Marzo

Daizeze Bedʼeade jara ũrĩbibʉ sãwũã ʉ̃kʉrʉ ẽbẽrarãba nããra bia obeadata, tẽã bia ẽãta ojʉ̃drʉsidata. Bari jaraita, nokʼo Salomónta. Iyara Jeowara biʼia ũdukʼawuabasi akʉza kʼawuabasi sãwũã yiwidʼibarabasita Jeowaʼa, mamina tẽã iya daizeze zeri ẽãra yiwidʼi jʉ̃drʉsi, Jeowara maʉ̃ kʼarea mejãcha kĩrʉsi, adewara pʉwʉrʉ Israeldebemarãra mejãcha zʉbʉriasi Salomónba kayirua oda kʼarea. Daizeze Bedʼeade jara ũrĩbibʉ Salomón beida tẽãra iyira iyi zõrãrã joudapeadamae jousidata. Bari jaraita, nokʼo David joudapeadamae (1 Rey. 11:​5-9, 43; 2 Rey.23:13). ¿Mamina maʉ̃ba jarakĩrãbʉka Jeowabara Salomónʼra jẽda piradrʉbita? Mawũã ẽ, maʉ̃ra biʼia kʼawuada ẽ Daizeze Bedʼeaba jara ẽ baera. Jẽda piradrʉira Jeowaba nebia bari diabʉ kĩrãkʼabʉ. Jeowabʉrʉ kʼawuabʉ kʼairata jẽda piradrʉbita, iya piradrʉbikĩrãta piradrʉbiyi, mawũã Jeowaba kãgabʉta ewari jõmaʉ̃nẽ omarẽã (Job 14:​13, 14; Juan 6:44). ¿Maʉ̃ nebiara Jeowaba Salomónʼa diaika? Dayirãbara kʼawuada ẽ, Jeowabʉrʉ kʼawuabʉ, mamina dayirãbara kʼawuapanʉ Jeowaba nekʼãrẽra jõma aripe obʉta. w24.05 4 parr. 9

Dayirãba Daizeze Jeowaʼa dayirã bebʉ diaya abʉrʉdera, Daizeze deda jʉ̃ẽbʉrʉ kĩrãkʼabʉ. Idi ewadera dayirãbara nekʼãrẽ jõma erbʉ sãwũã audre Jeowa neũdukʼawua bʼaita, adewara erpanʉ neũdukʼawuara Jeowa kãgapanʉta. Mamina Jeowa de karpara pʉwʉrʉ abapaide chu ẽ. Mawũẽra naʉ̃ba jarakĩrãbʉ Jeowara de ara barabʉ ẽãta, awuarabʉrʉ Jeowa de karpara bʉta iyi ode kʼẽrẽpapanʉrabʉmae (Apoc. 21:3). Ẽbẽrarã Jeowaʉ̃me kʼẽrẽpanʉra beidara, ¿wabida Jeowa karpa deda panʉka? Panʉ, Jeowaba biʼia kĩrãbebʉ baera ãyira. Jesúsba jarasi: «Beidarãra jẽda piradrʉita, Moisésbida maʉ̃ta ũdubisi bakuru zake pʉrea nʉmana ʉ̃rʉ nebʉraside, iya jarasi Jeowara Abrahán Daizezeta, Isaac Daizezeta akʉza Jacob Daizezeta. Iyira beidapeadara Daizeze ẽ awuarabʉrʉ zokʼaipanʉra Daizeze, iyimara maʉ̃ra jõmaʉ̃ta zokʼaipanʉ baera» (Luc. 20:​37, 38). w24.06 3, 4 parr. 6, 7

Sadoc Hebrónʼena wãsidera nekʼãrẽ yõena edebarisida edesi akʉza yõibarabasibʉrʉ yõñawa wãsi (1 Crón. 12:38). Davidta yõena wãibarabasibʉrʉ Sadocʼra mama wãñawabasi akʉza Israelta iyi nejʉradeba ẽdrʉbiyawabasi. Iyira mejãcha yõ kʼawua ba ẽ basibaibara, mamina zowaĩnĩgʉata mejãcha erbasi. ¿Kʼãrẽba kʼarebasi Sadoc mawũã zowaĩnĩgʉa bamarẽãra? Iyira mejãcha kʼarebasibaibara awuru ẽbẽrarã iyi ewaridebemara zareapananaba akʉza zowaĩnĩgʉapananaraba. Maʉ̃ra yiza biadebemara Davidbasi. Israel pʉwʉrʉ yõena wãnera, Davidba nãã jʉre edebasi, mõbe iyara zowaĩnĩgʉata ũdubibasi. Maʉ̃ kʼarea jõmaʉ̃ba nokʼo babikĩrãbasi (1 Crón. 11:​1, 2). Davidbara Jeowa ʉ̃rʉ ĩjãbasi, maʉ̃ba iyi nejʉraraba pẽwãbʉdadera Jeowaʼa kʼareba widibasi (Sal. 138:3). Adewara Sadocbara erbasi awuru yiza biarata, maʉ̃rãra Jehoiadábasi akʉza yi warra Benayata. Adewara panasi 22 gorogorora nokʼora Davidʼare wãnarata (1 Crón. 11:​22-25; 12:​26-28). w24.07 3 parr. 5, 6

Pablobara nemitiara mejãcha osi, bari jaraita, nããbema kristianorãra iya mejãcha pẽwãbasi, maʉ̃ kʼarea kristianoraba krĩchapanasi iya kʼãwũã nekʼãrẽ kayirua obʉra idubʉ ẽ baita. Mamina Jesúsbara mawũã akʉba ẽ basi Pablora. Jesúsba akʉza Jeowaʉ̃meba akʉpanasi Pabloba iyi sode kʼãrẽ nebia erbʉta. Jesúsba jarasi Pablora iya jidasita (Hech. 9:15). Jesúsba miõba okata osi kʼarebaita Pablo jẽda krĩchamarẽã (Hech. 7:58–8:3; 9:​1-9, 17-20). Tẽã Pablora kristianobasi akʉza iyira apostolbasi, maʉ̃ne iya badua biga diabasi Jeowaʼa iyita so zʉbʉria akʉsi baera (1 Tim. 1:​12-15). Ewari aba Pabloba ũrĩsi kongregasion Corintodebemane iduaribisidata yumakẽrã Jeowaba kãga ẽãne mia erkʼãĩbʉta aribia kongregasione bamarẽã. Maʉ̃nera, ¿kʼãrẽta omarẽã jarasi Pablobara? Pabloba odaba dayirã nebiata jaradiabʉ sãwũã Jeowaba kãga ũdubibʉta akʉza kʼẽãbʉta dayirãra akʉza kʼãrẽaba yibiata so zʉbʉria akʉita. w24.08 13 parr. 15, 16

Jeowabara wiña wiñane kʼawuabisi ẽbẽrarãba kʼãrẽta oibarata iyi kʼawa bʼaita. Adánba Evaʉ̃meba nemitia oda tẽãra, Abelbʉrʉ nããra ũdubisi Jeowa ʉ̃rʉ ĩjãbʉta. Abelba Jeowata mejãcha kãgabasi baera akʉza Jeowaba kãgabʉta okĩrãbasi baera sakripisiota diasi. Abelbara obejarata akʉbasi, maʉ̃ kʼarea maʉ̃ra obejaranebemata jida kʼãrãpe diasi Jeowaʼa sakripisiode. ¿Kʼãrẽta osi Jeowabara? «Jeowabara ũdubisi kãgata iyira akʉza iyi oprendata» (Gén. 4:4). Tẽã awuru ẽbẽrarãba kʼãwũã Abelde kĩrãkʼa sakripisio diasidadera, Jeowabara ũdubisi bia akʉbʉta ãya odara, bari jaraita Noéta (Gén. 8:​20, 21). Naʉ̃ba ũdubisi ẽbẽrarã nemitia omiamina Jeowa kʼawa baseabʉta akʉza Jeowaba kãgabʉta oseabʉta. w24.08 3 parr. 5, 6

Awururaba daya oẽ bada kʼarea zʉbʉriabibʉdadera, dayirãra maʉ̃ kʼarea mejãcha sopʉa baseabʉ akʉza krĩcha onʉmaseabʉ (Ecl. 7:7). Ʉ̃kʉrʉ ẽbẽrarã Jeowa ode kʼẽrẽpapanʉrasi mawũã berabarisi, mawũã sentisida. Bari jaraita, Jobta akʉza Habacucta (Job 6:​2, 3; Hab. 1:​1-3). Wãrĩnubaira jʉra kʼawuapanaibara zʉbʉriabibʉdade bia krĩcha ẽã nekʼãrẽ ojʉ̃drʉ totoi kʼarea, ¿kʼãrẽa? Bia krĩcha ẽ bʉrʉ nekʼãrẽ aña oseabʉ baera akʉza audre bedʼea zromata ũduseabʉ baera. Awururaba dayirã zʉbʉriabibʉrʉde akʉza ũdubʉdade maʉ̃ra ẽbẽrarã kʼãrẽ zʉbʉria berabari ẽãta, maʉ̃nera bʉa krĩchaseabʉ, ¿bigabasika mʉ̃ kʼãwũã zʉbʉriabidapeada kʼarea kʼãrẽ oẽ baira? Krĩchadaya salmista ʉ̃rʉ, naʉ̃ salmistabara ũdubasi sãwũã ẽbẽra kayiruaraba zʉbʉriabipanʉta ẽbẽrarã nekʼãrẽ aripe opanʉrata akʉza iya ũdubasi maʉ̃ra ẽbẽra kayiruarãra awurura zʉbʉriabibʉmina biapanʉta, sobiapanʉta, salmistaba jarasi ẽbẽra kayiruaraitara nekʼãrẽ bia ũduira zare ẽãta (Sal. 73:12). Maʉ̃ra ẽbẽra kayiruara mawũãnʉmʉ ũdubʉrʉ kʼarea, salmistara mejãcha sopʉabasi akʉza maʉ̃ta akʉnʉmʉ baera iyitara zarebasi ũduita Jeowaba iyaʼa kʼãrẽ nebia dianʉmʉta, iya maʉ̃ ʉ̃rʉ badua krĩchabasi baera sopʉa sentisi (Sal. 73:​14, 16). w24.11 3, 4 parr. 5-7

Dayirãra Jeowa ʉ̃rʉ ibia bedʼeaibara iyita wawiapanʉ baera. Nekʼãrẽ mejãcha kʼarea wawia ũdubidaibara. Bari jaradaita, Jeowara yi zroma iyi kĩrãkʼara neẽ akʉza iyi zareara jõka (Sal. 96: 4-7). Jeowaba naʉ̃ drʉade nekʼãrẽ parãnaba ũdubibʉ iyira mejãcha buru biata akʉza Jeowaba dayirãʼa bebʉta diasi. Mamina bari maʉ̃ awa dia ẽ basi, diasi nekʼãrẽ jõma dayirãba nesidabʉta bia bʼaita (Apoc. 4:11). Jeowabara kãga jõka ũdubibʉ (Apoc.15:4). Adewara Jeowaba nekʼãrẽ obʉrʉdera biʼia obʉ akʉza iya nekʼãrẽ oya asibʉrʉ, maʉ̃ra aripe obʉ (Jos. 23:14). Propeta Jeremíasbida jarasi Jeowa kĩrãkʼara neẽãta, iyitrʉ abapai yi zromata (Jer. 10:​6, 7). Nama ũdutabedadera dayirãbara nekʼãrẽ mejãcha kʼarea wawia ũdubiseapanʉ dayirã Zeze Jeowara. Mamina bari maʉ̃ kʼareabʉrʉ wawia ũdubibara ẽ, Jeowabida kãga ũdubidaibara. Akʉza dayirãra Jeowa ʉ̃rʉ ibia bedʼeapanʉ iyita mejãcha kãgapanʉ baera. w25.01 3 parr. 5, 6

Jeowa nejʉrarabara jarapanʉ Jeowa organizasionba nekʼãrẽ bia dayirã jaradiabʉra yibia ẽãta. Bari jaradaita, Daizeze Bedʼeaba jarabʉ dayirã Jeowaba kãgabʉde bʼaira, neneẽã erbaibarata dayirã kakuata, dayirãba nekʼãrẽ obʉra bia obaibarata akʉza Jeowaba kãgabʉde yiwidʼibarata, maʉ̃ kʼarea mebẽã abaʉba kayirua oda tẽã iyita jẽda krĩcha ẽ bʉrʉ, Jeowa pʉwʉrʉdeba ãĩ wãibara (1 Cor. 5:​11-12; 6:​9, 10). Dayirãbara Daizeze Bedʼeaba jarabʉde opanʉ, mamina Daizeze nejʉrarabara jarapanʉ dayirãbara kãga ẽãta ẽbẽrarãta akʉza dayirãbara jʉrata ẽbẽrarã dayirã kĩrãkʼapanʉ ẽãta. Dayirãba kʼawuaibara kʼaita Jeowa organizasion nejʉrata. Diaruba sewa nebʉrʉta jarabʉ Jeowa organizasion ʉ̃rʉ, iyira «sewa nebʉrʉ omia zeze» (Juan 8:44; Gén. 3:​1-5). Dayirãra maʉ̃ kʼarea, kʼãrẽa kĩrãmigaira neẽ, Diaruba awururata zokʼabʉ baera Jeowa organizasion ʉ̃rʉ sewida jaraita. w24.04 10 parr. 13, 14

Zʉbʉria zroma jʉ̃drʉda tẽã ʉ̃kʉrʉba ũdubʉdade Babilonia zroma jõma jõbibʉdata, kĩrãbedayi Jeowa ʉ̃rʉ Kʼawuabipanʉrãbara mawũã berabarita jaradara dããrabata. ¿Ʉ̃kʉrʉba Babilonia zroma jõma jõbibʉrʉta ũdubʉdade ĩjãnaika Daizeze ʉ̃rʉ? (Apoc. 17:5). Naʉ̃ta mawũã berabarira Moisés ewaride berabarida kĩrãkʼabayi. Israelitara Egiptodeba ẽdrʉsidera, ẽbẽrarã Egiptodebemarasi ãyi kʼaidu wãsi. Moisésba Egiptode 10 plaga berabari ʉ̃rʉ jarada aripe berabarinʉmʉta ũdusidadera, naʉ̃ra ẽbẽrarãbara Daizeze ʉ̃rʉ ĩjãbʉta ũdubisida (Éx. 12:38). Babilonia zroma jõbida tẽã ẽbẽrarãba ũdubidara Daizeze ʉ̃rʉ ĩjãbʉta akʉza Jeowaba iduaribira naʉ̃ra ẽbẽrata iyi pʉwʉrʉde bamarẽã, ¿maʉ̃ kʼareara dayirãbara sãwũã krĩchai? ¿Maʉ̃nera dayirãbara krĩchadaika biga ẽãta? Dayirãbara mawũã krĩcha ẽ baibara, awuarabʉrʉ Daizeze Jeowaba obʉ kĩrãkʼa odaibara. Jeowabara so zʉbʉria akʉbʉ, nebia obʉ, kĩrʉmia ẽ akʉza kãga jõka mejãcha erbʉ akʉza wãrĩnuarata jarabʉ (Éx. 34:6). w24.05 11 parr. 12, 13

¿Kʼãrẽta berabariseabʉ dayirãba ĩjã ẽ bʉrʉ bedʼea bia ʉ̃rʉ? Akʉdaya kʼãrẽta berabarisita siglo nããbemane. Ʉ̃kʉrʉ kristianorabara jarapanasi Daizeze ewarira zesita. Ʉ̃kʉrʉba krĩchasida apostol Pabloba bʉsita karta maʉ̃ ʉ̃rʉ bedʼeabʉta. Ʉ̃kʉrʉ mebẽrã Tesalónicadebemaraba maʉ̃ ʉ̃rʉ audre bia jʉrʉi kaude, ĩjã kʼãrãpe jaradia jʉ̃drʉsida. Ãya Pabloba jaradiadata kĩrãbesidabʉrʉ, maʉ̃ꞌa yi edebi ẽ bakasi (2 Tes. 2:​1-5). Apostol Pablobara ũrãgʼa diasi jõma ĩjãna ẽ bamarẽã ãya kʼãrẽ ũrĩbʉra akʉza ãyita mawũã berabari ẽ bamarẽã, naʉ̃ karta ũmenebemata bʉsi naʉ̃ba jarabʉ: «Mʉ̃ra Pablo, naʉ̃ bedʼeara mʉ̃ juwaba bʉbʉrʉa, mʉ̃a karta jõma obʉra kʼãwũã bʉbʉ. Mʉ̃a kʼãwũã bʉchu» (2 Tes. 3:17). w24.07 12 parr. 13, 14

Nããbema kristianorabara nesidapanasi mejãcha awuantadaita ãyira tẽãne mejãcha zʉbʉria odaibasi baera. Kristianora ebreorãra mejãcha pẽwãsida. Ãyi mawũã pẽwãpanʉta wiña aduʼanʉmaedaside ẽbẽrarã mejãchaʉta kristianorabasida maʉ̃ ewaridera. Pablobara jarasi naʉ̃ra kristianora mejãcha zʉbʉria osidamina, ãyira Jesús kĩrãkʼara mejãcha zʉbʉria berabari ẽ basita, Jesúsʼra beasida baera (Heb. 12:4). Judiorãra mejãcha kĩrʉpanasi akʉza wuabemarata zʉbʉria oitapanasi, judiora mejãchaʉba ĩjãsida baera kristiano bʼaita. 40 judiorata bedʼea abarika zesida nekoda ẽ baita mia bania doda ẽ baita Pablo beadayeda (Hech. 22:22; 23:​12-14). Kristianora ãyi mawũã pẽwãpanasimina, ãya nesidabasi ãba yi jʉredaita, Daizeze Bedʼea jaradia wãnaita akʉza ãya ĩjãbʉra audre zarea ĩjã erbaita. w24.09 12 parr. 15

Juanʼra Jesús neũdukʼawuabasi akʉza Jesúsbara mejãcha kãgabasi (Mat. 10:2). Juanʼra Jesúsʼʉ̃me Daizeze Bedʼea jaradia wãbasi, ũdusi Jesúsba miõba okata oũdubidara akʉza Jesúsʼʉ̃me kʼẽrẽpabasi bedʼea zroma berabarinʉmasimina. Akʉza ũdusi Jesús sãwũã beasidata, adewara Jesús jẽda pirãdrʉbʉrʉsida. Juanbara ũdusi siglo nããbema kongregasionꞌra sãwũã wari wãta, adewara iyi bei nãã ũdusi Daizeze Bedʼea bia ʉ̃rʉ jõmaʉ̃ꞌa jaradiasidata (Col. 1:23). Juan zõnababʉrʉde Apocalipsis librodebʉta bʉsi (Apoc. 1:1). Adewara iya bʉsi libro ebangeliodebemata aba, maʉ̃ awuara bʉsi karta primera, segunda akʉza tersera Juanta, maʉ̃nebemata karta tersera Juanʼra bʉ dia bʉesi yi neũdukʼawua Gayoʼa, Juanbara maʉ̃ra iyi wũãwũã kĩrãkʼa akʉbasi (3 Juan 1). Juanba karta bʉdabara mejãcha kʼareba zebʉrʉ Jesús kʼaidubemarata. w24.11 12 parr. 15, 16

Yumakẽrãba yi kima kãgabʉdera bia edabʉ akʉza akʉbʉ maʉ̃ra Jeowaba nebia diada kĩrãkʼa (Prov. 18:22; 31:10). Mawũã kãga erbʉ baera, yi kimaʼa wawia ũdubibʉ, maʉ̃ba ãyi ãba kʼãĩbʉrʉdera yi kima obi ẽ yi kima krĩchamabʉ ẽãta akʉza ajuerzade obi ẽ iya kãga ẽãta, awuarabʉrʉ iyaʼa wawia ũdubibʉ akʉza yumakẽrãsida zarea oyi Jeowa nãã iyi krĩcha neneẽã erbaita (Hech. 24:16). Yumakẽrãra, kʼawuapanaidua Jeowabara marara akʉbʉta kʼãwũã zarea obʉta maraba jarabʉdeba akʉza maraba nekʼãrẽ obʉdeba, mara kimaʼa kãga ũdubita. Maʉ̃ba ũdubidua mara kimaʼa kãgabʉta akʉza wawiabʉta akʉza jaraidua ãyira kãgata. Adewara oraidua mara kima zʉbʉriabibʉta. Mawũã odara ũdubiyi mara kimaʼa kãgabʉta akʉza akʉda ẽ bayi kʼãrẽ ẽ kĩrãkʼa. Zarea ora bʉ kima bia akʉita, mawũã ora kʼarebayi adua ẽ baita Jeowaʉ̃me neũdukʼawua biata (Sal. 25:14). w25.01 13 parr. 17, 18

Dayirã Jeowa odepanʉrabara jaradiakĩrãne jaradiapanʉ akʉza zarea opanʉ mawũã odaita. Maʉ̃ba dayirãra awuarapanʉ wuabema kristianoraira. ¿Mamina kʼãrẽba kʼarebaseabʉ audre sobiade akʉza jaradiakĩrãne jaradia bʼaita? Jesúsʼra zarea osi Daizeze Bedʼea jaradiakĩrãne jaradia bʼaita, maʉ̃ba iyira dayirãita yiza bia. Jesúsbara jaradiakĩrãne jaradiabasi akʉza ewari berabaribʉrʉza audre zarea obasi jaradiaita. Ewari aba, Jesúsba iya Daizeze Bedʼea jaradiabʉta biʼia ũrĩbita yizata zokʼasi. Jarasi yumakẽrã abaʉba higuera bakuruta poaga ũbeabayeda biʼia akʉ erbasita, mawũãsidu maʉ̃ higuerãra zaʉ ẽ basita. Maʉ̃ kĩrãkʼa iya poaga ũbeabayeda Daizeze Bedʼea jaradiabasi judiora, mawũãsidu mejãchaʉba ĩjãna ẽ basi. Mamina Jesúsbara Daizeze Bedʼea jaradiabʉta iduaribi ẽ basi. Iyira naʉ̃ yumakẽrãba higuera zaʉyeda jʉ̃ãbada kĩrãkʼabasi (Luc. 13:​6-9). Dayirãbida jaradiakĩrãne jaradiakĩrãpanañi, Jesúsba jarada kĩrãkʼa opanʉbʉrʉ akʉza iya odade opanʉbʉrʉ. w25.03 14, 15 parr. 1-4

Bʉa ũdusibʉrʉ ẽbẽra aba bʉmabʉta, ¿ñabasea jara wãibaraka bʉa iyira kãgata? Daizeze Bedʼeaba jarabʉ yi buru biabara naena bia krĩchabʉta kʼãrẽ oita. Bʉa ẽbẽra abaʉta ũdukʼawuakĩrãbʉrʉ, iyiʉ̃me bedʼeaibara ẽ, mawũã ẽ bʉrʉ ãba bʼaibara ẽ, awuarabʉrʉ jĩgaʉba ũdukʼawuaseabʉ. Bari jaraita, akʉseabʉ iyi sãwũãbʉta, iya wuabemara sãwũã edabʉta, ãba yi jʉrebʉde mawũã ẽ bʉrʉ nekʼãrẽ awuru obʉde. ¿Kʼãrẽta oseabʉ bʉa maʉ̃ ẽbẽra jĩgaʉba ũdukʼawuaira? Ãba yi jʉrebarima wãbʉrʉde, mawũã ẽ bʉrʉ mebẽrã kongregasionebemarabawara ãbabʉde, maʉ̃ ẽbẽraba nekʼãrẽ obʉdeba bʉa kʼawuaseabʉ iyi Jeowaʉ̃me sãwũãbʉta, iyi sode iya kʼãrẽ nebia erbʉta, adewara iyi sãwũãchuta. Maʉ̃ awuara, bʉa ũdukʼawuaseabʉ maʉ̃ ẽbẽra neũdukʼawuara saʉ̃rasida akʉza ãyi kʼãrẽ ʉ̃rʉ bedʼabʉta (Luc. 6:45). Bʉa ẽbẽra ũdukʼawuakĩrãbʉbara, ¿nekʼãrẽ bʉa okĩrãta abarika okĩrãbʉka? Zõrãrã iyi kongregasionebema widiseabʉ iyi ʉ̃rʉ, mawũã ẽ bʉrʉ mebẽã maʉ̃ ẽbẽra biʼia ũdukʼawuabʉa widiseabʉ (Prov. 20:18). Adewara widiseabʉ iya kʼãrẽ nebia erbʉta akʉza wuabemaraba iyi sãwũã akʉbʉta (Rut 2:11). Mamina bʉa maʉ̃ ẽbẽra jĩgaʉba ũdukʼawuanʉmʉnera, zarea ora ewari jõmaʉ̃nẽ iyi kʼawuachua ẽ bʼaita, mawũã ẽ bʉrʉ iyi ʉ̃rʉ jõma widinʉmaita, maʉ̃bara mitia sentibiseabʉ baera maʉ̃ ẽbẽrata. w24.05 22 parr. 7, 8

Zõrãrãbara mesera krĩcha ẽ yi nemitia obʉba iya obʉra idubʉ ẽ baita. Ʉ̃kʉrʉbara zõrãrãba ʉ̃ra akʉ jʉ̃ẽbʉrʉde, jẽda krĩchabʉ ãya nemitia odara. Ʉ̃kʉrʉbara ewari nesidabʉ jẽda krĩchaita. Maʉ̃ba zõrãrãbara yi nemitia odara akʉ jʉ̃ẽna ʉ̃rʉ akʉ jʉ̃ẽpanʉ. Zõrãrãba ʉ̃rabʉrʉ akʉ jʉ̃ẽna tẽã, yi nemitia odabara jẽda krĩchaseabʉ iyaʼa ũrãgʼa diadapeada ʉ̃rʉ, mawũã obʉba kʼarebaseabʉ jẽda krĩchaita, mõbe Jeowaʼa widiseabʉ kĩrãduamarẽã iya nemitia odata (Sal. 38:18). Maʉ̃ba akʉza zõrãrãʉ̃me ãba yi jʉrebʉrʉdera yi nemitia odabara ũdubiseabʉ bia ẽãbʉta akʉza ũrĩkĩrãbʉta iyaʼa ũrãgʼa diabʉdata. Zõrãrãba yi nemitia oda kʼarebadaita jẽda krĩchamarẽã, ibiade edapanʉ akʉza ũdubipanʉ kʼawuabʉta iyi sãwũã berabarinʉmʉta. Adewara Jeowaʼa yiwidʼipanʉ kʼarebamarẽã ãyi mebẽã kʼarebaita zarea obʉta akʉza jʉ̃ãpanʉ yi nemitia odaba biʼia krĩchamarẽã iya kʼãrẽta aña obʉta (2 Tim. 2:​25, 26). w24.08 22, 23 parr. 12, 13

Jeowabara kãga ẽãta mia abaʉ ẽbẽrata beimarẽãra. Jeowabara kãgabʉ nemitia odarãra jẽda krĩchadamarẽã iyiʉ̃me bia bʼaita (2 Cor. 5:20). Maʉ̃ kʼarea Jeowabara nawedaiduba idibasidu kʼareba zebʉrʉ ẽbẽrarã iyi odeba jĩga wãnara, jẽda krĩchadamarẽã akʉza iyima jẽda zedamarẽã. Zõrãrãbara kʼarebapanʉ ẽbẽrarã kongregasioneba ãĩ wãnata jẽda krĩchamarẽã, naʉ̃ trajo oira jipade yibia, mawũã opanʉne Jeowaʉ̃me ãba trajapanʉ baera (Rom. 2:4; 1 Cor. 3:9). Ʉ̃tʉra audre sobiapanʉ ẽbẽra nemitia obadata jẽda krĩchabʉrʉde. Jeowara sobiabʉ ẽbẽra aba kongregasioneba ãĩ wãnata jẽda zebʉrʉdera. Dayirãba krĩchadara Jeowaba dayirãta kʼãrẽaba so borekea akʉbʉ ʉ̃rʉ akʉza dayirã sãwũã iyi biadeba so zʉbʉria akʉbʉ ʉ̃rʉ, mawũãra dayirãba iyira audre kãgadayi (Luc. 1:78). w24.08 31 parr. 16, 17

Jesúsba judio nokʼo bʼaita ĩjãsibʉrʉ, maʉ̃ politikade edabʉ kĩrãkʼabakasi. Mamina Jesúsbara ĩjã ẽ basi ãyi nokʼo bʼaira. Daizeze Bedʼeaba jarabʉ iyira katumainʉ wãsita doba bʼaita. Naʉ̃ra ẽbẽrarãba Jesúsʼa jarada ʉ̃rʉ jarapanasimina ãyi nokʼo bamarẽã, Jesúsbara ĩjã ẽ basi mawũã politikade eda bʼaira. Naʉ̃ba dayirã nebiata jaradiabʉ. Idi ewadera dayirãra jarada ẽ bayi miõba okata omarẽã, mia dayirãta nokʼo babikĩrã ba ẽ bayi. Mamina ẽbẽra aba nokʼo babibʉrʉdera ẽbẽrarãba dayirã jaraseabʉ naʉ̃bari botamarẽã, mawũã ẽ bʉrʉ maʉ̃are bamarẽã jaradayi. Ẽbẽrarãba iyi mawũã osidamina Jesúsʼra politikade eda wã ẽ basi, awuarabʉrʉ iya jarasi: «Mʉ̃ Nokʼora naʉ̃ drʉadebema ẽ». Naʉ̃neba Jesúsba dayirã yiza biata amaesi (Juan 17:14; 18:36). Idi ewade dayirãbida nesidapanʉ Jesúsde kĩrãkʼa krĩchaita akʉza iya oda kĩrãkʼa oita. Jesúsde kĩrãkʼa dayirãsida Daizeze Nokʼoare panʉ, maʉ̃ Nokʼo ʉ̃rʉ jaradiapanʉ akʉza yiwidʼipanʉ maʉ̃ Nokʼo zemarẽã (Mat. 6:10). w24.12 4 parr. 5, 6

Bʉa Daizeze Bedʼea estudiabʉeda, krĩchara mama jõma kʼawua wãta sãwũã oũdubita. Bari jaraita, Jeowadeba kʼawuara sãwũã wuabemara jõmaʉ̃ta daucha edaita, adewara Jesúsde kĩrãkʼa oseabʉ. Jesúsbara mejãcha kãgabʉta ũdubisi yi zezera akʉza wuabemara ẽbẽrarãta, bʉabida iyide kĩrãkʼa oseabʉ, ¿sãwũã? Bʉ zarea obʉde mejãcha zʉbʉriaibaramina kʼẽrẽpa bʼaita, bʉ zarea obʉde wuabemara mebẽrã kʼarebaita akʉza ẽbẽrarã jaradiaita Jesúsʼra dayirã jõmaʉ̃bari beisita, mawũã ãyabida ũdudamarẽã dayirãba nebia ũdubʉta. Dayirãba biʼia kʼawuabʉrʉde kʼãrẽa beisita Jesúsʼra, maʉ̃ne audre kãga wãñi Jeowata Jesúsʼʉ̃me akʉza ãyabida dayirãta kãgayi (Sant. 4:8). Maʉ̃ba nekʼãrẽ jõma odadrʉ kʼawuaita kʼãrẽta jarakĩrãbʉta Jeowaba. Jeowabara dayirã nekʼãrẽ mejãcha diabʉ kʼãrẽ kʼawuaita iyi ʉ̃rʉ. w25.01 25 parr. 16, 17

Idibema testora kʼãwũãbida jaraseabʉ: «Mʉ̃ nemitiara bʉ dabudeba jipa ãĩ buebʉrʉ». Mamina maʉ̃ kʼarea soiduba jẽda krĩchapanʉbʉrʉ, Jeowabara maʉ̃ nemitiara jĩga balbʉebʉ kĩrãkʼabʉ iya ũdu ẽ baimae. Miqueas 7:​18, 19de ũdubibʉ awuru yizata. Mama jarabʉ Jeowabara dayirã nemitiara pusa ẽzadra balbʉebʉta. Nawedara nekʼãrẽ baduta pusa ẽzadra baebasibʉrʉ, maʉ̃ra wua ũdu ẽ basi. Naʉ̃ra yizaraneba Daizeze Bedʼeaba ũdubibʉ Jeowabara dayirã nemitiara jipa kĩrãduabʉta, mawũã dayirãta aduʼapanamarẽã. Davidba naʉ̃ta jarasi: «Sobiapanʉ yi ãya kayirua oda kĩrãduadapeadara akʉza ãyi kayirua jẽda kĩrãbeda ẽãrata» (Rom. 4:7). Maʉ̃ba jarakĩrãbʉ wãrĩnu jipa kĩrãduabʉta. w25.02 9 parr. 7, 8

Idi ewadera bʉ ẽjũã kĩrãwãreãta naʉ̃ drʉadera, ¿saʉ̃ maʉ̃ ẽjũã kĩrãwãreãra? Maʉ̃ra ẽjũã kĩrãwãreã jauredebema. Maʉ̃ ẽjũã kĩrãwãreã jauredebemanera ẽbẽrarã mejãchabʉ akʉza ãyira aduʼapanʉ. Adewara kãgapanʉ wuabema ẽbẽrasida maʉ̃ne edapanamarẽã. Krĩchapanʉ maʉ̃ ẽjũã kĩrãwãreã jauredebara ãĩ wã ẽ baita. Idi ewadera dayirãra panʉ ẽbẽra kayiruarabawara akʉza ẽbẽrarãbara opanʉ Diaruba zokʼabʉta. Maʉ̃ kʼarea Jeowabara parãsi ẽjũã kĩrãwãreã jauredebemata, dayirãta mama aduʼa akʉza ãbapanamarẽã (1 Juan 5:19; Apoc. 12:12). Jeowabara akʉbʉ ẽbẽrarã naʉ̃ drʉadebʉra sãwũã mejãcha zʉbʉriabʉta, mamina Jeowabara iyi odepanʉrãra kʼarebabʉ aduʼa bamarẽã, mawũã iya zokʼabʉta sobiade opanamarẽã. Daizeze Bedʼeabara jarabʉ naʉ̃ ẽjũã kĩrãwãreã jauredebemara dayi mĩrʉbari kĩrãkʼabʉta (Is. 4:6; 58:11). Maʉ̃ba yi ẽbẽrarã maʉ̃ne edapanʉra sobiapanʉ akʉza aduʼapanʉ (Is. 54:14; 2 Tim. 3:1). w24.04 20 parr. 1, 2

Bʉta juwa jidakĩrãbʉbʉrʉ maʉ̃ kʼarea Jeowaʼa yiwidʼibʉbaibara. Jeowabara dayirã jara ẽ kima diaita, mamina iya biʼia kʼawuabʉ dayirãba kʼãrẽ nesidabʉta akʉza dayirã sãwũã sentibʉra, maʉ̃ba iyara akʉita jarabʉ. Adewara iya kʼarebayi, dayirãba kima bia ũduyeda. Maʉ̃ kʼarea bʉa iyaʼa bʉ sãwũã sentibʉta akʉza bʉa kʼãrẽ kãgabʉ ʉ̃rʉ jara ũrĩbibʉta idubʉrãra (Sal. 62:8). Jeowaʼa widira kʼarebamarẽã bʉa jʉ̃ã kʼawuabʉta ũdubita akʉza buru biata diamarẽã (Sant. 1:5). Mawũãsidu bʉa saʉ̃ta bʉ kima bʼaita ũdu ẽ bʉrʉ, Jeowabara jarabʉ iyara kʼareba bʼaita, sobia bʼaita akʉza krĩcha bia erbaita (Sal. 55:22). Mamina jʉra kʼawuapanaibara, aukʼara krĩchada ẽ baibara kʼaiʉ̃me juwa jidai ʉ̃rʉ (Filip. 1:10). Wãrĩnu sobia bʼaira, juwa jidachuaibara ẽ awuarabʉrʉ, dayi wãrĩnu sobia bʼaira Jeowa neũdukʼawua biabaibara (Mat. 5:3). Mamina bʉ waidide dobabʉedara audre trajaseabʉ Jeowaita (1 Cor. 7:​32, 33). Zarea ora bʉ ewari bia zokʼa kʼawuaita. w24.05 21 parr. 4; 22 parr. 6

¿Ewari sõbebayeda yi bedʼeapanaibara? Mesera nekʼãrẽ oita krĩchadara, mawũãra bia wã ẽ bayi (Prov. 21:5). Bigabayi dããrabayeda yi bedʼeapanaita, mawũã audre yi ũdukʼawuadaita, mamina biga ẽ bayi aukʼara ewari bio berabaribira. Daizeze Bedʼeaba jarabʉ: «Dayirãba jʉ̃ãbʉta mesera berabari ẽ bʉrʉ, dayi sota kayabibʉ» (Prov. 13:12). Mebẽrã ũme yi bedʼeapanʉne, ¿dayirãbara sãwũã kʼarebaseabʉ? Dayirãbara trʉ̃seabʉ dayirã deidu neko zemarẽã, semanaza mebẽrãbawara Jeowa ʉ̃rʉ kʼawuapanʉne ãyisida edapanamarẽã, mawũã ẽ bʉrʉ ãyibawara jemenene wãseapanʉ (Rom. 12:13). Ãya bʉ kʼarebata nesidabʉbʉrʉ ãyi doba pana ẽ baita, bʉra ãyibawara wãseabʉ ewaraeda wãbʉrʉde akʉza ãyibawara wãseabʉ karrode akʉza bʉ deda jʉ̃ẽmarẽã trʉ̃seabʉ, mawũã ũmepai pana ẽ marẽã (Gál. 6:10). Yi bedʼeapanʉba bʉaʼa jarara ãyibawara wãmarẽã, mawũã ãyidoba amae ẽ baita, bʉta ãyibawara wãra bʉara ãyita mejãcha kʼarebayi audre yi ũdukʼawuadamarẽã. Mamina jʉra kʼawuabara ãyi ũmepai amae ẽ baita, mamina maʉ̃ daucha aukʼara ewari jõmaʉ̃nẽ ãyi kʼawa barãra, mawũã iduaribita ãyirai bedʼeadamarẽã audre yi ũdukʼawuadaita. w24.05 30 parr. 13, 14

Zõrãrãba akʉpanʉ kʼãrẽba edesita maʉ̃ ẽbẽra nemitia omarẽã. Bari jaraita, ¿iya Daizeze Bedʼea estudiabʉta idubʉsika? ¿Daizeze Bedʼea badua jaradia wãbʉta idubʉsika? ¿Daizezeʼa badua yiwidʼibʉta idubʉsika? ¿Krĩcha mitia oita zebʉʼa yi edebisika? ¿Kʼairata iyi neũdukʼawuara? ¿Kʼãrẽta akʉbʉ, ũrĩbʉ akʉza kʼãrẽne jemenebʉ? ¿Naʉ̃ jõma obʉba sãwũã aña krĩchabisi iyaʼa? ¿Kʼawuabʉka Jeowara sãwũã sentibʉta iya nemitia oda kʼarea? Zõrãrãbara bedʼeata widipanʉ yi nemitia oda, mawũã iyikʉzaʉba krĩchamarẽã kʼãrẽba edesita iyi Jeowadeba jĩga bʼaita akʉza nemitia omarẽã. Mamina zõrãrãbara maʉ̃ bedʼea widibʉrʉdera ibiade widipanʉ. Widida ẽ bedʼea ãyaʼa widita nesida ẽãra (Prov. 20:5). Adewara zõrãrãbara yizata zokʼaseabʉ kʼarebaita nemita odaba krĩchamarẽã iya odara biga ẽ basita akʉza jẽda krĩchamarẽã maʉ̃ kʼarea. Adewara nemitia odara zõrãrãba ʉ̃ra akʉ jʉ̃ẽbʉrʉdera sopʉa baseabʉ, iya nekʼãrẽ aña jidada kʼarea akʉza iyi sãwũã krĩchabʉ kʼarea. Maʉ̃ba iya jẽda krĩchaseabʉ. w24.08 22 parr. 9-11

Jesúsbara bedʼea bia Daizeze Nokʼo ʉ̃rʉbemara jaradiakĩrãne jaradiabasi, kʼawuabasi baera Daizezeba iya maʉ̃ta omarẽã kãgabʉta. Jesúsʼitara audre yibiabasi Daizeze Bedʼea jaradia wãita, maʉ̃ba iyi beibodoarebida idubʉ ẽ basi Daizeze Bedʼea jaradiabʉra, awuarabʉrʉ pʉwʉrʉza jaradia wãbasi Daizeze Bedʼeata awurura (Luc. 13:22). Adewara Jesúsbara iyi kʼaidubemarabida jaradiasi sãwũã Daizeze Bedʼea jaradiaita (Luc. 10:1). Idi ewadebida, bedʼea bia Daizeze Bedʼea ʉ̃rʉ jaradia wãita audre yibia Jeowaba akʉza Jesúsʼʉ̃meba kãgabʉ kĩrãkʼa (Mat. 24:14; 28:​19, 20). Dayirãbida ẽbẽrarãta Jeowaba akʉbʉ kĩrãkʼa akʉpanʉbʉrʉ, audre jaradiakĩrãne jaradiadayi Daizeze Bedʼeara. Jeowabara kãgabʉ ẽbẽrarã mejãchaʉba iyi bedʼeata ũrĩnamarẽã akʉza iya zokʼabʉta ojʉ̃drʉdamarẽã (1 Tim. 2:​3, 4). Wãrĩnu, Daizeze Bedʼea jaradiabʉba kʼarebaseabʉ ẽbẽrarã beideba ẽdrʉdamarẽã, maʉ̃ kʼarea Jeowaba dayirã jaradiabʉ sãwũã bedʼeaita ẽbẽrarã Daizeze ʉ̃rʉ jaradiabʉrʉde. Idi ewade, dayirãba Daizeze Bedʼea jaradiabʉta ẽbẽrarãba ũrĩamapanʉmina, zʉbʉria zroma jõi nãã ũrĩkĩrã zeseabayi. w25.03 15, 16 parr. 5-7

Nawedara dayirãbara ẽbẽra kongregasioneba ãĩ wãnata ãba yi jʉrebarieda jʉ̃ẽbʉrʉdera saluda ẽ basi, mamina atiara aba abakaʉba kʼawua jidaseabʉ iya Daizeze Bedʼeade kʼãrẽ kʼawuadadeba saludaita, mawũã ẽ bʉrʉ saluda ẽãta. Mamina kĩrãbedaibara maʉ̃ ẽbẽraʉ̃me dããra bedʼeanʉma ẽ baibarata, mia iyiʉ̃me ãba wãibara ẽãta. Daizeze Bedʼeaba jarabʉ ʉ̃kʉrʉ ẽbẽrarã nemitia odatrʉ dayirãbara saluda ẽ baibarata, naʉ̃rata saludara ãya nemitia obʉta bia akʉbʉ kĩrãkʼabayi (2 Juan 9, 11). Naʉ̃ testoba nãã jarabʉdeba kʼawuaseapanʉ Juanʼra audrera bedʼeanʉmasi apostata ʉ̃rʉ, mawũã ẽ bʉrʉ jari ẽbẽrarã Daizeze Bedʼeaba oẽ marẽã jarabʉta wuabemara obikĩrãpanʉrata (Apoc. 2:20). Maʉ̃ba ẽbẽra abaʉba Jeowa odeba ãĩ wãnaba, apostataraba jaradiabʉta jaradianʉmʉbʉrʉ, mawũã ẽ bʉrʉ Daizeze Bedʼeade oẽ marẽã jarabʉta obinʉmʉbʉrʉ, zõrãrãbara akʉde wã ẽ bayi maʉ̃ ẽbẽrarã, mawũãsidu maʉ̃ ẽbẽrarã jẽda krĩchaseabʉ. Mamina naʉ̃ ẽbẽra waidide jẽda krĩcha ẽ nããra dayirãbara saluda ẽ bayi, mia trʉ̃ ẽ bayi ãba yi jʉrebarieda jʉ̃ẽmarẽã. w24.08 30, 31 parr. 14, 15

Ẽbẽrarã jõma ne dia berabarida tẽã Jesúsba iyi kʼaidubemara jarasi nãã wãnamarẽã Capernaúmʼena jãbade. Maʉ̃enara iyira katumaena wãsi, ẽbẽrarãba nokʼo babikĩrãbasi baera (Juan 6:​16-20). Jesús kʼaidubemara mawũã jãbade wãne nãgʉ zromata zesi. Jesúsba maʉ̃ta ũdui ãyima wãsi jĩrʉne, mamina pusa ʉ̃rʉ, iyi kʼaidubemara kʼaidu jʉ̃ẽbʉrʉde, Jesúsba Pedroʼa jarasi iyi kĩrãkʼa pusa ʉ̃rʉ wãmarẽã (Mat. 14:​22-31). Jesús jãbade baridogode nãgʉra taʉ totosi, aramaʉ̃ta iyi kʼaidubemaraba Jesúsʼa jarasida bʉtrʉ wãrĩnu Daizeze warra (Mat. 14:33). Marcosba naʉ̃ta jarasi: «Mawũẽ ãzhira kʼãbãẽã perabʉdaba bia akʉdruasidʼa. Aramaʉ̃nerã zhi zromata wadʼi kʼawuadʼa ẽbasia pan wĩkaba kʼabanata nekʼobigadʼamina» (Mar. 6:​50-52). Nama jarabʉdebara Jesús kʼaidubemarabara biʼia ũrĩna ẽ basi Jeowaba kʼãrẽaba zarea diasita Jesúsʼa miõba okata omarẽã. w24.12 5 parr. 7

Jeowaba dayirãʼa kãga ũdubibʉ kʼarea biga diaira dayirãbara nekʼãrẽ jõma odaibara Jesús beida jẽda kĩrãbebʉrʉ ewaride wãita, adua ẽ baita maʉ̃ ewarita, mamina maʉ̃ awuara nekʼãrẽ oseapanʉ. Trʉ̃seapanʉ ẽbẽrarãta jʉ̃ẽmarẽã maʉ̃ ewaride. Dayirãba maʉ̃ obʉrʉdera jara ũrĩbiseapanʉ kʼãrẽta odaita Jesús beida jẽda kĩrãbebʉrʉde, maʉ̃itara zokʼaseabʉ jw.org de bideora ũdubibʉta bari jaraita naʉ̃ta, ¿Kʼãrẽa beisi Jesura? akʉza Kĩrãbedaya Jesu beidata. Zõrãrã kongregasionebemaraba trʉ̃ñi ẽbẽrarã Jeowa ode kʉrãzapanʉrãra. Naʉ̃ra ẽbẽrarãnebemata Jeowa organizasionʼena jẽda zeita krĩchara nama egorodepanʉrata akʉza ʉ̃tʉpanʉrata mejãcha sobiadayi (Luc. 15:​4-7). Yibiabayi Jesús beida jẽda kĩrãbebʉrʉ ewaride bari dayirãi yiya saluda ẽ baita, awuarabʉrʉ yi ʉ̃rabʉrʉ zebʉrʉra akʉza yi jʉ̃ẽ ẽ dããraba jʉ̃ẽbʉrʉra saludaisida bigabayi, maʉ̃ba kãgapanʉ maʉ̃ ewaridera ẽbẽrarã jõmaʉ̃ta bia sentidamarẽã (Rom. 12:13). w25.01 29 parr. 15

Jesús dayirãbari beidaba ũdubibʉ Jeowaba nekʼãrẽ jõma daucha obʉta. Mamina bari maʉ̃ awa ũdubi ẽ, ũdubibʉ Jeowabara dayirãra mejãcha kãgata (Juan 3:16; 1 Juan 4:​9, 10). Jesús dayirãbari beimarẽã zokʼasidera, Jeowabara bari kãgaba ẽ basi dayirãra ewari jõmaʉ̃nẽ panamarẽã, awuarabʉrʉ iya kãgabʉ dayirãra iyi mebẽrãne eda panamarẽã. Jeowaba Adán parãsidera Jeowa mebẽrãnebemabasi, mamina iya nemitia oside ãĩ wãbʉrʉ kĩrãkʼasi maʉ̃ mebẽrãneba. Maʉ̃ba dayirã jõmaʉ̃ta Jeowa mebẽrãneba jãpepanʉ, mamina Jesústa dayirãbari beisi baera aranʉbai dayirãsida jẽda Jeowa mebẽrãne eda baseapanʉ. Mawũãsidu idi ewadebida Jeowabara iyi ode kʼẽrẽpabʉra akʉza iya jarabʉdebʉra bia akʉbʉ iya nemitia obʉrʉdera kĩrãduabʉ maʉ̃ nemitiara. Maʉ̃ba dayirãra atiara jõmaʉ̃ta Jeowaʉ̃me bia baseapanʉ akʉza dayirã mebẽrãbawarabida. Naʉ̃ba ũdubibʉ Jeowaba dayirãra kʼãrẽaba kãgata (Rom. 5:​10, 11). w25.01 21 parr. 6

Wãrĩnubaira Jesústa dayirã kʼarea kʼãwũã beidara, jipade nebia zroma, dayirãʼa nebia bari diadapeada (2 Cor. 9:15). Jesústa dayirã kʼarea beisi baera, dayirãra atiara Jeowa neũdukʼawua baseapanʉ, iyi kʼawa baseapanʉ. Akʉza dayirãba jʉ̃ãpanʉ ewari jõmaʉ̃nẽ panaita. Dayirãbara nekʼãrẽ mejãcha kʼarea biga diaseapanʉ Jeowaʼa, iyara yi Warrata diasi baera dayirãta mejãcha kãgabʉ baera (Rom. 5:8). Mamina maʉ̃ta kĩrãdua ẽ baita Jesúsba jara amaesi poagaza kĩrãbeibarata iyi beida ewarita (Luc. 22:​19, 20). Naʉ̃ poagadera Jesús beidara jẽda kĩrãbedayi jueves 2 abril 2026de. Wãrĩnubaira naʉ̃ ewaridera jõmaʉ̃ba nekʼãrẽ okĩrãpanʉ wãita mama. Jipade yibiabayi maʉ̃ ewari zei nãã, dayirã jõmaʉ̃ba ewari jʉrʉdaita krĩchaita Jeowaba kʼãrẽta ozebʉrʉta akʉza Jesúsba kʼãrẽta ozebʉrʉta dayirãbari. Mamina bari maʉ̃ awa oibara ẽ, maʉ̃ berabarida tẽãbida jipade yibia maʉ̃ ʉ̃rʉ krĩchaira. w25.01 20 parr. 1, 2

Jeowaba akʉza Jesúsba kʼãrẽ obʉ ʉ̃rʉ bia krĩchaiba, kʼarebayi kʼawuaita ãya dayirãta kʼãrẽaba kãgabʉta. Jesús beida jẽda kĩrãbepanʉ semana aba waebʉde, leseabʉ ebangeliota aba, mawũã ẽ bʉrʉ ũme akʉza Jesús beida jẽda kĩrãbe berabarida tẽãbida leseabʉ, mamina kĩrãbera jõma Jesús ʉ̃rʉ kʼawuaira, wãña jõma kʼawua ẽ baita, awuarabʉrʉ wiña wiñane kʼawuaita bʉya audre kʼawuakĩrãbʉta, jʉrʉda audre kʼãrẽa kãgaibarata Jeowata Jesúsʼʉ̃me. Jeowa odebʉta dããrababʉrʉ krĩchaseabʉ nekʼãrẽ wuara kʼawuaira neẽãta Daizeze Jeowaba aripe obʉ ʉ̃rʉ, kãga ũdubibʉ ʉ̃rʉ akʉza dayirã ẽdrʉbida ʉ̃rʉ, mamina wãrĩnubaira naʉ̃ ʉ̃rʉ kʼawuaira mejãchabʉ kʼãrẽba kʼarebaseabʉta. w25.01 24, 25 parr. 13-15