Julio

Ʉ̃kʉrʉ mebẽrãba Jeowa kʼarea mejãcha okĩrãpanʉ, mamina edaʉde ãyira zõrãpanʉ baera, kayapanʉ baera, mawũã ẽ bʉrʉ nekʼãrẽ awuru kʼarea audre diabe ẽ baera, ãyikʉza naʉ̃ta kʼãwũã widipanʉ: «¿Mʉ̃ra Jeowabara waidide bia akʉbʉka?». Salmo 71 bʉdara mawũã sentisi, iya maʉ̃ kʼarea Jeowaʼa jarasi: «Mʉ̃ zarea jõbʉrʉde doba idubʉrãra» (Sal. 71:​9, 18). Salmistara mawũã zarea neẽ sentibasimina, iyara biʼia kʼawuabasi Jeowaba zokʼabʉta oita jidasibʉrʉ, Jeowabara iyaʼa jaradiaibasita sãwũã audre bia bʼaita akʉza ewari jõmaʉ̃nẽ iyi kʼawa bʼaibasita. Adewara kʼawuasi edaʉde Jeowaita audre diabe ẽ kĩrãkʼabʉmina, zarea obʉbʉrʉ Jeowaba kãgabʉta oita mawũãra Jeowara sobia bʼaita iyi kʼarea (Sal. 37:​23-25). Bʉta zõrãbʉbʉrʉ zarea ora Jeowaba akʉbʉ kĩrãkʼa akʉita bʉyikʉza. Jeowaba kʼarebayi bʉa ũdumarẽã kʼãrẽta oseabʉta iyi kʼarea bʉma iyi kʼarea kʼãrẽ obe ẽ kĩrãkʼabʉmina (Sal. 92:​12-15). Badua krĩcharãra bʉa kʼãrẽ obe ẽã ʉ̃rʉ, awuarabʉrʉ audre krĩchara bʉara kʼãrẽta oseabʉta Jeowa kʼarea. w24.10 28 parr. 14-16

Kristianora Daizeze Bedʼeadebema sãwũã oita biʼia kʼawua ẽ bʉraitara, zareabʉ ãya nei oitabʉrʉde Daizeze Bedʼearadebemaba jarabʉ kĩrãkʼa oũdubita akʉza Daizeze Bedʼeade Jeowaba kʼãrẽ ley diabʉta neẽbʉrʉ, ãyara krĩchaseabʉ ãya kãgata oseabʉta, adewara ʉ̃kʉrʉbara ãyikʉzaʉba bʉebʉ awuru leyta. Bari jaraita, kristianora Corintodebemaraba Pabloʼa widisida yiko idolora diadara, koseabʉ kʼawuaita. Pabloba ãya jarai kaude kʼãrẽta oibarata, ũdubisi aba abakaʉba jidaibarata ãyi krĩchaba iduaribibʉta akʉza Pablobara jara ũrĩbisi ʉ̃kʉrʉ Daizeze Bedʼearadebemata, mawũã ãya kʼawuadamarẽã ãya kʼãrẽta jidaita, adewara maʉ̃ jidabʉrʉde ãyi krĩchasi aduʼa bamarẽã, mawũã wuabemarata baebi ẽ baita (1 Cor. 8:​7-9). Pabloba kristianora Corintodebemara mawũã jaradiadaba kʼarebasi ãyi aba abakaʉba jida kʼawuamarẽã kʼãrẽta okĩrãbʉta, adewara biʼia kʼawuadamarẽã Daizeze Bedʼeadebema sãwũã oita. w24.04 5 parr. 14

Jonás ewaridera, Nínivedebemarãra Jeowaba ewarita diasi ãya nemitia obʉ jẽda krĩchadamarẽã. Kĩrãbedadrʉ Jesúsba jaradata, jẽda piradrʉita kʼawua odaita maʉ̃ne jẽda piradrʉdayi yi nemitia obeadarasida (Juan 5:29). Maʉ̃ne jẽda piradrʉseabʉ ʉ̃kʉrʉ ẽbẽrarã Sodomanebemarata akʉza Gomorradebemarata, dayirãbara maʉ̃rabida Daizeze Bedʼea jaradiaseabayi. Jeowaba biʼia kʼawua obʉta ũdukʼawuabʉ baera ẽbẽrarã so sãwũãbʉta akʉza ãya kʼãrẽ krĩchabʉta. Ẽbẽrarã jẽda piradrʉbi ewari zebʉrʉdera Jeowabara ẽbẽra aba abaka kʼawua oyi iya kʼãrẽ odadeba. Jeowabara so zʉbʉria ũdubikĩrã, maʉ̃ba iya ẽbẽra abaʉʼa so zʉbʉria ũdubibaradera ũdubibʉ, mamina ẽbẽra abaʉʼa kʼãrẽa so zʉbʉria ũdubita neẽbʉrʉ ũdubi ẽ. Daizeze Bedʼeaba dajada jara ẽ bʉrʉ ẽbẽra aba jẽda piradrʉ ẽ baita dayirãbara jara ẽ baibara kʼai ẽbẽrata jẽda piradrʉita, mawũã ẽ bʉrʉ jẽda piradrʉ ẽãta. w24.05 6 parr. 15, 16

Nawedara Daizeze odepanʉraba bedʼea zroma ũdubʉrʉdera, Daizeze Bedʼeaba kʼarebabasi ãya so zarea erbamarẽã. Mawũã berabarisi propeta Jeremíasta. Jeowaba iyaʼa Daizeze Bedʼea jaradia wãmarẽã jarasidera Jeremíasʼra krĩcha osi. Iya naʉ̃ta jarasi: «Mʉ̃ra bia bedʼeabe ẽ warrara bʉ baera» (Jer. 1:6). ¿Kʼãrẽba so zarea diasi iya Daizeze Bedʼea jaradia wãmarẽã? Jeowaba iyaʼa bedʼea jaradaba kʼarebasi. Jeremíasba jarabʉ: «Iya bedʼea jaradara mʉ̃ sode pʉrea eradrʉnʉmʉta bʉwʉrʉba idu ãĩ wãbi ẽ kĩrãkʼa besi akʉza mʉ̃ra mapaesi maʉ̃ta idu ãĩ wãbi ẽ baera» (Jer. 20:​8, 9). Jeremías bʉmae ẽbẽrarãba iya jaradiabʉ ũrĩkĩrã ẽ basimina, Jeowaba iyaʼa bedʼea jaradaba zarea diasi aripe omarẽã Jeowaba zokʼadata. Kristianorabara so zarea ũdubʉ Daizeze Bedʼeadeba. Pabloba jarasi Jeowaba kʼãrẽta omarẽã kãgabʉ ʉ̃rʉ biʼia kʼawuapanʉbʉrʉ, naʉ̃ba kʼarebaibasita ãya nebiata odamarẽã akʉza Jeowaba kãgabʉta oita (Col. 1:​9, 10). w24.04 14, 15 parr. 2-4

Sadocʼra Jeoware kʼẽrẽpabasi Abiatarba kʼarebakĩrãbasimina David warra Adonías. Iya yi zeze bari zokʼakĩrãbasi, Davidbara kʼawuabasi iyara Sadoc ʉ̃rʉ ĩjãseabasita, maʉ̃ kʼarea iya kʼawuaside Adoníasba kʼãrẽta oita krĩchabʉta Sadocʼa, Benayaʼa akʉza Natánʼa jarasi Salomónta nokʼo babidamarẽã (1 Rey. 1: 32-34). Sadocʼra awuru ẽbẽrarã Jeowa ode kʼẽrẽpapanʉra yizaba kʼarebasibaibara, bari jaraita, Natán yizaba. Iyira Jeoware kʼẽrẽpabasi akʉza David arebasi Salomón nokʼobasidera Abiatarba obadata saserdote Sadocʼa obisi (1 Rey. 2:35). ¿Bʉra sãwũã Sadoc kĩrãkʼa baseabʉ bʉ mebẽrãnebema abaʉba, mawũã ẽ bʉrʉ bʉ neũdukʼawuaba Jeowata idubʉra? Ũdubira Jeowaʼa bʉra iyiare kʼẽrẽpa bakĩrãbʉta (Jos. 24:15). Jeowaba bʉaʼa zarea diayi akʉza zowaĩnĩgʉata. Jeowaʼa yiwidʼibara akʉza ewari jõmaʉ̃nẽ iyi ode kʼẽrẽpapanʉra kʼawa bara. Jeowaba bia akʉbʉ bʉ kʼãwũã iyare kʼẽrẽpabʉra, maʉ̃ kʼarea nebiata diayi (2 Sam. 22:26). w24.07 6, 7 parr. 16, 17

Salmo 15:2de jarabʉ kʼãrẽta oibarata Daizeze neũdukʼawua bʼaira, jarabʉ Daizeze neũdukʼawuarãra «kʼẽrẽpapanʉta» akʉza «biata opanʉta». Nama jarabʉ kʼẽrẽpapanʉ akʉza bia opanʉ, naʉ̃bara jarakĩrãbʉ maʉ̃ mawũã obʉta badua obaibarata idubʉ ẽ baibarata. Mamina, ¿wãrĩnu dayirãra kʼẽrẽpa baseabʉka Daizeze nããra? Dayirã jõmaʉ̃ta nemitia omiamina zarea opanʉbʉrʉ Jeowaba zokʼabʉta aripe odaita, Jeowa dabʉ nããra dayirãra kʼẽrẽpabʉ kĩrãkʼabʉ, mawũẽra dayirãba Daizeze Jeowaʼa dayi bebʉ diaya aside akʉza buru kʼoeside, maʉ̃neba ʉ̃tabʉrʉ Daizeze neũdukʼawua ba jʉ̃drʉsi. Bari jaraita, nawedara israelita baera naʉ̃ba jarakĩrãkʉa ẽ basi Daizeze neũdukʼawuata mawũã Daizeze dedabʉta, ʉ̃kʉrʉbara Daizeze Jeowaba zokʼabʉta soiduba oda ẽ basi baera (Is. 48:1). Israelita abaʉta Daizeze de karpade bakĩrãbasibʉrʉ biʼia ũdukʼawuabaibarabasi Jeowaba kʼãrẽta omarẽã zokʼabʉta, abarikabʉ idi ewade dayirãta Jeowa neũdukʼawua bia bʼaira, bari buru kʼoeibara ẽ akʉza jaraibara ẽ Jeowa ʉ̃rʉ Kʼawuabipanʉrãta, awuarabʉrʉ oũdubibara aripe opanʉta. w24.06 8 parr. 4; 9 parr. 6

Akʉdaya Jeowaba dayirãbari kʼãrẽ bia ozebʉrʉta. Bari jaraita iya dayirã diabʉ nekʼãrẽ biata. Edaʉde Jeowaba dayirãʼa dia ẽ nekʼãrẽ biata mejãcha, mamina diabʉ dayirãba nesidabʉta. Bari jaraita, iya diabʉ dayirã kʼãrẽ koita, kʼãrẽ wua jʉ̃ita akʉza sama bʼaita (Sal. 4:8; Mat. 6:​31-33; 1 Tim. 6:​6-8). Jeowaba dayirã maʉ̃ra nebiara diabʉ ẽ, maʉ̃ta diaibara baera. Akʉdaya Jesúsba Mateo 6:​25, 26de jaradata. Jesúsba ibana zakera ʉ̃rʉ naʉ̃ta jarasi: «Ãyira ne u ẽ, mia jʉrepe ẽ, mia nekʼãrẽ wuagabarimae wuagada ẽ. Mamina Daizezebara ne diabʉ». Naʉ̃ jarada tẽã Jesúsba widisi: «¿Kõbe marara ibanaira audre yibia ẽka?». Jeowaba nedʉwʉrʉrata biʼia akʉbʉbʉrʉ dayirãsida biʼia akʉyi. Jeowara Zeze bia baera akʉza dayirãta mejãcha kãgabʉ baera diabʉ dayirãba nekʼãrẽ nesidabʉta (Sal. 145:16; Mat. 6:32). w24.09 26, 27 parr. 4-6

Ʉ̃kʉrʉ mebẽrã yumakẽrãta yi buru kʼoemara zõrãrã kʼarebabari babipanʉ, ãyara kʼarebapanʉ zõrãrãba kongregasione nekʼãrẽ mejãcha oibarade. Zõrãrã kʼarebabarirabʉrʉ, ũdubidaibara Daizeze Bedʼeadebema sãwũã oita biʼia kʼawuabʉta, Jeowa kãgapanʉta akʉza Jeowaba zokʼabʉde panʉta, adewara ãyara soiduba kãgapanʉ mebẽrã kongregasionebemara (Mat. 22:​37-39). ¿Kʼãrẽta oseabʉ yumakẽrã buru kʼoebʉbara zõrãrã kʼarebabari bʼaita? Daizeze Bedʼeade jara ũrĩbibʉ kʼãrẽta oibarata zõrãrã kʼarebabari bʼaita (1 Tim. 3:​8-10, 12). Bʉta zõrãrã kʼarebabarira bakĩrãbʉbʉrʉ estudiaibara maʉ̃ ʉ̃rʉ akʉza mama jarabʉde oũdubibaibara, mamina bʉa nããrãra kʼawuaibara kʼãrẽa zõrãrã kʼarebabari bakĩrãbʉta. w24.11 14, 15 parr. 4, 5

Ẽbẽra mejãchaʉba jarapanʉ ãyara Daizeze Bedʼeara leda ʉ̃rʉ lepanʉta. Mamina, ¿ãyara wãrĩnu ĩjãpanʉka Daizeze Bedʼeaba jarabʉ ʉ̃rʉ? ¿Idu yi jaradiabipanʉka Daizeze Bedʼea? Wãrĩnubaira ãyidebema mejãchaʉba oda ẽ maʉ̃ra. Mamina dayirãra jipa awuarapanʉ. Dayirãbara Daizeze Bedʼeaba jarabʉde oũdubikĩrãpanʉ. Dayirãba Daizeze Bedʼea leira akʉza mama jarabʉde oira, zarea baseabʉ. Edaʉde ewari neẽ baera Daizeze Bedʼea leita, maʉ̃ta neẽbʉrʉ mesera lebʉba bia krĩcha ẽ kʼãrẽta jarabʉta, mawũã ẽ bʉrʉ Daizeze Bedʼeade nekʼãrẽ mejãcha awuara oibarata ũdubʉrʉba krĩcha zroma obibʉ. Naʉ̃ranebema dayirãita mejãcha zareabʉmina, Jeowaba biode kʼarebayi dayirãba oita krĩchabʉ aripe oita. Daizeze Bedʼea lebʉrʉdera zarea ora mama jarabʉde aripe oita. Mawũẽra bʉa Daizeze Bedʼea audre lebʉrʉde akʉza mama jarabʉde oũdubibʉbʉrʉ, naʉ̃ba kʼarebayi bʉ audre sobia bʼaita (Sant. 1:25). w24.09 7 parr. 15, 16

Dayirãta zʉbʉriade berabarida kʼarea sopʉapanʉnera, Jeowabara iyi jaure zareadeba so zarea diabʉ dayirãʼa. Bʉta zʉbʉriade berabarinʉmʉbʉrʉ akʉza mejãcha sopʉabʉbʉrʉ, maʉ̃ kʼarea Jeowaʼa jarada jõma bʉ sãwũã sentibʉra. Bʉra iyiʉ̃mera bedʼeaseabʉ bʉya kãgade akʉza bʉya kãga ũmadaʉbayeda (Sal. 86:3; 88:1). Jeowaʼa badua widibara iyi jaure zareata diamarẽã akʉza ĩjãra Jeowabara bʉ bedʼeara ũrĩbʉta. Bʉ zʉbʉriade berabaribʉrʉdera zarea neẽbʉ kĩrãkʼa sentiseabʉ. Maʉ̃nera Jeowabara iyi jaure zareata diayi bʉaʼa mawũã zarea bamarẽã akʉza iya zokʼabʉta kʼẽrẽpa odamarẽã (Efe. 3:16). Bʉa Jeowaʼa iyi jaure zarea widida tẽãra piki barãra. Jʉrʉda audre oita nekʼãrẽ Jeowadebemata, mawũã Jeowa jaure zarea erbaita. Maʉ̃itara ãba yi jʉrebarima wãibara, jaradiade akʉza Daizeze Bedʼeata ewariza akʉibara, mawũã nekʼãrẽ Daizezedebema ʉ̃rʉ krĩcha bʼaita (Filip. 4:​8, 9). Bʉa Daizeze Bedʼea akʉnʉmʉena krĩchara kʼai ẽbẽrata zʉbʉriade berabarisita akʉza Jeowaba sãwũã kʼarebasita naʉ̃ ẽbẽra zarea bʼaita. w24.10 9 parr. 12-14

Jeowaba Jesúsʼʉ̃meba ẽbẽrarã kãgapanʉ, abarika dayirãbida kãgapanʉ maʉ̃rane kĩrãkʼa (Prov. 8:31). So borekeata ũdubipanʉ ẽbẽrarã Daizeze neẽãbʉ kĩrãkʼa bʉra akʉza kʼãrẽ bia jʉ̃ãbʉ ẽãra (Efes. 2:12). Ẽbẽrarãba mejãchade erbʉ bedʼea zromata, mamina dayirãba erpanʉ ãyi kʼarebaira, maʉ̃ra bedʼea bia Daizeze Nokʼodebema. Dayirãba naʉ̃ra ẽbẽrarãta kãga baera akʉza so borekea akʉpanʉ baera naʉ̃ra ẽbẽrarã jaradiakĩrãpanʉ bedʼea bia Daizeze Bedʼeadebemata. Maʉ̃ bedʼea bia ãyi soidu zebʉrʉde, kʼarebabʉ nebia jʉ̃ã bʼaita ʉ̃ra zeide akʉza idi ewade audre sobia bamarẽã, adewara kʼarebabʉ ʉ̃ra zeidebida jʉ̃ãpanamarẽã ewari jõmaʉ̃nẽ bʼaita (1 Tim. 6:19). Ẽbẽrarãta kãga baera ãyaʼa jaradiapanʉ naʉ̃ drʉa jõira arakʼaitabata (Ezeq. 33:​7, 8). Kãgapanʉ ẽbẽrarãba kʼawuadamarẽã zʉbʉria zroma zebʉrʉ ewaride kʼãrẽ berabarita, nããra religion zeri ẽãrãra jõma jõbiyi, maʉ̃are Diaruba zokʼabʉrata jõma jõbiyi Armagedónʼne (Apoc. 16:​14, 16; 17:​16, 17; 19:​11, 19, 20). w24.05 16, 17 parr. 8, 9

Pabloba kristianora jarasi iduaribimarẽã «Daizeze kĩrʉbiba kʼawua omarẽã». Dayirãbara maʉ̃ ũrãgʼata ũrĩpanʉ awururaba zʉbʉriabibʉrʉde jõma Jeowa juwade amaepanʉne, iya krĩchabʉ ewaride kʼawua omarẽã yi dayirã zʉbʉriabibʉra, maʉ̃ta osi Johnba mebẽã abaʉba iyi zʉbʉriabiside. Iya jarabʉ: «Mʉ̃ara zarea oibarabasi kĩrʉbia yi edebi ẽ baita, mawũã kayirua oẽ baita, maʉ̃ oira zarebasi. Mamina Romanos 12:19ba kʼarebasi mʉ̃a jʉ̃ã kʼawuabʉ ũdubita akʉza Jeowa ʉ̃rʉ ĩjãita». Dayirãba jõma Jeowa juwade amaepanʉbʉrʉ akʉza jʉ̃ãpanʉbʉrʉ, iya jõma sãwũã kʼawua oita mawũãra mejãcha zʉbʉria ẽ bayi. Bari jaraita, maʉ̃ kʼarea mejãcha sopʉa ẽ bayi akʉza krĩcha zroma oẽ bayi maʉ̃ sãwũã ara oi kʼarea. Jeowaba dayirãra kʼarebakĩrãbʉ, iya dayirã jarabʉ kĩrãkʼabʉ: «Idʉaribira jõma mʉ̃a kʼawua oita». Jeowaba jarabʉ iya jõbita dayirã zʉbʉriabibʉra akʉza iyara dayirã bedʼea zroma sãwũã ara oira audre yibiata dayirãba oita krĩchabʉira, maʉ̃ba dayirãba maʉ̃ ʉ̃rʉ ĩjãpanʉbʉrʉ Jeowaba kʼarebai jʉ̃ãbʉeda mejãcha krĩcha zroma oẽ bayi maʉ̃ kʼarea. w24.11 6 parr. 14, 15

Dayirãba jʉra kʼawuapanaibara nebiata aukʼara jʉrʉnʉma ẽ baita. Maʉ̃ta kʼawuaseapanʉ apostol Pabloba kristianora jaradadeba. Iyara jarasi israelitaraba oda kĩrãkʼa oda ẽ marẽã (1 Cor. 10:​6, 7, 11). Jeowabara ãyaʼa yikota diasi mamina ãyara bia akʉda ẽ basi maʉ̃ra, ¿kʼãrẽa? Ãya nebiata audre kãgapanasi baera (Núm. 11: 4-6, 31-34). Adewara paka zake oro oma yiwidʼisidadera, ũdubisida ãyitara audre yibiata nekoita, nekʼãrẽ doita akʉza bia berabarita Jeowaba zokʼabʉ oi kaude (Éx. 32:​4-6). Pʉwʉrʉ Jerusalénta akʉza Jerusalén templo jõita arakʼaita babʉrʉde, Pabloba kristianora jarasi jʉra kʼawuapanamarẽã israelitara kĩrãkʼa bada ẽ baita. Abarika idi ewadera dayirãra panʉ naʉ̃ drʉa jõbodoare, maʉ̃ kʼarea dayirãra jʉra kʼawuapanaibara israelitara kĩrãkʼa pana ẽ baita. w24.12 6 parr. 13

Jeowara mejãcha sobiabʉ baera kãgabʉ wuabema ẽbẽrasida iyi kĩrãkʼa sobia bamarẽã (1 Tim. 1:11). Maʉ̃ba dayirã nekʼãrẽ mejãcha diasi dayirãba nekʼãrẽ nesidabʉta mawũã sobiapanamarẽã, maʉ̃ne edabʉ juwa jida bʼaita (Sant. 1:17). Bari jaraita, ẽbẽra juwa jidapanʉnera jarapanʉ ãyira ewari jõmaʉ̃nẽ yi kãgapanaita akʉza yiya wawia ũdubipanaita. Ãya maʉ̃ta opanʉbʉrʉ ewari jõmaʉ̃nẽ sobiapanañi. Mamina ãyi mawũã juwa jidabʉrʉde yi kima jaradara jipa kĩrãduabare, maʉ̃ba sobiabʉ ẽ. Jeowabara kãgabʉ yumakẽrãbara yi kimaʼa wawia ũdubimarẽã. Maʉ̃ kʼarea yumakẽrãba yi kima bia akʉira kãgade erbaibara akʉza bia edaibara (1 Ped. 3:7). w25.01 8 parr. 1, 2; 9 parr. 4, 5

Pabloba Hebreos Kartade jaradabara, kʼarebasi nããbema kristianoraba kʼawuadamarẽã kʼãrẽta oibarata zʉbʉria zroma zebʉrʉde. Maʉ̃ne Pablobara jarasi Daizeze Bedʼeara biʼia kʼawuadamarẽã akʉza ũrĩnamarẽã, naʉ̃ba kʼarebaibasi baera sewa nebʉrʉ jarabʉrʉde maʉ̃ʼa yi edebi ẽ baita, mawũã ãya ĩjãbʉta aduada ẽ marẽã. Adewara Pablobara kʼarebasi mebẽrãba ĩjã erbʉta audre zarea bamarẽã akʉza odamarẽã Jesúsba zokʼada kĩrãkʼa. Akʉza mebẽrã kongregasion nãã edepanʉra bedʼeasida ũrĩnamarẽã. Pablobara jaradiasi nããbema kristianora ãyi pẽwãbʉdade zʉbʉria opanʉra, Jeowaba mawũã iduaribibʉta ãyaʼa jaradiaita awuanta kʼawuadamarẽã. Idi ewadebida dayirãba Daizeze Bedʼeaba jarabʉ kĩrãkʼa odara, naʉ̃ba kʼarebayi dayirãba ĩjãpanʉra audre zarea erbaita jõñiena (Heb. 3:14). w24.09 13 parr. 17, 19

Daizeze Bedʼeadera ẽdrʉbibara jarakĩrãbʉ nekʼãrẽ diaita debebʉta pagaita, maʉ̃me ibiade bʼaita akʉza jipa wua kĩrãbe ẽ baita iya aña odata. Jeowaba maʉ̃ kĩrãkʼa osi dayirãba aduada jẽda erbaita. ¿Sãwũã? Kĩrãbedadrʉ Adán Evaʉ̃mebara aduasidata ãyi ewari jõmaʉ̃nẽ bʼaita akʉza nekayirua oka bʼaita. Maʉ̃ kʼarea Jeowaba dayirã ẽdrʉbira maʉ̃ kĩrãkʼabʉta diaibarabasi (1 Tim. 2:6). Dayirãra ẽdrʉbiseabasi yumakẽrã naʉ̃ nekʼãrẽ ũbea ũdubibʉba: Aba, nemitia okabaibarabasi. Ũme, ewari jõmaʉ̃nẽ baseabaibarabasi naʉ̃ egorode. Ũbeata, iyi bebʉta dayirãbari diakĩrãbaibarabasi. Akʉdaya bedʼea ũbea kʼãrẽa Jesúsbʉrʉ dayirãra ẽdrʉbiseabasita nemitiadeba. Aba, iyira nemitiata okabasi baera (1 Ped. 2:22). Ũmeta, ewari jõmaʉ̃nẽ baseabasi naʉ̃ egorode. Ũbeata, dayirã jõmaʉ̃bari beikĩrãbasi (Heb. 10:9). w25.02 4, 5 parr. 11, 12

Jeowabara kãgabʉ bʉra akʉza kãgabʉ iyi pʉwʉrʉde bamarẽã. Siglo nããbemane Jesúsba iyi kʼaidubemara ʉ̃kʉrʉra naʉ̃ta jarasi: «Mʉ̃a wãrĩnu mara jaraya, mostaza ta kĩrãkʼa wiña ĩjãpanʉbʉrʉ, katuma jaraseabʉ zawa kuba wãra, mama kuba wañi. Mawũãra maraba kʼãrẽ oẽãra neẽbaya» (Mat. 17:20). Maʉ̃ ewaridera ẽbẽrarã Jesús kʼaidu badarabara ʉ̃rabʉrʉ ĩjãpanʉ baera, nesidabasi ewariza ãya ĩjãbʉra audre ĩjãbi wãnamarẽã. Maʉ̃ kʼarea Jesúsba jarasi ãyita zarea odara audre ĩjãita Jeowa ʉ̃rʉ, mawũãra Jeowaba kʼarebaita ẽdrʉdamarẽã badu bedʼea zromaneba. Jeowabara bʉsida iyaba kʼarebayi. Bʉa kʼawuabʉbʉrʉ kʼãrẽba bʉ buru kʼoebi ẽãta, nekʼãrẽ mesera ara ora, mawũã buru kʼoeita. Bʉ bebʉ Jeowaʼa diara akʉza buru kʼoera, Jeowa ode bʼaira jipade yibia, neẽ maʉ̃ kĩrãkʼara. w25.03 6, 7 parr. 18-20

Davidbara ewari jõmaʉ̃nẽ kĩrãbebasi Jeowabara iyira kʼarebaita, maʉ̃ kʼarea dayirãba iyide kĩrãkʼa opanʉbʉrʉ bedʼea zroma zebʉrʉdera awuantadayi. Dayirãba krĩchapanʉbʉrʉ Jeowaba naena sãwũã kʼareba zebʉrʉta, dayirãbara audre zarea ĩjãseabʉ (Is. 37:​17, 33-37). Adewara jw.org de ũduseabʉ Jeowaba sãwũã kʼareba zebʉrʉta iyi odepanʉrãra. Adewara krĩchara bʉra Jeowabara sãwũã kʼarebasita naena. Kĩrãbera Jeowaba bʉ sãwũã kʼareba zebʉrʉta. Bari jaradaita, iya jarabʉ iyi neũdukʼawua ba zemarẽã (Juan 6:44). Yibiabayi Jeowa widita kĩrãbebimarẽã sõbede panʉsita bʉa wididara, bʉ kʼarebadata akʉza sõbede bedʼea zromaneba ẽdrʉbidata. Bʉa kĩrãbebʉbʉrʉ Jeowaba sãwũã kʼareba zebʉrʉta audre ĩjãbayi Jeowaba bʉra tẽã kʼarebaita. w24.06 21 parr. 8

Dayirã jõmaʉ̃ta zarea odaibara yi kayiruade bae ẽ baita. Wãrĩnubaira jõma mebẽrã Jeowa odepanʉrãra Jeoware kʼẽrẽpa bakĩrãpanʉ, iyideba jĩga wãmapanʉ, mamina dayirãra kayirua omia baera, kayiruata oseapanʉ (Rom. 7:​21-23). Dayirãba jʉ̃ã ẽãne ũduseabʉ bedʼea zroma dayirã kayiruade baebiseabʉta, mamina dayirãta Jeoware kʼẽrẽpa bakĩrãpanʉbʉrʉ akʉza Jesúsʼare kʼẽrẽpa bakĩrãpanʉbʉrʉ, ũrĩbara Jesúsba jaradata, ʉrʉmapanaibara. Dayirã jõmaʉ̃ba ũduseapanʉ dayi yi kayiruade baebiseabʉta, mamina dayirãnebema aba abakaʉba erbʉ saʉ̃ kayiruade audre mesera baeseabʉta. Bari jaraita, ʉ̃kʉrʉra zarea opanʉbaibara juwa jidaena mia erkʼãĩ ẽ baita, adewara ʉ̃kʉrʉbara zarea obʉbaibara ãyikʉza ãyi kakua tã ẽ baita, adewara ẽbẽrarã ãkadabe akʉ ẽ baita, mawũã ẽ bʉrʉ ʉ̃kʉrʉra zarea opanʉbaibara naʉ̃ drʉadebemabʉ kĩrãkʼa ba ẽ baita. Bari jaraita, ʉ̃tabʉta krĩcha ẽ baita, ẽbẽrarã kʼarea pera ẽ baita akʉza kĩrʉmia ẽ baita. w24.07 14 parr. 3; 15 parr. 5

¿Naʉ̃ yumakẽrãra sãwũã sentikasi iya nemitia oda kʼarea jẽda krĩchabʉta ũdubisidu zõrãrãbara jẽda kongregasionma zebi ẽ basibʉrʉ? adewara ¿sãwũã sentikasi jẽda kongregasionʼena zebʉrʉde mebẽrãba bia edada ẽ basibʉrʉ akʉza kãgabʉta ũdubida ẽ basibʉrʉ? Pabloba jarasi naʉ̃ yumakẽrãta bia edada ẽ basibʉrʉ, iyira mejãcha sopʉakasita akʉza zarea neẽã sentikasita, adewara krĩchaseabasi iya kʼãrẽ nebia jʉ̃ãira neẽãta akʉza wua Jeowa neũdukʼawua babe ẽãta. Adewara, ¿kʼãrẽta berabariseabasi kongregasionebemaraba naʉ̃ yumakẽrãta bia edada ẽ basibʉrʉ? Naʉ̃ yumakẽrãta bia edada ẽ basibʉrʉ, ãyisida Jeowadeba jĩga wãseabasi, ¿kʼãrẽa mawũã jarapanʉ? Ãya naʉ̃ yumakẽrãta bia eda ẽ basibʉrʉ, Jeowade kĩrãkʼa so zʉbʉria akʉbʉta ũdubida ẽ bakasi, awuarabʉrʉ ãyara Diarude kĩrãkʼa onʉmakasi. Diarura jipade ẽbẽra kayirua, Diarubara mia abaʉta kãga ẽ. Ãya mawũã opanasibʉrʉ Diaruta kʼarebabʉ kĩrãkʼabakasi maʉ̃ mebẽã sopʉabita akʉza Jeowadeba jĩga wãbita (2 Cor. 2:​10, 11; Efes. 4: 27). w24.08 16, 17 parr. 7, 10, 11

Jesúsbara kongregasionʼra akʉbari zõrãrãta diasi dayirãʼa. Nããbema siglodera kongregasion akʉbari zõrãrãne dia bʉesida Pablota, Bernabéta akʉza wuabema mebẽrãta kʼarebadamarẽã kongregasionta audre zarea bʼaita (Hech. 11:22; 15:​40, 41). Kongregasion akʉbari zõrãrãra badua aña wãpanaibara ãya akʉpanʉ baera kongregasionʼrata. Edaʉde awuru kongregasion akʉ wãira jĩgara wãibara. Semanaza ãyara diskursota diabʉ, mebẽrã kongregasione panʉta akʉ wãpanʉ, mawũã so zarea diaita, ãba yi jʉrebʉ yi nãã edebarirabawara akʉza zõrãrãbawara, Daizeze Bedʼea jaradia wãi nãã, bedʼea biata jaradiabʉ adewara zarea obʉ jõma daucha erbaita asamblea regionalʼita, adewara asamblea sirkuitodebemata, mawũã mebẽrãba jõma bia ũrĩnamarẽã, adewara ãyira zarea opanʉ eskuela yi nãã edebariraita oita, poagaza ãba yi jʉreita yi nãã edebarirabawara akʉza Betelba nekʼãrẽ awuru omarẽã zokʼabʉta opanʉ. w24.10 21 parr. 12, 13

Jeremíasba jarasi Jeowa bedʼeadata idibema testode. Pabloba jaraside Jeowaba dayirã nemitia wua kĩrãbe ẽãta maʉ̃ bersikuloba jarabʉta jarasi (Heb. 8:12). ¿Kʼãrẽta jarakĩrãbʉ maʉ̃ba? Daizeze Bedʼeade «kĩrãbei» jarabʉbara ewari jõmaʉ̃nẽ jarakĩrãbʉ ẽ naweda kʼãrẽ berabaridata jẽda krĩchaita. Edaʉde jarakĩrãbʉ nei oita, bari jaraita yumakẽrã Jesús kʼawa ʉ̃tʉ kachi jirabadaba, Jesúsʼa jarasi iyita kĩrãbemarẽã Jesúsba Daizeze Nokʼo zokʼabʉrʉde (Luc. 23:​42, 43). Naʉ̃ yumakẽrãba maʉ̃ jarasidera jarakĩrãkʉa ẽ basi Jesúsba ʉ̃tʉ zokʼabʉrʉde iyita bari krĩchamarẽã, awuarabʉrʉ iyita kʼarebamarẽã kãgabasi akʉza Jesúsba jaradaba ũdubisi maʉ̃ ẽbẽra wãrĩnu kʼarebakĩrãbasita, iyara jẽda piradrʉbikĩrãbasi. Maʉ̃ kʼarea Jeowaba dayirã nemitia wua kĩrãbe ẽ baita jarabʉbʉrʉ, naʉ̃ba jarakĩrãbʉ iyara badua dayirã jaranʉma ẽ baita dayirãba kʼãrẽ aña odata akʉza jʉrʉ ẽ baita dayirã sãwũã zʉbʉria oita akʉza jipa kĩrãduaita dayirã nemitiara. w25.02 11 parr. 14, 15

Dayirãba biʼia ũrĩ kʼawua bʼaira akʉza kʼawuabaibarata Jeowaba kʼãrẽ nebiata erbʉta iyi sode, iya kʼãrẽta oita krĩchabʉta akʉza iya kʼãrẽta kãgata, mawũã ẽ bʉrʉ kʼãrẽta jʉrata. Bʉara mawũã jõma kʼawuada tẽã, bʉyikʉza krĩchaseabʉ, mʉ̃ara kʼawuabʉ Jeowa sãwũã krĩchabʉra, maʉ̃ba atiara ¿kʼãrẽta oita jidayi mawũã iyi sobiabita? (Efes. 5:17). Edaʉde dayirãba nekʼãrẽ oita jidabʉrʉdera, maʉ̃bara Jeowata sobiabibʉ, mamina dayirã mebẽrãra sobiabi ẽ. Krĩchadaya naʉ̃ ʉ̃rʉ. Yibariraba kãgapanʉ ãyi kauta juwa jidamarẽã yumakẽrã plata erbʉme, mawũã ẽ bʉrʉ ãyaʼa dote biata diaseabʉme, maʉ̃ yumakẽrã Jeowa ode biabʉ ẽ mina. Maʉ̃nera yibiabayi yuwẽrãba iyikʉza krĩchaita: ¿Naʉ̃ yumakẽrãbara kʼarebaseabʉka mʉ̃ra Jeowaʉ̃me bia bʼaita? Naʉ̃ yuwẽrãba Jeowaba kʼãrẽta krĩchabʉ kʼawuaira akʉibara Mateo 6:33ba jarabʉta, nama jarabʉ Jeowa odepanʉrabara jõmaʉ̃ba nããra bʉeibarata Jeowa Nokʼota. Wãrĩnubaira, dayirã jõmaʉ̃ba kãga akʉza wawiapanʉ dayirã yibarirãra akʉza ẽbẽra komunidadebemarasida wawia ũdubipanʉ. Mamina dayirãitara audre yibia Jeowata sobiabita. w25.01 17 parr. 9, 10

Idi ewadera mejãchaʉba pẽwãpanʉ Daizeze Bedʼea jaradiapanʉ kʼarea. Maʉ̃ba dayirãbara nesidapanʉ Jeowa kʼarebata (Apoc. 12:17). ¿Sãwũã kʼawuapanʉ Jeowaba wãrĩnu kʼarebaita? Jesúsba Juan 17de jaradadeba, iya Jeowaʼa yiwidʼibʉrʉde jarasi akʉmarẽã iyi kʼaidubemarata. Jeowabara ũrĩsi iyi bedʼeara, kʼarebasi iyi kʼaidupanʉrãra. Libro Hechosde kʼawuapanʉ Jeowabara kʼarebasita Jesús kʼaidubemarãra Daizeze Bedʼea jaradiakĩrãne jaradiapanamarẽã ãyi pẽwãpanasimina. Jesús yiwidʼiside jarasi Jeowaʼa akʉmarẽã iyi kʼaidupanʉrata adewara jari ẽbẽrarã iyi kʼaidupanʉraba jarabʉ ĩjãnarasida. Maʉ̃nebʉ bʉsida, maʉ̃ kʼarea Jeowabara idibasidu ũrĩbʉ Jesúsba jaradara. Maʉ̃ba dayirãbara ĩjãseabʉ Jeowaba nããbema apostolera kʼarebada kĩrãkʼa, dayirãsida wãrĩnu kʼarebaita (Juan 17:​11, 15, 20). Naʉ̃ ewari jõbodoarera Daizeze Bedʼea jaradiaira audre zarea wã. Mamina Jesúsba jarasi Jeowaba dayirã kʼarebaita akʉza zarea diaita mawũã ẽbẽrarã Daizeze Bedʼea jaradiakĩrãne jaradiapanamarẽã (Luc. 21:​12-15). w25.03 17, 18 parr. 13, 14

Jeowa pʉwʉrʉra mejãcha sobiapanʉ ãya Jeowaʼa biga diapanʉ baera. Dayirãba wãrĩnu kʼawuadaba, Daizeze Bedʼeade bedʼea bia ũdubʉba akʉza Jesús beidadeba nebia jʉ̃ãbʉba kʼarebabʉ dayirã so aduʼa bʼaita. Naʉ̃ ʉ̃rʉ bedʼeabʉrʉba dayirãra wãrĩnu sobiabibʉ (Sal. 34:8; 133:​1-3). Ẽbẽrarã ẽjũã kĩrãwãreã jauredebemane edapanʉbara, ũdubipanʉ kãgata akʉza ãba bakĩrãpanʉ. Idi ewade mawũãpanʉba dayirãʼa krĩchabibʉ ẽjũã kĩrãwãreã zebʉrʉdera sãwũã audre yi kãga ũdubidaita akʉza ãbapanaita (Col. 3:14). Baduta wãrĩnu sobia bakĩrãbʉbʉrʉ eda wãibara ẽjũã kĩrãwãreã jauredebemane. Krĩcha ẽ baibara ẽbẽraba sãwũã krĩchabʉta Jeowa ʉ̃rʉ Kʼawuabipanʉrã ʉ̃rʉ, maʉ̃rãra Jeowaitara akʉza yi mebẽrãitara ẽbẽra bia baera (Is. 65:15). w24.04 21, 22 parr. 7, 8

Dayirãbara, ¿sãwũã kʼarebaseapanʉ mebẽrã dobabʉ mia kʼãĩkĩrãbʉra? Maʉ̃itara dayirãra jʉra kʼawua bedʼeaibara (Efes. 4:29). Dayirãbara naʉ̃ ʉ̃rʉ krĩchaibara, ¿mʉ̃a i jaramia jarabʉdeba, mawũã ẽ bʉrʉ mʉ̃a bedʼea jarabʉdeba, sopʉa sentibibʉka maʉ̃ mebẽãra, mawũã ẽ bʉrʉ mʉ̃a jarabʉdeba ãyaʼa krĩchabibʉka ãyira juwa jidaibarata? Mʉ̃a ũdubʉrʉde mebẽrã dobapanʉrata yiya bedʼeakʉanʉta maʉ̃nera, ¿krĩchadogoka ãyira yi kãgakʉpanʉta? (1 Tim. 5:13). Adewara zarea odaibara mebẽrã dobapanʉra krĩchabi ẽ baita biga ẽãta ãyi waidide doba bʼaira. Mawũã jaraikaʉde zarea odaibara mebẽrã dobapanʉra biga diaita, ãyi kʼãwũã zarea obʉ baera doba bʼaita. Dayirãba krĩchapanʉbʉrʉ mebẽã aba kima bia ba zeseabʉta mebẽã wẽrã abaʉita maʉ̃nera, ¿kʼãrẽta oi? Daizeze Bedʼeaba jarabʉ dayirãbara krĩchaibarata awuru ẽbẽrasida sãwũã sentibʉ ʉ̃rʉ (Rom. 15:2). Ʉ̃kʉrʉ mebẽrã dobapanʉrabara kãga ẽ ãyaʼa kima jʉrʉ diadamarẽãra. Maʉ̃ kʼarea wawiaibara ãya kʼãrẽ oi jidabʉra (2 Tes. 3:11). Edaʉde ʉ̃kʉrʉ mebẽrãbara kãga ãyaʼa kima jʉrʉ diadamarẽãra, mamina ãya dayirã kʼarebamarẽã jara ẽ nebara, jara ẽ baibara kʼaiʉ̃me mia kʼãĩbarata (Prov. 3: 27). w24.05 24, 25 parr. 14, 15

Idi ewadera dayirãbara badu ewaride bedʼea zromata ũduseabʉ, maʉ̃ba dayirã bebʉra atiaʉde awuara baseabʉ. Mamina kʼãrẽ bia kʼawuapanʉ baera Jeowaba dayirãta kʼarebaseabʉta. Dayirãba bedʼea zroma ũdubʉrʉde, ũdudara Jeowaba sãwũã kʼarebabʉta, naʉ̃ba ĩjãbibʉ Daizezera wãrĩnu zokʼaichuta, Davidba Salmo 18:46de jarada kĩrãkʼa (Sal. 18:46). Mawũãsidu tẽã Davidbara jarasi Daizezera mʉ̃ Mõgara. Mamina, ¿kʼãrẽa jarasi Davidbara Daizezera mõgara kĩrãkʼabʉta? Daizeze Bedʼeabara jarabʉ Daizezera mõgara kĩrãkʼabʉta, mawũã dayirã jara ũrĩbita iyi sode kʼãrẽ nebia erbʉ ʉ̃rʉ. Akʉza ẽbẽrarã iyi ode kʼẽrẽpabadaraba iyi nebia ʉ̃rʉ bedʼeabʉrʉdera jarapanasi iyira mõgara kĩrãkʼabʉta. Deuteronomio 32:4debʉrʉ jarakata jarasi Daizezera Mõgarata akʉza Anabida jarasi «neẽ mõgara Daizeze kĩrãkʼa bʉra» (1 Sam. 2:2). Habacucbida jarasi Jeowara iyi Mõgarata (Hab. 1:12). Salmo 73 bʉdabida jarasi Daizezera mõgara iyi sodebemata (Sal. 73:26). Adewara Jeowabida jarasi iyira Mõgarata (Is. 44:8). w24.06 26 parr. 1, 3

Nokʼora Israeldebema Jeowaba kãgabʉdebʉrabara iyaʼa yiwidʼipanasi soiduba. Daizeze Bedʼeaba jarabʉ nokʼo Josías kĩrãkʼara neẽbasita awuru nokʼo kʼãwũã soiduba jẽda Jeowama zebʉrʉra (2 Rey. 23:25). Salomónbara iyi beibodoare nemitiata osi iyi sode, iya soiduba oẽ basi baera Daizezeba zokʼabʉta (1 Rey. 11:4). Adewara Abiyam ʉ̃rʉbida Daizeze Bedʼeaba jarabʉ iyara soiduba oba ẽ basita Jeowaba zokʼabʉra (1 Rey. 15:3). Edaʉde Daizeze Bedʼeaba bedʼea soiduba jarabʉrʉdera jarakĩrãbʉ daya kʼãrẽ krĩchabʉta, daya kʼãrẽ kãgabʉta akʉza kʼãrẽta okĩrãbʉta, dayi sãwũãbʉta, nekʼãrẽ obʉrʉde kʼãrẽ kʼãrẽa mawũã obʉta akʉza daya nekʼãrẽ okʼawuabʉta. Mawũẽra, ¿kʼãrẽta jarakĩrãbʉ soiduba oita Jeowaba zokʼabʉta? Ẽbẽra abaʉba Jeowaba omarẽã zokʼabʉta obʉbʉrʉ iya maʉ̃ra obʉ ẽ bari oibara baera, awuarabʉrʉ Jeowaʼa kãga ũdubikĩrãbʉ baera akʉza wawiabʉta. w24.07 21 parr. 4, 5

Isaías 44:22de Jeowaba awuru yizata zokʼabʉ ũdubita iya dayirã nemitiara jipa kĩrãduabʉta, nama jarabʉ: «Bʉ nemitiara mʉ̃ara jipa ãĩ bʉeyi jãrãraba ara anabari kĩrãkʼa, bʉ kayiruara jãrãra zromaba ara anabari kĩrãkʼa jipa ãĩ bʉeyi». Jeowaba dayirã nemitia kĩrãduabʉrʉdera dayima jãrãrã zromaba ara anabʉ kĩrãkʼabʉ, mawũã mia abaʉba wua ũduda ẽ marẽã. ¿Kʼãrẽta jaradiabʉ naʉ̃ra yizara jõmaʉ̃ba? Dayirãbara krĩchada ẽ baibara Jeowaba dayirã nemitia kĩrãduabʉrʉdera iya maʉ̃ra tẽã kĩrãbeita. Dayirã nemitiara Jesús beidaba jõma pagasi baera, maʉ̃ra jõma jipa jare wãbʉ akʉza dayima maʉ̃ kayiruara oka bada kĩrãkʼabʉ. Jeowaba dayirã nemitia kĩrãduabʉrʉdera maʉ̃ta obʉ, iyara dayirã nemitiara jipa kĩrãduabʉ. Jeowaba so zʉbʉria akʉbʉba kʼarebabʉ jẽda iyi neũdukʼawua bia bʼaita akʉza krĩcha ẽ baita Jeowabara dayirã kayiruara waidide jõma kĩrãdua ẽãta. w25.02 10, 11 parr. 11-14

Jeowabara zokʼabʉ zõrãrãta kongregasion neneẽã erbamarẽã (1 Cor. 5:7). Adewara zõrãrãbara nekʼãrẽ jõma opanʉ nemitia odaba jẽda krĩchamarẽã. Maʉ̃ba nemitia odata kʼarebabʉdadera, ãyara audrera kãgapanʉ naʉ̃ ẽbẽraba jẽda krĩchamarẽã. ¿Kʼãrẽa mawũã kãgapanʉ? Jeowade kĩrãkʼa okĩrãpanʉ baera. Jeowabara kãga akʉza so borekea akʉbʉ (Sant. 5:11). Apostol Juanbara mebẽrã kongregasionebemara kãga akʉbasi. Iya bʉsi: «Marara mʉ̃ warrara kĩrãkʼabʉ baera, mʉ̃a naʉ̃ta bʉbʉ nekayirua oda ẽ bamarẽã. Mamina, abaʉba nekayiruata ora, erpanʉ kʼareba Daizeze kʼawabʉta: Jesukristota, iyara nejõma aripe obʉ» (1 Juan 2:1). Mamina bʉ, mebẽrã ãya nemitia oda kʼarea jẽda krĩcha ẽãta. Mawũã berabaribʉrʉdera naʉ̃ ẽbẽrarã kongregasioneba ãĩ wãibara. w24.08 25 parr. 19, 20

Bʉara edaʉde krĩchabaribaibara awuru mebẽrãba sãwũã Jeowa kʼarea nekʼãrẽ audre obʉta akʉza bʉa sãwũã ãyide kĩrãkʼa obe ẽãta. Mawũã krĩchabaribʉrʉ zarea ora mawũã wua krĩcha ẽ baita. Jeowabara akʉnʉmʉ ẽ baera saʉ̃ba iyaʼa audre dianʉmʉta akʉza saʉ̃ba iyaʼa audre eda dianʉmʉta (Gál. 6:4). Bari jaradaita, Maríabara aseite mejãcha balebʉta Jesús jĩrʉne weasi (Juan 12:​3-5). Mamina pẽdrabara Jeowa templodera moneda ũme diasi, naʉ̃ra monedara mejãcha bale ba ẽ basimina (Luc. 21:​1-4). Jesúsbara akʉ ẽ basi naʉ̃ra wẽrãra ũmenebemaba saʉ̃ba audre wiña diasita akʉza saʉ̃ba mejãcha diasita, iyimara naʉ̃ra wẽrãra ũmeba ũdubisida wãrĩnu ĩjãbʉta. Abarika Jeowabida akʉ ẽ dayirãnebemaba saʉ̃ba audre diabʉta akʉza saʉ̃ba audre wiña diabʉta, awuarabʉrʉ dayirãba nekʼãrẽ obʉrʉde iyita kãga baera akʉza iyi ʉ̃rʉ ĩjãbʉ baera mawũã opanʉbʉrʉ, Jeowabara naʉ̃ra biʼia akʉbʉ dayirãita kʼãrẽ ẽ kĩrãkʼabʉmina. Dayirã jõmaʉ̃ta bedʼea abaʉ kʼarea krĩcha opanʉ. Mamina Daizeze Bedʼeaba kʼarebayi Jeowaba maʉ̃ ʉ̃rʉ sãwũã krĩchabʉta kʼawuaita. Bʉa maʉ̃ta obʉbʉrʉ bʉ sora aduʼa beyi. Jeowabara wãrĩnu krĩchabʉ bʉ ʉ̃rʉra akʉza bʉa iyi Nokʼota nãã bʉeya nekʼãrẽ idubʉsibʉrʉ Jeowabara maʉ̃ra kĩrãdua ẽ, iyira sobiabʉ maʉ̃ kʼarea akʉza aranʉbai nebiata diayi bʉa naʉ̃ta obʉ kʼarea. Jeowabara iyi ode kʼẽrẽpapanʉrãra jõmaʉ̃ta mejãcha kãga akʉza sobiabʉ ãya kʼãrẽ obʉ kʼarea. w24.10 25 parr. 3; 29 parr. 17, 18