Octubre

Badua dayirã jarapanʉ sãwũã Jeowadeta audre bia odaita, maʉ̃ra zebʉ zõrãrã kongregasionebemaneba, Beteldeba, kongregasionʼra akʉbari zõrãrãneba akʉza Zõrãrã Burubiadeba. Mamina, ¿kʼãrẽta berabariseabʉ ãya zokʼabʉta dayirãba bia ũrĩ ẽ bʉrʉ? Ãyi ʉ̃rʉ mitia krĩcha jʉ̃drʉseabʉ akʉza krĩchaseabʉ ãya zokʼabʉra dayirãba oita zeri ẽãta. Ĩjãbʉ kʼarea jõma obʉta ũdubidara, ũdubidayi ĩjãbʉta Jeowaba zokʼabʉta iyi organizasionʼra akʉza Jeowaba kʼawuabʉta saʉ̃ta bigata akʉza saʉ̃ta zeri ẽãta, maʉ̃ba dayirãitara zare ẽ bayi jõma Jeowa organizasionba kʼãrẽta omarẽã zokʼabʉra ũrĩta (Heb. 13:17). Dayirãba ũrĩpanʉbʉrʉ Jeowa organizasionba zokʼabʉta, naʉ̃ba kʼarebayi kongregasion ãba erpanaita (Efes. 4:​2, 3). Naʉ̃ra yi nãã edepanʉrãra nemitia omiamina ãya zokʼapanʉta dayirãba ũrĩpanʉ, dayirãba ĩjãpanʉ baera Jeowaba dayirã nebia diaita ãyi bedʼeata ũrĩpanʉ kʼarea (1 Sam. 15:22). Akʉza kʼawuapanʉ nekʼãrẽta ara oibarabʉrʉ, Jeowaba ara oita iya kãgabʉ ewaride. w25.03 23, 24 parr. 13, 14

Idi ewade dayirãba kʼãrẽ ũdunʉmʉra jipade yibia. ¿Kʼãrẽa? Dayirãbara ũdu wãna sãwũã Daizeze Bedʼeade propesiaba jarabʉra, aripe berabari wãta. Bari jaradaita, akʉpanʉ sãwũã nokʼo nortedebemata adewara nokʼo surdebemaʉ̃me yõpanʉta kʼaiba zokʼaita naʉ̃ drʉara (Dan. 11:40). Maʉ̃ awuara Daizeze Nokʼo ʉ̃rʉ naʉ̃ drʉa jõmaʉ̃nẽ jaradia wãna. Akʉza ẽbẽrarã mejãchaʉta wãpanʉ Daizeze ode (Is. 60:22; Mat. 24:14). Adewara yiko jauredebemata dayirãba nesidabʉde erpanʉ (Mat. 24:​45-47). Jeowabara kʼarebabʉ dayirãba biʼia ũrĩnamarẽã aranʉ kʼãrẽta sãwũã berabarita (Prov. 4:18). Zʉbʉria zroma zebʉrʉdera biʼia kʼawuapanañi kʼãrẽta odaita, mawũã Jeowaʉ̃me kʼẽrẽpa bʼaita akʉza mebẽrãbawara ãba bʼaita maʉ̃ ewaride. Mamina dayirãbara kʼawuadaibara bʉta nekʼãrẽ dayirãba kʼawua ẽãta nekʼãrẽ ʉ̃ra zei ʉ̃rʉ. w24.05 8 parr. 1, 2

Salmistaba jara ũrĩbibʉ ẽbẽra abaʉba awuru ʉ̃rʉ i kayirua bedʼeabʉ ʉ̃rʉ, maʉ̃ ẽbẽrabara sewidata jarabʉ wuabemara ʉ̃rʉ. Salmo 15:3ba kĩrãbebibʉ Jeowa de karpadebʉbara wuabemara ʉ̃rʉ nemitia oẽãta akʉza iyi neũdukʼawuara ʉ̃rʉ i kayirua jara ẽãta (Sal. 15:1). ¿Sãwũã i kayirua bedʼeaseapanʉ dayirã neũdukʼawua ʉ̃rʉ? Dayirãta jʉra kʼawuapanʉ ẽ bʉrʉ wuabemara ʉ̃rʉ, i kayirua bedʼeaseabʉ. Krĩchadaya naʉ̃ra yiza ũbea ʉ̃rʉ: yi nããrabemata, mebẽã wẽrã abaʉba yi nãã edebari obʉta idubʉebʉ, yi ũmeta mebẽrã juwa jidapanʉrata Beteldeba ãĩ wãpanʉ, yi ũbeata jarapanʉ mebẽã aba wua zõrãrã ẽãta mawũã ẽ bʉrʉ zõrãrã kʼarebabari ẽãta. Jipade biga ẽ bayi dayirãba jaraita maʉ̃ra mebẽrãra mawũã berabarisita ãya nei aña osi baera, wãrĩnu bʼaira dayirãbara kʼawua ẽ baera kʼãrẽa mawũã berabarisita maʉ̃ra. Jeowa de karpadebʉbara wuabemara ʉ̃rʉ nekʼãrẽ mitia oẽ akʉza iyi neũdukʼawua ʉ̃rʉ i kayirua jara ẽ. w24.06 11 parr. 11-13

Dayirãba nekʼãrẽ jidai naweda, nãã krĩchaibara Jeowaba kãgabʉde obʉ kʼawuaita, maʉ̃ta odara Jeowaʼa audre wawiata ũdubidayi. Bʉa Daizeze Bedʼea akʉnʉmʉne krĩchara: «Mʉ̃ra mama basibʉrʉ, ¿kʼãreta okasi?». Bari jaradaita, bʉa maʉ̃ra yumakẽrãra 10ba jarabʉta ũrĩbʉbʉrʉ, Jeowaba zokʼada kʼãrãpe ẽbẽrarã israelitara drʉa diaya adama orda wãmarẽã, ¿bʉra maʉ̃ra ẽbẽra 10ba jarabʉ kʼarea peraika mawũã ẽ bʉrʉ Jeowata wãrĩnu wawia ũdubibʉ baera oika Jeowaba kãgabʉta? Israelitara mejãchaʉba Josuéba Calebʼʉ̃meba wãrĩnu jarabʉta ĩjãna ẽ basi baera, eda wã ẽ basi Daizezeba Drʉa diaya abʉma (Núm. 14:​10, 22, 23). w24.07 10 parr. 7

Gómerʼra Oseasdeba ãĩbasi. Iyara Oseasʼra awuru yumakẽrãrabari yi idubʉsi. Jeowabara Gómer mawũã wãsi baera kĩrãdua ẽ basi, awuarabʉrʉ iyara kʼawuabasi Gómer sode kʼãrẽtabʉta, maʉ̃ kʼarea Oseasʼa jarasi: «Jẽda wãra kʼaʉ̃ wẽrã edade akʉza kãga ũdubira iyaʼa, iyira awuru yumãkẽraba kãgabʉmina akʉza ãĩ babʉmina abarika Jeowaba Israeldebemara kãga ũdubibʉ kĩrãkʼa, ãyi awuru daizezeʼa yiwidʼibʉmina akʉza torta maʉ̃ita zokʼabʉta kãgamina». (Os. 3:1; Prov. 16:2). Oseasʼra Gómer eda wãsidera, Gómerʼra waidide nemitia onʉmasi, mamina Jeowaba Oseasʼa jarasi iyiareba jʉrʉ wãmarẽã Gómerʼra mawũã iyiʉ̃me ibiade bʼaita akʉza kĩrãduamarẽã iya nemitia odara. Naʉ̃ yizadeba Jeowaba israelitara ũdubisi ãya nemitia zroma osimina, Jeowabara ãyira kĩrãdua ẽãta akʉza iya kãga ũdubibʉra jõkata. Adewara Jeowabara propetarata zokʼa bʉebasi israelitarata kʼarebaita, mawũã ãya nemitia obʉta idubʉdamarẽã. Naʉ̃ yizaba jaradiabʉ Jeowabara ẽbẽra abaʉ ʉ̃rʉ jõma biʼia kʼawuabʉta akʉza iya nekʼãrẽ jõma obʉta kʼarebaita maʉ̃ ẽbẽraba iya kʼãrẽ aña obʉta idubʉmarẽã. w24.08 10 parr. 7

Pablobara kartara ebreora bʉ dia bʉesi, maʉ̃ra ebreorabara ãyi religion judiata idubʉsida kristianora bʼaita, mamina mawũã awuara yiwidʼi jʉ̃drʉira ãyitara zare bʼaibasi. Bari jaraita, judiorãra Jeowaba iyi pʉwʉrʉ bamarẽã jidasi. Adewara Jerusalénʼra kristianora judioraitara jipade yibiabasi, ¿kʼãrẽa? Jeowaba nokʼo jʉrʉdabara Jerusalénʼneba zokʼabasi baera akʉza ãyara Jeowaʼa yiwidʼipanasi baera Jerusalénʼnebema templodeba. Nokʼora religionebemaraba jarapanasi Moisés Leyba jarabʉde oibarata, maʉ̃ kʼãrẽa judiora kʼẽrẽpapanʉrabara ãya zokʼabʉde opanasi. Basi Ley sãwũã nekoibara ʉ̃rʉ, sirkunsision ʉ̃rʉ akʉza yi judiora ẽ sãwũã edaibara ʉ̃rʉ jara ũrĩbibʉta. Mamina Jesús beida tẽã Jeowabara bia akʉ ẽ basi templode iyaʼa sakripisio diadaira. Naʉ̃ jõma kʼarea ʉ̃kʉrʉ kristianoraitara jipade zarebasi Jeowaʼa sãwũã awuara yiwidʼi (adoración) jʉ̃drʉita (Heb. 10:​1, 4, 10). Adewara ʉ̃kʉrʉ kristianora ãya ĩjãbʉ zarea erbʉraitabida, zarebasi mawũã Jeowaʼa awuara yiwidʼi jʉ̃drʉira. Bari jaraita, apostol Pedroita (Hech. 10:​9-14; Gál. 2:​11-14). Mawũã Jeowaʼa awuara yiwidʼi jʉ̃drʉsida baera, naʉ̃ra kristianorãra nokʼora religionebemabaraba pẽwã jʉ̃drʉsida. w24.09 9 parr. 4

Jeowaba iyi pʉwʉrʉdebemara nekʼãrẽ omarẽã jarabʉrʉdera kãgabʉ jõma daucha odamarẽã (1 Cor. 14:33). Jeowabara kãgabʉ naʉ̃ drʉa jõmaʉ̃mae Daizeze bedʼeata jaradiadamarẽã (Mat. 24:14). Maʉ̃ kʼarea iya jidasi yi warra Jesúsba maʉ̃ trajo oita. Jesúsbara maʉ̃ trajora jipade biʼia obʉ. Bari jaraita siglo nããrabemanera kongregasion owãnamae basi zõrãrãta, maʉ̃ra zõrãrãba kʼarebabasi maʉ̃ kongregasionta bia bamarẽã akʉza jõma daucha erpanamarẽã (Hech. 14:23). Jerusalénʼnera panasi apostolerata akʉza zõrãrã mamabemarata, maʉ̃rabara jidapanasi kongregasione kʼãrẽta oibarata, mawũã mebẽrã maʉ̃ kongregasionebemaraba maʉ̃ daucha odamarẽã (Hech. 15:2; 16:4). Mebẽrãba zõrãrãba jarabʉta ũrĩpanasi baera naʉ̃ba kʼarebasi kongregasionʼra audre eaba wãmarẽã akʉza ãya ĩjãbʉsida audre zarea erpanamarẽã (Hech. 16:5). w24.04 8 parr. 1

16 nisanʼne diapedare wẽrãra kʼẽrẽpapanʉrata jʉ̃ẽsida Jesús joudapeadaidu (Luc. 24:​1, 10). Maʉ̃ra wẽrãranebema abara María Magdalenabasi. Iyara Jesús joudapeadata akʉ wãsi, mainʉ jʉ̃ẽbʉrʉde iya Jesús joudapeadamae akʉbʉrʉdera miõ ũdu ẽ basi, maʉ̃ kʼarea iyira wẽba wãsi Pedroʼa akʉza Juanʼa maʉ̃ta jaraita. Aramaʉ̃ta Pedrora Juanʼʉ̃mera wẽba wãsida maʉ̃ akʉde. Ãyi mainʉ jʉ̃ẽbʉrʉdera ũdusida Maríaba jaradara wãrĩnubasita. Ãya mawũã miõ neẽãta ũdui, Pedrora Juanʼʉ̃mera deda wãsida, mamina Maríara wã ẽ basi awuarabʉrʉ piki jẽga besi. Iyi mawũã jẽganʉmʉnera Maríabara krĩchasi iyira abapaibasita, mamina iya kʼawua ẽ nãã Jesúsba akʉnʉmasi. María mawũã jẽgabʉba Jesús sota tõbarisi, maʉ̃ne Jesúsba ũdusi Maríabara wãrĩnu ĩjãbʉta iyi ʉ̃rʉ, maʉ̃ kʼarea María yi ũdubisi akʉza jarasi iyi kʼaidubemarata akʉ wãmarẽã, mõbe jaramarẽã iyira jẽda piradrʉsita (Juan 20:​17, 18). w24.10 13 parr. 7

Moisésʼra propetabasi, juezbasi akʉza Daizeze pʉwʉrʉta zokʼabasi. Adewara bʉsi ʉ̃kʉrʉ bedʼeara Daizeze Bedʼeadebʉta. Jeowaba israelitara Egiptodeba ẽdrʉbisidera Moisésbasi Jeowa pʉwʉrʉ nãã edebʉra akʉza iya ũdusi Jeowaba sãwũã miõba okata osita iyi pʉwʉrʉ kʼarebaita. Jeowaba Moisésta zokʼasi Daizeze Bedʼeade libro nãã juesomabʉrata bʉmarẽã akʉza Salmo 90ta, adewara iya bʉsibaibara Salmo 91sida akʉza iya bʉsibaibara Job librosida. Moisés 120 poaga babʉrʉde iyi bei nãã, israelitarata ãba jʉredasi ãya kĩrãbebita ãyi kʼãrẽ berabari zebʉrʉta. Ãyara ũdusida sãwũã Jeowaba miõba okata osita akʉza sãwũã zʉbʉriabisita egipsiorata (Éx. 7:4). Ãyara ũdusida Jeowaba sãwũã mar Rojo ẽzadra ewasita akʉza kʼarebasita ãyita maʉ̃ne berabarimarẽã. Tẽã ãya ũdusida Jeowaba sãwũã paraonta iyi gorogororabawara makenasita (Éx. 14:​29-31). Mawũã ãyi drʉa ibʉawabʉma wãside ãya ũdusida Jeowaba sãwũã bia akʉsita akʉza sãwũã kʼarebasita (Deut. 8:​3, 4). Jeowaba israelitara drʉa bia diaya ada zei arakʼaita babʉrʉde, Moisésba iyi bei nãã ũrãgʼa biata diasi naʉ̃ra israelitara, mawũã so zarea diaita. w24.11 8, 9 parr. 3, 4

Jesúsba iyi bei nãã bedʼea jaradara bedʼeasita ẽbẽrarã ʉ̃ta wãiraʉ̃mebʉrʉ, mamina Galileade bedʼea jaradara bedʼeasi ẽbẽrarã jõma ʉ̃rʉ.Poaga 32de Galileade Jesúsba bedʼea jarasidera, naʉ̃ra ẽbẽrarãbara Jesúsʼra audrera jʉrʉpanasi yiko kʼarea, naʉ̃ ewaridera Jesúsbara naʉ̃ra ẽbẽrarãra bari yiko ʉ̃rʉ bedʼea ẽ basi, iyara audre bedʼea biata jarasi, ¿saʉ̃ta? Jarasi ãyira ewari jõmaʉ̃nẽ baseabʉta. Jesúsba jarasi ẽbẽrarã beidarãra ewari jõbodoare jẽda piradrʉita ewari jõmaʉ̃nẽ bʼaita, mamina nama Juan 6dera Jesúsʼra bedʼea ẽ basi bari ẽbẽrarã wiñabʉ ʉ̃rʉ iyi bei nãã yiko oside jarada kĩrãkʼa, awuarabʉrʉ naʉ̃nera jarasi ẽbẽrarã jõmaʉ̃ba ũduseabasita maʉ̃ ewari jõmaʉ̃nẽ bʼaita. w24.12 11 parr. 10, 11

Jeowabara jʉra ẽbẽrarã mia pomiara (Sal. 11:5). Mamina audre jʉra yumakẽrã yi kima pobʉta (Mal. 2:16). Yumakẽrã yi kima pobʉra bari yi kimaʉ̃mebʉrʉ bia wã ẽ bayi, Jeowaʉ̃mebida bia wã ẽ akʉza Jeowabara ũrĩ ẽ bayi naʉ̃ yumakẽrã yiwidʼira (1 Ped. 3:7). Ʉ̃kʉrʉ yumakẽrãbara ãya kʼãrẽ jarabʉdeba zʉbʉriabibare ãyi kimara, naʉ̃ta Jeowabara kãga ẽ, bari jaraita, i jʉra bedʼeaita, jʉra bedʼeaita, imitia bedʼeaita (Efes. 4:​31, 32). Yumakẽrãba yi kima iyi deda imitia jarabʉbʉrʉ, maʉ̃ba yumakẽrãra bari bia wã ẽ bayi yi kimaʉ̃mebʉrʉ akʉza Jeowasida iyi neũdukʼawua ba ẽ bayi (Sant. 1:26). Jeowaba jipade jʉra ẽbẽra ãkadabe akʉira. Maʉ̃ba yumakẽrãba maʉ̃ta obʉbʉrʉ, Jeowa neũdukʼawua ẽ akʉza maʉ̃ yumakẽrãba yi kima wawia ũdubi ẽ. Maʉ̃ba Jeowabara kãgabʉ yumakẽrãra ãĩ ba ẽ marẽã yi kimaneba akʉza mia kʼãrẽsida krĩcha ẽ baita awuru yuwẽrã erkʼãĩta. Maʉ̃ kʼarea Jesúsba jarasi yumakẽrã abaʉta iyi sode awuru yuwẽrãʉ̃me ãba kʼãĩkĩrãbʉbʉrʉ ãĩbasita (Mat. 5:​28, 29). w25.01 9 parr. 6-8

Jeowaba dayirãra neneẽãbʉta akʉira, naʉ̃bara jarakĩrãbʉ dayirãba obadata jare wãsita akʉza nemitia oka kĩrãkʼa beita. Naʉ̃bara jarakĩrãbʉ ẽ Jeowaba nekʼãrẽ omarẽã jarabʉra iyara aripe oẽãta. Jeowabara dayirãra neneẽãbʉ a ẽ dayirãta zarea osi baera mawũã bʼaita. Adewara maʉ̃ba jarakĩrãbʉ ẽ Jeowabara kayiruara bia akʉbʉta. Jeowabara kĩrãduabʉ dayirãba nemitia obʉra ĩjãpanʉ baera Jeowaba akʉza yi Warraʉ̃meba nekʼãrẽta osita maʉ̃ nemitiadeba ẽdrʉbita (Rom. 3:24). ¿Kʼãrẽ nebiata ũdupanʉ Jeowaba dayirã neneẽãbʉta akʉbʉ baera? Ʉ̃kʉrʉ kristianorãra jidasida ʉ̃tʉ Jesúsʼʉ̃meba zokʼadamarẽã, mawũã Daizeze warrarabasi (Tito 3:7; 1 Juan 3:1). Daizezeba ãya nemitia obʉta kĩrãduasi baera, maʉ̃ba nemitia oka kĩrãkʼabʉ akʉza iduaribibʉ Daizeze Nokʼota zokʼadamarẽã (Rom. 8:​1, 2, 30). Ʉ̃kʉrʉ kristianora nama egorode bʼairasida, ãya nemitia obʉra Daizezebara kĩrãduasi, mawũã ewari jõmaʉ̃nẽ baseapanʉ naʉ̃ egorode, adewara Daizeze neũdukʼawua baseapanʉ (Sant. 2:​21-23). w25.02 5 parr. 17; 7 parr. 18

Kʼawuadayi Pedroba sõbede ũdubisita Jeowa kĩrãkʼa krĩchabʉ ẽãta. Ewari aba Jesúsba jarasi iyira Jerusalénʼena wãibarabasita mõbe mama nokʼora religionebemaraba iyira po kʼãrãpe beadaibasita (Mat. 16:21). Pedrobara bia ũrĩ ẽ basi Jesúsba jaradara, iya ĩjã ẽ basi sãwũã Daizezeba dayirã ẽdrʉbimarẽã jidadata mawũã beadaibasita (Mat. 16:16). Maʉ̃ kʼarea jãpe ede kʼãrãpe naʉ̃ta jarasi: «Nokʼó, mawũã bedʼearãrũã bʉzhita sozuburiarua, Daizezebara bʉra mawũãrã berabʼaribi ẽã» (Mat. 16:22). Pedrora Jeowa kĩrãkʼa krĩchaba ẽ basi baera, iyira bedʼea abarika ba ẽ basi Jesúsʼʉ̃me. Jesúsba kʼawuabasi iya Jeowaba kãgabʉ oira iyira zʉbʉria kʼãrãpe beibarabasita, maʉ̃ba Pedroba iyi kʼarebakĩrãbasimina ũrĩ ẽ basi Pedroba jaradara. Pedroba naʉ̃neba kʼawuasi iyira Daizeze kĩrãkʼa krĩchaita waebʉta, abarika dayirãbida nesidapanʉ Jeowa kĩrãkʼa krĩchaita. w25.03 9 parr. 5, 6

¿Neũdukʼawua abaʉba sewasika bʉra? Ẽbẽra abaʉba bʉta zʉbʉriabisimina, biʼia kʼawuabara Jeowabara bʉra kãgabʉta. Bʉta sewasidabʉrʉ kʼarebaseabʉ bedʼea bia Davidba jaradaba idibema testode. Libro abaʉba jarabʉ yi mejãcha zʉbʉriabʉrãra abarikabʉta kʼãrẽ bia jʉ̃ã ẽ bai kĩrãkʼa. ¿Jeowaba sãwũã kʼarebabʉ yi mawũã sentipanʉrãra? Kʼaʉ̃ bersikuloba jarabʉ Jeowara kʼawabʉta yi sopʉabʉrabawara, yi zʉbʉriabʉrãra ẽbẽra abaʉba mawũã osi baera. Jeowara Zeze bia kĩrãkʼabʉ. Jari yi zezeba yi wũãwũã jẽganʉmʉ ũdui, jira edape kʉrʉgabidabari kĩrãkʼa. Dayirã zʉbʉrianʉmʉta ũdui Jeowabara aramaʉ̃ta kʼarebabʉ. Iya dayirã sora aduʼa babikĩrãbʉ, mawũã aukʼara zʉbʉria ẽ baita. Mamina dayirãbara jʉ̃ãpanʉ nebia zeita, maʉ̃ kʼarea awuantaseapanʉ badu bedʼea zromata (Is. 65:17). w24.12 23 parr. 13, 14

Idi ewadebida Jeowabara akʉbʉ zõrãrãba kʼãrẽ nebia obʉra. Zõrãrãbara akʉpanʉ mebẽrãra, jaradiabʉ kongregasione, jaradia wãpanʉ. Mamina maʉ̃ awuara ʉ̃kʉrʉbara kʼarebapanʉ Daizeze de parãita akʉza kʼarebapanʉ mebẽrã drʉade neida berabaribʉrʉde. Akʉza ʉ̃kʉrʉta medikobawara bedʼeabʉ mebẽrãbari. Zõrãrãbara bia kʼawuapanʉ kongregasionʼrãra Daizezedeta. Maʉ̃ kʼarea ãya obʉra soiduba obʉ akʉza wãrĩnu ĩjãpanʉ maʉ̃ obʉ kʼarea Jeowabara ãyaʼa nebiata diaita (Col. 3:​23, 24). Jõmaʉ̃ta zõrãrã kongregasionebema babe ẽ, mamina jõmaʉ̃ba nekʼãrẽ diaseabʉ Jeowaʼa. Jeowabara bia akʉbʉ dayirãba iyi kʼarea zarea opanʉra. Maʉ̃ kʼarea dayirãba plata kongregasionʼita diabʉrʉdera Jeowaba maʉ̃ra bia akʉbʉ, maʉ̃ra wĩkabʉmina. Akʉza iyira sobiabʉ dayirãba mebẽrãba dayirã ʉ̃rʉ nekayirua oda kĩrãduabʉde. Kĩrãbera Jeowabara bʉa obʉra bia akʉbʉta nekʼãrẽ wĩkabʉmina. Iyara kãga bʉra akʉza nebiata diayi bʉa mawũã obʉ kʼarea (Luc. 21:​1-4). w24.06 23, 24 parr. 12, 13

Daizeze odepanʉra baduta mawũã berabariseabʉ, nemitia zromata oseabʉ, mõbe krĩchaseabʉ maʉ̃ra atiaʉde mawũã berabarisita, iyikʉza krĩchaseabʉ: «Mʉ̃a kʼawua ẽ sãwũã mawũã berabarisita». Mamina jẽda biʼia krĩchara kʼawuayi iyi sãwũã wiña wiñane maʉ̃ne eda baesita. Iya maʉ̃itara nekʼãrẽ bio osibaibara. Bari jaraita, jemenebasibaibara Daizezeba kãga ẽãta akʉza neũdukʼawua zeri ẽãta jʉrʉsibaibara, adewara internetʼne akʉsibaibara nekʼãrẽ akʉ ẽ baibarata akʉza Daizezeʼa yiwidʼi ẽ basi akʉza Daizeze Bedʼeasida akʉ ẽ basi akʉza jaradia wã ẽ basi adewara ãba yi jʉre ẽ basi. Kʉ̃ra Proverbiosde jarabʉ kĩrãkʼa, maʉ̃ra atiaʉde mawũã berabari ẽ basi. ¿Kʼãrẽta kʼawuapanʉ? Bari jʉra kʼawua baibara ẽ nekayirua oẽ baita, awuarabʉrʉ jʉra kʼawuabaibara wiña wiñane maʉ̃ kayiruama edebʉta oẽ baita, maʉ̃ta jarasi Salomónba (Mat. 5:​29, 30). w24.07 16 parr. 10, 11

¿Kʼãrẽta jarakĩrãbʉ maʉ̃ nekʼãrẽ biabara? Maʉ̃bara jarakĩrãbʉ bedʼea bia Daizeze Nokʼo ʉ̃rʉ dayirãba jaradiapanʉta (2 Cor. 4:1). ¿Kʼãrẽta jarakĩrãbʉ kʉgʉrʉ egoro omabara? Maʉ̃bara jarakĩrãbʉ yi ẽbẽrarã maʉ̃ bedʼea bia edepanʉrata. Pablo ewaribasidera ne nẽdobarirabara kʉgʉrʉta zokʼapanasi yiko edeita, bino edeita akʉza plata edeita. Abarika Jeowaba dayirãta zokʼabʉ maʉ̃ bedʼea biata ẽbẽrarã jaradia wãnamarẽã. Jeowa kʼarebadeba dayirãbara zarea erbaseabʉ naʉ̃ bedʼea bia jaradia wãita. Edaʉde dayirãra pera sentiseapanʉ ẽbẽrarãʉ̃me bedʼeaita. ¿Kʼãrẽta odaibara mawũã sentida ẽ baita? Apostolera jarasidade Daizeze bedʼeata wua jaradiada ẽ marẽã, aramaʉ̃ta ãyira Jeowaʼa yiwidʼisida ãyaʼa zarea diamarẽã. Jeowaba waña panʉsi ãyi bedʼeara (Hech. 4:​18, 29, 31). Bʉta ẽbẽraʉ̃me bedʼeaita perabʉbʉrʉ, widida Jeowaba kʼarebamarẽã Daizeze bedʼea pera ẽã jaradiaita. w24.04 16 parr. 8, 9

Dayirãbara Jeowata mejãcha kãgabʉ baera, kãgapanʉ ẽbẽrarãba iyi trʉ̃ ʉ̃rʉ ibia bedʼeamarẽã, maʉ̃ba jaradiapanʉ. Adewara Diarubida Daizeze trʉ̃ ʉ̃rʉ imitia bedʼeabʉ baera, dayirãbara Daizeze Bedʼeata ẽbẽrarã jaradiapanʉ kʼawuadamarẽã wãrĩnuta Jeowa ʉ̃rʉ (Gén. 3:​1-5; Job 2:4; Juan 8:44). Akʉza ẽbẽrarã Daizeze Bedʼea ũrĩkĩrãpanʉa jaradiakĩrãpanʉ Daizeze ʉ̃rʉ akʉza kãgapanʉ ẽbẽrarãba kʼawuadamarẽã Daizeze Jeowara kãga barabʉta akʉza jõma aripe zokʼabʉta, adewara Daizeze Nokʼobʉrʉ jõbita zʉbʉriara akʉza jõmaʉ̃ta aduʼa sobia babita (Sal. 37:​10, 11, 29; 1 Juan 4:8). Daizeze Bedʼea jaradia wãbʉrʉdera dayirãbara Daizeze trʉ̃ ʉ̃rʉ ibia bedʼeabipanʉ, dayirãra arigʉ sobiapanʉ Jeowa ʉ̃rʉ Kʼawuabipanʉrãba oibarata opanʉ baera. w24.05 18 parr. 12

Mebẽrã, ¿kʼãrẽta jarakĩrãbʉ iyi deidu jʉ̃ẽbʉdade bia akʉibara? Naʉ̃bara jarakĩrãbʉ bari iyi neũdukʼawuaratrʉ bia edaibara ẽãta, wuabemara ẽbẽrarãsida bia akʉibarata (1 Ped. 4:9). Libro abaʉba jarabʉ ẽbẽra yi deidu jʉ̃ẽbʉdade bia edabʉbara, baduta bia edabʉta iya ũdukamina akʉza iyi deda jʉ̃ẽmarẽã trʉ̃bʉta. Bʉyikʉza widira, ¿mʉ̃ra ũdukaʉdeka wuabemara bia edabʉta? (Heb. 13:​2, 16). Zõrãrã mawũã bʉbara baduta bia edabʉ, bari jaraita ẽbẽrarã kʼãrẽ neẽbeta, mebẽrã kongresione diskurso dia jʉ̃ẽnata, adewara kongregasion akʉbari zõrãrãta (Gén. 18:​2-8; Prov. 3:27; Hech. 16:15; Rom. 12:13). w24.11 21 parr. 6

Jesúsba jarasi wẽrãra yi zake 10panʉraba jʉ̃ãpanasita yumakẽrã ʉ̃rabʉrʉ juwa jidaita (Mat. 25:​1-4). Naʉ̃ra wẽrãrabara jʉ̃ãpanasi yumakẽrã juwa jidade uruta mawũã iyi kʼaidu wãita. Jesúsba jara ũrĩbisi naʉ̃ra wẽrãranebema juesomara krĩcha barabasita akʉza yi wuabema juesomarãra krĩcha neẽãta. Wẽrãra yi zakera krĩcha barabʉrabara nekʼãrẽ jõma osi ãyi ĩbira kibi ẽ baita. Ãyara maʉ̃ra mawũã osi yumakẽrã juwa jidade uruta ãza zeseabasi baera (Mat. 25:​6-10). Maʉ̃ba yumakẽrã juwa jidaitabʉta zebʉrʉdera, naʉ̃ra wẽrãrãra maʉ̃ kʼaidu wãsida. Abarika kristianora ʉ̃ta wãirata kʼẽrẽpapanʉbʉrʉ akʉza daubapanʉbʉrʉ, ũdudayi ãya nebia jʉ̃ãpanʉta Jesús zebʉrʉde (Apoc. 7:​1-3). w24.09 21 parr. 6

Dayirãba idi ewade ũdupanʉ ẽbẽrarã mejãchaʉba ũrĩkĩrãpanʉta dayirãba bedʼea bia jaradiapanʉra. Naʉ̃ ʉ̃rʉ krĩchaiba kʼarebabʉ dayirãbida ewariza jaradiakĩrãne jaradia wãnaita Daizeze Bedʼeata. Dayirãba ũdupanʉ poagaza ẽbẽra mejãchaʉta jʉ̃ẽpanʉta Jesús beida jẽda kĩrãbeita akʉza ẽbẽrarã mejãchaʉba kʼawuakĩrãbʉ Daizeze Bedʼea ʉ̃rʉ, adewara mejãchaʉta buru kʼoepanʉ. Maʉ̃ awuara, mejãchaʉba dayirãne kĩrãkʼa jaradiapanʉ Daizeze Bedʼeata. Wãrĩnubaira dayirãba kʼawua ẽ ẽbẽrarã sõbe ba ũrĩkĩrãita dayirãba jaradiapanʉra. Mamina kʼawuapanʉ Jeowabara ẽbẽrarã mejãchaʉta ãba jʉredaita iya kãgabʉta odamarẽã akʉza naʉ̃ ẽbẽrarãra ẽdrʉyi zʉbʉria zroma zebʉrʉdeba (Apoc. 7:​9, 14). Jaradia wãira Jeowaba zokʼabʉ akʉza iya ĩjãbʉ ẽbẽrarã mejãchaʉba ũrĩkĩrãnaita bedʼea biara. Maʉ̃ kʼarea dayirãbara idubʉda ẽ baibara jaradiatakiruta (Luc. 10:2). Jesús kʼaidupanʉrãra ũdukʼaude ãya ewari jõmaʉ̃nẽ Daizeze Bedʼeata jaradiakĩrãne jaradiapanʉ kʼarea. Bari jaradaita, nawedara Jesús kʼaidubemaraba jaradia wãbʉrʉdera jaradiakĩrãne jaradiapanasi, zowaĩnĩgʉata ũdubipanasi. Maʉ̃ kʼarea ẽbẽrarã mejãchaʉba ãyira ũdukʼawuapanasi Jesús kʼaidubemarata (Hech. 4:13). Idi ewadebida, dayirãba ẽbẽrarã jaradia wãbʉrʉde zowaĩnĩgʉata ũdubipanʉbʉrʉ akʉza jaradiakĩrãne jaradiapanʉbʉrʉ, ãyabida ũrĩkĩrãnañi dayirã bedʼeata akʉza ũdudayi dayirãbara Jesúsba obada kĩrãkʼa opanʉta. w25.03 18 parr. 15; 19 parr. 17, 18

Edaʉde awuru ẽbẽrarãita kʼãrẽ ẽ kĩrãkʼabʉra Jeowaitara jipade nebia zroma. Daizeze Bedʼeade ẽbẽrarã mawũã berabarida ʉ̃rʉ nebʉrabʉ, bari jaradaita Davidta. Jeowaba propeta Samuelta zokʼa bʉesi Jeséidu wãmarẽã, Jesé wũãwũãranebemata aba nokʼo bʼaita jidaita. Jesébara yi wũãwũãra siete ũdubisi Samuelʼa, mamina yi tẽãbemara ũdubi ẽ basi, maʉ̃ra Davidbasi. Yi zezema Davidʼra waidide warrarabasimina, Jeowabara Davidta jidasi nokʼo bamarẽã (1 Sam.16:​6, 7, 10-12). ¿Kʼãrẽa mawũã jidasi? Jeowabara ũdusi David sode kʼãrẽ nebiatabʉta akʉza kʼawuabasi Davidbara iyira wãrĩnu kãgabʉta. Jeowabara bʉ kʼareara nekʼãrẽ mejãcha ozebʉrʉ. Bari jaraita, diabaribaibara ũrãgʼa biata bʉa audre nesidabʉde (Sal. 32:8). Mawũã bʉa nesidabʉde ũrãgʼa bia diaira Jeowabara bʉra bia ũdukʼawuabaibara (Sal. 139:1). Jeowaba ũrãgʼa diabʉta bʉa ũrĩbʉbʉrʉ nebiata ũduyi. Bʉa mawũã nebia ũdubʉrʉdera kʼawuayi Jeowabara bʉra wãrĩnu kãgabʉta (1 Crón. 28:9; Hech. 17:26, 27). Bʉa Jeowa kʼarea kʼãrẽ ozebʉrʉra Jeowabara kĩrãdua ẽ, iyara bia akʉbʉ maʉ̃ra akʉza Jeowabara akʉbʉ bʉa bʉ sode kʼãrẽ nebia erbʉta (Jer. 17:10). w24.10 25, 26 parr. 7-9

Bʉara Jeowara mejãcha kãga akʉza kʼarebakĩrãbʉ mebẽrãsida, ¿kʼãrẽba kʼarebaseabʉ bʉa maʉ̃ta okĩrãmarẽã? Krĩchara mebẽrã kʼarebabʉba bʉta kʼãrẽaba sobiabibʉta. Jesúsba naʉ̃ta zokʼasi: «Audre sobiabʉ daya diabʉde dayaʼa diapanʉira» (Hech. 20:35). Jesúsba wuabemara kʼarebakĩrã kʼarebasidera mejãcha sobiabasi. Akʉra kʼãrẽta jarabʉta Marcos 6:​31-34de. Ewari aba Jesúsʼra iyi kʼaidubemarabawara ẽbẽrarã biobʉmaeba jĩga wãsida ẽnaʉkĩrãpanasi baera, mamina ẽbẽrarãba ãyi sama wãta kʼawuadai ãyi nãã jʉ̃ẽsida mainʉ, mamina maʉ̃nera Jesúsbara maʉ̃ra ẽbẽrarã jaraseabasi ãyiʉ̃me bedʼeabe ẽãta iyi kʼaidubemarãra neiwari neko ẽ kisi baera, mawũã ẽ bʉrʉ wiña jaradia kʼãrãpe jaraseabasi deda wãnamarẽã, mamina Jesúsbara mawũã krĩcha ẽ basi, awuarabʉrʉ iya ẽbẽrarã mejãcha kãgabʉ baera soiduba kʼarebasi adewara jaradiasi ẽbẽrarã, maʉ̃ba iya akʉimara ewarisida kisi (Mar. 6:35). w24.11 16 parr. 9, 10

Yibariraba kʼarebara bʉ wũãwũãba badu ewaride jaradiamarẽã Daizeze Bedʼea ʉ̃rʉ (Rom. 10:10). Plauta zaira nãã wiña wiñane owã, mawũã tẽã bia za kʼawuaita, maʉ̃ kĩrãkʼa berabariseabʉ dayirãba ĩjãbʉ ʉ̃rʉ bedʼea jʉ̃drʉbʉrʉde. Maʉ̃ ʉ̃rʉ bedʼeabʉrʉdera bedʼeaseabʉ bedʼea zareabʉ ẽãra ʉ̃rʉ. Bari jaraita, wũãwũãra Jeowa ʉ̃rʉ Kʼawuabipanʉrãbara, naʉ̃ta widiseabʉ iyi kopaero kolegiodebema: «¿Bʉara kʼawuabasika sientipikoraba ãya kʼãrẽ oi nããra akʉbʉta naʉ̃ drʉade nekʼãrẽbʉta, mawũã naʉ̃neba parãita? Akʉra naʉ̃ bideo maʉ̃ ʉ̃rʉ bedʼeabʉta». Dai pagina internetʼne jʉrʉda «Kʼaiba parãsi» abʉmae, adewara ũdubira bideo mama edabʉta. Naʉ̃ bideo akʉbida tẽã naʉ̃ta widira: «Sientipikoraba ãya nekʼãrẽ parãi kʼarea naʉ̃ drʉadebemata akʉpanʉ akʉza ãya parãbʉrʉdera ãyi ʉ̃rʉ ibia bedʼeapanʉ mamina, ¿kʼai ʉ̃rʉbʉrʉ ibia bedʼeaseabʉ kʼãwũã jõma parãna kʼarea?». Mawũã obʉba kʼarebaseabʉ ãyi kopaeroraba audre kʼawuakĩrãnamarẽã. w24.12 18, 19 parr. 17, 18

Jeowaba dayirã diasi yi Warrata dayirãbari beimarẽã mawũã ẽdrʉita nemitiadeba. Mamina daya krĩchaseabʉ sãwũã ẽbẽra aba nemitia oka beidadeba ẽbẽrarã mejãchaʉta ẽdrʉbi maʉ̃ nemitiadebara. Pabloba naʉ̃ta jarasi: «Yumakẽrã abaʉba ũrĩ ẽ basi baera ẽbẽra jõmaʉ̃ta nekayirua omia, maʉ̃ kĩrãkʼa yumakẽrã abaʉba ũrĩsi baera jõmaʉ̃ta ẽbẽra biabayi» (Rom. 5:19; 1 Tim. 2:6). Naʉ̃ba jarakĩrãbʉ Adánʼneba jõmaʉ̃ta nemitia omiabasi baera, abarika Jesúsdeba jõmaʉ̃ta ẽdrʉseabʉ nemitiadeba. ¿Kʼãrẽa iduaribi ẽ basi Jeowabara Adánʼneba zeda wũãwũã kʼẽrẽpa panʉrãra bei ẽ panamarẽã? Mawũã krĩchaira dayirã beibari maʉ̃ra biga kĩrãkʼabʉ akʉza maʉ̃ba ara odogo kĩrãkʼabʉ, mamina Jeowaitara mawũã ẽ. Iyara jõma daucha obʉ baera. Maʉ̃ba Adánta ariwia ewari jõmaʉ̃nẽ baseabasibʉrʉ, dayima kayirua okabada kĩrãkʼa bakasi akʉza yi wũãwũãrasida kayirua okabada kĩrãkʼa panakasi. Mamina dayirãbara kʼawuapanʉ maʉ̃ra mawũã ẽãta. w25.01 20, 21 parr. 3, 4

Pabloba kʼawuaside iyi beadaita, maʉ̃ kʼarea mejãcha krĩcha zroma oẽ basi, iya osi baera nebiata Daizeze nãã, maʉ̃ba iya jarasi: «Mʉ̃ra wũẽbasi jõñinʉ akʉza soiduba ĩjãsi» (2 Tim. 4:​6-8). Pablobara jidasi ewari jõmaʉ̃nẽ Jeowaba zokʼabʉta obʼaita, maʉ̃ kʼarea iyira aduʼa sentibasi iya kʼawuabʉ baera Jeowara sobiabʉta iya obʉ kʼarea. Idi ewadebida dayirãbida krĩcha biata jidaseabʉ, mawũã dayirãba obʉdeba Jeowata sobiabiseabʉ. ¿Maʉ̃ra dayirãbara sãwũã oseabʉ? Pablobara iyi ʉ̃rʉ akʉza wuabema kristianora ʉ̃rʉ naʉ̃ta jarasi: «Jõma ũdupanʉ kʼarea opanʉ ẽ awuarabʉrʉ ĩjãbʉ kʼarea jõma opanʉ». Yi ĩjãbʉ kʼarea jõma obʉbara nekʼãrẽ oi nãã, krĩchabʉ Jeowaba kʼãrẽta kãgabʉta akʉza kʼawuabʉ Daizeze Bedʼeaba jarabʉde obʉbʉrʉ, bia wãita akʉza Jeowaba tẽã iyaʼa nebiata diaita (Sal. 119:66; Heb. 11:6). w25.03 20 parr. 1, 2

Daizeze odepanʉra mejãchaʉta, nããrãra yõmiabasi, kĩrʉmiabasi, mamina Daizeze jaure zareaba kʼarebasi ãya nãã obadata idubʉdamarẽã akʉza idi ewade awuara panamarẽã (Is. 65:25). Ãyara mejãcha zarea ozebʉda ãya nekʼãrẽ aña obadata idubʉita (Efes. 4:​22-24). Daizeze pʉwʉrʉdebemarãra kayirua omia baera edaʉde nekʼãrẽ aña opanʉ idibasidu. Mawũãsidu Jeowabara ẽbẽrarã badumaebemata iyi pʉwʉrʉeda webʉ, naʉ̃ra ẽbẽrabara iyita kãgapanʉ baera akʉza wuabemarata. Naʉ̃ba kʼarebabʉ aduʼapanaita akʉza ãbapanaita (Tito 2:11). Ẽbẽrarã naʉ̃ drʉa jõmaʉ̃maebemata kʼãwũã ãba bʼaira mia abaʉ ẽbẽrarã naʉ̃ drʉadebemaba oau ẽ, mamina Jeowabʉrʉ oseabʉ maʉ̃ra. Jeowara sewa nebʉrʉ oẽ (Is. 55:​10, 11). Idi ewade ũdupanʉ maʉ̃ra aripe berabarinʉmʉta dayirã mebẽrã akʉbʉrʉde. Dayirã audu ẽbẽra kayiruarata mejãchabʉmina, Jeowa pʉwʉrʉdepanʉrãra aduʼa sobiapanʉ, naʉ̃ ẽjũã kĩrãwãreã jauredebemara Jeowaba parãsi baera (Sal. 72:7). Maʉ̃ kʼarea ẽbẽrarã jaradiapanʉ maʉ̃ ʉ̃rʉ, ãyisida Daizeze odepanamarẽã (Mat. 28:​19, 20). w24.04 23 parr. 13, 15

Jesúsbara Jeowara mejãchade kãgabasi iyi krĩcha jõmainʉba. Jesúsbara kʼawuabasi Jeowaba kʼãrẽta omarẽã kãgabʉta maʉ̃ kʼarea Jeowaba kãgabʉde okĩrãbasi iya maʉ̃ obʉrʉde mejãcha zʉbʉriaibarabasimina. Jesúsbara ewari jõmaʉ̃nẽ Jeowaba kãgabʉta okĩrãbasi, maʉ̃ba iduaribi ẽ basi nekʼãrẽ baduba aña krĩchabimarẽã iya maʉ̃ oita. Pedrota akʉza ʉ̃kʉrʉ Jesús kʼaidubemarãra Jesúsʼʉ̃me ãbapanasi baera, ãya kʼawuaseabasi Jesús sãwũã krĩchabʉta. Pedroba kristianora karta nãã bʉ dia bʉeside, jarasi nekʼãrẽ jõma erpanamarẽã Jesús kĩrãkʼa krĩchadaita (1 Ped. 4:1). Pedroba nama zokʼasi bedʼea «Nekʼãrẽ jõma erbaidua» ũdubita gorogororaba ãyi yõ wãi nããra, nekʼãrẽ ãya nesidabʉta jõma erbasita mawũã yõita, maʉ̃ba abarika Jeowa odepanʉrabida Jesús kĩrãkʼa krĩcha kʼawuapanʉbʉrʉ, ãya nekʼãrẽ jõma nesidabʉta erpanañi nemitia oita zebʉrʉa yi edebi ẽ baita (2 Cor. 10:​3-5; Efes. 6:12). w25.03 8, 9 parr. 1-3

Yi bedʼeapanʉnera, ¿kʼãrẽ ʉ̃rʉ bedʼeaibara? Bʉa ẽbẽra aba audre kãga zei nãã, bʉa iyaʼa widiseabʉ iya kʼãrẽta oita krĩchabʉta. ¿Bʉara sãwũã kʼawuaseabʉ bʉme bedʼeabʉba sãwũã krĩchabʉra? Mara bedʼeabʉdadera wãrĩnuta jaraibara, adewara ũrĩbara ababemaba kʼãrẽta jarabʉta akʉza bedʼeata widiseabʉ, adewara jaraibara mayi ũmeba mayi sode sãwũã krĩchabʉta (Sant. 1:19). Adewara mayi ũmeba nekʼãrẽ oseapanʉ ãbaʉba akʉza maʉ̃ne bedʼeaseapanʉ maraba kʼawuakĩrãbʉ ʉ̃rʉ. Bari jaraita, ewara eda ãba wãseapanʉ ẽbẽrarã biobʉmae, nekode mawũã ẽ bʉrʉ bari ode bedʼea wãita, adewara ãbaʉba Daizeze bedʼea jaradia wãseapanʉ. Adewara bʉa iyi sãwũã bʉra kʼawuaseabʉ mara mebẽrãbawara ãbabʉde akʉza mara neũdukʼawuarabawara ãbabʉde. Marabara nekĩrã bio ãbaʉba oseapanʉ, mawũã kʼawuaita sãwũãbʉta akʉza wuabemarabawara ãba baseabʉ, kʼawuaita wuabemara aba abaka sãwũã edabʉta. w24.05 27, 28 parr. 6, 7

Aranʉ dayirãba ũdudayi bedʼea zromata, maʉ̃ne nesidadayi audre Jeowa ʉ̃rʉ ĩjãnaita. Daizeze Bedʼeade nebʉrabʉba akʉza idi ewade mebẽrã ʉ̃rʉ nebʉrabʉba, kʼarebayi krĩchaita sãwũã Jeowaba ũdubisita iyira Mõgara kĩrãkʼabʉta iyi ode kʼẽrẽpapanʉra. Naʉ̃ba kʼarebayi bʉabida Jeowata akʉmarẽã mõgara kĩrãkʼa. Maʉ̃ba audre kʼarebadayi kongregasionebemarata. Bari jaraita, Jesúsba Simónʼa trʉ̃ diasi, jarasi Cefas (Pedro), naʉ̃ba jarakĩrãbʉ Mõgarata (Juan 1:42). Jesúsba naʉ̃ bedʼeabara jarakĩrãbasi Pedrobara mebẽrã kongregasionebema so zarea diaibasita akʉza kʼarebaibasita ãya ĩjãbʉta audre zarea erpanamarẽã. Daizeze Bedʼeaba jarabʉ zõrãrã kongregasionebemara bisia mejãcha teinʉmʉne, mõgara zromaba sombra diabʉ kĩrãkʼabʉta, ãya bia akʉpanʉ baera mebẽrã kongregasionebemarata (Is. 32:2). Mamina dayirãbida mebẽrãta kʼarebaseapanʉ dayirãba Jeowade kĩrãkʼa opanʉbʉrʉ, mawũã ãyita mõgara zroma kĩrãkʼa baseapanʉ. w24.06 28 parr. 10, 11

Nokʼora Jeowa dabʉ nãã kʼẽrẽpabʉrabara ũdubipanasi ãyara Jeowa yiwidʼibʉta Jeowaba kãgabʉ kĩrãkʼa. Jeowaba nokʼorã kʼẽrẽpabʉ ẽã adabara idubʉsida Jeowaba zokʼabʉta akʉza daizeze zeri ẽã yiwidʼi jʉ̃drʉsida (1 Rey. 21:​25, 26; 2 Crón. 12:1). ¿Jeowaitara kʼãrẽa yibiabasi iyaʼa jʉ̃zaba yiwidʼira? Nokʼorabara jaradiaibarabasi wuabemara sãwũã yiwidʼibaibarata Daizeze Jeowara, adewara nokʼoraba daizeze zeri ẽã yiwidʼipanasidera ãyara nekʼãrẽra aripe oẽ basi akʉza nemitiata opanasi (Os. 4:​1, 2). Israelitarãra Daizeze pʉwʉrʉbasi, mamina ãya daizeze zeri ẽãra yiwidʼipanasidera Jeowadeba ãĩ babʉ kĩrãkʼabasi (Jer. 3:​8, 9). Juwa jidapanʉnebema abaʉta yi kimaneba ãĩbara, naʉ̃bara yi kimara mejãcha sopʉabibare akʉza krĩcha obibare. Abarika ẽbẽra abaʉba iyi bebʉ Jeowaʼa diaya adata tẽã daizeze zeri ẽãra yiwidʼibʉbʉrʉ, maʉ̃ra Jeowadeba ãĩ babʉ kĩrãkʼabʉ, maʉ̃ba Jeowara mejãcha sopʉabʉ (Deut. 4:23). w24.07 22-24 parr. 12-15