Dauba bʼaidua Jeowa ewari zei nãã

1. ¿Kʼãrẽta oibara Jeowa ewaride bei ẽ baita?

DAIZEZE Bedʼeaba jarabʉde Daizeze ewari zeira, maʉ̃ba jarakĩrãbʉ iya iyi nejʉrarata kʼawua oita akʉza iyi pʉwʉrʉ ẽdrʉbita (Is. 13:1, 6; Ezeq. 13:5; Sof. 1:8). Daizeze ewarira jʉ̃drʉyi nokʼoraba Babilonia Zroma makenabʉrʉde akʉza jõñi iya Armagedón webʉrʉde. Dayirã maʉ̃ne bei ẽ baira, kʼãwũãenaʉ̃ba dauba bʼaibara. Jesuba jaradia ẽ basi bari dauba bʼaibarata, awuarabʉrʉ jarasi kĩrãkita bʼaibarata (Mat. 24:21; Luc. 12:40).

2. ¿Sãwũã kʼarebabʉ 1 Tesalonicensesba jarabʉbara?

² Yi nããrabema karta Tesalonicenses bʉ dia bʉedara, Pablobara mejãcha zokʼasi yizarata, kʼarebaita kristianora Daizeze ewari zei naena dauba panamarẽã. Pablobara kʼawuabasi Daizeze ewarira maʉ̃ ewaridera ze ẽ baita (2 Tes. 2:1-3). Mawũãsidu Pabloba ũdubisi mebẽrã dauba bʼaibarata maʉ̃ ewari nrʉema zei kĩrãkʼa. Dayirãbida maʉ̃ ũrãgʼata ũrĩnaibara, akʉdaya maʉ̃ ʉ̃rʉ, aba, sãwũã zei Daizeze ewarira. Ũme, kʼairata bei maʉ̃ ewaridera. Ũbea, sãwũã dauba bʼaibara bei ẽ baita maʉ̃ ewaride.

¿SÃWŨÃ ZEI DAIZEZE EWARIRA?

3. ¿Jeowa ewarira sãwũã zei nezrʉgamia kĩrãkʼa diamasi? (Akʉra potota).

³ «Nezrʉgamia diamasi zebari kĩrãkʼa» (1 Tes. 5:2). Naʉ̃ta yiza nããrabema Daizeze ewari sãwũã zeita. Nezrʉgamiarãra mesera zebʉ ẽbẽrarãba jʉ̃ã ẽãne. Maʉ̃ kĩrãkʼa Daizeze ewarisida mesera zeyi ẽbẽrarãba jʉ̃ã ẽãne, maʉ̃ne kristianora wãrĩnuarasida kĩrãmigabayi maʉ̃ ewari mesera berabari baera.

4. ¿Daizeze ewarira kʼãrẽne abarikabʉ yuwẽrã toita pʉa teibabariʉ̃mera?

⁴ «Yuwẽrã toita pʉa teibabari kĩrãkʼa» (1 Tes. 5:3). Yuwẽrã biogobʉbara kʼawuabʉ iyi toira, mamina kʼawua ẽ kʼãrẽ ewaride toita. Maʉ̃ mawũã berabaribʉrʉdera kʼawua ẽ bayi kʼãrẽ ewaride toita, iyira pʉanʉmeñi, mõbe iyira toi baera toyi. Maʉ̃ kĩrãkʼa Dayirãba kʼawua ẽ kʼãrẽ ewaride jʉ̃drʉita Daizeze ewarita, mamina kʼawuapanʉ Daizeze ewarira zeita akʉza iyara kʼawua oita ẽbẽra kayiruarãra akʉza maʉ̃nebara ẽdrʉ ẽ bayi.

5. ¿Kʼãrẽne abarikabʉ zʉbʉria zromata, ũnadrʉ zebʉrʉ ewariʉ̃mera?

⁵ Ũnadrʉ zebari kĩrãkʼabʉ. Pablobara akʉza jẽda jarabʉ nezrʉgamia diamasi nezrʉgabari kĩrãkʼa, naʉ̃nera Pablobara jarabʉ Daizeze ewarira ũnadrʉ uru kĩrãkʼabʉta (1 Tes. 5:4). Nezrʉgamiara ãyi nekʼãrẽ zrʉga bʉeda, ãyara kĩrãduabʉ ewarira ũnadrʉ uruta, mawũã ũnadrʉbʉrʉdera ãyira jidaseapanʉ. Maʉ̃ kĩrãkʼa zʉbʉria zroma zebʉrʉde, kʼawuadayi kʼairaba Jeowaba kãga ẽã obʉta. Mamina dayirãbara ãya obʉ awuara opanʉ daubapanʉne, Jeowaba kãgabʉ kĩrãkʼa opanʉne, nebia obʉde akʉza aripe opanʉne (Efes. 5:8-12). Maʉ̃ tẽã apostol Pabloba ũdubisi yiza ũme kʼairata ẽdrʉ ẽ baita maʉ̃ ewaride.

¿KʼAIRATA BEI MAɄ̃ EWARIDERA?

6. ¿Sãwũãbʉde kʼãĩbʉ kĩrãkʼabʉ ẽbẽrarã mejãchaʉta? (1 Tesalonicenses 5:6, 7).

⁶ «Yi kʼãĩpanʉrabara» (akʉra 1 Tesalonicenses 5:6, 7). Pabloba jarasi ẽbẽrarã Daizeze ewari zebʉrʉde beirãra kʼãĩbʉ kĩrãkʼabʉta. Ẽbẽra kʼãĩbʉbara kʼawua ẽ iyi audu kʼãrẽ berabarinʉmʉta akʉza kʼãrẽ ũmadaʉbasi. Maʉ̃ba kʼawua ẽ kʼãrẽ berabarinʉmʉta akʉza kʼãrẽ obe ẽ, idibema ẽbẽrarã kʼãĩbʉ kĩrãkʼabʉ (Rom. 11:8). Ãyitara kʼãrẽ ẽ kĩrãkʼabʉ nekʼãrẽ ũdubibʉde ewari jõbodoarepanʉta akʉza zʉbʉria zroma arakʼaitabata. Naʉ̃ drʉade nekʼãrẽ zʉbʉria ũdupanʉba ẽbẽrarã mejãchaʉba Daizeze ʉ̃rʉ kʼawuakĩrã zeseabʉ, mamina ʉ̃kʉrʉrãra ãya nãã obadata jẽda ozeseabʉ, maʉ̃ba kʼãĩbʉ kĩrãkʼa baseabʉ. Ʉ̃kʉrʉba krĩchapanʉ Daizeze ewarira zeita, mamina maʉ̃ra mejãcha waebʉta wabida zeira (2 Ped. 3:3, 4). Mamina kʼawuapanʉ kʼãwũã ewari berabari wãbʉrʉza, audre yibiata dauba bʼaita.

7. ¿Kʼãrẽne abarikabʉ ẽbẽra kĩrã purrabʉta Jeowaba makenaiʉ̃mera?

⁷ «Yi kĩrã purrabʉbara». Pablobara jarasi ẽbẽrarã Daizezeba makenaira kĩrã purrabʉ kĩrãkʼapanʉta. Ẽbẽrarã kĩrã purrabʉrabara nekʼãrẽ obʉrʉdera bia oẽ, maʉ̃ba ãya nekʼãrẽ jidabʉrʉdera aña jidabʉ. Maʉ̃ kĩrãkʼa ẽbẽrarã kayiruarabara ũrĩ ẽ Jeowaba jarabʉra, maʉ̃ba ãya jidabʉba edebʉ beieda, mamina Daizeze Bedʼeaba jarabʉ kristianora bia krĩchamarẽã (1 Tes. 5:6). Ẽbẽra Daizeze Bedʼea bia ũdukʼawuabʉba jarabʉ «bia krĩchaiba jarakĩrãbʉ, krĩcha aduʼa bʼaita mawũã iya nekʼãrẽ jidabʉrʉde bia jida kʼawuaita». ¿Kʼãrẽa aduʼabaibara? Mejãcha krĩcha zroma oẽ bʼaita drʉade nekʼãrẽ berabarinʉmʉ kʼarea, politikara ʉ̃rʉ akʉza drʉade bedʼea zroma ũdubʉ ʉ̃rʉ. Daizeze ewari arakʼaitaba baera, ẽbẽrarãbara dayirã jaradayi jʉrʉdamarẽã kʼaiare bʼaita, maʉ̃ba krĩcha zroma oẽ baibara kʼãrẽ panʉi ʉ̃rʉ, Daizeze jaure zareaba kʼarebai baera dayirã aduʼa bʼaita akʉza mawũã bia jidaita (Luc. 12:11, 12).

¿KʼÃRẼTA OIBARA JEOWA EWARIDE DAUBA BʼAITA?

8. 1 Tesalonicenses 5:8​ba jarabʉ dayirãbara nebiata ũdubibarata dauba bʼaita, ¿saʉ̃ maʉ̃ nebiarãra? (Akʉra potota).

⁸ «Jʉ̃ibara trʉ̃ãne [jʉ̃baridebemata]» akʉza kaskota. Pabloba dayirãra jarasi gorogorora kĩrãkʼabʉta yõena wãña wãbʉta (akʉra 1 Tesalonicenses 5:8). Ẽbẽrarãbara akʉpanʉ gorogororãra wãña wãbʉta yõena. Maʉ̃ra kĩrãkʼabʉ dayirãsida, dayirãba ũdubibʉ Jeowa ewari zebʉrʉdera daubabʉta, jʉ̃bʉde trʉ̃ãne jʉbari ĩjãinebemata akʉza kãgaidebemata, adewara kasko nebia jʉ̃ãinebemata jʉ̃bʉde, maʉ̃ nebia ũdubʉba mejãcha kʼarebaseabʉ.

9. ¿Ĩjãiba sãwũã kʼarebabʉ?

⁹ Trʉ̃ãne jʉ̃baribara gorogorora sota kʼarebabasi. Maʉ̃ kĩrãkʼa ĩjãiba akʉza kãga ũdubiba kʼarebayi dayirã sora, mawũã Jeowa ode kʼẽrẽpa bʼaita akʉza Jesude kĩrãkʼa oita. Ĩjãiba kʼarebayi bia kʼawuaita Jeowabara iyi jʉrʉbʉara nebia diaita (Heb. 11:6). Adewara ĩjãibara kʼarebabʉ Jesuʉ̃me kʼẽrẽpa bʼaita bedʼea zroma ũdubʉmina. Idi ewade dayirãba ĩjãbʉra audre zarea erbaseabʉ akʉbʉde mebẽrã sãwũã Jeowa ode kʼẽrẽpabʉta ãya bedʼea zroma ũdubʉmina, pẽwãpanʉmina akʉza dayirãba odara mebẽrãba oda kĩrãkʼa Jeowata nãã bʉera, jʉrʉda ẽ bayi plata mejãcha erbaita akʉza nekʼãrẽ mejãcha naʉ̃ drʉadebʉta.b

10. ¿Sãwũã kʼarebabʉ awuantaita Jeowa kãgaiba akʉza ẽbẽrarã kãgaiba?

¹⁰ Kãgaba kʼarebabʉ dauba bʼaita (Mat. 22:37-39). Daizezeta wãrĩnu kãgapanʉ baera jaradia wãpanʉ bedʼea zroma ũdupanʉmina (2 Tim. 1:7, 8). Dayirãba ẽbẽrarã Daizeze odebʉ ẽãta kãga ũdubipanʉ baera, jaradiada ʉ̃rʉ jaradiapanʉ. Jaradiapanʉ telepononeba akʉza kartadeba, jʉ̃ãpanʉ ẽbẽrarã Daizeze odebʉ ẽãta Jeowa ode bamarẽã (Ezeq. 18:27, 28).

11. Mebẽrã kãga ũdubiba, ¿sãwũã kʼarebabʉ? (1 Tesalonicenses 5:11).

¹¹ Kãgata ũdubibara dayirã mebẽrãbida. Maʉ̃ kãgara ũdubibʉ yiya so zarea diabʉde akʉza kʼarebabʉde (akʉra 1 Tesalonicenses 5:11). Dayirãra gorogorora yõne yiya kʼarebabari kĩrãkʼabʉ, gorogorora yõne wãne edaʉde ãyi kopaerorata poseabʉ, mamina ãya maʉ̃ra krĩña oẽ. Maʉ̃ kĩrãkʼabʉ dayirã mebẽrãne, ãyi sopʉabibʉde dayirãbara krĩña oẽ akʉza abarika oẽ, ãya dayi ʉ̃rʉ nekayirua oda kĩrãkʼa (1 Tes. 5:13, 15). Akʉza wawiata ũdubipanʉ mebẽrã dayirã kongregasione nãã edebʉra (1 Tes. 5:12). Pabloba maʉ̃ karta kristianora Tesalónicadebema bʉdara, mamabema kongregasionʼra poaga aba ba ẽ basi wabida, maʉ̃ kʼarea zõrãrã mamabema kongregasion yi nãã edebaribara, nekʼãrẽ mejãcha kʼawua ẽ basi baera nemitiata osibaibara, mawũãsidu maʉ̃ra mebẽrã wawiata ũdubibarabasi. Zʉbʉria zroma ewariza kʼãwũã arakʼaita wã kʼarea, dayirãbara audre ũrĩbaibara zõrãrã bedʼeara nãã ũrĩbadaira. Zʉbʉria zroma ewari zebʉrʉdera sukursalba, sede mundialʼʉ̃meba nãã zokʼabada kĩrãkʼa neẽbayi dayirãʼa kʼãrẽ omarẽãra jarabʉra, maʉ̃ba kʼãwũãena yibia dayirãba wawia ũdubita akʉza kãgata zõrãrã. Kʼãrẽ berabarimina bia krĩchabaibara akʉza akʉ ẽ baibara maʉ̃ra mebẽrãba nekayirua obʉta, awuarabʉrʉ krĩchara sãwũã Jeowaba Jesukristodeba jaradiabʉta maʉ̃ra mebẽrã.

12. ¿Nebia jʉ̃ã bʼaiba sãwũã kʼarebabʉ bia krĩchaita?

¹² Gorogorora buru kaskoba kʼarebabʉ kĩrãkʼa, abarika kʼarebabʉ dayirãsida nebia jʉ̃ã bʼaiba bia krĩchaita. Dayirãba nebia jʉ̃ãbʉta wãrĩnu ĩjãpanʉbʉrʉ, ũdupanʉ nekʼãrẽ naʉ̃ drʉade diabʉra zeri ẽãta (Filip. 3:8). Nebia jʉ̃ã bʼaiba kʼarebabʉ aduʼa bʼaita akʉza zarea bʼaita. Akʉdaya mebẽrã Wallace akʉza Laurinda yizata, maʉ̃rãra Áfricadepanʉ. COVID-19 kʼarea ãyi deda jẽda wãbe ẽ basi ãyi yibarira beiside, Wallaceba jarabʉ: «Nebia jʉ̃ã bʼaiba kʼarebabʉ mʉ̃ra krĩchaita mʉ̃ yibarira sãwũã bʼaita ẽjũã biade, nebia jʉ̃ã bʼaiba kʼarebabʉ mʉ̃ krĩcha aduʼa erbaita, mʉ̃ yibarira beida jẽda krĩcha zebʉrʉde».

13. ¿Kʼãrẽta oseapanʉ Daizeze jaure zarea erbaita?

¹³ «Daizeze jauredeba zebʉra kibiraidua» (1 Tes. 5:19). Pabloba jarasi Daizeze jaure zareara dayirãba tʉbʉ pʉrea dayirãne eda erbʉ kĩrãkʼabʉta. Dayirãba Daizeze jaure zareata erbʉbʉrʉ soiduba nebiata okĩrã odayi akʉza zarea erbayi Jeowaita trajaita (Rom. 12:11). ¿Kʼãrẽta oibara Daizezeba iyi jaure zareata diamarẽã? Jeowaʼa widibara iyi jaure zareata diamarẽã, iyi bedʼeata akʉibara akʉza Jeowa organizasione bʼaibara, Jeowaba iyi jaure zareadeba maʉ̃ta kʼarebabʉ baera. Maʉ̃ta obʉbʉrʉ neta jauredebemata erbaseabʉ (Gál. 5:22, 23).

14. ¿Kʼãrẽta oda ẽ baibara Daizeze jaure zarea erbaira? (Akʉra potota).

¹⁴ Jeowaba iyi jaure zarea diada tẽãra dayirãra jʉra kʼawuaibara iyideba jaure zarea zebʉ kibi ẽ baita. Jeowabara iyi jaure zareara diabʉ ẽbẽra iyi krĩcha jaigʉa ẽã erbʉa akʉza nekayirua oẽã. Daizezebara iyi jaure zarea dia ẽ bayi dayirãba nekayiruata krĩchabʉbʉrʉ akʉza obʉbʉrʉ (1 Tes. 4:7, 8). Daizezeba iyi jaure zarea dia bamarẽãra dayirãbara propesiarãra igara akʉ ẽ baibara (1 Tes. 5:20). Naʉ̃ bersikulode bedʼea propesiaba jarakĩrãbʉ Jeowaba nekʼãrẽ jaradata iyi jaure zareadeba, maʉ̃ra bedʼeade edabʉ Jeowa ewari zei ʉ̃rʉ akʉza dauba bʼai ʉ̃rʉ, maʉ̃ba krĩchada ẽ Armagedonʼra atia ze ẽãta, awuarabʉrʉ bia kʼawuapanʉ iyi ewari zeira arakʼaitabata. Adewara opanʉ «Daizezeba zokʼabʉta akʉza iyiʉ̃me» kʼẽrẽpapanʉ (2 Ped. 3:11, 12).

«NEKʼÃRẼ JÕMA BERA BIA AKɄIDUA»

15. ¿Kʼãrẽta oibara Diaruba dayirã sewa ẽ bamarẽãra? (1 Tesalonicenses 5:21).

¹⁵ Ʉ̃ra zeide Daizeze nejʉraba naʉ̃ta jarayi: «Aduʼa bʼaita» (1 Tes. 5:3). Diarubara maʉ̃ bedʼeadeba ẽbẽrarã naʉ̃ drʉade jõmabʉra sewayi (Apoc. 16:13, 14). Iya dayirãra sewa ẽ bayi «nekʼãrẽ bera bia [akʉbʉbʉrʉ]» (akʉra 1 Tesalonicenses 5:21). «Bia akʉidua» griego bedʼeadera jarakĩrãbʉ sãwũã ẽbẽrabara kʼawuapanasita platata akʉza orota wãrĩnu kʼawuaita, maʉ̃ kʼarea dayirãbida kĩrãkita akʉibara dayirãba akʉbʉta akʉza ũrĩbʉta wãrĩnu kʼawuaita. Maʉ̃ oita yibiabasi mebẽrã Tesalonicadebemaraitara, idibida dayirãitara naʉ̃ra audre yibia zʉbʉria zroma zeita arakʼaita ba baera. Ẽbẽrarãba jarabʉ ĩjãi kaude, bia zokʼapanʉ dayirã krĩchara, dayirãba ũrĩbʉta akʉza akʉbʉta abarikabʉ kʼawuaita Daizeze Bedʼeaba jarabʉ kĩrãkʼa akʉza Jeowa organizasionba jarabʉ kĩrãkʼa. Maʉ̃ta obʉbʉrʉ iduaribi ẽ bayi Diaruba dayirãta sewamarẽã (Prov. 14:15; 1 Tim. 4:1).

16. ¿Kʼãrẽ nebiata jʉ̃ãseapanʉ akʉza maʉ̃ba kʼãrẽta obiseabʉ?

¹⁶ Daizeze pʉwʉrʉra ẽdrʉyi zʉbʉria zromanebara, mamina dayirã aba abakaʉba kʼawua ẽ nrʉema kʼãrẽ berabarita (Sant. 4:14). Dayirãta Jeowaʉ̃me kʼẽrẽpabʉde beira zʉbʉria zroma zei naena, mawũã ẽ bʉrʉ Jeowaʉ̃me kʼẽrẽpa panʉbʉrʉ zokʼaipanʉne zʉbʉria zromane, Jeowaba jarabʉ diaita dayirã ewari jõmaʉ̃nẽ bʼaita. Yi ʉ̃ta wãirãra Jesuʉ̃me bayi, yi wuabemara Jeowaʉ̃me kʼẽrẽpa badarãra nama egorode bayi ẽjũã kĩrãwãreãnẽ. Krĩchaibara nebia jʉ̃ãbʉ ʉ̃rʉ akʉza dauba bʼaibara Daizeze ewari zei nãã.