Noviembre

Jeowabara so zʉbʉria akʉbʉ ẽbẽrarã kongregasioneba ãĩ wãnara. Zõrãrãbida Jeowade kĩrãkʼa akʉpanʉ naʉ̃ra ẽbẽrarãra. Bari jaraita, Jeowabara israelitara kʼarebaira jʉ̃ã ẽ basi ãya nããra ũdubidamarẽã jẽda krĩchabʉta, awuarabʉrʉ iyiareba kʼareba jʉ̃drʉsi. Jeowabara iyi propetarata zokʼa bʉesi israelitaraba jẽda krĩchabʉ ũdubi nãã. Jeowaba propeta Oseasʼa jarasi yi kima iyideba ãĩ badata jʉrʉ wãmarẽã iyiʉ̃me bʼaita, maʉ̃ yuwẽrãba waidide nemitia onʉmasimina. Naʉ̃neba Jeowaba iyi pʉwʉrʉʼa kʼawuabisi iyara so zʉbʉria akʉbʉta ãyira (Os. 3:1; Mal. 3:7). Zõrãrãbara Jeowade kĩrãkʼa obʉta ũdubipanʉ, maʉ̃ kʼarea ãyara kãgapanʉ yi nemitia odara jẽda zemarẽã akʉza jʉrʉpanʉ sãwũã kʼarebaita. Naʉ̃ba kʼarebabʉ yi nemitia odaita zarea ba ẽ marẽã jẽda zeita. Jesúsba nebʉra jarade, ũdubibʉ sãwũã zeze abaʉba yi warra iyi dedaʉba wãnata mesera iyiareba orra wãsita, orrabʉrʉde bʉra kʼãrãpe jẽgasi (Luc. 15:20). Kĩrãbedaibara yi zezebara jʉ̃ã ẽ basita yi warra iyidu jʉ̃ẽita, awuarabʉrʉ jĩga ũdubʉrʉde iyiareba orrasi. w24.08 28 parr. 7, 8

Idibema testode bedʼea jarabʉba ũdubibʉ Jeowabara iyi buru biara wãga ẽãta, awuarabʉrʉ diakĩrãne diabʉta awururabida. Adewara Jeowabara kãgabʉ dayirãba maʉ̃ta iyaʼa wididamarẽã, iyaʼa kʼareba widibʉra mitia akʉ ẽ baera (Prov. 2:​1-6). Dayirãbida Jeowade kĩrãkʼa dayirãba kʼawuapanʉta awurura jaradiaseapanʉ (Sal. 32:8). Bari jaradaita, dayirãba kʼawuabʉta jaradiaseapanʉ yi ʉ̃rabʉrʉ Daizeze Bedʼea jaradia jʉ̃drʉpanʉra, ãyabida kʼawuamarẽã sãwũã biʼia jaradia wãita Daizeze Bedʼeata. Adewara zõrãrãbara kʼarebaseabʉ zõrãrã kʼarebabarirata akʉza awuru mebẽrã yumakẽrãrata jaradiapanʉne kʼãrẽta oibarata kongregasione. Adewara ʉ̃kʉrʉ mebẽrã de parãpanʉraba akʉza Daizeze de ara opanʉraba, ãya kʼawuabʉta jaradiapanʉ awuru mebẽrã naʉ̃raba maʉ̃ oita kʼarebadamarẽã. w24.09 28, 29 parr. 11, 12

Zõrãrã bʼaira mia abaʉba iyi ʉ̃rʉ ikayirua jarakabaibara, naʉ̃ba jarakĩrãbʉ kongregasionebemara naʉ̃ mebẽã ʉ̃rʉ bia krĩchaibarata (1 Tim. 3:2). Akʉza iya obʉba krĩchabi ẽ baibara wuabemara aña onʉmʉta. Wãrĩnubaira ẽbẽrarã Jeowa odebʉ ẽãbara bʉ ʉ̃rʉ imitia bedʼeayi akʉza bʉa ĩjãbʉta ĩjã ẽ bayi. Mamina naʉ̃ra ẽbẽrabara ũdudaibara bʉara wãrĩnuta jarabʉta akʉza bʉra ẽbẽra biata (Dan. 6:​4, 5). Maʉ̃ba bʉyikʉza widira, ¿mebẽrã kongregasionebemaraba akʉza wuabema ẽbẽrarãba mʉ̃ra bia akʉbʉka? Biata kãgaibara. Maʉ̃bara jarakĩrãbʉ mebẽrã kongregasionebemaba kʼãrẽ bia obʉta akʉibarata akʉza ãyaʼa biga diaibara ãyi sode nebiata erbʉ kʼarea (Tito 1:8). Adewara jarakĩrãbʉ nebia oita wuabemara kʼarebaita akʉza dayaʼa zokʼadabitapai oẽ baita, awuarabʉrʉ maʉ̃ne wũẽta oibarata. ¿Kʼãrẽa zõrãrãbara ũdubibara biata kãgabʉta? Zõrãrãba biata kãgabʉbʉrʉ sobiade ewari jʉrʉdayi mebẽrã kongregasionebema akʉ wãnaita akʉza ãya kongregasione kʼãrẽ oibarata sobiade odayi (1 Ped. 5:​1-3). Ãya nekʼãrẽ mejãcha oibaramina mejãcha sobiapanañi mebẽrãta kʼarebapanʉ baera (Hech. 20:35). w24.11 20, 21 parr. 3-5

Zõrãrã kʼarebabarirabara mejãchade kʼarebapanʉ kongregasione. Pabloba ũdubisi naʉ̃ra mebẽrãra mejãcha kãgabʉta iya Filipodebemara kartara bʉ dia bʉeside saludasi zõrãrã kʼarebabarirata akʉza zõrãrã kongregasionebemarata (Filip. 1:1). Mejãcha mebẽrã buru kʼoepanʉrabara sobiade kʼarebapanʉ zõrãrã kongregasionebemara krĩcha ẽã ãyi warrarabʉta, mawũã ẽ bʉrʉ zõrãrãta. Bari jaradaita, Devanʼra 18 poagabasi, iyi zõrãrã kʼarebabari babisidadera adewara mebẽã Luisʼra 50 poaga audrebasi zõrãrã kongregasionebema kʼarebabari babisidadera. ¿Mebẽrã zõrãrã kʼarebabarirãra sãwũã sentipanʉ maʉ̃ta opanʉ baera? Luisba jarabʉ: «Mʉ̃ra mejãcha sobiabʉ atia mebẽrãta kʼarebabʉ baera kongregasione akʉza mebẽrãba mʉ̃aʼa kãgata mejãcha ũdubipanʉ baera, maʉ̃ba atiara mʉ̃a ãya ũdubiseabʉ iyabaʉ kãgata». Zõrãrã kʼarebabarira mejãchaʉta Luis kĩrãkʼa sentipanʉ. Bʉta yi buru kʼoemabʉrʉ, ¿kʼãrẽa krĩcha ẽ zõrãrã kʼarebabari bʼaita? w24.11 14 parr. 1-3

Nokʼo Ezequías 39 poagabaside, iyira mejãcha kayasi. Maʉ̃ne Jeowaba jarasi propeta Isaíasdeba iyira maʉ̃ kayaba beibasita, jipa kʼãrẽ obe ẽ basita (2 Rey. 20:1). Maʉ̃ kʼarea Ezequíasʼra mejãcha zʉbʉriasi, mejãcha sopʉa kʼãrãpe widisi Jeowaʼa kʼarebamarẽã iyi mawũã zʉbʉria ẽ baita. Jeowaba ũduside Ezequías jẽganʉmʉta maʉ̃ bedʼea pʉa kʼarea mejãcha sopʉasi. Aramaʉ̃ta propeta Isaíasdeba jara bʉesi ũrĩsita iyi yiwidʼira akʉza ũdusita iyi jẽgabadara. Maʉ̃ kʼarea jarasi iyira bebibasita. Jeowaba iyira so zʉbʉria akʉsi baera jarasi dããrabaibasita akʉza Jeowaba jarasi Jerusalénʼra ẽdrʉbibasita asiriora juwadeba (2 Rey. 20:​4-6). ¿Kʼãrẽta oseabʉ bʉa bʉ kayata jipa taʉ ẽ kĩrãkʼabʉbʉrʉ? Jõma jarada Jeowaʼa bʉ sãwũã sentibʉta mejãcha jẽgaibaramina. Daizeze Bedʼeaba jarabʉ Daizezeba dayirãra kãga akʉbʉta akʉza dayirãʼa so zarea diabʉta mejãcha kayabʉmina (2 Cor. 1:​3, 4). w24.12 24 parr. 15-17

Ẽjũã kĩrãwãreã zebʉrʉdera dayirãbara ẽbẽrarã beida jẽda piradrʉbʉrʉra bia edadayi. Akʉza audre ũdukʼawuadayi Jeowata adewara iya nekʼãrẽ parãnata (Sal. 104:24; Is. 11:9). Adewara ẽjũã kĩrãwãreã zebʉrʉdera dayirãra nemitia okabayi maʉ̃ba audre biʼia odayi Jeowaba zokʼabʉta akʉza kʼãrẽa dayirã nemitia kĩrãduamarẽã widira neẽbayi mawũẽra, ¿bʉmara yibia bʼaika mawũã ewari jõmaʉ̃nẽ sobia bʼaita aduaita bari atia sobia bʼai kʼarea? Mawũã ẽ (Heb. 11:25). Dayirãba nebia zei jʉ̃ãbʉra aranʉ bʼai wãrĩnu berabariyi, wãrĩnu zeyi maʉ̃ nebiara, maʉ̃ba yibiabayi nekʼãrẽ jõma oita dayirãba maʉ̃ nebia ũduita. Dayirãbara maʉ̃ nebiara ũduseabʉ Jeowaba dayirãta mejãcha kãga baera akʉza yi Warrata dayirã bari beimarẽã zokʼasi baera. w25.01 29 parr. 12

Hebreos librode ũdubibʉ ẽbẽrarã mejãchaʉba ĩjãbasita Daizeze Jeowa ʉ̃rʉ, maʉ̃nebʉ Moisésta, naʉ̃bara mejãcha ĩjãbʉta ũdubisi (Heb. 3:​2-5; 11:​23-25). Moisésbara erbasi kʼãrẽa ĩjãita Jeowa ʉ̃rʉ, iya ũdusi baera desiertodebʉde Jeowaba bania diasita akʉza yiko diasita (Éx. 15:​22-25; Sal. 78:​23-25). Egiptodeba ẽdrʉdata poaga aba berabaribʉrʉde, Moisésbara Jeowa ʉ̃rʉ mejãcha ĩjãbʉmina iyikʉza widibasi Jeowaba wãrĩnu aripe oi kʼawuaita iya jaradara. Moisésbara krĩchabasi, desiertodera yiko neẽ baera sãwũã Jeowaba naʉ̃ra ẽbẽrarã 600 mil audrebʉa chichi diaita, mawũã nekodamarẽã. Maʉ̃ kʼarea Jeowaba Moisésʼa widisi: «¿Bʉka nekʼãrẽ Jeowa juwaba obe ẽãra?» (Núm. 11:​21-23). Jeowaba Moisésʼa jarakĩrãbasi iyira zarea barabʉ baera, oseabʉta iya kãgata. Wãrĩnubaira Jeowaba Moisésʼa naʉ̃ta jarasi: ‹Mʉ̃ra zarea barabʉ baera mʉ̃a jarabʉra jõma aripe oyi›. w25.03 26 parr. 1, 2

¿Biga bʼaika dayirãba jaradaita Noé ewaride nekʼãrẽ jõma berabaridaba ũdubibʉta zʉbʉria zroma berabaribʉrʉde abarika berabarita? Biga ẽ bayi mawũã jaraira, Daizeze Bedʼeaba mawũã berabarita jara ẽ baera. Jesúsbara jarasi Noé ewaride berabaridara iyi ewaride abarika berabarita. Mamina maʉ̃bara jarakĩrãkʉa ẽ basi jõma Noé ewaride berabaridara abarika berabarita (Mat. 24:​37-39). ¿Kʼãrẽta osi Noébara iya ũrĩside Jeowaba ẽbẽrarã jõma makenaita? Iya ũdubisi Jeowa ʉ̃rʉ ĩjãbʉta jãba zroma ojʉ̃drʉside (Heb. 11:7; 1 Ped. 3:20). Abarika idibema ẽbẽrarãba Daizeze Bedʼea ʉ̃rʉ ũrĩbʉrʉdera ãya nekʼãrẽ obʉdeba ũdubibara Jeowa ʉ̃rʉ ĩjãbʉta (Hech. 3:​17-20). Pedrobara jarasi Noébara Daizeze bedʼea jaradiabasita. Abarika Noéba ẽbẽrarã jaradiabada kĩrãkʼa dayirãsida zarea opanʉ ẽbẽrarã naʉ̃ drʉadebʉ jõmaʉ̃ʼa jaradiadaita, mamina kʼawuapanʉ mawũã obeda ẽãta. w24.05 9, 10 parr. 3-5

Dayirãra nekʼãrẽ jõma obʉ ãyaʼa wawia ũdubidaita akʉza bia edadaita (Rom. 12:10). Maʉ̃ kʼarea Jeowa de karpadebʉbara Salmo 15:4ba jarabʉ kĩrãkʼa oibara, «aripe obʉ iya jaradata bia wã ẽ mina». Dayirãba nekʼãrẽ oya adata aripe oẽ bʉrʉ wuabemarata sopʉabiseabʉ (Mat. 5:37). Bari jaraita, Jeowabara jʉ̃ãbʉ juwa jidapanʉraba ãyi ʉ̃rabʉrʉ juwa jidaside kʼãrẽ oya adara aripe odamarẽã, adewara jʉ̃ãbʉ yibarirabara ãyi wũãwũã kʼãrẽ oita jarabʉra maʉ̃sida aripe odamarẽã. Dayirãba Jeowata akʉza wuabemarata kãgapanʉ baera, dayirãra nekʼãrẽ jõma opanʉ dayirãba nekʼãrẽ oya adara aripe oita. Adewara dayirãba Jeowa kãgapanʉra wawia ũdubira nekʼãrẽ diakĩrã diabaibara akʉza bia edaibara (Rom. 12:13). Dayirãra ãba yi jʉrebarima wãbʉrʉde, mawũã ẽ bʉrʉ Daizeze Bedʼea jaradia wãbʉrʉde mebẽrãbawara ãbapanʉ, mamina maʉ̃ awuara nekʼãrẽ awuru obʉde ãyiʉ̃me ãbapanʉbʉrʉ, naʉ̃ba kʼarebayi audre ũdukʼawuaita ãyita. Adewara dayirãba mebẽrã kʼãwũã bia edabʉba, ũdubibʉ dayirãba Jeowade kĩrãkʼa opanʉta. w24.06 12 parr. 15, 16

Jeowabara wãrĩnuta jaradiabʉ jari yi eda krĩchapanʉrãra (Mat. 11:25). Dayirãba wãrĩnu kʼawua jʉ̃drʉsidera iduaribisi wuabemaraba jaradiamarẽã (Hech. 8:​30, 31). Maʉ̃ kʼarea jʉra kʼawuabaibara ʉ̃ta bʼaita krĩcha ẽ baita. Dayirãta ʉ̃tabʉta krĩchabʉbʉrʉ, dayirãba krĩchabʉtrʉ audre yibiabayi Daizeze Bedʼeaba jarabʉira, mawũã ẽ bʉrʉ organizasionba jarabʉira. Kĩrãbepanʉbʉrʉ Jeowara audre yi zromata dayirãira, maʉ̃ba kʼarebayi eda bʼaita krĩchaita (Sal. 8:​3, 4). Adewara yiwidʼibʉrʉde Jeowaʼa widibaibara eda bʼaita krĩchabimarẽã akʉza iyaʼa idu yi jaradiabita. Mawũã odara iya kʼarebayi iyi organizasioneba akʉza iyi Bedʼeadeba mawũã iyide kĩrãkʼa krĩchadamarẽã. Daizeze Bedʼea ʉ̃rʉ akʉbʉrʉde, krĩchara kʼãrẽta krĩchabʉta Jeowabara eda bʼai krĩchai ʉ̃rʉ akʉza ʉ̃ta bʼai krĩchabʉ ʉ̃rʉ. Bʉaʼa kongregasione pribilegio zromata diadara audre zarea obara eda bʼaita krĩchaita. w24.07 10 parr. 8, 9

1919deba Jeowa kʼarebadeba Jesúsba jidasi ʉ̃kʉrʉ mebẽrãta, naʉ̃raba yiko jauredebemata dayirãba nesidabʉ ewaride diadamarẽã (Luc. 12:42). Dayirãba ũduseapanʉ Jeowaba kʼarebabʉta naʉ̃ra mebẽrãba maʉ̃ta biʼia odamarẽã (Is. 65:​13, 14). Jeowa pʉwʉrʉta kʼãwũã daucha ba ẽ basibʉrʉ, obeda ẽ bakasi Jesúsba dayirã kʼãrẽ omarẽã zokʼabʉta (Mat. 28:​19, 20). Bari jaradaita, idi ewade dayirã jarada ẽ basibʉrʉ sama jaradia wãibarata, mawũãra jõmaʉ̃ba ãya kãgamae jaradiaseabakasi, mamina mawũã osidabʉrʉ ʉ̃kʉrʉ drʉamae audre jaradiakasida, mamina ʉ̃kʉrʉmaera mia kʼãrẽsida jaradiada ẽ bakasi. Bʉabida awuru nebiata ũdu zebʉrʉbaibara kʼãwũã bia zokʼapanʉ baera. Jesúsba Jeowa pʉwʉrʉ nãã bia zokʼa erbada kĩrãkʼa idi ewadebida abarika obʉ. w24.04 8, 9 parr. 2-4

Caínʼra Adán akʉza Evadeba zesi baera, nemitia omiabasi akʉza iyara nekʼãrẽ oẽ basi jẽda krĩchaita. Daizeze Bedʼeaba jarabʉ Caínbara nemitiata obasita (1 Juan 3:12). Maʉ̃ kʼarea Jeowabara Caínba sakripisio diadara bia akʉ ẽ basibaibara akʉza iyisida bia akʉ ẽ basibaibara. Caínʼra iya nemitia oda kʼarea jẽda krĩchai kaude Jeowaʉ̃me kĩrʉsi. Maʉ̃ kʼarea Jeowara Caínʼʉ̃me bedʼeasi (Gén. 4:​3-7). Jeowara ibiade bedʼeasi Caínʼʉ̃me, Jeowaba jarasi Caínba nebiata ora nebiata diaita. Adewara jarasi iyita kĩrʉbia yi edebira, naʉ̃bara nemitia obita. Mamina Caínʼra Jeowa yi kʼarebabi ẽ basi akʉza jẽda krĩcha ẽ basi iya nemitia oda kʼarea. Caínba iyi bedʼeata ũrĩ ẽ basi baera, ¿kʼãrẽta osi Jeowabara? ¿Jeowabara krĩchasika ẽbẽrarãra wua kʼareba ẽ baita? Mawũã ẽ. w24.08 10 parr. 8

Moisésbara israelitara kĩrãbebisi ãya kʼãrẽ nebiata jʉ̃ãpanʉta. Jeowaba ãyaʼa diaibasi drʉata mama ewari biobayeda panamarẽã. Maʉ̃ drʉara jipade kĩrãwãreã basi akʉza mamara yikora mejãcha basi. Moisésba jara ũrĩbisi maʉ̃ drʉara sãwũãbʉta, iya jarasi maʉ̃ drʉadera basita de zromata yi parãmata akʉza maʉ̃ra dedera nekʼãrẽ bia mejãchabasita. Adewara basita egoro wamata bania mama piaita akʉza ãyara neuira nesida ẽ basi yi umabasi baera (Deut. 6:​10, 11). Moisésba israelitara jara ũrĩbisi ãyita maʉ̃ ẽjũã kĩrãwãreãnẽ bakĩrãbasibʉrʉ Jeowaba zokʼabʉta oibarabasita. Moisésba ãyaʼa jarasi Jeowaba zokʼabʉta odamarẽã, mawũã maʉ̃ ẽjũã kĩrãwãreãnẽba ãĩ wã ẽ baita (Deut. 30:20). Mamina israelitarabara oda ẽ basi Jeowaba zokʼabʉde. Maʉ̃ kʼarea Jeowabara iduaribisi ãyira asirioraba akʉza babilonioraba jida edemarẽã akʉza ãyi drʉasida jãrĩnamarẽã (2 Rey. 17:​6-8, 13, 14; 2 Crón. 36:​15-17, 20). w24.11 9 parr. 5, 6

Religionebemara mejãchaʉba krĩchapanʉ bari Jesús ʉ̃rʉ ĩjãibarata mawũã ĩjãbʉba Jesúsba ãyita ẽdrʉbi baera (Juan 6:29). Ẽbẽrarã Galileade pananarabara ĩjãpanasi Jesús ʉ̃rʉ, mamina ãyara tẽã idubʉsida Jesúsʼra, ¿kʼãrẽta berabarisi mõbera? Audrera naʉ̃ra ẽbẽrarãbara Jesúsʼra jʉrʉbasi ãya nesidabʉta diamarẽã. Bari jaraita, ãyi kayabʉta bebimarẽã, ãyaʼa yikota bari diamarẽã, mawũã ẽ bʉrʉ ãya ũrĩkĩrãkʉtrʉ jaradiamarẽã. Jesúsbara naʉ̃ ẽbẽrarã kʼawuabisi iyira ze ẽ basita bari ẽbẽrarãba kãgabʉta diaita, awuarabʉrʉ zesita ẽbẽrarã jaradiaita kʼãrẽta oibarata iyi kʼaidubemara bamarẽã. Audrera naʉ̃ra ẽbẽrarãbara Jesústa orradaibarabasi Jesúsba jaradiadade oũdubita (Juan 5:40). w24.12 12 parr. 12, 13

¿Yumakẽrã yi kima zʉbʉriabibadara sãwũã ẽbẽra bia baseabʉ? Naʉ̃ra yumakẽrãbara kʼawuaseabʉ Jesús yizadeba. Iyara bia edasi iyi kʼaidubemarãra. Akʉdaya sãwũã yi juwa jidapanʉrabara yi kimara bia edaseabʉta Jesúsde kĩrãkʼa iyara iyi kʼaidubemarãra bia edasi akʉza ibiade bedʼeabasi. Jesúsʼra ẽbẽra biabasi, maʉ̃ba iyi kʼaidubemarãra bia edabasi. Adewara Jesúsba iyi kʼaidubemara iyi juwa edre erba ẽ basi, awuarabʉrʉ wawia ũdubisi yi kʼaidubemara adewara edabʉta ũdubisi ãyi akʉita (Juan 13:​12-17). Jesúsba jarasi yi kʼaidubemara: «Mʉ̃neba kʼawuaidua, mʉ̃ sora aduaʼa ibiadebʉa akʉza sodera eda krĩchabʉa, mʉ̃ma zeidua mawũãra mʉ̃a ẽnaʉ̃biya» (Mat. 11:​28-30). Jesúsʼra kĩrʉmia ẽ basi, maʉ̃ba wuabemaba iyi kĩrʉbibʉrʉdera aduʼabasi. Idi ewadera ẽbẽra mejãchaʉba krĩchapanʉ ẽbẽra abaʉta kĩrʉmia ẽ bʉrʉ maʉ̃ ẽbẽrarã po ẽ bʉta. Mamina wãrĩnubaira maʉ̃ta jarakĩrãbʉ ẽ, awuarabʉrʉ bia zokʼa kʼawuabʉ iyi kakuata. Maʉ̃ba mesera kĩrʉ ẽ iyi kĩrʉbibʉdadera. w25.01 10 parr. 10, 11

Dayirãra naʉ̃ ewari jõbodoarepanʉ baera bedʼea zromara audre ũdu wãna. ¿Kʼãrẽa? Yõtabʉ baera, drʉade neida berabaribʉ baera, mawũã ẽ bʉrʉ awuru kaya zromata zeseabʉ baera, adewara maʉ̃ awuara aduaseabʉ trajota, nekʼãrẽ bia erbadata, mawũã ẽ bʉrʉ dayi drʉadeba awuru drʉa eda wãibara, maʉ̃nera ¿kʼãrẽba kʼarebaseabʉ ũdubita wãrĩnu ĩjãbʉta Jeowaba kʼarebaita? Dayi krĩcha zroma onʉmʉnera, audre yibia Jeowa jara ũrĩbita kʼãrẽ kʼarea krĩcha zroma onʉmʉta. Bʉta bedʼea zromane berabaribʉrʉdera yibia Jeowa widita buru biata diamarẽã, mawũã kʼawuaita kʼãrẽ oita jidaita adewara widita aduʼa babimarẽã, mawũã krĩcha zroma oẽ baita bʉ sãwũã berabarinʉmʉ kʼarea (Luc. 12:​29-31). Jeowa widira kʼarebamarẽã sobia bʼaita bʉa kʼãrẽ erbʉdeba (1 Tim. 6:​7, 8). Plata kʼarea krĩcha zroma obʉbʉrʉ, jʉrʉda dayirã kartarane maʉ̃ ʉ̃rʉ bedʼeabʉta. Akʉza mejãchaʉba jarapanʉ ãyi plata kʼarea mejãcha krĩcha zroma onʉmʉnera, mejãcha kʼarebabʉta kartara jw.org de bʉba akʉza bideora jw.org de bʉba. w25.03 28, 29 parr. 10, 11

Jeowaba Pedroʼa jarasi ẽbẽrarã judiora ẽã jaradiamarẽã, maʉ̃ ewadera judiora ẽãsida Jeowa pʉwʉrʉde eda baseabasi, maʉ̃ba jarasi Cornelioʼa jaradia wãmarẽã. Cornelioba nããra kʼawua jʉ̃drʉsi Daizeze ʉ̃rʉ ẽbẽrarã judiora ẽãnera, mamina Pedroitara zarebasi, iyara kʼarebata nesidabasi, ¿kʼãrẽa? Iyi ewaridera judiorãra ãbapana ẽ basi baera ẽbẽrarã awuru pʉwʉrʉdebemaʉ̃mera. Maʉ̃ba iya nãã sãwũã krĩchabadara Pedrobara awuara krĩchaibarabasi naʉ̃ ẽbẽrarã judiora ẽã jaradiaita. Pedroba kʼawuaside Jeowaba iya kʼãrẽta omarẽã kãgabʉta, iya krĩchabadara awuara krĩchasi, maʉ̃ba iyi eda jʉ̃ẽbʉdadera kʼãrẽ jara ẽã wãsi (Hech. 10:​28, 29). Wãsi Cornelioidu akʉza yi mebẽrãinʉ jaradiade Jeowa ʉ̃rʉ mõbe naʉ̃rãra buru kʼoesida (Hech. 10:​21-23, 34, 35, 44-48). Tẽã Pedroba yi wuabemara kristianora jarasi abarika krĩchadamarẽã (1 Ped. 3:8). Dayirã jõma Jeowa odepanʉrabara nesidapanʉ Jeowa kĩrãkʼa krĩchaita, maʉ̃itara Daizeze Bedʼeaba jarabʉde odaibara. w25.03 9, 10 parr. 7, 8

Ẽbẽrarãba idi ewade sãwũã krĩchabʉra jipade awuara wã Jeowaba sãwũã krĩchabʉira (Prov. 17:15). Maʉ̃ba yibiabayi dayirãba kʼawuaita sõbede ẽbẽra abaʉba aña bedʼeabʉta akʉza maʉ̃ba jarabʉta ĩjã ẽ baibara, mawũã dayirãba Jeowade sobiade obʉta aduabida ẽ bayi. Pabloba kristianora ebreora jarasi zarea odamarẽã Daizeze Bedʼeata audre kʼawua wãita. Dayirãbida abarika oibara. Naʉ̃ba jarakĩrãbʉ dayirãba Daizeze Bedʼea akʉbʉrʉdera, biʼia krĩchaibarata dayirãba kʼãrẽ kʼawuanʉmʉ ʉ̃rʉ, naʉ̃ba kʼarebai baera Jeowata bia ũdukʼawuamarẽã akʉza biʼia kʼawuadamarẽã Jeowa sãwũã krĩchabʉta. Mamina dayirãba maʉ̃ obʉra ewari abapai oibara ẽ, awuarabʉrʉ buru kʼoeda tẽãbida maʉ̃ta ewariza opanaibara. Dayirã Daizeze odebʉta dããraba ẽ mina, mawũã e bʉrʉ dããrabamina dayirã jõmaʉ̃ba nesidapanʉ Daizeze Bedʼeata ewariza leita (Sal. 1:2). Dayirãba Daizeze Bedʼea dobaʉba akʉbʉta ewariza opanʉbʉrʉ, naʉ̃ba kʼarebayi dayirãba ĩjãbʉta audre zarea erpanamarẽã (Heb. 11:​1, 6). w24.09 10 parr. 7, 8

Dayirãba Jeowata wãrĩnu zokʼaibʉta akʉpanʉbʉrʉ zare ẽ bayi iyiʉ̃me kʼẽrẽpabʉta ũdubira. Mawũã berabarisi Joséta. Joséba Jeowata wãrĩnu zokʼaibʉta ũdubasi baera nemitiata okĩrã ẽ basi Jeowa dabʉ nãã (Gén. 39:9). Dayirãbida kʼawuakĩrãbʉbʉrʉ Jeowa wãrĩnu zokʼaibʉta, ewari jʉrʉibara Daizeze Bedʼea akʉita akʉza iyaʼa yiwidʼita. Mawũã odara dayirãra audre Jeowa kʼawabayi Joséba oda kĩrãkʼa, dayirãta Jeowa kʼawabʉta sentibʉbʉrʉ, jipa nekayiruata okĩrãna ẽ bayi. Ẽbẽra abaʉba kĩrãduara Jeowa zokʼaibʉta maʉ̃ra mesera bʼai Jeowadeba jĩga wãseabʉ. Akʉdaya kʼãrẽta berabarisita israelitara ãyi drʉa ibʉawabʉdepanaside. Ãyara kʼawuapanasi Jeowara zokʼaibʉta, mamina ewari berabari wãne krĩchasida Jeowabara ãya nesidabʉta dia ẽ baita (Éx. 17:​2, 7). Mawũãbʉba ãyira Jeowadeba jĩgara wãsida, maʉ̃ kʼarea kʼãrẽ krĩcha ẽã, ãyide kĩrãkʼa oita krĩchada ẽ baibara (Heb. 3:12). w24.06 24 parr. 14, 15

Naʉ̃ ewari jõbodoarepanʉ baera, dayirãba mejãcha ũdu wãnañi audre bedʼea zroma dayi zʉbʉriabibʉta akʉza jẽgabibʉta. Jeowaba akʉbʉ dayirã zʉbʉriara akʉza kʼawuabʉta dayirã sãwũã sentibʉta maʉ̃ne. Iyara bia kĩrãbebʉ dayirã kʼãrẽaba jẽgabʉra. ¿Kʼãrẽta oseabʉpe dayirãba bedʼea zroma ũdubʉ kʼarea jẽgabʉbʉrʉ? Nããra, jõma jaraseabʉ Jeowaʼa dayirã sãwũã sentibʉta. Yi ʉ̃mera, idubʉda ẽ baibara ãba yi jʉrebarieda wãpanʉta mebẽrãbawara ãba bʼaita, mebẽrãba kʼarebaseapanʉ baera. Yi ũbeara, Daizeze Bedʼeade jʉrʉra yizara bʉ kʼarebaseabʉta. Zeyi ewarita dayirã wua zʉbʉria ẽ baita pʉa kʼarea, mia jẽga ẽ baita maʉ̃ kʼarea. Awuarabʉrʉ, jẽgadayi mejãcha bʼai baera sobiata ẽjũã kĩrãwãreãnẽra (Apoc. 21:4). w24.12 20 parr. 3; 25 parr. 19

Jeowaba jʉrʉsi dayirãta iyi ʉ̃rʉ jaradiamarẽã, maʉ̃ kʼarea jarabʉ iyara kʼarebaita (Is. 43:​10-11). Atia kʼawuadaya bedʼea kimare sãwũã kʼarebabʉta Daizezebara. Nããra, Jesúsʼra dayirãbawarabʉ Daizeze Bedʼea jaradiapanʉnera (Mat. 28:​18-20). Yi ũmera, Jeowabara angeleratabʉ kʼãrẽ, dayirãta kʼarebamarẽã (Apoc. 14:6). Yi ũbeata, Jeowabara dayirã iyi jaure zareata diabʉ, mawũã kĩrãbedamarẽã dayirãba kʼawuadata (Juan 14:​25, 26). Yi kimarera, Jeowabara dayirã diasi mebẽrãta, mawũã Daizeze bedʼea dayidobaʉba jaradia wã ẽ baita. Mawũẽra Jeowa kʼarebadeba akʉza mebẽrã kʼarebadeba pera ẽã jaradiaseapanʉ Daizeze Bedʼeara. Mamina bʉra krĩcha obʉbʉrʉ ẽbẽrarãta deda ũdu ẽãnera bʉyikʉza widiseabʉ: ¿sama duanʉba? ¿Ne edade wãsidaka? ¿Trajabarabʉka? mawũã bʉbʉrʉ ¿mʉ̃ara audre ũduika ode ẽbẽrarã? (Hech. 16:13). w24.04 17 parr. 10, 11

Mebẽã aba juwa jidabʉta zõrãrã bakĩrãbʉbʉrʉ, mebẽrã kongregasionebemata akʉza wuabema ẽbẽrarãta iyi mebẽrã ʉ̃rʉ ibia bedʼeabaibara. Maʉ̃ kʼarea zõrãrã jarapanʉ ãyi mebẽrãra biʼia akʉ erbamarẽã. Naʉ̃ba jarakĩrãbʉ bʉ mebẽrãra ibiade bia akʉibarata akʉza krĩcha jida kʼawuabaibarata bʉ mebẽrãita. Semanaza bʉ mebẽrãbawara ãba yi jʉreibara Jeowa ʉ̃rʉ kʼawuadaita, kʼarebaibara ãba yi jʉrebarieda wãita akʉza kʼarebaibara bʉ mebẽrãba ãya oseabʉta odamarẽã Jeowaita. Zõrãrãba wũãwũãta erbʉbʉrʉ 18 poaga ba ẽ nããbʉta, maʉ̃bara iyi deda bʉedara iya jarabʉta ũrĩbara (1 Tim. 3:4). Zõrãrãbara yi wũãwũãrãra nekʼãrẽra jõma ibiade jaradiaibara. Mamina ãyira wabida wũãwũãra baera, wuabema wũãwũãra kĩrãkʼa jemenepe ipida bakĩrãbʉ, maʉ̃ba bʉa jaradiaibara bʉ bedʼeata ũrĩ kʼawuadamarẽã akʉza wuabemarata wawiadamarẽã, adewara jaradiaibara kʼẽrẽpa bamarẽã. Adewara zõrãrãbara kʼarebaibara ãyi wũãwũãra audre Jeowa neũdukʼawua badamarẽã akʉza Daizeze Bedʼeaba jarabʉde odamarẽã. Adewara kʼarebaibara krĩchadamarẽã buru kʼoeita. w24.11 22 parr. 10, 11

Dayirãba audre jaradia wãne ũdupanʉ Jeowaba sãwũã kʼarebabʉta dayirãra, naʉ̃ba kʼarebabʉ daya ĩjãbʉsida audre zarea bamarẽã (1 Cor. 3:9). Kĩrãbera Jeowabara akʉnʉmʉ ẽãta bʉa kʼãrẽta oẽãta akʉza wuabemaraba kʼãrẽta onʉmʉta, iyara audrera akʉbʉta dayirã sode kʼãrẽtabʉta. Jeowara sobiabʉ bʉa soiduba yi Warra beida kʼarea biga diakĩrãbʉbʉrʉ (1 Sam. 16:7; Mar. 12:​41-44). Jesústa dayirã kʼarea beisi baera dayirãba nebiata ũduseapanʉ, ¿kʼãrẽ nebiata? Jeowaba dayirã nemitia kĩrãduaita, Jeowa neũdukʼawua bʼaita akʉza aranʉbai ewari jõmaʉ̃nẽpanaita, maʉ̃ kʼarea biga diadaibara Jeowaʼa iya dayirã kãga ũdubibʉ baera. Jeowaba dayirãta kãga baera diasi maʉ̃ra nebiarata (1 Juan 4:19). Mamina Jesúsʼabida biga diadaibara iya dayirãta mejãcha kãga baera iyi bebʉta diasi dayirã ẽdrʉbita. w25.01 31 parr. 16-18

Krĩchara Salmo 73 bʉda ʉ̃rʉ. Iya akʉbasi ẽbẽrarã Jeowa odebʉ ẽãrãra sãwũã bia wã kĩrãkʼabasita, iyimara maʉ̃ra ẽbẽrarã kaya ẽ kĩrãkʼabasi, aduʼabʉ kĩrãkʼabasi akʉza nekʼãrẽ bia mejãcha erpanʉ kĩrãkʼabasi (Sal. 73:​3-5, 12). Iya ũdubasi baera maʉ̃ra ẽbẽrarã mawũã bia wã kĩrãkʼabʉta maʉ̃ kʼarea krĩchasi Jeowa ode bʼaira biga ẽãta. Naʉ̃ salmistabara maʉ̃ ʉ̃rʉ badua krĩchabasi (Sal. 73:​13, 14). ¿Kʼãrẽba kʼarebasi mawũã krĩchabʉa yi edebi ẽ baita? Naʉ̃ salmistara Jeowaʼa yiwidʼibaridu jʉ̃ẽsi (Sal. 73:​16-18). Mamara aduʼabasi baera, bia krĩchaseabasi iya widida ʉ̃rʉ. Iya mama kʼawuasi jari ẽbẽrarã iyima bia wã kĩrãkʼabʉra atiaedabʉrʉ kʼãwũã biapanʉta, mamina ʉ̃ra zeidera nebiata jʉ̃ãna ẽãta. Maʉ̃ba iya kʼawuasi Jeowa ode bʼaira audre yibiata. Maʉ̃ kʼarea iya soiduba okĩrãsi Jeowaba zokʼabʉta (Sal. 73:​23-28). w24.10 26, 27 parr. 11, 12

Jeowabara dayirãta jidasi iyi bari bedʼeamarẽã (Is. 43:​10-12). Dããrabade Zõrãrã Burubiaraba karta bʉ dia bʉedade naʉ̃ta jarabasi: «Jipa arigʉ yibia Jeowa ʉ̃rʉ Kʼawuabipanʉrã bʼaira». ¿Kʼãrẽa mawũã jarasida? Bari jaraita, krĩchara awuru ẽbẽraba jarapanʉta bʉa nemitia osita, maʉ̃ kʼarea bʉa nesidabʉ ẽbẽra aba bʉare bedʼeamarẽã akʉza bʉ ʉ̃rʉ wãrĩnuta jaramarẽã, ¿maʉ̃nera bʉara kʼai ẽbẽrata jidai? Bʉara jʉrʉyi iyide ĩjãseabʉta akʉza wãrĩnuta jarabʉta mawũã bʉare bedʼeabʉrʉde ĩjãnamarẽã iyi bedʼeara. Jeowaba dayirãta jidasi iyiare bedʼeamarẽã, naʉ̃ba ũdubibʉ Jeowabara dayirãra biʼia ũdukʼawuabʉta akʉza ĩjãbʉ iyi ʉ̃rʉ wãrĩnuta jaraita. Dayirãra maʉ̃ kʼarea mejãcha sobiapanʉ baera, nekʼãrẽ jõma opanʉ, mawũã iyi trʉ̃ ʉ̃rʉ ibia bedʼeabita adewara iyi ʉ̃rʉ sewidata jarabʉdadera, dayirãra zarea opanʉ iyi ʉ̃rʉ wãrĩnu jaraita, mawũã ũdubipanʉ mejãcha sobiapanʉta Jeowa ʉ̃rʉ Kʼawuabibari baera (Rom. 10:​13-15). w24.05 18 parr. 13

Jesúsba awurura kʼarebabʉba mejãcha sobiabibasi. Ewari aba Jesúsbara ẽbẽrarãra kʼarebasi Daizeze Bedʼea ʉ̃rʉ jaradiaside mamina maʉ̃ awuara nekʼãrẽ ãya nesidabʉde kʼarebasi, diasi yikota akʉza iyi kʼaidubemara jarasi maʉ̃ta ẽbẽrarã dedekamarẽã (Mar. 6:41). Maʉ̃neba jaradiasi iyi kʼaidubemara kʼãrẽaba yibiata wuabemara kʼarebakĩrãita adewara ũdubisi wuabemaraba nesidabʉde kʼarebaisida jipade yibiata. Krĩchara kʼãrẽaba sobiasidata Jesús kʼaidubemarata ũdusidade Jesúsba miõba okata odata akʉza kʼarebasidade maʉ̃ yikota wuabema ẽbẽrarã dedekaita ãyi jãwãñiena (Mar. 6:42). Mamina naʉ̃ ewaridebʉrʉ kʼareba ẽ basi Jesúsbara, awuarabʉrʉ Jesús nama egorode basidera ũdubisi ewari jõmaʉ̃nẽ krĩchabʉta wuabemara sãwũã kʼarebaita, iya kʼãrẽ kãgabʉ ʉ̃rʉ krĩchai kaude (Mat. 4:23). Wuabemara nekʼãrẽ jaradiaiba akʉza wuabemaraba nesidabʉ diaiba mejãchade sobiabibasi Jesúsʼra. w24.11 16 parr. 10, 11

Naʉ̃ ewari jõbodoare dayirãba ũdu wãna wuabʉrʉ wãta bedʼea zromara, maʉ̃ba zarea odaibara dayirãi yiya kʼarebadaita. Dayirãbara kʼarebaseabʉ mebẽrãra audre Jeowa kʼawa bamarẽã akʉza ãyaʼa kãga ũdubiseabʉ. Bari jaraita, ãba yi jʉrebʉrʉde ãyaʼa so zarea diaseabʉ akʉza ũrĩseabʉ ãyi bedʼeata, adewara kãga ũdubiseabʉ akʉza bia edaseabʉ, mawũã bia sentimarẽã. Zõrãrãbara biode kʼarebaseabʉ mebẽrã kongregasionebema bedʼea zromane berabaribʉra. Drʉade neida berabaribʉba zʉbʉria obʉrʉde, mawũã ẽ bʉrʉ kayabʉde zõrãrã kongregasionebemabara mesera jʉrʉbʉ sãwũã kʼarebaita maʉ̃ra mebẽrãra. Adewara zõrãrãbara so zarea diabʉ naʉ̃ra mebẽrã Daizeze Bedʼeadeba. Zõrãrã abaʉba ũdubibʉbʉrʉ mia bedʼeaseabʉta, ũrĩbʉta ãyi bedʼeata, wuabemarata so zʉbʉria akʉbʉta, mawũãra jõmaʉ̃ta iyiʉ̃me bedʼeakĩrãnañi. Zõrãrã mawũãbʉba kʼarebabʉ mebẽrãba ũdudamarẽã iyi kãgata akʉza iya Daizeze Bedʼeadeba ũrãgʼa diabʉrʉdera ũrĩkĩrãnañi (1 Tes. 2:​7, 8, 11). w24.06 29 parr. 12, 13

Dayirãbara krĩchabeda ẽ Jeowaba yi Warra zʉbʉrianʉmʉ ũduside kʼareba ẽ basi baera iyira kãga neẽãta. Wãrĩnubaira Jeowaba dayirã parãsidera jarachu iyi kĩrãkʼa parãsita. Dayirãra edaʉde sopʉa sentipanʉ mawũã ẽ bʉrʉ sobiabʉ. Naʉ̃ba ũdubibʉ dayirãta Jeowaba iyi kĩrãkʼa parãsi baera, iyisida edaʉde sopʉabarita. Adewara Daizeze Bedʼeade ũdubibʉ ʉ̃kʉrʉ ẽbẽrarãba Jeowara mejãcha sopʉabisidata (Sal. 78:​40, 41). Jeowara mejãcha sopʉasibaibara yi Warra iya kãgata zʉbʉria osidade akʉza beasidade. Jesús dayirã kʼarea beidaba ũdubibʉ Jeowaba dayirãra mejãcha kãgata. Jeowaba dayirã kãgabʉ kĩrãkʼara mia abaʉ ẽbẽraba kãga ẽ dayirãra, mia dayirã neũdukʼawua biaba, mia dayirã mebẽrã daya audre kãgaba, kãga ze ẽ dayirãra Jeowaba kãgabʉ kĩrãkʼara (Rom. 8:​32, 38, 39). Mia dayikʉza mejãcha kãga ze ẽ Jeowaba dayirã kãgabʉ kĩrãkʼara, dayirãra ewari jõmaʉ̃nẽ bakĩrãpanʉ, mamina Jeowabara audre kãgabʉ dayirãra ewari jõmaʉ̃nẽ panamarẽã. Daya nemitia obʉrʉdera daya kãgabʉ Jeowaba kĩrãduamarẽã maʉ̃ta, mamina Jeowabara audre soiduba kĩrãduakĩrãbʉ maʉ̃ra. Jeowaba dayirã nekʼãrẽ mejãcha widi ẽ, iya dayirã jarabʉ yi Warra dayirã kʼarea beida ʉ̃rʉ, soiduba ĩjãnamarẽã akʉza iya jarabʉde odamarẽã. Jipade yibia kʼawuapanʉ baera Jesús dayirã kʼarea kʼãwũã beidadeba Jeowaba dayirã kʼãrẽaba kãgata (Ecl. 3:11). w25.01 22 parr. 8, 9

Dayirãbara edaʉde nekʼãrẽ kʼawua jidaibara dayirãba sentibʉdeba, akʉbʉdeba akʉza ũrĩbʉdeba. Mamina naʉ̃ba dayirãra sewaseabʉ akʉza obiseabʉ nekʼãrẽ Jeowaba oẽ marẽã kãgabʉta (Ecl. 11:9; Mat. 24:​37-39). Kõbe ĩjãbʉ kʼarea jõma opanʉbʉrʉ, dayirãba nekʼãrẽ jidadabʉra jidadayi Jeowaba kãgabʉde. Jeowaba jarabʉta opanʉbʉrʉ dayirãra aduʼabayi akʉza sobiapanañi (Sal. 16:​8, 9; Is. 48:​17, 18). Adewara ĩjãbʉ kʼarea jõma opanʉbʉrʉ, ewari jõmaʉ̃nẽbayi (2 Cor. 4:18). Dayirãkʉza naʉ̃ta widiseabʉ: «¿Mʉ̃a nekʼãrẽ jidai nããra kʼãrẽneba jidabʉ? ¿Mʉ̃ara jidabʉka mʉ̃a akʉbʉdeba mawũã ẽ bʉrʉ Jeowaba ũrãgʼa diabʉdeba?». w25.03 20, 21 parr. 3, 4

Dayirã aba abaka zarea odaibara ũdubidaita kʼãrẽa yibiata ẽjũã kĩrãwãreã jauredebemane eda bʼaira. Mawũã odaira dayirãbara oseabʉ Jeowade kĩrãkʼa. Jeowabara ẽbẽrarã ajuerzade iyi ode babi ẽ (Jer. 31:3; Juan 6:44). Mamina ẽbẽra biabaibara akʉza iyi sãwũãbʉta ũdu kʼawuakĩrãbaibara. Adewara iyi sode kʼãrẽ nebia erbʉta ũdukʼawuakĩrãbaibara. Mawũã bʉ ẽbẽratrʉ iyi pʉwʉrʉde eda baseabʉ. Dayirãbara ¿kʼãrẽta oibara akʉza kʼãrẽ nebiata ũdubibara ẽbẽrarã Daizeze pʉwʉrʉde eda bamarẽã? Dayirãi wãrĩnu kãgapanʉta ũdubidaibara. Kãgapanʉ wuabemara ʉ̃rabʉrʉ ãba yi jʉrebarima zebʉrʉdera krĩchadamarẽã, dayirãra wãrĩnu yi kãgapanʉta. Mawũã berabarisi kongregasion Corintodebemane. Ẽbẽrarã jʉ̃ẽkata jʉ̃ẽsida ãba yi jʉrepanʉmae ãya ũdusida mebẽrãra ãyirai yi kãga ũdubipanʉta. Maʉ̃ kʼarea ãya naʉ̃ta jarasida: «Daizezera wãrĩnu marane eda bʉ» (1 Cor. 14:​24, 25; Zac. 8:23). Maʉ̃ kʼarea dayirãbara ũrĩnaibara ũrãgʼa bia idibema testoba jarabʉra. w24.04 24 parr. 16, 17