Septiembre

Dayirãra bari zarea oibara ẽ bia kʼawuaita Daizeze Bedʼeadebema sãwũã oita, awuarabʉrʉ zarea oibara maʉ̃ obʉta idubʉ ẽ baita, maʉ̃ba krĩcha ẽ baibara daya Jeowa ʉ̃rʉ kʼawuasi baera nesida ẽãta wua iyi ʉ̃rʉ kʼawuaira (1 Cor. 10:12). Ewariza dayikʉza akʉibara jʉrʉbʉ kʼawuaita Jeowa ʉ̃rʉ audre kʼawua wãita. Pabloba kolosensera karta bʉ dia bʉeside akʉza ũdubisi kʼãrẽaba yibiata Daizeze Bedʼeadebema sãwũã oi kʼawuabʉta idubʉ ẽ baita. Kristianora kolosenserabara biʼia kʼawuapanasi Daizeze Bedʼeadebema sãwũã oita, mawũãsidu Pabloba ãyaʼa jarasi maʉ̃ obʉta idubʉda ẽ marẽã mawũã sewa nebʉrʉ jarabʉa yi edebi ẽ baita (Col. 2:​6-10). Epafrasbara bia ũdukʼawuabasi mebẽrã kongregasionebemara akʉza ãyi kʼarea yiwidʼibasi mawũã kʼẽrẽpapanamarẽã akʉza Daizeze Bedʼeadebema sãwũã oita biʼia kʼawuapanamarẽã (Col. 4:12). ¿Kʼãrẽta kʼawuapanʉ naʉ̃neba? Pabloba akʉza Epafrasʼʉ̃meba kʼawuasida dayirãba Daizeze Bedʼeadebema sãwũã oita biʼia kʼawuabʉta idubʉamabʉbʉrʉ, Jeowa kʼarebata nesidaita, adewara maʉ̃ awuara badua akʉbaibarata Jeowa ʉ̃rʉ kʼawuabʉta aribia obʉ kʼawuaita. Ãyara kãgapanasi kristianora kolosenseraba bedʼea zroma ũdubʉidu ũdubidamarẽã biʼia kʼawuapanʉta Daizeze Bedʼeadebema sãwũã oita. w24.04 6, 7 parr. 16, 17

Jeowaʼa wawia ũdubibara jarakĩrãbʉ oẽ baita Jeowaba kãga ẽãta iyita kãgapanʉ baera. Daizezeba dayirã biʼia akʉmarẽãra kʼawuakĩrãpanʉ saʉ̃ta wãrĩnuta akʉza saʉ̃ta sewidata. Adewara saʉ̃ta nekayiruata akʉza saʉ̃ta nekayirua ẽãta (Prov. 2:​3-6; Heb. 5:14). Ẽbẽrarã wawia ũdubipanʉbʉrʉ Daizezeʼa wawia ũdubi kaude, mawũãra wãrĩnu ẽãta ĩjã wãnañi. Krĩchadadrʉ, Jeowaba zokʼasi ẽbẽrarã 12bʉta israelitara drʉa diaya adama orda wãmarẽã. Maʉ̃ranebema 10bʉba audre wawiata ũdubisi Canaánʼnebemara Jeowaʼa wawia ũdubi kaude. Maʉ̃ kʼarea ãya jarasida: «Kaʉ̃ra ẽbẽrarãbawarara yõbeda ẽ, audre zareabarabʉ baera dayirãira» (Núm. 13:​27-31). Wãrĩnu kananeorãra audre zarea barachuasi, maʉ̃ kʼarea ãya jaraside maʉ̃rabawara yõna ẽãta, Jeowaba sãwũã kʼarebabʉta kĩrãduasida. w24.07 9 parr. 5, 6

Dayirãbara bia kʼawuapanʉ Jeowaba nekʼãrẽ kʼawuabʉrʉdera jõma biʼia obʉta. Abarika Abrahánʼne kĩrãkʼa dayirãba kʼawuapanʉ Jeowara naʉ̃ drʉa jõmaʉ̃nẽbema juezta akʉza iyira kayirua okata, iyira buru biata, adewara so zʉbʉria ũdubibʉta, adewara iyara iduaribibʉ yi Warrabida ẽbẽrarãta kʼawua omarẽã (Juan 5:22). Jeowaba akʉza yi Warra Jesúsʼʉ̃mebʉrʉ kʼawuapanʉ ẽbẽra aba abakaʉ sode kʼãrẽtabʉra (Mat. 9:4). Maʉ̃ba ãya ẽbẽra aba abaka kʼawua obʉrʉdera aripe odayi. Zarea odaibara ĩjãita Jeowaba ẽbẽrarã sãwũã kʼawua obʉra aripe obʉta akʉza kĩrãbedaibara dayirãbara kʼawua ẽãta sãwũã kʼawua oita ẽbẽrarã, awuarabʉrʉ Jeowabʉrʉ biʼia kʼawuabʉta sãwũã kʼawua oita ẽbẽrarã (Is. 55:​8, 9). Maʉ̃ kʼarea dayirãbara ĩjãpanʉ Jeowaba akʉza yi Warraʉ̃meba jõma ewari jõmaʉ̃nẽ aripe opanʉta. Adewara Jesúsbara yi Zezeba nebia erbʉta ũdubibʉ iyara jõma daucha obʉ akʉza so zʉbʉria ũdubibʉ (Is. 11:​3, 4). w24.05 7 parr. 18, 19

Soiduba wãrĩnu jaraira jipade yibia, maʉ̃ta ũdupanʉ Felipeba Natanaelta Jesús ũdukʼawuamarẽã edeside. Jesúsba Natanael ũdukata ũdusidera jarasi naʉ̃ yumakẽrãbara mia abaʉ ẽbẽrata sewa ẽãta (Juan 1:47). Natanaelba audre wãrĩnuta jarasi. Natanaelʼra dayirã kĩrãkʼa kayirua omiabasi, mamina iyara wuabemara kĩrãbitabʉdebʉrʉ nekʼãrẽ biata obasi ẽ, awuarabʉrʉ iya nekʼãrẽ jõma obʉde ũdubibasi wãrĩnu jarabʉta. Jesúsbara bia akʉbasi Natanaelʼra. Salmo 15de Jeowaba jara ũrĩbibʉ dayirãba kʼãrẽta omarẽã kãgabʉta, maʉ̃nera audre jara ũrĩbibʉ dayirãba wuabemara sãwũã edaibara ʉ̃rʉ. Salmo 15:3de jara ũrĩbibʉ sãwũãbʉta ẽbẽra Jeowa de karpadebʉra, jarabʉ naʉ̃ ẽbẽrarã «awuru ʉ̃rʉ sewa nebʉrʉ jara ẽãta, wuabemara ʉ̃rʉ nemitia oẽãta akʉza iyi neũdukʼawuara ʉ̃rʉ i kayirua jara ẽãta». Dayirãba awuru ʉ̃rʉ sewa nebʉrʉta jarara, mawũãra zʉbʉriabiseabʉ awururata (Sant. 1:26). w24.06 10 parr. 7, 9; 11 parr. 10

Bʉa Daizeze Bedʼea jaradia wãi nãã bia krĩchabʉbʉrʉ kʼãrẽta oita, naʉ̃ba kʼarebayi bʉ awururaʉ̃me bedʼeabʉrʉde aduʼa bʼaita. Jesúsba kʼarebasi iyi kʼaidubemaraba jaradia wãi nãã, biʼia krĩchadamarẽã kʼãrẽta oibarata (Luc. 10:​1-11). Jesús kʼaidubemarabara Jesúsba jaradade osida baera, nebiata osida akʉza naʉ̃ba kʼarebasi ãyisida sobia bʼaita. Daizeze Bedʼea jaradia wãi nããra, dayirãbara nãã krĩchaibara kʼãrẽta jarakĩrãpanʉta akʉza maʉ̃ta dayi bedʼeabʉde jara ũrĩbita. Adewara krĩchaseabʉ dayi bʉmae ẽbẽrarãba daya jaradiabʉrʉde sãwũã panʉseabʉta akʉza ãya panʉbʉdeba dayabida ãyaʼa kʼãrẽta jara ũrĩbiseabʉta. Akʉza zarea ora ẽbẽrarã jaradia wãbʉrʉde aduʼa bʼaita, ipidaita akʉza ãyaʼa ũdubita bʉra mia bedʼeaseabʉta. w24.04 16 parr. 6, 7

Dayirãba kʼãwũã jaradiapanʉba ũdubibʉ Jeowa kãgabʉta. Dayirãra bedʼea abarikapanʉ naʉ̃ testoba jarabʉme: «Daizeze Jeowa, bʉ abapaiʼabʉrʉ ibia bedʼeaibara, wawiata ũdubibara akʉza zareata». Dayirãba wuabema ẽbẽrarã jaradiabʉrʉde naʉ̃ drʉadebʉra jõma Jeowaba parãsita akʉza dayirãsida Jeowaba parãnata bʉta, maʉ̃neba Jeowa ʉ̃rʉ ibia bedʼeapanʉ akʉza wawia ũdubipanʉ, dayi ewarita bia zokʼara akʉza daya nekʼãrẽ bia erbʉta bia zokʼara Daizeze bedʼea jaradia wãita, mawũãra dayi zarea jõma diayi Jeowaʼa (Mat. 6:33; Luc. 13:24; Col. 3:23). Dayirãra Daizeze ʉ̃rʉ bedʼeakĩrã akʉza iyi trʉ̃ ʉ̃rʉ jaradiakĩrã wuabemara akʉza kʼãrẽta jaradiakĩrãbʉta maʉ̃ trʉ̃ba. w24.05 17 parr. 11

Jeowabara dayirãra aduʼa babibʉ akʉza sobia babibʉ. Mamina ʉ̃ra zeide kʼarebayi ewari jõmaʉ̃nẽ bʼaita. Dayirãbara soiduba ĩjãpanʉ iya dayirãʼa nebia diakĩrãbʉta akʉza iyira zarea barabʉta maʉ̃ oita. Soiduba ĩjãpanʉ baera zarea opanʉ iyiʉ̃me kʼẽrẽpa bʼaita. Jeowa ode kʼẽrẽpapananaraba maʉ̃ta osida. Akʉdaya Timoteo nebʉrata (Heb. 6:​10-12). Timoteobara ũdubisi wãrĩnu ĩjãbʉta Jeowaba iyira kʼarebaita (1 Tim. 4:10). Maʉ̃ kʼarea iyira mejãcha zarea osi Jeowaʉ̃me kʼẽrẽpa bʼaita akʉza wuabemara kʼarebaita. ¿Kʼãrẽta osi? Apostol Pabloba jaradiasi audre zarea omarẽã biʼia jaradiaita kongregasione akʉza jaradiade wãinebida. Adewara Pablobara jarasi yiza bia bamarẽã zõrãrãita akʉza warraraita. Akʉza iyara mebẽrãra ibiade ũrãgʼaibarabasi akʉza kãgade, maʉ̃ra iyitara zareabasibaibara (1 Tim. 4:​11-16; 2 Tim. 4:​1-5). Timoteoba bia kʼawuabasi Jeowabara maʉ̃ kʼarea iyaʼa nebia diaita (Rom. 2:​6, 7). w24.06 22, 23 parr. 10, 11

Israelitaraba Jeowaba zokʼabʉta oẽãnera, Jeowabara propetara badua zokʼa bʉebasi ãyaʼa jaramarẽã kʼãrẽta berabarita iyi bedʼeata ũrĩna ẽ bʉrʉ. Bari jaraita, Jeowaba Jeremíasneba jarasi israelitara iyima jẽda zedara iyara ãyira jẽda bia akʉita akʉza kãga jõkata ũdubita. Jeowabara bari kãgabasi israelitaraba ãya nemitia oda kʼarea jẽda krĩchadamarẽã, mawũã iya bia akʉita (Jer. 3:​12, 13). Jeowaba Joeldeba jarasi israelitara soiduba jẽda zedamarẽã (Joel 2:​12, 13). Jeowaba Isaíasdeba jarasi israelitara ãya kʼãrẽ kayirua obadara idubʉdamarẽã Jeowa dabʉ nãã neneẽãpanaita (Is. 1:​16-19). Adewara Jeowaba Ezequieldeba naʉ̃ta jarasi: «¿Mʉ̃ra sobiabʉka ẽbẽra kayirua beibʉrʉdera? ¿Mʉ̃itara audre yibia ẽka iya nemitia obʉta idubʉmarẽã mawũã bei ẽ bamarẽã?. Ẽbẽra aba beibʉrʉdera mʉ̃ra sobiabʉ ẽ, maʉ̃ kʼarea jẽda zeidua mʉ̃ma mawũã zokʼaipanaita». (Ezeq. 18:​23, 32). Ẽbẽra abaʉba iya nãã nemitia obadata idubʉra akʉza jẽda krĩchara Jeowara mejãcha sobiabʉ, Jeowabara kãgabʉ baera ẽbẽrarãra ewari jõmaʉ̃nẽ panamarẽã. w24.08 9 parr. 5, 6

Jeowabara iyi odepanʉra jõmaʉ̃ʼa diabʉ ãya kʼãrẽ nesidabʉra, bʉaʼabida diayi yiko jauredebemata, jaradiayi kʼãrẽta oita akʉza bia akʉyi. Jeowaba adewara nekʼãrẽ awurudeba ũdubibʉ dayirã jõmaʉ̃ta daucha akʉbʉta. Bari jaradaita, Daizeze Bedʼeara idi ewadera ẽbẽrarã jõmaʉ̃ba ãyi bedʼea awuara awuarakade akʉseabʉ. Nawedara Daizeze Bedʼeara bʉsida bedʼea ũbeade ebreode, arameone akʉza griegode, mamina maʉ̃ba jarakĩrãbʉ ẽ ẽbẽrarã maʉ̃ bedʼea bedʼeapanʉratrʉ audre Daizeze neũdukʼawua biarata (Mat. 11:25). Jeowaba dayirãta biʼia akʉmarẽãra, nesida ẽ unibersida eda wãita, mawũã ẽ bʉrʉ awuru bedʼea kʼawuaita. Jeowabara iyi buru biara ẽbẽrarã unibersida eda jʉ̃ẽnapeadarabʉrʉ diabʉ kʼãrẽ ẽ, iyara maʉ̃ra diabʉ kʼãrẽ, ẽbẽrarã naʉ̃ drʉadepanʉra jõmaʉ̃ʼa. Maʉ̃ kʼarea Daizeze Bedʼeara bedʼea awuara awuarakade tradusibisi, mawũã ẽbẽrarã mejãchaʉba kʼawuadamarẽã sãwũã iyi neũdukʼawua bia ba zeseabʉta (2 Tim. 3:​16, 17). w24.06 6 parr. 13, 7 parr. 14, 15

Jesúsba Jerusalén pʉwʉrʉ jõbiyi ada ewarita zebodobasi. Kristianora Judeadebemaraba maʉ̃ ze ẽ nããra, ãyi ewarira biʼia zokʼaibarabasi mawũã maʉ̃ ewari zebʉrʉde, kʼawuaita kʼãrẽta oita akʉza ãya ĩjãbʉsida audre zarea erbaibarabasi (Heb. 10:25; 12:​1, 2). Dayirãba aranʉ bedʼea zroma ũduira audre yi zromabayi kristianora Judeadebemaraba ũdudaira (Mat. 24:21; Apoc. 16:​14, 16). Maʉ̃ kʼarea akʉdayi ũrãgʼara naʉ̃ra kristianora kʼarebadata akʉza sãwũã dayirãbida maʉ̃neba nebia ũduseabʉta. Apostol Pabloba kristianora ũrãgʼasi Daizeze Bedʼeata akʉdamarẽã akʉza maʉ̃ ʉ̃rʉ krĩchadamarẽã (Heb. 5:14–6:1). Apostol Pabloba Escrituras Hebreasdeba jara ũrĩbisi kʼãrẽa audre yibiabasita naʉ̃ra kristianoraba kʼãwũã Jeowaʼa yiwidʼibʉra judioraba nãã obadaira. Pabloba kristianora jarasi Daizeze bedʼeade wãrĩnu jarabʉta biʼia kʼawuadamarẽã akʉza biʼia ũrĩnamarẽã, mawũã yi sewida jarapanʉʼa yi edebi ẽ baita. w24.09 8, 9 parr. 2, 3; 10 parr. 6

Jesús kʼaidubemarabara nesidapanasi ãyaʼa so zarea diadamarẽã, ¿kʼãrẽa? Ãyidebema mejãchaʉba ewari jõmaʉ̃nẽ Jesús kʼaidu bʼaita idubʉsida baera ãyi deta, ãyi mebẽrãta akʉza ãyi trajota (Mat. 19:27). Ãyidebema ʉ̃kʉrʉra awuru ẽbẽrarãbara bia edada ẽ basi Jesús kʼaidubema baera (Juan 9:22). Ãyara naʉ̃ jõma osida ĩjãpanasi baera Jesúsʼra Mesíasta (Mat. 16:16). Mamina Jesús beadapeada tẽãra, ãyira mejãcha sopʉapanesi, krĩchapanasi baera ãya nebia jʉ̃ãbadara mamapai jõsita. Jesúsbara biʼia kʼawuabasi iyi kʼaidubemara kʼãrẽa sopʉapanʉra, maʉ̃ba iya krĩcha ẽ basi iyi kʼaidubemarãra sopʉapanʉta iyi ʉ̃rʉ audre ĩjãita waebʉ baera. Maʉ̃ kʼarea Jesúsʼra iyi piradrʉda ewaride wãsi iyi kʼaidubemara kʼarebade. Jesúsʼra yi ũdubisi María Magdalenaʼa, Maríara iyi joudapeadamae jẽgabasi (Juan 20:​11, 16). Adewara Jesúsʼra yi ũdubisi iyi kʼaidubemara ũme akʉza Pedroʼa yi ũdubisi. w24.10 13 parr. 5, 6

Yibarirabara kʼarebara mara wũãwũãra wuabemara jaradiaita kʼãrẽa ĩjãbʉta Jeowa ʉ̃rʉ. Pagina jw.org de bʉ artikulo «¿Iyidoba zesika mawũã ẽ bʉrʉ parãnaka?» abʉta, maʉ̃ta bigabayi ãbaʉba akʉdara, maʉ̃ akʉda tẽã, widira saʉ̃ba audre bia jara ũrĩbiseabʉta naʉ̃ drʉa parãnara wãrĩnubʉta. Bari jaraita, iyi kopaeroba naʉ̃ta jaraseabʉ: «Mʉ̃ara ĩjãbʉ mʉ̃a ũdubʉtrʉ mamina Daizezera mʉ̃ara ũduka». Bʉ wũãwũãba naʉ̃ta panʉseabʉ: «Krĩchara naʉ̃ta, bʉa oide de parãnʉmʉta ũdura, ¿bʉara krĩchaika maʉ̃ra iyidoba parãnʉma zesita? mawũẽ ẽ bʉrʉ ¿krĩchaika ẽbẽra abaʉba parãsita? Maʉ̃ de parãmata ẽbẽraba mawũã osibʉrʉ, ¿bʉmabida bʉ naʉ̃ drʉa kʼaiba parãnara?». w24.12 18 parr. 16

Dayirã jõmaʉ̃ba nesidapanʉ ũrãgʼa biata diadamarẽã kʼãrẽ oita jidabʉrʉde bia jidaita. Maʉ̃ oira zõrãrã kongregasionebemaba akʉza awuru mebẽrã krĩcha bia erpanʉraba kʼarebaseapanʉ. Mebẽrã zõrãpanʉraba dayirãʼa ũrãgʼata diara, krĩchada ẽ baibara ãya ũrãgʼa diabʉra biga ẽãta idi ewadera ẽbẽrarãra awuara krĩchapanʉ baera. Jeowabara kãgabʉ mebẽrã zõrãpanʉra ũrãgʼara ũrĩpanamarẽã. Ãyira dayirã nãã panʉ baera, bia kʼawuabʉ kʼãrẽta oibarata nekʼãrẽ badu berabaribʉrʉde ãyita maʉ̃ne berabaribari baera akʉza ãya krĩcha bia erbʉta dayirãʼa jaradiaseapanʉ. Nawedara Jeowabara zõrãpanʉra iyi ode kʼẽrẽpapanʉrata zokʼabasi yi pʉwʉrʉʼa ũrãgʼa bia diaita, bari jaraita, Moisésta, Davidta akʉza Juanta. Naʉ̃ra yumakẽrãnebemara mia abaʉta iyabaʉ poagadebema ẽ basi akʉza aba abakaʉta nekʼãrẽ awurua berabarisi. Naʉ̃ra yumakẽrãraba ãyi bei nãã, ũrãgʼa biata dia amaesida yi audre warrarapanʉra. Naʉ̃ra yumakẽrã kʼẽrẽpapanʉrabara ũdubisida kʼãrẽaba yibiata Daizezeba jarabʉde oira. Ãya ũrãgʼa dia amaenabara dayirã jõmaʉ̃ta kʼarebabʉ warrarapanʉrata akʉza zõrãpanʉrata (Rom. 15:4; 2 Tim. 3:16). w24.11 8 parr. 1, 2

Noé ewaridera Daizezebara jarasi wata koda ẽ marẽã (Gén. 9:​3, 4). Maʉ̃ tẽã Jeowaba jarasi israelitara wata koda ẽ marẽã, yi wa kobʉrʉra jarasi beadaibarata (Lev. 7:27). Jesúsbida jarasi judiora Moisés Leyba jarabʉra ũrĩbarata (Mat. 5:​17-19). Naʉ̃neba kʼawuapanʉ Jesúsbara judiora widiba ẽ basita wãrĩnu iyi yarata akʉza iyi wata kodamarẽã. Naʉ̃ nãã Jesúsba jarasi samaritanaʼa: «Mʉ̃a bania diabʉrʉra iyide drʉbayi ewari jõmaʉ̃nẽ bʼaita» (Juan 4:​7, 14). Mamina Jesúsba samaritanaʼa jarakĩrãkʉa ẽ basi chuta pozo aba daya maʉ̃ bania dora ewari jõmaʉ̃nẽ babibʉta, abarika Jesúsba ẽbẽrarã Capernaúmnebemara jaraside ewari jõmaʉ̃nẽ bʼaita iyi wata akʉza iyi yarata koibarata, maʉ̃bara Jesúsbara jarakĩrãkʉa ẽ basi wãrĩnu mawũã oibarata. w24.12 9 parr. 4-6

Yumakẽrã kristianorãra biode jʉra kʼawuapanaibara yuwẽrã sãwũã akʉbʉ kʼarea. ¿Kʼãrẽa? Daya nekʼãrẽ akʉbʉ daucha oseabʉ baera. Maʉ̃ba Pabloba kristiano romanora ũrãgʼa biata jarasi. Iya jarasi: «Drʉadebemaba obʉ kĩrãkʼa oraidua» (Rom. 12:​1, 2). Pabloba naʉ̃ ũrãgʼa diasidera kongregasion Romanebemara dããrabasi bʉta, mamina Pabloba ũdusi naʉ̃ra kristianorabara naʉ̃ drʉadebemaba obʉ kĩrãkʼa opanʉta akʉza ẽbẽrarã naʉ̃ drʉadebʉ kĩrãkʼa krĩchapanʉta, maʉ̃ kʼarea maʉ̃ta jarasi, idi ewade ʉ̃kʉrʉ yumakẽrã juwa jidapanʉrabara krĩchapanʉ ẽbẽrarã naʉ̃ drʉadebema kĩrãkʼa akʉza opanʉ yumakẽrã naʉ̃ drʉadebemaba obʉ kĩrãkʼa, maʉ̃ba yi kimara zʉbʉria obare akʉza pobare, maʉ̃ kʼarea Pabloba ũrãgʼa diadara yibia dayirãita. w25.01 9 parr. 4

Idi ewadebema zõrãrã kongregasionebemabara nekʼãrẽ mejãcha obʉ, ãyara Daizeze Bedʼeata jaradia wãpanʉ. Ãyira yiza bia mebẽrãita jaradia wãpanʉ baera (2 Tim. 4:5). Mebẽrã jaradiapanʉ sama jaradia wãibarata akʉza jaradiapanʉ sãwũã jaradiaibarata ẽbẽrarã. Zõrãrã kongregasionebemabara jõma daucha kʼawua opanʉ. Bari jaraita, mebẽã abaʉba nemitiata ora, ãyara ibiade ũrãgʼapanʉ, mawũã Jeowadeba jĩga wã ẽ marẽã, mamina maʉ̃ba idubʉ ẽ bʉrʉ, iya nemitia obʉta kongregasioneba ãĩ bʉeseapanʉ, mawũã kongregasion neneẽã erbaita (1 Cor. 5:​12, 13; Gál. 6:1). Adewara zarea opanʉ mebẽrã kongregasionebema bia akʉita (1 Ped. 5:​1-3). Diskurso biata diapanʉ, zarea opanʉ mebẽrãta biʼia ũdukʼawuaita akʉza mebẽrãta akʉ wãpanʉ ãyaʼa so zarea diaita. Ʉ̃kʉrʉ zõrãrãbara kʼarebabʉ ãba yi jʉrebari de ara parãita akʉza Daizeze de oide, asamblea regional opanʉ ewaride bia berabarimarẽã kʼarebapanʉ akʉza bedʼeapanʉ mebẽrãbari medikobawara akʉza ʉ̃kʉrʉ zõrãrãra trajapanʉ mebẽrã ospitalde kayabʉ akʉpanʉne akʉza nekʼãrẽ awurude. w24.10 20 parr. 9

Daizeze Bedʼeaba ẽdrʉsida jarabʉdera jarakĩrãbʉ dayirã debebʉdeba ẽdrʉbisidata Jesústa dayirã jõmaʉ̃bari beisi baera. Apostol Pedrobara naʉ̃ta jarasi: «Marabara kʼawuapanʉ nekʼãrẽ ãrĩbariba (plata, oro) ẽdrʉbi ẽ basita mara yibarira nããbemaneba dia amenanebara. Awuarabʉrʉ mejãcha yibiabasi iyi wara, neneẽãbasi kordero neneẽãbʉ kĩrãkʼa, Jesús wara» (1 Ped. 1:​18, 19). Jesústa dayirãbari beisi baera, ẽdrʉsida beideba akʉza nemitia omianeba, maʉ̃bara mejãcha zʉbʉriabibʉ dayirãra (Rom. 5:21). Jeowaʼa Jesúsʼa biga diapanʉ Jesústa beisi baera dayirã jõmaʉ̃bari, mawũã ẽdrʉbita nemitiadeba. w25.02 5 parr. 16

¿Kʼãrẽta oseapanʉ yi kayirua yi edebi ẽ baita? Akʉdaya kʼãrẽta jaradiabʉta Proverbios yi zroma 7ba. Nama jarabʉ kʉ̃ra aba nekayirua osita wẽrã odebemaʉ̃me, bersikulo 22de jarabʉ iya kʼawuaimara maʉ̃ yuwẽrã kʼaidubasi, mamina wãrĩnubaira yi bersikulo nããbemaraba ũdʉbibʉ iyira atiaʉde maʉ̃ne eda bae toto ẽ basita, awuarabʉrʉ iya wiña wiñane maʉ̃ nekʼãrẽ o wãba mainʉ edesita. ¿Kʼãrẽta osi naʉ̃ kʉ̃raba iya maʉ̃ nekayirua oi nãã? Nããra, maʉ̃ yuwẽrã de eskina kʼawa berabarisi, maʉ̃are wãsi maʉ̃ yuwẽrã deare (Prov. 7:​8, 9). Maʉ̃are maʉ̃ yuwẽrã ũdʉbʉrʉde aña wã ẽ basi, mawũã oi kaude idʉ yi ñegabisi akʉza ũrĩsi maʉ̃ yuwẽrãba sakripisio osi ada ʉ̃rʉ, iya maʉ̃ra mawũã nebʉrasi ũdubita iyira ẽbẽra wẽrã biata (Prov. 7:​13, 14, 21). Naʉ̃ kʉ̃raba maʉ̃ta oẽ basibʉrʉ naʉ̃ nekayiruade eda bae ẽ bakasi. w24.07 16 parr. 8, 9; 19 parr. 19

Jeowabara iduaribi ẽã ẽbẽra nemitia obʉta kongregasione bamarẽã. Ʉ̃kʉrʉbara krĩchaseabʉ Jeowaba ẽbẽrarãta so zʉbʉria akʉbʉ baera, iduaribibʉta ẽbẽra nemitia obʉra kongregasione bamarẽã, mamina wãrĩnubaira Jeowabara mawũã so zʉbʉria akʉbʉ ẽ. Wãrĩnu, Jeowabara so zʉbʉria akʉbʉ wuabema ẽbẽrarãra, mamina iyara iduaribi ẽ ẽbẽrarã nemitia obʉra bamarẽã kongregasione, iya jarabʉra nrʉemaza awuarabʉ ẽ baera (Jud. 4). Jeowaba iduaribira ẽbẽra nemitia obʉta kongregasione bamarẽã, wuabema mebẽrãta zʉbʉria berabaribiseabʉ akʉza Jeowabara so zʉbʉria akʉbʉta ũdubi ẽ bayi (Prov. 13:20; 1Cor. 15:33). Adewara kʼawuasida Jeowabara kãgabʉta miõta bei ẽ bamarẽã, awuarabʉrʉ beideba ẽdrʉbikĩrãbʉ ewari jõmaʉ̃nẽ panamarẽã, ẽbẽrarãba ãya nãã nemitia obadata idubʉdara akʉza odara Jeowaba zokʼabʉta, mawũãra jẽda iyi neũdukʼawua baseabʉ (Ezeq. 33:11; 2 Ped. 3:9). Yumakẽrã Corintodebemata nemitia oda kʼarea jẽda krĩchasidera, Jeowaba jarasi kongregasionebemara naʉ̃ yumakẽrãra bia edadamarẽã akʉza kĩrãduamarẽã iya nemitia odara. w24.08 17 parr. 7; 18, 19 parr. 14, 15

Jesúsba ẽbẽrarã kʼawua obʉrʉdera, akʉyi yi ʉ̃ta wãira arepanʉ kʼawuaita (Mat. 25:​31-46). ¿Jesúsbara sõbede kʼawua oi ẽbẽrarã? Zʉbʉria zroma berabarinʉmʉne, Armagedón jʉ̃drʉbodoare, maʉ̃ne Jesúsbara kʼawua oyi ẽbẽrarã (Mat. 24:21). Obeja akʉbariba, obejarata kabraraneba jãpe bʉebari kĩrãkʼa, Jesúsbara ẽbẽrarã yi ʉ̃ta wãira arepanʉta jãpe bʉeyi yi maʉ̃rare panʉ ẽãneba. Daizeze Bedʼeaba jarabʉ Jesúsba Jeowabari ẽbẽrarã kʼawua obʉrʉdera, daucha kʼawua oita (Is. 11:​3, 4). Jesúsbara kĩrãkita akʉyi ẽbẽrarãba kʼãrẽ obʉta, kʼãrẽ krĩchabʉta akʉza kʼãrẽ jarabʉta (Mat. 12:​36, 37). Jesúsbara kʼawuabayi kʼairaba kʼarebabʉta ʉ̃ta wãirãra, maʉ̃ra ẽbẽrarã kʼarebaira Daizeze Bedʼeata jaradia wãibara. w24.09 20, 21 parr. 3, 4

Yibiabayi Daizeze Bedʼeata akʉita, mawũã kʼawuai baera Daizeze Bedʼeaba kʼãrẽta jarabʉta daya krĩchabʉ ʉ̃rʉ. Krĩchadaya naʉ̃ ʉ̃rʉ, kʉ̃ra abaʉba iyikʉza widibʉ Jeowabara iyi ʉ̃rʉ wãrĩnu krĩchabʉ kʼawuaita. Mamina naʉ̃ kʉ̃rabara, ¿bari mamapai krĩchaibaraka? ¿Kʼãrẽ oẽ baibaraka? Mawũã ẽ, audre bigabayi iya akʉita Daizeze Bedʼeade kʼãrẽta jarabʉta, mawũã kʼawuaita Jeowaba kʼãrẽta krĩchabʉta iyi ʉ̃rʉ. Dayirãba Daizeze Bedʼea lebʉrʉdera Jeowara dayirã maʉ̃neba bedʼeabʉ kĩrãkʼabʉ. Mamina dayirãba nekʼãrẽ abaʉ ʉ̃rʉ bia kʼawua ẽ bʉrʉ, bari mamapai akʉibara ẽ, nekʼãrẽ awuruta oibara, jʉrʉibara testora daya krĩchabʉ ʉ̃rʉ bedʼeabʉta. Adewara dayirã organizasionba nekʼãrẽ mejãcha diabʉ audre bia estudiaita, maʉ̃ kʼarea maʉ̃sida zokʼaseapanʉ (Prov. 2:​3-6). Adewara dayirãba maʉ̃ ʉ̃rʉ jʉrʉbʉdera Jeowaʼa widibara kʼarebamarẽã dayirãba nesidabʉta ũduita. Maʉ̃ tẽã jʉrʉseapanʉ testo, mawũã ẽ bʉrʉ kartara dayirãba kʼawuakĩrãbʉ ʉ̃rʉ bedʼeabʉta. w24.10 25 parr. 4, 5

Ẽbẽra abaʉba nekʼãrẽ obʉrʉde wuabemaraba iyita bia akʉdamarẽã obʉbʉrʉ, iyabʉrʉ wuabemara zokʼaita obʉbʉrʉ, Jeowabara kʼareba ẽ bayi maʉ̃ mebẽãra (1 Cor. 10:​24, 33; 13:4). Edaʉde Jesús neũdukʼawuarabida nekʼãrẽta audre okĩrãbasi Jeowaita, mamina ãyara maʉ̃ra kãgaba okĩrã ba ẽ basi. Mawũã berabarisi Santiagota Juanʼʉ̃me, ãya widisida Jesúsʼa Jesús nokʼo babʉrʉde ãyidebema aba Jesús juwarare jewedabimarẽã, ababemata iyi juwaʼãkare, Jesúsbara ãya kãgabʉta jarai kaude, iyi kʼaidudebemara 12panʉra naʉ̃ ũrãgʼata diasi: «Marãnebema zhi zromata bʼa krĩña bʼʉra bʼaibara dewaraurãta aribʼaebarita, marãnebema zhi zromata bʼa krĩña bʼʉra bʼaibara jõmaʉ̃ nezokʼata» (Mar. 10:​35-37, 43, 44). Mebẽrãba ãya kʼãrẽ obʉta soiduba opanʉbʉrʉ, mawũãra nekʼãrẽ mejãchade kʼarebaseabʉ mebẽrã kongregasionebemarata (1 Tes. 2:8). w24.11 15, 16 parr. 7, 8

Dayirãba nekʼãrẽ obʉrʉdera mebẽrã kãga baera, bʉyitrʉ krĩcha ẽ bayi awuarabʉrʉ, nãã krĩchayi wuabemara sãwũã sentiseabʉta akʉza kʼawuayi sainʉ oseabʉta (1 Cor. 10:​23, 24, 32; 1 Tim. 2:​9, 10). Bʉa maʉ̃ne nekʼãrẽ oita jidabʉba, ũdubibʉ wuabemara kãgata akʉza wawiabʉta. Bʉa nekʼãrẽ oita jidabʉrʉdera krĩchaibara kʼãrẽta oibarata naʉ̃ jõma aribaeita. Jesúsba jarasi dayirãbara naena akʉibarata sõbe gastaita (Luc. 14:28). Maʉ̃itara bʉa akʉibara bʉ kʼãrẽaba ewari jʉrʉibarata, kʼãrẽaba zarea oibarata akʉza kʼãrẽaba plata gastaita bʉa oita krĩchabʉ jõma aribaeita. Adewara edaʉde bigabayi bʉ mebẽrã jara ũrĩbita kʼãrẽta oita krĩchabʉta akʉza ãyi aba abakaʉba kʼãrẽta oibarata, mawũã jõma bia aribaeita. Mamina, ¿kʼãrẽa yibia maʉ̃ jõma oira? Naʉ̃ jõma oiba kʼarebayi bʉa akʉita nekʼãrẽ waidide ara oitabʉta, mawũã ẽ bʉrʉ nekʼãrẽ awuara oseabʉta bʉa krĩchabʉ aribaeita. Bʉa bʉ mebẽrã jarara naʉ̃ ʉ̃rʉ akʉza bʉa ũrĩra ãya kʼãrẽ jaraitabʉta, naʉ̃ba kʼarebayi bʉa oita krĩchabʉta ãya kʼarebadamarẽã jõma aribaeita. w25.01 18, 19 parr. 14, 15

Isaíasba jara ũrĩbibʉ ẽjũã kĩrãwãreã jauredebemane panʉrãra kʼãrẽa sobiapanʉta. Naʉ̃ ẽjũã kĩrãwãreã jauredebemara Jeowaba parãsi (Is. 65:​18, 19). Idi ewadera organizasionʼra naʉ̃ drʉadebemarabara wãrĩnuta jaradia ẽ Daizeze ʉ̃rʉ. Mamina jipade yibia Jeowaba dayirãta zokʼabʉ baera kʼarebaita naʉ̃ra ẽbẽrarã ãĩ wãnamarẽã naʉ̃ organizasion zeri ẽãneba, ẽjũã kĩrãwãreã jauredebemane eda panamarẽã. Mejãcha sobiapanʉ Jeowa organizasione edapanʉ baera, maʉ̃ kʼarea jaradiakĩrãne jaradiapanʉ awuru ẽbẽrarãbida (Jer. 31:12). Adewara ẽjũã kĩrãwãreã jauredebemane panairãra mejãcha sobiapanʉ nebia zeita jʉ̃ãpanʉ baera. Daizeze Bedʼeaba jarabʉ dera yi parãnane bʼaita akʉza ne ura yi udade bʼaita, bari trajada ẽ bayi Jeowaba nebiata diai baera. Jeowabara jarabʉ dayirãra aduʼapanaita akʉza wãrĩnu sobiapanaita. Jeowabara kʼawuabʉ dayirãba kʼãrẽta kãgabʉta, mõbe diayi dayirãba kãgabʉta mawũã sobiapanamarẽã (Is. 65:​20-24; Sal. 145:16). w24.04 22, 23 parr. 11, 12

Jeowara dayirã Mõgara babiseabʉ ewari jõmaʉ̃nẽ iyi ʉ̃rʉ ĩjãpanʉne. Dayirãba biʼia kʼawuapanʉ bedʼea zroma ũdubʉrʉde ũrĩpanʉbʉrʉ iya zokʼabʉta, tẽã juneane nebia ũdudaita (Is. 48:​17, 18). Dayirãba ũdubʉrʉza Jeowaba sãwũã kʼarebabʉta, iyi ʉ̃rʉ audre zarea ĩjãnañi. Maʉ̃ba awuantadayi bedʼea zromara zebʉrʉra Jeowa kʼarebadeba. Mõgara zromara ewari jõmaʉ̃nẽ ariya chu akʉza iyi sãwũã chura awuara ẽ. Abarika bʉ Jeowata iyi sãwũãbʉra awuara toto chu ẽ akʉza iya kʼãrẽ oita krĩchabʉra awuara krĩcha toto chu ẽ (Mal. 3:6). Adán Evaʉ̃meba Jeowaba zokʼabʉta ũrĩ ẽ basidera, Jeowabara awuara oita krĩcha ẽ basi. Apostol Pablobara jarasi Jeowabara awuara oita jarabe ẽãta iya oya adara (2 Tim. 2:13). Maʉ̃ba jarakĩrãbʉ naʉ̃ drʉade kʼãrẽ berabaribʉba akʉza ẽbẽrarãba kʼãrẽ obʉrʉba awuara babi ẽ Jeowara, mia iyi sãwũã chude, mia iyi kʼãrẽ oita krĩchabʉde akʉza iya zokʼabʉde. Mawũã Jeowara kĩrã awuarabʉ ẽ baera, ĩjãpanʉ dayirãba bedʼea zroma erbʉdera iya kʼarebaita akʉza iya dayirã nekʼãrẽ bia diaya adara mawũã oita (Sal. 62:​6, 7). w24.06 27, 28 parr. 7, 8

Bʉa ẽbẽra abaʉta bedʼea erbʉbʉrʉ, ¿kʼãrẽba kʼarebayi bia krĩchaita juwa jidaita, mawũã ẽ bʉrʉ juwa jida ẽãta? Nãã biʼia ũdukʼawuaibara iyita. Nawedara bʉara wiña ũdukʼawuabasibaibara, mamina atiara iyiʉ̃me bedʼeabʉ baera, audre ũdukʼawuayi iyi sode sãwũãbʉta. Adewara bʉra iyiʉ̃me badua bedʼeabʉ baera, audre kʼawuayi iya sãwũã krĩchabʉta, iyi sode nekʼãrẽ nebia erbʉta akʉza Jeowaʉ̃me sãwũãbʉta, mawũã ewari berabari wãne bʉa kʼawuayi maʉ̃ra bʉita kima bia baseabʉta, mawũã ẽ bʉrʉ kima bia ẽãta (Prov. 31:​26, 27, 30; Efes. 5:33; 1 Tim. 5:8). Adewara ũdukʼawuayi bʉa nesidabʉta diaseabʉ kʼawuaita akʉza bʉabida mawũã oseabʉ kʼawuaita akʉza kʼarebayi bʉyikʉza kʼawuaita bʉ kima bʼaiba nemitia obʉrʉde bʉa maʉ̃ta kĩrãduaseabʉ kʼawuaita (Rom. 3:23). Mamina kĩrãbedaibara ẽbẽra bʉme bedʼeabʉra bʉ kĩrãkʼa abarika krĩcha ba ẽ baibarata ewari jõmaʉ̃nẽ, awuarabʉrʉ akʉibara mara awuara krĩchapanʉmina, wãrĩnu sobia baseabʉ kʼawuaita. w24.05 27 parr. 5

Davidbida nemitiata osi, mamina propeta Natánba iyaʼa jaraside Jeowa sãwũã sentibʉta, maʉ̃ kʼarea Davidbara eda krĩchabʉta ũdubisi, mõbe iya kayirua oda kʼarea soiduba jẽda krĩchabʉta ũdubisi. (Sal. 51:​3, 4, 17). Nokʼo Ezequíasbida nemitiata osi (2 Crón. 32:25). Mamina Davidʼde kĩrãkʼa Ezequíasbara eda krĩchabʉta ũdubi kʼãrãpe iya kayirua oda kʼarea jẽda krĩchasi (2 Crón. 32:26). Maʉ̃ kʼarea Jeowaba jarasi Ezequíasʼra nokʼo biabasita akʉza iyiare kʼẽrẽpabasita (2 Rey. 18:3). ¿Kʼãrẽta kʼawuapanʉ? Dayirãba kayiruata osidabʉrʉ soiduba jẽda krĩchaibarata akʉza zarea odaibara jẽda oda ẽ baita iyabaʉ kayiruata. Zõrãrã abaʉba bʉaʼa ũrãgʼata diara nekʼãrẽ zroma kʼarea, mawũã ẽ bʉrʉ nekʼãrẽ zake kʼarea, ¿kʼãrẽta oibara? Maʉ̃ kʼarea dayirãbara krĩcha ẽ baibara Jeowaba dayirãra kãga ẽãta akʉza zõrãrã kongregasionebemarabara dayirãra bia akʉ ẽãta. Nokʼora Israeldebemarasida abarika ũrãgʼasida baera akʉza ãyisida kʼẽãsida baera (Heb. 12:6). Dayirãʼa ũrãgʼata diadara dayirãbara nããrãra ũdubibara eda krĩchabʉta, yi ũmera jʉrʉibara dayirãba nekʼãrẽ aña odata sãwũã ara oita, yi ũbeata, soiduba obʼaibara Jeowaba zokʼabʉta. Dayirãba kayirua oda kʼarea jẽda krĩchapanʉbʉrʉ, Jeowaba kĩrãduayi dayirã kayiruara (2 Cor. 7:​9, 11). w24.07 22 parr. 8, 9, 11

Zõrãrãbara nekʼãrẽ jõma osidamina ẽbẽra nemitia oda kʼarebaita, naʉ̃ ẽbẽrata iya nemitia oda kʼarea jẽda krĩcha ẽ bʉrʉ kongregasioneba ãĩ bʉepanʉ (2 Rey. 17:​12-15). Iya obʉba ũdubibʉ Jeowaba zokʼabʉde bakĩrã ẽãta (Deut. 30:​19, 20). Maʉ̃nera zõrãrãnebema abaʉba kongregasionebemara platapormaneba jarabʉ, maʉ̃ ẽbẽrarã wua Jeowa ʉ̃rʉ Kʼawuabipanʉrã ẽãta. Mawũã kongregasionebemara kĩrãbita jaraira, opanʉ ẽ yi ẽbẽrata dauperabita, awuarabʉrʉ jarapanʉ kãgapanʉ baera kongregasionebemaraba Daizeze Bedʼeade jarabʉta oũdubidamarẽã, ¿saʉ̃ maʉ̃ra? Maʉ̃ ẽbẽraʉ̃me ãba ba ẽ bamarẽã akʉza maʉ̃me neko ẽ bamarẽã (1 Cor. 5:​9-11). Jeowaba maʉ̃ ũrãgʼa diadara yibiabasi. Pabloba naʉ̃ta jarasi: «¿Kʼawuada ẽka arina wika erapʉa obariba, masa jõma oregueabibarita?» (1 Cor. 5:6). Ẽbẽra aba iya nemitia odata jẽda krĩcha ẽ bʉrʉ akʉza maʉ̃ ẽbẽrata kongregasioneba ãĩ bʉe ẽ bʉrʉ, wuabemarabara krĩchaseabʉ nesida ẽãta Jeowaba zokʼabʉde bʼaira (Prov. 13:20; 1 Cor. 15:33). w24.08 27 parr. 3, 4

Dayirãbara dayirã zareara awurura diabe ẽ. Mamina dayirãba nekʼãrẽ oseapanʉ kʼarebaita awuru mebẽrã zarea nesidapanʉrata. Bari jaraita, mebẽã abaʉta zõrãyirubʉrʉ, mawũã ẽ bʉrʉ kayabʉbʉrʉ, dayirãbara kʼarebaseabʉ iyi de imabʉde, mawũã ẽ bʉrʉ iyita ne eda wãbʉrʉde. Mawũã ẽ bʉrʉ kʼarebaseapanʉ ãba yi jʉrebari de ara oita. Adewara kʼarebaseabʉ ãba yi jʉrebari de imaita. Kĩrãbedaibara dayirãba kʼãrẽ jarabʉba so zarea diaseabʉta wuabemara, mawũẽra dayirãbara mebẽrã so zarea diaseapanʉ. ¿Bʉara kʼawuabʉka saʉ̃ mebẽãba so zarea diamarẽã nesidabʉta? Kʼawuabʉbʉrʉ trʉ̃seabʉ selulardeba iyaʼa so zarea diaita, mawũã ẽ bʉrʉ kartata zokʼa bʉeseabʉ adewara akʉ wãseabʉ iyi deidu. Edaʉde krĩchaseapanʉ awurura so zarea diaira nekʼãrẽ mejãcha jaraibarata, mamina wãrĩnubaira daya mebẽã abaʉʼa ibiade bedʼeabʉrʉba akʉza dayi sodebʉta jarabʉrʉba kʼarebaseabʉ. Maʉ̃ kʼarea mejãcha krĩcha oda ẽ baibara mebẽã abaʉʼa kʼãrẽ jarai kʼarea. Edaʉde bʉa mawũã bedʼea wiña jarasimina mejãcha kʼarebaseabʉ mebẽrãra bʉa iya nesidakʉta jarasi baera, maʉ̃ba mejãcha kʼarebabʉ maʉ̃ ewaride iyi bia bʼaita (Prov. 12:25; Efes. 4:29). w24.09 28 parr. 8-10

Bʉta dããrãbabʉrʉ zõrãrã kʼarebabaride, bʉta mawũãra Daizeze Bedʼeade nebiabʉta oũdubibʉbaibara zõrãrã bʼaita. ¿Bʉabida zõrãrãba obʉta okĩrãbʉka? ¿Kʼãrẽta obʉ zõrãrãbara? Mebẽrã zõrãrãra zarea opanʉ Daizeze Bedʼea jaradia wãita. Maʉ̃ awuara mebẽrãta akʉ wãpanʉ ãyaʼa so zarea diaita akʉza ãya kʼãrẽ jarabʉdeba akʉza kʼãrẽ obʉdeba kʼarebabʉ mebẽrãba Jeowa ʉ̃rʉ ĩjãbʉta audre zarea erpanamarẽã. Maʉ̃ba naʉ̃ra zõrãrãra Daizeze Bedʼeabara jarabʉ kongregasionʼa nebia diada kĩrãkʼabʉta (Efes. 4:8). ¿Zõrãrã bʼaira kʼãrẽta oibara? Zõrãrã bʼaira bari mawũã nekʼãrẽ mejãcha okʼawua chuibara ẽ. Mamina naʉ̃ drʉadera ẽbẽra abaʉba dayi trajabira akʉbʉ kʼãrẽta okʼawuabʉta. Kõbe zõrãrã kongregasionebema bʼaira jipa awuarabʉ, bari Daizeze Bedʼeata jaradia kʼawua ba ẽ baibara akʉza nekʼãrẽ jaradia kʼawua ba ẽ baibara, awuarabʉrʉ oũdubibara 1 Timoteo 3:​1-7de jarabʉ nebiata akʉza Tito 1:​5-9de jarabʉta. w24.11 20 parr 1-3