẽraba Daizeze Nokʼo ʉ̃rʉ jaradia jʉ̃drʉ totobe ẽ. Maʉ̃ ẽbẽraba Daizeze Bedʼea ʉ̃rʉ jaradiaira iyira Jeowaba kãgabʉde bʼaibara, maʉ̃ kʼarea Daizeze Nokʼo ʉ̃rʉ jaradiaira dayirãitara nebia zroma kĩrãkʼa bʼaibara akʉza dayirãba jaradiakĩrã jaradiaibara dayirã wãmae. Abarika Jesúsde kĩrãkʼa dayirãbida zarea okĩrãpanʉ badu ẽbẽrarã jaradiaita Daizeze Nokʼo ʉ̃rʉ (Mat. 13:​3, 23; 1 Cor. 3:6). Idi ewade Jeowa organizasionbida abarika obʉ, ãyara zarea opanʉ Daizeze trʉ̃ ʉ̃rʉ kʼawuabita wuabemara, maʉ̃itara ãyara zokʼapanʉ Daizeze Bedʼea kapũrĩa bedʼeadebʉta yi trʉ̃ Traducción del Nuevo Mundo, naweda Daizeze Bedʼea bʉsidadera Daizeze trʉ̃ra bʉepanasi iyi wãibaramae. Idi ewadebida dayirãba Daizeze Bedʼea zokʼabʉbara Daizeze trʉ̃ra mama jarabʉ kĩrãkʼa iyi wãibaramae bʉebʉ kʼãrẽ. Traducción del Nuevo Mundo, naʉ̃ Daizeze Bedʼeara bedʼea 270 audrebʉde tradusi zebʉda, ʉ̃kʉrʉ bedʼeadera jõmabʉ, ʉ̃kʉrʉ bedʼeadera wiña tradusibʉ. w24.04 9 parr. 8, 9

Ʉ̃kʉrʉ juwa jidapanʉra poaga dããrababara nekʼãrẽ obʉ ewariza yi kimaʼa mejãcha kãgabʉta ũdubita (1 Juan 3:18). Yumakẽrãba iyi kima mejãcha kãgabʉ ũdubita naʉ̃ta oseabʉ: bʉraseabʉ, kartata dia bʉeseabʉ, maʉ̃ta neẽbʉrʉ selulardeba trʉ̃seabʉ jaraita, «¿Bʉra sãwũã wãpe?», «¿Bia bʉka?», mawũã ũdubita wãrĩnu kãgabʉta. Yumakẽrãba mawũã obʉbʉrʉ ũdubiyi yi kimaʼa mejãcha kãgabʉta akʉza bia akʉbʉta. Adewara mawũã yi juwa jidapanʉra mia kʼãrẽ bedʼea zromaba oẽ bayi yi idubʉdaita. Yumakẽrãba yi kimata wãrĩnu kãgabʉbʉrʉ iyibitaʉba kʼawuabaibara ẽ, maʉ̃ra jaraibara yi kimabida, maʉ̃ba kʼarebabʉ yuwẽrãra kʼãrẽ ẽ kĩrãkʼa senti ẽ marẽã. Bari jaraita, yuwẽrãʼa biga diaseabʉ nekʼãrẽ obʉ kʼarea iyi kʼarebaita (Col. 3:15). Yumakẽrãba jarabʉrʉde yuwẽrãʼa iyi kʼãrẽ kʼãrẽa kãgabʉta, naʉ̃ba kʼarebabʉ yuwẽrãbida yumakẽrã audre kãga wãmarẽã. Mawũã jarabʉrʉdera yuwẽrãra aduʼabʉ, yumakẽrãba kãgabʉta sentibʉ akʉza bia akʉbʉta. w25.01 11 parr. 15; 13 parr. 16

Salmo 15 jõbodoare jarabʉ: «Yi mawũãbʉra neida berabari ẽ bayi». Nama salmistaba ũdubibʉ dayirãba Jeowaba nekʼãrẽ omarẽã zokʼabʉta jõma opanʉbʉrʉ dayirãra sobia bʼaita, maʉ̃ kʼarea Jeowaba dayirã jaradiabʉ kʼãrẽ oita akʉza nebiata diabʉ adewara bia akʉbʉ dayirãra. Jeowa de karpade panʉrabara jõmaʉ̃ba nebiata jʉ̃ãpanʉ, 144.000rabara jʉ̃ãpanʉ ʉ̃ta wãita, mama Jesúsba ãyita erbʉ baera sama bʼaita (Juan 14:2). Adewara yi nama egorode panairabara sobiade jʉ̃ãpanʉ Apocalipsis 21:3ba jarabʉta aripe berabarimarẽã. Jipade yibia Jeowaba kãgabʉ baera dayirãra iyi de karpade ewari jõmaʉ̃nẽ panamarẽã (Sal. 15:​1-5). w24.06 13 parr. 19, 20

Daizeze Bedʼeade bedʼea «gloria» jarabʉbara jarakĩrãbʉ ẽbẽra abaʉba nekʼãrẽ zromata obʉta, mawũã iyi ʉ̃rʉ ibia bedʼeadamarẽã. Jeowaba pʉwʉrʉ Israeldebemarata Egiptodeba ẽdrʉbiside, ũdubisi iyi kʼãrẽaba zarea barabʉta. Krĩchadaya naʉ̃ berabarida ʉ̃rʉ. Ewari aba katuma Sinaí kʼawa israelitarãra ãba yi jʉrepanasi asamblea opanʉne. Maʉ̃ne katuma audu jãrãrata pãrĩgua totosi akʉza drʉa ureta zesi. Adewara bata baesi akʉza kachu mejãcha jĩgʉa pugabasi dayi kʉwʉrʉ ki kĩrãkʼa (Éx. 19:​16-18; 24:17; Sal. 68:8). Israelitaraba naʉ̃ ũdusidadera ãyira mejãcha kĩrãmigasidabaibara, ũdusida baera Jeowa kʼãrẽaba zarea barabʉta. Dayirãbara awuru ẽbẽrarã jara ũrĩbiseabʉ Jeowa kʼãrẽaba zarea barabʉta akʉza iya kʼãrẽ nebiata erbʉta. Adewara dayirãba nekʼãrẽ bia obʉrʉde biga diaita Jeowaʼa maʉ̃ra iyi zareadeba osi baera (Is. 26:12). w25.01 2 parr. 2, 3

Israelitara Jeowaba Drʉa diaya adama wãbaside ʉ̃kʉrʉ yumakẽrãrãra Moisés ʉ̃rʉ aña bedʼea jʉ̃drʉsida akʉza iya sãwũã zokʼabada ʉ̃rʉ. Ãya jarasida: «Pʉwʉrʉra jõma neneẽãbʉ [bari Moisés awa ẽ], Jeowara ãyi ẽzadrabʉ» (Núm. 16:​1-3). Wãrĩnu Jeowaitara pʉwʉrʉra jõma neneẽãbasi, mamina iya jidasi Moisésta iyi pʉwʉrʉ daucha jʉre edemarẽã. Maʉ̃ kʼarea ãyi Moisés ʉ̃rʉ imitia bedʼeabʉde wãrĩnubaira Jeowa ʉ̃rʉbʉrʉ imitia bedʼeabasi. Ãyara krĩcha ẽ basi Jeowaba kʼãrẽ kãgabʉta, awuarabʉrʉ krĩchapanasi ãya kãgabʉtrʉ. ¿Ãyara kʼãrẽta kãgabasi? Ãyita bia akʉdamarẽã akʉza nokʼo babidamarẽã. Jeowabara makenasi maʉ̃ra yumakẽrãrãra akʉza iyi kʼaidu pananarasida (Núm. 16:​30-35, 41, 49). Idi ewadebida Jeowabara bia akʉ ẽ jari ẽbẽrarã iyi organizasionba jarabʉ bedʼeata ũrĩ ẽ bʉrʉ. w24.07 11 parr. 11

Idi ewadebida dayirãbara wãrĩnu ĩjãbʉta ũdubita nesidapanʉ, ẽbẽrarãba ĩjãna ẽ baera dayirãba naʉ̃ ewari jõi arakʼaitaba jarabʉra. Adewara ãya jarapanʉ dayirãra kĩrãnemapanʉta (2 Ped. 3:​3, 4). Wãrĩnubaira dayirãbara jõma biʼia kʼawua ẽ maʉ̃ ewaride kʼãrẽ berabarira. Maʉ̃ kʼarea nesidapanʉ wãrĩnu ĩjãnaita, Jeowaba naʉ̃ drʉade nemitiabʉ jõbiya abʉra weita iya kãgabʉ ewaride akʉza ĩjãnaibara Jeowaba dayirãra bia akʉita. Idi ewadebida dayirãbara ĩjãnaibara Jeowaba Zõrãrã Burubiarata zokʼabʉta, mawũã dayirãʼa jaradiaita kʼãrẽta oibarata (Mat. 24:45). Idi ewade zʉbʉria zroma zebʉrʉdera dayirãʼa nekʼãrẽ omarẽã jarabʉta ũrĩnaibara mawũã ẽdrʉita. Kʼãwũãweda dayirãbara Jeowa organizasionba nekʼãrẽ omarẽã jarabʉta ũrĩnaibara. Dayirãba kʼãwũãweda ãya jarabʉta ĩjãna ẽ bʉrʉ, zʉbʉria zroma zebʉrʉde nekʼãrẽ omarẽã jarabʉdadera zarebayi ũrĩta ãyi bedʼeata. w24.09 11 parr. 11, 12

Yibarirabara kʼawuapanʉ ãya ĩjãbʉta ũdubibʉ kʼarea ãyi wũãwũãrabida abarika ĩjãpanaita, maʉ̃ kʼarea wũãwũãrabara ãyikʉza widiseapanʉ naʉ̃ bedʼeata: «¿Mʉ̃ara sãwũã kʼawuabʉ Daizezera wãrĩnu bʉta? ¿Mʉ̃ara Daizeze Bedʼeaba jarabʉra ĩjãseabʉka?». Daizeze Bedʼeaba jarabʉ kristianora ãyidobaʉba kʼawuadamarẽã kʼãrẽta omarẽã kãgabʉta Daizeze Bedʼeaba (Rom. 12:1; 1 Tes. 5:21). Mawũẽra, ¿marabara sãwũã kʼarebaseabʉ mara wũãwũãraba audre ĩjã bamarẽã? Kʼarebara mara wũãwũãra Daizeze Bedʼeaba jarabʉta ãyi dabʉba akʉmarẽã wãrĩnuta. Mara wũãwũãraba bedʼea widibʉrʉde kʼarebara ãyidobaʉba jʉrʉ kʼawuamarẽã, kʼarebara mara wũãwũãra eda wãmarẽã dayirã pagina internetʼne, jw.org de. Bari jaraita, kʼarebara akʉdamarẽã kartaraba akʉza bideoraba ũdubibʉta Daizeze Bedʼeara ẽbẽrarãba oẽbasita (1 Tes. 2:3). w24.12 15 parr. 4, 5

Zõrãrãbara Jesúsde kĩrãkʼa oseapanʉ. Zõrãrã kongregasionebemabara wuabemara jaradiaibara, audre warrara, mawũã kʼarebadamarẽã audre kongregasione. Zõrãrãbara jʉ̃ãna ẽ baibara mebẽrãbara jõma aripe odamarẽã, awuarabʉrʉ ãyaʼa ibiade ũrãgʼa diabʉ mawũã ãya kʼãrẽ omarẽã jarabʉdara, audre bia odamarẽã, eda krĩchabʉta ũdubidamarẽã, adewara ãya ĩjãbʉta audre zarea erpanamarẽã akʉza wuabemara ʉ̃rʉ krĩchabʉta ũdubidamarẽã (1 Tim. 3:1; 1 Ped. 5:5). Jesúsbara jarasi yi kʼaidubemara Daizeze Nokʼo ʉ̃rʉ wuabemara jaradiamarẽã, adewara maʉ̃ daucha jara ũrĩbidamarẽã kʼãrẽta jarabʉta Daizeze Bedʼeaba, maʉ̃ba Jesús kʼaidubemarabara krĩchapanasibaibara Jesúsba zokʼadara jõma oauda ẽãta, mamina iyara bia kʼawuabasi naʉ̃rabara aripe odaita, mamina Jesúsba kãgabasi iyi kʼaidubemarabida maʉ̃ta kʼawuamarẽã, maʉ̃ kʼarea naʉ̃ta jarasi: «Mʉ Zezeba mʉta zokʼadʼa kĩrãkʼa mʉãbidʼa marãta zokʼaya» (Juan 20:21). w24.10 16 parr. 15; 17 parr. 17

Davidʼra nokʼo biabasi. Adewara Davidbara nekʼãrẽ trãbidebemara jõma kʼawuabasi, iyara bedʼea biakiruta bʉbasi, iyira yõ kʼawuabasi akʉza propetabasi. Davidbara bedʼea zroma mejãcha ũdusi. Bari jaraita, iyira ewari biobayeda mĩrʉ wãibarabasi nokʼo Saúldeba, naʉ̃ba iyita beakĩrãbasi baera. Adewara David nokʼo bada tẽã, yi warra Absalónba iyi nokʼota jãrĩkĩrãbʉ baera beakĩrãbasi, maʉ̃ kʼarea iyira mĩrʉ wãibarabasi. David mawũã mejãcha bedʼea zroma ũdusimina akʉza iya nemitia osimina, ũdubisi iyira Jeoware kʼẽrẽpabʉta beiyeda. Jeowaba jarasi Davidbara iyi so sobiasita, maʉ̃ kʼarea jipade yibia dayirãbida Davidba ũrãgʼa diada ũrĩta (1 Rey. 15:5). Akʉdaya kʼãrẽta jarasita Davidba yi warra Salomónʼa iyi nokʼo bʼai nãã. Jeowaba jidasi Salomónta templota omarẽã mamaʉ̃ba iyi pʉwʉrʉba iyaʼa yiwidʼipanamarẽã (1 Crón. 22:5). Mawũẽra Salomónbara nekʼãrẽ mejãcha oita erbasi akʉza Jeowa kʼarebata nesidabasi pʉwʉrʉ bia zokʼaita. ¿Davidba kʼãrẽ ũrãgʼata diasi? Davidba jarasi yi warra Salomónʼa Jeowaba zokʼabʉta aripe obʉbʉrʉ bia wãita (1 Rey. 2:​2, 3). w24.11 10 parr. 9-11

Yumakẽrãba yi kimata pobarebʉrʉ, zʉbʉriabibarebʉrʉ akʉza imitia jarabaribʉrʉ. Nama nekʼãrẽ seisbʉ yumakẽrãba oibarata mawũã Jeowaʉ̃me bia bʼaita akʉza yi kimaʉ̃me. Aba, iyikʉza kʼawuaibara iya obʉra jipade nemitiata, wãrĩnubaira Jeowabara jõma ũrĩbʉ akʉza kʼawuabʉ iya kʼãrẽta obʉta (Sal. 44:21; Ecl. 12:14; Heb. 4:13). Ũme, zarea oibara iya nemitia obʉta idubʉita akʉza yi kima pobʉ idubʉita, mawũã awuara ojʉ̃drʉita (Prov. 28:13). Ũbea, Jeowaʼa widibara kĩrãduamarẽã iya obʉta akʉza yi kimabida maʉ̃ta jaraibara mawũã ãyiʉ̃me ibiade bʼaita (Hech. 3:19). Adewara Jeowaʼa so zʉbʉria bedʼeaibara kʼarebamarẽã iyi imitia bedʼeabʉta, krĩcha mitia erbʉta akʉza nekʼãrẽ mitia obʉta soiduba idubʉbimarẽã mawũã Jeowaba kãgabʉde ojʉ̃drʉita (Sal. 51:​10-12; 2 Cor. 10:5; Filip. 2:13). Kimareta, Jeowaʼa wididade aripe oita zarea oibara. Jʉraibara yõmia bʼaita akʉza ikayirua bedʼea bʼaita (Sal. 97:10). Juesomata, waña jʉrʉibara zõrãrã kongregasionebema kʼarebata (Sant. 5:​14-16). Seista, kʼawuaibara kʼãrẽta oibarata mawũã iyabaʉ nemitiata jẽda oẽ baita. w25.01 11 parr. 14

Jeowaba bʉaʼa nekʼãrẽ bia mejãcha dia zebʉrʉ, bʉ bebʉsida iya diada, maʉ̃ kʼãrẽa, ¿bʉara Jeowara mejãcha kãgabʉka? ¿Bʉa sãwũã ũdubi wãrĩnu kãgabʉta? Bʉa iyi kãgabʉ ũdubira bʉ bebʉta iyaʼa diaibara akʉza buru kʼoeibara, mawũã Jeowara bʉ Zezebayi akʉza bʉ neũdukʼawuabayi maʉ̃ kʼarea iyara bʉra bia akʉyi, bʉra iyide baera (Sal. 73:24; Is. 43:​1, 2). Dayi bebʉ Jeowa diabʉrʉba akʉza buru kʼoebʉrʉba kʼarebabʉ dayi ewari jõmaʉ̃nẽ bʼaita (1 Ped. 3:21). ¿Kʼãrẽba wabida buru kʼoebi ẽ bʉra? Ẽbẽrarã mejãchaʉba ãya nekʼãrẽ nemitia obadata akʉza sãwũã krĩchabadata idubʉepanʉ, mawũã buru kʼoeita. Idi ewadera ãyira mejãcha sobiapanʉ Jeowadeta opanʉ baera. w25.03 2 parr. 1, 2

Edaʉde Daizeze Bedʼeaba jarabʉ dayirã kayiruara ne zʉgʉa zroma kĩrãkʼabʉta, bari jaraita nokʼo Davidba jarasi iya kayirua odara ne zʉgʉa zroma kĩrãkʼabasita (Sal. 38:4). Mawũãsidu Salmo 25:18 akʉza 32:5ba jarabʉ dayirãba kayirua oda kʼarea jẽda krĩchadara, Jeowabara kĩrãduaita maʉ̃ra. Ebreo bedʼeadera naʉ̃ra bersikuloraba «kĩrãduai» jarabʉbara jarakĩrãbʉ «jiraedaita», mawũã ẽ bʉrʉ «edeita». Jeowaba dayirãba kayirua odata kĩrãduabʉrʉdera dayirã okiwade ne zʉgʉa zroma abʉta ãĩ bʉebʉrʉ kĩrãkʼabʉ. Daizeze Bedʼeade awuru yizata jarabʉ mawũã ũdubita Jeowabara dayirãba kayirua odara sãwũã jĩga edebʉta. Salmo 103:12ba jarabʉ: «Ũmadaʉ ʉ̃tʉ zebʉra jĩgabʉ ũmadaʉ baebʉmaebara, maʉ̃ kĩrãkʼa jĩgabʉ kʼãrẽ dayirã nemitiara». Diapedarera bisiara jãpe ʉ̃tʉ zebʉ, kewararera jãpe baebʉ, maʉ̃ba iyabaʉ ũmadaʉ̃de diapeda ẽ mia kewara ẽ. Naʉ̃ba jarakĩrãbʉ Jeowabara dayirã nemitiara jĩga edebʉta dayirãba ũdu ẽ baide. Naʉ̃ba dayirã kʼawuabibʉ Jeowabara dayirã nemitiara wãrĩnu kĩrãduabʉta. w25.02 9 parr. 5, 6

Jesús ʉ̃ta wãna tẽã Pedroba ẽbẽra wãbe ẽãbʉta bebisi, maʉ̃neba ẽbẽrarã mejãchaʉba orrasida iyira (Hech. 1:​8, 9; 3:​2, 6-8). Pedro ewaridera ẽbẽrarã mejãchaʉba kãgadebasi ãyi ʉ̃rʉ ibia bedʼeamarẽã, mamina Pedroba ũdubisi iyi eda krĩchabʉta maʉ̃ba ẽbẽrarãba iyaʼa ibia bedʼeabʉrʉde ĩjã ẽ basi maʉ̃ta (Hech. 3:11). Awuarabʉrʉ idu iyi ʉ̃rʉ ibia bedʼeabi kaude jarasi iya jõma osita Jeowa akʉza Jesús kʼarebadeba, Jesús ʉ̃rʉ bedʼeabʉrʉta jarasi: «Daibara izhidʼebema ĩjã panʉã, za naʉ̃ marãba ũdukʼawua bʼeta akʉ kʼobʼera kʼãwũã bʼe dogʼoa izhi zareaba» (Hech. 3:​12-16). Dayirãbida Pedrode kĩrãkʼa eda krĩchabʉta ũdubiseapanʉ. Dayirãbara wuabema kʼarea nekʼãrẽ opanʉ Jeowata akʉza mebẽrãta kãgapanʉ baera, mawũã opanʉ ẽ wuabemaraba dayirãta bia akʉmarẽã. Mawũã obʉrʉdera eda krĩchabʉta ũdubipanʉ. Dayirãbara eda krĩchabʉta ũdubipanʉ sobiade nekʼãrẽ obʉde Jeowa kʼarea akʉza dayirã mebẽrã kʼarea, wuabemaraba maʉ̃ta ũduda ẽ mina (Mat. 6:​1-4). w25.03 10, 11 parr. 11, 12

Dayirãba bia krĩchadara Jeowa kʼãrẽaba kãgabʉta akʉza wuabemara ẽbẽrarãta, naʉ̃ba kʼarebayi jaradiakĩrã jaradiaita Daizeze Bedʼea ʉ̃rʉ (Mat. 22:​37-39). Krĩchara Daizeze bedʼea jaradia wãbʉrʉde Jeowaʼa kʼãrẽaba sobia bʼaita. Adewara krĩchara ẽbẽra abaʉta Daizeze Bedʼea kʼawua jʉ̃drʉbʉrʉde iya wãrĩnuta kʼawuasi baera, maʉ̃ kʼarea mejãcha sobiabʉta akʉza krĩchaseabʉ ẽbẽrarã Daizeze Bedʼea ũrĩpanʉrãra ewari jõmaʉ̃nẽ baseabʉta (Juan 6:40). ¿Bʉra nekʼãrẽ berabarida kʼarea deda pikibʉka? Mawũãbʉrʉ krĩchara kʼãrẽta oseabʉta Jeowa kʼarea akʉza wuabema ẽbẽra kʼarea. COVID-19 baesidera Samuelta yi kima Daniaʉ̃me deda pikipanasi. Maʉ̃ne ãya jaradiapanasi Daizeze Bedʼeara kartadeba, selulardeba, adewara Daizeze Bedʼeata kʼawuabipanasi Zoomneba. Samuelba Daniaʉ̃mebara ãya okĩrãbʉta obe ẽ basimina, nekʼãrẽ jõma opanasi Daizezede odaita, mawũã ãyi mejãcha sobiapanaita. w24.04 18, 19 parr. 15, 16

Wãrĩnubaira dayi sobia bʼaira juwa jidaibara ẽ, mawũãsidu ʉ̃kʉrʉ mebẽrã warrarapanʉrata akʉza zõrãrãpanʉrata dobapanʉnera ãyara kima biata ũdukĩrãpanʉ. Kʼaita bʉ nobio bʼaita jʉrʉi nawedara, bʉra Jeowa neũdukʼawua bia bʼaibara akʉza bʉyikʉza biʼia ũdukʼawuaibara. Adewara kʼawuabaibara sãwũã biʼia akʉita bʉ kimata, mawũã iya nesidabʉ diaita (1 Cor. 7:36). Akʉza bʉa biʼia kʼawuabaibara sãwũã bamarẽã kãgabʉta ẽbẽra bʉ kima bʼaira. Bʉa maʉ̃ta biʼia kʼawua ẽ bʉrʉ, badu ẽbẽraʉ̃me bedʼea jʉ̃drʉ totoseabʉ, maʉ̃ ẽbẽra bʉita biga ẽ mina. Mamina ẽbẽra bʉ kima bʼaira buru kʼoe bʼaibara (1 Cor. 7:39). Mamina bʉta ẽbẽra abaʉ̃me juwa jidaira maʉ̃ ẽbẽrarã bari buru kʼoe bʼaibara ẽ. Bigabayi bʉa naʉ̃ ʉ̃rʉ bʉyikʉza widita: «¿Mʉ̃ara kʼãrẽta kãgabʉ? ¿Mʉ̃ kima bʼaiba kʼãrẽ nebiata erbamarẽã kãgabʉ? ¿Mʉ̃ara jʉ̃ãbʉka mʉ̃ kima bʼaira aukʼara ẽbẽra bia bamarẽã?». w24.05 20 parr. 1, 3

Yi bedʼeapanʉrabara, ¿kʼãrẽta oseapanʉ edaʉde bedʼea zromata erpanʉnera? ¿Maʉ̃ba jarakĩrãbʉka marara bia wã ẽãta? Maʉ̃ta jarakĩrãbʉ ẽ, edaʉde yi ʉ̃rabʉrʉ bedʼeapanʉraba akʉza juwa jidapanʉraba bedʼea zromata ũduseapanʉ baera. Juwa jidapanʉrãra biapanʉ ãyirai wawia ũdubibʉde akʉza ãyi krĩcha abarika bʉ ẽ mina jʉrʉpanʉne sãwũã bedʼea abarika zeita. Maraba kʼãwũãena bedʼea zroma ũdubʉrʉde sãwũã ara obʉba ũdubiyi mayi juwa jidabʉrʉdebida sãwũã bʼaita. Bari jaraita, ¿bedʼea abarika zeda ẽãnera ibiade bedʼeapanʉka? ¿Nemitia obʉrʉdera jarabʉka mʉ̃a osita akʉza zarea obʉka maʉ̃ta wua oẽ baita? ¿Mʉ̃a nemitia obʉrʉdera mesera widibʉka maʉ̃ta kĩrãduamarẽã akʉza maʉ̃sida kĩrãduabʉka? akʉza ¿kĩrãduabʉka ababemaba nemitia odara? (Efes. 4:31). Mara ʉ̃rabʉrʉ yi bedʼeapanʉne Mara ʉ̃rabʉrʉ yi bedʼeapanʉne bedʼea abarika zeda ẽ bʉrʉ akʉza badua kĩrʉpanʉbʉrʉ maʉ̃ba jarakĩrãbʉ ẽ juwa jidabʉrʉde maʉ̃ bedʼea zromara ara odaita maʉ̃ba jarakĩrãbʉ ẽ juwa jidabʉrʉde maʉ̃ bedʼea zromara ara odaita. Mawũã yi bedʼeapanʉne ũdura maʉ̃ ẽbẽrarã bʉita ẽ basita, bʉa krĩchaseabʉ mamapai jõbita, maʉ̃ra yibia bʉita akʉza ababema ẽbẽraitabida. w24.05 29 parr. 12

Ewari jõmaʉ̃nẽ ũrĩpanʉbʉrʉ Jeowaba zokʼabʉta akʉza nekʼãrẽ oi nãã Daizeze Bedʼeaba jarabʉde opanʉbʉrʉ, yiza biabayi wuabemaraita. Dayirãba Daizeze Bedʼeata estudiapanʉbʉrʉ akʉza dayirãba ĩjãbʉta zarea erpanʉbʉrʉ, naʉ̃ba kʼarebayi iyiʉ̃me kʼẽrẽpa bʼaita akʉza iya zokʼabʉta opanaita. Mawũã odara naʉ̃ drʉaba jaradiabʉta oda ẽ bayi akʉza dayirã krĩchara badua awuara totonʉma ẽ bayi, awuarabʉrʉ audre Jeowa kʼawapanañi (Efes. 4:14; Sant. 1:​6-8). Adewara kʼarebaseapanʉ yi bedʼea zromane berabarinʉmʉta (1 Tes. 3:​2, 3). Zõrãrã kongregasionebemara bia krĩcha kʼawuabaibara, kʼãrẽ daucha erbaibara akʉza kãga ẽ baibara iya jarabʉrʉta wuabemaba omarẽã, adewara kʼẽrẽpabaibara. Daizeze Bedʼeaba jarabʉta opanʉbʉrʉ, kʼarebabʉ mebẽrã kongregasionebemata aduʼapanamarẽã akʉza ãya ĩjãbʉta zarea erpanamarẽã (Tito 1:9; 1 Tim. 3:​1-3). Zõrãrãba yiza bia diabʉrʉde akʉza mebẽrã so zarea diabʉrʉde kʼarebapanʉ nejaradiabarirãra badua Daizeze Bedʼea jaradia wãpanamarẽã akʉza ãyidobaʉba Daizeze Bedʼea kʼawuadamarẽã, adewara ãba yi jʉrebarima wãnamarẽã. Mebẽrãba bedʼea zroma ũdubʉrʉdera zõrãrãbara ãyaʼa kĩrãbebipanʉ Jeowa ʉ̃rʉ ĩjãibarata akʉza kĩrãbeibarata Jeowaba kʼãrẽ nebia weya abʉ ʉ̃rʉ. w24.06 31 parr. 16-18

Jesús nama egorode baside iya ẽbẽrarã jaradiabasi yi Zezebara ẽbẽraba kayirua odara kĩrãduakĩrãbʉta. Akʉra nebʉra zeze abaʉba yi warra aduadata. Maʉ̃ yumakẽrã warrara dedaʉba wãsi iya kãgata oita. Naʉ̃ yumakẽrã warrabara tẽã krĩchasi iya kʼãrẽ odara biga ẽ basita, maʉ̃ kʼarea jẽda yi zezema wãita krĩchasi. ¿Kʼãrẽta osi yi zezebara maʉ̃nera? Jesúsba jarasi yi zezeba yi warra jĩgaʉba uruta ũdubʉrʉdera sobia orra wãsi mõbe ũdubʉrʉde bura kʼãrãpe nẽgasi. Yi warrabara yi zezeʼa widikĩrãbasi iyi deda babimarẽã iyi nezokʼa kĩrãkʼa, mamina yi zezebara ĩjã ẽ basi iyita mawũã bamarẽã. Yi zezebara yi warraba kʼãrẽ aña odara kĩrãduakĩrãbasi akʉza iyi deda bamarẽã kãgabasi yi warra baera. Yi zezeba kʼãwũã jarasi: «Naʉ̃ mʉ warra beudʼa kĩrãkʼa nʉmanata zokʼai bʼʉa, aduadʼata ũdubʉda» (Luc. 15:​11-32). Jesúsba nama egoroeda zei nãã yi Zezeʉ̃me ʉ̃tʉbaside ũdubasibaibara sãwũã Jeowaba ẽbẽrarã ãya nemitia oda kʼarea jẽda krĩchabʉrʉde ãyi nemitia kĩrãduabasita. Maʉ̃ba biʼia jara ũrĩbiseabasi Jeowaba sãwũã ẽbẽrarã so borekea akʉbʉta. w24.08 11 parr. 11, 12

Mebẽã abaʉba bia krĩchabʉta ũdubibʉdera iya nekʼãrẽ oita jidai nããra, krĩchabʉ jõma jidaita Jeowaba krĩchabʉde akʉza naʉ̃ mebẽãbara kʼawuabʉ audre yibiata Jeowa neũdukʼawua bʼaita. Akʉza iyara kʼawuabʉ jõma iya bia kʼawua chu ẽãta, awuarabʉrʉ Jeowa kʼarebata jʉrʉbʉ Jeowaʼa yiwidʼibʉdeba. Audre Jeowa yiwidʼibara nekʼãrẽ oita jidai naweda, iya kʼarebamarẽã bia jidaita akʉza dayirãbara ĩjãibara Jeowabara biʼia kʼawuabʉta saʉ̃ta bigata akʉza saʉ̃ta zeri ẽãta dayirãitara. Jeowabara dayirãra parãsi iyide kĩrãkʼa odamarẽã maʉ̃ba dayirãbara iyaʼa biga diapanʉ (Gén. 1:26). Dayirãra nemitia omia baera Jeowade kĩrãkʼa jõma daucha obeda ẽ (Is. 55:9). w25.03 11 parr. 13; 13 parr. 17, 18

Wuabemara ʉ̃rʉ aña krĩcharãra. Dayirãba awuru kʼarea nebia obʉrʉde biga diada ẽ bʉrʉ, dayikʉza naʉ̃ta widiseabʉ, ¿iyara wãrĩnu bia akʉ ẽka mʉ̃a iyi kʼarea nebia odara? mawũã ẽ bʉrʉ ¿kĩrãduasika biga diaita? Mawũã ẽ bʉrʉ nekʼãrẽ awuru kʼarea biga dia ẽ basi. Edaʉde ʉ̃kʉrʉbara biga diakĩrãbʉmina zareabʉ jaraita iya kʼãrẽ krĩchabʉta, mawũã ẽ bʉrʉ ʉ̃kʉrʉra mejãcha perabʉ awururaba ãyi kʼarebabʉrʉdera, audre ãya nãã awururata kʼarebabaribasibʉrʉ akʉza idi ewade maʉ̃ta obe ẽ baera. Mamina dayirãba mebẽrãta mejãcha kãgapanʉbʉrʉ, ãyi ʉ̃rʉ aña krĩcha ẽ bayi akʉza ãyi kʼarea nekʼãrẽ bia obʉta sobiade obayi (Efes. 4:2). Jʉ̃ã kʼawuabada. Nokʼo Salomónba jarasi dayirãba awuru kʼarea nebia obʉrʉdera, ewari mejãcha berabarida tẽã nebia ũduseabʉta maʉ̃neba dayirãba jʉ̃ã ẽ basimina (Ecl. 11:1). Naʉ̃ba jarakĩrãbʉ edaʉde ʉ̃kʉrʉbara dayirãba ãyi kʼarea nebia odara, ewari mejãcha berabarida tẽãbʉrʉ biga diaseabʉta. w24.09 30 parr. 18, 19

Edaʉde ẽbẽra aba kongregasion jõma kĩrãbita jarasidabʉrʉ kʼẽãsidata, maʉ̃ ẽbẽraʉ̃mera waidide bedʼeaseabʉta iyara ũdubisi baera jẽda krĩchabʉta akʉza idubʉsi baera nemitia nãã obadata. Naʉ̃ ẽbẽra kʼẽãnapeadabara nesidabʉ mebẽrã kongregasionebemaraba kʼarebadamarẽã Jeowaba zokʼabʉde oita (Heb. 10:​24, 25). Mamina ẽbẽra aba kongregasioneba ãĩ bʉebʉrʉdera jipade awuarabʉ, kongregasioneba ãĩdogodera naʉ̃ ẽbẽraʉ̃me wua bedʼeabe ẽ baera akʉza mia nekobe ẽ iyiʉ̃me (1 Cor. 5:11). ¿Dayirãbara iyira trʉ̃ ẽ baibaraka ãba yi jʉrebarieda jʉ̃ẽmarẽã, mawũã ẽ bʉrʉ ãba yi jʉrebarieda jʉ̃ẽbʉrʉdera, iyira saluda ẽ baibaraka? Mawũã ẽ, dayirã maʉ̃ra ẽbẽraʉ̃me ãbapanʉ ẽ mina naʉ̃ranebemata dayirã mebẽrãbasibʉrʉ, mawũã ẽ bʉrʉ dayirã neũdukʼawuabasibʉrʉ trʉ̃seapanʉ ãba yi jʉrebarieda jʉ̃ẽmarẽã, mamina aba abakaʉba kʼawua jidaseabʉ iya Daizeze Bedʼeade kʼãrẽ kʼawuadadeba. w24.08 30 parr. 13, 14