Bʉra wãrĩnu sobia baseabʉ

1. ¿Sãwũã Daizeze ʉ̃rʉ kʼawuaibara kʼarebabʉ sobia bʼaita?

WÃRĨNU sobia bʼaibara jarakĩrãbʉ ẽ ewari abapai sobia bʼaita awuarabʉrʉ jarabʉ ewari jõmaʉ̃nẽ sobia bʼaita. Mamina, ¿sãwũã sobia baseabʉ? Jesuba katumane bedʼea bia jaradade naʉ̃ta jara ũrĩbisi: «Sobiapanʉ Daizezedebema audre kʼawuakĩrãpanʉta» (Mat. 5:3). Jesubara kʼawuabasi Jeowabara ẽbẽrarãra osita iya kãgabʉta odamarẽã akʉza iyi ʉ̃rʉ kʼawuadamarẽã. Daizeze Jeowara sobiabʉ baera maʉ̃ kʼarea iya kãgabʉta opanʉrãra sobia baseabʉ (1 Tim. 1:11).

2, 3. (1) ¿Jesuba jaradiadadera kʼairasida sobia baseabʉ? (2) ¿Kʼãrẽta kʼawuadai naʉ̃ artikulodera akʉza kʼãrẽa?

² ¿Dayirãra bedʼea zroma neẽãnebʉrʉ sobia baseapanʉka? Mawũã ẽ. Jesuba katumane bedʼea bia jaraside, iya jarasi baera yi «jẽga bʼera» kayirua oda kʼarea, bedʼea zroma erbʉ kʼarea sobia baseabʉta. Abarikabʉ yibiata obe kʼarea zʉbʉriabʉrata akʉza Jesu kʼarea ikayirua jarabʉdade zʉbʉriabʉta (Mat. 5:4, 10, 11). Mamina, ¿dayirã mawũã zʉbʉrianʉmʉnera sãwũã sobia baseapanʉ?

³ Jesubara jarasi dayirã sobia bʼaira biabaibara ẽãta. Awuarabʉrʉ dayirã sobia bʼaira Daizeze ʉ̃rʉ kʼawuaibarata mawũã iyi kʼawa bʼaita (Sant. 4:8). ¿Sãwũã oseapanʉ maʉ̃ra? Naʉ̃ artikulode akʉdayi bedʼea ũbea sãwũã wãrĩnu dayirã sobia baseabʉta.

DAIZEZE BEDʼEATA LERA AKɄZA BIA KʼAWUARA

4. ¿Kʼãrẽta nããra oibara wãrĩnu sobia bʼaita? (Salmo 1:1-3).

⁴ ABA: Wãrĩnu sobia bʼaira Daizezedebemata kʼawuaibara. Wãrĩnu sobia bʼaira Daizeze Bedʼeata leibara akʉza bia kʼawuaibara. Jesubara jarasi Daizeze ʉ̃rʉ kʼawuaira yiko kĩrãkʼabʉta. Ẽbẽrarãba akʉza nedʉwʉrʉraba nesidabʉ nekoita ãyi bei ẽ baita. Mamina ẽbẽrarãbʉrʉ leseabʉ Daizeze Bedʼeara ãya maʉ̃ oita nesidapanʉ. Maʉ̃ kʼarea Jesuba jarasi: «Maʉ̃ẽnabemata zhi bʼʉmata mawũã bʼʉa: Zhãrã bari zhikoba bʼa ẽã, awuarabʉrʉ Daizezeba jara bʼʉta jõma aribʼae bʼʉba bʼaya» (Mat. 4:4). Maʉ̃ kʼarea mia ewari ababida le ẽ berabari ẽ baibara Daizeze Bedʼeara. Salmistaba jarasi: «Sobiabʉ» yi Daizeze Bedʼea lebʉra (akʉra Salmo 1:1-3).

5, 6. (1) ¿Kʼãrẽta kʼawuaseapanʉ Daizeze Bedʼeadebara? (2) ¿Kʼãrẽne kʼarebaseabʉ Daizeze Bedʼea lebʉbara?

⁵ Daizezebara dayirãra mejãcha kãga. Maʉ̃ kʼarea iyi bedʼeade jaradiabʉ kʼãrẽ, kʼãrẽta oibarata dayirã sobia bʼaita. Naʉ̃ne kʼawuapanʉ kʼãrẽa nama panʉta dayirãra, sãwũã iyi kʼawa baseabʉta akʉza kʼãrẽta oibarata iya dayirã kayirua kĩrãduamarẽã, adewara kʼawuapanʉ Daizezeba kʼãrẽ nebia weita aranʉ (Jer. 29:11). Naʉ̃ ʉ̃rʉ Daizeze Bedʼeade kʼawuabʉba dayita sobiabibʉ.

⁶ Daizeze Bedʼeabara ũrãgʼa biata erbʉ dayi bebʉita dayirã bia wãmarẽã. Maʉ̃ba dayirãba maʉ̃ ũrãgʼata ũrĩnara sobia baseabʉ. Maʉ̃ba bedʼea zroma kʼarea krĩcha zroma obʉdera, ewarita jʉrʉda Daizeze Bedʼea leita akʉza maʉ̃ ʉ̃rʉ biʼia krĩchara. Jesuba jarasi: «Audrera sobia bʼeaidʼe bʼʉa Daizeze bedʼeata ũrĩpe aribʼae bʼeta» (Luc. 11:28).

7. ¿Kʼãrẽba kʼarebabʉ Daizeze Bedʼea lebʉrʉde maʉ̃ ʉ̃rʉ biʼia kʼawuaita?

⁷ Daizeze Bedʼea lenʉmʉnera ewari jʉrʉda biʼia kʼawuaita akʉza lekĩrã leita. Krĩchara naʉ̃ ʉ̃rʉ, ¿ewari aba kʼãwũã berabaribarika? Ewari aba ẽbẽra abaʉba bʉa kokĩrãbʉ yikota wiayi, mamina bʉra mesera wãibara baera, mawũã ẽ bʉrʉ bedʼea zromaba krĩcha zroma obʉ baera nekokĩrã neko ẽ bayi. Mesera nekoyi, mamina bʉ neko berabarida tẽã krĩchayi audre biga basita pikãga nekoita, mawũã kʼawuaita sãwũã warrabasita. Abarika berabariseabʉ dayirãba Daizeze Bedʼea lebʉrʉde. Edaʉde mesera lebʉ baera kʼawua ẽ Daizeze Bedʼeaba dayirãʼa kʼãrẽta jaradiakĩrãbʉta. Daizeze Bedʼea lebʉrʉde krĩchara ẽbẽra sãwũã bedʼeabadata akʉza ãya kʼãrẽta obadata, mawũã lekĩrã leita akʉza sobia bʼaita.

8. ¿Kʼãrẽta opanʉ nezokʼara jipa bʉra akʉza bia krĩchapanʉrabara? (Akʉra notata).

⁸ Jesubara jidasi «nezokʼara jipa bʉra akʉza bia krĩchabʉra» dayirã yiko diamarẽã nekobari ũmadaʉde. Maʉ̃ kʼarea dayirãbara mejãcha erbʉ yiko jauredebematab (Mat. 24:45). Nezokʼara jipabʉraba nekʼãrẽ obʉra, jõma Daizeze Bedʼeadeba zebʉ (1 Tes. 2:13). Yiko jauredebemabara kʼarebabʉ Daizeze Bedʼeadeba kʼawuaita Daizezeba sãwũã krĩchabʉta, maʉ̃ kʼarea akʉpanʉ Jarakabʉ akʉza ¡Despertad! kartarata. Adewara ʉ̃kʉrʉ artikulorata akʉbʉ jw.org de akʉza jedekoza JW Broadcasting^® ta akʉpanʉ. Daizeze Bedʼeata lera akʉza bia kʼawuara oseapanʉ yi ũmenebemata dayirã sobia bʼaita.

ODAIBARA JEOWABA ZOKʼABɄTA

9. ¿Dayirãbara saʉ̃ ũmenebemata oibara wãrĩnu sobia bʼaita?

⁹ ŨMETA: Wãrĩnu sobia bʼaira nesidabʉ Jeowaba zokʼabʉ oita. Salmistaba bʉsi: «Sobiabʉ yi Jeowa wawia ũdubipanʉra akʉza iyi odebʉra» (Sal. 128:1). Jeowaʼa wawia ũdubibara jarakĩrãbʉ oẽ baita iya kãga ẽãta (Prov. 16:6). Ewariza zarea oibara Jeowaba iyi bedʼeade kʼãrẽta bigabʉta akʉza kʼãrẽta bigabʉ ẽã abʉta oita (2 Cor. 7:1). Sobiapanañi Jeowaba kãgabʉta opanʉbʉrʉ akʉza iya jʉrabʉta jʉrapanʉbʉrʉ (Sal. 37:27; 97:10; Rom. 12:9).

10. Romanos 12:2​de jarabʉdebara, ¿kʼãrẽta oibara dayirãbara?

¹⁰ (Akʉra Romanos 12:2). Ẽbẽra abaʉba kʼawuabʉmina Jeowabʉrʉ zokʼaseabʉta maʉ̃ awuara iyara oũdubibara Jeowaba zokʼabʉra. Bari jaradaita, ẽbẽra abaʉba biʼia kʼawuabʉbaibara nokʼoraba kʼaseabʉta karreterade kʼãrẽaba wã bʼai ʉ̃rʉ, mamina iya maʉ̃ta ũrĩamabʉ baera mesera wãbʉ karreterade. Abarika dayirãba obʉdeba ũdubipanʉ Jeowaba zokʼabʉ oira dayirãitara audre yibiata (Prov. 12:28). Davidba naʉ̃ta kʼawuabasi baera Jeowaʼa jarasi naʉ̃ta: «Bʉa mʉ̃aʼa jaradiabʉ mʉ̃ bebʉ saʉ̃ ode bia bʼaita. Bʉ chumaerabʉ mejãcha sobiata, bʉ juwararera bayi ewari jõmaʉ̃nẽ sobiata» (Sal. 16:11).

11, 12. (1) ¿Dayirã krĩcha zroma obʉde akʉza sopʉabʉde kʼãrẽneba jʉra kʼawuabaibara? (2) ¿Filipenses 4:8bara sãwũã kʼarebabʉ dayirã baribʉde dayi ewari bia zokʼaita?

¹¹ Dayirã krĩcha zroma obʉde akʉza bedʼea zroma erbʉde jʉrʉseabʉ jemeneita, mawũã ẽ bʉrʉ nekʼãrẽ awuruta obʉ maʉ̃ ʉ̃rʉ mejãcha krĩcha ẽ baita. Maʉ̃ta obʉmina jʉra kʼawuabaibara Jeowaba jʉrabʉta oda ẽ baita (Efes. 5:10-12, 15-17).

¹² Pabloba mebẽrã pilipensera karta bʉ dia bʉeside jarasi krĩchadamarẽã aripe obʉ ʉ̃rʉ, neneẽãbʉ ʉ̃rʉ, jõma kãgade obʉ ʉ̃rʉ akʉza jõma sobiade obʉ ʉ̃rʉ (akʉra Filipenses 4:8). Pabloba bʉ ẽ basimina jemene bʼai ʉ̃rʉ, iya bʉdaba dayirãta kʼarebaseabʉ kʼawuaita kʼãrẽta oseabʉta dayirã baribʉde. Musika ũrĩbʉrʉde, bideo juego jemenebʉrʉde, pelikula akʉbʉrʉde, krĩchara naʉ̃ testoba bedʼea jarabʉ ʉ̃rʉ kʼawuaita bʉa obʉra biga bʉ kʼawuaita akʉza Jeowaba kãgabʉ kʼawuaita. Kãgapanʉ dayirãba nekʼãrẽ jõma obʉra Jeowaba kãgabʉde bamarẽã (Sal. 119:1-3). Dayirãta aduʼabʉbʉrʉ nebiata obʉ baera, naʉ̃ba kʼarebayi oita nekʼãrẽ ũbeadebema dayirã sobia bʼaita (Hech. 23:1).

NÃÃRA ORA DAIZEZEDEBEMATA

13. ¿Saʉ̃ yi ũbeadebema dayirã wãrĩnu sobiabibʉra? (Juan 4:23, 24).

¹³ ŨBEATA: Zarea ora Jeowaba kãgabʉta nããra oita. Jeowaba dayirã jõmaʉ̃ta parãsi baera iyitrʉ jʉ̃zaba abapai kãgaibara (Apoc. 4:11; 14:6, 7). Mawũẽra dayirãitara audre yibiabaibara soiduba oita Daizezeba kãgabʉta (akʉra Juan 4:23, 24). Dayirãbara kãgabʉ Daizeze jaure zareaba kʼarebamarẽã Jeowaba kãgabʉ oita iyi bedʼeade zokʼabʉ kĩrãkʼa. Nããra odaibara Jeowaba zokʼabʉta, ʉ̃kʉrʉ pʉwʉrʉmae ʉ̃kʉrʉ nokʼoraba iduaribida ẽ mina Daizezeba zokʼabʉta omarẽã. Idira mebẽrãra 100 audre karselde edabʉ ãyira Jeowa ʉ̃rʉ Kʼawuabipanurã baera.c Mawũãsidu ãyira zarea opanʉ yiwidʼita, Daizeze Bedʼea kʼawuaita, Daizeze ʉ̃rʉ jaradiaita akʉza iyi nokʼo ʉ̃rʉ. Dayirã pẽwãbʉdadera sobiapanʉ kʼawuapanʉ baera Jeowara dayirãʉ̃mebʉta akʉza iya bia akʉita (Sant. 1:12; 1 Ped. 4:14).

YIZA IDIBEMATA

14. ¿Kʼãrẽta berabarisi mebẽã aba Tayikistánʼne akʉza kʼãrẽa?

¹⁴ Dayirã mebẽrã mejãchaʉta sobiapanʉ ãyi zʉbʉriapanʉmina nekʼãrẽ ũbea bedʼeadata oũdubipanʉ baera. Akʉdaya kʼãrẽta berabarisita mebẽã Yovidón Boboyónov. Iyira 19 poaga basi karselʼeda edesidade gorogorora bakĩrã e basi baera Tayikistánʼne. 4 octubre 2019de iyi dedaʉba jida edesida, mõbe karselde eda bʉesida ẽbẽra kayirua kĩrãkʼa. Iyira mejãcha posida gorogorora bakĩrã ẽ basi baera. Iyi mawũã odapeadara naʉ̃ drʉa jõmaʉ̃nẽ kʼawuasida. Maʉ̃ tẽã juezbara iyira karselde eda bʉesi akʉza mama trajo zareata obisi. Iyira mama basi maʉ̃ pʉwʉrʉdebema nokʼoba jarayeda ãĩ bʉedamarẽã. Yovidón iyi mama karselde eda bʉedara kʼẽrẽpabasi akʉza sobiabasi iya kʼawuabasi baera audre kʼawuaibarata Daizeze ʉ̃rʉ.

15. ¿Yovidón karselde basidera sãwũã kʼawuasi Daizeze ʉ̃rʉra?

¹⁵ Yovidón iyi wabida karselde bʉeda iya audre kʼawua wãsi Daizeze ʉ̃rʉ. Iya erba ẽ basimina Daizeze Bedʼeata akʉza kartarata, ¿maʉ̃ra iyara sãwũã kʼawua wãsi? Mebẽrãbara yikota bolsade dia bʉepanasi. Maʉ̃ bolsade testo ewarizadebemata bʉ dia bʉepanasi, mawũã Yovidónbara Daizeze Bedʼea leseabasi akʉza maʉ̃ ʉ̃rʉ krĩchaseabasi. Iyi ẽdrʉbisidade iya naʉ̃ ũrãgʼata diasi yi waidide bedʼea zroma ũdu ẽãra: «Dayirã wabida ewarade bʉedara audre nesidabʉ Daizeze ʉ̃rʉ audre kʼawuaita Daizeze Bedʼeadeba akʉza kartaraneba».

16. ¿Kʼãrẽ ʉ̃rʉ krĩchabasi Yovidónbara?

¹⁶ Yovidónʼra Jeowaba kãgabʉde basi. Iyara nekayirua ʉ̃rʉ krĩcha ẽ basi akʉza nekayiruata oẽ basi, awuarabʉrʉ krĩchasi Jeowaʉ̃me kʼẽrẽpa bʼaita. Yovidónbara akʉbasi nekʼãrẽ Jeowaba jõma parãnata. Diapedara ũrĩbasi ibanara biabʉta, diamasira akʉbasi jedekota akʉza chĩdaurata. Iya jarabʉ: «Jeowaba kʼãwũã nebia diabʉba kʼarebasi mʉ̃ sobia bʼaita akʉza so zarea erbaita». Jeowaba nekʼãrẽ jõma diabʉdeba akʉza iyi bedʼeadeba ũrãgʼa diabʉdeba, dayirãsida sobiapanʉ akʉza mawũã sobiabʉba kʼarebabʉ bedʼea zroma awuantaita.

17. ¿Sãwũã kʼarebaseabʉ 1 Pedro 1:6, 7ba mebẽrãʼa Yovidón kĩrãkʼa berabaribʉra?

¹⁷ Yovidónbara nããra bʉesi Jeowaba kãgabʉta oita. Iya kʼawuabasi Daizezeare kʼẽrẽpa bʼaira audre yibiata. Jesuba jarasi: «Daizeze Jeowatrʉ kãgara iyi bedʼeatrʉ aribaedua» (Luc. 4:8). Gorogorora nokʼoraba akʉza gorogororaba kãgabasi Yovidónba idubʉmarẽã Jeowa odebʉta. Mamina Yovidónbara nrʉemaza Jeowaʼa yiwidʼibasi kʼarebamarẽã kʼẽrẽpa bʼaita akʉza mapae ẽ baita. Yovidónʼra bia edada ẽ basimina kʼẽrẽpabasi, maʉ̃ kʼarea sobiabʉ iya nãã neẽ badata erbʉ baera. Atiara iya ĩjãbʉra audre zarea erbʉ iyita zʉbʉria berabarisi baera (akʉra 1 Pedro 1:6, 7).

18. ¿Dayirãra sãwũã wãrĩnu sobia baseapanʉ?

¹⁸ Jeowaba kʼawuabʉ dayirãba kʼãrẽta nesidabʉta wãrĩnu sobia bʼaita. Bʉa naʉ̃ artikulode bedʼea ũbea kʼawuadata oũdubira, wãrĩnu sobia baseabʉ bedʼea zroma ũdubʉmina. Mawũã bʉa jaraseabʉ: «Pʉwʉrʉra sobiapanʉ kʼawuapanʉ baera ãyi zezera Jeowata» (Sal. 144:15).