Trajadadrʉ Daizeze «mejãcha so zʉbʉria» erbʉa

1. ¿Ẽbẽra so zʉbʉriabʉ ʉ̃rʉ krĩchabʉrʉdera, kʼãrẽta krĩchapanʉ?

DAYIRÃBA krĩchabʉrʉdera ẽbẽra so zʉbʉria akʉbʉ ʉ̃rʉ, krĩchapanʉ maʉ̃ ẽbẽrarã ẽbẽra biata, iyira so borekeata akʉza iya erbʉta diakĩrãta. Adewara krĩchaseapanʉ Jesuba samaritano ʉ̃rʉ nebʉraside. Naʉ̃ samaritanobara so borekeata ũdubibasi nezrʉgabariraba posidade judio abaʉta. Samaritanora mawũã ũdubʉrʉba so zʉbʉriasi, adewara kãga ũdubita jʉrʉsi maʉ̃ judiota kʼarebamarẽã (Luc. 10:29-37). Naʉ̃ nebʉrabara ũdubibʉ Daizeze nebiadebemata, dayirãba ewari jõmaʉ̃nẽ ũdupanʉta, so zʉbʉria akʉita.

2. ¿Akʉza sãwũã ũdubichu so zʉbʉriara?

² Akʉza so zʉbʉriara ũdubibʉ dayirãba ẽbẽra kʼẽã ẽãne kʼẽãibaramina. Jeowabara dayirãra mejãcha so zʉbʉria akʉbʉ salmone jarabʉ kĩrãkʼa: «Iya dayirãra mejãcha kʼẽã ẽ, dayirãba nemitia obʉrʉ aba» (Sal. 103:10). Edaʉde Jeowabara kʼẽãibara daucha ẽbẽraba nemitiata osibʉrʉ.

3. ¿Kʼãrẽ bedʼeata panʉnai naʉ̃ artikulodera?

³ Naʉ̃ artikulodera akʉdayi Daizeze Bedʼeaba panʉbʉta naʉ̃ra bedʼea ũbea ʉ̃rʉ: ¿kʼãrẽa so zʉbʉria ũdubibʉ Jeowabara?, ¿kʼãrẽne abarikachu daucha kʼẽãita so zʉbʉria akʉiʉ̃mera? akʉza ¿kʼãrẽba kʼarebaseabʉ maʉ̃ nebia ũdubita?

KʼÃRẼA SO ZɄBɄRIA ŨDUBIBɄ JEOWABARA

4. ¿Kʼãrẽa so zʉbʉria ũdubibʉ Jeowabara?

⁴ Kãgaba. Apostol Pablobara jarasi Daizezebara mejãcha erbʉta so zʉbʉriara. Naʉ̃nera Pablora bedʼeakʉasi Daizezeba ẽbẽrarã jʉrʉkʉasita ʉ̃ta wãita ãyira nekayirua omiamina (Efes. 2:4-7). Daizezebara so zʉbʉria ũdubibʉ ẽ bari yi ʉ̃ta wãira. Davidba jarabarisi: «Jeowara ẽbẽra bia jõmaʉ̃me, iya so zʉbʉria erbʉra ũdupanʉ, iya nejõma parãnane» (Sal. 145:9). Jeowabara ẽbẽrarã kãga baera jʉrʉbʉ kʼãrẽneba so zʉbʉria ũdubita ãyaʼa.

5. ¿Sãwũã kʼawuasi Jesubara yi Zeze so zʉbʉriara?

⁵ Jesubara kĩrãkita kʼawuabʉ wuabemaraira Jeowabara kãgata wuabemara so zʉbʉria ũdubira. Iyira naʉ̃ drʉaeda zei naweda, yi Zezeʉ̃me kikibarisi (Prov. 8:30, 31). Iya ũdubidabarisi, yi Zezeba sãwũã so zʉbʉria ũdubibasita ẽbẽrarã nekayirua omiara (Sal. 78:37-42). Iya ẽbẽrarã jaradiabasidera, Jesubara jarabasi maʉ̃ nebiara yi Zezeba erbʉta.

6. ¿Kʼãrẽ yizata jarasi Jesubara ũdubita Jeowabara so zʉbʉria akʉbʉta?

⁶ Nããrabema artikulode akʉda kĩrãkʼa Jesubara nebʉrasi warra aduada ʉ̃rʉ, ũdubita Jeowabara so zʉbʉria akʉkĩrãta. Maʉ̃ warra aduadara wãsi dedaʉbara «maĩnu platara ewaradʼe gastasia izha krĩñane bʼʉdʼe» (Luc. 15:13). Maʉ̃ tẽã maʉ̃ warrara jẽda krĩchape zesi iyi deda. ¿Kʼãrẽta osi yi zezebara? Maʉ̃ warrabara maʉ̃ kʼawuaira mejãcha jʉ̃ã ẽ basi. Jesuba nebʉrasi: «Wawarawedʼa zhi zezeba ũdui sozuburiape wãẽbasia. Mobe oburape kĩrãma nigasia». Iyara zʉbʉriabi ẽ basi maʉ̃ kʼarea, awuarabʉrʉ so zʉbʉriata ũdubisi. Kĩrãduasi iyi nemitiata akʉza deda zebisi yi mebẽrãbawara bʼaita. Maʉ̃ warraba nemitia mejãcha osimina, yi zezebara kĩrãduasi maʉ̃ra, yi warrabara jẽda krĩchasi baera. Yi zeze Jesuba nebʉradadebemara ũdubikĩrãbʉ Jeowata. Maʉ̃neba Jesubara jaradiakĩrãbasi Jeowabara kĩrãduakĩrãbʉta ẽbẽra nekayiruara, ãya jẽda krĩchapanʉbʉrʉ wãrĩnu (Luc. 15:17-24).

7. ¿Kʼãrẽne abarikachu buru bia bʼaita akʉza so zʉbʉria akʉiʉ̃mera?

⁷ Yi buru biadeba. Jeowa buru biara bari zebʉ ẽ iyi krĩcha biadeba. Daizeze Bedʼeabara jarabʉ «buru bia» ʉ̃tʉbemabara «so zʉbʉria akʉbʉ, nekʼãrẽ bia obʉ» (Sant. 3:17). Zeze bia kĩrãkʼa, Jeowabara bia kʼawuabʉ iya so zʉbʉria ũdubibʉba kʼarebabʉta iyi warrarãra (Sal. 103:13; Is. 49:15). Maʉ̃bara nebiata jʉ̃ãbibʉ ẽbẽrarãra nekayirua omiamina. Iyi buru biabʉra jõka baera jʉrʉbʉ kʼãrẽne so zʉbʉria ũdubita ẽbẽrarã. Iyara biʼia kʼawuachu sainʉbayeda so zʉbʉriata ũdubibarata ẽbẽrarã. Iyira buru bia baera, kʼẽãbʉ ẽbẽrarãba krĩña nekayiruata odara.

8. Ẽbẽra abaʉba nekayiruata krĩña idubʉ ẽ bʉrʉ, ¿kʼãrẽta jaradaibara iyara akʉza kʼãrẽa?

⁸ Ẽbẽra abaʉba krĩña nekayirua obidabʉrʉ, ¿kʼãrẽta odai maʉ̃nera? Daizeze jaure zareadeba Pablobara ũrãgʼasi: «Ãba pana ẽ marẽã» «maʉ̃ ẽbẽraʉ̃mera» (1 Cor. 5:11). Yi nemitia obʉ jẽda krĩcha ẽãra jarapanʉ wua Jeowa ʉ̃rʉ Kʼawuabibari ẽãta. Mawũã opanʉ mebẽrã kʼẽrẽpapanʉ kʼarea akʉza Jeowa neneẽãbʉta ũdubita. Ẽbẽra abaʉta jaradara wua Jeowa ʉ̃rʉ Kʼawuabibari ẽãta, ʉ̃kʉrʉba krĩchapanʉ mawũãra Daizeze so zʉbʉriata ũdubida ẽ basita. Akʉdayi maʉ̃ra wãrĩnu kʼawuaita.

ẼBẼRA ABAɄTA JARADARA WUA JEOWA Ʉ̃RɄ KʼAWUABIBARI ẼÃTA, ¿MAɄ̃BA ŨDUBIBɄKA SO ZɄBɄRIATA?

9, 10. (1) Hebreos 12:5, 6ba jarabʉdebara, ¿kʼãrẽa jaraseapanʉ wua Jeowa ʉ̃rʉ Kʼawuabibari ẽã abʉrʉdera, so zʉbʉriata ũdubibʉta? (2) ¿Kʼãrẽ yizaba biʼia ũrĩbibʉ?

⁹ Ãba yi jʉrebarimae jaradara ẽbẽra daya kãgabʉta «wua Jeowa ʉ̃rʉ Kʼawuabibari ẽãta», maʉ̃ kʼareara mejãcha sopʉabʉ. Daya krĩchaseabʉ wua Jeowa ʉ̃rʉ Kʼawuabibari ẽã adaira nesida ẽ basita. Ẽbẽra abaʉta jaradara wua Jeowa ʉ̃rʉ Kʼawuabibari ẽãta maʉ̃ba, ¿wãrĩnu ũdubibʉka so zʉbʉriata? Ũdubibʉ. Ẽbẽra abaʉta kʼẽãita nesidabʉbʉrʉ, kʼẽãnaibara, mawũã obʉba ũdubiyi buru biata, so zʉbʉriata akʉza kãgata (Prov. 13:24). Ẽbẽra jipa nekayirua obʉta jaradara wua Jeowa ʉ̃rʉ Kʼawuabibari ẽãta, ¿maʉ̃ba kʼarebaika iyira ne awuara oita? Ne awuara oseabʉ. Mejãchaʉba jarapanʉ zõrãrãba mawũã jidada kʼarea ãyira maʉ̃ba kʼarebasita jẽda kʼẽrẽpa bʼaita, nekʼãrẽ awuara oita akʉza Daizezema zeita (akʉra Hebreos 12:5, 6).

¹⁰ Krĩchadayi maʉ̃ yizata. Obeja akʉbaribara iyi obeja akʉbʉdera kʼawuada aba kayabʉbʉrʉ. Mawũẽra maʉ̃ obeja bemarẽãra iyara edaʉde jãpe edebʉ wuabemara obejaraneba. Obejarãra ãba bakĩrã wuabemara obejarabawara, maʉ̃ba iyi abapai jãpe bʉbʉdadera zʉbʉriadogo. Obeja akʉbariba iyi obejaranebemata jãpe bʉera bebiya, ¿maʉ̃ba jarakĩrãkʉka krĩña mawũã obʉta zʉbʉriamarẽã? Mawũã ẽ. Iya kʼawuabʉ maʉ̃ obeja kayabʉta jãpe ede ẽ bʉrʉ wuabemaraneba kayayita yi wuabemarãra (naʉ̃ testoʉ̃me akʉra Levítico 13:3, 4).

11. (1) ¿Kʼãrẽa jaraseapanʉ ẽbẽra wua Jeowa ʉ̃rʉ Kʼawuabibari ẽãra, obeja kayabʉ kĩrãkʼabʉta? (2) ¿Kʼãrẽ kʼarebata erbʉ wua Jeowa ʉ̃rʉ Kʼawuabibari ẽãbara?

¹¹ Ẽbẽra wua Jeowa ʉ̃rʉ Kʼawuabibari ẽãra maʉ̃ obeja kayabʉ kĩrãkʼabʉ (Sant. 5:14). Kaya kayirua wuabemara kayabiseabʉ kĩrãkʼa, ẽbẽra Jeowa ode kʼẽrẽpabʉ ẽ bara ne aña obiseabʉ wuabemara. Maʉ̃ kʼarea edaʉde maʉ̃ ẽbẽrarã ãĩ bʉeibara kongregasioneba. Mawũã opanʉba ũdubibʉ Jeowabara mejãcha kãgata mebẽrã kʼẽrẽpapanʉrãra akʉza maʉ̃ba yi nekayirua obʉ sora tõbariseabʉ, mawũã jẽda krĩchamarẽã. Wua Jeowa ʉ̃rʉ Kʼawuabibari ẽ mina, wãseabʉ ãba yi jʉrebari eda, mama ũrĩseabʉ Daizeze Bedʼeata akʉza jẽda soiduba ĩjãita. Adewara jʉrʉseabʉ kartarata iyita akʉza JW Broadcasting^® akʉita. Zõrãrãba akʉbʉde iya nekʼãrẽ awuara owãta, edaʉde ũrãgʼata diayi iyi jẽda zemarẽã Jeowa pʉwʉrʉ eda.b

12. Ẽbẽra abaʉba nekayirua obʉta idubʉ ẽ bʉrʉ, ¿kʼãrẽta oibara zõrãrãba kãga ũdubita?

¹² Kĩrãbedaibara wua Jeowa ʉ̃rʉ Kʼawuabibari ẽã apanʉta yi nekayirua obʉde jẽda krĩcha ẽãta. Zõrãrãbara kʼawuapanʉ maʉ̃ra akʉdaibarata adewara ñabasea bʼai kʼẽã ẽ baibarata. Kʼawuapanʉ Jeowabara aukʼara kʼẽã ẽãta (Jer. 30:11). Ãyara kãga mebẽrãra, maʉ̃ kʼarea ãya nekʼãrẽ oamapanʉ naʉ̃ra mebẽrã Jeowaʉ̃me neũdukʼawuapanʉta ãrĩ ẽ baita. Edaʉde kãga ũdubita akʉza so zʉbʉria akʉita, nekayirua obʉra ãĩ bʉeibara kongregasioneba.

13. ¿Kʼãrẽa Corinto kongregasionera ãĩ bʉesida kristiano abaʉta?

¹³ Akʉdayi Pabloba kʼãrẽta osita siglo nabemane kristiano abaʉba nekayirua obʉde jẽda krĩcha ẽ baside. Maʉ̃ kristiano Corintodebemabara nekayiruata onʉmasi, yi zeze kimata erkʼãĩchuasi iyara. Kʼãrẽ nemitia jipa. Jeowabara jarabarisi israelitarãra: «Yumakẽrã iyi zeze kimaʉ̃me ãba yi erkʼãĩbʉra imitia jarabibʉ iyi zeze ʉ̃rʉ. Ãyi ũmeweda beibara, bedʼea aba» (Lev. 20:11). Pablobara jara ẽ basi maʉ̃ yumakẽrãra beadamarẽãra, mamina jarasi ãĩ bʉedaibarata kongregasionebara. Iya mawũã obʉdeba aña krĩchabibasi ʉ̃kʉrʉ mebẽrã kongregasionebemarata, adewara ʉ̃kʉrʉba krĩchasida maʉ̃ra mejãcha nekayirua zroma ẽãta (1 Cor. 5:1, 2, 13).

14. ¿Pablobara sãwũã so zʉbʉriata ũdubisi ẽbẽra Corintodebema akʉza kʼãrẽa? (2 Corintios 2:5-8, 11).

¹⁴ Maʉ̃ tẽãra Pablobara kʼawuasi maʉ̃ ẽbẽra nekayirua omiara jẽda krĩchasita soiduba. Maʉ̃ ẽbẽrabara kongregasion ʉ̃rʉ imitia bedʼeabisimina, Pablobara jarasi zõrãrãʼa maʉ̃ ẽbẽrarã aukʼara zʉbʉriabi ẽ bamarẽã. Iyara zokʼasi naʉ̃ta odamarẽã: «Iyi nemitiara kĩrãduadaibara ibiade akʉza so zarea diadaibara». Adewara jarasi kʼãrẽa mawũã odaibarata: «Iyira aukʼara krĩcha oẽ bamarẽã mejãcha sopʉanʉmʉ kʼarea». Pablora maʉ̃ ẽbẽra kʼarea so zʉbʉriasi. Pablobara kãga ẽ basi maʉ̃ ẽbẽrarã aukʼara sopʉabʉdeba iya nemitia obʉ kʼarea, idubʉmarẽã Daizezeba kĩrãduamarẽã jʉrʉbʉta (akʉra 2 Corintios 2:5-8, 11).

15. ¿Sãwũã ũdubipanʉ zõrãrãbara daucha kʼẽãpanʉta akʉza so zʉbʉria ũdubipanʉta?

¹⁵ Jeowade kĩrãkʼa zõrãrãbara so zʉbʉriara ũdubikĩrã. Daucha kʼẽãibaradera, daucha kʼẽãpanʉ adewara so zʉbʉria ũdubibaradera, so zʉbʉriata ũdubipanʉ. Ẽbẽra ne kayirua obʉta kʼẽã ẽ bʉrʉ so zʉbʉriata ũdubi ẽ awuarabʉrʉ iduaribibʉ iya nekʼãrẽ onʉmʉta. Kõbebʉrʉ, ¿bari zõrãrã abaʉba ũdubibaraka so zʉbʉriara?

KʼÃRẼBA KʼAREBAI DAYIRÃ JÕMAɄ̃BA SO ZɄBɄRIA ŨDUBITA

16. Proverbios 21:13ba jarabʉdebara, ¿kʼãrẽta oi Jeowabara so zʉbʉriata ũdubida ẽ bʉrʉ?

¹⁶ Kristianora jõmaʉ̃ba so zʉbʉria ũdubikĩrãbʉ Jeowade kĩrãkʼa. ¿Kʼãrẽa? Iyara ũrĩ ẽ so zʉbʉria ũdubibʉ ẽ bedʼeara (akʉra Proverbios 21:13). Dayirãba kãgabʉbʉrʉ Daizezeba ũrĩmarẽã dayi yiwidʼibʉta, jʉra kʼawuabaibara mebẽrã bia edada ẽ baita. Dayirãbara ãyi kʼareba ẽ baikaude zarea opanʉ mebẽrã zʉbʉriapanʉ ũrĩta. Dayirãbara wãrĩnu ũrĩpanʉ naʉ̃ ũrãgʼata: «Yi so zʉbʉria ũdubi ẽãra, iyi ʉ̃rʉ kʼawua obʉdadera iyabida so zʉbʉria ũdubida ẽ bayi» (Sant. 2:13). Dayirãta eda krĩchapanʉbʉrʉ akʉza kʼawuapanʉbʉrʉ nesidabʉta dayirã so zʉbʉriata ũdubidamarẽã, mawũãra soiduba ũdubidayi so zʉbʉriata wuabemaraʼa. Maʉ̃ audre ũdubikĩrãpanʉ nekayirua odata jẽda zebʉrʉde kongregasionʼena.

17. ¿Nokʼo Davidbara sãwũã soiduba ũdubisi so zʉbʉriara?

¹⁷ Daizeze Bedʼeaderabʉ yiza dayirãba kʼawuaseabʉta sãwũã so zʉbʉria ũdubita akʉza zarea edada ẽ baita wuabemarata. Krĩchadadrʉ nokʼo David ʉ̃rʉ, iyara badua ũdubibasi so zʉbʉriara. Saúlbara Davidʼra beakĩrãbasimina, Davidbara so zʉbʉriata ũdubisi maʉ̃ nokʼo Jeowaba jʉrʉdara, maʉ̃ kʼarea Davidbara neida oẽ basi (1 Sam. 24:9-12, 18, 19).

18, 19. Jarada nekʼãrẽ ũmene Davidba so zʉbʉria ũdubi ẽ badata.

¹⁸ Edaʉde Davidbara so zʉbʉriara ũdubi ẽ basi. Ewari aba Nabalba Davidʼra i jʉra jarasi akʉza yiko dia ẽ basi iyaʼa mia iyi gorogorora, maʉ̃ kʼarea Davidʼra mejãcha kĩrʉ kʼãrãpe jarasi Nabalʼra beaita akʉza iyi dedabemasida. Abigaíl Nabal kimabara ñabasea nekʼãrẽ osi baera, iya ibiadebʉta ũdubisi baera akʉza jʉ̃ã kʼawuabʉta, maʉ̃ kʼarea Davidʼra miabea ẽ basi (1 Sam. 25:9-22, 32-35).

¹⁹ Ewari aba Natánba nokʼo Davidʼa nebʉrasi, ẽbẽra nemejãcha erbʉba zrʉgasita ẽbẽra nekʼãrẽ neẽãbʉta, maʉ̃ ẽbẽrabara zrʉgasi iyi obeja audre kãgabʉta. Davidʼra mejãcha kĩrʉpe jarasi naʉ̃ bedʼeata: «Jeowa wãrĩnu zokʼaibʉ kĩrãkʼa, yumakẽrãra maʉ̃ mawũã odara jipa beibara» (2 Sam. 12:1-6). Mamina Davidbara biʼia kʼawuachuasi Jeowaba Moisésʼa Ley diadabara jarabasita ẽbẽra abaʉba obeja aba zrʉgara, maʉ̃ zrʉgadabara jẽda diaibarabasita kimare (Éx. 22:1). Davidba jaraside maʉ̃ yumakẽrãra beibarata maʉ̃bara aukʼara jipa zarea jarasi. Natánbara maʉ̃ yizadeba ũrĩbikĩrãbasi Davidʼa iyara audre nemitiata obʉrʉta maʉ̃ira. Jeowabara Davidʼa audre so zʉbʉriata ũdubisi, Davidba ũdubidaira maʉ̃ yumakẽrãʼa (2 Sam. 12:7-13).

20. ¿Kʼãrẽta jaradiabʉ dayirãra David yizabara?

²⁰ Akʉpanʉ sãwũã Davidʼra kĩrʉbia yi edebi kʼãrãpe jarasi Nabalʼra beaibasita akʉza iyiʉ̃me badarasida. Adewara jarasi beaibarata maʉ̃ yumakẽrã Natánba nebʉradara. Maʉ̃ kʼarea dayirãbara widiseabʉ, ¿kʼãrẽa maʉ̃ yumakẽrã ẽbẽra bia badabara majãcha zarea bedʼeasita iya kʼawua osidera? Krĩchadaya Davidʼra maʉ̃nera sãwũã nʉmasita. Iyi krĩchara aduʼa ba ẽ basi nekayiruata onʉmasi baera. Ẽbẽra abaʉba aukʼara zarea bedʼeabʉbʉrʉ wuabemara ʉ̃rʉ, maʉ̃ba kʼawuabibʉ iyira bia wã ẽãta Jeowaʉ̃me. Jesubara naʉ̃ ũrãgʼata jarasi: «Zhãrãta kʼawua orãũdua, Daizezeba marã maʉ̃ kʼarea kʼawua o ẽbamarẽã. Zhãrãta kʼawua odʼara Daizezebara marã maʉ̃ zadʼe kʼawua oya» (Mat. 7:1, 2). Zarea odadrʉ wuabamara aukʼara zarea jara ẽ baita akʉza odadrʉ Jeowade kĩrãkʼa wuabemara so zʉbʉria akʉbʉde.

21, 22. ¿Dayirãbara sãwũã ũdubiseapanʉ so zʉbʉriara?

²¹ So zʉbʉria akʉira bari dayi sode erbaibara ẽ awuarabʉrʉ oũdubibara. Dayirãbara krĩchadaibara kʼairata kʼarebaita, bari jaraita dayirã mebẽrãne, kongregasione akʉza deza jaradia wãinebida. Maʉ̃ta jʉrʉpanʉbʉrʉ dayirãbara mejãcha ũdudayi sãwũã so zʉbʉria ũdubita. ¿Dayirãbara kʼawuapanʉka ẽbẽra abaʉba nesidabʉta so zarea diadamarẽã? Edeseapanʉ yikota iyita, mawũã ẽ bʉrʉ ne awuara kʼarebaita. ¿Bʉka mebẽrã aba jẽda Jeowa ʉ̃rʉ Kʼawuabibarita? Iyara nesidabʉbaibara so zarea diadaita mawũã ẽ bʉrʉ neũdukʼawuata. ¿Dayirãbara jaradiaseabʉka bedʼea bia Daizeze Bedʼeadebemara wuabemaraʼa? Mawũã obʉdeba biʼia ũdubiseabʉ so zʉbʉriara wuabemarãra (Job 29:12, 13; Rom. 10:14, 15; Sant. 1:27).

²² Dayirãta dau kʼawuapanʉbʉrʉ ũdudayi sãwũã so zʉbʉria ũdubita wuabemaraʼa. Dayirãba maʉ̃ so zʉbʉriata ũdubipanʉbʉrʉ wuabemaraʼa, dayirãbara mejãcha sobiabiyi dayirã Zeze ʉ̃tʉbemara, iyara mejãcha so zʉbʉria ũdubibʉ baera.