Referencia karta Nekʼawuabari baita Kristianora kĩrãkʼa akʉza trajaita Daizezeita
© 2024 Watch Tower Bible and Tract Society of Pennsylvania
2-8 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA SALMOS 79-81
Jeowa trʉ̃a kãga ʉ̃dubira
w17.02 9 parr. 5
Ẽdrʉbita: nebia Jeowaba bari diaida
5 ¿Sãwũã ũdubipanʉ Jeowa trʉ̃a wawia ũdubipanʉta? Dayirãba nekʼãrẽ obʉdeba. Daizezebara jʉ̃ãbʉ dayirãra neneẽã panamarẽã (akʉra 1 Pedro 1:15, 16). Maʉ̃ kʼarea dayirãbara Jeowa abapaiʼabʉrʉ yiwidʼipanʉ akʉza soidʉba opanʉ iya nekʼãrẽ omarẽã zokʼabʉta. Jeowaba ley diabʉta ũrĩpanʉ akʉza Daizeze Bedʼeadebemaba jarabʉta opanʉ ẽbẽrarãba maʉ̃ kʼarea pewãpanʉmina. Dayirãba nekʼãrẽ bia obʉba ũdubibʉ kʼaita dayirãta akʉza Jeowa trʉ̃ ʉ̃rʉ ibia bedʼeabibʉ (Mat. 5:14-16). Dayirãra neneẽã panʉ baera dayirã sãwũã bʉdeba ũdubipanʉ Jeowaba nekʼãrẽ omarẽã zokʼabʉra jipade yibiata akʉza ũdubipanʉ Diarura sewa nebʉrʉ omiata. Wãrĩnubaira dayirãra nemitia omiara, mamina maʉ̃ mawũã obʉrʉdera soidʉba jẽda krĩchapanʉ, mõbe jẽda oda ẽ nekʼãrẽ Jeowa ʉ̃rʉ imitia bedʼeabibʉta (Sal. 79:9).
ijwbv 3 parr. 4, 5
Romanos 10:13 | «Jeowa trʉ̃ jarabʉrʉra»
Daizeze Bedʼeade jarabʉrʉde Jeowa trʉ̃ jarabʉrʉra, naʉ̃bara bari jarakĩrãbʉ ẽ kʼawuaibarata saʉ̃ta Daizeze trʉ̃ta akʉza yiwidʼibʉrʉde maʉ̃ trʉ̃ta zokʼaita (Salmo 116:12-14). Jarakĩrãbʉ maʉ̃ awuara ĩjãibarata Daizeze ʉ̃rʉ akʉza iyaʼa kʼareba widibarata (Salmo 20:7; 99:6).
Daizeze trʉ̃ta Jesúsʼitara jipade yibia basi. Iya sãwũã yiwidʼibara ʉ̃rʉ yiza amaenane naʉ̃ta jarasi: «Zeze ʉ̃tʉbema, bʉ trʉ̃ra neneẽã baide bʉa» (Mateo 6:9). Adewara Jesúsba jarasi dayirãta ewari jõmaʉ̃nẽ bakĩrãpanʉbʉrʉ ũdukʼawuaibarata, ũrĩbarata akʉza kãgaibarata ẽbẽra maʉ̃ trʉ̃ erbʉta (Juan 17:3, 6, 26).
Jʉrʉda nekʼãrẽ biʼiabʉta Daizezedebemata
it-2 127 parr. 5
José
José trʉ̃ta yizroma babibʉ. Jacob wũãwũãranebemara Joséta audre bia akʉpanasi. Maʉ̃ kʼarea jipade yibia basi tribu Israeldebemara ʉ̃rʉ bedʼeabʉrʉde iyi trʉ̃ta zokʼaita (Sl 80:1) Mawũã ẽ bʉrʉ iyi trʉ̃ta zokʼapanasi 10 tribu ʉ̃rʉ bedʼeaita. (Sl 78:67; Am 5:6, 15; 6:6.)
9-15 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA SALMOS 82-84
Bia akʉra bʉa pribilegio erbʉra
wp16.6 8 parr. 2, 3
Kʼãrẽta kʼawuapanʉ ibanaraneba
Ẽbẽrarã Jerusalénʼnebemarabara biʼia ũdukʼawuapanasi ibana zake golondrinara. Naʉ̃ ibana zakera ẽbẽrarã deda de obasi, adewara templodebida de opanasi. Ãyira poagaza mama wãbasibaibara, mama ãyi wũawũã zakera dapʉeira neida berabari ẽ basi baera.
Salmo 84 bʉdara templode trajabasi 6 jedeko babʉrʉza semana aba, mamina iyira golondrinara kĩrãkʼa bakĩrãbasi, naʉ̃ra golondrinarãra ewari jõmaʉ̃nẽ Daizeze deda panasi baera. Iya jarasi jipade kãgata Jeowade tabernakulora akʉza soidʉba bakĩrãbʉta maʉ̃ deda (Salmo 84:1-3). Dayirãra dayirã mebẽrabawara, ¿Soidʉba wãkĩrãpanʉka ãba yi jʉrebariedara? akʉza ¿biʼia akʉpanʉka naʉ̃ probilegiora? (Salmo 26:8, 12).
w08 15/7 30 parr. 3, 4
Dayirãba kʼãrẽ oseabʉ ʉ̃rʉ krĩchaiba kʼarebayi sobia bʼaita
Bʉta zõnabasi baera, mawũã ẽ bʉrʉ kayabʉ baera akʉza wũãwũã barabʉ baera, edaʉde zareabʉbaibara bʉa kãgabʉ kĩrãkʼa audre oita Jeowa kʼarea. Edaʉde bʉa aukara krĩchanʉmaseabʉ bʉa kʼãrẽ obe ẽã ʉ̃rʉ krĩchaikʼaude bʉa kʼãrẽ oseabʉ ʉ̃rʉ.
Bʉ kĩrãkʼa berabarisi lebita aba Israeldebemata. Iyira poagade semanaʉ̃me trajabasi templode. Mawũasidu iyira ewari jõmaʉ̃nẽ trajakĩrãbasi mama, maʉ̃ra yibia baera. Mamina iyara obe ẽ basi maʉ̃ra (Sal. 84:1-3). ¿Kʼãrẽba kʼarebasi iyi maʉ̃ kʼãrẽa aukara krĩcha zroma oẽ baita? Krĩchaiba Daizeze templode ewari aba trajabʉbʉrʉ, maʉ̃ra pribilegio biata ewari aba basimina (Sal. 84:4, 5, 10). Maʉ̃ kĩrãkʼa dayirãbida zarea oibara audre krĩchaita dayirãba atia kʼãrẽta oseabʉta Jeowa kʼarea, mawũã krĩcha ẽã dayirãba kʼãrẽta obe ẽã ʉ̃rʉ.
w20.01 17 parr. 12
Daizeze Jeowaitara dayirãra nebia
12 Dayirãta kayapanʉbʉrʉ kʼawuapanʉ Jeowabara biʼia kʼawuabʉta dayirã maʉ̃ne berabarinʉmʉta. Iyaʼa wididadrʉ kʼarebamarẽã dayirã bedʼea zromane berabarinʉmʉmina akʉita kʼãrẽ nebia erbʉta. Daizeze Bedʼeata akʉdaibara akʉza jʉrʉibara saʉ̃ testode jarabʉta Jeowaba dayirã kʼãrẽãba kãgata. Dayirãta Jeowaʉ̃me kʼẽrẽpabʉbʉrʉ iyara bia akʉyi (Sal. 84:11).
Jʉrʉda nekʼãrẽ biʼiabʉta Daizezedebemata
it-1 1183 parr. 2
Jẽrãmara
Kristiano wãrĩnuarara ũdukʼawuade ãya jẽrãmarara akʉza pẽdrara sãwũã so zʉbʉria ũdubibʉ kʼarea. Santiagoba naʉ̃ra kristianora ʉ̃rʉ naʉ̃ta jarasi: «Daizezebara kãgabʉ jaigʉa neẽã iyaʼa yiwidʼidamarẽã kʼãwũã: jẽrãmara akʉita akʉza pẽdrata ãyi zʉbʉriabʉrʉde adewara naʉ̃ drʉaba nekayirua obʉ kĩrãkʼa oẽã». (Snt 1:27.)
16-22 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA SALMOS 85-87
Yiwidʼiba kʼarebabʉ bedʼea zroma awuantaita
w12 15/5 25 parr. 10
¿Bʉa ũdubibʉka Jeowaba nebia erbʉta?
10 Dayirãba Jeowaba nebia erbʉ ũdubira nesidapanʉ Daizeze Bedʼeaba ũrãga diabʉ ũrĩta naʉ̃ bedʼeata: «Badua yiwidʼipanaidua» (Rom. 12:12). Maʉ̃ba Jeowaʼa widiseapanʉ kʼarebamarẽã iya kãgabʉ kĩrãkʼa yiwidʼidaita iyaʼa. Yibia bayi dayirã yiwidʼibʉrʉde iyaʼa widita iyi jaure zareata. Dayirãba ĩjãbʉta audre zarea babimarẽã akʉza zarea diamarẽã yikayirua oita zebʉrʉde yi edebi ẽ baita. Adewara iyi Bedʼeata audre bia zokʼa kʼawuaita (2 Tim. 2:15; Mat. 6:13; Luc. 11:13; 17:5). Wũãwũã zakerabara mejãcha ĩjãpanʉ ãyi yibari ʉ̃rʉ, abarika dayirãbida ĩjãibara dayirã Zeze ʉ̃tʉbema ʉ̃rʉ. Dayirãba iyaʼa widibʉdade kʼarebamarẽã iya zokʼabʉta soidʉba oita, ĩjãibara iya maʉ̃ bedʼeara panʉita. Dayirãbara krĩcha ẽ baibara dayirãba Jeowa kʼãrẽ jarabʉ kʼarea iyira kĩrʉita, iyira mia kʼãrẽsida mama krĩcha ẽ baera. Dayirãra iyaʼa yiwidʼiseabʉ iyi ʉ̃rʉ ibia bedʼeaita, iyaʼa biga diaita akʉza kʼareba widita dayirãba bedʼea zroma ũdubʉ awuantaita. Adewara widiseapanʉ kʼarebamarẽã dayirãba nekʼãrẽ iyi kʼarea obʉdeba iyi trʉ̃ ʉ̃rʉ ibia bedʼeabita (Sal. 86:12; Sant. 1:5-7).
Jeowabara sãwũã panʉbʉ dayirã yiwidʼira
17 (Akʉra Salmo 86:6, 7). Davidbara krĩchabasi Jeowabara wãrĩnu panʉbʉta yiwidʼira, abarika dayirãbida wãrĩnu ĩjãseapanʉ. Naʉ̃ artikulode ũdusida yiza biarata bio, naʉ̃ra yizaba ũdubibʉ Jeowabara diaseabʉta buru biata akʉza zareata dayirãba nesidabʉ awuantaita. Iya zokʼaseabʉ mebẽrã kongregasionebemarata akʉza ẽbẽrarã iyi ode panʉra ẽãta dayirãta kʼarebamarẽã.
18 Jeowaba dayirã yiwidʼi dayirãba kãgabʉ kĩrãkʼa panʉ ẽ mina, kʼawuabʉ iyara panʉita dayirã yiwidʼira. Iyara diayi dayirãba nesidabʉde akʉza dayirãba nesidabʉ ewaride. Wãrĩnu yiwidʼidaibara akʉza ĩjãbaibara Jeowaba idi ewade akʉita dayirãra akʉza ʉ̃ra zeide «zokʼaibʉra nekʼãrẽ jõma kãgabʉta [diayi]» (Sal. 145:16).
Jʉrʉda nekʼãrẽ biʼiabʉta Daizezedebemata
it-1 551 parr. 5
So
Soidʉba oita Jeowaba zokʼabʉta. Dayi soara bia bʼaira jõma bia baibara, jʉ̃zaba ãrĩbʉbʉrʉ mawũãra zeri ẽ bayi. Mamina ababema sora aba zeri ẽ bʉrʉ, maʉ̃bara kʼãrẽ ẽ. Davidba Jeowaʼa jarasi: «Mʉ̃ so abapai babira bʉ trʉ̃ wawiaita». Naʉ̃ba ũdubibʉ dayi sora ẽzadra dra baseabʉta, dayi sodeba nebia oita krĩchaseabʉ, maʉ̃ daʉcha nemitia oisida krĩchaseabʉ. (Sl 86:11.) Mawũã dayi so ẽzadra dra bʉba Jeowaba zokʼabʉra dayirãbara okĩrãne oẽ soidʉba. (Sl 119:113; Rev 3:16.) Adewara dayirã soba sewaseabʉ, daya jaraseabʉ nekʼãrẽ oita mamina wãrĩnubaira, awuru kʼãrẽta oita krĩchanʉmʉ. Maʉ̃ta neẽ bʉrʉ nokʼo ũmeba jarabʉta daʉcha okĩrãbʉ. (1Cr 12:33; Sl 12:2, nota). Jesúsbara kãga ẽ basi mawũã sewakʉadaira. (Mt 15:7, 8.)
23-29 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA SALMOS 88, 89
Jeowa Nokʼora audre yibia
w17.06 28 parr. 5
Ũdubira wãrĩnu ĩjãbʉta Jeowabʉrʉ bia zokʼaseabʉta
5 Adewara kʼawuapanʉ nekʼãrẽ awuru kʼãrẽabida jaraseapanʉta Jeowabara bia zokʼaseabʉta. Iyara daucha zokʼabʉ. Jeowaba jarabʉ iyara nekʼãrẽ obʉrʉdera daʉcha okĩrãta (Jer. 9:24). Iyideba zebʉ nekʼãrẽ daʉcha oira, maʉ̃ kʼarea Jeowaba nei kʼãwũã oibarabʉrʉ kʼãrẽa akʉira neẽ ley yumakẽrãraba odara. Jeowaba ẽbẽrarã ley diadara jõma daʉcha bʉ. Daizeze Bedʼeaba jarabʉ nekʼãrẽ jõma Jeowaba obʉra jõma aripe obʉta iyita mawũã chʉ baera. Maʉ̃ba dayirãba ĩjãseabʉ Jeowaba ley diabʉta akʉza Daizeze Bedʼeade bʉra akʉza iya nekʼãrẽ oita jidabʉra jõma daucha bʉta (Sl. 89:14; 119:128). Diarubara jarabʉ Daizeze Jeowabara jõma bia zokʼa ẽãta. Mamina dayirãba akʉpanʉ iya zokʼabʉra jõma daʉcha oẽãta.
w17.06 29 parr. 10, 11
Ũdubira wãrĩnu ĩjãbʉta Jeowabʉrʉ bia zokʼaseabʉta
10 Jeowabara jõma bia zokʼabʉ yãrãta zʉbʉria oẽ akʉza ewari jõmaʉ̃nẽ iya jarabʉta omarẽã kãgabʉ ẽ. Ẽbẽrarã Jeowa juwa edre bʉra sobiapanʉ akʉza sentipanʉ Jeowaba iduaribibʉta ãya kʼãwũã jidamarẽã kʼãrẽ oita (2 Cor. 3:17). Davidba jarasi dayirãra Jeowaʉ̃mera mejãcha sobiabʉta (1 Crón. 16:7, 27). Adewara salmista Etánba jarasi Jeowa pʉwʉrʉra mejãcha sobiabʉta Jeowaba zokʼabʉ baera (Sal. 89:15, 16).
11 Dayirãba biʼia krĩchapanʉbʉrʉ Jeowaba kʼãrẽ nebia ozebʉrʉ ʉ̃rʉ, kʼarebayi dayirãba audre ĩjãita Jeowaba audre bia zokʼaseabʉta. Mawũã odara, dayirãsida salmista kĩrãkʼa krĩchadayi audre yibiata Daizeze deda bʼaita jãpe bʼaira (Sal. 84:10) Jeowaba dayirãta parãsi baera biʼia kʼawuabʉ dayirãba kʼãrẽta nesidabʉta. Maʉ̃ba iya dayirã nekʼãrẽra soidʉba diabʉ. Jeowaba dayirã nekʼãrẽ omarẽã jarabʉra maʉ̃ra dayirã biaita. Maʉ̃ta dayirãba ũrĩbʉbʉrʉ bia wãñi ewari jõmaʉ̃nẽ, edaʉde maʉ̃ oita zareabʉmina (akʉra Isaías 48:17).
w14 15/10 10 parr. 14
Jipa ĩjãra Daizeze Nokʼo ʉ̃rʉ
14 Bedʼeabʉ Davidʉ̃me bedʼea abarika zedata (akʉra 2 Samuel 7:12, 16). Maʉ̃neba Jeowabara jarasi Davidʼa dayirãra ẽdrʉbibarira iyideba zeita (Luc 1:30-33). Mawũã dayirã zokʼaibarara zeibasi Davidʼdeba (Ezeq. 21: 25-27). Daizeze Bedʼeaba jarabʉ: «Iyideba zedara ewari jõmaʉ̃nẽ bayi, iyi nokʼora mʉ̃ nãã ewari jõmaʉ̃nẽ bayi ũmadaʉ kĩrãkʼa» (Sal 89:34-37). Maʉ̃ra mawũã berabariyi Jesúsdeba. Jesúsba zokʼa jʉ̃drʉbʉrʉdera neẽ bayi kʼãrẽ kayiruara akʉza iya obʉra ewari jõmaʉ̃nẽ bayi.
Jʉrʉda nekʼãrẽ biʼiabʉta Daizezedebemata
cl 281 parr. 4, 5
Bʉabʉrʉ kãga jõka ũdubibʉ
4 Escrituras Hebreasde leal (kãga jõka) abʉbara jarakĩrãbʉ ẽbẽra abaʉba awuru ẽbẽraba bia edabʉta akʉza iyi kʼawa bʉta maʉ̃ ẽbẽrata kãgabʉ baera. Maʉ̃bara jarakĩrãbʉ ẽ bari fielta (kʼẽrẽpata) ẽbẽra aba fiel baseabʉ iyita mawũã baibara baera, mamina nama Daizeze Bedʼeade leal abʉbara jarakĩrãbʉ ẽbẽra abaʉba awurua lealtad ũdubibʉrʉdera maʉ̃ ẽbẽrabara mawũa ũdubibʉta maʉ̃ ẽbẽrata kãgabʉ baera. Bari jaraita, Salmo 89:37de jarabʉ jedekora fielta iyira diamasiza ʉ̃tʉzebʉ baera, mamina dayirãbara jarabeda ẽ iyira lealta. ¿Kʼãrẽa? Iyi leal bamarẽãra kãgata ũdubibara baera, mamina jedekobara ũdubi ẽ maʉ̃ra, iyira zokʼaibʉ ẽ baera.
5 Pʉsa marasara wãpe zebʉ, mamina lealtadʼra mawũã bʉ ẽ. Awuarabʉrʉ ẽbẽra abaʉba ũdubibʉbʉrʉ iyira lealtadʼta, mawũã ẽ bʉrʉ kãga jõka ũdubibʉta, maʉ̃ ẽbẽrarã yi ababema ẽbẽraʉ̃me bedʼea zroma ũdusimina maʉ̃me kʼẽrepabʉ.
30 SEPTIEMBREDEBA-6 OCTUBRE EDA
BEDʼEA BIA DAIZEZE BEDʼEADE ŨDUDATA SALMOS 90, 91
Jeowa ʉ̃rʉ ĩjãra ewari jõmaʉ̃nẽ bʼaita
wp19.3 5 parr. 4
Jʉrʉpanʉ dayi sãwũã dããra bʼaita
Moisésba bedʼeata jarasi, iya maʉ̃ bedʼea jaradara 3.500 poagaba. Iya jarasi: «Dayirã ewarirabʉ poaga 70 akʉza zareaba babibʉ poaga 80, biode trajapanʉ akʉza zʉbʉriapanʉ; mesera berabaribʉ baera akʉza wãbaripanʉ» (Salmo 90:10). Ẽbẽrarãbara nekʼãrẽ mejãcha ozebʉrʉ mawũã mesera zona ba ẽ baita akʉza ewari dããrã baita, mawũãsidu dayirãra Moisésba jarada ewaridupai jʉ̃ẽpanʉ.
wp19.1 5, rekuadro
¿Kʼaita Daizeze trʉ̃ta?
¿Kʼaiba parãsi Daizezera?
Daizeze Bedʼeaba jarabʉ Daizeze ʉ̃rʉ: «Katuma ʉ̃tʉ zei naweda akʉza drʉa parãi naweda, bakikibarisi akʉza bakikibariyi bʉra Daizeze» (Salmo 90:2). Maʉ̃ba Daizezera ewari jõmaʉ̃nẽ bakikibari akʉza nekʼãrẽ jõma bʉra Jeowaba parãna (Revelación [Apocalipsis] 4:11).
Jeowa kãgabara kʼarebabʉ perabia yi edebi ẽ baita
16 Diarubara kʼawuabʉ dayirãbara mejãcha kãgata dayi bebʉra, maʉ̃ kʼarea iya jarabʉ dayirãbara nekʼãrẽ baduta oita dayi bebʉ zokʼai erbaita adewara idubʉseabʉta Jeowa neũdukʼawua bʼaita (Job 2:4, 5). Mamina iya jipa aña krĩchabʉ, Diarura zarea barabʉ baera dayirã beaita, iyara maʉ̃ta zokʼabʉ dayirã daʉperaita akʉza Jeowadeba jĩga babita (Heb. 2:14, 15).Maʉ̃ kʼarea Diarubara edaʉde zokʼabʉ ʉ̃kʉrʉ ẽbẽrata, dayirã jaramarẽã dayirãba Daizeze ĩjãbʉta idubʉ ẽ bʉrʉ beadaita adewara dayirã mejãcha kayabʉdera Diarubara obʉ medikorata akʉza dayirã mebẽrã Jeowa odepanʉra ẽãta dayirã ʉ̃rʉ bamarẽã wata kẽgʉde bʉemarẽã. Mawũã ẽ bʉrʉ Diarubara dayirã kayabʉdera obʉ ʉ̃kʉrʉ ẽbẽraneba daya jaramarẽã, jʉrʉmarẽã sãwũã beita, maʉ̃ra Daizezeba kãgabʉde bʉ ẽ mina.
17 Dayirãnebemara mia kʼaita beiamapanʉ, mamina beidara kʼawuapanʉ Daizezebara iyi krĩchade erbaita akʉza dayirãra kãga bʼaita (akʉra Romanos 8:37-39). Jeowaitara iyi neũdukʼawua beibʉrʉdera iyi burude zokʼaibʉ kĩrãkʼabʉ (Luc. 20:37, 38). Maʉ̃ kʼarea Jeowabara ñabasea jẽda piradrʉbikĩrãbʉ (Job. 14:15). Jeowabara iyi warrata beibisi dayirã bari, mawũã dayirãta ewari jõmaʉ̃nẽ panamarẽã (Juan 3:16). Dayirãbara biʼia kʼawuapanʉ, Jeowabara kʼãrẽaba kãgabʉta akʉza akʉkĩrãbʉta dayirãra, maʉ̃ kʼarea kayabʉdera adewara pẽwãpanʉnera jĩgara wã ẽ iyideba, awuarabʉrʉ jʉrʉpanʉ iyi kʼarebata. Dayirã diamarẽã zowaĩnĩgʉata akʉza aduʼa babimarẽã. Maʉ̃ta osida Valeria akʉza yi kimaʉ̃meba (Sal. 41:3).
Jʉrʉda nekʼãrẽ biʼiabʉta Daizezedebemata
¿Bʉka angel aba dayirã aba abaka akʉbarita?
Jesúsba jarasi: «Kaʉbaidʉa za wĩkakidera bia akʉ ẽ baita, mʉ̃a maraʼa jaraya angelerabara ʉ̃tʉra akʉpanʉta mʉ̃ Zeze kĩrãra» (Mateo 18:10). Maʉ̃bara jarakĩrãbʉ ẽ dayirãbara angel aba erbʉta dayirã akʉbarita. Awuarabʉrʉ Jesúsbara jarakĩrãkʉasi naʉ̃ra angelerabara kristiano jõmaʉ̃ta kʼarebakĩrãbʉta. Maʉ̃ba kristianorabara nekʼãrẽ oda ẽ ãyita krĩña neida berabarimarẽã, maʉ̃ne angeleraba ãyita kʼarebadamarẽã.
¿Naʉ̃ba jarakĩrãbʉka angelerabara dayirãra kʼareba ẽãta? Mawũã ẽ (Salmo 91:11). Ʉ̃kʉrʉ ẽbẽrabara krĩchapanʉ Daizezebara angeleraneba kʼarebabarita. Jeowa ʉ̃rʉ Kawuabipanʉrãbara ũdupanʉ sãwũã angeleraba kʼarebabʉta Daizeze Bedʼea jaradiabʉrʉde. Mamina dayirãba angelerã ũduda ẽ baera, aripe kʼawua jarabeda ẽ Daizezeba sãwũã zokʼabʉta angelerãra ẽbẽra kʼarebaita. Mamina dayirãbara Jeowaʼa biga diaibara krĩchapanʉbʉrʉ iya kʼarebasita maʉ̃ra angeleraneba (Colosenses 3:15; Santiago 1:17, 18).
7-13 OCTUBREBAYEDA
BEDʼEA BIA DAIZEZE BEDʼEADE ŨDUDATA SALMOS 92-95
Jeowaba zokʼabʉ oira audre yibia
w18.04 26 parr. 5
Warrara, ¿Daizezedebema audre oita krĩchapanʉka?
5 Bʉara nekʼãrẽ Daizezedebema audre oita krĩchaibara biga diaita Jeowaba bʉa kãga ũdubibʉ kʼarea akʉza iya nekʼãrẽ ozebʉrʉ kʼarea bʉbari. Yumakẽrã Daizeze ode bʉba jarasi yibiata Jeowaʼa biga diaita iya dayirãbari nekʼãrẽ mejãcha ozebʉrʉ baera (Sal. 92:1, 4). Warrara krĩchaidʉa Jeowaba marabari kʼãrẽta ozebʉrʉta. Iya maraʼa diasi bebʉta, iyita ũdukʼawuabisi, wãrĩnu ʉ̃rʉ kʼawuabisi, Daizeze Bedʼeata diasi, adewara mebẽrã kongregasionebemata akʉza nebiata jʉ̃ãbibʉ ʉ̃ra zeide. Bʉa nekʼãrẽ Daizezedebemata nããra obʉbʉrʉ, mawũãra bari ũdubi ẽ bayi bʉara biga diabʉta Jeowaʼa, awuarabʉrʉ bʉra iyi neũdukʼawua bia bayi.
w18.11 20 parr. 8
¿Kʼaiba ara obʉ dayirã sãwũã krĩchabʉra?
8 Zeze biaba yi wũãwũãra bia wãmarẽã kãgabʉ kĩrãkʼa Jeowabida kãgabʉ dayirãra bia wãmarẽã (Is. 48:17, 18). Maʉ̃ kʼarea Daizeze Bedʼeadeba jaradiabʉ sãwũã baibarata akʉza sãwũã edaibarata wuabemarata. Jeowabara kãgabʉ dayirãba iyi kĩrãkʼa krĩchadamarẽã akʉza iya nebia erbʉta ũdubidamarẽã. Maʉ̃ kʼarea, ¿jaraseapanʉka Jeowabara iduaribi ẽãta dayirãkʉzaʉba krĩchaita? Mawũã ẽ, awuarabʉrʉ kʼarebabʉ audre bia krĩchadamarẽã dayirãba (Sal. 92:5; Prov. 2:1-5; Is. 55:9). Jeowabara kʼarebabʉ dayirãba nekʼãrẽ jidabʉrʉde maʉ̃ba sobiabamarẽã. Akʉza edaʉde iya idaribibʉ dayirãba nekʼãrẽ jidaibarade dayirãkʉzaʉba krĩchamarẽã kʼãrẽta oita (Sal. 1:2, 3). Maʉ̃ba jaraseapanʉ dayirãta Jeowa kĩrãkʼa krĩchapanʉbʉrʉ nebiata ũdudaita.
w20.01 19 parr. 18
Daizeze Jeowaitara dayirãra nebia
18 Dayirã zõna basimina krĩchaibara Jeowabara bia akʉbʉta akʉza zokʼaita iyita kʼãrẽta omarẽã (Sal. 92:12-15). Jesúsba jaradiasi Jeowabara bia akʉbʉta dayirãba nekʼãrẽ obʉra iyita, dayirãba krĩchabʉmina nekʼãrẽ mejãcha obe ẽãta mawũã ẽ bʉrʉ mejãcha kʼawua ẽãta (Luc. 21:2-4). Mawũẽra krĩchadaibara dayirãba oseabʉta. Bari jaradaita, jaradiaseapanʉ Jeowa ʉ̃rʉ, yiwidʼiseapanʉ mebẽrã kongregasionebema ʉ̃rʉ. Adewara so zarea diaseabʉ mebẽrã kʼẽrẽpa bamarẽã. Jeowabara jarabʉ dayirãra iyi kʼarebabarita, mamina mawũã krĩchabʉ ẽ dayirãba kʼãrẽ nebiata obʉ kʼarea awuarabʉrʉ iyi bedʼeata ũrĩpanʉ baera (1 Cor. 3:5-9).
Jʉrʉda nekʼãrẽ biʼiabʉta Daizezedebemata
cl 176 parr. 18
Daizezebara nekʼãrẽ bio okʼawuabʉa
18 Pabloba jarasi Daizeze buru bia ʉ̃rʉ. Iya jarasi: «¡Daizezera biodʼe kʼãrẽ kʼawua bʼʉa, krĩcha kʼawua bʼʉa! ¡Miõba kʼawua ẽã izha oita krĩcha bʼʉra, dazha kʼawua ẽã izha obʼʉra!» (Romanos 11:33). Naʉ̃ testodera Griegodera jarabʉ Daizeze buru biara jogoa zroma daʉkʉrenʉmʉ kĩrãkʼabʉta. Naʉ̃bara Pablobara jarakĩrãbasi Daizeze buru biara bʉa jogoa daʉkʉrenʉmʉma akʉbari kĩrãkʼabʉta, eidura kʼãrẽ ũdu ẽ. Maʉ̃ kĩrãkʼabʉ Daizeze buru biata, dayirãba nekʼãrẽ joma oimina iyide kĩrãkʼa ũrĩ zeita jõma kʼawua ẽ. Adewara dayirãbara kʼawua ẽ bayi jõma Jeowaba kʼawuabʉra (Salmo 92:5). Mawũẽra dayirãra Jeowa nããra kʼãrẽ ẽ kĩrãkʼa bʉ.
14-20 OCTUBREBAYEDA
BEDʼEA BIA DAIZEZE BEDʼEADE ŨDUDATA SALMOS 96-99
Jaradiaidua bedʼea biata
w11 1/3 6 parr. 2
¿Kʼãrẽ bedʼea biara?
Bedʼea biabara jarakĩrãbʉ Jesúsba nama egorode baside jaradiadata, maʉ̃ta iyi kʼaidu panʉraba bʉdata. Jesús ʉ̃ta wãi nãã iyi kʼaidubemara naʉ̃ta zokʼa amaesi: «Wãidua, mõbe mʉ̃nebemata ĩjãnamarẽã jaraidua drʉaza yãrã jõmaʉ̃ʼa. Buru kʼoeidua Daizeze trʉ̃ne, yi Warra trʉ̃ne, jaure bia trʉ̃ne. Jaradiaidua jõma odamarẽã mʉ̃a zokʼadata» (Mateo 28:19, 20). Mawũẽra Daizeze Nokʼo ʉ̃rʉ wuabemara jaradiada awuara zarea odaibara kristianorãra wuabemara ẽbẽrasida Jesús kʼaidu babita.
w12 1/9 16 parr. 1
¿Kʼãrẽta berabari Daizezeba kʼawua oi ewaridera?
Ẽbẽra mejãchaʉba ũrĩbʉrʉde Daizezeba kʼãwua oi ewarita krĩchapanʉ ẽbẽrarã mejãchaʉta Daizeze nãã ãba panʉta Daizezeba kʼawua omarẽã. Ʉ̃kʉrʉra yi nebia odara ʉ̃ta wãita, yi nemitia odara eda wãita. Mamina Daizeze Bedʼeabara mawũã jara ẽ. Daizezeba kʼawua obʉrʉdera jarabʉ naʉ̃ drʉade nemitia bʉta jõbita (Salmo 96:13). Daizezebara jidasi Jesústa Juez bamarẽã. Maʉ̃ba naʉ̃ drʉade ẽbẽrarã jõmaʉ̃ta aduʼa sobia bamarẽã. (Akʉra Isaias 11:1-5; Hechos 17:31.)
w12 15/9 12 parr. 18, 19
Poaga milbayeda aduʼa panañi akʉza maʉ̃neba ʉ̃ta
18 Poaga 1914deba ʉ̃ta Daizeze Nokʼobara ara ojʉ̃drʉsi mawũã Jeowa mebẽrã ʉ̃tʉ bʉta akʉza nama egorode bʉta ãba panamarẽã (Efes. 1:9, 10). Jesúsba mil poagabayeda zokʼabʉrʉde, ũduyi dayirãba idi ewade ũdu ẽ badata. Mawũã mil poaga zokʼabʉta jõbʉrʉdera, ¿kʼãrẽta berabari? Jesúsba jõma zokʼaseabʉmina iyara krĩcha ẽ Jeowaba zokʼabʉta jãrĩta. Maʉ̃ba mil poaga berabʉrʉdera jẽda diayi iya zokʼabadara. Maʉ̃ba Jesúsba nekʼãrẽ jõma obʉra obʉ Jeowa ʉ̃rʉ ibia bedʼeabita (Mat. 28:18; Filip. 2:9-11).
19 Maʉ̃ mil poaga berabariyeda ẽbẽrarã nama egorode bairãra nemitia oka bayi, opanañi Jesúsde kĩrãkʼa, adewara soidʉba Jeowaʼa yi zokʼabidayi. Mil poaga jõna tẽãra ẽbẽrarãbara bedʼeata ũdudayi. Mama ãya ũdubidaibara kʼaiare panʉta (Rev. 20:7-10). Maʉ̃ tẽã, jipa makenañi ẽbẽra kayiruarata akʉza angel kayiruarata. Kʼãrẽ yibia bai maʉ̃ ewarira. Maʉ̃nera Jeowa mebẽrã ʉ̃tʉ bʉta akʉza nama egorode bʉta ãba panañi. Jõmaʉ̃ba Jeowabʉrʉ yiwidʼipanañi (akʉra Salmo 99:1-3).
Jʉrʉda nekʼãrẽ biʼiabʉta Daizezedebemata
it-1 412
Trãbi
Salmone Isaíasde akʉza Revelaciónʼne bedʼeabʉ trãbi yiwidi ʉ̃rʉ. (Sl 33:3; 40:3; 96:1; 98:1; 144:9; 149:1; Isa 42:10; Rev 5:9; 14:3.) Nekʼãrẽ nãã jarabʉba akʉza tẽã jarabʉba ũdubibʉ naʉ̃ trãbi yiwidira trãpanʉta Jeowaba nekʼãrẽ obʉrʉdeba ũdubibʉde iyabʉrʉ bia zokʼaseabʉta naʉ̃ drʉa jõmaʉ̃nẽ. Salmo 96:10ba mawũã ũdubibʉ jarabʉ baera Jeowara nokʼo basita. Naʉ̃ trãbi yiwidiba udubibʉ Jeowara yizromata akʉza Jeowara nokʼo biata ʉ̃tʉbemaraita akʉza nama egorobemaraita. (Sl 96:11-13; 98:9; Isa 42:10, 13.)
21-27 OCTUBREBAYEDA
BEDʼEA BIA DAIZEZE BEDʼEADE ŨDUDATA SALMOS 100-102
Jeowa biga diara iya kãga jõkata ũdubibʉ baera
¿Kʼãrẽta oibara buru kʼoeita?
18 Jeowa kãga ũdubira jipade yibia (akʉra Proverbios 3:3-6). Jeowa kãgabʉba kʼarebayi bedʼea zroma zebʉrʉde awuantaita. Daizeze Bedʼeabara badua jarabʉ Jeowabara iyi odepanʉrãra kãga jõkata ũdubibʉ. Naʉ̃bara jarakĩrãbʉ Jeowabara jipa amae ẽ baita iyi odepanʉrãra akʉza ewari jõmaʉ̃nẽ kãga bʼaita (Sal. 100:5). Daizezebara bʉra iyizade parãsi (Gén. 1:26). ¿Sãwũã ũdubiseabʉ bʉara maʉ̃ kãgara?
19 Nããra Jeowaʼa biga diaibara (1 Tes. 5:18). Ewariza bʉyikʉza widira: «¿Sãwũã ũdubi zebʉrʉ Jeowabara mʉ̃ra kãgabʉta?». Bʉ Jeowaʼa yiwidʼibʉrʉde iyaʼa biga diara akʉza jarada iya bʉ kʼãrẽne kʼarebasita, kʼawuara Jeowabara bʉra mejãcha kãgabʉta, adewara bʉaʼa nebia diakĩrãbʉta, abarika Pabloba kʼawuabada kĩrãkʼa Jeowabara iyira mejãcha kãgabʉta (akʉra Gálatas 2:20). Bʉyikʉza widira: «¿Mʉ̃ara wabida Jeowa kãgabʉta ũdubikĩrãbʉka?». Dayirãba Jeowa kãgabʉba kʼarebayi nemitia oẽ baita, adewara bedʼea zroma zebʉrʉta awuantadayi. Naʉ̃ba kʼarebayi bʉa ewariza Daizezedebema obʼaita adewara Jeowaʼa kãga ũdubi bʼaita ewariza.
«Bia krĩchaidua mõbe ʉrʉma beaidua»
10 Dayirãbara idubʉdaibara audua bedʼeabʉta, itua dobʉta, imitia bedʼeabʉta, neũdukʼawua kayirua erbʉta, ẽbẽra ãkada akʉbʉta akʉza pelikula yõbʉ akʉbʉta (Sal. 101:3). Diarubara jʉrʉbʉ sãwũã ãrĩta dayirã Jeowaʉ̃me neũdukʼawuara (1 Ped. 5:8). Dayirãta jʉra kʼawuapanʉ ẽ bʉrʉ Diarubara dayi krĩchade akʉza sode zebiseabʉ kãgaita wuabemaba erbʉta, sewa nebʉrʉmia bʼaita, yãrãta jʉraita akʉza wuabemaba nemitia obʉrʉde, maʉ̃ta kĩrãdua ẽ marẽã obiseabʉ (Gál. 5:19-21). Dayirãba mawũã krĩchabʉta waña ãĩ bʉeda ẽ bʉrʉ, dayi sode wariseabʉ chirua kayirua kĩrãkʼa akʉza maʉ̃ba bedʼea zromata ũdubiseabʉ (Sant. 1:14, 15)..
w11 15/7 16 parr. 7
¿Ũrĩnaika Jeowaba jʉra kʼawuabamarẽã jarabʉde?
7 ¿Kʼãrẽta opanʉ aña jaradiapanʉ bedʼea ũrĩ ẽ baita? Dayirãbara maʉ̃ra ẽbẽra bedʼea ẽ akʉza dayirã deda zebi ẽ. Adewara akʉda ẽ ãya karta diapanʉta akʉza telebisorde kʼãrẽ sewida jarabʉta ũrĩna ẽ, mia ãya internetʼne kʼãrẽ bedʼea jarabʉta dayirãbida eda panʉ ẽ. ¿Kʼãrẽa mawũã panʉ? Nããra, Jeowata mejãcha kãgabʉ baera. Iyara wãrĩnuta jarabʉ maʉ̃ba ũrĩna ẽ iyi bedʼea ʉ̃rʉ sewida jarabʉra (Sal. 31:5; Juan 17:17). Yi ũmeta, dayirãbara mejãcha kãgapanʉ baera iyi organizasionta, naʉ̃ba dayirã jaradiasi kʼaita Daizeze trʉ̃ra akʉza kʼãrẽta jarakĩrãbʉta, kʼãrẽa pãrãsita naʉ̃ drʉara, sãwũãdogota beibʉrʉdera akʉza beidarãra jẽda piradrʉita. Dayirãba naʉ̃ ʉ̃rʉ ũrĩsidera mejãcha sobiasida, maʉ̃ba dayirãbara kʼãrẽa ũrĩra nesida ẽ apostatara bedʼeara akʉza ẽbẽrarã Jeowa organizasion ʉ̃rʉ imitia bedʼeabʉ bedʼeara. Dayirãba ũrĩnara ãyi bedʼeata ãyi kĩrãkʼa panañi (Juan 6:66-69).
Jʉrʉda nekʼãrẽ biʼiabʉta Daizezedebemata
it-2 629
Pelícano
Naʉ̃ pelícanora mejãcha nekoda tẽãra, wãbʉ miõ neẽmae. Mama poe okerajʉ kʉbawã, akʉza mia kʼãrẽsida pira ẽ. Maʉ̃ba jĩgaʉbara mõgara torro kĩrakʼa ũdubʉ. Iyira dããrabayeda poe pikibʉ, maʉ̃ba salmistabara jarasi iyi sopʉabʉdera naʉ̃ pelícano kĩrãkʼabʉta. (Sl 102:6.)
28 OCTUBREDEBA–3 NOVIEMBREBAYEDA
BEDʼEA BIA DAIZEZE BEDʼEADE ŨDUDATA SALMOS 103, 104
Iya kĩrãbebʉ dayirãra egoro omata
Jeowade kĩrãkʼa ora maya krĩchabʉta oẽãne
5 Jeowa edabʉta krĩchabʉ baera akʉza wuabemara so zʉbʉria akʉbʉta ũdubibʉ baera iya krĩchabʉta jipa oẽ. Bari jaradaita, Jeowaba eda krĩchabʉta ũdubisi ẽbẽrarã Sodomanebema makenaita krĩchaside. Iyi angeleraneba Jeowaba Lotʼa jarasi katumaena mĩrʉ wãmarẽã. Lotʼra mejãcha perabasi baera Jeowaʼa widisi iduaribimarẽã iyita akʉza yi mebẽrãbawara wãita Zóar pʉwʉrʉeda, mamina Jeowaba krĩchabasi maʉ̃ pʉwʉrʉsida makenaita. Maʉ̃ kʼarea Jeowaba jaraseabasi Lotʼara iya jarabʉta jõma omarẽã. Maʉ̃ widi kʼaude iya iduaribisi Lotʼara idu wãmarẽã Zóar pʉwʉrʉeda iya nãã krĩchasimina ẽbẽrarã maʉ̃ pʉwʉrʉdebema makenaita (Gén. 19:18-22). Poaga mejãcha berabarida tẽã Jeowaba so zʉbʉria akʉbʉta ũdubisi ẽbẽrarã Nínivedebemara. Jeowaba zokʼasi Jonásʼa jaramarẽã iya maʉ̃ pʉwʉrʉ ãrĩta akʉza ẽbẽrarã kayirua mamabʉrata makenaita. Mamina ninibitaraba ãya kayirua obada idubʉsida, maʉ̃ kʼarea Jeowaba so zʉbʉria akʉ kʼãrãpe makena ẽ basi maʉ̃ pʉwʉrʉra (Jon. 3:1, 10; 4:10, 11).
Jeowa ʉ̃rʉ ĩjãra Sansónba oda kĩrãkʼa
16 Sansónʼra iya kayirua oda kʼarea zʉbʉriabasimina, idubʉ ẽ basi Jeowaba kãgabʉ oita. Dayirãba kayirua obʉrʉde maʉ̃ kʼarea kʼẽãnara, mawũã ẽ bʉrʉ dayirãba pribilegio erbʉta aduara, zarea oibara Jeowaba kãgabʉta idubʉ ẽ baita. Kĩrãbera Jeowabara kĩrãduakĩrãbʉta bʉa nemitia odata (Sal. 103:8-10). Dayirãba kayirua osimina Jeowaba dayirãra zokʼaseabʉ iya kãgabʉ oita Sansón berabarida kĩrãkʼa.
17 Akʉdaya Michael yizata. Iyara mejãcha kʼarebabasi yi kongregasione, bari jaraita iyira zõrãrã kʼarebabaribasi akʉza yi nãã edebaribasi. Mamina iya nekayiruata osi baera aduasi iyi pribilegiora. Iya jarabʉ: «Mʉ̃a nekʼãrẽ Jeowaita obʉra jõma bia wãbasi, mamina atiaʉde muroma deguebʉrʉ kĩrãkʼasi. Mʉ̃a krĩchakabasi Jeowaba mʉ̃ra idubʉita, mamina krĩcha obasi jẽda iyi neũdukʼawua bʼai kʼarea akʉza mʉ̃ iyita trajaseabʉ kʼawuaita mʉ̃a nãã obada kĩrãkʼa kongregasione».
18 Michaelbara idubʉ ẽ basi Jeowaba kãgabʉ oira. Iya jarabʉ: «Mʉ̃ra zarea osi audre Jeowa neũdukʼawua bia bʼaita, maʉ̃ kʼarea soiduba yiwidʼi jʉ̃drʉsi, Daizeze Bedʼeata akʉ jʉ̃drʉsi akʉza maʉ̃ ʉ̃rʉ krĩchabasi». Ewari berabarida tẽã iyira zõrãrãbasi akʉza yi nãã edebaribasi. Iyara jarabʉ: «Zõrãrã kʼarebadeba mʉ̃a ũdusi Jeowaba mʉ̃ra waidide kãgabʉta, mʉ̃ara akʉza kongregasione jẽda aduʼa obesi Jeowaba zokʼabʉra. Mʉ̃ kʼãwũã berabaridaba mʉ̃aʼa jaradiasi Jeowabara kĩrãduabʉta yi wãrĩnu jẽda krĩchabʉra». Dayirãba kayirua oda kʼarea wãrĩnu jẽda krĩchapanʉbʉrʉ ĩjãseapanʉ Jeowabara dayirãra kʼarebaita akʉza jẽda zokʼaita iya kãgabʉta omarẽã (Sal. 86:5; Prov. 28:13).
Bʉa Daizezeita oita krĩchabʉra oseabʉ
2 Bʉa wabida aripe oẽbʉrʉ bʉa oita krĩchadata, maʉ̃ kʼarea sopʉarãra, dayirãba krĩchada aripe oira zarea odaibara, mamina bʉa Daizezeita audrea oita krĩchabʉba, ũdubibʉ bʉitara Jeowa neũdukʼwua bʼaira audrea yibiata. Maʉ̃ba bʉya oita krĩchabʉra, ora bʉya oseabʉbitapai, mawũã mejãcha krĩcha zroma oẽ baita (Sal. 103:14; Miq. 6:8). Maʉ̃ba bʉa nekʼãrẽ oita krĩchabʉrʉdera, jʉrʉda bʉya oseabʉta. Mamina, ¿kʼareta odaibara daya krĩchada aripe oita? Akʉdaya ʉ̃kʉrʉ ũrãgʼata.
Jʉrʉda nekʼãrẽ biʼiabʉta Daizezedebemata
cl 55 parr. 18
Jeowara zarea barabʉ nekʼãrẽ ʉ̃tʉbemata akʉza egorodebema parãita
18 ¿Kʼãrẽta kʼawuapanʉ Jeowa ʉ̃rʉ ũdubʉdade iyi zareaba nekʼãrẽ jõma parãnata? Dayirãba ũdubʉdade Jeowaba nekʼãrẽ kĩrãtana parãnata kʼawuabʉ iyira mejãcha zarea barabʉta. Salmistaba jarasi: «Bʉa parãnara mejãchabʉ,[. . .] Bʉa parãnaba jõma birasi naʉ̃ drʉara (Salmo 104:24). Naʉ̃ra wãrĩnu. Sientipikorabara ũdubʉda nekʼãrẽ Daizezeba parãnara kĩrãtana bʉta millon. Mamina kʼawuapanʉ maʉ̃ ʉ̃ta bʉta. Ẽbẽraba nekʼãrẽ kĩrãtana parãitabʉra edaʉde jõma ma krĩcha ẽ akʉza jõbʉ. Mamina Jeowaba nekʼãrẽ kĩrãtana parãbʉra jõma krĩchabʉ akʉza jõ ẽ.