Mayo

Iyi pʉwʉrʉ Egiptodeba ẽdrʉbida tẽã Jeowabara ʉ̃kʉrʉta saserdote babisi akʉza awuru lebitarata jidasi tabernakulode nekʼãrẽbʉta odamarẽã. ¿Jeowaba biʼia akʉbasika ẽbẽrarã tabernakulode trajabadatrʉ, mawũã ẽ bʉrʉ maʉ̃ kʼawapananatrʉ? Mawũã ẽ, Jeowabara jõmaʉ̃ta daucha akʉbasi. Drʉa ibʉawabʉ israelitara pananamaera, jõmaʉ̃ta ãyi neũdukʼawuabasi. Bari jaraita, Jeowabara bʉsi jãrãrata ewaride tabernakulo ʉ̃rʉ bamarẽã, diamasira ʉ̃tʉba pʉreabibasi tʉbʉta tabernakulo ʉ̃rʉ, mawũã jõma israelitaraba ũdudamarẽã (Éx. 40:38). Mawũã jõmaʉ̃ba ũdupanʉ baera, jãrãrata aña wãbʉrʉdera israelitara jõmaʉ̃ta maʉ̃ kʼaidu wãseabasi ãya nekʼãrẽ erbada jʉrepedape (Núm. 9:​15-23). Idi ewade abarikabʉ, kʼãrẽ ẽ dayirã samabʉta Jeowabara dayirãra akʉbʉ akʉza kãga ũdubibʉ. w24.06 4 parr. 10-12

Absalón David warrabara beakĩrãbasi yi zeze Davidta mawũã iyita nokʼo bʼaita (2 Sam. 15:​12, 13). Maʉ̃ba Davidʼra mesera mĩrʉ wãibarabasi Jerusalénʼneba. Ãyi ode wãne Davidba kʼawuasi Absalónba kʼãrẽ oita krĩchabʉ kʼawuaira ãyidebema aba Jerusalénʼne baibarabasita, maʉ̃ kʼarea jẽda wãmarẽã zokʼasi Sadocta akʉza awuru saserdoterata (2 Sam. 15: 27-29). Ãya maʉ̃ oira mejãcha jʉra kʼawuabaibarabasi. Davidba nei oita krĩchabasi, maʉ̃ kʼarea Sadocʼa akʉza iyi neũdukʼawua Husáiʼa widisi kʼarebadamarẽã maʉ̃ oita (2 Sam. 15:​32-37). Husáibara krĩña ũdubisi iyira Absalónʼarebʉ kĩrãkʼa, mõbe jara ũrĩbisi kʼãrẽta oseabʉta David beaita, mamina wãrĩnubaira Husáira Davidʼarebasi. Adewara iya Absalónʼa jaradabara kʼarebabasi Davidba ewari erbamarẽã Absalónʼʉ̃me yõ wãita. Tẽã Husáiba maʉ̃ ʉ̃rʉ jara ũrĩbisi Abiatarʼa akʉza Sadocʼa (2 Sam. 17:​8-16). Aramaʉ̃ta Sadocba Abiatarʼʉ̃meba jara ũrĩbisida Davidʼa kʼarebadamarẽã iyita beada ẽ marẽã (2 Sam. 17: 21, 22). w24.07 4, 5 parr. 9, 10

Ʉ̃kʉrʉ mebẽrãba ãyi buru kʼoei nãã, mawũã ẽ bʉrʉ buru kʼoeda tẽã nemitiata osi baera, krĩchapanʉ Jeowaba ãyi nemitiara kĩrãdua ẽãta. Mamina kĩrãbedaibara Jeowabara yi warrata zokʼasita dayirã nemitiadeba ẽdrʉbita akʉza dayirãta kãgabʉ baera. Maʉ̃ kʼarea Jeowaba kãgabʉ bʉa kʼawuamarẽã iyara bʉ nemitiara kĩrãduasita. Iya dayirã jarabʉ «zera dayi bedʼea ara odaita». Maʉ̃ bedʼea ara oda tẽãra Jeowabara bʉ nemitiara jipa kĩrãduabʉ. Sobiapanʉ kʼawuapanʉ baera Jeowabara dayirãba nãã nemitia odara jipa kĩrãduabʉta. Mamina audrera mejãcha sobiapanʉ kʼawuapanʉ baera daya nãã nebia odara Jeowabara kĩrãdua ẽãta (Sal. 103:​9, 12; Heb. 6:10). Bʉa nãã nemitia oda kʼarea waidide krĩcha obʉbʉrʉ, ¿kʼãrẽba kʼarebaseabʉ? Bʉa nãã nemitia odata waidide krĩchanʉmai kaude, zarea ora krĩchaita bʉa atia kʼãrẽ obʉ ʉ̃rʉ akʉza bʉa ʉ̃ra zeide kʼãrẽ oseabʉ ʉ̃rʉ. Bʉa nãã kʼãrẽ nemitia oda ʉ̃rʉ krĩchai kaude, zarea ora krĩchaita bʉa atia kʼãrẽta oseabʉta Jeowa kʼarea akʉza krĩchara Jeowaba aranʉbai bʉaʼa kʼãrẽ nebia diaya abʉ ʉ̃rʉ. w24.10 8 parr. 8, 9

Bʉa Daizeze Bedʼea lebʉrʉdera edaʉde sopʉa baseabʉ ũdubʉ baera nekʼãrẽ mejãcha awuara oibarata. Krĩchara naʉ̃ ʉ̃rʉ: ewari aba bʉa Daizeze Bedʼea akʉnʉmʉne ũduyi jarabʉta ẽbẽra abapaiabʉrʉ kãga ũdubira biga ẽãta, awuarabʉrʉ jõmaʉ̃ta daucha kãgaibarata (Sant. 2:​1-8). Mawũã ũdubʉrʉ baera bʉara awuara oita krĩchabʉ sãwũã wuabemara bia edaita. Akʉza nrʉemane bʉa Daizeze Bedʼea lenʉmʉne ũduyi jʉra kʼawua bamarẽã jarabʉta dayi kĩrãme sãwũã zokʼabʉde (Sant. 3:​1-12). Maʉ̃ne bʉyikʉza kʼawuabʉrʉ edaʉde wuabemara imitia bedʼeabarita. Maʉ̃ba awuara oita krĩchabʉ, wuabemara bʉyi bedʼeabʉdeba so zarea diaita. Adewara maʉ̃ nrʉemane bʉa lenʉmʉne ũduyi naʉ̃ drʉadebema neũdukʼawua bʼaira kayiruata (Sant. 4:​4-12). Maʉ̃ba bʉyikʉza krĩchayi audre jʉra kʼawuabaibarata telebisorde kʼãrẽ akʉbʉde akʉza kʼãrẽ musika ũrĩbʉde. Nrʉema bʉa krĩchaseabʉ nama jõma jarabʉ aripe oira mejãcha zareabʉta. Krĩcha zroma orãra. Daya nekʼãrẽ ara oira waña ara oẽ. w24.09 5, 6 parr. 11, 12

Jesúsbara biʼia kʼawuabasi Jeowabara akʉnʉmʉta iyi sãwũã zʉbʉriabipanʉta iya oẽ bada kʼarea akʉza iya ĩjãbasi Jeowabara kʼawua oita iyi zʉbʉriabipanʉrãra. Dayirãbida Jesúsde kĩrãkʼa oseapanʉ, kʼawuabaibara awururaba daya oẽ bada kʼarea zʉbʉriabibʉrʉde kʼãrẽ oita. Bari jaraita, krĩchaseapanʉ kʼãrẽ jara ẽ baita awururaba dayi ʉ̃rʉ kʼãrẽ odata bedʼea zroma ẽ basibʉrʉ, mawũã ẽ bʉrʉ krĩchaseapanʉ chupea bʼaita audre bedʼea zroma ũdu ẽ baita (Ecl. 3:7; Sant. 1:​19, 20). Edaʉde audre yibiabayi dayirã bedʼeaita, bari jaraita dayirãba awuru zʉbʉriabipanʉ ũdubʉrʉde, mawũã ẽ bʉrʉ dayirãba ĩjãbʉare bedʼeaita nesidabʉrʉde (Hech. 6:​1, 2). Mawũãsidu dayirã bedʼeabʉrʉdera zarea oibara ibiade bedʼeaita akʉza wawia ũdubita. Dayirãbida Jesúsde kĩrãkʼa odaibara, iduaribibara jõma «Daizezeba kʼawua omarẽã» (1 Ped. 2:23). w24.11 5, 6 parr. 10, 12

Nemitia odaba jẽda krĩchabʉrʉdera, mejãchade sobiapanʉ (Luc. 15:7). Zõrãrãba nekʼãrẽ jõma obʉ yi nemitia odaba jẽda krĩchamarẽã. Mamina wãrĩnubaira, ¿kʼaiba kʼarebabʉ iya obʉta jẽda krĩchamarẽãra? Kĩrãbedaibara Pabloba jarasita Daizezeba jẽda krĩchabibʉta (2 Tim. 2:25). Wãrĩnubaira Jeowabʉrʉ kʼarebabʉ yi nemitia odaba jẽda krĩchamarẽã, mawũã mia abaʉ ẽbẽraba kʼareba ẽ. Pabloba jara ũrĩbibʉ yi nemitia odaba iya obʉ jẽda krĩchabʉrʉ tẽãra, kʼãrẽ nebia ũduita. Kʼarebabʉ Daizeze Bedʼeadebema ʉ̃rʉ audre bia kʼawuaita akʉza kʼarebabʉ audre nebiata oita, adewara wua oẽ Diaruba omarẽã kãgabʉta (2 Tim. 2:​25, 26). Nemitia odaba jẽda krĩchabʉta ũdubibʉrʉdera zõrãrãbara nekʼãrẽ jõma odayi badua akʉ wã bʼaita, mawũã iya ĩjãbʉta audre zarea erbamarẽã, adewara kʼarebadayi Diarua yi edebi ẽ marẽã akʉza kʼarebadayi nebiata omarẽã (Heb. 12:​12, 13). w24.08 23 parr. 14, 15

Ẽbẽrarã jʉ̃ẽsida Jesúsba ãyaʼa yiko diadama, mamina Jesúsʼra iyi kʼaidubemarabawara mama neẽbasi. Aramaʉ̃ta ẽbẽrarãra jãbade barida kʼãrãpe wãsida Capernaúmʼena Jesús jʉrʉde (Juan 6:​22-24). Mamina, ¿naʉ̃ra ẽbẽrarãbara jʉrʉpanasika wãrĩnu Daizeze nokʼo ʉ̃rʉ kʼawuakĩrãba? Mawũã ẽ. Ãyara jʉrʉpanasi Jesúsba ãyaʼa yikota diadamarẽã. Maʉ̃ra, ¿sãwũã kʼawuapanʉ? Akʉdaya kʼãrẽta berabarisita ẽbẽrarãba ũdusidade Jesústa Capernaúm kʼawa. Maʉ̃ne Jesúsbara ãyaʼa jarasi iyita bari jʉrʉ zebʉdata yiko koya. Jesúsba ãyaʼa jarasi ãya yiko jʉrʉbʉra ewari jõmaʉ̃nẽ ba ẽ baibasita. Maʉ̃ kʼarea jarasi jʉrʉdamarẽã yiko ewari jõmaʉ̃nẽ babiseabʉta (Juan 6:​26, 27). Aramaʉ̃ne Jesúsba jarasi Jeowaba diaibasita maʉ̃ yiko. w24.12 5 parr. 8, 9

Zõrãrãba diskurso diabʉrʉde Daizeze Bedʼeadeba jaradiaibara akʉza wuabemara ũrãgʼa diabʉrʉde Daizeze Bedʼeadeba jaradiaibara. Maʉ̃itara biʼia estudiaibara Daizeze Bedʼeaba jaradiabʉta akʉza dayirã kartaraba jarabʉta (Prov. 15:28). Estudiabʉrʉde bia akʉra sãwũã dayirã kartaraba testo abaʉ ʉ̃rʉ bia jara ũrĩbibʉta mawũã tẽã bʉa bia zokʼaita. Adewara zarea ora kʼarebaita ẽbẽrarãba audre kãgadamarẽã Jeowata akʉza oũdubidamarẽã Daizeze Bedʼeaba jaradiabʉde. Bʉa mawũã kʼarebaira bigabayi zõrãrãnebʉta dããraba ũrãgʼa widita akʉza iya jaradade oũdubita (1 Tim. 5:17). Zõrãrãbara mebẽrã so zarea dia kʼawuabaibara Daizeze Bedʼeadeba. Mamina mebẽrã ũrãgʼa diaibarabʉrʉ akʉza kʼẽãibarabʉrʉ, maʉ̃ra ibiade opanʉ. Zõrãrãba wuabemata ibiade edapanʉbʉbʉrʉ akʉza nejaradiabʉrʉde Daizeze Bedʼeadeba jaradiabʉbʉrʉ mawũãra nejaradiabari biabayi Jesús kĩrãkʼa (Mat. 11:​28-30; 2 Tim. 2:24). w24.11 24 parr. 16

Dayirãra Jeowa ʉ̃rʉ ibia bedʼeapanʉ iyi ʉ̃rʉ bedʼea biata jarabʉrʉde. Jeowa odepanʉra trãnaibara Jeowaʼa, iyi trʉ̃ ʉ̃rʉ ibia bedʼeadamarẽã akʉza ẽbẽrarã jaradamarẽã Jeowaba ãyi ẽdrʉbita. Adewara pʉwʉrʉra jõmaʉ̃a jaradamarẽã Jeowa zareabarabʉ ʉ̃rʉ (Sal. 96:​1-3). Naʉ̃ jõmaneba Jeowa ʉ̃rʉ ibia bedʼeaseabʉ (Hech. 4:29). Dayirãbara kʼãrẽ erbʉdeba Jeowa ʉ̃rʉ ibia bedʼeabipanʉ. Kristianora wãrĩnuarabara maʉ̃ opanʉne ibia bedʼeabipanʉ Jeowa ʉ̃rʉ (Prov. 3:9). Bari jaraita, nawedara israelitarabara platata diabasi, mawũã ẽ bʉrʉ ãya nekʼãrẽ bia erbʉta diapanasi templo maparãnamarẽã akʉza bia akʉdamarẽã (2 Rey. 12:​4, 5; 1 Crón. 29:​3-9). Ʉ̃kʉrʉ ẽbẽrarã Jesús kʼaidubadarabara ãya nekʼãrẽ bia erbʉta diapanasi, Jesúsʼa akʉza iyi apostolera ãya erpanamarẽã ãya nesidabʉta (Luc. 8:​1-3). Adewara Daizeze Bedʼeaba jarabʉ nããbema siglode ʉ̃kʉrʉ kristianora jarrababa zʉbʉriaside, mebẽrã awuru pʉwʉrʉdebemaba platata zokʼa bʉesita maʉ̃ra mebẽrã kʼarebaita (Hech. 11: 27-29). Idi ewade dayirãbida dayirãba nekʼãrẽ bia erbʉta zokʼaseabʉ Jeowa ʉ̃rʉ ibia bedʼeaita. w25.01 4 parr. 8; 5 parr. 11

¿Kʼãrẽba kʼarebasi Cornelio buru kʼoeita? Corneliobara yi mebẽrãbawaraʉba Daizezeʼa wawia ũdubipanasi, maʉ̃ kʼarea Corneliobara so zʉbʉria yiwidʼibasi Daizeze Jeowaʼa iyita kʼarebamarẽã (Hech. 10:2). Pedroba Daizeze Bedʼea ʉ̃rʉ jaradia jʉ̃ẽsidera Cornelioʼa, yi mebẽrãbawaraʉba ĩjãsida akʉza mesera buru kʼoesida (Hech. 10:​47, 48). Mawũẽra Corneliobara nekʼãrẽ jõma osi iya nãã nemitia obada jipa idubʉita, mawũã yi mebẽrãbawara Daizeze Jeowaba zokʼabʉde bʼaita (Jos. 24:15; Hech. 10:​24, 33). Corneliora gorogoro nokʼobasimina akʉza nekʼãrẽ bia mejãcha erbasimina maʉ̃ꞌa yi edebi ẽ basi iyi buru kʼoe ẽ baita, awuarabʉrʉ zarea osi mesera buru kʼoeita. Bʉta Jeowa ʉ̃rʉ Kʼawuabibari bakĩrãbʉbʉrʉ, zarea oibara nãã nemitia obada idubʉita, mawũã ora Jeowaba kʼarebayi iya zokʼabʉ kĩrãkʼa bamarẽã. w25.03 5 parr. 12, 13

Bʉa ũrĩra Jeowa organizasion ʉ̃rʉ akʉza Jeowa pʉwʉrʉdebema nãã edepanʉra ʉ̃rʉ imitia bedʼeabarabʉta, kĩrãbera siglo nããrabemanebida Jeowa nejʉrarabara sewa nebʉrʉta jarasidata Jesús ʉ̃rʉ akʉza iyi kʼaidupanʉra ʉ̃rʉ. Jesúsba jarasi ẽbẽrarãbara jʉradaibasita Daizeze odepanʉrãra akʉza ãyi ʉ̃rʉ sewidata jaradaibasita, maʉ̃ra idi ewade aripe berabarinʉmʉ (Mat. 5:​11, 12). Dayirãba biʼia kʼawuapanʉbʉrʉ sewidara Diarudeba zebʉta akʉza sewida jarabʉdade kʼãrẽ oita kʼawuapanʉbʉrʉ, Jeowa organizasion ʉ̃rʉ sewida jarabʉdade maʉ̃ʼa yi edebida ẽ bayi, ¿kʼãrẽta oseabʉ bʉ maʉ̃ʼa yi edebi ẽ baita? Ĩjãraidua wuabemaraba sewa nebʉrʉ jarabʉta. Pabloba jara ũrĩbisi kʼãrẽta oibarata dayirã sewa nebʉrʉ jarabʉdade. Iya Timoteoʼa jarasi wuabemara jaramarẽã awururaba sewa nebʉrʉ jarabʉta ĩjãna ẽ marẽã (1 Tim. 1:​3, 4). Dayirãbara sewa nebʉrʉ jarapanʉra ĩjãna ẽ, kʼawuapanʉ baera maʉ̃ sewidara Diarudeba zebʉta, awuarabʉrʉ ĩjãpanʉ Daizeze Bedʼeaba jarabʉtrʉ (2 Tim. 1:13). w24.04 11 parr. 16; 13 parr. 17

Jeowaʉ̃me kʼẽrẽpapanʉrabawara ãba bʼaidua. Jeowabara kãgabʉ ãba yiwidʼidamarẽã. Maʉ̃ta opanʉ jõmaʉ̃ta wãrĩnuarebʉbʉrʉ. Yi wãrĩnuneba jĩga wãbʉrʉbara obʉ kongregasionta ãba ba ẽ bamarẽã. Maʉ̃ kʼarea Daizezebara jarabʉ maʉ̃ra ẽbẽrarãneba jĩgara bamarẽã, maʉ̃ta oda ẽ bʉrʉ dayirãsida wãrĩnuneba jĩga baseabʉ (Rom. 16:17). Dayirãba kʼawuapanʉbʉrʉ saʉ̃ta wãrĩnuta akʉza maʉ̃ arepanʉbʉrʉ dayirãra biapanañi Daizezeʉ̃me, adewara dayirãba ĩjãbʉra zareabayi (Efes. 4:​15, 16). Diaruba sewida jarabʉa idu yi edebi ẽ bayi akʉza Jeowaba kʼarebayi zʉbʉria zroma zebʉrʉdera. Wãrĩnuare bara, mawũã Jeowara bʉarebayi (Filip. 4:​8, 9). w24.07 13 parr. 16, 17

Jesúsbara audre kʼarebakĩrãbasi ẽbẽrarã ãya nemitia oda kʼarea sopʉapanʉrata akʉza naʉ̃rata trʉ̃basi iyi kʼaidubema bamarẽã. Jesúsbara kʼawuabasi audrera ẽbẽrarãbara bedʼea zromata ũdupanʉta akʉza zʉbʉriapanʉta ãya kayirua oda kʼarea, maʉ̃ kʼarea Jesúsbara audrera kʼarebakĩrãbasi ẽbẽrarã ãya nemitia oda kʼarea zʉbʉriapanʉrata. Jesúsba naʉ̃ta jarasi: «Yi neneẽã panʉrabara medikoeda wãira nesida ẽ, mamina yi kayapanʉrãra medikoeda wãibara». Adewara iya jarasi iyira ze ẽ basita ẽbẽrarã nebia obe jʉrʉde, awuarabʉrʉ zesita yi kayirua opanʉra jʉrʉde (Mat. 9:​12, 13). Maʉ̃ta ũdubisi ẽbẽra wẽrã iyi jĩrʉma jẽgabada nemitia kĩrãduaside (Luc. 7:​37-50). Jesúsbara wãrĩnuta jaradiasi ẽbẽra wẽrã samaritanaʼa kʼawuabasimina naʉ̃ ẽbẽra wẽrãra iyi kima araʉ̃mebʉ ẽãta (Juan 4:​7, 17-19, 25, 26). Dayirãra nemitia omia kʼarea beipanʉ, maʉ̃ba Jeowaba Jesúsʼa zareata diasi wẽrãrata, yumakẽrãrata akʉza wũãwũãrata jẽda piradrʉbimarẽã (Mat. 11:5). w24.08 4 parr. 9, 10

¿Jeowabara sãwũã neneẽã babi iyi trʉ̃ra aranʉ bʼaira? Maʉ̃itara Jeowabara iya kʼawua obʉrʉde jõma daucha kʼawua oyi. Bari jaraita, aranʉbai Jeowaba jõbiyi Babilonia Zromata, maʉ̃ba iyi trʉ̃ ʉ̃rʉ mejãcha imitia bedʼeabisi baera (Apoc. 17:​5, 16; 19:​1, 2). Ẽbẽrarãba ũdubʉdade religion zeri ẽãra jõma jõbibʉta, ãya krĩchaseabʉ Jeowa pʉwʉrʉeda zeita. Maʉ̃ tẽãra Armagedón zebʉrʉde Jeowaba jipa jõbiyi Diaruba atia sãwũã zokʼabʉra, naʉ̃ drʉade nekʼãrẽ mitiabʉra wua neẽbayi. Adewara ẽbẽrarã Jeowa trʉ̃ ʉ̃rʉ imitia bedʼeapanʉrãra akʉza iyi jʉrapanʉrãra Jeowabara makenañi. Mõbe ẽdrʉbiyi yi ẽbẽrarã iyi kãgapanʉrata, iya zokʼabʉ opanʉrata akʉza iyi ʉ̃rʉ ibia bedʼeapanʉrata (Mar. 8:38; 2 Tes. 1:​6-10). Jesúsba mil poagabayeda zokʼabʉta berabarida tẽã akʉza Diaru ʉ̃tʉ zedata jõbʉrʉ tẽã Jeowa trʉ̃ra maʉ̃nebʉrʉ jipa neneẽãbayi (Apoc. 20:​7-10). Maʉ̃ ewaridera ẽbẽrarã naʉ̃ drʉa jõmanebemaba kʼawuadayi Jeowa kʼãrẽaba yi zromata akʉza iyi ʉ̃rʉ ibia bedʼeadayi (Hab. 2:14). Kʼãrẽ bia bai ẽjũã kĩrãwãreãnẽ jõmaʉ̃ba Jeowa trʉ̃ ʉ̃rʉ ibia bedʼeadaita. w25.01 7 parr. 15, 16

¿Kʼãrẽba kʼarebaibasi kristianorãra ãya bedʼea zroma erbʉ awuantaita? Pablobara jarasi Jeowabara iduaribibʉta kristianorãra mawũã pẽwãnamarẽã jaradiaita ãya bedʼea zroma ũdubʉrʉde kʼãrẽta oibarata. Naʉ̃ba kʼarebaibasi kristianoraba ãyi sode nebia erbʉta audre bia oũdubidamarẽã Jeowaba kãgabʉ kĩrãkʼa. Kristianora ebreoraba krĩchasida baera ãya mawũã awuantabʉ kʼarea kʼãrẽ nebia ũduita, maʉ̃ba ãyitara zare ẽ basi bedʼea zroma erpanʉra awuantaita (Heb. 12:11). Pablobara wuabema kristianora so zarea diasi ãyi pẽwãbʉdade zarea panamarẽã akʉza mapaeda ẽ marẽã. Pablobara nããra kristianorãra pẽwãbasi baera kʼawuabasi kʼãrẽaba zʉbʉriabipanʉta kristianora pẽwãbʉdadera. Adewara Pablobara bia kʼawuabasi sãwũã awuantaita pẽwãbʉdadera, iyita maʉ̃ne berabarisi baera, kristiano bada tẽãra iyira pẽwã jʉ̃drʉsida (2 Cor. 11:​23-25). w24.09 12, 13 parr. 16, 17

Ewari berabari wãbʉrʉza audre jaradiaibara, ¿kʼãrẽa? Ewari jõita kʼaita ba baera, akʉdayi Jesúsba kʼãrẽta jarasita Marcos 13:10de Daizeze bedʼea jaradia wãi ʉ̃rʉ ewari jõbodoare. Mateoba bʉdadera Jesúsba jarasi Daizeze Bedʼeata naʉ̃ drʉa jõmaʉ̃nẽ jaradiadaita ewari jõi nãã (Mat. 24:14). Bedʼea ewari jõi abʉba jarakĩrãbʉ naʉ̃ drʉade jõma Diaruba zokʼabʉ jõi ewarita, Jeowaba jidasi kʼãrẽ ewaride akʉza kʼãrẽ ũmadaʉde mawũã oira (Mat. 24:36; Hech. 1:7). Ewari berabari wãbʉrʉza maʉ̃ ewari kʼawapanʉ (Rom. 13:11). Maʉ̃ ewari zeyeda jaradia takeraibara. Dayikʉzaʉba naʉ̃ta krĩchaibara, ¿kʼãrẽa jaradiapanʉ bedʼea bia Daizeze Nokʼodebemara? Daizeze bedʼeara jaradiapanʉ kãgaba. Daizeze Bedʼeara jaradia wãpanʉ bedʼea biata kãga baera, jaradia wãpanʉ wuabemarata kãga baera, jaradia wãpanʉ Jeowata akʉza iyi trʉ̃ta kãgapanʉ baera. w24.05 14, 15 parr. 2, 3

Yibarirabara kʼarebaidua mara wũãwũãraba akʉdamarẽã nekʼãrẽ naʉ̃ drʉadebʉta. Mara wũãwũãrabawara oide wãne kʼarebaidua mara wũãwũãba ũdumarẽã Jeowaba naʉ̃ drʉa sãwũã parãnata. Mõbe kʼarebara bʉ wũãwũãba ũrĩmarẽã maʉ̃ nekʼãrẽ parãnara jipa buru biata. Bari jaraita, nekʼãrẽ mejãcha naʉ̃ drʉadebʉra bʉrrʉbʉrrʉabʉ. Sientipikorabara maʉ̃ ʉ̃rʉ mejãcha estudiapanʉ. Nicola Fameliba jarasi maʉ̃ nekʼãrẽ bʉrrʉbʉrrʉabʉra juachaseabʉta, maʉ̃ juachaira trʉ̃gapanʉ sucesíon de Fibonacci. Maʉ̃ bʉrrʉbʉrrʉachura ũduseabʉ korogo dede, ʉ̃kʉrʉ chiruade, nepono girasolde, galasiade akʉza nekʼãrẽ awurude. w24.12 16 parr. 7

Moisés, David akʉza Juan ewarira jipa awuarabʉ dayirã ewarira akʉza ãyi sãwũã berabaridasida awuarabʉ. Mawũãsidu bʉ nekʼãrẽne abarikabʉta. ¿Kʼãrẽne? Naʉ̃ra yumakẽrãraba opanasi Jeowaba zokʼabʉta dayirãbida abarika opanʉ. Dayirãra Jeowaʼa yiwidʼipanʉ, Jeowa ʉ̃rʉ ĩjãpanʉ, adewara jʉrʉpanʉ iyi kʼarebata. Naʉ̃ra yumakẽrãrane kĩrãkʼa dayirãbida ĩjãpanʉ Jeowabara kʼarebabʉta iyi bedʼea ũrĩpanʉra. Mawũẽra naʉ̃ra yumakẽrãraba jaradata ũrĩnaibara, Jeowaba zokʼabʉta aripe odaibara. Dayirãba ũrĩnara ewari jõmaʉ̃nẽ bia wãñi akʉza ewari biobayeda panañi. Adewara dayirã Zeze Jeowata mejãcha sobiabidayi. Iya nebiata mejãcha diayi dayirãba krĩcha ẽ badata (Efes. 3:20). w24.11 13 parr. 20, 21

Nããbema siglodera ʉ̃kʉrʉ mebẽrãra zõrãrãra kʼarebabari babipanasi (1 Tim. 3:8). Apostol Pabloba jarasi yumakẽrãra wuabema kʼarebabari ʉ̃rʉ, maʉ̃bara jarakĩrãkʉasibaibara ẽbẽrarã zõrãrã kʼarebabarirata. Naʉ̃ra yumakẽrãrabara biode kʼarebabasi zõrãrãta, naʉ̃ba kʼarebabasi zõrãrãba ewari erbamarẽã wuabemara jaradiaita akʉza mebẽrãta akʉdamarẽã so zarea diadaita. Mawũẽra naʉ̃ra zõrãrã kʼarebabarirabara kʼarebabasibaibara Daizeze Bedʼeadebema kopia oita, maʉ̃ta neẽbʉrʉ maʉ̃ kopia oita nekʼãrẽ nesidabʉ edadaita. Idi ewadera, ¿kʼãrẽta opanʉ zõrãrã kʼarebabarirabara? (1 Ped. 4:10). Naʉ̃ra yumakẽrãrabara kʼarebapanʉ naʉ̃ne: kongregasione platabʉ bia zokʼaita, akʉbʉ kongregasionba sama jaradia wãita, kartara kongregasionebemata akʉbʉ, bideorata akʉza audiorata bʉebʉ, ʉ̃kʉrʉra akomodadordebʉ, mawũã ẽ bʉrʉ salon ara oita kʼarebabʉ. Mawũã naʉ̃rabara kʼarebabʉ kongregasione jõma bia wãmarẽã (1 Cor. 14:40). w24.10 19 parr. 4, 5

Dayirãba kĩrãbepanʉbʉrʉ Jeowara wãrĩnu zokʼaibʉta akʉza iya kʼarebakĩrãbʉta, badu bedʼea zroma zebʉrʉde awuantadayi. Daizezebara nekʼãrẽ jõma oseabʉ baera iya dayirã diayi zareata badu bedʼea zroma awuantadamarẽã. Maʉ̃ kʼarea bedʼea zroma ũdubʉrʉde aduʼa baseapanʉ. Mawũẽra, Jeowaba kʼãwũã nekʼãrẽ wikade kʼarebabʉbʉrʉ nekʼãrẽ bedʼea zromanebida kʼarebaseabʉ. Nokʼo Davidbara mejãcha ĩjãbʉta ũdubisi Jeowade. Akʉdaya kʼãrẽa mawũã ũdubisita. Ewari aba iya yi zeze obejarata akʉbasi, maʉ̃ta imamata ze kʼãrãpe aba edesi. Maʉ̃ tẽã awuru ewaride zesi wuita, maʉ̃bida iyaba edesi obeja aba. Maʉ̃nera Davidbara pera ẽã kʼaidu pẽwã wãsi, mawũã maʉ̃ra obejara kʼarebaita. Davidbara bia kʼawuabasi Jeowa kʼarebadeba mawũã zarea erbasita, maʉ̃ kʼarea jara ẽ basi iyi zareadeba odata (1 Sam. 17:​34-37). Maʉ̃ ʉ̃rʉ bia krĩchadaba audre ĩjãbisi Jeowabara iyira kʼarebaita ʉ̃ra zeidebida. w24.06 21 parr. 5, 6

Bari jaraita, bʉta piesta eda wãmarẽã jaradara maʉ̃nera bʉara, ¿kʼãrẽta oi? Maʉ̃ piesta kʼaiba onʉmʉta kʼawua ẽ bʉrʉ akʉza kʼãrẽta oita bia kʼawua ẽ bʉrʉ, widiseabʉ: ¿Sama akʉza sõbede odai maʉ̃ piestara? ¿Mawũã ẽ bʉrʉ ẽbẽrarã sõbe jʉ̃ẽi maʉ̃ piesta edara? ¿Kʼaiba akʉi mama jʉ̃ẽbʉrʉdera? ¿Kʼairata wãita mamara? ¿Kʼãrẽta odai? akʉza ¿mamara itua diabara bꞌaika? Maʉ̃ra bedʼea panʉbʉba mejãcha kʼarebayi bʉa kʼawuaita kʼãrẽta oita. Bʉa naʉ̃ra widibʉrʉdera, kʼawuadogo kʼãrẽta okĩrãbʉ ʉ̃rʉ. Mamina atiara yibiabayi krĩchaita kʼãrẽta berabariseabʉta bʉa maʉ̃ta oita jidara. Bari jaraita, maʉ̃ piesta eda wãra ẽbẽrarã Jeowa odepanʉ ẽãta, Jeowa wawia ũdubi ẽãta, mawũã ẽ bʉrʉ mama ituata diadara, mamina kʼaiba kʼãrẽaba doibara jara ẽ bʉrʉ, mawũã ẽ bʉrʉ kʼaiba akʉita neẽbʉrʉ, ¿kʼãrẽta oi? (1 Ped. 4:3). Bʉa naʉ̃ ʉ̃rʉ krĩchabʉrʉde kʼawuadogo kʼãrẽta oseabʉta. w25.01 15 parr. 4, 5

Akʉdayi yizarata, mawũã audre bia ũrĩnaita Jeowaba sãwũã jipa ãĩ bʉebʉta dayirã nemitia yi Warra dayirãbari beimarẽã zokʼaside. Kolor purru eskarlata mawũã ẽ bʉrʉ kolor purru karmesi ʉrabʉeira jipade zare. Jeowaba naʉ̃ yizata zokʼabʉ mawũã dayirã kʼawuabita iya dayirã nemitiara jipa kĩrãduabʉta. Dayirã nemitiara debe kĩrãkʼabʉ (Mat. 18:​32-35). Dayirãba nemitia obʉrʉdera dayima Jeowaʉ̃me debe barabʉ kĩrãkʼabʉ, mamina Jeowaba dayirã nemitia kĩrãduabʉrʉdera maʉ̃ debe jõma ãĩ bʉebʉrʉ kĩrãkʼabʉ, adewara Jeowabara jʉ̃ã ẽ iya dayirã debe kĩrãduasimina dayirãba pagamarẽã maʉ̃ta. Sobiapanʉ kʼawuapanʉ baera Jeowaba dayirã nemitia jipa kĩrãduabʉta. w25.02 10 parr. 9, 10

Yibarira zõnababʉrʉdera naʉ̃rabara nesidayi ãyi wũãwũãraba kʼarebadamarẽã ãya nekʼãrẽ nesidabʉde akʉza platade. Maʉ̃nera naʉ̃ra wũãwũãrabara ãyi yibarirãra kʼarebakĩrãne kʼarebadayi ãya nesidabʉde (1 Tim. 5:4). Mamina yibarira Jeowa odepanʉrabara biʼia kʼawuapanʉ ãyira audre sobia pana ẽ baita ãyi wũãwũãra bari dapʉẽbʉdade, yi zroma babʉrʉde ãyitaʼa plata ganamarẽã, mawũã ãyi zõna babʉrʉde bia akʉita. Awuarabʉrʉ kʼawuapanʉ ãyira audre sobia bʼaita ãyi wũãwũãra dapʉẽbʉdade Jeowa ode kʼẽrẽpa bamarẽã (3 Juan 4). Bʉ wũãwũã wiñabʉeda jaradiara traja kʼawuamarẽã akʉza jaradiara kʼãrẽaba yibiata zarea trajaita akʉza bʉa obʉdeba ũdubira Jeowa ʉ̃rʉ ĩjãbʉta mawũã iyi yi zroma babʉrʉde abarika omarẽã (Prov. 29:21; Efes. 4:28). Wũãwũã wiñabʉiduba yibarirabara kʼarebaibara ãya oseabʉta odamarẽã kolegiode bia wãita, adewara yibarirabara kʼarebaibara jʉrʉdamarẽã dayirã kartarane Jeowaba kʼãrẽta krĩchabʉta, mawũã wũãwũãraba bia jidadamarẽã kʼãrẽta estudiakĩrãbʉta. Wãrĩnubaira, yibarirabara kʼarebaibara ãyi wũãwũãraba ũdumarẽã trajo ãya nesida diabʉta akʉza iduaribibʉta jaradia wãita, mawũã ẽ bʉrʉ yi nãã edebari bʼaita. w25.03 30, 31 parr. 15, 16

Isaías yi zroma 65de Jeowaba jara ũrĩbisi ẽbẽrarã maʉ̃ ẽjũã kĩrãwãreãnẽ panairãra sãwũã bʼaibasita. Mama bedʼea jarabʉra nekʼãrẽ ũmene aripe berabaribasi. Yi nããrabemara aripe berabarisi poaga 537de. Naʉ̃ ewaridera judiora kayirua odapeadara jẽda krĩchadara Babilonianeba ẽdrʉbisida akʉza ãyira jẽda wãsi ãyi drʉaeda. Jeowabara nebiata diasi iyi pʉwʉrʉara akʉza kʼarebasi ãya Jerusalénʼnebema templota audre biʼia ara odamarẽã, mawũã iyaʼa yiwidʼidaita mamaʉ̃ba (Is. 51:11; Zac. 8:3). Isaíasba propesia jaradara akʉza aripe berabarisi poaga 1919de, dayirã ewaride. Naʉ̃ ewaridera Jeowa odepanʉrabara idubʉsida Babilonia zromane edapanʉta. Maʉ̃ tẽã naʉ̃ ẽjũã kĩrãwãreã jauredebemara audre eaba wãsi. Daizeze Nokʼo ʉ̃rʉ jaradiapanʉra kongregasionʼrata audre eaba wãsida akʉza ãya maʉ̃neba nebiata ũdusida. Ẽbẽrarã yõmiabadaraba, kĩrʉmiabadaraba maʉ̃ta idubʉ kʼãrãpe nebiata ũdubisida kristianone kĩrãkʼa. w24.04 20, 21 parr. 3, 4

Ʉ̃kʉrʉ drʉadera yibariraba mawũã ẽ bʉrʉ awuru zõrãrã ãyi mebẽrãnebemaba kima jʉrʉbʉ yi doba panʉraita. Adewara awuru drʉade yi mebẽrãba mawũã ẽ bʉrʉ yi neũdukʼawuaraba jʉrʉbʉ saʉ̃ta kima bia ba zeseabʉta yi dobabʉita. Mõbe ãya jʉrʉbʉ sãwũã yumakẽrã dobabʉta yi yuwẽrã dobabʉme yi ũdumarẽã, ãya kʼawuadamarẽã maʉ̃ne yi bedʼea jʉ̃drʉseabʉ kʼawuaita. Bʉaʼa jaradara bʉ neũdukʼawuaita kima biata jʉrʉmarẽã, bʉara bia krĩchaibara bʉ neũdukʼawuaba akʉza yi ababema ẽbẽraba kʼãrẽta nesidabʉta akʉza kʼãrẽta kãgabʉta. Maʉ̃ne bʉa ũdura ẽbẽra aba bʉ neũdukʼawuaita kima bia ba zeseabʉta, ũdukʼawuara maʉ̃ ẽbẽra sãwũãchuta akʉza akʉra maʉ̃ ẽbẽrarã Jeowa neũdukʼawua bia kʼawuaita. Wãrĩnu bʼaira, audre yibia Jeowa neũdukʼawua bʼaita plata mejãcha erbaira, estudio bia erbaira akʉza nebia mejãcha erbaira. Mawũãsidu kĩrãbedaibara yi yumakẽrã dobabʉbʉrʉ akʉza yuwẽrã dobabʉbʉrʉ kʼawua jidaita iyira maʉ̃ ẽbẽraʉ̃me juwa jidakĩrãbʉ kʼawuaita. w24.05 23 parr. 11

Yi bedʼeapanʉrãra dayirãbara kʼarebaseabʉ bia krĩcha kʼãrãpe ãyaʼa kʼãrẽ jarabʉrʉde. Edaʉde bigabayi daya kʼãrẽ jara ẽ baita, mawũã oira bigabayi dayi kakua bia zokʼaita (Prov. 12:18). Dayirãba kʼawuabʉrʉde ẽbẽra ũme yi bedʼeapanʉta edaʉde dayirãbara wuabema ẽbẽrarã jarakĩrãbʉ maʉ̃ta, mamina yibiabayi mawũã oẽ baita iduaribidaibara ãyareba jaradamarẽã, adewara wuabemara ãyi ʉ̃rʉ imitia bedʼea ẽ baibara akʉza sewa nebʉrata jara ẽ baibara (Prov. 20:19; Rom. 14:10; 1 Tes. 4:11). Akʉza bʉa kʼãrẽ jarabʉdeba, adewara kʼãrẽ widibʉdeba krĩchabirãra yi ʉ̃rabʉrʉ bedʼeapanʉra ãyira juwa jidaibarata. Ʉ̃rabʉrʉ yi bedʼeapanʉta wua yi bedʼeada ẽ bʉrʉ, maʉ̃ kʼarea ãyaʼa widida ẽ baibara kʼãrẽa yi idubʉsidata, mawũã ẽ bʉrʉ jara ẽ baibara abaʉdebemaba aña osi baera mawũã berabarisita (1 Ped. 4:15). Ʉ̃rabʉrʉ yi bedʼeapanʉnebemata wua yi bedʼeada ẽ bʉrʉ, maʉ̃ kʼarea krĩchabeda ẽ dayirãbara ãyara bia krĩcha kʼãrãpe yi bedʼea jʉ̃drʉda ẽ basita, awuarabʉrʉ kĩrãbedaibara ʉ̃rabʉrʉ yi bedʼeabʉbara kʼarebabʉta mebẽrãba kʼawuaita maʉ̃ ẽbẽrãʉ̃me juwa jidaita, mawũã ẽ bʉrʉ juwa jida ẽãta. Mawũã yi bedʼeapanʉnebemata wua bedʼeada ẽãnera naʉ̃ba ãyira mejãcha sopʉabiseabʉ, maʉ̃ kʼarea dayirãbara jʉrʉdaibara ãyi sãwũã kʼarebadaita. w24.05 31 parr. 15, 16

Dayirã mebẽrãnebema abaʉta mawũã ẽ bʉrʉ dayi neũdukʼawuata Jeowadeba jĩga wãbʉrʉdera, maʉ̃ra jipade pʉ (Sal. 78:40). Dayirãba maʉ̃ ẽbẽrata mejãcha kãgabasibʉrʉ, mawũãra audre pʉbayi dayirãitara. Bʉta mawũã berabaribaribʉrʉ kĩrãbera Sadoc yizaba kʼarebaseabʉta. David beibodoare Abiatarba ũdubisi iyira Davidʼarebʉ ẽãta, mawũãsidu Sadocʼra Jeoware kʼẽrẽpabasi. Davidʼra zõnabasi baera beibodobasi, maʉ̃ne yi warra Adoníasba yi zeze bari zokʼakĩrãbasi, iya kʼawuabasimina Jeowaba Salomónta jidasita nokʼo bamarẽã (1 Crón. 22: 9, 10). Abiatarʼra Adonías arebasi (1 Rey. 1:​5-8). Iyi mawũãbʉrʉba Abiatarbara ũdubisi David are akʉza Sadoc are ba ẽ basita akʉza mia Jeoware ba ẽ basita. Abiatarʼra Sadocʼʉ̃mera poagara mejãcha ãba trajasida saserdotede Jeowaita (2 Sam. 8:17; 15:29; 19:​11-14). w24.07 6 parr. 14, 15

Jipade yibia dayirãra ewari jõmaʉ̃nẽ jʉra kʼawuapanaita, dayirãba nekʼãrẽ aña obʉrʉdera atia eda sobiabʉ, mamina dayirãba Jeowaba nekʼãrẽ omarẽã zokʼabʉta opanʉbʉrʉ mawũãra ewari jõmaʉ̃nẽ wãrĩnu sobiapanañi (Heb. 11:25; Sal. 19:8). Wãrĩnubaira dayirãra parãsida ewari jõmaʉ̃nẽ Jeowaba kãgabʉta oita (Gén. 1:27). Dayirãba maʉ̃ta opanʉbʉrʉ dayirã krĩchara aduʼabayi akʉza ewari jõmaʉ̃nẽ sobiapanañi (1 Tim. 6:12; 2 Tim. 1:3; Jud. 20, 21). Wãrĩnubaira kakuabara obe ẽ (Mat. 26:41). Mamina maʉ̃ba jarakĩrãbʉ ẽ dayirãra yi kayirua yi edebibarata Jeowata dayirã kʼawabʉ baera dayirã kʼarebaita (2 Cor. 4:7). Wãrĩnubaira dayirãba zarea nesidabʉrʉdera maʉ̃ zareara Jeowaba diabʉ, mawũãsidu dayirãsida zarea oibara ewari jõmaʉ̃nẽ maʉ̃ kayirua yi edebi ẽ baita. Dayirãba Jeowa kʼareba widibʉrʉdera iya diaita dayirãba nesidabʉra (1 Cor. 10:13). Dayirãra Jeowa kʼarebadeba ewari jõmaʉ̃nẽ jʉra kʼawua baseapanʉ yi kayirua yi edebi ẽ baita. w24.07 19 parr. 19-21

Apostol Pabloba jarasi idibema testode jarabʉta Timoteoʼa, iyisida zõrãrã kongregasionebemabasi, nemitia odara wuabemara kĩrãbita kʼẽãmarẽã. ¿Naʉ̃ba jarakĩrãbasika nemitia odara kongregasionba akʉbarabʉ kĩrãbita kʼẽãnaibarabasita? Mawũã ẽ. Awuarabʉrʉ yi ẽbẽra nemitia oda kʼawuabʉa jaraibarabasi. Bari jaraita, yi ũduda akʉza yi nemitia odaba jarada ẽbẽra. Zõrãrãbara maʉ̃rabʉrʉ jaraseabʉ yi nemitia odaʉ̃me bedʼeasita akʉza kʼẽãsidata iya oda kʼarea. Edaʉde kongregasionebema mejãchaʉba kʼawuapanʉ kʼaiba nemitia osita. Mawũã mejãchaʉba kʼawuapanʉnera, zõrãrãnebema abaʉba kongregasione platapormaneba jarabʉ yi nemitia odara kʼẽãsidata. ¿Kʼãrẽa mawũã opanʉ? Pabloba jarasi mawũã obʉrʉba kʼarebabʉta kongregasionebemata jʉra kʼawua panamarẽã akʉza iyabaʉ nemitiata oda ẽ marẽã. w24.08 23, 24 parr. 16, 17

Zarea odaibarata Jeowaba zokʼabʉta opanaita iya naʉ̃ ewari jõbiyeda akʉza kristianora ʉ̃ta wãirãra urumapanaibaramawũã Jesúsba ãya nebia jʉ̃ãbʉta diamarẽã (Mat. 24:40). Naʉ̃ra kristianorabara sobiade jʉ̃ãpanʉ ãyi ãba jʉreda kʼãrãpe ʉ̃ta wãita. Armagedón berabarida tẽãra naʉ̃ra kristianora ʉ̃ta wãbʉrʉra Jesús nobiabayi (2 Tes. 2:1). Jesúsba kʼawua oi ewari arakʼaitabamina, dayirãra kʼãrẽ kʼarea peraira neẽ, awuarabʉrʉ kʼẽrẽpabʉta ũdubidara Daizeze Jeowabara iyi zareata diayi. Mawũã yumakẽrã warra kĩrãbita panamarẽã (2 Cor. 4:7; Luc 21:36). Dayirã ʉ̃tʉ bʼaita, mawũã ẽ bʉrʉ nama egorode bʼaita, dayirãta zarea opanʉbʉrʉ Jesúsba jara amaenata ũrĩnaita, mawũãra Jeowata sobiabidayi. Jeowaba iyareba dayirãta so zʉbʉria akʉbʉ baera, dayirã trʉ̃ra bebʉ librode eda bʉyi (Dan. 12:1; Apoc. 3:5). w24.09 25 parr. 19, 20

Bʉta aduʼa bakĩrãbʉbʉrʉ, ¿kʼãrẽta oseabʉ? Krĩchara bʉa atia kʼãrẽ nebia erbʉta akʉza Jeowaba bʉra atiara sãwũã bia akʉbʉta. Krĩchara ẽbẽrarã idi ewadebemabara atiaedara nebiata erbʉ kĩrãkʼabʉ, mamina ʉ̃ra zeidera naʉ̃ra ẽbẽrarãbara kʼãrẽ nebia jʉ̃ãpanʉ ẽ. Mamina Jeowabara atiara bʉara nebia mejãcha diabʉ. Mamina naʉ̃ nebiara bari idibʉrʉ diabʉ ẽ Jeowabara, awuarabʉrʉ ʉ̃ra zeidera bʉa jʉ̃a ẽ bada nebiaidu diayi Jeowabara (Sal. 145:16). Wãrĩnubaira bʉara biʼia kʼawua ẽ nekʼãrẽ naʉ̃ drʉadebemata oita jidasibʉrʉ bʉra atiara sãwũãbakasita, audre biabakasita, mawũã ẽ bʉrʉ audre mitiabakasita. Mamina naʉ̃ta biʼia kʼawuabara, bʉa nekʼãrẽ oita jidabʉrʉde Jeowa kãgaba akʉza ẽbẽra kãgaba nekʼãrẽ obʉbʉrʉ mawũãra erbayi nekʼãrẽ bʉ sobiabibʉta. w24.10 27 parr. 12, 13