Abril

Dayirãba nebiata ũdubikĩrãpanʉbʉrʉ ĩjãibara Jesústa dayirãbari beisita dayirã ẽdrʉbita (Efes. 1:7). Wãrĩnu yi ʉ̃ta wã ẽãrabara Jesús beida jẽda kĩrãbebʉrʉdera ko ẽ panʼra akʉza do ẽ binosida (Juan 10:16). Mamina ãyabida koibara pan zokʼaibʉdebemara, maʉ̃ba jarakĩrãbʉ ĩjãibarata Jesúsʼra beisita ãyibari, ãyita ewari jõmaʉ̃nẽ panamarẽã (Juan 6:53). Mamina yi ʉ̃ta wãirabara ũdubibʉ, ãyira Jesúsba iyi bei nãã bedʼea abarika zedade edapanʉta akʉza ãya ʉ̃tʉ Jesúsʼʉ̃meba zokʼaita, mawũẽra dayirã ewari jõmaʉ̃nẽ bʼaira ĩjãnaibara Jesúsʼra dayirãbari beisita. w24.12 13 parr. 14, 16

Jesús bei nãã yiko odadera, Jesúsbara iyi kʼaidubemara diasi panta mõbe jarasi maʉ̃ panbara jarakĩrãbʉta iyi kakuata, maʉ̃ tẽa diasi binota, mõbe jarasi maʉ̃bara jarakĩrãbʉta iyi wa bedʼea abarika zei yiwidita (Mar. 14:​22-25; Luc. 22:20; 1 Cor. 11:24). Jesúsʼra bedʼea abarika zesi ẽbẽrarã iyiʉ̃me ʉ̃tʉba zokʼaiʉ̃me (Heb. 8:​6, 10; 9:15). Jesús iyi bei naena yiko oside bedʼea abarika zesidera, maʉ̃ ewaridera iyi kʼaidubemara awabʉrʉbasi, neẽbasi wuabemara ẽbẽrarã. Jesúsʼra maʉ̃ ewaridera bedʼea abarika zesi iyi kʼaidupanʉra 11ʉ̃me akʉza ẽbẽrarã ʉ̃ta wãiʉ̃me, naʉ̃ra 11parʉrata Jeowabara nããra jidasi ʉ̃ta wãita. Ãya Jesúsʼʉ̃meba zokʼai baera. w24.12 11 parr. 9, 10

Jesúsʼra iyi neũdukʼawuadebema abaʉba sewasi akʉza iyi nejʉraraba jida edesida, mõbe iyaʼa imitia bedʼeasida, kayirua iya oda ẽãta osi asida, adewara beade zokʼasida, mama iyira zʉbʉriabisida, ʉ̃kʉrʉ gorogororaba bakurude ʉ̃tʉ juwa kachi jirabʉsida mama beimarẽã. Mawũã mejãcha zʉbʉriasimina Jesúsʼra Jeoware kʼẽrẽpabasi, mamina Jeowara audre sopʉasi yi Warra mejãcha zʉbʉriabibaramʉ ũduside. Jeowaba yi Warra mejãcha kãgabasimina akʉza iyira zarea mejãcha erbasimina kʼãrẽ oẽ basi yi Warra maʉ̃neba ẽdrʉbira, ¿kʼãrẽa? Dayirãta mejãcha kãgabʉ baera. Jesúsba iyi bebʉ kʼãwũã ẽbẽrarãbari diadaba, ũdubibʉ Jeowabara bʉsida mejãcha kãgata. Jeowabara yi Warra iya audre kãgata diasi akʉza yi Warra kʼarea mejãcha sopʉasi dayirãta ẽdrʉbita nemitiadeba. Bʉa maʉ̃ ʉ̃rʉ kʼawuabʉrʉdera, ¿bʉra sãwũã sentibʉ? (1 Juan 4:​9, 10). Jeowabara kãgabʉ dayirãba aba abaka nemitiadeba ẽdrʉdamarẽã. w24.08 6 parr. 13, 14

Jeowaba dayirã kʼãrẽaba kãgabʉta kʼawuaira bigabayi krĩchaita iya kʼãrẽta osita dayirãbari akʉza iyi kʼãrẽ pʉade berabarisita. Yi Warrata diasi dayirãbari beimarẽã, naʉ̃ra jipade zarebasi. Diaruba jarabʉ mia abaʉ ẽbẽrata Jeoware kʼẽrẽpa babe ẽãta bedʼea zroma ũdubʉrʉ. Mamina Jeowaba kʼãrẽta osi ũdubita Diaruba jaradara sewidabasita. Iya zokʼasi yi Warrata zʉbʉria kʼãrãpe beimarẽã nama egorode (Job 2:​1-5). Jesús iyi nejʉraraba zʉbʉria osidadera akʉza iyi kʼarea ipidasidadera akʉza iyi bakurude ʉ̃tʉ jirabʉsidadera, Jeowabara jõma ũdusi maʉ̃ra. Mamina bari maʉ̃ awa ũdu ẽ basi, ũdusi sãwũã zʉbʉria beasidasidata (Mat. 27:​28-31, 39). Maʉ̃nera Jeowabara Jesúsʼra ẽdrʉbiseabasi Jeowara zarea barabʉ baera (Mat. 27:​42, 43). Mamina Jeowaba Jesústa maʉ̃ zʉbʉriadeba ẽdrʉbisibʉrʉ, atiara ẽbẽrarãba jʉ̃ãpana ẽ bakasi ʉ̃ra zeide nebia jʉ̃ãpanʉra akʉza Jesúsʼra bei ẽ bakasi dayirã nemitia kʼarea. Maʉ̃ kʼarea Jeowaba iduaribisi yi Warrara zʉbʉria kʼãrãpe beimarẽã. w25.01 22 parr. 7

Poaga 33de 16 nisánʼne Jesús kʼaidubemarãra sopʉapanʉ akʉza perapanʉ. Jesús kʼaidubemara ũme Jerusalénʼneba Emaúsʼeda wãsida. Ẽbẽra aba ãya ũdukaba orrabʉ ãyita, mõbe ãyi kʼaidu wã, aramaʉ̃ta Jesús kʼaidubemarabara naʉ̃ ẽbẽra jara ũrĩbipanʉ ãyira mejãcha sopʉapanʉta Jesústa beisi baera. Naʉ̃ yumakẽrãbara Jesús kʼaidubemara jara ũrĩbibʉ bedʼea ãya jipa kĩrãdua ẽ baita. Iyara jara ũrĩbisi propetaraba bedʼea jaradata mawũã kʼawuadamarẽã Jesúsʼra kʼãrẽa zʉbʉriaibarabasita akʉza beibarabasita. Ãyi Emaúsʼidu jʉ̃ẽbʉrʉdera Jesús kʼaidubemarabara kʼawuapanʉ maʉ̃ yumakẽrãra Jesústa (Luc. 24:​13-35). Jesús jẽda piradrʉda tẽãra, 40 ewaribayeda nama egorodebasi, maʉ̃nera iyira iyi kʼaidubemara yi ũdubibasi. Jesúsbara iyi kʼaidubemara so zarea diasi, naʉ̃ba kʼarebasi ãyi wua sopʉapana ẽ marẽã akʉza perada ẽ marẽã. Maʉ̃ba ãyara soiduba jaradiakĩrãpanasi Daizeze Nokʼo ʉ̃rʉ. w24.10 12 parr. 1-3

Wũãwũã zakera ewari berabari wãne iyidoba zõna ba zeyi, mamina dayirãba Daizeze Bedʼeadebema sãwũã oita biʼia kʼawuaira, maʉ̃ra iyidoba kʼawua ze ẽ, maʉ̃itara zarea oibara. Bari jaraita, mebẽrã Corintodebemarabara ĩjãsida Daizeze Bedʼea ʉ̃rʉ, buru kʼoesida, Daizezeba iyi jaure zareata diasi ãyara akʉza Pablobida ãya nebiata jaradiasi (Hech. 18:​8-11). Mamina ãyi buru kʼoedata poaga bio berabaribʉrʉde, mejãcha kristianoraba ũdubisida ãyara Daizeze Bedʼeadebema sãwũã oira biʼia kʼawua ẽãta (1 Cor. 3:2). Daizeze Bedʼeadebema sãwũã oita biʼia kʼawuaira, nãã daya maʉ̃ta okĩrãbaibara. Yi kʼãrẽ kʼawua ẽ kĩrãkʼa bakĩrãpanʉrabara jʉrʉda ẽ sãwũã ũdubita Daizeze Bedʼeadebema sãwũã oita biʼia kʼawuabʉta (Prov. 1:22). Ʉ̃kʉrʉ ẽbẽrarãbara ãyi zõnabasidu kãgabʉ ãyi yibariraba nekʼãrẽ omarẽã ãyibari. Dayirãra maʉ̃ra kĩrãkʼa bakĩrãpanʉ ẽ, awuarabʉrʉ nekʼãrẽ obʉrʉdera dayirãdobaʉba krĩchakĩrãpanʉ kʼãrẽta oita akʉza audre Jeowa kʼawa bakĩrãpanʉ. Bʉta zarea obʉbʉrʉ Daizeze Bedʼeadebema sãwũã oita biʼia kʼawuaita, Jeowaʼa yiwidʼira, iya kʼarebayi bʉa maʉ̃ta okĩrãmarẽã akʉza omarẽã (Filip. 2:13). w24.04 4 parr. 9, 10

Jeowaba jara ũrĩbibʉ iyi sãwũã sentibʉta ẽbẽrarã iya kʼawua oibaradera (Ezeq. 33:11). Jeowaba ẽbẽra abaʉta beabʉrʉdera mawũã krĩña beabʉ ẽãta, awuarabʉrʉ kʼawuabʉ kʼãrẽa mawũã oibarata. Jeowabara so zʉbʉriata ũdubibʉ, maʉ̃ba iya oseabʉdera so zʉbʉria akʉbʉ iya kãgata. Dayirãba kʼawuabʉdera, ¿kʼairata jẽda piradrʉ ẽ bai? Daizeze Bedʼeaba ʉ̃kʉrʉ yizarata jara ũrĩbibʉ. Bari jaraita, Jesúsba jarasi Judas Iscariotera jẽda piradrʉ ẽ baita (Mar. 14:21; adewara akʉra Juan 17:12). Judasbara biʼia kʼawuabasi iya kʼãrẽ onʉmʉra Jeowa ʉ̃rʉbasita akʉza yi Warra ʉ̃rʉ, mawũãsidu osi iyara (akʉra naʉ̃ testota Marcos 3:29). Adewara Jesuba jarasi ʉ̃kʉrʉ religion nokʼora iyi ewaridebemarasida jẽda piradrʉ ẽ baita iyi ʉ̃rʉpanasi baera (Mat. 23:33; akʉra Juan 19:11 nota «del hombre»). Pabloba jarasi apostatara jẽda krĩcha ẽãrãra jẽda piradrʉ ẽ baibasita (Heb. 6:​4-8; 10:29). w24.05 4 parr. 10, 11

Dayirãta Jeowa kʼawapanʉbʉrʉ Diaruba dayirã zʉbʉriabibʉra maʉ̃ra ara oseabʉ (1 Juan 3:8). Adewara ẽjũã kĩrãwãreãnẽbida Jeowabara kʼarebayi iyi odepanʉra iyiʉ̃me ewari jõmaʉ̃nẽ kʼẽrẽpapanamarẽã (Apoc. 21:4). Jeowa de karpade eda bʼaira, arigʉ yibia dayirãra iyiʉ̃me ewari jõmaʉ̃nẽ yi neũdukʼawua baseabʉ baera (Ezeq. 37:27). Dayirãta Jeowa de karpade bakĩrãpanʉbʉrʉ, ¿kʼãrẽta odaibara? Daizeze odepanʉraba kʼawuakĩrãpanʉ kʼãrẽta omarẽã kãgabʉta Jeowaba. Dayirãba Jeowa mejãcha kãgabʉ baera zarea opanʉ daya nekʼãrẽ obʉdeba Jeowa sobiabita (Col. 1:10). Dayirãbara kĩrãduada ẽ baibara Daizezera yi zromata, maʉ̃ba dayirãba wawia ũdubipanʉbʉrʉ oda ẽ bayi iya nekʼãrẽ kãga ẽãta. Maʉ̃ kʼarea ũdubikĩrãpanʉ sainʉ oita kʼawuabʉta Daizeze nãã (Miq. 6:8). w24.06 4 parr. 8, 9

Jeowaba Abrahánʼa widisi iyi warrata sakripisiode diamarẽã, maʉ̃ oira Abrahánʼitara jipade pʉa bʼaibasi, mawũãsidu Abrahánbara diakĩrãne diaibasi yi warrara, mamina Abrahánba yi warra beaitanʉmʉne Jeowaba jarasi oẽ marẽã. Mamina Abrahánba odaba jõmaʉ̃ʼa ũdubisi Jeowabara iyi warrara diakĩrãne diaibasita ẽbẽrarãbari, ẽbẽrarãta mejãcha kãgabʉ baera (Gén. 22:​1-18). Poaga bio berabarida tẽã Jeowaba israelitara leyta diasi, maʉ̃ne jarasi ãyaʼa sakripisiode diadamarẽã nedʉwʉrʉrata ãyi nemitia kĩrãduaita (Lev. 4:​27-29; 17:11). Maʉ̃ra sakripisioraba ũdubisi Jeowaba sakripisio audre yibiata diaibasita, naʉ̃ sakripisiora yibiabaibasi, ẽbẽrarãta jipa ẽdrʉbibasi baera nemitiadeba. Daizezeba propetara bʉbisi dayirã ẽdrʉbi ʉ̃rʉ, ¿kʼaibasi maʉ̃ra? Maʉ̃ra Daizeze Warrabasi. Iyira mejãcha zʉbʉriape beibarabasi, iyara maʉ̃ra osi bʉta ẽdrʉbikĩrãbasi baera nemitiadeba (Is. 53:​1-12). w24.08 4 parr. 7, 8

Dayirãba Daizeze Bedʼea lebʉrʉdera krĩchadaibara mama jarabʉta dayirãba sãwũã oũdubiseabʉ ʉ̃rʉ. Bʉa Daizeze Bedʼea akʉbʉde bʉyikʉza kʼãwũã krĩchara: «¿Kʼãwũãenara mʉ̃ara sãwũã oũdubiseabʉ nama jarabʉra akʉza tẽãbida?». Maʉ̃ ʉ̃rʉ bia ũrĩnaita krĩchara bʉa lebʉta 1 Tesalonicenses 5:​17, 18. Maʉ̃ tẽã, piki a kʼãrãpe krĩchara bʉ sãwũã yiwidʼinʉmʉ ʉ̃rʉ. ¿Bʉ yiwidʼibʉrʉdera soiduba yiwidʼibʉka? mawũã ẽ bʉrʉ ¿badua yiwidʼibʉka? ¿Bʉara Jeowaʼa kʼãrẽ kʼarea biga diakĩrãbʉ? Nekʼãrẽ ũbea ʉ̃rʉ krĩchabaribaibara mawũã Jeowaʼa biga diaita. Bʉa Daizeze Bedʼea akʉda tẽã ewari wiña jʉrʉbʉbʉrʉ maʉ̃ ʉ̃rʉ bia krĩchaita, naʉ̃ba kʼarebayi biʼia ũrĩta Daizeze Bedʼeaba kʼãrẽta jarabʉta akʉza maʉ̃ta oũdubita. Bʉa Daizeze Bedʼea akʉbʉrʉza, mawũã obʉbʉrʉ, Jeowaba kãgabʉdebayi. w24.09 5 parr. 9, 10

Jeowabara dayirã parãsidera parãsita audre sobiapanamarẽã awurura nekʼãrẽ diabʉrʉde ãya dayirã nekʼãrẽ diabʉira. Dayirãba mebẽrã kʼarebabʉrʉdera mejãchade sobiapanʉ akʉza kãga ãya dayirãʼa biga diamarẽã. Mamina ãya dayirãʼa biga diasita, biga dia ẽãta sobiapanʉ dayirãba oibarata osida baera. Krĩcha ẽã dayirãba kʼãrẽ nebia obʉta, kĩrãbedadrʉ Daizeze Bedʼeaba jarabʉta: «Jeowabara kaʉ̃ ʉ̃ta diaseabʉ» (2 Cron. 25:9). Mia kʼai ẽbẽraba Jeowade kĩrãkʼara dia ẽ nebiara. Maʉ̃ kʼarea dayirãra mejãcha sobia panʉ jʉ̃ãpanʉ baera Jeowaba nebia diaita. Bigabayi zarea odaita Jeowaba nekʼãrẽ diakĩrãne diabʉ kĩrãkʼa diapanaita. w24.09 31 parr. 20, 21

Jeowabara so borekea akʉbʉ akʉza so zʉbʉria akʉbʉ (Sal. 103:13; Is. 49:15). Dayirã zʉbʉriabʉrʉdera Jeowara mejãcha sopʉabʉ dayima iyita zʉbʉriabibʉ kĩrãkʼabʉ baera (Zac. 2:8). Adewara Jeowaba kʼarebabʉ dayirãta iyi kʼawapanamarẽã mawũã iyi neũdukʼawua bia bʼaita (Sal. 25:14; Hech. 17:27). Adewara Jeowara yi zromamina iyara eda krĩchabʉta ũdubibʉ. Iyara ẽbẽrarãra nemitia omiamina kʼarebabʉ baera (Sal. 113:​6, 7). Jeowaba mawũã nebiata mejãcha erbʉ baera, jõmaʉ̃ta iyi ʉ̃rʉ ibia bedʼeakĩrãpanʉ. Dayirãra Jeowa ʉ̃rʉ ibia bedʼeapanʉ kãgapanʉ baera wuabemarabida ũdukʼawuadamarẽã Jeowata. Wãrĩnubaira ẽbẽrarã mejãchaʉba kʼawuada ẽ Jeowa sãwũã chura, ¿kʼãrẽa? Diaruba ẽbẽrarã aña krĩchabibʉ baera Jeowa ʉ̃rʉ akʉza Jeowa ʉ̃rʉ sewidata jarabʉ baera (2 Cor. 4:4). Diarubara ẽbẽrarã krĩchabibʉ Jeowara ẽbẽra kayiruata iya kãgakʉta oẽãnera zʉbʉriabi bareta ẽbẽrarã akʉza krĩchabibʉ ẽbẽrarã, naʉ̃ drʉade nemitiabʉra jõma Daizezedeba zebʉta. Mamina dayirãbara biʼia kʼawuapanʉ Jeowa sãwũã chura, maʉ̃ba ẽbẽrarã jaradiakĩrãpanʉ iyi ʉ̃rʉ. Mawũã opanʉneba ibia bedʼeabipanʉ iyi ʉ̃rʉ (Is. 43:10). w25.01 3 parr. 6, 7

Jesúsʼra Daizeze warrabasimina, kayirua okabasimina akʉza miõba okata obasimina Diaruba zokʼasi ʉ̃kʉrʉ ẽbẽrarãta Jesús ʉ̃rʉ sewa nebʉrʉta jaradamarẽã. Bari jaraita, Jesúsba ẽbẽra abaʉdeba angel kayirua ãĩ bʉebʉrʉdera, religion nokʼora Jesús ewaridebemaraba jarapanasi, Jesúsbara maʉ̃ra mawũã obasita Diaru jauredeba (Mar. 3:22). Jesús nokʼora kĩrãbita edesidadera, religion nokʼoraba jarasida Jesúsʼra Daizeze ʉ̃rʉ imitia bedʼeabʉta akʉza wuabema ẽbẽrarãbida jarasida jaradamarẽã Jesústa beadamarẽã (Mat. 27:20). Tẽã Jesús kʼaidubemaraba Daizeze Nokʼo ʉ̃rʉ jaradia wãsidade, yi maʉ̃ bedʼea ũrĩkĩrã ẽãbara sewidata jarasida ãyi ʉ̃rʉ wuabema ẽbẽrarã judiora ẽã, mawũã naʉ̃rata Jesús kʼaidubemara ʉ̃rʉpanamarẽã (Hech. 14:​2, 19). Hechos 14:2 ʉ̃rʉ, La Atalaya 1 diciembre 1998debemaba naʉ̃ta jara ũrĩbisi: «Diaruare panʉrabara kristianoraba Daizeze Nokʼo ʉ̃rʉ jaradiabʉra ũrĩkĩrãna ẽ basi akʉza maʉ̃ awuara ãyara sewa nebʉrʉta jarasida naʉ̃ra kristianora ʉ̃rʉ, mawũã wuabemaraba ãya jarabʉta ũrĩkĩrã ẽ marẽã akʉza jʉradamarẽã». Diarubara idibasidu sewa nebʉrʉta jarabʉ. w24.04 11 parr. 15, 16

Wãrĩnubaira kʼãrẽ ẽ dayirã sõbede beira. Jeowabʉrʉ kʼawuabʉ kʼaira ẽbẽrata jẽda piradrʉbira. Jeowatrʉ Juez bia baera iya jõma kʼawua aripe oyi (Sal. 33:​4, 5). Adewara krĩchada ẽ baibara dayirã ewari jõma bʼaira ũduita dayi sama chudeba. Maʉ̃ba dayirãbara krĩchada ẽ baibara ẽbẽra abaʉʼa Daizeze Nokʼo ʉ̃rʉ jaradia jʉ̃ẽna ẽ basi baera, Daizeze Jeowabara maʉ̃ ẽbẽrarã jaraita chibota (Mat. 25:46). Jeowabara mawũã krĩcha ẽ bayi ẽbẽra aba abaka mejãcha kãgabʉ baera. Adewara dayirãbara bia kʼawuada ẽ Jeowabara sãwũã kʼawua oita zʉbʉria zroma berabarinʉmʉnera. Maʉ̃nera ʉ̃kʉrʉbara Daizeze ʉ̃rʉ ĩjãbʉta ũdubiseabʉ. Zʉbʉria zroma berabaribʉrʉde Jeowaba ũdubiyi iyira kʼaita, maʉ̃nera wabida ẽbẽrarãbara Jeowa ʉ̃rʉ kʼawuaseabayi akʉza ĩjãseapanañi (Ezeq. 38:16). w24.05 12 parr. 14, 15

Jeowa odepanʉrãra ãyirai yiya kʼarebakĩrã (2 Cor. 8:4). Mamina ãya maʉ̃ oira zowaĩnĩgʉabʉta ũdubidaibara. Bari jaradaita, yõbarabʉdera, zõrãrãbara kʼawuapanʉ mebẽrãbara nesidapanʉta ãyaʼa zowaĩnĩgʉa diadamarẽã, adewara naʉ̃ra mebẽrãbara nesidaseapanʉ diamarẽã Daizeze Bedʼeata, kartarata adewara yikota, wuata akʉza ãyi sama bʼaita. Ãya mebẽrã Jeowa odepanʉta mejãcha kãgapanʉ baera nekʼãrẽ jõma opanʉ diaita naʉ̃ra mebẽrãba nesidapanʉta, maʉ̃ oira ãyi bebʉde bʼaimina. Maʉ̃ mawũã dayirãbara nesidayi Betelba omarẽã jarabʉta aripe odaita, mawũã mebẽrãbawara ãbapanaita (Heb. 13:17). Zõrãrã diapanʉ kartata ãya kʼawuamarẽã kʼãrẽta oibarata drʉade neida berabari nãã akʉza berabaribʉrʉde, zõrãrãbara naʉ̃ta badua akʉpanaibara (1 Cor. 14:​33, 40). Zowaĩnĩgʉabʉta ũdubidaibara mamina jʉra kʼawuapanaibara (Prov. 22:3). Nekʼãrẽ oi nãã biʼia krĩchara adewara jʉra kʼawuabara. Ĩjãnadrʉ Jeowa ʉ̃rʉ. Jeowabara krĩchabʉ dayirã aba abakaʉ ʉ̃rʉ akʉza iyara kãgabʉ dayirãra aduʼapanamarẽã, maʉ̃ kʼarea iya kʼarebabʉ dayirãba awuru mebẽrãta kʼarebabʉrʉde neida berabari ẽ marẽã. w24.07 4 parr. 8; 5 parr. 11

Davidbara biʼia ũdukʼawuabasi Jeowara akʉza iyide ĩjãbasi. Saúlba akʉza wuabemara ẽbẽrarãba David pẽwãpanasidera iyara Jeowaʼa kʼarebata widisi (Sal. 18:46). Davidba ũduside Jeowaba iyi bedʼea sãwũã panʉnata akʉza sãwũã kʼarebadata, maʉ̃ne iya jarasi: «Jeowara zokʼaibʉ». Davidbara maʉ̃ bedʼeabara jarakĩrãkʉa ẽ basi Jeowara bari zokʼaitabʉta. Libro abaʉba jara ũrĩbibʉ Davidbara ũdubasita «Daizezera wãrĩnʉbʉta, adewara ẽbẽrarãta badua kʼarebabʉta». Davidba ũdusi Jeowabara sãwũã kʼarebasita, maʉ̃ba audre ĩjãsi iyara Jeowarabʉta akʉza maʉ̃ba diasita iyaʼa zareata mawũã iyiʉ̃me kʼẽrẽpa bʼaita (Sal. 18:​28, 29, 49). Dayirãba ĩjãbʉbʉrʉ Jeowara wãrĩnu zokʼaibʉta, maʉ̃ba kʼarebayi iya kãgabʉta sobiade oita, badu bedʼea zroma zebʉrʉde zarea bʼaita, adewara kʼarebayi okĩrã oita iya kãgabʉta akʉza kʼarebayi soiduba iyi kʼawa panamarẽã. w24.06 20, 21 parr. 3, 4

Pabloba kʼãwũã tesalonisensesʼra jaradiadaba, ¿kʼãrẽta jaradiabʉ dayirãʼa? Dayirãba ũrĩnara bedʼea bia dayirãmabʉta, mamina Daizeze Bedʼeaba jarabʉ kĩrãkʼabʉ ẽ bʉrʉ, maʉ̃ne jʉra kʼawuapanaibara. Unión Soviéticade ẽbẽrarã Daizeze pʉwʉrʉra jʉrapanʉraba kartata dedekasida, ãyaʼa krĩchabisida maʉ̃ kartara sentral mundialdeba zesita. Maʉ̃ kartadera jarabasi awuru organizasionta omarẽã. Maʉ̃ karta wãrĩnu kĩrãkʼabasimina yi kʼẽrẽpapananarãra maʉ̃ne eda bae ẽ basi, ãya biʼia kʼawuapanasi baera Daizeze Bedʼeade kʼawuada kĩrãkʼa ba ẽ basita. Idi ewade, maʉ̃ne kĩrãkʼa Daizeze pʉwʉrʉ jʉrapanʉrabara internetʼta zokʼapanʉ, mawũã Jeowa pʉwʉrʉta ãba ba ẽ bamarẽã akʉza mawũã aña krĩchabidaita. Maʉ̃ kʼarea dayirãra jʉra kʼawuapanaibara akʉza dayirãba ũrĩpanʉra kʼawuaibara wãrĩnu Daizeze Bedʼeaba jarabʉ kĩrãkʼabʉta (2 Tes. 2:2; 1 Juan 4:1). w24.07 12 parr. 14, 15

Dayirãitara audre yibiabayi jidaita dayirã bebʉ Jeowa diaita akʉza iyi pʉwʉrʉdebema bʼaita. Jeowabara kãgabʉ ẽbẽrarã jõmaʉ̃ba maʉ̃ta oita jidamarẽã. Jeowabara kãgabʉ ẽbẽrarã iyi neũdukʼawua bia bamarẽã akʉza ewari jõmaʉ̃nẽ panamarẽã (Deut. 30:​19, 20; Gál. 6:​7, 8). Jeowabara ẽbẽrarã jara ẽ ajuerzade odamarẽã iya zokʼabʉta, awuarabʉrʉ kãgabʉ ẽbẽra aba abakaʉba kʼawua jidamarẽã kʼãrẽta okĩrãbʉta mamina, ¿kʼãrẽba sãwũãi ẽbẽra abaʉba buru kʼoeda tẽã nemitia zromata ora? Maʉ̃ ẽbẽrata iya nemitia oda kʼarea jẽda krĩcha ẽ bʉrʉ maʉ̃ra kongregasioneba ãĩ wãibara (1 Cor. 5:13). Maʉ̃ ẽbẽra mawũã Jeowa odeba ãĩ wãsimina Jeowabara soiduba kãgabʉ jẽda zemarẽã iyima, iya nemitia oda kʼarea jẽda krĩchamarẽã akʉza jẽda iyi neũdukʼawua bamarẽã nãã bada kĩrãkʼa. Jeowabara dayirãba nemitia odata wãrĩnu kĩrãduakĩrãbʉ baera, zokʼasi yi warrata dayirãbari beimarẽã. Jeowabara wãrĩnu kãgabʉ dayirãra. Iyiareba ẽbẽrarã nemitia odara jarabʉ ãya nemitia oda kʼarea jẽda krĩchadamarẽã mawũã jẽda zeita iyima (Zac. 1:3; Rom. 2:4; Sant. 4:8). w24.08 14 parr. 1, 2

Apostol Juanba tersera karta bʉsidera ʉ̃kʉrʉ ẽbẽrarãba sewa nebʉrata jaradiapanasi akʉza mebẽrãta kongregasione ãyirai yõbipanasi. Mawũãsidu ʉ̃kʉrʉra Jeowarepanasi ãya Jeowaba zokʼabʉta opanasi baera (2 Juan 4, 6). Mawũẽra Juanʼra mejãcha sobiabasi, mamina naʉ̃ra kristianorabara Juan awa sobiabi ẽ basi Jeowasida sobiabasi (Prov. 27:11). ¿Kʼãrẽta kʼawuapanʉ dayirãbara? Jeowaʉ̃me kʼẽrẽpabʉdera, dayirãra sobiapanʉ akʉza wuabemarasida sobiabipanʉ (1 Juan 5:3). Bari jaraita, dayirãra mejãcha sobiabʉ Jeowata sobiabipanʉnera akʉza Jeowara mejãcha sobiabʉ ũdubʉrʉde dayirãba oda ẽãta naʉ̃ drʉade opanʉta, adewara aripe opanʉne iya zokʼabʉta. Akʉza angelerasida sobiapanʉ dayirã kʼarea (Luc. 15:10). Dayirãra mejãcha sobiabʉ ũdubʉdade mebẽrãra pẽwãpanʉinʉ kʼẽrẽpabʉta (2 Tes. 1:4). Naʉ̃ drʉa Diaruba zokʼabʉta jõbʉrʉdera dayirãra mejãcha sobiapanañi Jeoware kʼẽrẽpabʉta ũdubibʉda baera. w24.11 12 parr. 17, 18

Ẽbẽra aba bʉmachuta ũdura, ¿ewari sõbebayeda jĩgaʉba akʉibara bʉa maʉ̃ ẽbẽrarã, mawũã iyaʼa jara ũrĩbita bʉa iyira kãgachʉta? Bʉa maʉ̃ ẽbẽraʼa ñabasea jarara iyi kãgachuta, maʉ̃ ẽbẽrabara krĩchaseabʉ bʉara nekʼãrẽ oita jidai nãã bia krĩcha ẽãta (Prov. 29:20). Mamina bʉa maʉ̃ ẽbẽraʼa iyi kãgachuta jaraita ewari bio berabaribira akʉza aukʼara krĩchabʉbʉrʉ maʉ̃ jaraita, adewara maʉ̃ ẽbẽraba kʼawuara bʉa iyi kãgachuta, mawũãra krĩchaseabʉ bʉara bia kʼawua ẽãta kʼãrẽta okĩrãbʉta (Ecl. 11:4). Ẽbẽra abaʉ̃me iyi bedʼea jʉ̃drʉi nããra, bʉa biʼia kʼawuabaibara bʉra wãrĩnu juwa jidakĩrãbʉta akʉza biʼia kʼawuabaibara maʉ̃ ẽbẽrarã wãrĩnu bʉmabʉta. Mamina kĩrãbeibara maʉ̃ba jarakĩrãkʉ ẽãta bʉra maʉ̃ ẽbẽraʉ̃me juwa jidaibarata. Bʉa kʼawuara ẽbẽra abaʉba bʉ kãgachʉta ¿Kʼãrẽta oi maʉ̃ne? Maʉ̃ ẽbẽrata bʉa kãgachʉ ẽ bʉrʉ zarea ora bʉa nekʼãrẽ obʉdeba ũdubita iyira kãga ẽãta. Jipade mitia ũduchuayi bʉa ẽbẽra aba kãga ẽãta, maʉ̃ʼa ũdubira iya kãgachu kĩrãkʼa (Efes. 4:25). w24.05 22, 23 parr. 9, 10

Yi wãrĩnu kristianora ʉ̃ta wãira kʼẽrẽpabʉratrʉ Jesúsbara ʉ̃tʉ bia edayi iyi Nokʼode. Kristianora ʉ̃ta wãira urumapanʉ ẽãra ededa ẽ bayi ʉ̃ta kristianora yi jidakʉadapeadaʉ̃me (Mat. 24:31). Mawũẽra ẽbẽrarã jõma nama egorode bʼaibida ũrĩnaibara Jesúsba jaradara, kʼẽrẽpa bʼaibara akʉza urumapanaibara. Dayirãbara bia kʼawuabʉda Jeowaba kʼãrẽta oita krĩchabʉra, maʉ̃ba iya kʼawua obʉrʉ ewaridera ĩjãpanʉ aripe oita. Maʉ̃ba idi ewade Jeowaba kristiano aba kʼẽrẽpabʉta jidara ʉ̃ta edeita, maʉ̃ kʼareara krĩcha opanʉ ẽ. Kĩrãbedaya Jesúsba nebʉradata, yumakẽrã abaʉba jʉrʉsita ẽbẽrarãta iyi drʉade ubade trajadamarẽã, trajo jõbodoare (Mat. 20:​1-16). Naʉ̃ra nezokʼaranebemara ʉ̃kʉrʉta diapedaʉba trajakisi, ʉ̃kʉrʉta ũmatipa jʉ̃ẽsi kewarabayeda trajaita, ʉ̃kʉrʉra kewara trajo jõbodoare jʉ̃ẽsi, mamina drʉa yibaribara jõmaʉ̃ta daucha pagasi. Abarika kʼãrẽ ẽ Jeowaba sõbede jidasita kristianora ʉ̃ta wãita, ãyita kʼẽrẽpapanʉbʉrʉ jõmaʉ̃ba nebiata ũdudayi. w24.09 24 parr. 15-17

Jesúsʼra awururaba zʉbʉria osida iya kʼãrẽ oẽ bada kʼarea. Bari jaradaita, yi mebẽrãba jarasida iyira kĩrãnemabʉta, adewara religion nokʼoraba jarasida iyara zarea erbʉta angelera kayiruaraba kʼarebabʉ baera, adewara gorogorora romanorãra iyi kʼarea mejãcha ipidasida akʉza mejãcha posida, tẽã beasida (Mar. 3:​21, 22; 14:55; 15:​16-20, 35-37). Iyi mawũã edasidamina Jesúsʼra maʉ̃ kʼarea kĩrʉ ẽ basi, ¿kʼãrẽta kʼawuapanʉ dayirãba iyi yizadeba? (1 Ped. 2:​21-23). Jesúsʼra iya oẽ bada kʼarea zʉbʉriabisida. Mamina yiza biata ũdubisi dayirãʼa, maʉ̃ne kʼãrẽta oita kʼawuadamarẽã. Jesúsbara kʼawuabasi sõbede chupea bʼaita akʉza sõbede bedʼeaita (Mat. 26:​62-64). Bari jaraita, ʉ̃kʉrʉ ẽbẽrarãba iyi ʉ̃rʉ sewidata jarasidera iyara kʼãrẽ jara ẽ basi (Mat. 11:19). Mamina iyi bedʼeabʉrʉdera kĩrʉ bedʼea ẽ basi mia imitia bedʼea ẽ basi iyi zʉbʉriabipanʉara. w24.11 5 parr. 9, 10

Krĩchadaya naʉ̃ta, dayirãba ẽbẽra mejãcha kãgabʉa nekʼãrẽ bari diapanʉta mamina, ¿sãwũã senti daya ũdura maʉ̃ ẽbẽraba daya diadara bari wuagasita? ¿Sopʉayi bʉmabida? Mamina maʉ̃ ẽbẽraba daya diadata biʼia wuaga erbʉbʉrʉ akʉza bia akʉbʉbʉrʉ dayirã mejãcha sobiayi, abarika berabaribʉ Jeowaʉ̃me. Jeowaba yi Warra iya audre kãgata diasi dayirã bari beimarẽã, dayirãba maʉ̃ kʼarea biga diabʉta ũdubidara akʉza iya dayirã kãga ũdubibʉ ʉ̃rʉ biga diabʉta ũdubidara, Jeowara mejãcha sobiayi (Juan 3:16; Rom. 5:​7, 8). Dayirãba nããra kʼawuaside Jesúsba akʉza Jeowaba dayirã kʼarea kʼãrẽ oda ʉ̃rʉ, maʉ̃nera mejãchade biga diakĩrãpanasi, mamina ewari berabari wãne daya maʉ̃ra kĩrãdua wãseabʉ, idubʉseabʉ mawũã biga diabʉta. Dayima nekʼãrẽ bari diadapeadata miõba ũdu ẽ mae merai kĩrãkʼabʉ, mawũã berabari ẽ marẽã dayirãbara badua kĩrãbedaibara Jeowaba akʉza Jesúsba dayirã kʼarea kʼãrẽ oda ʉ̃rʉ, mawũã ãyaʼa biga diaita. w25.01 26 parr. 1, 2

Mebẽã aba dããraba ẽ bʉrʉ buru kʼoedata maʉ̃ra zõrãrã babe ẽ, ¿kʼãrẽa? Ewari nesida audre Jeowa neũdukʼawua bʼaita akʉza Daizeze Bedʼeade jarabʉde krĩcha jida kʼawuaita. Adewara naʉ̃ mebẽãbara Jesúsde kĩrãkʼa edabʉta ũdubibara. Adewara Jeowaba nekʼãrẽ omarẽã zokʼabʉrʉta sobiade oibara. Naʉ̃bara jarakĩrãbʉ jʉ̃ãbaibarata Jeowaba kʼawua jarayeda kongregasione nekʼãrẽ omarẽã (Mat. 20:23; Filip. 2:​5-8). Adewara Jeowaʉ̃me kʼẽrẽpa bʼaibara, maʉ̃itara oũdubibara Jeowaba zokʼabʉta akʉza iyi organizasionba. Daizeze Bedʼeabara jarabʉ zõrãrãbara biʼia jaradia kʼawuabaibarata. Mamina, ¿maʉ̃bara jarakĩrãbʉka diskurso bia jaradiabaibarata? Mawũã ẽ. Wãrĩnubaira zõrãrã jõmaʉ̃ba diskursora bia jaradiabʉ ẽ. Mamina Daizeze Bedʼea jaradia wãbʉrʉde Daizeze Bedʼeara bia zokʼa kʼawuabaibara akʉza mebẽrã akʉ wãbʉrʉdera Daizeze Bedʼeadeba so zarea diaibara mebẽrã. w24.11 23, 24 parr. 14, 15

Dayirãba Daizeze Bedʼeade ũdura testo aba daya bia ũrĩ ẽãta, audre jʉrʉseabʉ bia kʼawuaita, tẽã nei ewarita krĩcha kiuibara dayirãba Jeowa akʉza Jesús ʉ̃rʉ kʼawuadata akʉza ãya dayirã mejãcha kãga ũdubibʉ ʉ̃rʉ (Sal. 119:97). Bʉa Daizeze Bedʼea estudiabʉrʉde nekʼãrẽ awuru yiwidita kʼawua ẽ bʉ kʼarea mejãcha krĩcha zroma orãra. Bari jaraita, naʉ̃ra ẽbẽra abaʉba oro jʉrʉbʉ kĩrãkʼabʉ. Iya oro jʉrʉbʉrʉdera waña oro ũdueda ẽ, maʉ̃ kʼarea ewari bio berabaribʉ, zarea obʉ jʉrʉita, iya kʼawuabʉ baera oro zake wiñakiruta ũdubʉrʉbʉsida, mejãcha bale baita, maʉ̃ kĩrãkʼa dayirãba Daizeze Bedʼea estudiabʉrʉde dayima nekʼãrẽ yiwidita ũdu ẽ bʉrʉ, maʉ̃ kʼarea krĩcha orãra, daya wiña kʼawuadara audre balebʉ baera oroira, maʉ̃ kʼarea idubʉrãra Daizeze Bedʼeade nekʼawuabʉra (Prov. 8:10). Akʉza zarea ora nekʼãrẽ yiwidi kʼawuaita Daizeze Bedʼeadeba (Sal. 1:2). w25.01 25 parr. 14, 15

Jeowaba jʉ̃ãbʉ dayirãba awururaba nemitia obʉrʉde kĩrãduayawa bamarẽã (Sal. 86:5; Luc. 17:4; Efes. 4:32). Dayirã zʉbʉria obʉdadera mejãchade pʉ, audre pʉabʉ dayi neũdukʼawuaba, mawũã ẽ bʉrʉ dayi mebẽãba zʉbʉriabibʉrʉde (Sal. 55:​12-14). Edaʉde dayirã sãwũã zʉbʉriabʉra kucho zakeba subari kĩrãkʼabʉ (Prov 12:18). Edaʉde daya krĩchakĩrãbʉ dayi awuruba mawũã zʉbʉria odara dayitara pʉ ẽ basita, maʉ̃ta mawũã odara kucho zakeba sudapeadata ãĩ bʉe ẽã aribia pẽĩ abai kĩrãkʼabayi. Maʉ̃ kĩrãkʼa dayi zʉbʉriabʉta dayirãba kʼãrẽ ẽ kĩrãkʼa akʉdara, dayi pʉabʉra taʉ ẽ bayi. Ẽbẽra abaʉba dayima ẽãchuta obʉrʉdera dayirã kĩrʉdogo. Daizeze Bedʼeade jarabʉ dayirã edaʉde mawũã sentiseabʉta, mamina jarabʉ dayirãra maʉ̃ kĩrʉbia yi edebi ẽ baibarata (Sal. 4:4; Efes. 4:26). ¿Kʼãrẽa? Dayirã kĩrʉbʉbʉrʉ naʉ̃bara nebiata we ẽ (Sant. 1:20). Jõmaʉ̃ta kĩrʉbari, mamina ewari jõmaʉ̃nẽ kĩrʉ kikibarira dayidebʉ. w25.02 15 parr. 4, 6

Jesúsba nebʉrata jara ũrĩbisi ũdubita ẽbẽra abaʉba platata aukʼara jʉrʉbʉbʉrʉ maʉ̃ ẽbẽrarã Daizeze dabʉ nããra kʼãrẽ nebia erbʉ ẽãta (Luc. 12:​16-21). Wãrĩnubaira dayirãbara kʼawua ẽ nrʉema kʼãrẽta berabarita (Prov. 23:​4, 5; Sant. 4:​13-15). Adewara Jesúsba ũrĩbisi ẽbẽra abaʉta iyi kʼaidubema bakĩrãbʉbʉrʉ, naʉ̃ ẽbẽrabara iya kʼãrẽ nebia erbʉra idubʉyawabaibarata (Luc. 14:33). Siglo nããbemane mebẽrã Judeadebemaraba mawũã ũdubisida ãya nekʼãrẽ bia erbʉta amaesidade (Heb. 10:34). Idi ewadebida, mebẽrã mejãchaʉba ãya kʼãrẽ nebia erbʉra aduapanʉ politikade eda wã ẽ kʼarea (Apoc. 13:​16, 17). ¿Mamina kʼãrẽba kʼarebabʉ naʉ̃ra mebẽrãba maʉ̃ta odamarẽã? Ãyara wãrĩnu ĩjãpanʉ Jeowaba jarabʉ ʉ̃rʉ. Jeowaba naʉ̃ta jarabʉ: «Mʉ̃a bʉra amae ẽ bayi akʉza ewari jõmaʉ̃nẽ bʉ kʼawabayi» (Heb. 13:5). Dayirãra zarea opanʉ zõna babʉrʉde erbaita kʼãrẽ nesidabʉta. Mamina kʼawuapanʉ dayirãba krĩchabʉde berabari ẽ bʉrʉ Jeowaba bia akʉita. w25.03 29 parr. 13, 14

Jeowabara jʉ̃ã e dayirãdobaʉba biʼia kʼawuamarẽã Daizeze Bedʼeadebema sãwũã oira, awuarabʉrʉ iya dayirãʼa diabʉ zõrãrã kongregasionebemarata, naʉ̃raba dayirãʼa jaradiamarẽã sãwũã audre Jeowa kʼawa bʼaita akʉza Jesúsde kĩrãkʼa oũdubidamarẽã (Efes. 4:​11-13). Jeowaba iyi jaure zareata diabʉ dayirã, mawũã Jesús kĩrãkʼa krĩchadamarẽã (1 Cor. 2:​14-16). Daizezeba naʉ̃ra librota bʉbisi Mateo, Marcos, Lucas akʉza Juan. Mawũã dayirãba kʼawuadamarẽã Jesús sãwũã krĩchabasita, sãwũã bedʼeabasita akʉza kʼãrẽta obasita Daizeze bedʼea jaradia wãbʉrʉde. Bʉa Jesúsde kĩrãkʼa ora iyi kĩrãkʼa krĩchayi akʉza biʼia kʼawuayi Daizeze Bedʼeadebema sãwũã oita. Mamina dayirãba biʼia kʼawuaita Daizeze Bedʼeadebema sãwũã oita, Jesús ʉ̃rʉ nãã kʼawuadamaepai ameibara ẽ. w24.04 4, 5 parr. 11, 12

Ewariza dayirã jõmaʉ̃ba nekʼãrẽ oita jidaibara. Maʉ̃ranebemara ʉ̃kʉrʉ kʼãrẽ oita jidaidera mejãcha krĩchaibara ẽ zare ẽ baera. Bari jaraita, daya mejãcha krĩcha ẽ diapedare kʼãrẽ kʼoibarata, mawũã ẽ bʉrʉ kʼãrẽ ũmadaʉde kʼãĩ wãibarata. Mamina bʉ ʉ̃kʉrʉra kʼãrẽ oita jidabʉdade bia krĩchaibarata. Bari jaraita, dayi kayabʉde, sãwũã sobia bʼai ʉ̃rʉ, dayi mebẽrã ʉ̃rʉ krĩchabʉrʉde. Wãrĩnubaira, dayirãbara kãgabʉ baera dayirãba kʼãrẽ oita jidabʉrʉba dayirã mebẽrãsida sobia bamarẽã dayirãsida bia bʼaita. Mamina audrera kãgapanʉ dayirãba nekʼãrẽ oita jidabʉrʉde maʉ̃ba Jeowata sobiabimarẽã (Rom. 12:​1, 2). Bigabʉ dayirãba kʼãrẽ okĩrãbʉ ʉ̃rʉ audre kʼawuaita. Krĩchadaya naʉ̃ ʉ̃rʉ. Mediko abaʉba ẽbẽra kayabʉta ũdubʉrʉdera iyara aramaʉ̃ta diadogo ẽ badu remediota. Iya kʼawuaita maʉ̃ ẽbẽra kʼãrẽ remedio diaira, nãã bia kʼawuaibara maʉ̃ ẽbẽra sama pʉakʉta, kʼãrẽba sãwũãnʉmʉta iya nesidabʉta diaita. Maʉ̃ kĩrãkʼa dayirãba nekʼãrẽ oita jidabʉrʉdera nãã bia kʼawuabaibara dayirãba kʼãrẽ okĩrãbʉ ʉ̃rʉ, mawũãtrʉ bia kʼawuadai baera kʼãrẽta oita. w25.01 14 parr. 1-3

¿Kʼãrẽta kʼawuapanʉ Jeowaba ẽbẽrarã so zʉbʉria akʉbibʉ ʉ̃rʉ? Jeowabara so zʉbʉria ũdubibʉ akʉza iyara kãga ẽã mia abaʉ ẽbẽrata beimarẽãra. ¿Sãwũã ũdubibʉ Jeowabara ẽbẽrarã so zʉbʉria akʉbʉta? (2 Ped. 3:9). ¿Jeowabara sãwũã ũdubi zebʉrʉ mia kʼaita bei ẽ marẽã kãgabʉta? Iya maʉ̃ra ũdubisi nokʼo Davidba kayirua zroma oda kĩrãduaside. Davidʼra mia beasi akʉza ãĩbasi, mawũãsidu Davidʼra jẽda krĩchasi, maʉ̃ kʼarea Jeowaba so zʉbʉria akʉ kʼãrãpe kĩrãduasi iya kayirua odara (2 Sam. 12:​1-12). Nokʼo Manasésbida kayirua zromata mejãcha osi, mawũãsidu Jeowaba iyira so zʉbʉria akʉ kʼãrãpe kĩrãduasi iya kayirua odara, Manasésta jẽda krĩchasi baera (2 Crón. 33:​9-16). Maʉ̃ra yizaraba ũdubibʉ Jeowabara so zʉbʉria ũdubibʉta yi ẽbẽrarã so zʉbʉria ũdubibara. Jeowabara jẽda piradrʉbiyi naʉ̃ra ẽbẽrarãra ãya kʼawuabasi baera ãya odara kayirua zromabasita akʉza maʉ̃ kʼarea jẽda krĩchasida baera. w24.05 4 parr. 12