Febrero

Mebẽã abaʉba Daizeze Bedʼeade nebiabʉta ũdubibʉbʉrʉ, naʉ̃ mebẽãra kongregasionʼitara jipade yibia. Yumakẽrã abaʉba jʉ̃ã ẽ bʉrʉ iya jarabʉta wuabemaba odamarẽã, maʉ̃bara ũrĩbʉ wuabema bedʼeata akʉza zarea obʉ wuabemaba kʼãrẽ jarabʉta biʼia kʼawuaita. Bari jaraita, zõrãrã ãba yi jʉrebʉrʉde nekʼãrẽ jidaide krĩcha abarika zedara akʉza Daizeze Bedʼeaba jarabʉdebʉbʉrʉ, ¿maʉ̃nera bʉra krĩcha abarika zeika ãyiʉ̃me bʉa maʉ̃ oita krĩcha ba ẽ basimina? Zõrãrãbara jʉ̃ã ẽã wuabemaraba odamarẽã iya krĩchakʉde. Adewara kʼawuabʉ wuabemara bedʼeara kĩrãkita ũrĩbarata (Gén. 13:​8, 9; Prov. 15:22). Adewara wuabemara wawia ũdubibʉ akʉza kʼaikʼaia ẽã ãyibawara, awuarabʉrʉ zarea obʉ ibiade edaita akʉza jʉrʉbʉ ãyibawara sãwũã aduʼa bʼaita bia edada ẽ mina (Sant. 3:​17, 18). Adewara iyaʼa kĩrʉ bedʼeabʉdade ibiade panʉbʉba, kʼarebayi wuabemarasida iyiʉ̃me aduʼa bamarẽã bedʼea abarika panʉ ẽ mina (Juec. 8:​1-3; Prov. 25:15; Mat. 5:​23, 24). w24.11 23 parr. 13

Jesúsʼra dayirã bari beisi, mamina iyira maʉ̃ tẽãra wuara bei ẽ basi dayirã bari, maʉ̃ra abapai osi akʉza maʉ̃neba wuara oẽ basi (Rom. 6:10). Mawũãsidu Jesúsbara atiara nekʼãrẽ mejãcha obʉ dayirã bari, atiara iyi zarea trajabʉ dayirãʼa nebiata mejãcha diaita, dayirãba maʉ̃ nebiara ũduseabʉ iyita dayirã bari beisi baera atiara, ¿kʼãrẽta obʉ Jesúsba? Iyira atiara Nokʼo, saserdote akʉza kongregasion buru (1 Cor. 15:25; Efes. 5:23; Heb. 2:17). Akʉza Jesúsbara ãba jʉredabʉ ʉ̃ta wãirata, adewara ẽbẽrarã mejãchabʉra naʉ̃ egorode bʼairata (Mat. 25:32). Mamina atiara dayirãra naʉ̃ ewari jõbodoarepanʉ baera, Jesúsba Zõrãrã Burubiadeba diabʉ nekʼãrẽ dayirãba nesidabʉta mawũã Jeowa ode kʼẽrẽpapanamarẽã (Mat. 24:45). Mamina maʉ̃ awa ẽ, ẽjũã kĩrãwãreã zebʉrʉdebida Jesúsba mil poagabayeda zokʼabʉrʉdera, iyara nekʼãrẽ biara mejãcha oyi dayirãbari. Naʉ̃ jõmaʉ̃ba ũdubibʉ Jeowabara Jesúsʼra zokʼa bʉe ẽ basita bari iyi bebʉta dayirãbari diamarẽã, awuarabʉrʉ zokʼa bʉesi dayirã kʼarea nekʼãrẽ biata mejãcha omarẽã. w25.01 24 parr. 12

Jeowabara dayirã nemitiara jipa kĩrãduabʉ akʉza ewari jõmaʉ̃nẽ, adewara iya dayirã nemitia mawũã kĩrãduabʉba kʼarebabʉ jẽda iyi neũdukʼawua bʼaita, mamina kĩrãbedaibara Jeowabara dayirã nemitiara kĩrãduaibara ẽãta. Iya dayirã nemitia mawũã kĩrãduabʉra nekʼãrẽ bari diabʉ kĩrãkʼabʉ iyi biadeba mawũã obʉ baera. Mejãchade sobiapanʉ Salmo 130:4ba jarabʉ kĩrãkʼa, Jeowaba dayirã nemitiata jipa kĩrãduabʉ baera (Rom. 4:8). Mamina kĩrãbedaibara Jesúsba jaradata, iya jarasi: «Maraba kĩrãdua ẽ bʉrʉ wuabemaraba nemitia odata, mawũãra Daizezebida kĩrãdua ẽ bayi maraba nemitia obʉra» (Mat. 6:​14, 15). Maʉ̃ba jipade yibia dayirãbida Jeowade kĩrãkʼa kĩrãduaita. w25.02 13 parr. 18, 19

Dayirãba kʼawuapanʉ Sodoma akʉza Gomorradera basita yumakẽrã Daizeze nãã bia obʉta, maʉ̃ra Lotbasi. Mamina biʼia kʼawuada ẽ Lotba ẽbẽrarã naʉ̃ pʉwʉrʉdebema jõmaʉ̃ʼa Daizeze ʉ̃rʉ jaradiasi kʼawuaita. Naʉ̃ra ẽbẽrarã maʉ̃ pʉwʉrʉdebemarãra nekayirua omiarabasi mamina, ¿ãyi aba abakaʉba bia kʼawuabasika saʉ̃ta bigata akʉza saʉ̃ta biga ẽãta? Kʼawuada ẽ basibaibara. Daizeze Bedʼeaba jarabʉ ẽbẽrarã mejãchaʉta Lot deidu jʉ̃ẽsidata, ẽbẽrarã Lot deda jʉ̃ẽnapeadata wawa oita. Adewara jarabʉ maʉ̃ra ẽbẽrarã bio jʉ̃ẽnanera edabasita zõrãrãta akʉza warrarata (Gén. 19:4; 2 Ped. 2:7). Mawũẽra, ¿jaraseapanʉka Daizeze so zʉbʉria akʉbʉbara jipade piradrʉbi ẽ baita ẽbẽrarã maʉ̃ pʉwʉrʉranebemara? Maʉ̃ra kʼawuada ẽ, mamina kʼawuapanʉ Jeowaba Abrahánʼa jarasita maʉ̃ pʉwʉrʉdera mia 10bida ba ẽ basita ẽbẽrarã bia opanʉrãra (Gén. 18:32). Maʉ̃ kʼarea jaraseapanʉ maʉ̃ra ẽbẽrarãbara bia ẽãta opanasita akʉza Jeowaba maʉ̃ kʼarea makenasita ãyira. Mamina, ¿maʉ̃ba jarakĩrãbʉka Daizezeba ẽbẽrarã bia ẽ opanʉra jẽda piradrʉbibʉrʉdera maʉ̃ra ẽbẽrarã mia abaʉta jẽda piradrʉ ẽ baita? Mawũã ẽ, maʉ̃ra bia kʼawuada ẽ. w24.05 2 parr. 3; 3 parr. 8

Edaʉde platara neẽ baera ʉ̃kʉrʉbara ĩjãbʉ ãyi mebẽrãneba jĩga wãita trajo bia ũduita. Mamina ãya mawũã obʉdera ũdupanʉ ãya jidadara biga ẽ basita bia wã ẽ baera. Maʉ̃ba jipade yibia daya trajo jʉrʉnʉmʉnera, bari krĩcha ẽ baita plata sõbe ganai ʉ̃rʉ. Yibiabayi nããra krĩchaita maʉ̃ba kʼarebabʉ kʼawuaita bʉta akʉza bʉ mebẽrãta Jeowa kʼawa bʼaita (Luc. 14:28). Bʉta jĩga traja wãibarabʉrʉ bʉyikʉza naʉ̃ta widira: «Mʉ̃ta jĩga wãra, ¿kʼãrẽba sãwũãi mʉ̃ kimaʉ̃mera? mawũã ẽ bʉrʉ ¿naʉ̃ trajobara kʼarebaika ãba yi jʉrebari wãita, jaradia wãita akʉza mebẽrã kongregasionebemabawara ãba bʼaita?». Adewara bʉta wũãwũã barabʉbʉrʉ bʉyikʉza naʉ̃ta widira: «¿Mʉ̃ta jĩgabʉbʉrʉ sãwũã kʼarebai mʉ̃ wũãwũãraba Jeowade jarabʉde odamarẽãra?» (Efes. 6:4). Bʉ mebẽrã Daizeze odebʉ ẽãraba, mawũã ẽ bʉrʉ bʉ neũdukʼawuara Daizeze odebʉ ẽãraba bʉa ũrãgʼata diadara, ũrĩrãra ãyi bedʼeara. Awuarabʉrʉ ũrĩra Jeowaba kʼãrẽta jarabʉta bʉaʼa Daizeze Bedʼeadeba. w25.03 29 parr. 12

Kristiano abaʉba Daizeze Bedʼeadebema sãwũã oita biʼia kʼawua ẽ bʉrʉ yi sewabiseabʉ, ĩjãseabʉ awururaba sewa nebʉrʉ jarabʉta akʉza yi sewabiseabʉ apostatara. Adewara naʉ̃ ẽbẽrarã jiwaida, yõmia, mawũã ẽ bʉrʉ mesera kĩrʉbʉ akʉza yi kayiruata mesera oseabʉ (1 Cor. 3:3). Daizeze Bedʼeadera jara ũrĩbibʉ ẽbẽra abaʉba Daizeze Bedʼeadebema sãwũã oita biʼia kʼawuaira abarikabʉta ẽbẽra aba wari wã kĩrãkʼa (Efes. 4:15). Wũãwũã zakebara wiñayiruedara nekʼãrẽ jõma kʼawua ẽ, maʉ̃ba iya nesida yi zezeba jaradiamarẽã. Bari jaraita, papa abaʉba iyi kau wikakiruedara ode wãnera yi kau juwata jidabʉ, mawũã neida berabari ẽ marẽã, mamina yi kau wari wãne iyara jida ẽ iyi kau juwara, awuarabʉrʉ kĩrãbebibʉ ode wãnera jʉra kʼawua bamarẽã akʉza iyi yi zroma chubidadera yi papabara kʼãrẽ jara ẽ, yi kauba kʼawuabʉ baera kʼãrẽta oibarata. Abarika kristiano Daizeze Bedʼeadebema sãwũã oita biʼia kʼawuabʉbara, iya nekʼãrẽ oita jidai nãã biʼia krĩchabʉ Daizeze Bedʼearadebemaba kʼãrẽta jarabʉta akʉza mama jarabʉ kĩrãkʼa oũdubibʉ. w24.04 3 parr. 5, 6

Poaga biobayeda, yi warrata akʉza naʉ̃ra angeleratrʉ iyi neũdukʼawuabasi. Mamina tẽã Jeowaba parãsi ẽbẽrarãta, naʉ̃rasida iyi neũdukʼawua baseapanasi. Naʉ̃ra neũdukʼawuadebemara naʉ̃ra basi, Enoc, Noé, Abrahán akʉza Job. Daizeze Bedʼeabara jarabʉ ãyira Jeowa neũdukʼawuabasita Jeowaba jarabʉta opanasi baera (Gén. 5:24; 6:9; Job 29:4; Is. 41:8). Dããraba Jeowaba iyi neũdukʼawuara iyi deda trʉ̃bʉta (Ezeq. 37:​26, 27). Ezequielba propesia bʉdade jarabʉ Daizezera neũdukʼawua bia bakĩrãbʉta iyi ode kʼẽrẽpapanʉraʉ̃me, iya jarabʉ maʉ̃ra ẽbẽraʉ̃me bedʼea abarika zeita, mawũã aduʼapanaita. Naʉ̃ propesiade jarabʉ yi ʉ̃ta wãirata akʉza nama egorode panairata iyi deda ãbapanaita (Juan 10:16). Maʉ̃ra idi ewade aripe berabarinʉmʉ. w24.06 2 parr. 2; 3 parr. 4, 5

Jeowa odepanʉra jõmaʉ̃ta Daizeze Nokʼo are bakĩrãpanʉ, mamina maʉ̃itara jõmaʉ̃ba nesidapanʉ zowaĩnĩgʉa bʼaita (Mat. 6:33). Bari jaraita, naʉ̃ drʉadera yi kayiruata audre eaba wã baera, Jeowa odepanʉrabara zowaĩnĩgʉa ũdubita nesidapanʉ Jeowaba kãgabʉde bʼaita akʉza Daizeze Nokʼo ʉ̃rʉ jaradiaita. Idi ewadera ẽbẽrarã aba abakaʉba jidabʉ ãyi politikade kʼaiare bʼaita, maʉ̃ba Jeowa odepanʉraitara zarea baseabʉ kʼaiarebʉ ẽãta ũdubira (Juan 18:36). Mejãcha mebẽrã Jeowa odepanʉraba ĩjãna ẽ baera politikade eda wãita, mawũã ẽ bʉrʉ gorogororane eda wãita maʉ̃ kʼarea nokʼorabara plata diada ẽ ãyaʼa, zʉbʉria opanʉ, adewara karsel eda edepanʉ. Dayirãba akʉdara sãwũã Jeowa odepanʉraba ũdubi zebʉdata ãyi Daizeze Nokʼo arepanʉta, naʉ̃ba zowaĩnĩgʉa babiyi dayirãra. Jesús nama egorode basidera politikade eda ba ẽ basi, maʉ̃ra Diarude baera (Mat. 4:​8-11; Juan 6:​14, 15). Iyi so zarea erbaira Jeowaʼa kʼareba widibasi. w24.07 3 parr. 4; 4 parr. 7

Jeowabara naʉ̃ nebʉrara Daizeze Bedʼeadebʉ kʼãrẽ, dayirãba biʼia kʼawuadamarẽã iya kʼãrẽa jʉrata nemitiara, Jeowabara nemitiara jʉra, naʉ̃ba dayirãta iyideba jĩga babibʉ baera akʉza beieda edebʉ baera (Is. 59:2). Maʉ̃ta mawũã kʼawuabʉ baera Diarubara kãgabʉ dayirãbida nemitiata odamarẽã, adewara maʉ̃ kʼarea Adán Evaʉ̃mera iyara sewasi. Adán Evaʉ̃meba Diaru bedʼea ũrĩsidadera Diarubara krĩchasi Jeowaba ẽbẽrarãita kʼãrẽ oita krĩchabʉra aripe berabari ẽ baita, mamina wãrĩnubaira Diarubara biʼia kʼawua ẽ basi Jeowaba ẽbẽrarã kʼãrẽaba kãgabʉra, mamina Jeowabara ẽbẽrarãita kʼãrẽ oita krĩchabʉra kĩrãdua ẽ basi, awuarabʉrʉ iya ẽbẽrarãra mejãcha kãgabʉ baera mesera jʉrʉsi sãwũã nebiata jʉ̃ãbita maʉ̃ra ẽbẽrarã (Rom. 8:​20, 21). Jeowabara kʼawuabasi ẽbẽrarã Adán akʉza Evadeba zedarabara, ʉ̃kʉrʉba ũdubibasita iyita kãgapanʉta akʉza iyi kʼarebata jʉrʉdaibasita nemitiadeba ẽdrʉita. Jeowara Zeze bia baera iyara jʉrʉsi ẽbẽrarã sãwũã ẽdrʉbita nemitiadeba akʉza sãwũã iyi kʼawa babita. w24.08 3 parr. 3, 4

Dayirã Jeowa odepanʉra mejãchaʉba nekʼãrẽ mejãcha oibara ewaride. Dayirãnebema mejãchaʉta trajade wãibara mawũã daya nesidabʉta erbaita akʉza dayirã mebẽrãba nesidabʉta diaita (1 Tim. 5:8). Adewara ʉ̃kʉrʉ mebẽrãbara ãyi mebẽrã kayabʉta akʉpanʉ, mawũã ẽ bʉrʉ ãyi mebẽrãnebema zõrãpanʉrata akʉpanʉ. Maʉ̃ awuara dayirã jõmaʉ̃ba dayikʉza bia akʉibara, dayisida medikoma wãibara. Adewara dayirã jõmaʉ̃ba kʼarebadaibara kongregasionebida. Bari jaradaita, dayirã jõmaʉ̃ba ewariza jaradia wãibara. Daizeze Bedʼea akʉira Jeowa odepanʉraitara audre yibia, maʉ̃ kʼarea jipade yibiabayi ewariza opanaita maʉ̃ta. Salmo libroba jarabʉ sãwũãbʉta ẽbẽra sobiabʉra, jarabʉ: «Kãga Jeowa leyta; ewaride akʉza diamasi lebʉ akʉza bia krĩchabʉ maʉ̃ ʉ̃rʉ» (Sal. 1:​1, 2). Naʉ̃ba ũdubibʉ ewari jʉrʉibarata Daizeze Bedʼea akʉita mamina, ¿dayirãitara kʼãrẽ ũmadaʉde audre yibia Daizeze Bedʼea akʉira? Maʉ̃ra dayirã aba abakaʉdebʉ, aba abakaʉba jʉrʉibara baera kʼãrẽ ũmadaʉde audre yibiata Daizeze Bedʼea akʉita ewariza. w24.09 3 parr. 5, 6

Kristiano Daizeze Bedʼeadebema sãwũã oita biʼia kʼawuabʉbara nesidabʉ wuabemaraba kʼarebamarẽã, iya kʼareba widibʉrʉdera jʉ̃ã ẽ awururaba iyibari jidamarẽã, awuarabʉrʉ iya nekʼãrẽ oita jidabʉbʉrʉ kʼawuabʉ maʉ̃ra iyidebʉta. Mamina kristiano Daizeze Bedʼeadebema sãwũã oita biʼia kʼawua ẽ bara, kʼareba widibʉrʉdera jʉ̃ãbʉ iyaʼa kʼawua jaradamarẽã iya kʼãrẽta oibarata akʉza iyibari jidadamarẽã. Zõrãrãra jõma abarikabʉ ẽ, maʉ̃ kĩrãkʼa kristianora Daizeze Bedʼeadebema sãwũã oita biʼia kʼawuabʉrabara iyabaʉ nebiata ũdubibʉ ẽ. Bari jaraita, ʉ̃kʉrʉra buru bia, ʉ̃kʉrʉra zowaĩnĩgʉa erbʉ, mawũã ẽ bʉrʉ ʉ̃kʉrʉbara awurura nekʼãrẽ diakĩrã akʉza krĩchabʉ wuabemara sãwũãbʉ ʉ̃rʉ, maʉ̃ kʼarea ãya nekʼãrẽ oita jidabʉrʉdera awuara awuaraka jidabʉ, maʉ̃ba jarakĩrãbʉ ẽ aña jidabʉta, awuarabʉrʉ ãyara akʉbʉ jõma Daizeze Bedʼearadebemaba jarabʉ kĩrãkʼa oita. Adewara mebẽã abaʉba nekʼãrẽ oitabʉde ãyide kĩrãkʼa oẽ bʉrʉ aña krĩcha ẽ bayi maʉ̃ mebẽã ʉ̃rʉ awuarabʉrʉ ãbapanañi (Rom. 14:10; 1 Cor. 1:10). w24.04 4 parr. 7, 8

Bʉa krĩchabʉbʉrʉ bʉra kʼãrẽita zeri ẽãta, ¿kʼãrẽta oseabʉ? Lera testo Jeowaba bʉ kʼãrẽaba kãgabʉ ʉ̃rʉ bedʼeabʉta, mõbe maʉ̃ ʉ̃rʉ krĩchara. Adewara krĩchara bʉa kʼãrẽta okĩrãbʉta, mõbe bʉa wuabemarane kĩrãkʼa abarika obe ẽ bʉrʉ Jeowa kʼarea, maʉ̃ kʼarea sopʉarãra, krĩcha orãra maʉ̃ kʼarea. Kĩrãbera Jeowabara jʉ̃ã ẽãta bʉa obe ẽãsidu wũẽta omarẽãra (Sal. 103:​13, 14). Bʉta zʉbʉria osidabʉrʉ akʉza krĩchabʉbʉrʉ maʉ̃ra mawũã berabarisita bʉ kʼarea, wua mawũã krĩcharãra. Kĩrãbera Jeowabara yi zʉbʉriabidapeadata kʼawua oi ẽãta, awuarabʉrʉ Jeowabara kʼawua oyi yi ẽbẽrarã awurura zʉbʉriabibʉta (1 Ped. 3:12). Edaʉde bʉa krĩchaseabʉ awuru ẽbẽrarãra kʼarebabe ẽãta bʉtrʉ zʉbʉriade berabaribʉ baera, mamina wãrĩnubaira, Jeowabara bʉta zokʼaseabʉ awuru ẽbẽrarã kʼarebaita. Yi audre yibiara Jeowabara iduaribibʉ bʉa iyi ʉ̃rʉ jaradiamarẽã awuru ẽbẽrarã, mõbe kĩrãbera maʉ̃ra badu ẽbẽraba obe ẽãta (1 Cor. 3:9). Bʉa ũdubʉrʉde awuru ẽbẽra bʉ berabarida kĩrãkʼa berabarinʉmʉta, maʉ̃nera bʉa kʼawuaseabʉ maʉ̃ ẽbẽra kʼãrẽaba sopʉabʉra akʉza kʼawuaseabʉ iyi sãwũã kʼarebaita, bʉta maʉ̃ne berabaribari baera. w24.10 8 parr. 6, 7

«Jeowabara kãga nekʼãrẽ aripe oita» (Sal. 37:28). Jeowabara kãgabʉ dayirãra awururaba bia edadamarẽã akʉza iyara kʼawuabʉ sõbede awururaba dayirãba oẽ bada kʼarea zʉbʉriabibʉta. Jeowabʉrʉ kʼawuabʉ sõbede dayirãba bedʼea zroma erbʉde kʼarebaira, maʉ̃ kʼarea Jesúsba jarasi maʉ̃ ewaride Jeowaba wãrĩnu kʼarebaita dayirãra. Aranʉbai Jeowaba zʉbʉria naʉ̃ drʉadebʉra jõma jõbiyi akʉza dayirãba oẽ bada kʼarea zʉbʉriabipanʉra wua mawũã oda ẽ bayi (Sal. 72:​1, 2). Mamina dayirã zʉbʉriabibʉ ewari jõñienara, Jeowabara dayirã jaradiabʉ kʼãrẽta oseapanʉta awururaba dayirãba oẽ bada kʼarea zʉbʉriabibʉrʉde (2 Ped. 3:13). Bari jaraita, jaradiabʉ kʼãrẽta oibarata bedʼea zromata audre ũdu ẽ baita. Iya dayirã jaradiabʉ yi Warra yizadeba, Daizeze Bedʼeade bʉbisi yi Warraba kʼãrẽta osita awururaba iya oẽ bada kʼarea zʉbʉriabisidade, adewara Daizeze Bedʼeade ũrãgʼa biatabʉ, jaradiabʉta awururaba dayirãba oẽ bada kʼarea zʉbʉriabibʉrʉde kʼãrẽta oibarata. w24.11 2, 3 parr. 3, 4

Jesúsba ẽbẽrarã mejãcha ne diamarẽã jarada oira zarebasi 5 mil ẽbẽrarã basi baera, maʉ̃ awuara wẽrãrata akʉza wũãwũã zakerata jʉachara 15 mil basibaibara (Mat. 14:21). Andrésba kʼãwũã jarasi: «Kũrãta za bʼʉba pan juesoma erubʼʉta cebada omata erubʼʉa, bʼedasidʼa ũme erubʼʉa, mawũãmina ¿naʉ̃ sãwũãĩpe bioitara?» (Juan 6:9). Maʉ̃ panʼra sebada omabasi akʉza mejãcha bale ẽ basibaibara, adewara bedasida bisiamapei badabasibaibara akʉza kʉyibasibaibara. Mamina maʉ̃ panbara akʉza maʉ̃ bedabara ẽbẽrarã jõma aribae ẽ baibasi ẽbẽrarã mejãchabasi baera. Jesúsbara ẽbẽrarãta bia edakĩrãbasi baera ãyaʼa jarasi poajãrã ʉ̃rʉ jewedadamarẽã (Mar. 6:​39, 40; Juan 6:​11-13). Daizeze Bedʼeaba jarabʉ pan dedekasidera akʉza beda dedekasidera Jesúsbara nããrãra Jeowaʼa yiwidʼisita biga diaita maʉ̃ yiko kʼarea. Iya maʉ̃ oira yibia basi, wãrĩnubaira maʉ̃ yikora Jeowaba diasi baera. Naʉ̃ba dayirã kĩrãbebibʉ dayirãsida nekoi nããra Jeowaʼa yiwidʼibarata. Tẽã Jesúsba jarasi maʉ̃ yikora dedekadamarẽã ẽbẽrarã. w24.12 2, 3 parr. 3, 4

Jesús nama egorode baside yi Zeze ʉ̃rʉ ibia bedʼeabasi. ¿Iya maʉ̃ra sãwũã osi? Iya miõba okata obʉrʉdera jara ũrĩbibasi maʉ̃ra yi Zezedeba osita (Mar. 5:​18-20). Adewara Jeowa ʉ̃rʉ ibia bedʼeabasi awurura yi Zeze ʉ̃rʉ bedʼeabʉrʉde nebiata jarabasi baera. Akʉza wuabemara sãwũã edabʉdeba ibia bedʼeabibasi yi Zeze ʉ̃rʉ. Ewari aba Jesúsba sinagogade jaradianʉmasi ẽbẽrarã. Maʉ̃ne edabasi ẽbẽra wẽrã aba 18 poaga bata demonio abʉta. Iyira maʉ̃ demonioba ẽkarra jʉre erbasi. Jesúsba maʉ̃ta ũdui kʼawuasi maʉ̃ ẽbẽra wẽrã mejãcha zʉbʉriabʉta, maʉ̃ kʼarea so borekea akʉ kʼãrãpe jarasi maʉ̃ demonio neẽ beita. Aramaʉ̃ta maʉ̃ ẽbẽra wẽrãra be totosi. Maʉ̃ tẽã ẽbẽra wẽrãra Jeowa ʉ̃rʉ ibia bedʼeasi (Luc. 13:​10-13). Naʉ̃ ẽbẽra wẽrãbara erbasi kʼãrẽa Jeowa ʉ̃rʉ ibia bedʼeaira. Idi ewade dayirãbida erpanʉ kʼãrẽa Jeowa ʉ̃rʉ ibia bedʼeaira. w25.01 3 parr. 3, 4

Dayirã dobaʉbara jõma jẽda ũdu ẽ Adánba Evaʉ̃meba aduadara (Sal. 49: 7-9). Kʼareba neẽãra dayirãra jipa beikasi akʉza jẽda bʼaita krĩcha ẽ bakasi, nedʉwʉrʉ kĩrãkʼa (Ecl. 3:19; 2 Ped. 2:12). Jeowaba dayirãta mejãcha kãgabʉ baera dayirã nemitia bari nebiata diasi. Maʉ̃neba kĩrãduabʉ iya dayirã kayiruara. Jesúsba jara ũrĩbisi kʼãrẽta maʉ̃ nebiara. Iya jarasi: «Daizezebara ẽbẽrarã mejãcha kãgabʉ baera diasi yi Warra aba bʉta iyidebema ĩjãbʉra bei ẽ bamarẽã, awuarabʉrʉ ewari jõmaʉ̃nẽ bʼaita» (Juan 3:16). Maʉ̃ nebiabara audre Jeowa neũdukʼawua babibʉ. Dayirãba ũduseabʉ naʉ̃ nebiata akʉza maʉ̃neba dayirãba nemitia odata kĩrãduaseabʉ. w25.02 3 parr. 3-6

¿Kʼãrẽba kʼarebasi Saulo buru kʼoeita? Jesús iyaʼa yi ũdubiside Saulora dauberre besi (Hech. 9:​3-9). Mawũã berabarida kʼarea, ewari ũbeabayeda iyira neko ẽ basi akʉza maʉ̃ ʉ̃rʉ krĩchasi, maʉ̃ne kʼawuasi Jesúsʼra Mesíasta akʉza iyi kʼaidubemarãra wãrĩnu kristianoarata. ¿Kʼãrẽta kʼawuapanʉ Saulodeba? Sauloba nekʼãrẽ mejãcha kʼawuabʉ baera ʉ̃tabʉta krĩchaseabasi, mawũã ẽ bʉrʉ iyira pera sentiseabasi wuabema ẽbẽra kʼarea, maʉ̃ba buru kʼoe ẽ baita krĩchaseabasi, mamina maʉ̃ʼa yi edebi ẽ basi. Iyara kristiano bʼaita jidasi kʼawuabasimina pẽwãnaita (Hech. 9:​15, 16; 20:​22, 23). Saulo buru kʼoeda tẽãra, bedʼea zromata ũdubasi, maʉ̃ kʼarea iya Jeowaʼa widibasi kʼarebamarẽã (2 Cor. 4:​7-10). Abarika bʉ buru kʼoeda tẽãra bedʼea zromata ũduseabʉ, mamina bʉra abapaibʉ ẽ, Jeowaba Jesúsʼʉ̃meba kʼarebayi (Filip. 4:13). w25.03 4 parr. 8, 9

Daizeze Bedʼea leita jipade yibia, mamina Daizeze Bedʼea akʉbʉdeba nebiata ũdukĩrãpanʉbʉrʉ bari leibara ẽ. Maʉ̃ ʉ̃rʉ bia ũrĩnaita naʉ̃ ʉ̃rʉ̃ krĩchadaya. Kue zeira yibia ne u bia pawãraita. Mamina kueta nrʉemaza mejãcha zera yibia ẽ, baniara aribia pia oũbida baera, maʉ̃ba audre yibia kue wiña zeita egoroba ewari erbamarẽã bania pia oũbʉta sõita, mawũã põasãmarẽã. Maʉ̃ kĩrãkʼa dayirãba Daizeze Bedʼea lebʉrʉde mesera lebʉbʉrʉ, naʉ̃bara kʼareba ẽ bayi jẽda kĩrãbeita dayirãba kʼãrẽ leda ʉ̃rʉ akʉza maʉ̃ba kʼawuada ẽ bayi kʼãrẽta oũdubibarata (Sant. 1:24). Bʉa Daizeze Bedʼea lenʉmʉne kʼawuara mesera lenʉmʉta, ¿kʼãrẽta oseabʉ? Zarea ora pikãga leita akʉza krĩchaita bʉa kʼãrẽ lenʉmʉ ʉ̃rʉ. Bʉara audre ewari jʉrʉseabʉ Daizeze Bedʼea leita mawũã audre ewari erbaita bʉa leda ʉ̃rʉ krĩchaita. w24.09 4, 5 parr. 7-9

Jeowa organizasionba zõrãrã jaradiabʉ kʼãrẽta oibarata. Bari jaraita, ãyaʼa jaradiabʉ ãba yi jʉrebʉrʉde sãwũã jaradiaibarata akʉza yiwidʼibʉrʉde sãwũã oibarata. Mamina bari maʉ̃ awa jaradiada ẽ, ãyaʼa jaradiapanʉ sãwũã biʼia akʉibarata Jeowa obeja zakerasida. ¿Sãwũã ũdubipanʉ zõrãrãbara biʼia akʉpanʉta ãyaʼa kʼãrẽ jaradiapanʉra? Maʉ̃ra opanʉ ãyaʼa nekʼãrẽ omarẽã jarabʉta biʼia akʉbʉde akʉza mama jarabʉde oũdubibʉrʉde. Zõrãrãba Jeowa organizasionba jaradiabʉde opanʉbʉrʉ, mebẽrãba ũdudayi Jeowaba ãyaʼa kãga ũdubibʉta akʉza ãyira bia akʉ erbʉta. Zõrãrãba dayirã nekʼãrẽ omarẽã jarabʉdadera dayirãbara oibara ãya omarẽã jarabʉra, dayirãba maʉ̃ta opanʉbʉrʉ ãyitara audre zare ẽ bayi ãyi trajo bia oita. Daizeze Bedʼeaba jarabʉ dayirãbara ũrĩbarata yi nãã panʉra bedʼeara (Heb. 13:​7, 17). Mamina dayirãitara ãyi bedʼea ũrĩra edaʉde zarea baseabʉ, ¿kʼãrẽa? Ãyira dayirã kĩrãkʼa kayirua omia baera. Dayirãba zõrãrãba kʼãrẽ aña obʉta akʉpanʉbʉrʉ akʉza ãya nebia obʉta akʉ ẽ bʉrʉ, Jeowa nejʉrara kĩrãkʼa krĩchaseapanʉ, ¿sãwũẽra? Jeowa nejʉrarabara kãgapanʉ dayirãba ĩjã ẽ marẽã Jeowaba iyi organizasioneba dayirãʼa jaradiabʉta. Maʉ̃ba dayirãba zõrãrã ʉ̃rʉ aña krĩchapanʉbʉrʉ aña krĩchaseapanʉ Jeowa organizasion ʉ̃rʉ akʉza Jeowa organizasion ʉ̃rʉ ĩjãbʉta aduaseapanʉ. w24.04 10 parr. 11, 12

Dayirãba widiseabʉ, ¿zʉbʉria zroma berabarinʉmʉne ẽbẽrarã beidara jẽda piradrʉika? Daizeze Bedʼeaba jara ũrĩbibʉ ẽbẽrarã Jeowa ʉ̃rʉbʉta akʉza Armagedónʼne Jeowaba iyi angelerabawaraʉba beabʉrʉra jẽda piradrʉ ẽ baita (2 Tes. 1:​6-10). Mamina, ¿jẽda piradrʉika ẽbẽra zʉbʉria zroma zebʉrʉde kayabʉde beidara, asidenta beidara, awuruba beadara, mawũã ẽ bʉrʉ naʉ̃ drʉade neida berabaribʉba beidara? (Ecl. 9:11; Zac. 14:13). ¿Jeowabara naʉ̃ra ẽbẽrarã bia ẽã obebawara jẽda piradrʉbika? (Hech. 24:15) Maʉ̃ra kʼawuada ẽ. Mamina dayirãbara wiña kʼawuapanʉ aranʉ kʼãrẽta sãwũã berabarita. Bari jaraita, Armagedón zebʉrʉde ẽbẽrarã kʼawua odaita ãya Daizezeba jidada ẽbẽrarãta sãwũã erbadadeba (Mat. 25:40). Adewara kʼawuapanʉ ẽbẽrarã Jesús arepanʉta akʉza 144.000ra kʼarebapanʉra jaraita ãyira obejarata (Apoc. 12:17). w24.05 10, 11 parr. 9-11

Daizeze Bedʼeaba jarabʉ idi ewadera bedʼea zroma daya obe ẽãta ũdupanʉta (2 Tim. 3:1). Idibema ẽbẽrarãbara mejãcha ũdupanʉ bedʼea zromata, mamina Jeowa ʉ̃rʉ Kʼawuabipanʉrãbara audre ũdupanʉ ãyita pẽwãpanʉ baera. ¿Kʼãrẽba kʼarebaseabʉ mawũãsidu kʼẽrẽpa bʼaita? Dayirãba kĩrãbeibara Jeowara wãrĩnʉbʉta, maʉ̃ba mejãcha kʼarebaseabʉ (Jer. 10:10; 2 Tim. 1:12). Jeowara wãrĩnu zokʼaibʉ, maʉ̃ba iyara jʉrʉbʉ sãwũã kʼarebaita dayirãra akʉza so zarea diabʉ bedʼea zroma ũdubʉdade (2 Crón. 16:9; Sal. 23:4). Kʼawuapanʉbʉrʉ Jeowara wãrĩnu zokʼaibʉta kʼãrẽ bedʼea zroma zebʉmina iyiʉ̃me kʼẽrẽpabayi. w24.06 20 parr. 1, 2

Bʉ, kʼãrẽa Jeowa organizasionba jarabʉ ũrĩra. Dayirã organizasion nãã edebariba Daizeze Bedʼea bia ũrĩbʉrʉdera ãyara nekʼãrẽ mesera obʉ, mawũã Daizeze Bedʼeaba jarabʉ kĩrãkʼa oita akʉza Daizezeba zokʼabʉde yiwidʼita. Mawũã opanʉ Jeowata sobiabikĩrãbʉ baera, ãya nekʼãrẽ jidabʉrʉdera nãã jʉrʉbʉ Daizeze Bedʼeadebemane, maʉ̃ra bedʼea bia baera. Apostol Pabloba jarasi: «Obara bedʼea bia mʉ̃a bʉaʼa jaradiadara» (2 Tim. 1:13). ¿Saʉ̃ maʉ̃ra bedʼea biarãra? Jesúsba jaradiada Daizeze Bedʼeade edabʉta (Juan 17:17). Maʉ̃ bedʼeadeba jõma zebʉ dayirãba ĩjãpanʉra, Daizeze organizasionba jaradiabʉ maʉ̃ta odamarẽã, maʉ̃ta ora bia wãñi. w24.07 11, 12 parr. 12, 13

Pedrobara biʼia kʼawuabasi sãwũã sentibʉta daya nemitia oda kʼarea jẽda krĩchaira akʉza maʉ̃ nemitia odata kĩrãduadaira, maʉ̃ kʼarea awurura maʉ̃ ʉ̃rʉ jaradiasi. Pentecostés ewari berabarida, tẽã Pedroba diskurso abaʉde judiora jara ũrĩbisi ãya beasidata Mesiasʼra. Maʉ̃ kʼarea Pedroba naʉ̃ra ẽbẽrarã ibiade kʼãwũã jarasi: «Kayiruara idubʉra akʉza jẽda zera, maraba kayirua obada kĩrãduamarẽã, mawũãra Jeowabara mara kayiruara kĩrãduayi» (Hech. 3:​14, 15, 17, 19). Pedroba jaradiasi ẽbẽra abaʉba jẽda krĩchabʉta ũdubira, naʉ̃bara nekʼãrẽ iya obadaira jipa awuara oibarata. Maʉ̃ba jarakĩrãbasi iya sãwũã aña krĩchabadara bia krĩchaibarata akʉza iya nekʼãrẽ aña obadara idubʉibarata. Adewara nekʼãrẽ oibarata Jeowaba kãgabʉde bʼaita. Pedroba ũdubisi Jeowabara dayirã nemitiara jipa kĩrãduabʉta, iyara maʉ̃ra wua krĩcha ẽãta. Jeowaba dayirã nemitia jipa kĩrãduabʉ, kʼawuabʉba kʼarebabʉ dayirã aduʼa sentipanaita. w24.08 12 parr. 14

Dayirãba ĩjãpanʉbʉrʉ naʉ̃ ewarira wãrĩnu jõita, mawũãra krĩchada ẽ bayi plata mejãcha jʉrʉita akʉza nekʼãrẽ bia erpanaita, zʉbʉria zroma zebʉrʉdera platara mia kʼãrẽsida bale ẽ bayi. Daizeze Bedʼeabara jarabʉ ẽbẽrarãbara orota, platata, ode balbʉeita, maʉ̃bara ãyi bebʉra kʼareba ẽ bai baera (Ezeq. 7:19). Dayirãbara krĩchada ẽ baibara mejãcha plata erbaita, awuarabʉrʉ jʉrʉdaibara trajo dayi mebẽrãba nesidabʉ diabʉta akʉza dayi bia babibʉta. Maʉ̃ awuara, maʉ̃ trajoba audre obibʉta Jeowadeta. Mawũã opanʉbʉrʉ naʉ̃ba kʼarebayi dayirã mejãcha debe oẽ baita. Adewara dayirãba nekʼãrẽ biata erbʉ ẽ bʉrʉ, ewari adua ẽ bayi jʉrʉita maʉ̃ sãwũã bia erbaita. Adewara dayirãra jʉra kʼawuapanaibara dayirãba nekʼãrẽ biata erbʉbʉrʉ, maʉ̃trʉ jʉ̃zaba akʉnʉma ẽ baita (Mat. 6:​19, 24). Naʉ̃ ewari jõbodoarera dayirãbara bia krĩcha kʼãrãpe jidaibara nekʼãrẽ bia erpanʉta audre bia akʉita, mawũã ẽ bʉrʉ Jeowa ʉ̃rʉ audre ĩjãita. w24.09 11 parr. 13, 14

Ʉ̃kʉrʉ nekʼãrẽ dayirãba aña obadara jipa idubʉseabʉ, mamina bʉ ʉ̃kʉrʉta dayita ewari jõmaʉ̃nẽ jʉra kʼawuabʉ ẽ bʉrʉ, maʉ̃bara nekayiruama edebiseabʉta. Bari jaraita, Pedrobara wawiabasi ẽbẽrarãta, maʉ̃ kʼarea iyara jarama ũbea jarasi Jesúsʼra ũdukata (Mat. 26:​69-75). Ewari bio berabarida tẽã, Pedroba ũdubibʉrʉ kĩrãkʼasi iyira wua pera ẽãta ẽbẽrarã kʼarea, Sanedrín kĩrãbita bedʼeaside (Hech. 5:​27-29). Mamina maʉ̃ tẽã, iyira kristianora judiora ẽã bawara wua neko ẽ basi, perabasi baera kristianora judioraba iyi ʉ̃rʉ kʼãrẽta jarai kʼarea (Gál. 2:​11, 12). Mawũẽra Pedroba ẽbẽrarã wawia ũdubibadara idubʉ ẽ basi, maʉ̃ne ũdubisi waidide mawũãbʉta. Dayirãbara bia kʼawuada ẽ iya maʉ̃ra jipa idubʉsi kʼawuaita. Abarika berabariseabʉ dayirãta. Dayirãba nekʼãrẽ aña obʉta jipa idubʉda ẽ bʉrʉ Jesúsba ũrãgʼa diadata ũrĩbara, dayirãra ewari jõmaʉ̃nẽ jʉra kʼawuapanaibara (Mat. 26:41). Bʉma bʉa nekʼãrẽ aña obadata jipa idubʉsi kĩrãkʼabʉbʉrʉ, aukʼara ĩjãrãra maʉ̃ ʉ̃rʉ, awuarabʉrʉ zarea ora oẽ baita nekʼãrẽ bʉ maʉ̃ kayirua eda jẽda baebiseabʉta. Bʉa maʉ̃ kayirua jẽda oẽ baya nekʼãrẽta obʉbʉrʉ akʉza bʉa maʉ̃ obʉde bia wãbʉbʉrʉ, maʉ̃ mawũã obʉta idubʉrãra ewari jõmaʉ̃nẽ obara (2 Ped. 3:14). w24.07 18, 19 parr. 17-19

Jesúsbara dayirã nekʼãrẽ mejãcha dia zebʉrʉ, maʉ̃ra mia kʼai ẽbẽraba ãyide kĩrãkʼara oẽ. Jesús nama egorode basidera zokʼasi iyi zareata wuabemara kʼarebaita (Luc. 9:​12-17). Adewara iya audre nebiata osi jõmaʉ̃bari beiside (Juan 15:13). Iyi beidata jẽda piradrʉdadeba dayirãra kʼarebakĩrãne kʼareba zebʉrʉ, yi Zeze Jeowa widibʉ iyi jaure zareadeba dayirã jaradiamarẽã akʉza so zarea diamarẽã (Juan 14:​16, 17; 16:13). Akʉza Jesúsbara kongregasioneba dayirã nekʼãrẽ mejãcha jaradiabʉ, maʉ̃neba dayirãbara wuabema ẽbẽra jaradiamarẽã (Mat. 28:​18-20). Apostol Pabloba jarasi Jesús ʉ̃ta wãside jidasita «yumakẽrãrata dayirã diaita» (Efes. 4:​7, 8). Pablobara jara ũrĩbisi Jesúsbara maʉ̃ra yumakẽrãrãra diasita dayirãta kongregasione nekʼãrẽ biode kʼarebamarẽã (Efes. 1:​22, 23; 4:​11-13). Naʉ̃ra yumakẽrãra nemita omia baera, edaʉde jõma aripe oda ẽ (Sant. 3:2). Mamina mawũãsidu Jesúsbara naʉ̃rata zokʼabʉ dayirã kʼarebamarẽã. w24.10 18 parr. 1, 2

Davidba jarasi yi warra Salomónʼa Jeowaba zokʼabʉta ũrĩbʉedara jõma bia wãbasita. Mamina iyi zõnababʉrʉde daizeze zeri ẽãra yiwidʼi jʉ̃drʉsi. Jeowaba maʉ̃ra kãga ẽ basi, maʉ̃ba wua buru biata dia ẽ basi. Salomónbara maʉ̃ba bia zokʼa ẽ basi pʉwʉrʉra (1 Rey. 11:​9, 10; 12:4). ¿Kʼãrẽta kʼawuapanʉ dayirãbara? Dayirãba Jeowaba zokʼabʉta ũrĩpanʉbʉrʉ iya dayirã nebiata diayi akʉza kʼarebayi (Sal. 1:​1-3). Jeowaba jara ẽ Salomón nebia diada kĩrãkʼa dayirãʼa diaita, mamina dayirãba iyi bedʼeata ũrĩnara, buru biata diayi dayirãba kʼawua bia jidadamarẽã nekʼãrẽ oide (Prov. 2:​6, 7; Sant. 1:5). Daizeze Bedʼeade ũrãgʼa diabʉta ũrĩpanʉbʉrʉ, maʉ̃ba biode kʼarebabʉ jidaita kʼãrẽ estudiaita, kʼãrẽ trajo jidaita, plata sãwũã gasta kʼawuaita akʉza kʼãrẽ jemeneita. Jeowaba zokʼabʉta opanʉbʉrʉ audre iyi kʼawapanañi akʉza ewari jõmaʉ̃nẽ panañi (Prov. 2:​10, 11). Neũdukʼawua biata erbayi akʉza Jeowaba dayirã jaradiayi sãwũã dayirã mebẽrãbawara audre sobia bʼaita. w24.11 10, 11 parr. 11, 12

Yibarirabara mejãcha ewari erbʉ ãyi wũãwũãrabawara bedʼeaita Daizeze Bedʼea ʉ̃rʉ akʉza Jeowa ʉ̃rʉ. Bari jaraita, edeseabʉ ãyi wũãwũãrãra museoeda. Mara wũãwũãra ũdubiseabʉ nekʼãrẽbʉta, mawũã ũdubita sãwũã Daizeze Bedʼeaba jarabʉra wãrĩnuta. Bari jaraita, jaradiaseabʉ La piedra moabita ʉ̃rʉ, maʉ̃ mõgarara 3.000 poaga berabaridatabʉ, maʉ̃ne eda bʉchu Jeowa trʉ̃ta. Mawũã ẽ bʉrʉ akʉseabʉ maʉ̃ poto mõgaradebemata internetʼne, mawũã ẽ bʉrʉ dayirã kartarane. Betel Warwick, Nueva Yorkde, mamabida chu museota, maʉ̃ museo trʉ̃ra «La Biblia y el nombre divino», maʉ̃ museodebida maʉ̃ mõgara kopiata bʉ, maʉ̃ mõgarade eda jarabasi nokʼo Mesá, Moabdebemara Israel ʉ̃rʉbasita akʉza Daizeze Bedʼeabara jarabʉ maʉ̃ra mawũã berabarisita (2 Rey. 3:​4, 5). Mara wũãwũãraba ũdubʉrʉde Daizeze Bedʼeaba jarabʉra wãrĩnuta, ãya ĩjãbʉra audre wari wãñi. w24.12 15 parr. 4-6