Poto platapormaneta akʉza letrara iyi ʉ̃rʉbʉta.
1922 Maʉ̃neba Sien Poagaba
«MAMINA biga diapanʉ Daizezeʼa iya Nokʼo Jesukristodeba dayirãta ẽdrʉbibʉ baera» (1 Cor. 15:57). Naʉ̃ testora poaga 1922debemabasi. Naʉ̃ba kʼarebasi Daizeze Bedʼea kʼawuapanʉrata ãya wãrĩnu ĩjãita Daizezeba nebia diaita ãyita kʼẽrẽpapanʉ baera. Wãrĩnu Jeowabara maʉ̃ra ẽbẽrarã nebiata diasi Daizeze Bedʼeata sobia jaradiapanʉ baera, maʉ̃ poagade. Jeowabara ãyaʼa nebiata diasi ãyi juwaba librora ojʉ̃drʉside akʉza radiora zokʼaside Daizeze Nokʼo ʉ̃rʉ jaradiaita. Iyabaʉ poagade Jeowaba ũdubisi iyi pʉwʉrʉra kʼarebabʉta. Daizeze Bedʼea kʼawuabarirãra ãba yi jʉresida asamblea audre yibiade Cedar Pointʼne (Ohio, E.U.A.). Maʉ̃ asambleaba ũdubisi sãwũã bʼaibarata Jeowa organizasionʼra idibayeda.
«DAIBARA JIPA KʼAWUA Ẽ BASI KʼÃRẼ OITA»
Daizeze Bedʼea jaradiabarira audre eaba wãne audre nesidapanasi kartarata. Betel Brooklynʼnera mebẽrãbara ʉ̃tʉ zebibasi kartarãra, mamina mebẽrãbara wabida wuabema empresaba kʼarebamarẽã nesidabasi librora ʉ̃tʉ zebita, libro neẽãnʉmʉta jedeko bio berabarisi baera Daizeze Bedʼeara mejãcha jaradiada ẽ basi. Maʉ̃ kʼarea mebẽã Rutherfordʼba widisi Robert Martinʼa librora ʉ̃tʉ zebiseabʉ kʼawuaita.
Empresa kalle Concord, Brooklyn (Nueva York).
Mebẽã Robert Martinʼba jarasi: «Daibara jipa kʼawua ẽ basi kʼãrẽ oita, nesidapanasi baera makina zromata maʉ̃ libro oita akʉza ʉ̃tʉ zebita». Aramaʉ̃ta mebẽrãbara deta arrendasida pʉwʉrʉ Brooklyn, kalle Concord, numero 18de.
Mamina jõmaʉ̃ta sobiapana ẽ basi, ẽbẽra dai libro kʼareba ʉ̃tʉ zebibadaba jarasi: «Marabara makina biata erbʉ mawũã librora ʉ̃tʉ zebita, mamina mia abaʉba zokʼabeda ẽ, maʉ̃ kʼarea jedeko 6 berabaribʉrʉdera ãrĩñi naʉ̃ra».
Martinʼba jarasi: «Naʉ̃ ẽbẽraba jarabʉra wãrĩnu kĩrãkʼabʉ, mamina naʉ̃ ẽbẽrabara kʼawua ẽ basi Daizezera ewari jõmaʉ̃nẽ dai kʼawa zebʉrʉta». Mebẽã Martinʼba jaradara wãrĩnubasi, maʉ̃ta audre ẽãne maʉ̃ makina zromabara ewari abaʉde 2.000 libro ʉ̃tʉ zebibasi.
Trajabarirata makina zroma kʼawapanʉ.
RADIOTA ZOKʼASIDA ẼBẼRA MEJÃCHAɄBA ŨRĨMARẼÃ
Librora ʉ̃tʉ zebipanʉ awuara Jeowa pʉwʉrʉbara jʉrʉsida sãwũã Daizeze Bedʼea jõmaʉ̃ʼa jaradiaita radiodeba. Mebẽã Rutherford radiode bedʼeakata bedʼeasi domingo kewarare 26 febrero poaga 1922de, iya naʉ̃ diskursota jaradiasi «Millones que ahora viven no morirán jamás». Iya naʉ̃ra jara ũrĩbisi emisora KOGʼde maʉ̃ra basi pʉwʉrʉ Los Ángelesde (California, E.U.A.).
Maʉ̃ra ũrĩsida ẽbẽrarã 25.000 panʉraba akʉza ʉ̃kʉrʉba kartata dia bʉesida biga diadaita, maʉ̃ne edabasi mebẽã Willard Ashford, iyira basi Santa Ana (California). Iyira Rutherford ʉ̃rʉ ibia bedʼeasi, iyara diskurso biata jaradiasi baera, adewara jarasi: «Dai deda ẽbẽra ũbea kayabasi, kʼãwũã radiode jaradia ẽ basibʉrʉ ũrĩ ẽ bakasi, mia dai de kʼawa jaradiasibʉsida».
Maʉ̃ta semana bio berabarida tẽã radiodeba jaradia wãsida, poaga jõbodo tẽã The Watch Tower kartaba jarasi ẽbẽrarã 300 mil panʉraba ũrĩsidata Daizeze Bedʼeara radiodeba.
Ẽbẽrarã mejãchaʉba ũrĩsida baera Daizeze Bedʼeata radiodeba, mebẽrã Daizeze Bedʼea kʼawuabarirabara krĩchasida emisora oita pʉwʉrʉ Staten Island Betel Brooklyn kʼawa. Maʉ̃ poaga berabarida tẽã, mebẽrã Daizeze Bedʼea kʼawuabarirabara zokʼasida emisora WBBRʼta, ẽbẽrarã Daizeze Nokʼo ʉ̃rʉ jaradiaita.
«ADV»
The Watch Tower karta 15 junio poaga 1922debemaba jarasi asamblea odaita pʉwʉrʉ Cedar Pointʼne (Ohio), 5-13 septiembrebayeda poaga 1922de. Daizeze Bedʼea kʼawuabarira maʉ̃ asambleaeda jʉ̃ẽpanʉra mejãcha sobiapanasi.
Mebẽã Rutherfordʼba naʉ̃ asambleade iya diskurso diaside jarasi: «Mʉ̃a ĩjãbʉ Daizezeba kʼarebaita naʉ̃ asamblea jõma bia berabaribita akʉza Jeowaba kʼarebaita Daizeze Bedʼea naʉ̃ drʉa jõmaʉ̃nẽ jaradiaita nãã okabadata». Mebẽrã yi diskurso diapananabara jarada ʉ̃rʉ jarapanasi akʉza so zarea diapanasi jaradia wãnamarẽã.
Ẽbẽrarã mejãchaʉta wãsida asamblea bʼaita poaga 1922de pʉwʉrʉ Cedar Pointma (Ohio).
Viernes 8 septiembrede 8.000 ẽbẽrarã jʉ̃ẽsida Rutherfordʼba diskurso jaradianʉmʉ ũrĩta, mama panana ẽbẽrabara jʉ̃ãpanasi, ãyi asambleaeda jʉ̃ẽmarẽã karta diadapeadade, «ADV» bʉchubadata jara ũrĩbimarẽã kʼãrẽta jarabʉta. Ẽbẽrarãbara ũdusida plataporma ʉ̃treare wua lonata bʉratʉbasita. Mebẽã Arthur Clausʼra zesi pʉwʉrʉ Tulsadeba (Oklahoma, E.U.A.), naʉ̃ diskurso ũrĩta. Mebẽãbara jʉrʉsi sama jewedaita mawũã iya bia ũrĩta, maʉ̃ ewaridera neẽbasi baera mikroponota akʉza parlanteta.
«Mia ababida bera ũrĩ ẽ basi»
Mebẽã yi nãã bedʼea jʉ̃drʉbʉba diskurso bia ũrĩta, jarasi diskurso jaradia jʉ̃drʉbʉdadera kʼaita eda wãbe ẽãta. Diapeda 9:30 mebẽã Rutherfordʼba iyi diskursora jaradia jʉ̃drʉsi Jesuba bedʼea jaradata Mateo 4:17de: «Daizezeta Nokʼodʼebema kʼaita basia». Ẽbẽrarãba Daizeze Nokʼo ʉ̃rʉ sãwũã ũrĩ ʉ̃rʉ iya naʉ̃ta jarasi: «Jesubara jara ũrĩbisi iya Daizeze Nokʼo zokʼa jʉ̃drʉbʉrʉdera ẽbẽrarã Daizezeʉ̃me kʼẽrẽpabʉra ãba yi jʉredaita».
Mebẽã Clausba jarasi: «Mʉ̃ara kĩrãkita ũrĩsi mebẽãba jarabadara, mia ababida bera ũrĩ ẽ basi». Maʉ̃ne iyita bia senti ẽ baera ãĩ wãibarabasi, mamina iyira ãĩ wãmabasi kʼawuabasi baera jẽdara idu zebida ẽãta.
Iyira bia sentisi baera jẽda urude iya ũrĩsi ẽbẽrarã juwa tachibarabʉta, maʉ̃ kʼarea mejãcha sobiasi akʉza jarasi iyita de ʉ̃tre wãibarabasibʉrʉ maʉ̃ diskurso bia ũrĩta, maʉ̃ra oibasita. Maʉ̃ ewaridera Clausʼra warrarabasi iyira 23 poagabasi, maʉ̃ kʼarea iyira ʉ̃ta wã zesi, mama jʉ̃ẽbodoare iya diskursota biʼia ũrĩsi.
Mamina Arthurʼra doba chua ẽ basi iyi neũdukʼawuarasida de ʉ̃trebasi, maʉ̃ranebema abaʉba yi trʉ̃ Frank Johnsonba widisi: «¿Bʉa kucho zaketa erbʉka?».
Arthurba jarasi: «Ãjã, erchu».
Frankba panʉsi: «Kʼãrẽ bia, daiba widibadara bʉdeba panʉdogo. ¿Ũdubʉka jari wua lona bʉratʉ jirabʉra?, kĩrãkita ũrĩda juezba jarabʉta.a Iya ‹jaraidua, jaraidua› abʉrʉde, kõtara naʉ̃ jʉ̃kara kimarebʉta».
Mawũẽra mebẽã Arthurba jʉ̃ãsi iyaʼa kʼawua jaradaita, maʉ̃ena mebẽã Rutherfordʼba iyi diskurso jõbodoare sobia jarasi: «Kʼẽrẽpapanaidua akʉza kristianoarata ũdubidua, kʼẽrẽpapanaidua Babilonia jõma jõñiena. Daizeze Bedʼeara mejãcha jaradiapanaidua akʉza jĩgara jaradia wãidua. Jõmaʉ̃ba kʼawuaibara Jeowara Daizezeta akʉza Jesutrʉ Nokʼo wuabema nokʼoira akʉza iyitrʉ Yibari wuabema yibarira. Idibema ewarira yibia Nokʼobara zokʼanʉmʉ baera akʉza marara iyi Nokʼo ʉ̃rʉ jaradiabari baera. Jaraidua, jaraidua, jaraidua Daizeze Nokʼoba sãwũã zokʼanʉmʉta».
Arthurba jarasi, iya akʉza iyi kʼawa kʉpanʉraba kõsidata maʉ̃ jʉ̃karara mawũã wua lonara pikãga eda baesita. Yi lonanera eda jarabasi: «Jaraidua Daizeze Nokʼoba sãwũã zokʼabʉta». «ADV», naʉ̃ letra ũbeabʉra zebʉ ingle bedʼeade Advertise jarabʉdeba, naʉ̃ bedʼeara tradusibu «jaraidua».
«TRAJO AUDRE YIBIA»
Pʉwʉrʉ Cedar Pointʼne asamblea badaba kʼarebasi mebẽrã Daizeze Nokʼo ʉ̃rʉ audre jaradiaita akʉza yi soiduba kʼarebakĩrãpanʉrabara kʼarebasida. Yi nãã edebari pʉwʉrʉ Oklahomanebemaba bʉsi: «Daibara Daizeze Bedʼea jaradiapanasi mina karbon ʉ̃tʉ zebibʉmae, maʉ̃ audura basi ẽbẽrarã nekʼãrẽ neẽãbʉta». Akʉza mebẽãba jarasi ẽbẽraba karta The Golden Age jidasidadera mejãcha jẽgasidata adewara maʉ̃ mebẽãba jarasi: «Daira mejãcha sobiapanʉ ẽbẽrarã so zarea diapanʉ baera».
Mebẽrã Daizeze Bedʼea kʼawuabarirabara kʼawuasida Jesuba Lucas 10:2de jaradara mesera odaibarabasita: «Wãrãnebai mʉ ũrãgʼa ĩjãnaĩrã bioa, mawũãmina miã ũrãgʼadʼaira bio ẽã». Naʉ̃ poaga jõbodoare krĩchasida Daizeze Nokʼo ʉ̃rʉ jaradiaita badumae.
a Mebẽã Rutherfordʼra trʉ̃gapanasi «juezta», iyira trajabasi baera juezde pʉwʉrʉ Misuride (E.U.A.).