Junio

Jesús dayirã kʼarea beidadeba nebiata ũdupanʉ atiabida, ¿saʉ̃ maʉ̃ra? Atiara Jeowabara dayirã nemitiara kĩrãduabʉ, mamina iya maʉ̃ nemitiara kĩrãduabʉ wãrĩnu kĩrãduakĩrãbʉ baera, soiduba okĩrãbʉ baera ajuerzade oẽ (Sal. 103:​3, 10-13). Dayirãnebema ʉ̃kʉrʉba krĩchabʉ Jeowabara dayirã nemitiara kʼãrẽa kĩrãduaira neẽãta, wãrĩnubaira Jeowabara neẽ dayirã nemitia kʼarea kĩrãduaira. Apostol Pabloba jarasi iyira kʼãrẽ kʼarea apostol trʉ̃gadaira neẽbasita, awuarabʉrʉ Jeowaba iyita so zʉbʉria akʉsi baera mawũãbʉta iyira (1 Cor. 15:​9, 10). Dayirãba nemitia obʉrʉde maʉ̃ kʼarea jẽda krĩchabʉrʉdera Jeowabara kĩrãduabʉ dayirã nemitiara mamina, ¿kʼãrẽa kĩrãduabʉ Jeowabara? Iyara dayirã nemitiara kĩrãduabʉ dayirãta mejãcha kãgabʉ baera, iyara mawũã obʉ ẽ iya mawũã oibara baera, maʉ̃ba bʉta bʉa nemitia oda kʼarea krĩcha obʉbʉrʉ akʉza krĩchabʉbʉrʉ Jeowaba kĩrãdua ẽãta, kĩrãbera Jeowabara yi Warrata diasita dayirãbari beita akʉza kĩrãbeibara Jeowabara yi Warrara beibisita ẽbẽrarã nemitia opanʉra kʼarea, maʉ̃rata jẽda krĩchadara kĩrãduayi iyara (Luc. 5:32; 1 Tim. 1:15). w25.01 26, 27 parr. 3, 4

Wuabemaraba kʼãrẽ jarabʉra mawũã ẽ bʉrʉ kʼãrẽ obʉra dayirãnebʉ ẽ, mamina dayirãnebʉ ãya kʼãrẽ obʉta kĩrãduaita, mawũã ẽ bʉrʉ kĩrãdua ẽ baita. Wãrĩnubaira audre bigabayi kĩrãduaita ãya kʼãrẽ aña odara, ¿kʼarea? Jeowata kãgapanʉ baera akʉza Jeowaba kãgabʉ baera dayirãba kĩrãduamarẽã awuruba aña odara, adewara dayirãba kĩrãduada ẽ bʉrʉ nekʼãrẽ aña oseapanʉ akʉza dayisida kayaseabʉ (Prov. 14:​17, 29, 30). Awuruba aña oda kʼarea dayita kĩrʉ kiki kʼawua ẽ bʉrʉ, naʉ̃ba kʼarebabʉ dayi sode aduʼa bʼaita, adewara naʉ̃ra dayirãita nekʼãrẽ bia, nãã bada kĩrãkʼa aduʼa sobia babibʉ baera. ¿Kʼãrẽta oibara ewari jõmaʉ̃nẽ sopʉa ba ẽ baita? Ewari berabaribibara. Krĩchadaya ẽbẽra asidentada ʉ̃rʉ, iyira maʉ̃ kʼarea medikoeda wãbʉrʉdera aramaʉ̃ta mesera be toto ẽ, awuarabʉrʉ iyara ewari berabaribibara mawũã bemarẽã. Maʉ̃ kĩrãkʼa dayirã sopʉabʉra mesera taʉ toto ẽ, awuarabʉrʉ idu ewari berabaribibara pʉabʉ taʉbita. Maʉ̃ba kʼarebayi dayirãba kĩrãduayawa bʼaita (Ecl. 3:3; 1 Ped. 1:22). Dayirãbara Jeowaʼa widiseapanʉ kʼarebamarẽã dayirãbida iyide kĩrãkʼa kĩrãdua kʼawua bꞌaita. w25.02 16, 17 parr. 8-11

Bari jaraita, dayirãba nãã kʼawuadara naʉ̃ra, dayirãba nemitia oda kʼarea jẽda krĩchaita, ĩjãita, buru kʼoeita akʉza beidara jẽda piradrʉi ʉ̃rʉ kʼawuadata (Heb. 6:​1, 2). Kristianorabara nããra maʉ̃ ʉ̃rʉ kʼawuapanʉ, maʉ̃ kʼarea Pedroba Pentecostés ewaride ẽbẽrarã maʉ̃ ʉ̃rʉ jaradiasi (Hech. 2:​32-35, 38). Kristiano bʼaira maʉ̃ ʉ̃rʉ ĩjãibara, bari jaraita Pabloba maʉ̃ ʉ̃rʉ jara ũrĩbisi, iya jarasi dayirãba jẽda piradrʉi ʉ̃rʉ ĩjãna ẽ bʉrʉ, Jesús kʼaidubema babe ẽãta (1 Cor. 15:​12-14). Mawũẽra dayirãba biʼia kʼawuaita Daizeze Bedʼeadebema sãwũã oita audre kʼawuakĩrãbaibara. Dayirãba kʼawuasida, bari nãã kʼawuadamaepai ameibara ẽãta, awuarabʉrʉ yiko jauredebema ʉ̃rʉ audre kʼawuaibarata, maʉ̃ba jarakĩrãbʉ bari kʼawuaibara ẽãta Jeowaba ley diabʉ ʉ̃rʉ, adewara maʉ̃ awuara kʼawuaibarata Daizeze Bedʼearadebemaba kʼãrẽta jarabʉta, mawũã kʼawuaita Jeowaba sãwũã krĩchabʉta. Maʉ̃ba dayirãba yiko jauredebemaneba nebiata ũdubikĩrãpanʉbʉrʉ, nããra biʼia kʼawuaibara maʉ̃ ʉ̃rʉ, krĩchaibara maʉ̃ ʉ̃rʉ akʉza daya kʼawuada kĩrãkʼa oũdubibara. Dayirãba mawũã opanʉbʉrʉ nekʼãrẽ oita jidabʉrʉde jidadayi nekʼãrẽ Jeowaba kãgabʉ oita. w24.04 5 parr. 12, 13

Daizezeba Jonásʼa kĩrãbebisi ẽbẽrarã Nínivedebemarabara kʼawua ẽ basita saʉ̃ta biata akʉza saʉ̃ta bia ẽãta (Jon. 1:​1, 2; 3:10; 4:​9-11). Tẽã Jesúsba maʉ̃ yizata zokʼasi jara ũrĩbita Jeowaba nekʼãrẽ aripe obʉta akʉza so zʉbʉria ũdubibʉta. Mamina, ¿kʼãrẽta jarakĩrãbʉ Jeowaba ninibitara iya kʼawua oi ewaride jẽda piradrʉbi jarabʉbara? Jesúsba jarasi ʉ̃kʉrʉra jẽda piradrʉibasita ãyi kʼawua odamarẽã (Juan 5:29). Maʉ̃nera iyara jarakĩrãbasi iya mil poagabayeda zokʼai ewarita, maʉ̃ ewaride jẽda piradrʉi baera yi bia obeta akʉza yi bia ẽã obeta (Hech. 24:15). Yi bia ẽã oberãra jẽda piradrʉdayi kʼawua odaita. Maʉ̃ mawũã berabaribʉrʉdera Jeowaba Jesúsꞌʉ̃meba akʉyi maʉ̃ra ẽbẽrarãba ãya kʼawua wãta wãrĩnu oũdubidai kʼawuaita. Nínivedebema abaʉta Jeowa yiwidʼi ẽ bʉrʉ Jeowaba kãgabʉ kĩrãkʼa, maʉ̃ ẽbẽrarã Jeowabara zokʼai babi ẽ bayi (Is. 65:20). Mamina jari ẽbẽrarã Jeoware kʼẽrẽpapanʉrãra ewari jõmaʉ̃nẽ bayi (Dan. 12:2). w24.05 5 parr. 13, 14

Jesúsbara Jeowade kĩrãkʼa wuabemara so zʉbʉria akʉbʉta ũdubisi (Juan 14:9). Jesúsba ẽbẽrarã sãwũã edadaba ũdubibʉ Jeowabara ẽbẽrarãra nemitia omiamina, mejãcha kãgata akʉza so borekea akʉbʉta, adewara kʼarebakĩrãbʉta nemitiadeba ẽdrʉita. Jesúsbara kʼarebabasi ẽbẽrarã nemita opanʉraba ãya nekʼãrẽ aña obʉta idubʉkĩrãmarẽã akʉza iyi kʼaidu bamarẽã (Luc. 5:​27, 28). Jesúsbara kʼawuabasi iyira awururabari beita. Iyara iyi kʼaidubemara badua jarabasi iyira sewadaibasita akʉza bakurude ʉ̃tʉ juwa kachi jirabʉdaibasita (Mat. 17:22; 20:​18, 19). Jesúsbara kʼawuabasi iyita beira naʉ̃ drʉade nemitiabʉra jipa jõibasita, adewara jarasi iyi beida tẽãra iyima weibasita ẽbẽrarã naʉ̃ drʉa jõmaʉ̃nẽbemata (Juan 12:32). Yi ẽbẽrarã Jesús ʉ̃rʉ ĩjãbʉta ũdubibʉratrʉ akʉza Jesús kʼaidubema babʉratrʉ, Jeowaba kãgabʉde baseabasi akʉza maʉ̃ratrʉ nemitiadeba jipa ẽdrʉseabasi (Rom. 6:​14, 18, 22; Juan 8:32). Jesúsbara zowaĩnĩgʉabʉta ũdubisi akʉza mejãcha zʉbʉriaibarabasimina diasi iyi bebʉta dayirãbari (Juan 10:​17, 18). w24.08 5 parr. 11, 12

Krĩchara bʉ sãwũã sentisita naʉ̃ra bedʼea biara ũrĩside, kʼawuaside Jeowabara bʉra kãgata, iyara kãgabʉta bʉra iyi mebẽrãnebema bamarẽã akʉza zʉbʉria naʉ̃ drʉadebʉsida jõbiyi adata, adewara bʉ mebẽrã beidasida jẽda piradrʉbita kʼawuaside (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Maʉ̃ bedʼea bia ʉ̃rʉ kʼawuaiba sobiabisi bʉra (Luc. 24:32). Bʉa kʼawua wãba sobiabasi, maʉ̃ba jaradiakĩrãbasi wuabema bʉa kʼawua wãta (naʉ̃ testoʉ̃me akʉra Jeremías 20:9). Daizeze Bedʼea dayi soidu zebʉrʉdera wuabemara jaradiakĩrãbʉ maʉ̃ ʉ̃rʉ (Luc. 6:45). Abarika sentipanʉ Jesús kʼaidubemara nããra pananaba jarada kĩrãkʼa, ãya jarasi: «Daiba ũdudapeadata akʉza ũrĩnapeadata jara ẽãranʉma ẽ bayi» (Hech. 4:20). Mejãcha kãgapanʉ wãrĩnuta, maʉ̃ kʼarea ẽbẽra bioʉꞌa jaradiakĩrãpanʉ. w24.05 15 parr. 5; 16 parr. 7

Jeowa pʉwʉrʉdebemarãra mejãchade sobiapanʉ awurura Daizeze Bedʼea jaradia wãbʉrʉdera. Ãyara maʉ̃ta opanʉ Jeowata kãgapanʉ baera akʉza kãgapanʉ baera ẽbẽrarãbida iyita ũdukʼawuadamarẽã. Mamina ʉ̃kʉrʉ mebẽrãitara Daizeze Bedʼea jaradia wãira zareabʉ, ¿kʼãrẽa? Ʉ̃kʉrʉra perapanʉ, krĩchapanʉ baera ãyara Daizeze Bedʼeara biʼia jaradiabe ẽãta. Akʉza perapanʉ awuru ẽbẽraba iyi deidu jʉ̃ẽmarẽã trʉ̃ ẽ basibʉrʉ, maʉ̃ne jʉ̃ẽ totoita. Adewara ʉ̃kʉrʉra perabʉ Daizeze Bedʼea iya jaradiabʉrʉde awuruba ũrĩkĩrã ẽ bai kʼarea. Mawũã ẽ bʉrʉ ʉ̃kʉrʉara jaradiasida awuru ẽbẽrarãʉ̃me yõ jʉrʉ ẽ marẽã. Maʉ̃ba ãyitara zareabʉ ẽbẽra ãya ũduka Daizeze Bedʼea jaradiaira. Bʉta Daizeze bedʼea jaradia wãbʉrʉde sobiabʉ ẽ bʉrʉ, maʉ̃ kʼarea krĩcha orãra. Bʉa krĩchabʉ baera bʉara biʼia oau ẽãta maʉ̃ta, naʉ̃ba ũdubibʉ eda krĩchabʉta, kãga ẽ baera awururaba bʉ ʉ̃rʉbʉrʉ audre ibia bedʼeamarẽã. Adewara ũdubibʉ bʉara kãga ẽãta awururaʉ̃me bedʼeakaita. Dayirãnebema mia abaʉba kãga ẽ bedʼea bia awurura jarabʉrʉde maʉ̃raba ũrĩkĩrã ẽ baira. Jeowabara biʼia kʼawuabʉ bʉa kʼãrẽ bedʼea zroma ũdubʉra, maʉ̃ kʼarea iya kʼarebakĩrãbʉ bʉa kʼareba nesidabʉrʉde (Is. 41:13). w24.04 14 parr. 1, 2

Bʉa Daizeze Bedʼea akʉbʉrʉde ũdura, nekʼãrẽ ara oibarata zarea ora maʉ̃ta iyabaʉ ewaride jõma ara oẽ baita. Bari jaraita, naʉ̃ta oseabʉ bʉa: kartade bʉra bʉa kʼãrẽta ara oibarata, maʉ̃ tẽã maʉ̃ranebemata aba mawũã ẽ bʉrʉ ũme jidara wiña wiñane ara owãita. Yi wuabemara idubira tẽã bꞌai awuara oita. ¿Kʼãrẽta nããra awuara oseabʉ bʉara? Nããrãra bʉara krĩchaseabʉ naʉ̃ra nekʼãrẽra bʉa awuara oibarade, saʉ̃ta bʉita audre zare ẽãta awuara ũdubita. Mawũã ẽ bʉrʉ jʉrʉseabʉ saʉ̃ta audre nesidata bʉa awuara oita. Bʉa kʼãrẽta mesera awuara oibarata ũdubʉrʉde, dayirã kartarane jʉrʉseabʉ maʉ̃ ʉ̃rʉ bedʼeabʉta. Jeowaʼa yiwidʼira, iyaʼa widira kʼarebamarẽã bʉa maʉ̃ta okĩrãita akʉza zarea diamarẽã bʉa maʉ̃ oita (Filip. 2:13). Maʉ̃ tẽã bʉa kʼawuada kĩrãkʼa oũdubira. Bʉa ũdubʉrʉde nekʼãrẽ awuara oita krĩchabada jõma aripe osita, naʉ̃ba kʼarebayi bʉa nekʼãrẽ awuruta awuara oibarade sobiade oita. Adewara nekʼãrẽ awurude awuara oibarabʉrʉ maʉ̃ oisida zare ẽ bayi. w24.09 6, 7 parr. 13, 14

Edaʉde bʉa nekʼãrẽ aña odaba awuru ẽbẽrarãta zʉbʉriabiseabʉ. Maʉ̃nera, ¿bʉara, kʼãrẽta oseabʉ? Nekʼãrẽ jõma ora naʉ̃ ẽbẽra ũdubita bʉara wãrĩnu jẽda krĩchabʉta, maʉ̃ nemitiara jẽda oẽ baita. Adewara iyaʼa widida kĩrãduamarẽã bʉa aña odata. Maʉ̃ awuara Jeowaʼa widira kʼarebamarẽã naʉ̃ mebẽã bʉa kʼãrẽ odadeba zʉbʉriadara iyi odeba ãĩ wã ẽ baita, adewara kʼarebamarẽã aduʼa bamarẽã iyi nãã bada kĩrãkʼa. Kĩrãbedaya propeta Jonásta. Jeowaba iyi Nínive eda wãmarẽã zokʼasidera, Jonásʼra aña mĩrʉ wãsi. Jeowabara iyira maʉ̃ kʼarea kʼẽãsi, maʉ̃neba Jonásba nebiata kʼawuasi (Jon. 1:​1-4, 15-17; 2:​7-10). Mawũãsidu Jeowabara krĩcha ẽ basi wua Jonásta zokʼa ẽ baita iyi propeta kĩrãkʼa, awuarabʉrʉ jẽda zokʼasi Nínive eda wãmarẽã iya nãã jaradata aripe oita. Jonásʼra iya nãã kʼãrẽ aña oda kʼarea sopʉabasimina, iduaribi ẽ basi maʉ̃ba idubimarẽã iya Jeowaba zokʼabʉ oita. Abarika dayirãbida Jonásde kĩrãkʼa kʼãrẽ aña obʉrʉdera zarea oibara maʉ̃ta jẽda oẽ baita akʉza idu Jeowa yi zokʼabidaibara iya kãgabʉ kĩrãkʼa (Jon. 3:​1-3). w24.10 9 parr. 10, 11

Jeowabara dayirã nemitiara bari kĩrãduabʉ ẽ, awuarabʉrʉ jipa jarebʉ. Maʉ̃ra debebarabʉta jipa ãĩ bʉei kĩrãkʼabʉ, maʉ̃ bia ũrĩnaita naʉ̃ ʉ̃rʉ krĩchaseapanʉ, ẽbẽra abaʉba kʼaiba debebarabʉta akʉira kartade bʉ erbʉ kʼairaba debe erbʉta. Mamina iyaʼa maʉ̃ debe pagabʉdadera iyara X bʉebʉ kʼawuaita maʉ̃ debera pagasidata, mamina naʉ̃ne Jeowaba dayirã debe jarei jarabʉbara, maʉ̃ta jarakĩrãbʉ ẽ. Maʉ̃ bia ũrĩnaita kʼawuadaya naweda kʼãrẽta opanasita kartade ne bʉita, ãyara yi tintara ãba pʉerabasi karbonta, gomata baniaena. Maʉ̃ba naʉ̃ra mesera jare bʉeseabasi, maʉ̃ kʼarea ẽbẽra abaʉba iyaʼa kʼaiba debebʉta bʉ erbasibʉrʉ akʉza maʉ̃ta wua surruakiruba jarebasibʉrʉ wua ũdu ẽ bakasi maʉ̃ kartade bʉbadara, jipa ʉra wãsi baera akʉza maʉ̃ba debe neẽbada kĩrãkʼabakasi. Mejãchade sobiapanʉ dayirãba nemitia odara Jeowabara maʉ̃ kĩrãkʼa jipa jarebʉebʉ baera (Sal. 51:9). w25.02 10 parr. 11

Ẽbẽra abaʉba dayirã ʉ̃rʉ aña krĩchabʉbʉrʉ mawũã ẽ bʉrʉ akʉza dayirãta bia eda ẽ bʉrʉ ĩjãnaibara Jeowabʉrʉ kʼawuabʉta wãrĩnu kʼãrẽta berabarisita. Dayirãba kʼawuapanʉbʉrʉ kʼãwũã zʉbʉriabʉra Jeowaba jõma jõbita, naʉ̃ba kʼarebayi dayirãba oẽ bada kʼarea zʉbʉriabipanʉmina awuantaita. Dayirãba jʉ̃ãpanʉbʉrʉ Jeowaba bedʼea zroma jõma ara oita, mawũãra dayirãra kĩrʉna ẽ bayi akʉza mia awururata jʉrada ẽ bayi. Dayirãta badua kĩrʉ kiki kʼawuabʉrʉ, naʉ̃bara nemitiata obiseabʉ akʉza Jeowadeba jĩga babiseabʉ akʉza dayi sobiasida aduabiseabʉ. Wãrĩnubaira dayirãra Jesús kĩrãkʼa nemitia oka ẽ iyara jõma aripe obasi. Edaʉde dayirãba kʼãrẽ obʉdeba, mawũã ẽ bʉrʉ kʼãrẽ jarabʉdeba nekʼãrẽ aña jaraseabʉ akʉza maʉ̃ kʼarea jẽda sopʉa baseabʉ dayirãra (Sant. 3: 2). Edaʉde awururaba zʉbʉriabida kʼarea sopʉabʉra, mesera kĩrãduaseabʉ, mamina bʉ ʉ̃kʉrʉta ẽjũã kĩrãwãreã zebʉrʉdebʉrʉ kĩrãduaseabʉta. Bʉta maʉ̃ne berabaribʉbʉrʉ, kĩrãbera Jeowabara bia kʼawuabʉta bʉ kʼãrẽne berabarinʉmʉra akʉza kĩrãbera Jesús nama egorode basidebida iyira zʉbʉriabisidata, maʉ̃ba iyara biʼia kʼawuabʉ bʉ sãwũã sentibʉra (Heb. 4:​15, 16). Dayirãra sobiapanʉ Jeowaba iyi Bedʼeade ũrãgʼa biarata diasi baera dayirãba kʼawuadamarẽã awururaba zʉbʉriabibʉrʉde kʼãrẽta oita. w24.11 6 parr. 12, 13

Naʉ̃ra ẽbẽrarãba ewari jõmaʉ̃nẽ bʼaira ĩjãibarabasi Jesús ʉ̃rʉ (Juan 3:​16-18, 36; 17:3). Naʉ̃ra ẽbẽrarãbara ĩjãna ẽ basi dayi ewari jõmaʉ̃nẽ bʼaira Jesús ʉ̃rʉ ĩjãibarata. Maʉ̃ba Jesúsʼa jarasida: «¿Bʉara kʼãrẽta ũdudʼakʼata oipe daiba maʉ̃ta ũdudʼape bʉdʼebemata ĩjãnaĩrã? ¿Bʉara kʼãrẽta oipe?» (Juan 6:30). Maʉ̃ tẽã jarasida Moisés ewaridera Daizezebara israelitara diaibasita manata, maʉ̃ta ãyi yikobasita ewariza (Neh. 9:15; Sal. 78:​24, 25). Ãya jaradaba ũdubisi ãyimara audre yibiabasita ãyaʼa yikoarata diadamarẽã, maʉ̃ kʼarea Jesúsba jara ũrĩbiside manabara ewari jõmaʉ̃nẽ babi ẽ baibasita, awuarabʉrʉ pan ʉ̃tre zebʉba kʼarebaibasita ewari jõmaʉ̃nẽ bʼaita, ãyara mia kʼãrẽsida widida ẽ basi kʼãrẽta jarakĩrãbʉta naʉ̃ba (Juan 6:32). Jesúsba ãyaʼa jaradiabaside kʼãrẽta oibarata ewari jõmaʉ̃nẽ bʼaita, ãyara ũrĩna ẽ basi, ¿kʼãrẽa? Ãya ewari jõmaʉ̃nẽ krĩchapanasi baera ãyi bia bʼaita. w24.12 5, 6 parr. 10, 11

Kolegiodera wũãwũãrabara kʼawuaseabʉ edaʉde naʉ̃ drʉade nekʼãrẽ ʉ̃tʉ zebʉra abarika ʉ̃tʉ zebʉta. Bari jaraita, bakuruta: bakuru borrogoabara erbʉ yi juwata, maʉ̃ juwade ʉ̃tʉ zebʉ awuru bakuru juwa zakerata, mawũã wã yi kĩbʉidubayeda, maʉ̃ mawũãbʉra trʉ̃gapanʉ fractales. Nekʼãrẽ mejãchaʉde ũduseabʉ mawũã chura. Adewara ãyira daucha mawũãbʉ wiña aña chu ẽ mamina, ¿kʼaiba osi mawũã bamarẽã? Mara wũãwũãraba maʉ̃ ʉ̃rʉ widibʉbʉrʉ Daizezeba nekʼãrẽ oda ʉ̃rʉra wãrĩnu ĩjãñi. Maʉ̃are ãyaʼa naʉ̃ta jaraseabʉ: «Warrara, dayirãsida Jeowaba parãsi baera, ¿maramara iya dayirã jarasi ẽka kʼãrẽta oibarata akʉza sãwũã baibarata sobia bʼaita?». Maʉ̃ tẽã jaraseabʉ maʉ̃ ũrãgʼara ũduseabʉta Daizeze Bedʼeade. w24.12 16 parr. 8

Jeowaba apostol Pabloʼa kartata bʉbisi kongregasionebemara biʼia jara ũrĩbimarẽã maʉ̃ ẽbẽra nemitia odara kongregasionebara ãĩ wãibarata (1 Cor. 5:13). Mawũẽra mebẽrã Jeowaʉ̃me kʼẽrẽpabʉbara, ¿sãwũã edaibarabasi ẽbẽra nemitia odara? Pablobara jarasi maʉ̃ ẽbẽraʉ̃mera ãba ba ẽ baibarata, maʉ̃ba jarakĩrãbasi mia neko ẽ baibarabasita maʉ̃ ẽbẽraʉ̃me. Dayirãta ẽbẽra abaʉme ãba nekobʉbʉrʉ akʉza maʉ̃ ẽbẽraʉ̃me aduʼa bedʼeapanʉ audre ũdukʼawua wãñi. Maʉ̃ba Pabloba jarakĩrãbasi ẽbẽra nemitia odaʉ̃mera ãba ba ẽ baibarata, mawũã obʉrʉba kʼarebaibasi kongregasionebemaraba iyabaʉ nemitiata oda ẽ marẽã maʉ̃ ẽbẽra kĩrãkʼa (1 Cor. 5:11). Adewara kongregasionebemaraba mawũã obʉrʉba kʼarebaibasi yi nemitia odaba ũdumarẽã iya odabara Jeowata mejãcha sopʉabisita akʉza kʼarebaseabasi iya oda kʼarea jẽda krĩchamarẽã (1 Cor. 5:​5-7). w24.08 15 parr. 4, 5

Israelitarabara poaga abaʉde ewari aba opanasi Expiación Ewarita. Sumo saserdotebara beabasi nedʉwʉrʉta pʉwʉrʉ nemitia obʉbari. Mamina wãrĩnubaira naʉ̃ra nedʉwʉrʉrabara israelitaraba nemitia obʉra jõma ãĩ bʉeba ẽ basi, nedʉwʉrʉra edabʉ baera ẽbẽrarãira. Mawũãsidu, israelitaraba ãya nemitia obʉta jẽda krĩchabasibʉrʉ akʉza nedʉwʉrʉrata sakripisio diabasibʉrʉ, Jeowaba kĩrãduabasi ãyi nemitiara (Heb. 10:​1-4). Expiación ewariba israelitara kĩrãbebibasi ãyira nemitia omiata. Mawũãmina, ¿Jeowabara kʼãrẽta osi mawũã dayirãba nemitia obʉ jipa kĩrãduaita? Jeowabara zokʼa bʉesi yi Warrata dayirã nemitiabari beimarẽã. Maʉ̃ tẽãra wuara zokʼa bʉe ẽ basi (Heb. 9:28). Mawũã Jesúsʼra zesi «iyi bebʉ diaita wuabemara ẽdrʉbita» nemitiadeba (Mat. 20:28). w25.02 4 parr. 9, 10

«Marabara nebiata okĩrãbʉmina kakuabara obe ẽã» (Mat. 26:41b). Jesúsba maʉ̃ bedʼea jarasidera ũdubikĩrãbasi iyara bia kʼawuabʉta dayirãra egoro oma baera kayirua ozeseabʉta, adewara iya jarasi jʉra kʼawuabaibarata dayikʉza krĩcha ẽ baita dayirã zareabʉta akʉza maʉ̃ kayiruara oze ẽ baita. Jesúsba maʉ̃ bedʼea jarai nãã iyi kʼaidubemaraba jarasida ãyara Jesúsʼra doba amaena ẽ baita (Mat. 26:35). Maʉ̃ra ãyara soiduba okĩrãpanasi, mamina ãya krĩchada ẽ basi wãrĩnu bedʼea zroma ũdubododera ãyira yi kayirua yi edebidaibasita, maʉ̃ kʼarea Jesúsba ãyaʼa jarasi idibema testode jaradata. ¿Kʼãrẽta osida iyi kaidubemarabara? Wãrĩnubaira ãyara oda ẽ basi Jesúsba omarẽã jaradata, ãyira ʉrʉmapana ẽ basi, maʉ̃ba ãya Jesús doba amae ẽ baya adara oda ẽ basi, awuarabʉrʉ doba amaesida (Mat. 26:56). w24.07 14 parr. 1, 2

Adán Evaʉ̃mebara bari adua ẽ basi ãyi ewari jõmaʉ̃nẽ bʼaita, maʉ̃ awuara aduasi Daizeze Jeowaʉ̃me neũdukʼawua biata. Ãyi nemitia oi nããra Jeowa mebẽrãbasi (Luc. 3:38). Mamina ãya Jeowa bedʼeata ũrĩ ẽ basi baera, wua Jeowa mebẽrãne ba ẽ basi. Maʉ̃ra berabarisi ãyi wũãwũãra barai nãã (Gén. 3:​23, 24; 4:1). Maʉ̃ kʼarea ãyideba zedarãra Jeowa mebẽrãne eda babe ẽ basi, maʉ̃ba nesidapanasi kʼarebata, mawũã Jeowaʉ̃me jẽda ibiade bʼaita (Rom. 5:​10, 11). Maʉ̃ba dayirãbara nesidabasi wua Jeowa nejʉra ba ẽ baita, awuarabʉrʉ iyi neũdukʼawua bʼaita. Mamina maʉ̃ra nããra Jeowarebʉrʉ jʉrʉ jʉ̃drʉsi dayirã iyiʉ̃me ibiade bʼaira, ¿sãwũã osi iya maʉ̃ra? Espiasioneba Jeowabara nekʼãrẽ jõma osi mawũã ẽbẽrarã jẽda iyiʉ̃me ibiade bamarẽã. Maʉ̃ oira nekʼãrẽ iyaba balebʉta diaibara. Mawũã obʉrʉba jẽda erbaseabʉ nekʼãrẽ ãrĩnara, mawũã ẽ bʉrʉ jipa aduadara. w25.02 3, 4 parr. 7, 8

Apostol Pabloba jarasi: «Naʉ̃ yumakẽrã mejãcha zʉbʉriasi iyi kʼẽãsidade mejãchaʉba» (2 Cor. 2: 5-8). Maʉ̃ ẽbẽraba erkʼãĩsi baera yi zeze kimata, kongregasioneba ãĩ bʉesida (1 Cor. 5:1). Maʉ̃ba kʼarebasi iya nemitia oda kʼarea jẽda krĩchaita, maʉ̃ kʼarea mebẽrãbara nesida ẽ basi aribia nemitia oda kĩrãkʼa akʉdaira (Heb. 12:11). Maʉ̃ yumakẽrãbara iya nãã nemitia obadata idubʉsi baera, Pabloba jarasi kongregasionebemara iduaribidamarẽã maʉ̃ yumakẽrãra jẽda kongregasionʼena zeita, adewara Pabloba jarasi: «Iyi nemitiara kĩrãduadaibara ibiade akʉza so zarea diadaibara», adewara iya kʼãrẽ obʉdeba «iyaʼa kʼawuabidamarẽã iyira kãgapanʉta». Yumakẽrã nemitia odata jẽda krĩchara, Pabloba kãgabasi mebẽrã kongregasionebemaba ãya kʼãrẽ jarabʉdeba, ãyi sãwũãbʉdeba akʉza ãya kʼãrẽ obʉdeba ũdubidamarẽã wãrĩnu kĩrãduasidata iya odara akʉza iyi wãrĩnu kãgapanʉta ũdubidamarẽã. Mebẽrãba mawũã osi baera, mebẽã nemitia odabara ũduseabasi kongregasionebemarãra wãrĩnu sobiapanʉta iyita jẽda zesi baera. w24.08 15 parr. 4; 16, 17 parr. 6-8

Pablobara ũrãgʼa biata diaseabasi kʼãrẽta sãwũã oibarata pẽwãbʉdade awuantaita, maʉ̃ba ũrãgʼa biata diasi kristianora ãyikʉza ĩjãna ẽ marẽã pẽwãbʉdadera, awuarabʉrʉ ĩjãnamarẽã Daizeze Jeowa ʉ̃rʉ. Maʉ̃ba ãyaʼa jaraseabasi: «Jeowara mʉ̃ kʼarebabari, maʉ̃ba mʉ̃ra pera ẽ» (Heb. 13:6). Idi ewadera mebẽrã mejãchaʉta pẽwãpanʉ. Dayirãba ãyi kãgabʉta ũdubiseapanʉ ãyibari yiwidʼipanʉne akʉza ãya nekʼãrẽ nesidabʉta diapanʉne. Daizeze Bedʼeaba jarabʉ yi ẽbẽrarã Jeowaba akʉza Jesúsba jarabʉde bakĩrãpanʉrãra pẽwãnaita (2 Tim. 3:12). Maʉ̃ kʼarea dayirã jõmaʉ̃ba nesidapanʉ bedʼea zroma zebʉrʉdera kʼawuaita kʼãrẽta oibarata awuantaita. Kʼãwũãena dayirãbara ĩjãnaibara Jeowata, ĩjãnaibara dayirãba badu bedʼea zroma erbʉde Jeowabara kʼarebaita. Aranʉ Jeowabara jõma ẽbẽrarã iyi ode kʼẽrẽpapanʉrãra aduʼa sobia babiyi (2 Tes. 1:​7, 8). w24.09 13 parr. 17, 18

¿Kʼãrẽba kʼarebasi Corintodebemara buru kʼoeita? (2 Cor. 10:​4, 5). Daizeze Bedʼeaba kʼarebasi akʉza Daizeze jaure zareaba, ãya idubʉeita nemitia obadata (Heb. 4:12). Corintodebemarabara Jesús ʉ̃rʉ ĩjã kʼãrãpe ãya nemitia obadata idubʉsida. Bari jaraita, itua doita, nezrʉgaita akʉza yumakẽrã abari yumakẽrãʉ̃me mia erkʼãĩbʉta, adewara yuwẽrã abari yuwẽrãʉ̃me mia erkʼãĩbʉta idubʉsida (1 Cor. 6:​9-11). Corintodebemaraitara ãya nemitia okikibari idubʉira, mejãcha zarebasimina, kʼawuabasi maʉ̃ra idubʉseabasita mawũã kristiano bʼaita. Maʉ̃ kʼarea ãyira mejãcha zarea osida o zake ewari jõmaʉ̃nẽ babibʉde wãita (Mat. 7:​13, 14). Dããra babʉrʉ nemitia idubʉita zarea obʉta, krĩcharãra bʉa maʉ̃ nemitiara iduaribi ẽãta, awuarabʉrʉ Daizeze Jeowa so zʉbʉria bedʼeara iya kʼarebamarẽã iyi jaure zareaba maʉ̃ nemitia idubʉita, mawũã tẽã buru kʼoeita. w25.03 6 parr. 15-17

Jeowabara jarabʉ dayirã jõmaʉ̃a buru biata diakĩrãne diaita. Maʉ̃ buru biaba kʼarebayi dayirãba nekʼãrẽ oita jidabʉrʉde jidaita nekʼãrẽ Jeowaʼa sobiabibʉta. Bʉ yiwidʼida tẽãra bʉara kĩrãkita ũrĩbara Jeowaba kʼãrẽta jarabʉta bʉaʼa. Maʉ̃ ʉ̃rʉ bia ũrĩnaita krĩchadaya naʉ̃ ʉ̃rʉ. Bʉta ode wãta pasiade, mamina ode aduayi bʉra. Maʉ̃nera bʉara ẽbẽrarã ara mama bʉra widiyi kʼãrẽta oseabʉta, widiyi saʉ̃ ode wãita. Mamina bʉa widida tẽãra bʉra tẽĩ toto ẽ bayi awuarabʉrʉ bʉara kĩrãkita ũrĩñi maʉ̃ ẽbẽraba bʉaʼa kʼãrẽta jaraita. Maʉ̃ kĩrãkʼabʉ dayirãta Jeowaʉ̃me. Dayirã yiwidʼida tẽãra kʼawuaibara Jeowaba kʼãrẽta jarasita, kʼãrẽta panʉsita. Maʉ̃itara nesidapanʉ Daizeze Bedʼeade akʉita wãrĩnuara Daizeze Bedʼeadebemata. Akʉseabʉ dayirãba kʼãrẽ oita krĩchabʉ ʉ̃rʉ. Bari jaraita, krĩchadaya piesta ʉ̃rʉ, dayirãta maʉ̃ piesta eda wãita jidaidera jʉrʉseabʉ Daizeze Bedʼeade piesta jʉra kʼawua akʉ ẽã ʉ̃rʉ bedʼeabʉta akʉza neũdukʼawua zeri ẽã ʉ̃rʉ bedʼeabʉta akʉza Daizeze Nokʼo nãã bʉei ʉ̃rʉ bedʼeabʉta (Mat. 6:33; Rom. 13:13; 1 Cor. 15:33). w25.01 15, 16 parr. 6, 7

Isaías propesia jaradaba jara ũrĩbibʉ kʼãrẽne awuarapanʉta ẽbẽra ẽjũã kĩrãwãreã jauredebemane panʉrata akʉza yi ẽbẽrarã maʉ̃neba ãĩ panʉrata. Jeowabara iyi odepanʉrãra diakĩrã diabʉ ãya nekʼãrẽ nesidabʉta, mawũã iyi kʼawapanamarẽã. Dayirãbara erpanʉ Daizeze jaure zareata, iyi Bedʼeata akʉza yiko jauredebemata mejãcha. Mawũã audre Jeowa kʼawapanamarẽã akʉza sobiapanamarẽã (akʉra naʉ̃ testoʉ̃me Apocalipsis 22:17). Mamina naʉ̃ra ẽbẽrarã ẽjũã kĩrãwãreã jauredebemaneba ãĩ panʉra, jarrabade berabaribʉ akʉza sobiapanʉ ẽ ãyira yiko jauredebema neẽ baera, maʉ̃ba Daizeze kʼawa babe ẽ (Amós 8:11). Jeowabara dayirãʼa ewariza diabʉta nekʼãrẽ dayirãba nesidabʉta, yiko jauredebemasida diabʉta (Joel 2:​21-24). Iya dayirãba nesidabʉra diabʉ Daizeze Bedʼeadeba, kartara Daizeze Bedʼeadebemaneba, ãba yi jʉrebarima wãbʉrʉdeba akʉza asambleaeda wãbʉrʉdeba, adewara dayirã pagina internetʼneba. Dayirãba maʉ̃ yiko jauredebemata ewariza erpanʉ baera, naʉ̃ba kʼarebabʉ dayirã zareapanaita. w24.04 21 parr. 5, 6

Bʉa ẽbẽra abaʉʼa jarakĩrãbʉbʉrʉ bʉra iyiʉ̃me bedʼea jʉ̃drʉkĩrãbʉta, bʉa jʉrʉseabʉ sãwũã bedʼeaita maʉ̃ ẽbẽraʉ̃me selulardeba, mawũã ẽ bʉrʉ ẽbẽra bio bʉmae. Biʼia jara ũrĩbira maʉ̃ ẽbẽra bʉa iyira kãgabʉta akʉza audre ũdukʼawuakĩrãbʉta (1 Cor. 14:9). Adewara jʉ̃ãrãra maʉ̃ ẽbẽraba mesera panʉmarẽã bʉa widikʉta (Prov. 15:28). Akʉza iya bʉaʼa jarara iyara bʉra kãga ẽãta, wua bedʼearãra iyiʉ̃me maʉ̃ ʉ̃rʉ. ¿Kʼãrẽta oi ẽbẽra abaʉba bʉaʼa jarara iya bʉ kãgachʉta? Naʉ̃ mebẽãba bʉaʼa maʉ̃ jaraira zowaĩnĩgʉata nesidabasibaibara, maʉ̃ kʼarea ibiade panʉra akʉza wawia ũdubira iyaʼa. Mamina bʉa maʉ̃ ʉ̃rʉ mebẽã mesera panʉbe ẽ bʉrʉ, iyaʼa widira jʉ̃ãmarẽã bʉa bia krĩchaita mawũã panʉita. Mamina ewari bio berabaribirãra iya widida panʉita, meserabai panʉra (Prov. 13:12). Mamina bʉa maʉ̃ ẽbẽrata kãga ẽ bʉrʉ ibiade jara ũrĩbira bʉara kãga ẽãta iyira. Mamina bʉa iyita kãgabʉbʉrʉ, iyaʼa jarada bʉra iyiʉ̃me bedʼea jʉ̃drʉkĩrãbʉta akʉza jara ũrĩbira bʉa kʼãrẽta kãgabʉta akʉza mara bedʼeabʉeda kʼãrẽta berabarimarẽã kãgabʉta. Edaʉde mara yi bedʼea jʉ̃drʉbʉrʉde kʼãrẽ berabarimarẽã kãgabʉdera mayiʉ̃meba awuara krĩchabaseabʉ. w24.05 23, 24 parr. 12, 13

Israelitara gorogorora bʉidu jʉ̃ẽsidera, Davidʼra waidide kʉ̃rabasi. Mama iya ũdusi ẽbẽra Filisteadebema yi zroma chuba yi trʉ̃ Goliatba jarabʉta kʼaita iyiʉ̃me yõkĩrãbʉta, maʉ̃ kʼarea gorogorora Israeldebemarãra mejãcha perabasi (1 Sam. 17:​10, 11). Maʉ̃ra gorogororãra perabasi ãya akʉpanasi baera maʉ̃ ẽbẽrarã kʼãrẽaba chuta akʉza bedʼea sãwũã jarabada kʼarea (1Sam. 17:​24, 25). Mamina Davidbara mawũã krĩchaba ẽ basi, iya krĩchasi Israelde gorogororabʉra badu gorogorora ba ẽ basita, awuarabʉrʉ Jeowa pʉwʉrʉ gorogorobasita. (1 Sam. 17:26). Iyara audrera krĩchabasi Jeowa ʉ̃rʉ, adewara wãrĩnu ĩjãbasi Jeowaba iyi nãã kʼarebada kĩrãkʼa maʉ̃nebida Jeowabara iyira kʼarebaita (1 Sam. 17:​45-51). w24.06 21 parr. 7

Krĩchaseabʉ Jeowata ũdukʼawua ẽ basibʉrʉ sãwũãbakasita, mawũã oiba kʼarebayi Jeowaʉ̃me kʼẽrẽpa bakĩrãita akʉza yumakẽrã Salmo bʉdaba jarada kĩrãkʼa jarayi: «Mʉ̃itara Daizeze orraira audre yibia» (Sal. 73:28). Dayirãra Daizeze zokʼaibʉare panʉ baera nekʼãrẽ bedʼea zroma zebʉrʉdera awuantaseapanʉ (1 Tes. 1:9). Iyira wãrĩnu zokʼaibʉ akʉza iya dayirãra krĩchabʉ akʉza ewari jõmaʉ̃nẽ kʼarebakĩrãbʉ. Iyara kʼarebasi ẽbẽrarã iyi ode nãã kʼẽrẽpa badarãra. Idi ewadebida dayirãsida mawũã kʼarebayi. Aranʉbai ũdudayi bedʼea zroma dayirãba ũdudakata, maʉ̃nera dayirãra doba ba ẽ bayi. Maʉ̃ kʼarea naʉ̃ bedʼeata soiduba jaraseapanʉ: «Jeowara mʉ̃ kʼarebabari, maʉ̃ba mʉ̃ra pera ẽ» (Heb. 13:​5, 6). w24.06 25 parr. 17, 18

Daizeze Bedʼeade jara ũrĩbibʉ nokʼora 40 audre bada ʉ̃rʉ, ãyara Israel ʉ̃rʉ zokʼapanasi. Ʉ̃kʉrʉra nokʼo biarabasi, mamina ãyara kayiruasida osida. Bari jaraita nokʼo Davidba, Jeowaba jarasi: «Mʉ̃ nezokʼa David [ . . . ] iyara aripe osi mʉ̃a zokʼada kĩrãkʼa adewara iyi soiduba ũdubisi mʉ̃ kʼaidubʉta akʉza mʉ̃ dabʉ nãã biabʉta osi» (1 Rey. 14:8). Nokʼo Davidʼra ãĩbasi yuwẽrã kimabarabʉme akʉza iya jʉrʉsi naʉ̃ yuwẽrã kima yõena wãbʉrʉde sãwũã beaita (2 Sam. 11:​4, 14, 15). Maʉ̃ awuara Daizeze Bedʼeaba jara ũrĩbibʉ, basita ʉ̃kʉrʉ nokʼora Jeowaʉ̃me kʼẽrẽpa ba ẽ basimina nebiata osidata. Bari jaradaita, Rehoboambara Jeowa dabʉ nããra yi kayiruata osi (2 Crón. 12:14). Mawũãsidu Rehobohambara nebiata osi, bari jaradaita iya ũrĩsi Jeowaba jaraside Israeldebedema 10 tribubʉme yõ ẽ bamarẽã akʉza iduaribimarẽã ãya awuru nokʼota jidamarẽã, adewara nekʼãrẽ osi mawũã Daizeze pʉwʉrʉ kʼarebaita iyi nejʉraraneba (1 Rey. 12:​21-24; 2 Crón. 11:​5-12). Jeowabara, ¿kʼãrẽta akʉbasi jaraita maʉ̃ra nokʼoranebema ʉ̃kʉrʉra iyiare kʼẽrẽpabasita? Jeowaba akʉbasi iyita soiduba kãgapanʉ kʼawuaita, ãya kayirua oda kʼarea soiduba jẽda krĩchapanʉ kʼawuaita akʉza Jeowaba kãgabʉde yiwidʼipanasi kʼawuaita. w24.07 20 parr. 1-3

¿Kʼãrẽta opanʉ zõrãrãbara wũãwũã aba buru kʼoebʉta iyi 18 poaga baena nemitia ora? Zõrãrãra ãba yi jʉreda kʼãrãpe, jʉrʉpanʉ zõrãrã ũme, maʉ̃rata bedʼeamarẽã wũãwũã yi nemitia odaʉ̃me, adewara zõrãrã ãba yi jʉrebʉrʉdera chuaibara wũãwũã nemitia odata akʉza yibarira Jeowa odebʉrata. Zõrãrã mawũã ãba yi jʉrebʉrʉdera yibarira wididayi kʼãrẽta obʉta kʼarebaita ãyi wũãwũãba idubʉmarẽã nemitia obʉta akʉza jẽda krĩchamarẽã. Wũãwũãba bia krĩchabʉbʉrʉ akʉza nekʼãrẽ obʉbʉrʉ iya nemitia obʉ idubʉita, adewara yibariraba ũrãgʼa diabʉde obʉbʉrʉ, mawũãra zõrãrã ũmeba jaraseabʉ yibariraba kʼarebadamarẽã. Zõrãrãbara kʼawuapanʉ Jeowabara jarabʉta yibarira ãyi wũãwũãra ibiade kʼẽã bamarẽã (Deut. 6:​6, 7; Prov. 6:20; 22:6; Efes. 6:​2-4). Zõrãrãbara badua akʉ wãpanʉ yibariraʉ̃me bedʼeaita, mawũã kʼawuapanʉ kʼarebapanʉ kʼawuaita ãyi wũãwũãba kʼãrẽne kʼarebamarẽã nesidabʉde. Mamina, ¿kʼãrẽta obʉ zõrãrãbara wũãwũãba iya nemitia obʉta idubʉ ẽãnera? Maʉ̃nera chuayi zõrãrã ũbea, ãba yi jʉredayi wũãwũã nemitia odaʉ̃me, yibariraʉ̃me. w24.08 24 parr. 18

Wãrĩnubaira awuruba dayirãbari nekʼãrẽ bio obʉrʉdera dayirã mejãcha sobiabʉ. Mamina audre sobiabʉ dayirãba awurura nekʼãrẽ diabʉrʉde. Jeowaba dayirãta mawũã parãsi baera, naʉ̃ba kʼarebabʉ sobia bʼaira dayide bamarẽã, dayareba jʉrʉseabʉ sãwũã audre sobia bʼaita. Dayirãba awururabari nekʼãrẽ bia oita jʉrʉpanʉbʉrʉ, naʉ̃ba kʼarebayi audre sobiapanaita. Jeowabara dayirãra biʼia parãsi (Sal. 139:14). Daizeze Bedʼeade jarabʉ yi ẽbẽrarã awururabari nekʼãrẽ bia obʉratrʉ sobia panʉta, maʉ̃ kʼarea Daizeze Bedʼeaba jarabʉ Jeowara Daizeze sobiata (1 Tim. 1:11). Jeowabʉrʉ awuru ẽbẽrarãbari nããra nekʼãrẽ bia osi akʉza iya obʉ kĩrãkʼara mia abaʉ ẽbẽraba obe ẽ. Maʉ̃ kʼarea Pabloba naʉ̃ta bʉsi: «Iyideba zokʼaipanʉa, pirabea akʉza panʉa» (Hech. 17:28). «Jõma kʼãrẽ biara akʉza jõma nekʼãrẽ aripe bʉra» Daizezedeba zebʉ (Sant. 1:17). ¿Kʼãrẽta oseapanʉ audre sobia bʼaita? Jeowade kĩrãkʼa wuabemarabari nekʼãrẽ bia okĩrãbaibara (Efes. 5:1). w24.09 26 parr. 1-4

Daizeze Bedʼeade jara ũrĩbibʉ kʼãrẽta oibarata zõrãrãba, maʉ̃ta zõrãrã kʼarebabariba kʼawuabʉrʉdera krĩchaseabʉ iyira zõrãrã babe ẽãta nekʼãrẽ biata mejãcha oũdubibara baera. Mamina kĩrãbedaibara Jeowaba akʉza iyi organizasionba jʉ̃ã ẽãta nama jarabʉde jõma daucha oũdubita (1 Ped. 2:21). Akʉza kĩrãbeibara Jeowa jaure zareaba kʼarebabʉta maʉ̃ra nebiara oũdubidaita (Filip. 2:13). Kõbe bʉara Daizeze Bedʼeade nebia jarabʉdebemara, ¿bʉara saʉ̃ta audre oũdubikĩrãbʉ? Bʉa maʉ̃ta audre bia okĩrãbʉbʉrʉ Jeowaʼa yiwidʼida akʉza biʼia estudiara bʉa kʼãrẽ nebia oũdubikĩrãbʉ ʉ̃rʉ. Zarea ora audre mebẽrã kʼarebaita. Adewara Jeowaʼa widida kʼarebamarẽã sãwũã audre bia oita iyideta akʉza sãwũã audre kʼarebaita mebẽrã kongregasionebemata (Is. 64:8). Bʉta zarea obʉbʉrʉ zõrãrã bʼaita Jeowaba kʼarebayi maʉ̃ta ũdumarẽã. w24.11 24, 25 parr. 17, 18

Jeowabara dayirã iyi ode kʼẽrẽpabʉra bia akʉbʉ, naʉ̃ba iyita sobiabibʉ. Mamina dayirã Jeowa ode kʼẽrẽpabʉta dããrababa jarakĩrãkʉ ẽ Jeowabara dayirãba nemitia obʉrʉdera maʉ̃ra kĩrãduaibarata, wãrĩnubaira Jeowabara yi Warrara dayirãra diasi diakĩrãbʉ baera dayirãta kãga baera, mawũã dia ẽ basi maʉ̃ nebiara dayirãba iyi kʼarea nebia obʉrʉta pagaita, dayirãba krĩchadara dayirã Jeowa ode kʼẽrẽpabʉ kʼarea Jeowabara bia akʉibarata, mawũãra jarabʉ kĩrãkʼabayi nesida ẽ basita Jesús dayirã kʼarea beita (naʉ̃ testoʉ̃me akʉra Gálatas 2:21). Apostol Pablobara kʼawuabasi iya Jeowa kʼarea nekʼãrẽ bia mejãcha obʉmina akʉza iyi zarea obʉmina Jeowabara kʼãrẽa iyi nemitiara maʉ̃neba kĩrãduaira neẽ basita (Efes. 3:7). Pablora zarea trajabasi Jeowaita, biga diakĩrãbasi baera Jeowaba iyita bia akʉbʉ kʼarea akʉza zʉbʉria akʉbʉ kʼarea. Abarika dayirãsida Jeowaita zarea trajaibara mamina dayirãbara maʉ̃ra oẽ baibara dayirãba biata obʉ kʼarea Jeowaba kĩrãduamarẽã dayi nemitiata, awuarabʉrʉ oibara biga diakĩrãpanʉ baera iya dayirãta so zʉbʉria akʉbʉ bari. w25.01 27 parr. 5, 6