Agosto

Yiwidʼipanʉ Jeowaba kʼarebamarẽã ẽbẽrarãba dayirãba jaradiabʉta ũrĩkĩrãnamarẽã, mawũã Jeowaba jarabʉta odamarẽã ãyabida mamina, ¿kʼãrẽta sãwũã berabari ẽbẽrarã Daizeze Bedʼea ũrĩkĩrã ẽãra akʉza dayirã mebẽrã arasida? Jeowabara kãgabʉbaibara Babilonia zroma jõna tẽãra, ẽbẽrarã iyi ʉ̃rʉ ĩjãbʉrʉra ẽdrʉdamarẽã, mawũẽra kʼãwũãweda ewariza jaradiaibara Jeowa ʉ̃rʉ ẽbẽrarã, ãya kʼawuadamarẽã Jeowa ʉ̃rʉ akʉza dayirãbawaraʉba Jeowata kãgamarẽã. Dayirãba kʼãwũãweda Daizeze ʉ̃rʉ jaradiapanʉbʉrʉ ẽbẽrarã, bedʼea zroma zebʉrʉde maʉ̃ ʉ̃rʉ kĩrãbeyi ãyara (naʉ̃ testoʉ̃me akʉra Ezequiel 33:33). Maʉ̃ba kʼarebaseabʉ zʉbʉria zroma zebʉrʉde kĩrãbeita dayirãba jaradata, mawũã Jeowama zedamarẽã akʉza dayirãbawaraʉba Jeowaba jarabʉta oita. Bari jaraita, yumakẽrã karsel akʉbari Filipodebemata drʉa ure zebʉrʉdebʉrʉ Daizeze ode bakĩrãsi, maʉ̃ kĩrãkʼa Babilonia zroma jõbʉrʉ tẽã, ẽbẽrarãba krĩchaseabʉ dayirãba jaradiada ʉ̃rʉ, mawũã Daizezema zekĩrãseabʉ (Hech. 16:​25-34). w24.05 17 parr. 9, 10

Atia akʉdayi kʼãrẽta kʼawuapanʉta Pabloba ebreora karta bʉdadeba. Ãyidebema ʉ̃kʉrʉba Jeowata audre ũdukʼawua wã ẽ basi baera, yiko ara diai kaude, jẽda lecheta diaibarabasi wũãwũã zake kĩrãkʼa (Heb. 5:12). Jeowaba ãyaʼa kongregasioneba ewariza nekʼãrẽ jaradiabʉta kʼawuakĩrãna ẽ basi akʉza ĩjãkĩrãna ẽ basi (Prov. 4:18). Bari jaraita, Jesús beida tẽãra wua oẽ baibarabasi Moisés leyba jaradiabʉra, mamina maʉ̃neba 30 poaga berabarisidu mejãcha judioraba krĩchapanasi akʉza jarapanasi Moisés Leyba jarabʉ kĩrãkʼa oibarata (Tito 1:10). Pabloba karta ebreora dia bʉesidera kʼarebakĩrãbasi ãya ĩjãmarẽã Jeowaba kʼãrẽ nebia jaradianʉmʉta ãyaʼa, adewara ũdudamarẽã Jeowaba ãyaʼa jaradiabʉra audre yibiata ãya nãã kʼawuabadaira. Maʉ̃ kartaba kʼarebasi mebẽrã judioraba ãya ĩjãbʉta audre zarea erbamarẽã akʉza zowaĩnĩgʉata erpanamarẽã (Heb. 10:​19-23). w24.04 6 parr. 15

Adánta akʉza Evaʉ̃me Diaru kʼaidu wãnaneba ʉ̃ta ẽbẽra mejãchaʉta bei zebʉrʉ naʉ̃ drʉa jõmaʉ̃mae. ¿Kʼãrẽta berabari naʉ̃ra ẽbẽrarãʉ̃me? Bʉ ʉ̃kʉrʉ ẽbẽrarã jẽda piradrʉbʉrʉde ʉ̃ta wãita, maʉ̃rãra 144.000ra, ãyira Jesúsʼare kʼẽrẽpapanʉ akʉza beikabayi (Apoc. 14:1). Adewara ẽbẽra mejãcha Jeowaʼa kãga ũdubibadarata jẽda piradrʉyi Jeowaba biata obera jẽda piradrʉbibʉrʉde. Jesúsba mil poagabayeda zokʼabʉde akʉza maʉ̃ tẽã Diaruba ẽbẽrarã sewabʉrʉde ãyita kʼẽrẽpapanʉbʉrʉ ewari jõmaʉ̃nẽ panañi (Dan. 12:13; Heb. 12:1). Adewara Jesúsba mil poagabayeda zokʼabʉrʉde jẽda piradrʉyi ẽbẽrarã bia ẽãta oberasida, maʉ̃rane edapanʉ ẽbẽrarã Jeowa ʉ̃rʉ kʼawua ẽ badarata akʉza ʉ̃kʉrʉ yi kayirua obeadarata. Maʉ̃ne ãya kayirua oda kʼarea jẽda krĩchaseabʉ akʉza Jeoware kʼẽrẽpa baseapanʉ ewari jõmaʉ̃nẽ (Juan 5:29; Luc. 23:​42, 43). Mamina jari ẽbẽrarã krĩña Jeowaba jʉrata odapeadarãra iyara jẽda piradrʉbi ẽ bayi (Luc. 12:​4, 5). w24.05 2 parr. 3; 6 parr. 15, 17

Salmo 15:2de jarabʉ Jeowabara kãgabʉta ẽbẽrarã soiduba wãrĩnu jarabʉrata, mamina maʉ̃bara bari jarakĩrãbʉ ẽ sewidata jara ẽ baibarata, awuarabʉrʉ dayirãba nekʼãrẽ jõma obʉdeba ũdubibarata wãrĩnuta jarabʉta (Heb. 13:18). Maʉ̃ra jipade yibia, Jeowabara jʉra baera ẽbẽra kayiruara, mamina iyira neũdukʼawua bia ẽbẽrarã kʼẽrẽpapanʉmera (Prov. 3:32). Ẽbẽra abaʉba wuabemara kĩrãbitabʉde ũdubira iyira Daizezeba zokʼabʉdebʉta, mamina iyidobabʉde Daizezeba zokʼabʉdebʉ ẽ bʉrʉ, maʉ̃ ẽbẽrabara soiduba wãrĩnuta jarabʉ ẽ. Iya obʉra kayirua, dayirãra maʉ̃ kĩrãkʼa bakĩrãpanʉ ẽ. Ẽbẽra abaʉba mawũã ora, tẽã juneane krĩcha zeseabʉ Jeowaba nekʼãrẽ omarẽã zokʼabʉra bigabʉ ẽãta (Sant. 1:​5-8). Maʉ̃ ẽbẽrabara nekʼãrẽ aña owãseabʉ wiña wiñane, iya mawũã nekʼãrẽ wiña aña oda tẽã ũdura iya kʼãrẽ bedʼea zroma ũdu ẽãta, tẽã juneanera audre kayirua zromata oseabʉ. Maʉ̃ ẽbẽrama iya Jeowaba kãgabʉta obʉ kĩrãkʼabʉmina, Jeowabara bia akʉ ẽ bayi iyira (Ecl. 8:11). Mamina dayirãbara nekʼãrẽ jõmaʉ̃nẽba ũdubikĩrãpanʉ soiduba jarapanʉta wãrĩnuta. w24.06 10 parr. 7, 8

Daizeze pʉwʉrʉbara mejãcha kãga Daizeze Bedʼeara, maʉ̃ba kʼarebabʉ baera ĩjã audre erbaita (Rom. 10:17). Wãrĩnu ĩjãpanʉ Jeowaba diasita kongregasionʼra, mawũã audre ĩjãta erpanamarẽã (1 Tim. 3:15). Diaruitara bigabayi Daizeze Bedʼeaba jarabʉta ĩjã ẽ wãnamarẽã akʉza Jeowa organizasionba jarabʉta (Efes. 4:14). Aranʉbai Diarubara sewidata jarayi mawũã nokʼorata Jeowa ʉ̃rʉ bamarẽã (Apoc. 16:​13, 14). Akʉza kʼawuapanʉ Diarubara ewariza zarea oita Daizeze pʉwʉrʉ sãwũã sewaita (Apoc. 12:9). Maʉ̃ kʼarea yibiabayi dayirãba kĩrãkita kʼawuaita saʉ̃ta wãrĩnuta akʉza saʉ̃ta sewidata, mawũã oita wãrĩnuba jarabʉta (Rom. 6:17; 1 Ped. 1:22). Naʉ̃ta oibara zʉbʉria zromaneba ẽdrʉita. w24.07 8 parr. 1-3

Jeowara israelitarabawara bedʼea abarika zesi. Jeowaba israelitara jarasi iyi leyba jarabʉta opanʉbʉrʉ, iya ãyira bia akʉita akʉza kʼarebaita. Mamina israelitaraba Jeowaba ley diabʉde opana ẽ basibʉrʉ, bari jaraita, ãyita daizeze zeri ẽãra yiwidʼibasibʉrʉ, Jeowabara ãyira akʉ ẽ baibasi. Maʉ̃ kʼarea zʉbʉriadaibasi ãyira. ¿Maʉ̃ba jarakĩrãbasika Jeowabara ãyira wua kʼareba ẽ baibasita akʉza bia akʉ ẽ baibasita? Mawũã ẽ. Leyba jarabasi baera ãya Jeowaʼa kʼarebata jẽda jʉrʉdara Jeowabara ãyira kʼarebaibasita (Deut. 30:​1-3, 17-20). Mamina ãyara soiduba jẽda krĩchabʉta ũdubibarabasi, mawũã Jeowaba ãyita jẽda bia akʉmarẽã. Israelitarabara badua opanasi nemitiata. Israelitarãra ãya maʉ̃ mawũã oda kʼarea mejãcha zʉbʉriasi. Mamina Jeowabara kĩrãdua ẽ basi israelitarãra maʉ̃ kʼarea, awuarabʉrʉ propetarata zokʼa bʉeda ʉ̃rʉ zokʼabasi, mawũã iyima jẽda zedamarẽã, mawũã ãya nemitia obʉta idubʉdamarẽã akʉza iyima jẽda zedamarẽã (2 Rey. 17:​13, 14). w24.08 9 parr. 4, 5

Jesús beida tẽã kristianora Jerusalénʼne akʉza Judeade badarãra mejãcha zʉbʉria osida. Maʉ̃ ewadede ʉ̃tʉ zesi kongregasion kristianata. Maʉ̃neba ʉ̃ta kristianorãra mejãcha pẽwã jʉ̃drʉsida. 20 poaga berabarida tẽã naʉ̃ra kristianorãra mejãcha zʉbʉriasida jarraba kʼarea akʉza nekʼãrẽ mejãcha neẽ baera (Hech. 11:​27-30). Mamina poaga 61nera naʉ̃ra kristianorãra maʉ̃neba wiña aduʼanʉmedasi. Ãyara tẽã bedʼea zromata audre ũdudaibasi. Ãyi mawũã wiña aduʼabidade Jeowaba apostol Pabloʼa bʉbisi kartata, naʉ̃ba mejãcha kʼarebaibasi naʉ̃ra kristianoraba ʉ̃ra zeide bedʼea zroma ũdubʉrʉta awuantadamarẽã. Hebreos kartade Pabloba ũrãgʼata diasi kristianora ãyi kʼãwũã wiña aduʼabʉra ewari jõmaʉ̃nẽ ba ẽ baibasi baera, awuarabʉrʉ ʉ̃ra zeide ãya bedʼea zromata ũdudaibasi baera. w24.09 8 parr. 1, 2

Dayirã bedʼea zroma berabaribʉrʉdera, Jeowabara dayirã kʼãrẽaba kãgabʉta ũdubiseabʉ mebẽrã kongregasionebemaneba. Naʉ̃ra mebẽrãʼa bʉ sãwũã berabarinʉmʉta jara ũrĩbira, ãyara so zʉbʉria akʉdayi bʉra akʉza ũrĩnañi bʉ bedʼeara, mawũã ẽ bʉrʉ ãyi bʉmebʉba so zarea diaseabʉ bʉaʼa. Adewara naʉ̃ra mebẽrãbara testo Daizeze Bedʼeadebemata ũdubiseapanʉ bʉaʼa so zarea diaita akʉza bʉme ãba yiwidʼiseapanʉ (Rom. 15:4). Edaʉde mebẽrãbara dayirãʼa jara ũrĩbiseabʉ Jeowaba sãwũã krĩchabʉta, naʉ̃ba kʼarebaseabʉ dayabida aukʼara krĩcha ẽ baita dayi zʉbʉria ʉ̃rʉ. Mebẽrãbara nekʼãrẽ awurudeba kʼarebaseabʉ dayirãra. Bari jaraita, dayirã yikota diaseabʉ, mawũã ãyi kãgata ũdubita (Prov. 17:17). Mamina mebẽrãba dayirãta kʼarebamarẽã kãgabʉbʉrʉ, ¿kʼãrẽta oibara? Bʉyiareba widibara kʼarebadamarẽã, edaʉde naʉ̃ra mebẽrãbara kʼawuada ẽ baera dayirã sãwũã sentibʉra, mawũã ẽ bʉrʉ dayirãba kʼãrẽta nesidabʉra (Prov. 14:10). Bʉ neũdukʼawua audre krĩcha bia erbʉa kʼareba widira, iyaʼa jarada bʉ sãwũã kʼarebaseabʉta. Adewara kʼareba widiseabʉ zõrãrã. Zõrãrãʉ̃me bedʼeaseabʉ mõbe ãyaʼa jara ũrĩbiseabʉ bʉ sãwũã sentibʉta. Edaʉde ʉ̃kʉrʉ mebẽrã wẽrãrãra kʼareba widipanʉ mebẽrã wẽrãrãra audre krĩcha erbʉa. w24.10 10 parr. 15, 16

Idi ewadera ẽbẽrarãra ejersisio opanʉ, bia nekopanʉ mawũã ãyi bia bʼaita krĩchabʉ baera, mamina ãya bia kʼawuapanʉ zõnabape beita, maʉ̃ kʼarea ẽbẽrabara krĩchabʉ dayirãra ewari jõmaʉ̃nẽ babe ẽãta, mamina Daizeze Bedʼeade jarabʉ Juan 3:16 akʉza Juan 5:24de dayirãra ewari jõmaʉ̃nẽ baseabʉta, mawũã jarasi Jesúsbara. Ewari aba Jesúsbara pan akʉza beda wiñabʉdeba ẽbẽrarãta mejãcha nekobisi. Maʉ̃ra bigabasi, mamina maʉ̃ nrʉema Jesúsba ẽbẽrarã iyi Capernaúmʼinu jʉrʉ jʉ̃ẽna jaradara audre yibiabasi, iya jarasi ẽbẽrarã beidara jẽda piradrʉbiseabʉta, mawũã ewari jõmaʉ̃nẽ bamarẽã (Juan 6:​39, 40). Naʉ̃ bedʼeaba dayirã ĩjãbibʉ dayirã mebẽrãnebema beidara jẽda piradrʉita, mawũẽra dayirãbara jẽda ũduseabʉ mawũã ãyiʉ̃me ewari jõmaʉ̃nẽ bʼaita. w24.12 8 parr. 1, 2

Organizasion Mundial de la Saludba jarasi yumakẽrãbara yi kimara pobareta, imitia jarabareta akʉza zʉbʉria obareta. Adewara yumakẽrãbara yi kimara wuabemara daidura bia erbʉta, mamina dedara zʉbʉriabibareta. ¿Kʼãrẽa ʉ̃kʉrʉ yumakẽrãra ẽbẽra kayirua? Naʉ̃ ẽbẽrabara deda ũdubʉ baera yi zezeba pobʉta yi kimara, maʉ̃ba iyabida abarika pobʉ yi kimara. Mawũã ẽ bʉrʉ iyi bʉmae akʉbʉ sãwũã yumakẽrãbara yuwẽrãra pope zʉbʉria obʉta, mawũã iyi juwa edre bamarẽã, mawũã ẽ bʉrʉ ʉ̃kʉrʉ yumakẽrãbara akʉbʉ internetʼne ẽbẽra ãkadabeta, maʉ̃ba akʉbʉ wẽrãrãra kʼãrẽ ẽ kĩrãkʼa, iya jarabʉrʉde bʼaibarata akʉza ʉ̃kʉrʉ yumakẽrãrãra deda yibariraba jaradiada ẽ basi awururaba iyi kĩrʉbibʉrʉdera kʼãrẽta oibarata, wuabemarabawara ibiade bʼaita, maʉ̃ba ẽbẽra kayirua akʉza mia pobare. Maʉ̃ra mawũã audre ũdusi COVID-19 berabariside, audre yumakẽrãrabara zʉbʉria osi yuwẽrãra, popanasi ãyi juwa edre bamarẽã. Mamina wãrĩnubaira, yumakẽrãbara yuwẽrã mawũã zʉbʉria oira nesida ẽ. w25.01 8 parr. 2, 3

Jesúsba jara ũrĩbisi Moisés Leyba jarabʉdera kʼãrẽta audre yibiata, iya jarasi: «Kãgaibara bʉ Zeze Jeowara bʉ soiduba, bʉ kakua jõmanẽba, bʉ zarea jõmainʉba akʉza bʉ krĩchaiduba» (Luc. 10:27). Naʉ̃ba ũdubibʉ dayirãbara Jeowara kãgadaibarata dayirãba nekʼãrẽ jõma erbʉdeba akʉza dayirã so jõmainʉba, maʉ̃ne edabʉ dayirãba kʼãrẽ kãgabʉta, dayirã sãwũã sentibʉta akʉza dayirã zarea jõmainʉba ũdubibarata kãgata, adewara dayirã krĩcha sãwũã zokʼabʉdeba. Wãrĩnubaira dayirãnebemabara mia abaʉba Jeowa sãwũã krĩchabʉ kĩrãkʼara krĩcha ze ẽ bayi, mamina dayirãba wiña kʼawuaseabʉ Jeowa sãwũã krĩchabʉra Jesús sãwũã krĩchabada ʉ̃rʉ kʼawuabʉdeba, iyara biʼia ũdubibasi baera yi Zeze sãwũã krĩchabʉra (1 Cor. 2:16). w25.03 8 parr. 1

Jesúsʼra nemitia okabasi Adán nemitia oi nãã bada kĩrãkʼa (1 Cor. 15:45). Mawũã Jesús beibʉrʉba Adánba aduadata jẽda ũduseabasi (Rom. 5:19). Mawũã Jesúsʼra awuru Adánbasi. Maʉ̃ba nesida ẽ awuru yumakẽrã nemitia okata zeita Adánba aduada jẽda ũduita, Jesústa jõmaʉ̃bari beisi baera akʉza maʉ̃ta wua oẽ bayi (Heb. 7:27; 10:12). ¿Kʼãrẽne awuarabʉ ẽdrʉbita espiasionʼʉ̃mera? Espiasionbara jarakĩrãbʉ Jeowaba nekʼãrẽ jõma obʉta ẽbẽrarãta iyibawara bia bʼaita, mawũã ãyita iyi neũdukʼawua badamarẽã. Ẽdrʉbibara jarakĩrãbʉ nekʼãrẽ diaita mawũã dayirã nemitiadeba ẽdrʉbita. Jesúsʼra jõmaʉ̃bari beisi dayirã debe pagaita, mawũã dayirã nemitiadeba ẽdrʉbita (Heb. 9:14). w25.02 5 parr. 12, 13

Jeowa zokʼaibʉ kʼawuaiba kʼawuabiseabʉ kʼãrẽa berabaribʉta bedʼea zromara. ¿Sãwũã mawũãra? Dayirãbara bedʼea zromata ũdupanʉ Diaruta Jeowaʉ̃me bedʼeakasi baera. Diarubara jarabʉ ẽbẽrarãba bedʼea zroma mejãcha ũdubʉrʉdera Jeowara amaeita (Job 1:​10, 11; Prov. 27:11). Maʉ̃ kʼarea dayirãta Jeowaʉ̃me kʼẽrẽpapanʉbʉrʉ, mama ũdubidayi Jeowata wãrĩnu kãgabʉta akʉza Diarura sewa nebʉra omiata. ¿Bʉara ũdubʉka bedʼea zromara nokʼoba pẽwãpanʉ kʼarea, plata neẽ kʼarea akʉza jaradiabʉde ẽbẽrarãba ũrĩ ẽ kʼarea, mawũã ẽ bʉrʉ nekʼãrẽ awuru bedʼea zroma kʼarea? Maʉ̃ta mawũãbʉbʉrʉ, kĩrãbera bʉa obʉdeba Jeowata sobiabiseabʉta, mawũã ẽ bʉrʉ sopʉabiseabʉta. Kĩrãbera iyara daya oẽãsidu wũẽtara obi ẽãta. Jeowabara diayi zareata awuantamarẽã. w24.06 22 parr. 9

¿Bʉa kʼawuabʉka kʼãrẽba ñabasea nemitia obiseabʉra? Jʉra kʼawuabaibara dayirã maʉ̃ nekayiruade eda bae ẽ baita akʉza krĩcha ẽ baita daya maʉ̃ra oẽ baita (1 Juan 1:8). Pablobida jarasi Daizezedebema nebia erpanʉrasida nekayiruade baeseabʉta jʉra kʼawuapanʉ ẽ bʉrʉ (Gál. 6:1). Bigabayi dayikʉzaʉba ĩjãitabʉta dayi nekʼãrẽba nekayirua obiseabʉta (2 Cor. 13:5). Daya kʼawuasibʉrʉ dayi kʼãrẽba nekayirua obiseabʉta, ¿kʼãrẽta oibara? Audre zarea oibara kʼawuaita sãwũã maʉ̃ʼa yi edebi ẽ baita. Krĩchara naʉ̃ta: nããra pʉwʉrʉ zroma audura basi murota, mawũã yi nejʉraraba kʼai beada ẽ marẽã, gorogorora mejãcha bʉeibarabasi yi puertaya, yi nejʉrara eda wã ẽ marẽã mama. Mawũẽra, ¿saʉ̃ta audre bia akʉdaibarabasi? Yi puertata. Maʉ̃ kĩrãkʼa dayirãbida kĩrãkita akʉdaibara dayi kʼãrẽba ñabasea nekayirua obiseabʉta, mawũã maʉ̃ne bae ẽ baita (1 Cor. 9:27). w24.07 15 parr. 5-7

Nebia odaita idibema testobara jarabʉ kĩrãkʼa, maʉ̃ra nebiarane edabʉ Daizeze Bedʼea jaradia wãita. Dayirãba Daizeze Bedʼea akʉbʉrʉde akʉza maʉ̃ ʉ̃rʉ krĩchabʉrʉde, naʉ̃ba kʼarebayi dayirãba Jeowa ʉ̃rʉ ĩjãbʉta audre zarea erbamarẽã. Adewara audre biʼia kʼawuadayi kʼãrẽaba yibiata Daizeze Bedʼea jaradia wãita. Bʉa Daizeze Bedʼeade akʉbʉrʉdera, maʉ̃ta mesera orãra akʉza bʉa maʉ̃ ʉ̃rʉ krĩchabʉrʉdebida mesera orãra. Awuarabʉrʉ ewari jʉrʉra maʉ̃ ʉ̃rʉ pikãga krĩchaita. Adewara bʉa Daizeze Bedʼeade akʉbʉrʉde ũdura bersikulo aba bia ũrĩ ẽãta, maʉ̃ta waña berabari totorãra, awuarabʉrʉ jʉrʉra Indice de las publicaciones Watch Tower, mawũã ẽ bʉrʉ Guía de estudio para los Testigos de Jehová abʉmae. Nama bʉa ũduseabʉ maʉ̃ bersikulo ʉ̃rʉ audre bia jara ũrĩbibʉta. Mawũẽra bʉa ewarita jʉrʉbʉbʉrʉ Daizeze Bedʼea akʉbʉrʉde biʼia kʼawuaita, naʉ̃ba kʼarebayi bʉa audre ĩjãmarẽã Daizeze Bedʼeaba jarabʉra wãrĩnuta (1 Tes. 5:21). Bʉa kʼawua wã ʉ̃rʉ audre biʼia ĩjãbʉbʉrʉ, naʉ̃ba kʼarebayi Daizeze Bedʼeata sobiade jaradia wãita. w24.04 15 parr. 4, 5

Davidba kʼãwũã jarasi: «Jeowa bʉra kʼãrẽ ẽbẽra bia akʉza kĩrãduabʉ dai kayiruara» (Sal. 86:5). Miqueasba jarasi ẽbẽra abaʉba nemitia zroma obʉrʉdera, mia abaʉba Jeowade kĩrãkʼa kĩrãdua kʼawuabʉra neẽãta (Miq. 7:18). Isaíasbida kʼãwũã jarasi: «Ẽbẽra kayiruabara idubʉibara iyi ora akʉza ẽbẽra kayiruabara idubʉibara krĩcha kayiruara, jẽda zeibara Jeowama, iya so zʉbʉria akʉi baera akʉza iya biode kĩrãduabʉ baera iyi kayiruara» (Is. 55:7). Kongregasion Corintodebemarabara Jeowade kĩrãkʼa obʉta ũdubira, naʉ̃ yumakẽrãba nemitia odata kĩrãduasida akʉza ũdubisida iyira kãgapanʉta. Maʉ̃ba ũdubisi nekʼãrẽ jõmaʉ̃nẽ ãyaʼa omarẽã zokʼabʉta opanʉta. Wãrĩnubaira, naʉ̃ yumakẽrãra kongregasioneba ãĩ bʉedapeadata dããraba ẽ basi, jedeko bio berabarisi, mawũãsidu iyi mawũã ãĩ bʉebʉdaba kʼarebasi iyabida ũdubimarẽã jẽda krĩchabʉta, maʉ̃ba kʼãrẽa kongregasioneba wua ãĩ bʼaira nesida ẽ basi. w24.08 17, 18 parr. 12, 13

Idibema ewarira jipade yibia. Jesúsba aranʉbai jõma ẽbẽrarãta kʼawua oi baera. Dayirãbara kʼawuapanʉ Jesúsba ẽbẽrarã kʼawua oi ewari zeira arakʼaitabata. Iya iyi kʼaidubemara jarasi baera kʼãrẽta ũdudaibasita iyi ewaride, adewara naʉ̃ ewarinʉmʉ jõi ewaride (Mat. 24:3). Naʉ̃ propesiara ũdudayi Mateo yi zroma 24de akʉza 25de. Adewara Marcos yi zroma 13 akʉza Lucas yi zroma 21ne. Jesúsba nebʉra ũbea zokʼasi kʼarebaita dayirã jʉra kʼawuapanamarẽã. Yi nããrabema nebʉrara bedʼeabʉ, obeja akʉza kabra ʉ̃rʉ. Yi ũmenebema nebʉrara bedʼeabʉ, wẽrãra yi zake 10 panʉra ʉ̃rʉ. Ãyidebema ʉ̃kʉrʉra krĩchabarabasi akʉza ʉ̃kʉrʉta krĩcha neẽãbasi. Yi ũbeadebema nebʉrara bedʼeabʉ, nebʉra monedadebema ʉ̃rʉ. Naʉ̃ra nebʉra aba abakaʉba kʼarebayi dayirãba audre biʼia ẽza ũrĩmarẽã sãwũã dayirã aba abakaʉba kʼãrẽ obʉdeba Jesúsba kʼawua oita. w24.09 20 parr. 1, 2

Krĩchadaya Jesúsba dayirãʼa kʼãrẽ jaradia amaenata, iyara nekʼãrẽ jõma obasi kãgaba, yi Zezeta kãgabasi baera akʉza ẽbẽrarãta, iya maʉ̃ kãgata ũdubibasi baera naʉ̃ba kʼarebasi zarea trajaita akʉza wuabemara kʼarebaita nekʼãrẽ kʼãrẽ ẽ kĩrãkʼabʉta oide (Mat. 20:28; Juan 13:​5, 14, 15). Mebẽrãra, marabida nekʼãrẽ obʉta kãgaba obʉbʉrʉ Jeowaba nebiata diayi bʉaʼa akʉza kʼarebayi bʉ zõrãrã kʼarebabari bʼaita krĩchabʉta aribaemarẽã (1 Ped. 5:5). Ẽbẽrarã naʉ̃ drʉadebemabara bia akʉpanʉ jari ẽbẽrarã zarea obʉta wuabemaraira nekʼãrẽ audre bia obʼaita, mamina Jeowa pʉwʉrʉdera mawũã berabari ẽ, mebẽã abaʉba Jesúsde kĩrãkʼa nekʼãrẽ jõma obʉta kãgaba obʉbʉrʉ iyara jʉ̃ã ẽ wuabemara ʉ̃rʉ zokʼaita mia wuabemaraba iyitrʉ audre bia akʉdamarẽã. Mebẽã abaʉba krĩchabʉbʉrʉ wuabemaraba iyitrʉ audre bia akʉdamarẽã mawũã chu mebẽãra zõrãrã kʼarebabari babe ẽ, iyitara zarea bʼai baera trajo kʼãrẽ ẽ kĩrãkʼabʉta omarẽã jarabʉdade oita, mamina maʉ̃ trajo kʼãrẽ ẽ kĩrãkʼabʉ oira jipade yibia Jeowa pʉwʉrʉ kʼarebaita (Juan 10:12). w24.11 15 parr. 6, 7

Kongregasionʼra naʉ̃ drʉa jõmaʉ̃nẽbemaba nesidapanʉ yumakẽrãra Daizezeba nebia kĩrãkʼa diabʉrata (Efes. 4:8). Bʉta yumakẽrãbʉrʉ akʉza yi buru kʼoemabʉrʉ, ¿maʉ̃ne kʼarebaseabʉka bʉara? (Prov. 3:27). ¿Bʉara nekʼãrẽ jõma obʉka zõrãrã kʼarebabari bʼaita? Mawũã ẽ bʉrʉ zõrãrã kʼarebabaribʉrʉ, ¿nekʼãrẽ jõma obʉka zõrãrã kongregasionebema bʼaita? adewara, ¿zarea obʉka nekʼãrẽ awuara oita Escuela Evangelizadorʼeda wãita? Naʉ̃ eskuelade nemejãcha kʼawuayi bʉara akʉza kongregasione audre zokʼadayi bʉra. Bʉita naʉ̃ jõma oita zareabʉbʉrʉ Jeowaʼa widira kʼarebamarẽã maʉ̃nebemata aba oita (Luc. 11:13). Naʉ̃ra yumakẽrãraba kongregasione trajo bia obʉba ũdubibʉ ãyira Jesúsba zokʼanʉmʉta (Mat. 28:20). Mejãchade sobiapanʉ dayirã Nokʼo Jesúsba dayirãta mejãcha kãga baera akʉza biʼia kʼawuabʉ baera dayirãba kʼãrẽta nesidabʉta. w24.10 23 parr. 16, 17

¿Kʼãrẽba sãwũãi Daizeze pʉwʉrʉ zʉbʉriabibʉra? Daizezebara jarabʉ: «Nãã zʉbʉria ũdubadara kĩrãduai baera akʉza mʉ̃ dabʉdeba merai baera» (Is. 65:16). Jeowabara jipa jõbiyi bedʼea zroma dayirãba ũdubʉra, ewari berabari wãne mia kʼãrẽsi kĩrãbeda ẽ bayi nekʼãrẽ dayirã zʉbʉriabibadara. Idi ewade dayirã ãba yi jʉrebarima wãira, jipade yibia namara aduʼapanʉ baera akʉza krĩchada ẽ nekʼãrẽ dayirã zʉbʉriabibʉ ʉ̃rʉ. Adewara kʼarebapanʉ dayirã mebẽrãsida aduʼapanamarẽã ãyaʼa neta jauredebema ũdubibʉrʉde, kãgata, bʉzridata, neneẽãta, ibiadebʉta akʉza urumʉ̃rʉãbʉta (Gál. 5:​22, 23). Kʼãrẽ yibia dayirãra Jeowa organizasione edapanʉ baera. Yi ẽbẽrarã ẽjũã kĩrãwãreã jauredebemane edapanʉrabara ũdudayi Jeowaba nebia weya abʉra wãrĩnu aripe berabaribʉta. w24.04 22 parr. 9, 10

Yiya bedʼeapanʉnera maʉ̃ba mejãcha sobiabibʉ. Yumakẽrãta yuwẽrãʉ̃me yi bedʼea jʉ̃drʉbʉrʉdera yi krĩchara bʼaibara juwa jidaita, naʉ̃ra jemene ẽ baera. Yi bedʼeapanʉ juwa jidai ewaridera jarapanʉ yiya kãgapanaita ewari jõmaʉ̃nẽ akʉza ãyirai wawia ũdubidaita, mamina ãya maʉ̃ jarai nãã biʼia krĩchaibara. Yiya bedʼeabʉba kʼarebayi audre yi ũdukʼawuadaita, mawũã kʼawuaita juwa jidaita mawũã ẽ bʉrʉ juwa jida ẽãta. Ãya krĩchasibʉrʉ juwa jida ẽ baita maʉ̃ba jarakĩrãkʉ ẽ ãya kayirua osita, mawũã yi bedʼeapanʉba kʼarebasi baera kʼawuaita juwa jidaita mawũã ẽ bʉrʉ juwa jida ẽãta. Mebẽrã dobapanʉraba kĩrãbeibara naʉ̃ta, juwa jidakĩrãbʉ ẽ bʉrʉ, kʼãrẽa mebẽã abaʉ̃me yi bedʼea jʉ̃drʉita neẽ. w24.05 26, 27 parr. 3, 4

Edaʉde ʉ̃kʉrʉ wũãwũãraitara zare ãya ĩjãbʉta wuabemara jaradiaita. Bari jaraita, ʉ̃kʉrʉba jaradara kolegiode naʉ̃ drʉade nekʼãrẽbʉra iyidoba zesita, mama wũãwũãrãra peraseabʉ ãya ĩjãbʉ ʉ̃rʉ jaraita. Propesorera mejãchaʉta maʉ̃ ʉ̃rʉ bedʼeabʉrʉdera ãyara maʉ̃ra wãrĩnu kĩrãkʼa jarabʉ. ¿Sãwũã kʼarebaseabʉ yibarirabara ãyi wũãwũãra ãya ĩjãbʉ ʉ̃rʉ pera ẽã jaradiamarẽã? Kʼarebaidua mara wũãwũãrãra pera ẽ bamarẽã Jeowa ʉ̃rʉ ĩjãbʉ baera. Adewara sientipikora bioʉba jarapanʉ naʉ̃ drʉade nekʼãrẽ ũdupanʉra iyidoba ze ẽ basita, ãya ũdubʉrʉ baera jõma nekʼãrẽ naʉ̃ drʉadebʉba wãrĩnu ũdubibʉta kʼaiba parãnata, maʉ̃ba ãya ĩjã ẽ jõma iyidoba zedara. Wũãwũãraba ãya ĩjãbʉ zarea erbaira, widiseapanʉ awuru mebẽrã kʼãrẽba kʼarebasita ãya ĩjãita naʉ̃ drʉa parãnara wãrĩnubʉta. w24.12 18 parr. 14, 15

Jesúsbara ewari jõmaʉ̃nẽ krĩchabasi ẽbẽrarãbara ũrĩta Daizeze Bedʼeara, naʉ̃ba kʼarebasi iya jaradiakĩrãne jaradiaita ẽbẽrarã. Maʉ̃ta poaga 30de ũdusi ẽbẽrarãbara mejãcha ũrĩbʉta Daizeze Bedʼeara, maʉ̃ kʼarea iya jarasi naʉ̃ yizata, ẽbẽrarã mejãchabʉra ne u waragabʉ kĩrãkʼabʉta (Juan 4:35). Jesúsba mawũã jaradata poaga aba berabaribʉrʉde akʉza naʉ̃ta jarasi: «Mawũã ne u jʉrepeira mejãchabʉ» (Mat. 9:​37, 38). Jesúsbara naʉ̃ bedʼeara jarada ʉ̃rʉ jarabasi, maʉ̃ba tẽã naʉ̃ta jarasi: «Wãrãnebai mʉ ũrãgʼa ĩjãnaĩrã bioa, [ . . . ] Maʉ̃ba widʼiudua Daizeze zhãrã Zhibaria, miã ũrãgʼabadata zokʼamarẽã izhidʼebema ĩjãĩta bʼema» (Luc. 10:2). Jesúsbara krĩchabasi iyi bedʼeara ẽbẽrarã mejãchaʉba ũrĩkĩrã bʼaita. Maʉ̃ba iya ũduside ẽbẽrarã mejãchaʉba wãrĩnu ũrĩbʉta iyi bedʼeara, maʉ̃nera mejãcha sobiasi. Jesúsbara kʼarebabasi iyi kʼaidubemaraba jaradiakĩrãne jaradiamarẽã Daizeze Bedʼeara, kʼarebabʉde krĩchadamarẽã ãya Daizeze Bedʼea jaradiabʉdeba nebia zromata berabaribasita. w25.03 18, 19 parr. 15, 16

Jeowabara kʼarebabʉ bedʼea zroma erbʉde. Nãgʉ zroma zebʉrʉdera ẽbẽrabara jʉrʉbʉ sama mĩrʉita, mõgara zromata ũdura mama wãbʉ mĩrʉita, maʉ̃ta neẽbʉrʉ, mõgara zobeade mĩrʉbʉ. Maʉ̃ kĩrãkʼa dayirãba bedʼea zroma ũdubʉrʉdera jʉrʉseabʉ Jeoware mĩrʉita, iya kʼarebai baera dayirãra. Jeowabara nekʼãrẽ jõma obʉ dayirãta ewari jõmaʉ̃nẽ iyi kʼawa panamarẽã akʉza jarabʉ idi ewade dayirã kʼãwũã zʉbʉriabʉra ewari jõmaʉ̃nẽ ba ẽ baita (Ezeq. 34:​25, 26). Dayirãbara Jeowa kʼarebara ũduseabʉ Jeowaʼa yiwidʼipanʉne. Jeowaba dayirãra aduʼa babiyi akʉza akʉyi dayirã sota, adewara dayirã krĩchata (Filip. 4:​6, 7). Jeowara dayirã kʼawabayi dayirã kʼarebaita, iyi ʉ̃rʉ ĩjãseapanʉ Jeowara Mõgara kĩrãkʼa pikibʉ baera (Is. 26:​3, 4). Jeowara ewari jõmaʉ̃nẽ zokʼaibʉ baera iya nekʼãrẽ oya adara aripe oyi, adewara ũrĩbʉ dayirã yiwidʼira akʉza kʼarebabʉ dayirãba kʼareba nesidabʉde. Maʉ̃ awuara ĩjãpanʉ Jeowabara doba amae ẽ baita iyi ode kʼẽrẽpapanʉrãra (2 Sam. 22:26). Jeowabara jipa kĩrãdua ẽ dayirãba iyi kʼarea nekʼãrẽ bia obʉra akʉza maʉ̃ kʼarea ewari jõmaʉ̃nẽ nebia diayi (Heb. 6:10; 11:6). w24.06 27 parr. 4-6

Zarea odaibara oẽ baita nekʼãrẽ dayirã Jeowadeba jĩga babibʉta. Bari jaradaita, jʉra kʼawuapanaibara daya kʼãrẽ akʉbʉ kʼarea akʉza dayi ewari sãwũã zokʼabʉ kʼarea, adewara jʉra kʼawuabaibara dayi neũdukʼawuara jʉrʉbʉrʉde maʉ̃raba dayaʼa aukʼara platata kãgabi ẽ marẽã. Dayirãba kʼawuadara nekʼãrẽ dayirãba obʉba Jeowadeba jĩga babibʉta, aramaʉ̃ta mesera jʉrʉibara maʉ̃ sãwũã ãĩ bʉeita, adewara mawũã Jeowadeba jĩga wã ẽ baita (Mat. 5:​29, 30). Dayirãba nekʼãrẽ Jeowaba zokʼabʉta soiduba oira, jʉra kʼawuabaibara krĩcha ẽ baita dayirãba Jeowadeta ewariza opanʉ baera, nesida ẽãta yi kayiruadeba jĩga bʼaita. Krĩchara mejãcha jʉ̃wʉrʉanʉmʉ ewarita, maʉ̃nera bʉra jʉ̃wʉrʉanʉmʉ baera obisia totoyi akʉza maʉ̃ kʼarea kʉrãzaita baniata dobʉ. Mamina, ¿kʼãrẽta berabari bʉa maʉ̃ bania doda tẽã bisiaeda wãra sombra jʉrʉi kaude? Bʉa mawũã ora akʉza jẽda obisea totoyi. Abarika dayirãbida nekʼãrẽ oibara mawũã Jeowa kʼawa bʼaita, mamina maʉ̃ awuara dayirãba nesidayi jʉra kʼawua bʼaita nekʼãrẽ dayirã Jeowadeba jĩga babiseabʉta oẽ baita. w24.07 21 parr. 6, 7

Dayirãbara bia kʼawua ẽ Jesúsʼra kʼãrẽaba zʉbʉriasita. Iyira iyi zʉbʉriabipanʉa yi edebi ẽ basi, awuarabʉrʉ Jeowaʉ̃me kʼẽrẽpabasi. Iyira gorogorora imitia bedʼea ẽ basi awuarabʉrʉ yi Zezeʼa yiwidʼibʉrʉde jarasi naʉ̃ra ẽbẽrarãba kʼãrẽ aña obʉra kĩrãduamarẽã (Luc. 23:34). Dayirã zʉbʉriabipanʉra kʼarea Jeowa yiwidʼibʉrʉdera, mejãcha kʼarebabʉ dayirãta maʉ̃ra ẽbẽrarãʉ̃me kĩrʉ ba ẽ baita, ãyita jʉra ẽ baita, adewara kʼarebabʉ ãya oda kʼarea dayi aukʼara sopʉa ẽ baita. Dayirãbara kʼawuada ẽ aranʉbai kʼãrẽaba zʉbʉria ũdudaira, maʉ̃ba kʼãrẽ berabari krĩcha ẽã audre yibiabayi ewari jõmaʉ̃nẽ Jeowaʼa kʼareba widita yiwidʼibʉrʉde, adewara zarea oita awururaba zʉbʉriabibʉrʉde Jesúsba oda kĩrãkʼa oita akʉza Daizeze Bedʼeadedemaba jarabʉde oita. Mawũã opanʉbʉrʉ Jeowaba nebiata diayi dayirã (1 Ped. 3:​8, 9). w24.11 7 parr. 16, 17, 19

Jeowabara kãga ẽ nemitia odaira. Maʉ̃ba iduaribi ẽ ẽbẽrarãba kãgabʉta odamarẽã (Sal. 5:​4-6). Jeowabara kãgabʉ dayirãba Daizeze Bedʼeade jarabʉde oũdubidamarẽã. Mamina Jeowaba kʼawuabʉ dayirãra nemitia omiata, maʉ̃ba jʉ̃ã ẽ dayirãba jõma daucha odaita iya kãgabʉ kĩrãkʼa (Sal. 130:​3, 4). Daizeze Bedʼeade jarabʉ Jeowabara jipade kãga ẽãta ẽbẽra iyaʼa wawia ũdubi ẽãra, naʉ̃ra ẽbẽrabara krĩchapanʉ baera Daizezeba iyi biaba so zʉbʉria akʉbʉta, maʉ̃ba nemitia oseapanʉta (Jud. 4). Adewara Daizeze Bedʼeadera jarabʉ Armagedón ewaridera yi ẽbẽrarã Daizezeba jarabʉta obʉ ẽãra jipa beita (2 Ped. 3:7; Apoc. 16:16). Jeowabara mia kʼaita bei ẽ bamarẽã kãgabʉ. Daizezebara kãgabʉ ẽbẽra jõmaʉ̃ta ãya nemitia oda kʼarea jẽda krĩchamarẽã, mawũã bei ẽ baita (2 Ped. 3:9). Zõrãrãbara opanʉ Jeowade kĩrãkʼa akʉza jʉ̃ã ẽ ẽbẽraba nemitia oda kʼarea mesera jẽda krĩchamarẽã, awuarabʉrʉ wiña wiñane kʼareba wãna jẽda Jeowaba bia akʉmarẽã. w24.08 26 parr. 1, 2

Jeowade kĩrãkʼa dayirãbida mebẽrãta mejãcha kãgapanʉ baera diapanʉ ãya nekʼãrẽ nesidabʉta. Bari jaraita, ¿bʉara ũdukʼawuabʉka saʉ̃ mebẽãba nesidabʉta yikota akʉza wuata? Jeowabara bʉta zokʼaseabʉ maʉ̃ra mebẽrãba nesidabʉta diamarẽã. Jeowa odepanʉrabara neida berabaribʉrʉde soiduba kʼarebakĩrãpanʉ. Bari jaradaita, pandemia zesidera mebẽrã mejãchaʉba ãya erbʉta diasida wuabemara. Bari jaraita, yikota, wuata akʉza nekʼãrẽ awuruta. Adewara donasionta diasida mawũã mebẽrã naʉ̃ drʉa jõmaʉ̃nebemata kʼarebadamarẽã. Naʉ̃ra mebẽrã jõmaʉ̃ba osida Hebreos 13:16ba jarabʉ kĩrãkʼa, nama jarabʉ: «Kĩrãduaraidua wuabemaraita nebia oita, mia kĩrãduaraidua maraba erbʉta wuabemarabida diaita, Daizezeba maʉ̃ sakripisiota mejãcha kãgabʉ baera». w24.09 27 parr. 6, 7

Krĩchadaya naʉ̃ ʉ̃rʉ. Bʉa trajota jʉrʉnʉmʉta bʉ mebẽrã akʉita ãya nesidabʉ diaita. Maʉ̃ne bʉa ũduyi trajo ũme. Aramaʉ̃ta bʉa krĩchayi maʉ̃ra trajo ʉ̃rʉ saʉ̃ta audre bigata, maʉ̃ kʼarea akʉyi yi ewarita akʉza kʼãrẽaba jĩgachubʉta bʉ dedaʉba. Mamina maʉ̃ra trajodebemara mia abaʉta kayirua ẽ, ãyi ũmena bigabʉ Jeowa odebʉba oita. Adewara maʉ̃ra trajodebema aba, bʉa audre okĩrãbʉbaibara, audre pagapanʉ baera mawũã ẽ bʉrʉ bʉa okĩrãta oi baera maʉ̃ trajode. Yibia maʉ̃ra ʉ̃rʉ krĩchaira, mamina bʉ nekʼãrẽ awuru ʉ̃rʉ audre bia krĩchaibarata. Wãrĩnubaira, maʉ̃ra trajodebema abaʉba iduaribi ẽ bayi bʉ badua wãmarẽã ãba yi jʉrebari eda, mawũã ẽ bʉrʉ bʉra ewari neẽ baseabʉ bʉ mebẽrã akʉita akʉza kʼarebaita ãyi aduʼapanamarẽã, sobiapanamarẽã akʉza audre Jeowa kʼawapanamarẽã. Maʉ̃ba yibiabayi bʉa nããra bʉeita yi audre yibiata. ¿Saʉ̃ maʉ̃ra? Bʉ Jeowa neũdukʼawua bia bʼaita akʉza bʉ mebẽrã kʼarebaita, bʉa mawũã ora jidayi nekʼãrẽ Jeowaʼa sobiabibʉta. w25.01 17 parr. 11-13

Bʉta zʉbʉriade berabaribʉbʉrʉ biʼia kʼawuaibara Jeowabara bʉra kãgata. Bʉta zʉbʉriade berabaribʉ kʼarea sopʉabʉbʉrʉ kĩrãbera Jeowabara bʉra kãgata, iyara akʉbʉ bʉa kʼãrẽ nebiata erbʉta bʉ sode. Akʉza kĩrãbera iyara bʉra maʉ̃ kʼarea iyi pʉwʉrʉ eda wesita (Juan 6:44). Jeowabara bʉra ewari jõmaʉ̃nẽ kʼarebakĩrãbʉ iyara bʉra wãrĩnu kãgabʉ baera. Dayirãba audre bia kʼawuaita Jeowaba zʉbʉriade berabaribʉra sãwũã akʉbʉ ʉ̃rʉ, kʼawuadaibara Jesúsba ẽbẽrarã sãwũã edabadata iyi nama egorode baside. Iyara yi zʉbʉriade berabaribʉrãra so zʉbʉria akʉbasi (Mat. 9:​9-12). Bari jaradaita, ewari aba yuwẽrã mejãcha kayabʉba iyi wua tõbarisidera Jesúsbara naʉ̃ ẽbẽra wẽrãra kʼẽã ẽ basi, awuarabʉrʉ so zarea diasi akʉza ibia bedʼeasi. Adewara biga diasi iya ĩjãta ũdubibʉ baera (Mar. 5:​25-34). Jesúsbara yi zezede kĩrãkʼa wuabemara so zʉbʉriata ũdubibasi (Juan 14:9). Maʉ̃ba bʉa ĩjãseabʉ Jeowabara bʉra bia akʉbʉta. Iya akʉbʉta bʉ sode bʉa kʼãrẽ nebia erbʉta. Bari jaraita, bʉa iyi ʉ̃rʉ kʼãrẽaba ĩjãbʉta akʉza iyi kʼãrẽaba kãgata. w24.10 7 parr. 4, 5

Davidʼitara jipa zarebasi aribia ʉ̃kʉrʉ iyi mebẽrãnebemaba akʉza neudukʼawuaraba iyi sewasidade. Maʉ̃ra iyitara jipa zarebasi, ãyara jʉrasida baera Davidʼra akʉza edaʉde iyira beakĩrãpanasi (1 Sam. 19:​10, 11; 2 Sam. 15:​10-14, 30). Maʉ̃ba iyira mejãcha sopʉabasi, mejãcha zarebasi iyita. Maʉ̃ kʼarea iya jarasi: «Zarea neẽ mejãcha sopʉabʉba, diamasiza mʉ̃ kʼãĩbarira daubaba surruabʉ, mʉ̃ daubaba birabibʉ mʉ̃ kꞌãĩbʉmae» (Sal. 6: 6). David mejãcha zʉbʉriasimina iya biʼia kʼawuabasi Jeowaba kãgabʉta iyira. Maʉ̃ kʼarea iya jaraseabasi Jeowaba ũrĩbasita iyi jẽgabadara (Sal. 6:8). Idibema testoba jarabʉ Jeowaba dayirã kʼãrẽaba kãgabʉta akʉza iya kʼawuabʉta biʼia dayirã sãwũã sentibʉra. Maʉ̃ kʼarea Davidba jaraseabasi Jeowaba iyi daʉbara bʉbʉ kĩrãkʼabasita libro abaʉde. Maʉ̃ kʼarea Davidba biʼia kʼawuabasi Jeowabara akʉbasita iya bedʼea zroma erbʉra mamina akʉza biʼia kʼawuabasi Jeowabida akʉbasita iyi wuabemaraba sãwũã sentibipanʉta. w24.12 22 parr. 11, 12