Reperensia Karta Nekʼawuabari Bʼaita Kristianora kĩrãkʼa akʉza Trajaita Daizezeita
© 2024 Watch Tower Bible and Tract Society of Pennsylvania
4-10 NOVIEMBREBAYEDA
BEDʼEA BIA DAIZEZE BEDʼEADE ŨDUDATA SALMO 105
Iyara ewari jõmaʉ̃ne kĩrãbebʉ iyi bedʼea abarika zedara
¿Kʼãrẽta odaibara audre ĩjãita Jeowaba drʉa bia weya abʉ ʉ̃rʉ?
11 Krĩchadadrʉ Jeowaba iyi pʉwʉrʉ nããbemara kʼãrẽ ara oya adara aripe berabaribida ʉ̃rʉ. Jeowaba jarasi Abrahánʼa akʉza yi kima Saraʼa ãyi zõna babʉrʉde wũãwũã erpanaita (Gén. 17:15-17). Akʉza jarasi Abrahánʼa iyideba zebʉrʉ wũãwũãra, diaita Canaán drʉata. Israelitara Abrahánʼneba zedara Egiptode wuabemara nezokʼabadaraba, krĩchaseapanasi Jeowaba Abrahánʼa jaradara aripe berabari ẽãta, mamina maʉ̃ra tẽã jõma aripe berabarisi. Tẽã juneane nããbema siglode Jeowaba Elisabetʼa jarasi iyi yõdrarabasimina wũãwũã erbaita. Adewara Jeowaba jarasi Maríaʼa wũãwũã baraita iyira mia kʼai yumakẽrãʉ̃me ãba kʼãĩkabasimina, maʉ̃ wũãwũãra Jesús basi. Jesúsdeba Jeowabara aripe berabaribisi iya jardin Edénʼne jaradata (Gén. 3:15).
12 Dayirãba akʉpanʉne sãwũã Jeowaba jaradara aripe berabari wãta, naʉ̃ba audre ĩjãbibʉ Jeowa zarea ʉ̃rʉ, adewara wãrĩnu weita ẽjũã kĩrãwãreã iya weya abʉra (akʉra Josué 23:14; Isaías 55:10, 11). Mawũã obʉba kʼarebayi dayirãba wuabemara jaradiaita ãyabida ĩjãnamarẽã Jeowabara wãrĩnu ẽjũã kĩrãwãreãra weita, mawũã krĩchada ẽ marẽã sewidata. Jeowaba jaraside bajã yiwidi weita akʉza egoro yiwidi weita, iya jarasi: «Naʉ̃ bedʼearata, kʼẽrẽpabʉ [...] akʉza wãrĩnu [...]» (Apoc. 21:1, 5).
it-2 581 parr. 2
Bedʼeata
Nekʼãrẽ jõma parãbʉta zokʼaipanʉrata akʉza zokʼaibʉ ẽãta jõma Daizeze Jeowaba jarabʉdebʉ. Maʉ̃ba iya nekʼãrẽ oita krĩchabʉta aripe berabarimarẽãra maʉ̃rata zokʼaseabʉ (Sl. 103:20; 148:8). Iyi bedʼeara dayirãbara ĩjãseabʉ, Daizezeba nekʼãrẽta oya asibʉrʉ maʉ̃ta aripe obʉ (Dt 9:5; Sl 105:42-45). Jeowaba jarabʉ «Daizeze Bedʼeara, ewari jõmaʉ̃nẽ baya». Naʉ̃bara jarakĩrãbʉ iya jaradara jõma aripe berabarita (Isa 40:8; 55:10, 11; 1Pe 1:25).
Jʉrʉda nekʼãrẽ biʼiabʉta Daizezedebemata
w86 1/11 19 parr. 15
Ʉ̃kʉrʉ warrara yi mebẽrã ãba sobia babibʉta
15 «Tajʉ̃sida yi jĩrʉta [José] kadenaba akʉza yi ochidausida. Iya bedʼea jarada aripe berabariyeda, Jeowa bedʼeaba audre neneẽã babisi» (Salmo 105:17-19.) Maʉ̃ba Joséra 13 poagabayeda nezokʼa basi akʉza karselde edabasi, Jeowaba jarabʉ jõma aripe berabariyeda. José mawũã zʉbʉria berabaridaba biode kʼarebasi iyira ẽbẽra bia bʼaita. Jeowaba iduaribisimina iya maʉ̃ bedʼea zroma ũdumarẽã tẽãne iya ũduibasi nekʼãrẽ biata. Josébara iya bedʼea zroma mejãcha ũdubʉmina, ¿ĩjãbasika Jeowaba jarada ʉ̃rʉra? José mawũã mejãcha zʉbʉria berabaridadeba kʼarebasi iyi sodeba nebia ũdubita eda krĩchabaita, audre Jeowa kʼawa bʼaita akʉza obaita Jeowaba zokʼabʉta, adewara jʉ̃ã kʼawuabaita. Mawũẽra José mawũã berabaridaba kʼarebasi audre ẽbẽra bia bʼaita, tẽãne Jeowaba zokʼasi iya krĩchabʉ aripe oita, adewara nekʼãrẽ zroma oita (Génesis 41:14, 38-41, 46; 42:6, 9.)
11-17 NOVIEMBREBAYEDA
BEDʼEA BIA DAIZEZE BEDʼEADE ŨDUDATA SALMO 106
Kĩrãduasida Daizeze ãyi ẽdrʉbidata
w18.07 20 parr. 13
¿Kʼaita Jeowa are bʉ?
13 Israelitaraba ũdusidade bãjã pariguanʉmʉta akʉza ba pʉrepʉrebarita akʉza nekʼãrẽ awuruta maʉ̃nera ãyira mejãcha perasida. Maʉ̃ kʼarea Moisésʼa jarasida ãyibari bedʼea wãmarẽã Jeowaʉ̃me (Éx. 20:18-21). Maʉ̃ kʼarea Moisésʼra wãsi katuma Sinaínu Jeowaʉ̃me bedʼeade, mõbe ewari biobayeda mama besi. Maʉ̃ba ãyi nãã edebʉta neẽ baera israelitaraba krĩchasida ãyira doba amaesidata, naʉ̃neba ũdubisida ãyara Jeowa ʉ̃rʉ ĩjãpanasita Moisésta ãyiʉ̃me ãba basi baera. Israelitaraba wua jʉ̃ãamatotosida Moisésʼra maʉ̃ kʼarea Aaronʼa jarasida: «Ora daita Daizeze dai nãã wãbʉta, kʼawuada ẽ baera Moisésʼra kʼãrẽ berabarisita, yumakẽrã dai Egipto drʉadeba ãĩ ededata» (Éx. 32:1, 2).
Jʉrʉda nekʼãrẽ biʼiabʉta Daizezedebemata
w06 15/7 13 parr. 9
Bedʼea audre yibia Salmo libro ũbeadebemata akʉza kimaredebemata
106:36, 37. Naʉ̃ bersikuloba ũdubibʉ nekʼãrẽ parãma yiwidʼira abarikabʉta angelera kayirua sakripisio diaiʉ̃me. Maʉ̃ba ẽbẽra abaʉba nekʼãrẽ parãma yiwidʼibʉbʉrʉ naʉ̃ ẽbẽrarã angel kayiruara yi zokʼabibʉ. Daizeze Bedʼeaba jarabʉ: «Kʼaubaidua nekʼãrẽ omaba» (1 Juan 5:21).
18-24 NOVIEMBREBAYEDA
BEDʼEA BIA DAIZEZE BEDʼEADE ŨDUDATA SALMO 107, 108
Biga diaidʉa Jeowaʼa iyira ẽbẽra bia baera
w07 15/4 20 parr. 2
Jeowa ʉ̃rʉ ibia bedʼeadrʉ ãba yi jʉrebʉrʉde
2 Dayirãra ãba yi jʉrebariedara wãpanʉ ẽ bari awuru ẽbẽra dayirãba nekʼãrẽ okĩrã abarika okĩrãʉ̃me ãba bʼaita, mawũã ẽ bʉrʉ ãyibawara jemeneita. Awuarabʉrʉ, ãba yi jʉrebariedara wãpanʉ Jeowa ʉ̃rʉ ibia bedʼeaita, maʉ̃ra mawũã ozebʉda dããrawedaʉba. Maʉ̃ta ũdubibʉ Salmo 35:18de, nama jarabʉ: «Mõbe, bika diayi kongregasione; bʉ ʉ̃rʉ ibia bedʼeayi pʉwʉrʉ kabana daidu». Salmo 107:31, 32bida maʉ̃ kĩrãkʼa jara ũrĩbibʉ, jarabʉ baera Jeowa ʉ̃rʉ ibia bedʼeaibarata ãba yi jʉrebʉrʉde.
w15 15/1 9 parr. 4
Biga diadrʉ Jeowaʼa
4 Dayirãba dayirã kʼarea nebia obʉdade biga diakĩrãira krĩchadaibara Jeowaba dayirã kʼarea kʼãrẽ nebiata ozebʉrʉta, mõbe akʉdaibara sãwũã iya maʉ̃ nebia obʉdeba ũdubibʉta dayirãra wãrĩnu kãgata akʉza iyi kãgara jõkata. Davidba mawũã osidera ũdusi Jeowaba iyi kʼarea kʼãrẽ nebiata osita (akʉra Salmo 40:5; 107:43).
Jʉrʉda nekʼãrẽ biʼiabʉta Daizezedebemata
w87 15/3 24, 25 parr. 3
Judioraba ãya krĩcha bia erbʉ ʉ̃rʉ ĩjãbʉta ũdubisidadera ãyira naʉ̃bara kʼareba ẽ basi babilonioraneba ẽdrʉira. Naʉ̃ra judiorabara ũdubisida ãyi ʉ̃rʉbʉrʉ audre ĩjãbʉta Jeowa ʉ̃rʉ ĩjãi kaude, maʉ̃ba ãya nekʼãrẽ jõma osidamina ẽdrʉbe ẽ basi. Mamina ãya Jeowa ʉ̃rʉ ĩjãbʉta ũdubisidadera ãya bedʼea zromata ũdupanasimina Jeowabara ãyira ẽdrʉbisi maʉ̃nebara.
25 NOVIEMBREDEBA–1 DICIEMBRE EDA
BEDʼEA BIA DAIZEZE BEDʼEADE ŨDUDATA SALMO 109-112
Dayirã Nokʼo Jesúsʼare panadrʉ
w06 1/9 13 parr. 6
Bedʼea audre yibiata Salmo libro juesomanebemata
110:1, 2 ¿Jesúsbara kʼãrẽta osi Daizeze juwarare jewedabasidera? Jesúsʼra jẽda piradrʉda tẽãra ʉ̃ta wãsi, iyara Daizeze juwarare jeweda jʉ̃ãsi poaga 1914de iya zokʼa jʉ̃drʉi zeyeda. Iyara ʉ̃ta wãirata mejãcha kʼarebasi, jaradiasi sãwũã jaradia wãita ẽbẽrarã, sãwũã iyi kʼaidu babita akʉza jaradiasi ʉ̃ta wãbʉrʉde iyiʉ̃meba sãwũã zokʼaita (Mateo 24:14; 28:18-20; Lucas 22:28-30).
w00 1/4 18 parr. 3
Daizezeʉ̃me yõpanʉrãra bia wã ẽ bayi
3 Siglo 20 jʉ̃drʉdadeba ya Jeowa ode panʉrãra mejãcha pẽwã zebʉda. Pʉwʉrʉ mejãchabʉmae ẽbẽra kayiruaraba jʉrʉpanʉ sãwũã idu jaradiabida ẽ baita Daizeze nokʼo ʉ̃rʉ, ãyara maʉ̃ kʼarea pẽwãpanʉ Jeowa ode panʉrãra. Ãyara mawũã opanʉ Diaruba mawũã obibʉ baera. Diarura dayirã audu leon kĩrãkʼa wã abari, mawũã ãbʉdeareba dayirãta makoita (1 Pedro 5:8). Poaga 1914de Daizezebara yi Warrara Nokʼo babisi naʉ̃ drʉa ʉ̃rʉ zokʼamarẽã, iya jarasi iyi nejʉrarata iyi juwa edre baebimarẽã (Lucas 21:24; Salmo 110:2). Aramaʉ̃ta Jesúsbara Diarura ʉ̃tʉba jʉretasi nama egoroeda, maʉ̃ kʼarea Diarura mejãcha kĩrʉsi akʉza iyi bei ewarira wiña waebʉta kʼawuabʉ baera pẽwã jʉ̃drʉsi kristianora ʉ̃ta wãirata akʉza yi wuabema Jeowa ode panʉrata (Revelación 12:9, 17).
be 76 parr. 3
Audre kʼawua wãra
Dayirãba nekʼãrẽ okʼawuabʉta audre bia zokʼakĩrãpanʉbʉrʉ dayirã areba ojʉ̃drʉibara. Bari jaraita, ¿bʉara trʉ̃bʉka awuru mebẽrãta bʉme Daizeze Bedʼea jaradia wãita? ¿Bʉara krĩchabʉka sãwũã kʼarebaita mebẽrã ʉ̃rabʉrʉ Jeowa ode panʉrata, warrarapanʉrata mawũã ẽ bʉrʉ mebẽrã kongregasionebema kayapanʉta? ¿Ãba yi jʉrebari de imaita, mawũã ẽ bʉrʉ asamblea obari de imaine kʼarebakĩrãbʉka bʉara? ¿Bʉara oseabʉka yi nãã edebari 30 ora diabarira? ¿Bʉra yi nãã edebari 50 ora diabari basebʉka? mawũã ẽ bʉrʉ ¿kongregasion audre kʼareba nesidabʉmae kʼarebaseabʉka? ¿Bʉta yumakẽrãbʉrʉ nekʼãrẽ obʉka ũdubita zõrãrã kʼarebabari bakĩrãbʉta mawũã ẽ bʉrʉ zõrãrã kongregasionebema bakĩrãbʉta? Bʉa Jeowadeta soiduba audre okĩrãbʉbʉrʉ, naʉ̃ba ũdubibʉ bʉara audre kʼawua wãta Jeowa ʉ̃rʉ (Sal. 110:3).
Jʉrʉda nekʼãrẽ biʼiabʉta Daizezedebemata
it-2 575 parr. 2
Bedʼea abarika zeda
Melquisedecʼde kĩrãkʼa saserdote bʼaita bedʼea abarika zeda. Salmo110:4de naʉ̃ bedʼea abarika zeda ʉ̃rʉ bedʼeabʉ, adewara Hebreos 7:1-3, 15-17de jarabʉ maʉ̃ saserdote bʼaira Jesukristota. Mamina maʉ̃ bedʼea abarika zedara Jeowaba Jesúsʼʉ̃meba mawũã osida. Jesúsba Lucas 22:29de yi Zezeʉ̃me bedʼea abarika zeda adara naʉ̃ basibaibara. Jeowata Jesúsʼʉ̃me mawũã bedʼea abarika zesi baera Jesúsʼra saserdote bʼaibasi Melquisedec kĩrãkʼa. Jeowabara Melquisedecʼra saserdote babisi akʉza nokʼo babisi. Maʉ̃ kĩrãkʼa Jesukristora ʉ̃tʉ nokʼo bʼaibasi akʉza saserdote bʼaibasi. Iyi ʉ̃ta wãna tẽã Jeowabara maʉ̃ babisi (Heb 6:20; 7:26, 28; 8:1). Maʉ̃ bedʼea abarika zedara ewari jõmaʉ̃nẽ bayi, maʉ̃ba Jesúsʼra nokʼo bayi akʉza saserdote bayi ewari jõma Jeowa juwade (Heb 7:3).
2-8 DICIEMBREBAYEDA
BEDʼEA BIA DAIZEZE BEDʼEADE ŨDUDATA SALMOS 113-118
¿Sãwũã pagaseabʉ Jeowaʼa?
w01 1/1 11 parr. 13
Audre kristiano bia babibʉ kãgabara
13 Jesúsbara jarasi dayirãbara Jeowatrʉ audre kãgaibarata nekʼãrẽ baduira. Mamina dayirãra Jeowa kãga toda ẽ basi. Maʉ̃ba jõmaʉ̃ta zarea odaibara Jeowa wãrĩnu kãgadaira. Dayirãba Daizeze ʉ̃rʉ ũrĩkata ũrĩsidadera orrasida iyi ʉ̃rʉ nebiata ũrĩsida baera. Maʉ̃ba dayirãbara wiña wiñane kʼawua wãsida Jeowabara naʉ̃ drʉara biʼia parãsita ẽbẽrarãta sobiapanamarẽã (Génesis 2:5-23). Adewara kʼawuasida Jeowabara nekʼãrẽ osita ẽbẽrarã nemitiadeba ẽdrʉbita (Génesis 3:1-5, 15). Jeowaba dayirãta mejãcha kãgabʉ baera yi Warra abapaibʉta jõmaʉ̃bari beimarẽã diasi mawũã nemitiadeba ẽdrʉbita (Juan 3:16, 36). Mawũẽra dayirãba ewariza Jeowa audre kʼawua wãne audre ũdukʼawua wãsida (Isaías 25:1). Nokʼo Davidba jarasi Jeowara mejãcha kãgabʉta iyita kãgade akʉbʉ baera (Salmo 116:1-9). Idi ewadera Jeowabara dayirãra akʉbʉ, jaradiabʉ, so zarea diabʉ, maʉ̃ba dayirãba audre Jeowata ũdukʼawua wãnara audre kãgadayi (Salmo 31:23; Sofonías 3:17; Romanos 8:28).
w09 15/7 29 parr. 4, 5
Biga diapanaibara akʉza wuabemaraʼa soiduba nekʼãrẽ diaibara
Salmistaba jarasi: «¿Sãwũã pagai mʉ̃a Jeowaʼa iya mʉ̃ kʼarea nebia ozebʉrʉra?» (Sal. 116:12). ¿Kʼãrẽ biata ũdusi salmistabara? Jeowabara iyi zʉbʉriabaside kʼarebasi akʉza iyaʼa so zareata diasi. Adewara iyi nejʉraraba beaita bʉdeba ẽdrʉbisi. Maʉ̃ kʼarea salmistabara biga diakĩrãbasi Jeowaʼa. ¿Kʼãrẽta osi iyara? Daizeze Bedʼeade jarabʉ: «Mʉ̃a nekʼãrẽ Jeowa nãã oya adara aripe oyi» (Sal. 116:3, 4, 8, 10-14). Mawũẽra salmistabara iya Jeowaʼa nekʼãrẽ oya adara aripe oita krĩchabasi.
Idi ewadebida dayirãbida salmistaba oda kĩrãkʼa oseabʉ, ¿sãwũã? Iyi leyba jarabʉta obʉde akʉza Daizeze Bedʼearadebemaba jarabʉta opanʉne. Maʉ̃ kʼarea dayirãra zarea odaibara Jeowaba kãgabʉta nããra oita. Adewara idu yi kʼarebabidaibara Daizeze zarea dayirãba nekʼãrẽ obʉde (Ecl. 12:13; Gál. 5:16-18). Jeowaba dayirãʼa nekʼãrẽ bia dia zebʉrʉra jõma mapaga auda ẽ, mamina Jeowata sobiabiseabʉ dayirãba soiduba opanʉbʉrʉ iya zokʼabʉta (Prov. 27:11). Kʼãrẽ bia Jeowaba zokʼabʉta opanʉ baera.
w19.11 22, 23 parr. 9-11
Levítico librodeba nekʼãrẽ biata kʼawuapanʉ
9 Yi ũmenebemata: Jeowaba zokʼabʉta opanʉ iyaʼa biga diadaita. Adewara israelitarabara Daizezeʼa oprenda neneẽã erbaita diapanasi. Levítico librode kʼawuapanʉ israelitarabara maʉ̃ oprendata diabasita Daizeze Jeowaʼa biga diadaita (Lev. 7:11-13, 16-18). Naʉ̃ oprendara ãya mawũã opana ẽ basi maʉ̃ta oibara baera, awuarabʉrʉ Jeowata kãgabʉ baera soiduba opanasi. Maʉ̃ oprendara koseabasi yi oprenda diadaba, yi mebẽrãba akʉza saserdoteba. Mamina basi maʉ̃ nedʉwʉrʉdebemara Jeowaʼabʉrʉ diaibarata, ¿kʼãrẽ basi?
10 Yi ũbeata: Jeowaʼa audre yibiata diapanʉ iyita kãgapanʉ baera. Jeowamara nedʉwʉrʉ dragara jipade yibia basi, adewara iya kãgabasi iyaʼa diadamarẽã nekʼãrẽ awuru nedʉwʉrʉdebemata bari jaraita yi kotrʉata (akʉra Levítico 3:6, 12, 14-16). Maʉ̃ kʼarea ẽbẽra abaʉba iyi biadeba nedʉwʉrʉ dragata akʉza Jeowaita yi audre yibiata diapanasibʉrʉ, naʉ̃bara Jeowara mejãcha sobiabibasi. Israelita abaʉba naʉ̃ oprendata mawũã diabasibʉrʉ ũdubibasi iyara audre nebiata okĩrãbasita Jeowaita. Abarika Jesúsbida soiduba osi Jeowaba nekʼãrẽ omarẽã jarabʉta Jeowata kãgabasi baera. Mawũã ũdubisi iya nebia erbʉta jõma diasita Jeowaʼa (Juan14:31). Jesúsbara soiduba okĩrãbasi Jeowaba iyaʼa nekʼãrẽ omarẽã zokʼabʉra akʉza iyara mejãcha kʼawuakĩrãbasi Daizeze ley ʉ̃rʉ (Sal. 40:8). Jeowara mejãcha sobiasibaibara yi Warraba soiduba obasi baera iya zokʼabʉta.
11 Israelitarabara oprenda neneẽã baidebemara soiduba diapanasi akʉza mawũã ũdubipanasi Jeowata kãgapanʉta. Abarika dayirãba Jeowa kʼarea nekʼãrẽ obʉrʉdera soiduba opanʉ, iyita kãgapanʉ baera. Jeowara mejãcha sobiabʉbaibara ũdubʉ baera ẽbẽrarã mejãchaʉba iyita kãgapanʉ baera soiduba opanʉta iya zokʼabʉta. Dayirãra mejãcha sobiapanʉ kʼawuapanʉ baera Jeowabara bari akʉbʉ ẽãta dayirãba kʼãrẽaba obʉta iya zokʼabʉta, awuarabʉrʉ Jeowaba akʉbʉ baera dayirãba kʼãrẽ kʼarea opanʉta maʉ̃ta. Bari jaradaita, dayirã zõnabasi baera edaʉde Jeowa kʼarea nekʼãrẽ mejãcha obe ẽ daya kãgabʉ kĩrãkʼa. Mamina dayirãbara biʼia kʼawuapanaibara Jeowabara akʉbʉ ẽãta dayirãba kʼãrẽaba osita. Dayirãba edaʉde krĩchaseabʉ Jeowa kʼarea wiña opanʉta, mamina Jeowabara audrera akʉbʉ dayirãba kʼãrẽ kʼarea opanʉta. Dayirãba soiduba obʉrʉdera sobiabʉ iyira.
Jʉrʉda nekʼãrẽ biʼiabʉta Daizezedebemata
w12 15/5 22 parr. 1-3
Lepanʉraba widipanʉta
Jeowabara mejãcha kãga ẽbẽrarã iyi ode kʼẽrẽpapanʉra bebʉra, mamina Salmo 116:15de jarabʉdera bedʼeabʉ ẽ ẽbẽra aba beida ʉ̃rʉ.
Naʉ̃ testode salmistabara jarakĩrãbasi ẽbẽrarã Jeowa ode kʼẽrẽpapanʉrata jõma beira Jeowaitara nemejãcha aduai kĩrãkʼabʉta. Iyara maʉ̃ kʼarea idu berabaribi ẽ maʉ̃ra (akʉra Salmo 72:14; 116:8). Adewara maʉ̃ kʼarea naʉ̃ testora ẽbẽra aba beibʉrʉde diskurso diabʉrʉdera biga ẽ bayi ũdubita. Naʉ̃bara jarakĩrãbʉ ẽ baera ẽbẽra abapai beida ʉ̃rʉ, maʉ̃ ẽbẽra Jeowa ode kʼẽrẽpabʉta beisimina.
Naʉ̃ testoba ũdubibʉ Jeowabara iyi ode kʼẽrẽpapanʉrãra jõma makenabi ẽ baita, maʉ̃ta ũdupanʉ Jeowaba idi ewade iyi ode kʼẽrẽpapanʉra sãwũã kʼareba zebʉrʉdeba, mejãcha pẽwãpanʉmina awuantapanʉ Jeowaba iduaribi ẽ baera jõma makenanaita.
9-15 DICIEMBREBAYEDA
BEDʼEA BIA DAIZEZE BEDʼEADE ŨDUDATA SALMO 119:1-56
¿Sãwũã warrarãra iyi ode neneẽã baseabʉ?
w87 1/11 18 parr. 10
¿Bʉara ewari jõmaʉ̃nẽ zarea obʉka Jeowaba kãgabʉde bʼaita?
10 Efesios 5:5de Pabloba naʉ̃ta jarasi: «Marabara kʼawuabʉ akʉza biʼia ũrĩbʉ dayi kakua neida obʉta, jaigʉabʉta akʉza nekʼãrẽ bia erbaita mejãcha kãgabʉta (nekʼãrẽ oma yiwidʼita), Daizeze Nokʼode akʉza Jesu Nokʼode eda ba ẽ bayi». Poagaza ẽbẽra mejãcha sensurapanʉ akʉza kongregasioneba ãĩ bʉepanʉ mia erkʼãĩpanʉ baera Jeowaba zokʼabʉ ẽãne (1 Corintios 6:18.) Maʉ̃ra mawũã berabaribʉ mebẽrãta nãã Jeowaba maʉ̃ ʉ̃rʉ kʼãrẽ jarabʉ kʼarea jʉra kʼawuabada kĩrãkʼa wua jʉra kʼawuapanʉ ẽ baera (Salmo 119:9.) Bari jaraita, mebẽrã mejãchaʉta paseade wãbʉrʉdera mebẽrãbawara ãba panʉ ẽ, awuarabʉrʉ ãba panʉ ẽbẽrarã naʉ̃ drʉadebemaraʉ̃me. Naʉ̃ra mebẽrãbara krĩchapanʉ maʉ̃ra ẽbẽrarãra ẽbẽra biata, maʉ̃ kʼarea ãyi neũdukʼawua bapanʉ akʉza nekʼãrẽ opanʉ Jeowa dabʉ nãã bigabʉ ẽãta. Edaʉde mawũã berabaribʉ mebẽrã ãyi trajodebemabawara aukʼara ãba panʉne. Ewari aba, zõrãra kongregasionebemata iyi trajodebema ẽbẽra wẽrãʉ̃me aukʼara neũdukʼawua bia basi, maʉ̃ba ewari berabarida tẽã iyira maʉ̃ ẽbẽra wẽrãʉ̃me wãsi akʉza iyi mebẽrãra amaesi. Maʉ̃ kʼarea iyira tẽã jʉ̃neane kongregasioneba ãĩ bʉesida. Daizeze Bedʼeaba jarabʉra wãrĩnu, neũdukʼawuara zeri ẽãbara dayirãba nebia obʉra aduabipanʉ (1 Corintios 15:33.)
w06 15/6 25 parr. 1
Daizeze Bedʼea badua ũrĩbʉ kʼarea sobiabʉ
NAɄ̃ drʉadera nekayiruara mejãchabʉ, maʉ̃ kʼarea Jeowabara dayirãra badua kĩrãbebibʉ kʼãrẽta kãgabʉta mawũã awuantadamarẽã. Jeowabara iyi ũrãgʼara dayirãra badua kĩrãbebibʉ nekʼãrẽ biodeba, bari jaraita, dayirã dobaʉba Daizeze Bedʼea akʉbʉdeba, ãba yi jʉrebarieda wãbʉrʉde akʉza mama mebẽrãba komentario diabʉrʉdeba. Dayirãba Daizeze Bedʼeade lebʉra mawũã ẽ bʉrʉ ũrĩbʉra yiwidi ẽ, maʉ̃ra dayirãba nãã kʼawuabadata jẽda jara ũrĩbipanʉ. Mamina dayirãra nemitia omia baera jõma kĩrãduabʉ, maʉ̃ kʼarea nesidapanʉ badua jẽda kĩrãbebipanamarẽã Jeowaba kʼãrẽta oita krĩchabʉta akʉza kʼãrẽta omarẽã zokʼabʉta. Biga diapanʉ Jeowaʼa kʼãwũã dayirã kĩrãbebibʉ baera. Naʉ̃ba dayirãʼa zarea diabʉ akʉza kʼarebabʉ kĩrãdua ẽ baita kʼãrẽa jidasidata Jeowaba zokʼabʉ oita. Salmistaba maʉ̃ kʼarea Jeowaʼa jarasi iyira mejãcha sobiabʉta Jeowaba badua kĩrãbebibʉ baera kʼãrẽta kãgabʉta (Salmo 119:24).
w10 15/4 20 parr. 2
Ĩjãra Jeowa Bedʼeaba jarabʉta
2 Daya nekʼãrẽ akʉbʉra zebari dayi krĩchaidu akʉza dayi soidu, maʉ̃ kʼarea jʉra kʼawuabaibara dayirãba kʼãrẽ akʉbʉ kʼarea. Maʉ̃ba dayirãba nemitiata akʉpanʉbʉrʉ, maʉ̃bara aña krĩchabiseabʉ, tẽã naʉ̃ nemitiata oseabʉ. Naʉ̃ drʉara Diaruba zokʼabʉ baera mejãchade bʉ nemitiata, maʉ̃ba maʉ̃ nemitiara ũduaseabʉ telebisorde, kartarane akʉza potorane. Maʉ̃ nemitiabara mejãcha zʉbʉriabiseabʉ dayirãra (1 Juan 5:19). Maʉ̃ kʼarea salmistaba jarasi: «Mʉ̃ dabʉa akʉbirãra nekʼãrẽ zeri ẽãta; mʉ̃ra bʉ ode zokʼai erbara» (Sal. 119:37).
Jʉrʉda nekʼãrẽ biʼiabʉta Daizezedebemata
w05 15/4 10 parr. 2
Daizeze Bedʼea ʉ̃rʉ ĩjãnadrʉ
2 Salmo 119bara erbʉ 176 bersikulo, naʉ̃ba erbʉ 22 estropa. Estropa aba abakaʉba erbʉ 8 bersikulo. Estropa 1nera bersikulo 1neba 8 bayeda nabema letra abesedario ebreodebemaba jʉ̃drʉbʉ. Mawũã wã 22 estropabʉ jõñiena. Salmistabara naʉ̃ kapitulora mawũã bʉsi ẽbẽrarãba burude kʼawuadamarẽã. Adewara zokʼasi bedʼea wiña abarika bedʼeabʉta, bari jaraita, Daizeze Bedʼeata, Daizeze leyta, Daizeze ota, Daizezeba kʼãrẽ zokʼabʉta.
16-22 DICIEMBREBAYEDA
BEDʼEA BIA DAIZEZE BEDʼEADE ŨDUDATA SALMO 119:57-120
Sãwũã awuantaseabʉ bedʼea zromara
w06 15/6 20 parr. 2
Kʼãrẽaba kãga bʉ bedʼeara
2 ¿Daizeze Bedʼeaba sãwũã so zarea diasi salmistaʼa? Iya biʼia kʼawuabasi Jeowabara iyira wãrĩnu akʉbʉta, iyi nejʉraraba mejãcha pẽwãpanasimina akʉza zʉbʉria opanasimina sobiabasi kʼawuabasi baera Daizeze ley akʉbʉdeba nebia ũdubʉta. Iyara kʼawuabasi Jeowaba iyira bia edabʉta akʉza kʼarebabʉta audre krĩcha bia erbamarẽã iyi nejʉraraira. Daizeze Bedʼeaba jarabʉta aripe obasi baera iyi krĩchara aduʼabasi akʉza neneẽãbasi (Salmo 119:1, 9, 65, 93, 98, 165).
w00 1/12 14 parr. 3
¿Dayirãbara kãgaka Daizeze Bedʼeara?
3 Salmistabara mejãcha kãgabasi Jeowa leyra. Maʉ̃ kʼarea iyara mesera obasi Jeowa leyba jarabʉta. Iyi nejʉraraba mejãcha pẽwãpanasimina salmistabara kĩrãdua ẽ basi Jeowa leyra (Salmo 119:60, 61). Daizeze Bedʼeabara dayirãʼa so zarea diabʉ, kʼawuabibʉ baera Jeowabara dayirãra ẽdrʉbita dayirã nejʉraneba. Daizezeba kʼawuabʉ dayirãra kʼãrẽ ewaride ẽdrʉbita dayirã nejʉraraneba, mawũã Daizeze Nokʼo ʉ̃rʉ jaradia wãnamarẽã (Marcos 13:10).
w06 1/9 14 parr. 4
Bedʼea audre yibia Salmo libro juesomanebemata
119:71. ¿Kʼãrẽne kʼarebabʉ zʉbʉria berabaribʉbara? Dayirãra bedʼea zroma ũdubʉba kʼarebaseabʉ audre Jeowa ʉ̃rʉ ĩjãita, soiduba yiwidʼita iyaʼa akʉza ewari jʉrʉita Daizeze Bedʼea estudiaita. Adewara Jeowaba zokʼabʉde oũdubita. Daya bedʼea zroma ũdubʉrʉde kʼãrẽ obʉba ũdubiseabʉ kʼãrẽta audre ara oibarata. Dayirãba bedʼea zroma ũdubʉrʉde jʉrʉpanʉbʉrʉ naʉ̃ba sãwũã audre ẽbẽra bia babiseabʉta mawũãra aukʼara krĩcha zroma oẽ bayi maʉ̃ kʼarea.
w17.07 13 parr. 3, 5
So zʉbʉria akʉra yi zʉbʉriapanʉrãra
3 Jeowabʉrʉ audre so zarea diabʉ dayirãra (akʉra 2 Corintios 1:3, 4). Jeowabʉrʉ audre kʼawuabʉ ẽbẽrarã sãwũã sentibʉra maʉ̃ kʼarea iyara so zʉbʉria akʉbʉ. Daizezebara iyi ode panʉraʼa jarabʉ iyabʉrʉ so zarea diaita (Is. 51:12; Sal. 119:50, 52, 76).
5 Jeowabara dayirãra kʼarebakĩrãbʉ maʉ̃ kʼarea dayirã sãwũã sentibʉra iyaʼa jõma jaraseabʉ. Sobiapanʉ kʼawuapanʉ baera Jeowabara kʼawuabʉta dayirã kʼãrẽaba zʉbʉriabʉra akʉza iya dayirãʼa so zarea diaita bedʼea zroma awuantaita.
Jʉrʉda nekʼãrẽ biʼiabʉta Daizezedebemata
w06 1/9 14 parr. 5
Bedʼea audre yibia Salmo libro juesomanebemata
119:96. ¿Ẽbẽrama jõma dauchabʉra kʼãrẽa jõma daucha bʉ ẽ? Salmistara bedʼeasi ẽbẽraba ãyima nekʼãrẽ jõma daucha akʉbʉ ʉ̃rʉ, maʉ̃neba jarakĩrãbasi ẽbẽraba ãyima daucha akʉbʉra jõma aripebʉ ẽata jõma biʼia kʼawuachu ẽ baera. Mamina Jeowaba dayirãʼa zokʼabʉra jõma aripebʉ maʉ̃ba biode kʼarebaseabʉ dayirãba nekʼãrẽ obʉrʉde.
23-29 DICIEMBREBAYEDA
BEDʼEA BIA DAIZEZE BEDʼEADE ŨDUDATA SALMO 119:121-176
Kʼãrẽta oseabʉ bari zʉbʉria ẽ baita
w18.06 17 parr. 5, 6
Dayirã krĩcha bia erbaira Daizeze Bedʼeademaba jarabʉta odaibara akʉza Daizeze Bedʼeaba zokʼabʉta odaibara
5 Jeowaba zokʼabʉdeba nebia ũduira dayirãbara bari le ẽ baibara Daizeze Bedʼeara akʉza maʉ̃ ʉ̃rʉ bari kʼawua ẽ baibara. Awuarabʉrʉ maʉ̃ra wawia ũdubidaibara akʉza mama jarabʉta okĩrãbaibara. Daizeze Bedʼeaba jarabʉ: «Jʉraidua yi kayiruara, awuarabʉrʉ kãgaidua nebiata» (Amós 5:15). Dayirãba nekʼãrẽ jõma mawũã akʉira zarea odaibara jõma Jeowaba akʉbʉ kĩrãkʼa akʉita. Maʉ̃ biʼia ũrĩta krĩchadaya naʉ̃ ʉ̃rʉ: Bʉta dããrabadogota bia kʼãĩ ẽãta maʉ̃ kʼarea medikoeda wãbʉ. Naʉ̃ medikobara jarabʉ bʉ biʼia kʼãĩra bia nekʼoibarata, ejersisio oibarata akʉza bʉa nãã nekʼãrẽ sãwũã obadata audre awuara oibarata. Mamina bʉa maʉ̃ta obʉde ũdura naʉ̃ba kʼarebanʉmʉta, ¿kʼãrẽta oi? Maramabi biga diayi maʉ̃ medikoa akʉza iya ũrãgʼa diada.
6 Abarika Jeowaba dayirãʼa jaradiabʉ kʼãrẽta oibarata akʉza oẽ baibarata mawũã nekayirua oda kʼarea zʉbʉrianuma ẽ baita, adewara iya mawũã jaradiabʉ dayirãta bia panamarẽã. Bari jaraita, krĩchadaibara dayirãba kʼãrẽ nebiata ũdudaita Daizeze Bedʼeaba zokʼabʉta odara, sewa nebʉrata jara ẽ bʉrʉ, nezrʉga ẽ bʉrʉ, mia erkʼãĩna ẽ bʉrʉ Daizezeba zokʼabʉ ẽãne, yõna ẽ bʉrʉ akʉza jaibanata jʉrʉda ẽ bʉrʉ, mawũã jõma bia wãñi (akʉra Proverbios 6:16-19; Rev. 21:8). Dayirãba ũdudara Jeowaba zokʼabʉta aripe opanʉne bia wãta, audre kãga wã Jeowara akʉza audre kãga wãñi iya zokʼabʉra.
w93 15/4 17 parr. 12
Warrara, ¿sãwũã bakĩrãpanʉ?
12 Jʉraibara akʉza igaraibara yi kayiruata. (Salmo 97:10.) Mamina, ¿sãwũã jʉraseapanʉ dayirãba kʼãrẽ kãgabʉra? Krĩchaseabʉ kʼãrẽta berabariseabʉta maʉ̃ta ora. «Jʉra kʼawuabara, Daizezera mia kʼaia yi sewabi ẽ. Nekʼãrẽ yumakẽrãba ubʉra akʉza maʉ̃ta jẽda jʉrepeyi. Ẽbẽra abaʉba krĩchabʉbʉrʉ iyi yaraba kãgabʉta oita, maʉ̃neba nemitiata zeyi». (Gálatas 6:7, 8.) Nekʼãrẽ mitia oita krĩchabʉrʉde krĩchara saʉ̃ta audre yibia bʼaita, adewara Jeowa kʼãrẽaba sopuabita. (Naʉ̃ testoʉ̃me akʉra Salmo 78:41.) Adewara krĩchara nemitia oda tẽã kʼãrẽta ũduseabʉta. Bʉa wũãwũã kãga ẽ basimina biogo beseabʉ, kaya kayiruata ũduseabʉ, bari jaraita, sidata. Adewara bʉa bia krĩcha ẽ bʉrʉ mawũã nemitia oda kʼarea krĩchaseabʉ bʉara jõma bia oẽãta akʉza zeri ẽãta, adewara maʉ̃ bedʼea zroma ũdudara mesera taʉ ẽ bayi. Mebẽã wẽrã abaʉba jarasi: «Dai yi ũdukʼawuai nããra dai aba abaka daiba ẽbẽra kãgabʉme kʼãĩpanasi. Maʉ̃ kʼarea atiara bedʼea zromata erpanʉ akʉza yi jiwapanʉ Daizeze ode panʉmina». Adewara kĩrãbeibara bʉa mawũã nemitia oda kʼarea kongregasioneba ãĩ wãseabʉta. Mawũã ẽ bʉrʉ bʉa pribilegio erbʉta aduaseabʉta. (1 Corintios 5:9-13.) Yibia ẽ bayi bari daya nekʼãrẽ kãgabʉta oi kʼarea zʉbʉriaira.
Jʉrʉda nekʼãrẽ biʼia bʉta Daizezedebemata
Ĩjãra Daizeze Bedʼeaba jarabʉra wãrĩnuta
8 Dayirãra Jeowa odepanʉ baera ĩjãpanʉ Jeowaba jarabʉra wãrĩnuta akʉza iyara dayirã bia wãmarẽã kãgabʉ (Sal. 31:5; Is. 48:17). Dayirãba ĩjãpanʉ Daizeze Bedʼeaba jarabʉra iya jarabʉra wãrĩnu baera (akʉra Salmo 119:160). Dayirãra abarika krĩchapanʉ Daizeze Bedʼea ʉ̃rʉ estudiabʉba jarada kĩrãkʼa: «Daizeze Bedʼeaba jarabʉra sewida ẽãta akʉza wãrĩnu aripe berabarita»
30 DICIEMBREDEBA–5 ENEROBAYEDA
BEDʼEA BIA DAIZEZE BEDʼEADE ŨDUDATA SALMOS 120-126
Sopʉade neusida mamina sobia ne u jurepesida
w04 1/6 16 parr. 10
Daizezeare panʉra mejãcha sobiapanʉ
10 Dayirãta Jeowa ode wãbʉrʉdera ũdubipanʉ Diaruare panʉ ẽãta. Santiago 4:7ba jarabʉ: «Jʉraidua Diarura [...] mawũã iyira wãñi maraneba». Mamina dayirãitara biode zare ẽ Diaruba kãgabʉ oira, maʉ̃ba zarea odaibara Jeowaba zokʼabʉde aripe odaita (Lucas 13:24). Daizeze Bedʼeade dayirãʼa jarabʉ Salmo 126:5de dayirãba nekʼãrẽ jõma opanʉbʉrʉ Daizezeba zokʼabʉta aripe oita Jeowabara dayirãʼa nekʼãrẽ bia diata. Jeowabara akʉbʉ dayirãba kʼãrẽ obʉra adewara jarabʉ iyi jʉrʉbʉara nebia diaita (Hebreos 11:6).
Bʉara kʼãrẽaba soiduba zarea ĩjãita
17 ¿Bʉra mejãcha zʉbʉriabʉka bʉ mebẽrãnebemata beisi baera? Ewari jʉrʉda audre soiduba ĩjãita beidarãra jẽda piradrʉita. Daizeze Bedʼeade akʉra ẽbẽrarã jẽda piradrʉkʉadara ʉ̃rʉ. ¿Mejãcha krĩcha obʉka bʉ mebẽrãnebemata aba wua Jeowa ʉ̃rʉ Kʼawuabibari ẽ baera? Estudiara akʉita Daizezeba kʼẽãbʉra audre yibiata. Badu bedʼea zroma ũdubʉba maʉ̃ne zarea ora audre soiduba ĩjãita. Bʉ sodebʉta jõma jarada Jeowaʼa akʉza abapai barãra, awuarabʉrʉ mebẽrã kongregasionebemara kʼawa bara (Prov. 18:1). Nekʼãrẽ ora wuabemarabawara, daʉbade oibaramina (Sal. 126:5, 6). Ewariza ãba yi jʉrebara, jaradia wãbara akʉza Daizeze Bedʼeasi akʉra. Akʉza akʉbara Jeowaba ʉ̃ra zeide bʉa nebia diakĩrãbʉta. Bʉa akʉbʉde Jeowaba sãwũã kʼareba wãta, maʉ̃ba audre ĩjã wãñi.
w01 15/7 18, 19 parr. 13, 14
Nebia obʉta idubʉda ẽ baibara
13 Salmistaba nebʉrasi ne ui ʉ̃rʉ akʉza maʉ̃ ne u jʉrepei ʉ̃rʉ, mawũã biʼia audre jara ũrĩbita Jeowaba sãwũã biʼia akʉsita akʉza sãwũã nebia diasita israelitara Babilonianeba ẽdrʉdaraʼa (Salmo 126: 5, 6). Maʉ̃ra israelitarãra mejãcha sobiapanasi ãyita ẽdrʉsida baera. Mamina ãyara bedʼea zroma ũdusida, ãyi pʉwʉrʉde ne u ẽã 70 poaga basi baera ne uira zarebasi, maʉ̃ kʼarea jẽgasida ãyira. Mamina mawũãsidu naʉ̃ra israelitarabara ne upanʉta idubʉda ẽ basi akʉza ãyi pʉwʉrʉ jẽda parãnʉmʉta idubʉda ẽ basi, maʉ̃ kʼarea nebiata ũdusida.
14 Dayirãba nebia obʉ kʼarea bedʼea zroma ũdubʉrʉdera mejãcha zʉbʉriaseapanʉ akʉza jẽgaseapanʉ maʉ̃ kʼarea (1 Pedro 3:14). Maʉ̃ kʼarea nawedara daya krĩchaseabʉ bari zʉbʉriabʉta, daya nebia onʉmʉmina ũdu ẽ baera maʉ̃ba kʼãrẽne kʼarebanʉmʉta, mamina dayirãba bedʼea zroma ũdubʉidu israelitarane kĩrãkʼa nebia obʉta idubʉda ẽ bʉrʉ, Jeowaba dayirãba jʉ̃ã ẽãne nebiata diayi (1 Corintios 3:6).
Jʉrʉda nekʼãrẽ biʼiabʉta Daizezedebemata
cl 73 parr. 15
Daizezera dayirã mĩrʉbari akʉza zarea barabʉ dayirã kʼarebaita
15 Jeowabara iyi pʉwʉrʉdebemata jõmaʉ̃ta kʼarebabʉ. Iya mawũã oẽ basibʉrʉ Diarubara jõbikasi iyi ode panʉrãra. Diarura naʉ̃ drʉadebema nokʼo baera kãga ẽ ẽbẽrarãba Jeowaba zokʼabʉta odamarẽã, maʉ̃ba jõma jõbikĩrãbʉ (Juan 12:31; Apocalipsis 12:17). Nokʼorabara kãgada ẽ Daizeze Bedʼeata jaradiamarẽã, maʉ̃ba ãyara taʉbikĩrãbʉ Daizeze Bedʼea jaradiapanʉra. Mawũãsidu dayirãbara wuabema ẽbẽrarã jaradiabʉ. Naʉ̃ra nokʼoraba Jeowa ode panʉrata taʉbiauda ẽ bʉrʉ naʉ̃ba ũdubibʉ Jeowaba wãrĩnu kʼarebabʉta (Salmo 17:7, 8).