Diciembre

Jesús kʼaidubemarabara ĩjãpanasi Daizeze Bedʼea ʉ̃rʉ akʉza zarea opanasi Daizeze Bedʼeaba jarabʉde oũdubidaita (Juan 17:6). Mamina ãyara biʼia ũrĩ ẽ basi kʼãrẽa Jesúsʼra ẽbẽra kayirua kĩrãkʼa beasidata, Jesúsbara kʼawuabasi iyi kʼaidubemarãra ẽbẽra biarata, mamina Daizeze Bedʼeaba jarabʉta audre kʼawuaita nesidapanasita (Luc. 9:​44, 45; Juan 20:9). Maʉ̃ kʼarea kʼarebasi ãya kʼãrẽ lebʉ ʉ̃rʉ audre biʼia ũrĩnamarẽã. Akʉdaya Jesúsba sãwũã kʼarebasita iyi kʼaidubemara ũme Emaúsʼeda wãnarata. Iyi kʼaidubemara ũmeʼa yi ũdusidera Jesúsbara ãya bedʼeata widisi akʉza waña jara ẽ basi kʼaita iyira, ¿kʼãrẽa? Jesúsba kʼawuakĩrãbasi ãyi sode kʼãrẽta krĩchabʉta, maʉ̃ kʼarea ãya jarasida kãgabʉta Jesúsba zokʼamarẽã Israelde romanoraba zokʼai kaude (Luc. 24:​18-27). Jesúsbara zokʼasi Daizeze Bedʼeata ãyaʼa jara ũrĩbita propesiara iyi ʉ̃rʉ jarabʉra aripe berabarinʉmʉta. Maʉ̃ diamasibida Jesúsba iyi kʼaidubemara daucha zebʉrʉde maʉ̃ra jarasi kʼãrẽta jarakĩrãbʉta propesiaraba (Luc. 24:​33-48). w24.10 14 parr. 9, 10

Jesúsba yi Zezedeba kʼawuasi kʼãrẽta oita akʉza kʼãrẽta jaraita. Idi ewade dayirã organizasionbara abarika obʉ Jesúsde kĩrãkʼa. Daizeze Bedʼeata zokʼapanʉ dayirã biʼia kʼawuabita kʼãrẽta bigata akʉza kʼãrẽta biga ẽãta (2 Tim. 3:​16, 17). Dayirã badua kĩrãbebipanʉ Daizeze Bedʼeara akʉibarata akʉza mama akʉbʉta daucha oũdubibarata. Dayirãba Daizeze Bedʼea akʉbʉrʉde, dayirã kartarata zokʼapanʉbʉrʉ naʉ̃neba nebia mejãcha ũduseapanʉ. Bari jaraita, dayirãba ũdubʉrʉde Jeowa organizasionba nekʼãrẽ omarẽã jarabʉra Daizeze Bedʼeaba jarabʉdebʉta, naʉ̃ba kʼarebayi dayirãba Jeowa organizasion ʉ̃rʉ audre ĩjã wãmarẽã (Rom. 12:2). Jesúsbara jaradiasi «bedʼea bia Daizeze Nokʼo ʉ̃rʉ» (Luc. 4:​43, 44). Adewara iyi kʼaidubemara jarasi Daizeze Nokʼo ʉ̃rʉ jaradia wãnamarẽã (Luc. 9:​1, 2; 10:​8, 9). Idi ewade Jeowa organizasionbida abarika obʉ, jaradiapanʉ Daizeze Nokʼo ʉ̃rʉ, krĩcha ẽã ãyi samabʉta. w24.04 9 parr. 5-7

Jeowa organizasionba jarabʉta ĩjã bʼaidua. Israel pʉwʉrʉdera Jeowabara zokʼasi Moisésta maʉ̃are Josuéta, mawũã iyi pʉwʉrʉʼa jaradiaita (Jos. 1:17). Israelitaraba maʉ̃ra ʉ̃rʉ ĩjãbasidera ãyira bia wãbasi. Siglo nããbemanera Jeowaba zokʼasi 12 apostolera mawũã kongregasion kristiana jaradiamarẽã (Hech. 8:​14, 15). Maʉ̃ tẽã, awuru zõrãrã Jerusalénʼnebemaba kʼarebasi ãyira, «kongregasionʼrabara audre zarea ĩjã wãsida akʉza ewariza wari wãsida» zõrãrãba jarabʉta ĩjãpanasi baera (Hech. 16:​4, 5). Idi ewadebida dayirãra Jeowaba nebia diabʉ iyi organizasionba jarabʉta ũrĩpanʉne. w24.07 10 parr. 10

Jeowabara Davidʼra mejãcha kãgabasi maʉ̃ kʼarea iyi ʉ̃rʉ naʉ̃ta bʉbisi Daizeze Bedʼeade: «Yumakẽrã mʉ̃ so sobiabibʉta». Mamina Davidbara nekayirua zroma osi, bari jaraita, iyira ãĩbasi akʉza mia beasi. Moisés leyba jarabasi ẽbẽra abaʉba naʉ̃ta osibʉrʉ beibarabasita (Lev. 20:10; Núm. 35:31). Mamina Jeowabara Davidʼra so zʉbʉria akʉsi. Jeowaba propeta Natánta David akʉde zokʼasi David waidide jẽda krĩcha ẽ basimina nemitia oda kʼarea. Iyi kʼarebaita Natánbara yizata zokʼasi mawũã Davidʼa biʼia jara ũrĩbita. Maʉ̃ba David sota tõbarisi, maʉ̃ kʼarea iyira sopʉasi iya oda kʼarea akʉza jẽda krĩchasi (2 Sam. 12:​1-14). Tẽã Davidba bʉsi salmo aba, maʉ̃ne jara ũrĩbibʉ iyi kʼãrẽaba sopʉabasita iya nemitia oda kʼarea (Sal. 51, yi ʉ̃trebemata). Idibasidu maʉ̃ salmo Davidba bʉdaba mejãcha kʼareba zebʉrʉ ẽbẽrarã kayirua odapeadata, ãya nemitia oda kʼarea jẽda krĩchaita. Mawũẽra idi ewadera mejãchade biga diapanʉ Jeowaʼa kʼarebasi baera Davidba iya nemitia oda kʼarea jẽda krĩchaita. w24.08 10 parr. 9

Idi ewade wũãwũãra dapʉẽira zare, maʉ̃ kʼarea biga diakĩrãpanʉ maraʼa kʼarebapanʉ baera mara wũãwũãraba Daizeze Bedʼea ʉ̃rʉ ĩjãmarẽã akʉza Jeowa ʉ̃rʉ (Deut. 6:​6, 7). Wũãwũãra waribʉrʉza nekʼãrẽ widiseabʉ dayirãba ĩjãbʉ ʉ̃rʉ, bari jaraita naʉ̃ bedʼeata widiseapanʉ: ¿kʼãrẽa Jeowabara dayirãʼa nekʼãrẽ omarẽã zokʼabʉ? Bʉ wũãwũãba maʉ̃ bedʼea widibʉ kʼarea, bʉa krĩchaseabʉ Daizeze Bedʼea ʉ̃rʉ akʉza Jeowa ʉ̃rʉ ĩjãbʉta adua wãta. Warrarabara ãyi wari wãbʉrʉza audre bedʼeata widibʉ, mawũã audre zarea ĩjã bʼaita, maʉ̃ba perarãra (1 Cor. 13:11). Wũãwũãraba bedʼea widibʉrʉde aramama mesera kʼarebara audre bia krĩchaita akʉza audre ĩjãita Daizeze Bedʼea ʉ̃rʉ akʉza Jeowa ʉ̃rʉ. w24.12 14 parr. 1, 2

Kristianora ebreorabara nesidapanasi ãya ĩjãbʉra zarea erbaita, maʉ̃ba kʼarebaibasi baera ʉ̃ra bedʼea zroma zebʉrʉde (Heb. 10:​37-38). Jesúsba iyi kʼaidubemara jarasi Jerusalén gorogororaba purranʉmʉta ũdubʉrʉdera, ãyira mĩrʉ wãibarabasita. Maʉ̃ bedʼeara Jesúsbara kristianora jõmaʉ̃ra jarasi, yi maʉ̃ pʉwʉrʉde edapanʉra akʉza yi meapanʉra (Luc. 21:​20-24). Maʉ̃ ewaridera gorogororaba pʉwʉrʉta purrabʉrʉdera, ẽbẽrarã mea bʉrãra pʉwʉrʉeda wãpanasi mama mĩrʉne maʉ̃ pʉwʉrʉra muro barabasi baera. Maʉ̃ kʼarea ʉ̃kʉrʉitara Jesúsba jaradara añabʉ kĩrãkʼabasi. Maʉ̃ kʼarea Jesúsba jarada ũrĩra wãrĩnu ĩjãbʉta ũdubibarabasi. Kristianora ebreorabara nesidapanasi ẽbẽrarã Jesúsba kongregasion akʉita jidada ʉ̃rʉ ĩjãita. Kristianora Jesúsba mawũã jʉrʉdarabara mebẽrã jarasidabaibara sõbede mĩrʉ wãita akʉza sãwũã oita. (Heb. 13:17). w24.09 10 parr. 9, 10

Jesús nama egorode basidera iyara jõma aripe osi yi zezeba zokʼa amaenara (Juan 17:4). Mamina Jesúsbara krĩcha ẽ basi nekʼãrẽ Jeowaba zokʼabʉra iyabʉrʉ jõma aripe oseabʉta, Jesúsbara jʉrʉsi ʉ̃kʉrʉ ẽbẽrarãta iyi kʼaidubema bamarẽã, maʉ̃ra jõma jaradiasi iya jaradiada kĩrãkʼa opanamarẽã iyi neẽãne. Jesúsbara biʼia kʼawuabasi iyi kʼaidubemarabara iya zokʼa amaenara bia odaibasita, maʉ̃ba jarasi akʉmarẽã mebẽrã kongregasionebemarata akʉza Daizeze Bedʼeasida wuabemara jaradiamarẽã. Jesúsbara iyi kʼaidubemara ũrãgʼa biata diasi, jarasi ãya ũrĩta nesidabʉta. Ʉ̃kʉrʉrabara ĩjãna ẽ basi wãrĩnu iyi beidata jẽda piradrʉdara, maʉ̃ kʼarea jarasi mawũã krĩchada ẽ marẽã (Luc. 24:​25-27; Juan 20:27). Adewara jarasi mejãcha jʉrʉda ẽ marẽã platata awuarabʉrʉ Daizezedeta nããra bʉedamarẽã (Juan 21:15). Adewara jarasi akʉda ẽ marẽã saʉ̃ba audre pribilegio bia erbʉta (Juan 21:​20-22). Akʉza ãya bia ũrĩ ẽ baera sõbede Daizeze Nokʼoba zokʼa jʉ̃drʉita, jarasi maʉ̃ kʼarea krĩcha oda ẽ marẽã, awuarabʉrʉ audre Daizeze Bedʼeata jaradia wãnamarẽã jarasi (Hech. 1:​6-8). w24.10 15, 16 parr. 13, 14

Jeowaba zokʼabʉta opanʉbʉrʉ ewari jõmaʉ̃nẽpanañi. Israelitarãra Jeowaba ãyaʼa nebia diaya ada kʼawapanasi. Abarika idi ewade Jeowaba dayirã ẽjũã bia diaya abʉ zeira arakʼaitaba. Aranʉbai naʉ̃ drʉara ẽjũã kĩrãwãreãbayi (Is. 35:1; Luc. 23:43). Diaruta akʉza angelera kayiruarãra neẽbayi (Apoc. 20:​2, 3). Naʉ̃ ewaridera neẽbayi religión zeri ẽãra Jeowa ʉ̃rʉ sewida jarabʉra (Apoc. 17:16). Adewara nokʼora ẽbẽrarã zʉbʉriabibʉrãra neẽbayi (Apoc. 19:​19, 20). Akʉza naʉ̃ ẽjũãnera neẽbayi ẽbẽrarã ãya kãgata okĩrãpanʉrãra (Sal. 37:​10, 11). Maʉ̃ ẽjũãnera ẽbẽrarã jõmaʉ̃ba Jeowaba zokʼabʉta opanañi, maʉ̃ba ãbapanañi akʉza aduʼapanañi. Mawũãpanʉ baera ẽbẽrarãra ãyirai yiya kãgapanañi akʉza ãyirai yiya ĩjãpanañi (Is. 11:9). Dayirã jõmaʉ̃ba jʉ̃ãpanʉ maʉ̃ ewari zemarẽã, yi audre yibiara dayirãba Jeowaba zokʼabʉde opanʉbʉrʉ, bari ewari biobayeda pana ẽ bayi awuarabʉrʉ ewari jõmaʉ̃nẽ zokʼaipanañi (Juan 3:16). w24.11 9 parr. 7

Bedʼeara idibema testora idi ewade jõma aripe berabarinʉmʉ. Bari jaraita, internetʼne dayirã pagina jw.org de, kartarata 1.000 bedʼea awuara awuarakabʉ. Naʉ̃ba kʼarebabʉ ẽbẽrarãba ũdukʼawuadamarẽã bedʼea bia Daizeze Nokʼo ʉ̃rʉ. Jesúsbara jarasi iyi kʼaidubemara Daizeze bedʼeara naʉ̃ drʉa jõmaʉ̃nẽ jaradiauda ẽ baita iyi zei nããra (Mat. 10:23; 25:​31-33). Jesúsba jaradara idi ewade jõma aripe berabarinʉmʉ. Ʉ̃kʉrʉ ẽbẽrarã bʉ Daizeze Bedʼea idu jaradiabida ẽ mae. Adewara ewariza wũãwũãrãra mejãcha topanʉ. Mawũẽra dayirã mejãcha zarea osidamina Daizeze bedʼea ẽbẽra jõmaʉ̃ʼa jaradiaita Daizeze ewari zei nããra, jõmaʉ̃ʼa jaradiauda ẽ bayi. w24.05 10 parr. 6, 7

Jesúsʼra iyi kʼaidubemarãra ibiade bedʼeabasi, mawũã imitia jara ẽ basi (Luc. 8:​47,48). Naʉ̃ra yiza bia yumakẽrã juwa jidapanʉraita. Jesúsbara jarasi yumakẽrãra ãĩ ba ẽ baibarata yi kimanebara. Iya jarasi Jeowaba jaradata, yumakẽrãra yi kimaʉ̃me ãbabaibara (Mat. 19:​4-6). Naʉ̃ testode jarabʉ «ãba baya». Naʉ̃ bedʼeara griego bedʼeade jarakĩrãbʉ kara bʼaita. Maʉ̃ba yi juwa jidapanʉta ãyirainʉ arigʉ yi kãgapanʉbʉrʉ akʉza bia edapanʉbʉrʉ nekʼãrẽ baduba jĩga babi ẽ bayi. Mawũã karabʉ kĩrãkʼabʉba, yi juwa jidapanʉnebema abaʉba nemitiata ora ãyi ũmena zʉbʉriayi. Maʉ̃ kʼarea yumakẽrãba yi kima mejãcha kãgabʉbʉrʉ akʉ ẽ bayi ẽbẽrarã ãkadabeta. Mawũã obʉrʉba oyi Daizeze Bedʼeaba jarabʉ kĩrãkʼa akʉ ẽ bayi nekʼãrẽ zeri ẽãra (Sal. 119:37). Adewara Jobʼde kĩrãkʼa oyi. Jobʼbara jarasi akʉ ẽ baita awuru wẽrãra (Job 31:1). w25.01 10 parr. 12, 13

Jeowaba dayirãba nekʼãrẽ aña oda kĩrãduabʉrʉdera, jipade awuarabʉ ẽbẽrarãba obʉira, iyara wãrĩnu kĩrãduabʉ baera. Salmistaba Jeowaba sãwũã kĩrãduabʉ ʉ̃rʉ naʉ̃ta jarasi: «Bʉde bʉ wãrĩnu kayirua kĩrãduaira akʉza mawũã bʉta wawiadamarẽã» (Sal. 130:4). Jeowaba dayirã nemitia kĩrãduabʉrʉdera jipa kĩrãduabʉ, mia abaʉba iyide kĩrãkʼa obe ẽ, maʉ̃ba dayirãba awururaba nekʼãrẽ aña obʉrʉde jipa kĩrãduakĩrãpanʉbʉrʉ, Jeowade kĩrãkʼa odaibara. Escrituras Hebreasde zokʼabʉ bedʼea aba jaraita Jeowaba sãwũã wãrĩnu kayirua kĩrãduabʉ ʉ̃rʉ, mamina naʉ̃ bedʼeara zokʼada ẽ ẽbẽrarãba sãwũã kĩrãduabʉ jaraidera. Jeowaba dayirãba nemitia oda sãwũã kĩrãduabʉra jipade awuarabʉ ẽbẽrarãba obʉira. Iya dayirãba aña odata kĩrãduabʉrʉdera, maʉ̃ra wua kĩrãbe ẽ akʉza iyara iduaribibʉ dayirãta jẽda iyi neũdukʼawua bia bamarẽã nãã bada kĩrãkʼa. Dayirãra mejãcha sobiapanʉ Jeowaba kʼãwũã dayirãba nekʼãrẽ aña odata kĩrãduada ʉ̃rʉ kĩrãduabʉ baera. w25.02 8 parr. 1-3

Ẽbẽrarãba ũrĩkĩrã ẽ bʉrʉ maʉ̃bara jarakĩrãkʉ ẽ dayirãra ewari aduasita, awuarabʉrʉ Jeowata Jesúsʼʉ̃me sobiabibʉ akʉza Jeowaba zokʼadata opanʉ. Maʉ̃ba dayirãra mejãcha sobia baseapanʉ ẽbẽrarãba ũrĩna ẽ mina (Prov. 27:11). Dayirãra mejãcha sobiaseapanʉ nejaradiabari abaʉba ũdura ẽbẽra Daizeze Bedʼea kʼawuakĩrãbʉta. Jarakabʉ kartaba jarabʉ naʉ̃ra wũãwũã aduada jʉrʉbʉ kĩrãkʼabʉta. Wũãwũã aduabʉrʉdera ẽbẽra mejãchaʉba jʉrʉpanʉ mamina maʉ̃ra abapaiba ũduyi, mawũã ũdubʉrʉdera jõmaʉ̃ta mejãcha sobiadayi. Maʉ̃ kĩrãkʼabʉ ẽbẽra aba Daizeze ode wãbita. Mebẽrã kongregasionebema jõmaʉ̃ba kʼarebapanʉ akʉza mebẽrã jõmaʉ̃ta nesidapanʉ dayirãpanʉmae jaradiaita. Maʉ̃ kʼarea mejãcha sobiapanʉ nekʼawuabaridebema abaʉta ãba yi jʉrebarieda zebʉrʉdera. w24.04 18 parr. 13, 14

Meserabai kʼawuakĩrãpanʉ ʉ̃ra zeide kʼãrẽta berabarita, maʉ̃ kʼarea Jeowa kʼarebadeba kãgapanʉ ẽbẽrarãba ĩjãnamarẽã Daizeze ʉ̃rʉ zʉbʉria zroma zei naweda, adewara mejãcha sobiapanʉ kʼawuasida baera naʉ̃ta berabariseabʉta: zʉbʉria zroma jʉ̃drʉbʉrʉdera ẽbẽrarã mejãchaʉba oda ẽ bayi Diaruba zokʼabʉta, awuarabʉrʉ Jeowarepanañi akʉza Jeowa ʉ̃rʉ ibia bedʼeadayi. Maʉ̃enara dayirãbara mejãcha erbʉ trajora, Daizeze Nokʼo ʉ̃rʉ naʉ̃ drʉa jõmaʉ̃nẽ jaradiaibara, maʉ̃ta wuara jaradia ẽ bai baera akʉza Daizeze ewari zeita arakʼaita ba baera dayirãbara jaradiaibara ẽbẽrarã aranʉ kʼãrẽta sãwũã berabarita. Bedʼea biata, ẽbẽrarãta Jeowata akʉza iyi trʉ̃ta audre kãgapanʉ baera, naʉ̃ba kʼarebabʉ jaradiakĩrãne jaradiapanaita Daizeze Jeowaba jarayeda wua jaradiada ẽ marẽã. w24.05 19 parr. 14-16

Diamasi iyi bei nãã Jesúsba Pedroʼa akʉza iyi kʼaidubemara nebiata jaradiasi, jaradiasi sãwũã eda krĩchabʉta ũdubibarata. Nawedara ẽbẽrarã jĩrʉ sʉgʉira de yibari nezokʼabʉrʉ obasi, mamina Jesúsbara edabʉta ũdubibasi baera iya osi maʉ̃ra, iya wua ʉ̃rʉ jʉ̃bada wẽã kʼãrãpe akʉza toayata iyi kʉrrʉde jʉ̃ kʼãrãpe iyi kʼaidubemara jĩrʉ jõmaʉ̃nẽta sʉgʉsi (Juan 13:​4, 5). Iya maʉ̃ oira ewari edebasimina osi, iyi sewai jĩrʉinʉ sʉgʉsi Jesúsbara, maʉ̃ne Jesúsba iyi kʼaidubemara jarasi: «¿Marãbara sãwũãta kʼawuabʉdakʼa mʉã marã kʼãwũã obʉrʉdʼebema? Marãbara mʉrã jara bʼea Miã Ũrãgʼabarita, Nokʼota, mawũã jaradʼaira biga mʉrã maʉ̃ baera. Mʉta Nokʼota Miã Ũrãgʼabarita bʼʉba marã jẽrũta sʉgʉbʉrʉba, marãsidʼa abʼarika jẽrũ sʉgʉdʼaibara zhiya» (Juan 13:​12-14). w25.03 10 parr. 9-11

Jeowa kʼawa bʼaira idi ewadera jipa zare naʉ̃ drʉade nekʼãrẽ kʼãwũã berabaribʉba. Ẽbẽrarã mejãchaʉba jarapanʉ Daizezera neẽãta. Edaʉde ẽbẽrarã nekayirua obʉra dayima bia wã kĩrãkʼabʉ. Maʉ̃ ũdubʉba dayirãba ĩjãbʉra adua wãseabʉ. Dayirãba jaraseabʉ ĩjãbʉta Jeowara wãrĩnu chuta, mamina dayirã sode krĩchaseabʉ iya dayirãra kʼareba ẽ baita. Maʉ̃ kĩrãkʼa berabarisi Salmo 73 bʉdata. Iya ũdubasi ẽbẽrarã Daizeze odebʉ ẽãra aduʼa sobiapanasita, maʉ̃ kʼarea iyikʉza widisi biga bʼai kʼawuaita Daizeze ode bʼaita (Sal. 73:​11-13). Maʉ̃ yumakẽrã Salmo bʉdara, ¿kʼãrẽba kʼarebasi iyi jẽda bia krĩcha bʼaita? Krĩchabasi kʼãrẽta berabaribʉta ẽbẽrarã Jeowa odeba jĩga wãbʉrʉde (Sal. 73:​18, 19, 27). Adewara krĩchasi kʼãrẽ nebiata ũduseabʉta iyi odebʉbʉrʉ. Dayirãbida abarika krĩchaseabʉ Jeowaba sãwũã kʼareba zebʉrʉta dayirãra. w24.06 25 parr. 16, 17

Nawedara ʉ̃kʉrʉ mebẽrãbara yi audre kʼãrẽ neẽbeara plata prestabasi interesbara adewara ʉ̃kʉrʉ juezʼrabara platabari zʉbʉria obasi yi nekʼãrẽ kayirua oẽ badata. Jeowabara jipade jʉra maʉ̃ oira (Ezeq. 22:12). Jipade yibia dayikʉza krĩchaita plata sãwũã akʉbʉ ʉ̃rʉ, maʉ̃itara dayikʉza widiseabʉ: «¿Mʉ̃ara ewari jõmaʉ̃nẽ krĩchanʉmʉka plata ʉ̃rʉ akʉza kʼãrẽta edai ʉ̃rʉ? ¿Mʉ̃aʼa plata prestabʉdadera atia paga ẽka krĩchabʉ baera, maʉ̃ ẽbẽrabara plata mejãcha erbʉta akʉza nesida ẽãta? ¿Mʉ̃a platata erbʉ baera krĩchabʉka mʉ̃ra wuabemaraira audre yi zromata? ¿Mʉ̃itara zareabʉka wuabemara nekʼãrẽ diakĩrãira? ¿Mebẽrãba platata mejãcha erbʉ kʼarea krĩchabʉka ãyara platata audre kãgata Jeowaira? ¿Mʉ̃ra yi plata erbʉrabawarabʉrʉ bakĩrãbʉka?». Dayirãta Jeowa neũdukʼawuara bakĩrãpanʉbʉrʉ zarea odaibara platata aukʼara kãgada ẽ baita. Mawũã opanʉbʉrʉ Jeowaba dayirãra doba amae ẽ bayi. w24.06 12, 13 parr. 17, 18

¿Kʼãrẽta oibara yi kayirua yi edebi ẽ baita? Dayirãbara nebiata krĩchaibara, adewara kʼawuaibara sãwũã jʉraita nekayiruata akʉza sãwũã nebia kãgaita (Amós 5:15). Mawũã opanʉbʉrʉ nebiata audre okĩrãñi, maʉ̃ba kʼarebayi nekayirua oẽ baita. Nekʼãrẽ Daizezedebemata audre odaibara. Dayirãta ãba yi jʉrebarima wãpanʉbʉrʉ akʉza jaradiade wãpanʉbʉrʉ, audre okĩrãñi nekʼãrẽ Jeowa sobiabibʉta (Mat. 28:​19, 20; Heb. 10:​24, 25). Dayirãba Daizeze Bedʼeata akʉra akʉza maʉ̃ ʉ̃rʉ biʼia krĩchara, naʉ̃ba kʼarebayi kãgaita nebiata akʉza jʉraita nekayiruata (Jos. 1:8; Sal. 1:​2, 3; 119:97). Jesúsbida naʉ̃ta jarasi: «Badua yiwidʼipanaidua mawũã kayiruade baebibari krĩchade baeda ẽ baita» (Mat. 26:41). Dayirãba ũdudayi Jeowaba dayirã sãwũã kʼarebabʉta akʉza iyita audre sobiabikĩrãpanañi (Sant. 4:8). w24.07 17, 18 parr. 14-16

Dayirãba wuabema ẽbẽrarã jaradiabʉrʉdera Jeowade kĩrãkʼa odaibara. Daizeze Bedʼeaba jarabʉ Jeowabara iya kʼawuabʉra wuabemara jaradiakĩrãne jaradiabʉta. Abarika dayirãba kʼawuabʉra wuabemara jaradiapanʉ. Jara ẽ: ‹Mʉ̃yidobaʉba kʼawuasi mʉ̃ara, iyabida abarika kʼawuaibara›. Adewara perada ẽ wuabemara jaradiaita, krĩchada ẽ maʉ̃ba daya obʉ kĩrãkʼa obʉrʉ baera jãrĩta daya obʉta. Daizeze odepanʉraba mawũã krĩchaira biga ẽ, awuarabʉrʉ soiduba jaradiakĩrãne jaradiapanʉ iya biʼia okʼawuamarẽã (1 Tes. 2: 8). Daizeze Bedʼeaba jarabʉ: «Mawũã ãyabida bia jaradiaseabayi wuabemara» (2 Tim. 2:​1, 2). Dayirãba wuabemara sobiade jaradiapanʉbʉrʉ dayirãba kʼawuapanʉta, mawũãra dayirãta akʉza wuabemarata buru biabayi, maʉ̃ daucha sobiapanañi. w24.09 29 parr. 12, 13

Bʉa krĩchabʉbʉrʉ nekʼãrẽ okʼawuabʉ ẽãta wuabemara kʼarebaita maʉ̃ kʼarea sopʉarãra, bʉara bʉ sode nebiata erbʉ wuabemara kongregasionebema kʼarebaita. Krĩchara Pabloba 1 Corintios 12:​12-30 bayeda jaradata, mõbe Jeowaʼa yiwidʼira kʼarebamarẽã nama jarabʉ kĩrãkʼa krĩchaita. Namara jarabʉ Jeowa odepanʉrãra jõmaʉ̃ta yiya nesidapanʉta akʉza jõmaʉ̃ta nebia kĩrãkʼapanʉta. Zarea ora bʉa jõma oseabʉta oita Jeowa kʼarea akʉza mebẽrã kʼarea. Kʼawuabara zõrãrãbara bʉ ʉ̃rʉ krĩchadaita akʉza bʉa nekʼãrẽ oseabʉta omarẽã jaradaita (Rom. 12:​4-8). Mebẽrã jõmaʉ̃ta Jeowa kʼawabaibara akʉza sobiabaibara awurura nekʼãrẽ diabʉde, adewara Jeowaba kãgabʉde bʼaibara. w24.11 17 parr. 12, 13

Anara mejãcha jẽgabasi bedʼea zromata bio erbasi baera. Ana kimabara kima ũme erbasi, yi abameba kimara Peninábasi. Peninábara jʉrabasi Anara, Peninára toseabasi mõbe wũãwũãra barabasi, mamina Anara tobe ẽ basi (1 Sam. 1:​1, 2). Maʉ̃ kʼarea Peninábara Anara imitia jarabasi mõbe ipidabasi iyi kʼarea, maʉ̃ kʼarea Anara mejãcha zʉbʉriabasi, jẽgabasi akʉza kʼãrẽ ko ẽ basi (1 Sam. 1:​6, 7, 10). ¿Kʼãrẽta osi Anabara iyi bia sentita? Anara nããrãra wãsi tabernakuloeda, israelitarãra mama yiwidʼipanasi Jeowaʼa. Mama jʉ̃ẽ kʼãrãpe Anaba Jeowaʼa jarasi: «Akʉra mʉ̃ kʼãrẽaba zʉbʉrianʉmʉta» (1 Sam. 1:11). Jeowaba akʉsi akʉza ũrĩsi iyi bedʼeara maʉ̃ kʼarea iya kʼarebasi Anara. Anara idibʉrʉ toseabasi (1 Sam. 1:​19, 20; 2:21). w24.12 21 parr. 5-7

Jesús dayirã kʼarea beidaba, jaradiabʉ iyara ẽbẽrarãra mejãcha kãgata akʉza ãyi ʉ̃rʉ wãrĩnu krĩchabʉta, mamina audre kãgata akʉza audre krĩchabʉta iyi kʼaidubemarata (Juan 13:1). Wãrĩnubaira Jesúsbara biʼia kʼawuabasi iyira zʉbʉriade berabaribasita akʉza zʉbʉria beadaibasita, mawũãsidu iyara maʉ̃ra oẽ basi bari Jeowaba mawũã omarẽã zokʼasi baera, awuarabʉrʉ soiduba osi, iyi bebʉta diakĩrãne diasi. Maʉ̃ta ũdubisi iya jaradiaside, ẽbẽrarã kʼarebaside soiduba osi baera, adewara iyi bei ewaride Jesúsba iyi kʼaidubemara jĩrʉta sʉgʉsi, adewara ãyaʼa so zarea diasi akʉza jaradiasi (Juan 13:​12-15). Mamina bari maʉ̃ awa ẽ, Jesús iyi ʉ̃tʉ bakurude kachi jirabaside iyi maʉ̃ pʉadenʉmasimina Jesúsba ẽbẽra kayirua iyi kʼawa jirabʉa jarasi nebiata ũduita, adewara Juanʼa jarasi yi papata bia akʉmarẽã (Luc. 23:​42, 43; Juan 19:​26, 27). Jesúsba Daizeze Bedʼea jaradiabaside ũdubisi ẽbẽrarãta wãrĩnu mejãcha kãgata iya jõma soiduba osi baera, iya iyi bebʉsida diasi ẽbẽrarã kʼarea. w25.01 23 parr. 11

Jeowaba dayirã nemitia kĩrãduabʉrʉdera nekʼãrẽneba ẽdrʉbʉ kĩrãkʼabʉ. Daizeze Bedʼeaba yizata zokʼabʉ dayirã maʉ̃ta biʼia jara ũrĩbita, dayirãra nemitia omiara baera nemitiama kadenaba jʉ̃bʉ kĩrãkʼabʉ, mamina Jeowaba dayirã nemitia kĩrãduabʉrʉdera maʉ̃ kadenaneba ẽdrʉbʉrʉ kĩrãkʼabʉ (Rom. 6:​17, 18; Apoc. 1:5). Ẽbẽra aba kadenama jʉ̃bʉta maʉ̃neba ẽdrʉbʉrʉdera mejãcha sobiabʉ, abarika Jeowaba dayirã nemitia kĩrãduabʉrʉdera dayirãra mejãcha sobiapanʉ. Daizeze Bedʼeaba jarabʉ dayirãra nemitia omia baera ẽbẽra abaʉba kaya kayirua erbʉ kĩrãkʼabʉta, maʉ̃ba dayirãba nemitia obʉrʉdera Jeowaʉ̃me neũdukʼawua bia badata aduabʉ. Mamina Jeowaba dayirã kayabadara bebibʉrʉ kĩrãkʼasi. Yi Warrata dayirãbari beimarẽã zokʼaside, iyara ẽdrʉbisi maʉ̃ kayiruadeba akʉza dayirãra jẽda iyi neũdukʼawua baseapanʉ (1 Ped. 2:24). Ẽbẽra aba kayabʉta bebʉrʉdera mejãcha sobiabʉ, dayirãsida abarika sobiapanʉ Jeowaʉ̃me neũdukʼawuabadata jẽda ara obʉrʉdera akʉza Jeowaba dayirã jẽda bia akʉbʉrʉde. w25.02 11 parr. 16; 13 parr. 17

Nebʉra moneda ʉ̃rʉ bedʼeabʉde, Jesúsba jara ũrĩbisi basita nezokʼara ũme ãyi nokʼoare kʼẽrẽpabʉta, mamina ababasita nezokʼa iyi nokʼoare kʼẽrẽpabʉta ũdubi ẽãta (Mat. 25:​14-30). Nezokʼa kʼẽrẽpapanʉrabara jarakĩrãbʉ kristianora ʉ̃ta wãirata, ãyi nokʼora Jesús. Iya trʉ̃bʉ naʉ̃rata iyiʉ̃me sobia bamarẽã. Naʉ̃ra kristianorabara ãya nebia jʉ̃ãpanʉra ũduyi, ¿saʉ̃ maʉ̃ra? Ãyita nããra jẽda piradrʉbidayi (Mat. 25:​21, 23; Apoc. 20:5b). Mamina nezokʼa kʼẽrẽpabʉ ẽ bara nekʼãrẽta jaradiabʉ yi kristianora ʉ̃ta wãira. ¿Kʼãrẽta? Ũdubidaibara ãyira trajakĩrãbʉta. Nebʉra monedadebida, Jesúsbara jarakĩrãkʉa ẽ basi kristianora ʉ̃ta wãirãra kʼãrẽ oamapanaibasita, awuarabʉrʉ jarakĩrãkʉasi kʼãrẽta berabarita ãya nekʼãrẽ Jeowaita okĩrãbʉta oamapanʉbʉrʉ. w24.09 22 parr. 10; 23 parr. 12, 13

Jõmaʉ̃ba dayirã mebẽrãba nesidabʉta diakĩrãbʉ akʉza daya nesidabʉsida erbakĩrãbʉ (Ecl. 7:12; 1 Tim.5:8). Ẽbẽra abaʉba dayaʼa jarara trajo bia diaita aramaʉ̃ta daya krĩchaseabʉ sõbe pagadaita maʉ̃ barira, maʉ̃ra kayirua ẽ. Mamina dayirãba krĩchapanʉbʉrʉ bari sõbe pagadaita, mawũãra ĩjãbʉta ũdubida ẽ bayi, awuarabʉrʉ daya akʉbʉdeba obayi. Ĩjãbʉ kʼarea jõma opanʉbʉrʉ, dayirãba trajo jidai nãã krĩchadayi maʉ̃ba audre Jeowa kʼawa babibʉta, mawũã ẽ bʉrʉ jĩga babibʉta. Maʉ̃ kʼarea dayirãkʉza maʉ̃ta wididaibara: «¿Maʉ̃ trajobara Jeowaba kãga ẽãta obika?» (Prov. 6:​16-19). «¿Maʉ̃ trajota ĩjãra Jeowadeta oita ewari neẽ baika? akʉza ¿maʉ̃ trajota ĩjãra mʉ̃ mebẽrãneba jĩga bʼaika ewari biobayeda?». Naʉ̃ trajoba dayirãta bia wãbi ẽ bʉrʉ bigabayi ĩjã ẽ baita, daya trajo ũduita mejãcha zareabʉmina. Ĩjãbʉ kʼarea jõma opanʉbʉrʉ ũdubidayi Jeowa ʉ̃rʉ ĩjãbʉta akʉza iya dayirãra nekʼãrẽ badudeba kʼarebaita (Mat. 6:33; Heb. 13:5). w25.03 21 parr. 5, 6

Dayirãbara akʉda ẽ baibara mebẽrã kongregasionebemaba ãya kʼãrẽ aña obʉta akʉza kʼãrẽ nemitia obʉta. Awuarabʉrʉ akʉdaibara Jeowaba akʉbʉ kĩrãkʼa ãyi nebiata. Dayirãta mebẽrã kongregasionebemabawara bedʼea zromata erbʉbʉrʉ, ibiade ara oseapanʉ. Mawũã opanʉbʉrʉ wuabema ẽbẽrasida ẽjũã kĩrãwãreã jauredebemama zekĩrãnañi ãyisida abarika edadamarẽã. Dayirãbara Jeowaʼa ewari jõmaʉ̃nẽ biga diapanaibara ẽjũã kĩrãwãreã jauredebemata diasi baera. Yi ẽbẽrarã sobia akʉza aduʼa adewara neneẽã bakĩrãpanʉrabara, jʉrʉibara ẽjũã kĩrãwãreã jauredebemata akʉza maʉ̃neba ãĩ wãita krĩcha ẽ baibara. Diarubara nekʼãrẽ jõma obʉ dayirãta maʉ̃neba ãĩ jʉretaita (1 Ped. 5:8; Apoc. 12:9). Maʉ̃ kʼarea dayirãra jʉra kʼawuapanaibara maʉ̃ʼa yi sewabi ẽ baita. Dayirãra zarea odaibara maʉ̃ ẽjũã kĩrãwãreã jauredebema bia akʉita mawũã aduʼapanaita. w24.04 24, 25 parr. 18, 19

Yibarira, kʼarebaidua mara wũãwũãrabida Daizeze Jeowaba zokʼabʉta okĩrãnamarẽã. Bʉa obʉdeba akʉza bʉ sãwũã bedʼeabʉdeba ũdubira Jeowaba zokʼabʉra audre yibiata. Bari jaraita, ãba yi jʉrebari eda wãbʉde, Daizeze Bedʼea jaradiabʉde akʉza Daizeze Bedʼea lebʉde. Maraba mawũã oũdubibʉba kʼarebayi mara wũãwũãraba audre kãgamarẽã Jeowata, mawũã bari marata Jeowa odebʉ kʼarea pana ẽ bayi, mawũã berabari wãne tẽã Jeowadeba jĩga ba ẽ marẽã. ¿Ẽbẽra abaʉta Jeowadeba jĩga wãsibʉrʉ, jẽda Jeowa neũdukʼawua baseabʉka? Iyira Jeowa neũdukʼawua baseabʉ, iya nemitia odata jẽda krĩchara akʉza eda krĩchabʉta ũdubipe zõrãrãbawara bedʼeara iya nemitia oda ʉ̃rʉ (Sant. 5:14). Mawũã oira zaremina, jipade yibiabayi akʉza jẽda Jeowa neũdukʼawua bʼaita. w24.07 25 parr. 18, 19

¿Mara yi bedʼeapanʉnera sãwũã Jeowaba kãgabʉde baseapanʉ? Marara mayirai audre yi ũdukʼawua wãne, audre yi kãgadayi mamina, ¿kʼãrẽba kʼarebai maraba Jeowa nãã kayirua oda ẽ marẽã? Marara ũmepai doba pana ẽ baibara, ituata aukʼara doda ẽ baibara akʉza bedʼea ẽ baibara mia erkʼãĩ ʉ̃rʉ (Efes. 5:3). Maʉ̃ba audre krĩchabiseabʉ baera ãba kʼãĩta, adewara zarea baseabʉ Jeowaba kãgabʉ oita, marara bedʼeaseapanʉ sãwũã mayirai yiya wawia ũdubita akʉza sãwũã oita Jeowaba kãgabʉta (Prov. 22:3). Mayirai audre yi kãga wãne audre ũdubikĩrã wãñi sãwũã yi kãgapanʉta, mamina maraba aukʼara krĩchapanʉbʉrʉ ãba yi erkʼãĩ ʉ̃rʉ, maʉ̃bara kʼareba ẽ bayi maraba krĩcha biata jidadamarẽã (Cant. 1:2; 2:6). Edaʉde maraba mayirai yiya kãga ũdubibʉdera nekʼãrẽ Jeowaba kãga ẽãta oseapanʉ (Prov. 6:27). Mayirai ʉ̃rabʉrʉ bedʼea jʉ̃drʉbʉrʉdera jara ũrĩbidua sãwũã yi kãga ũdubidaita Daizeze Bedʼearadebemaba jarabʉ kĩrãkʼa (1 Tes. 4:​3-7). w24.05 29 parr. 10, 11

Jõmaʉ̃ba kãgapanʉ wuabemaraba dayirã ʉ̃rʉ ĩjãnamarẽã, bari jaraita ĩjãnamarẽã ãyi kʼareba nesidabʉrʉde dayirãba wãrĩnu kʼarebaita (Prov. 17:17). ¿Kʼãrẽta oseabʉ wuabemaraba bʉ ʉ̃rʉ ĩjãnamarẽã? Zarea odaibara Jeowaba nebia erbʉta dayirãbida oũdubidaita. Bari jaraita, dayirãba nekʼãrẽ oya adara aripe oibara akʉza ãza jʉ̃ẽ ẽ baibara. ¿Zõrãrã abaʉba ũdubibʉbʉrʉ iyi ʉ̃rʉ ĩjãseabʉta kʼãrẽ nebiata ũdupanʉ mebẽrãbara? Mebẽrãba kʼawuabʉbʉrʉ ãyi bedʼea zroma erbʉde zõrãrã abaʉta trʉ̃seabʉta, naʉ̃ba kʼarebayi ãyi mejãcha krĩcha zroma oẽ baita. Zõrãrãba ũdubidara mebẽrãra kʼarebakĩrãbʉta, mawũãra mebẽrãbara kʼawuadayi zõrãrãbara ãyira kãgabʉta. Zõrãrãba zokʼapanʉbʉrʉ ũrãgʼa diabʉrʉde Daizeze Bedʼeata akʉza dayirã kartata, naʉ̃ba kʼarebayi mebẽrãba ãyaʼa ũrãgʼa diabʉde audre ĩjãnamarẽã ãyi ʉ̃rʉ, ãyi krĩchata jaradiapanʉ ẽ baera. Adewara mebẽrãbara audre ĩjãpanʉ zõrãrã ʉ̃rʉ ãyaʼa jaradapeadata wuabema jara ẽ bʉrʉ akʉza ãyaʼa nekʼãrẽ oya adata aripe opanʉbʉrʉ. w24.06 30 parr. 14, 15

Kʼawuapanʉ Jeowaba naʉ̃ ewade dayirã kayara neẽã totobi ẽãta, mamina iya dayirã diaseabʉ zareata maʉ̃ awuantaita (Sal. 41:3). Jeowaba kʼarebabʉ iyi jaure zareadeba, mawũã zarea erbaita, so aduʼa bʼaita akʉza krĩcha bia erbaita (Prov. 18:14; Filip. 4:13). Adewara Jeowaba jarabʉ kayara wua neẽ baita aranʉ bʼaira (Is. 33:24). Jeowaba iyi bedʼeade bʉ amaesi bedʼeara dayirã kʼarebabʉta bedʼea zroma berabarinʉmʉne (Rom. 15:4). Atia akʉdayi mebẽã África Occidentaldebemata kʼãrẽta berabarisita iyaʼa jarasidade kanserba baribʉta. Iya jarabʉ: «Isaías 26:3ba mejãcha kʼarebabasi. Jeowaba kʼarebaseabʉ dayi sãwũã bʼaita akʉza sãwũã krĩchaita maʉ̃ mawũã berabaribʉrʉde». ¿Kĩrãbebʉka testo aba bʉ kʼarebadata bʉa mejãcha bedʼea zroma ũdubaside? w24.12 24 parr. 17, 18

Zõrãrã kongregasionebemarabida Jeowade kĩrãkʼa akʉpanʉ ẽbẽrarã kongregasioneba ãĩ wãnara. Zõrãrãbara kãgapanʉ naʉ̃ ẽbẽrarã jẽda zedamarẽã (Luc. 15:​22-24, 32). Ẽbẽra nemitia odaba jẽda krĩcha kʼãrãpe jẽda zebʉrʉdera, mejãcha sobiabʉ Jeowata, Jesústa, angelerata akʉza mebẽrã kongregasionebemarata (Luc. 15:7). Ẽbẽra nemitia odaba jẽda krĩcha ẽ bʉrʉ, Jeowabara iduaribi ẽãta iyi pʉwʉrʉde bamarẽã. Mamina Jeowabara kĩrãdua ẽ maʉ̃ ẽbẽrarã, awuarabʉrʉ iyara jʉrʉbʉ sãwũã kʼarebaita maʉ̃ ẽbẽra jẽda krĩchamarẽã. Oseas 14:4de kʼawuaseapanʉ Jeowa sãwũã sentibʉta ẽbẽra aba iya nemitia oda kʼarea jẽda krĩcha ẽãne. Nama jarabʉ: «Ãyi nemitiara mʉ̃ara kĩrãduayi. Mʉ̃ya areba kãga akʉyi ãyira, mʉ̃ kĩrʉbira ãyideba jĩga wãsi baera». Zõrãrãbara Jeowaba naʉ̃ ẽbẽra sãwũã akʉbʉta biʼia kʼawuapanʉ baera ãyabida abarika opanʉ. Maʉ̃ba akʉpanʉ naʉ̃ ẽbẽraba kʼãrẽta awuara onʉmʉta, mawũã ũdubita iyira jẽda krĩchabʉta. Naʉ̃ testoba jarabʉdebara ẽbẽrarã Jeowa odeba ãĩ wãnarabara kʼawuaseapanʉ Jeowabara wãrĩnu kãgabʉta ãyira jẽda zemarẽã akʉza ãyira kãgata. w24.08 28 parr. 8, 9

Wãrĩnubaira edaʉde jõmaʉ̃ba biga dia ẽ dayirãba ãyi kʼarea nebia obʉrʉdera. Edaʉde krĩchaseapanʉ dayirãba awuru kʼarea nebia obʉrʉdera maʉ̃ra ãyitara kʼãrẽ ẽ kĩrãkʼabʉta, krĩchada ẽãta dayirã kʼãrẽaba zarea osita maʉ̃ oita, mawũã ẽ bʉrʉ kʼãrẽaba plata gastasita maʉ̃ diaita. Mawũã berabaribʉrʉdera kʼãrẽba kʼarebaseabʉ dayirã sopʉa ẽ baita akʉza awurura kʼarea nebia obʉta idubʉ ẽ baita. Kĩrãbedaibara dayirã sobia bʼaira, awurura kʼarea nebia oibarata (Hech. 20:35). Maʉ̃ kʼarea mebẽrãba dayirãba ãyi kʼarea nebia obʉrʉde biga diada ẽ bʉrʉ sopʉada ẽ baibara, dayi sobia bʼaira maʉ̃ne chu ẽ baera. Kĩrãbedaibara dayirãba awurura nebia diabʉrʉdera ũdubipanʉta Jeowade kĩrãkʼa opanʉta. Iyara ẽbẽra jõmaʉ̃ʼa nebiata diabʉ ʉ̃kʉrʉba maʉ̃ kʼarea biga diada ẽ mina (Mat. 5:​43-48). Jeowaba iyi odepanʉra jarabʉ ãya awururabari nebia obʉrʉde jʉ̃ãna ẽ bʉrʉ maʉ̃rabida ãyaʼa nebia diaita, mawũãra nebia zromata diaita (Luc. 6:35). Bʉa awurura kʼarea nebia obʉrʉde maʉ̃ kʼarea biga diada ẽ bʉrʉ sopʉarãra, kĩrãbera Jeowabara bʉaʼa nebia diaita awururabari nebiata obʉ baera, adewara bʉa diabʉrʉde soiduba diabʉ baera (Prov. 19:17; 2 Cor. 9:7). w24.09 29 parr. 14-16