Zõrãrã Gedeón yizade kĩrãkʼa oidua

1. 1 Pedro 5:2​ba jarabʉdebara, ¿kʼãrẽ trajo biata erbʉ zõrãrã kongregasionebemarabara?

JEOWABARA diasi zõrãrã kongregasionebema mebẽrãta akʉmarẽã. Ãyita maʉ̃ oira arigʉ yibia, wãrĩnu ãyara bia akʉbʉ mebẽrãra (Jer. 23:4; akʉra 1 Pedro 5:2). Arigʉ sobiapanʉ zõrãrã mawũã panʉta erpanʉ baera kongregasione.

2. Ʉ̃kʉrʉ zõrãrãbara, ¿kʼãrẽ bedʼea zromata ũdupanʉ?

² Zõrãrãra nekʼãrẽ mejãcha oibara. Bari jaraita, ãyara nekʼãrẽ trajo mejãcha oibara kongregasion akʉita. Tonyʼitara zareabasi kʼawuaita sainʉ oita, maʉ̃ kʼarea iyara mejãcha trajota obasi. Iyira zõrãrã Estados Unidosdebema, iya jarabʉ: «Pandemia COVID-19 jʉ̃drʉsidera nekʼãrẽ mejãcha ojʉ̃drʉsi, ãba yi jʉrebari ara oita akʉza Daizeze bedʼea sãwũã jaradia wãita, trajo oi mejãcha basimina audre owãibarabasi. Mʉ̃a nekʼãrẽ mejãcha oibarabasi baera ewari jʉrʉ ẽ basi Daizeze Bedʼea akʉita, yiwidʼita akʉza mʉ̃yidoba estudiaita». Ilirʼra zõrãrã Kosovodebemabasi, iyi bedʼea zromara awuarabasi. Iyi bʉmaera yõnebasi baera iyitara zarebasi organizasionba zokʼabada oita. Iya jarabʉ: «Sukursalba mʉ̃a jaraside mebẽrã yõnebʉra eda kʼarebamarẽã, mʉ̃itara zarebasi zowaĩnĩgʉa ũdubira, mʉ̃ra mejãcha perabasi akʉza mʉ̃mara ãya jaradara biga ẽ basi». Timʼra misionero Asiadebemabasi iyitara zarebasi nekʼãrẽ ewaridebema ewariza oita, iya jarabʉ: «Edaʉde mʉ̃ra mejãcha aukʼarabasi mebẽrãra akʉita». Zõrãrã kongregasionebemarãra, ¿kʼãrẽba kʼarebaseabʉ naʉ̃ra bedʼea zromanebʉ kĩrãkʼabʉta awuantaita?

3. ¿Dayirãbara kʼãrẽ nebiata ũduseabʉ estudiabʉrʉde Gedeón ʉ̃rʉ?

³ Zõrãrã kongregasionebemarabara juez Gedeón yizade kĩrãkʼa oseapanʉ (Heb. 6:12; 11:32). Gedeónbara akʉbasi Jeowa pʉwʉrʉrãra (Juec. 2:16; 1 Cró. 17:6). Jeowabara abarika Gedeón jidada kĩrãkʼa idibida jidasi zõrãrãta, iyi pʉwʉrʉta akʉmarẽã kʼãwũã bedʼea zroma idi ewade ũdubʉde (Hech. 20:28; 2 Tim. 3:1). Gedeónbara ũdubisi edabʉta krĩchabasita, sainʉ oita kʼawuabʉta ũdubibasi akʉza ũrĩbasi. Idi ewade dayirãbara nekʼãrẽ kʼawuaseapanʉ iya kʼãwũã ũdubidadeba. Dayirã zõrãrãta, zõrãrã ẽãta, zõrãrã biga diabʉta ũdubi kʼawuaibara akʉza kʼarebaibara maʉ̃ra mebẽrã kongregasion akʉbʉrata (Heb. 13:17).

¿KʼÃRẼTA OSEABɄ ZAREABɄBɄRɄ EDA KRĨCHABɄ ŨDUBITA AKɄZA SAINɄ OITA KʼAWUABɄ ŨDUBITA?

4. ¿Gedeónbara sãwũã ũdubisi eda krĩchabʉta akʉza kʼawuabasita sainʉ oseabʉta?

⁴ Gedeónbara eda krĩchabʉta ũdubibasi akʉza kʼawuabasi sainʉ oita.b Angelba jaraside Gedeónba ẽdrʉbita israelitara madianitara juwadeba, iya jarasi: «Manasésdebemanera mʉ̃ mebẽrã kʼãrẽ ẽ kĩrãkʼabʉ akʉza mʉ̃ zeze dedabemara mʉ̃ta yi audre kʼãrẽ ẽ kĩrãkʼabʉ» (Jue. 6:15). Iya krĩchabasi maʉ̃ra obe ẽãta, mamina Jeowabara kʼawuabasi iya oseabʉta. Jeowa kʼarebadeba Gedeónbara aripe osi Jeowaba zokʼadara.

5. ¿Sãwũãbʉde zarea baseabʉ zõrãrãitara ũdubita sainʉ oita kʼawuabʉta akʉza eda krĩchabʉ ũdubita?

⁵ Zõrãrãbara zarea obʉ ũdubita sainʉ oita kʼawuabʉta akʉza eda krĩchabʉ ũdubita, nekʼãrẽ jõma obʉde (Miq. 6:8; Hech. 20:18, 19). Aukʼara bedʼea ẽ ãya nebia obʉ kʼarea akʉza krĩcha ẽ ãyira zeri ẽãta nekayiruata obʉ baera. Zõrãrãbara bedʼea zromata ũduseabʉ. Bari jaraita, iya jaraseabʉ iya nekʼãrẽ jõma zokʼadapeadara oseabʉta, mamina tẽãra iyitara zarea baseabʉ maʉ̃ jõma aribaeita. Edaʉde zõrãrãitara zare baseabʉ eda krĩchabʉ ũdubita, mawũã ẽ bʉrʉ sainʉ oita kʼawuabʉ ũdubita wuabemaraba iya nekʼãrẽ oda kʼarea ibia bedʼeabʉ baera, mawũã ẽ bʉrʉ iya oda kʼarea aña jarapanʉne. ¿Zõrãrãbara kʼãrẽta kʼawuaseapanʉ Gedeón ʉ̃rʉra mawũã berabaribʉrʉdera?

6. ¿Zõrãrãbara sãwũã kʼawuaseabʉ Gedeón yiza ʉ̃rʉ sainʉ oita kʼawuabʉ ʉ̃rʉra? (Akʉra potota).

⁶ Kʼarebata widira. Ẽbẽra sainʉ oita kʼawuabʉbara kʼawuabʉ kʼãrẽta obe ẽãta. Gedeónbara kʼawuabasi sainʉ oseabʉta, maʉ̃ kʼarea kʼarebata widisi wuabemara (Juec. 6:27, 35; 7:24). Zõrãrãbara iyide kĩrãkʼa oibara, Tonyba jarabʉ: «Mʉ̃ wũãwũãraena sãwũã dapʉẽnaneba, mʉ̃a trajo erbadata awuara ĩjãbasi mʉ̃a oẽãsidu, maʉ̃ kʼarea mʉ̃ kimaʉ̃me estudiasidera, estudiasi sainʉ oita kʼawuai ʉ̃rʉ akʉza mʉ̃a jarasi mʉ̃ kima jara ũrĩbimarẽã mʉ̃a kʼãrẽne awuara oseabʉta akʉza jw.org de akʉsi bideo yi trʉ̃ Tal como Jesús, capacitemos a otros y confiemos en ellos». Tonybara jarasi wuabemara mebẽrã kʼarebamarẽã iyi trajo oita. Maʉ̃ tẽãra, ¿kʼãrẽta berabarisi? Tonyba jarabʉ: «Kongregasionera trajo biata opanʉ akʉza ewarita erbʉ mʉ̃yidobaʉba Daizeze Bedʼea akʉita, mawũã audre Jeowa kʼawa bʼaita».

7. Ãyi ʉ̃rʉ imitia jarapanʉbʉrʉ, ¿sãwũã Gedeónʼne kĩrãkʼa oseapanʉ zõrãrãbara? (Santiago 3:13).

⁷ Bʉ ʉ̃rʉ imitia bedʼeabʉbʉrʉ kĩrʉrãra. Ʉ̃kʉrʉ zõrãrãitara zarea baseabʉ ãyi ʉ̃rʉ imitia bedʼeabʉrʉde, mamina Gedeón yizaba kʼarebaseabʉ. Iyara kʼawuabasi iyira nekayirua omiata, maʉ̃ kʼarea eprainitara iyi ʉ̃rʉ imitia bedʼeasidera kĩrʉ ẽ basi (Juec. 8:1-3). Gedeónbara kĩrʉ panʉ ẽ basi awuarabʉrʉ edabʉta ũdubisi ãyi bedʼea ũrĩbaside, mawũã bedʼea zromara ara osida. Zõrãrãbara abarika opanʉ ãyi ʉ̃rʉ imitia bedʼeasimina ũrĩpanʉne kĩrʉ ẽã (akʉra Santiago 3:13). Mawũã obʉba kʼarebabʉ kongregasione aduʼa bʼaita.

8. ¿Zõrãrãbara sãwũã panʉseabʉ ãyi ʉ̃rʉ ibia bedʼeabʉrʉde? Yizata aba jara ũrĩbira.

⁸ Jeowa ʉ̃rʉ ibia bedʼeabidua. Gedeónba madianitara iyi juwa edre baebiside, wuabemara iyi ʉ̃rʉ ibia bedʼeasi, mamina iya osi Jeowa ʉ̃rʉ ibia bedʼeamarẽã (Juec. 8:22, 23). ¿Zõrãrãbara sãwũã Gedeónba oda kĩrãkʼa oseapanʉ? Maraba nebia obʉ kʼarea Jeowa ʉ̃rʉ ibia bedʼeabiseabʉ (1 Cor. 4:6, 7). Bari jaradaita, mebẽã abaʉa jaradara bʉa kʼãrẽaba bia obʉta, mebẽãba jaraseabʉ maʉ̃ra zebʉta Daizeze Bedʼeadeba akʉza organizasioneba. Zõrãrãbara krĩchaibara ãya mawũã jaradiabʉra Jeowa ʉ̃rʉ ibia bedʼeamarẽã mawũã obʉta, mawũã ẽ bʉrʉ wuabemaraba iyita akʉmarẽã mawũã obʉta. Krĩchadaya zõrãrã abaʉ ʉ̃rʉ, iyi trʉ̃ra Timoteo. Iyi zõrãrã bʼaita jarasidadera iyara kãgabasi jipa diskurso diaita, iya jarabʉ: «Mʉ̃a jara ũrĩbibasi bedʼea drazoabʉta akʉza biʼia, maʉ̃ kʼarea ẽbẽrarã mejãcha ibia bedʼeabasi mʉ̃ ʉ̃rʉ. Mamina mawũã obadaba mʉ̃ara ũdubibasi mʉ̃ ʉ̃rʉbʉrʉ ibia bedʼeabibʉta, mawũã Jeowa ʉ̃rʉ, mawũã ẽ bʉrʉ Daizeze Bedʼea ʉ̃rʉ ibia bedʼeabi ẽ basi». Ewari berabari wãne Timoteobara kʼawuasi nekʼãrẽ awuara oibarabasita, mawũã iyita akʉda ẽ bamarẽã (Prov. 27:21). Iya mawũã odadeba, ¿kʼãrẽta berabarisi? Iya jarabʉ: «Idi ewadera mebẽrãba mʉ̃a nebʉrabʉ mʉ̃a kʼãwũã diskurso obʉba ãyira mejãcha kʼarebabʉta, ãyi bedʼea zromane, pẽwãpanʉne awuantaita akʉza audre Jeowa kʼawa bʼaita. Mʉ̃ra atiara mejãcha sobiabʉ mebẽrãba kʼãwũã jarabʉ kʼãrẽa nãã jarabadaira».

¿KʼÃRẼTA OSEABɄ ZAREABɄRɄ ŨRĨTA MAWŨÃ Ẽ BɄRɄ ZOWAĨNĨGɄA ŨDUBITA?

9. ¿Kʼãrẽba zare baseabasi Gedeónʼitara ũrĩta akʉza zowaĩnĩgʉa bʼaita? (Akʉra poto yi nããrabemata).

⁹ Gedeón juez bʼaita jidasidera Israel pʉwʉrʉ nãã bʼaibarabasi. Maʉ̃ oita ũdubibarabasi ũrĩbʉta akʉza zowaĩnĩgʉabʉta, iyaʼa jarasida Baal altarta ãrĩmarẽã yi zeze yiwidʼibadata (Juec. 6:25, 26). Jeowaba jarada ũme jarasi iyi gorogororata eda babimarẽã (Juec. 7:2-7). Akʉza jarasi iyi nejʉrarabawara yõ wãmarẽã diamasi (Juec. 7:9-11).

10. ¿Kʼãrẽba oseabʉ zõrãrãitara zarea bʼaita ũrĩta?

¹⁰ Zõrãrãbara ewari jõmaʉ̃nẽ ũrĩbʉta ũdubibara (Sant. 3:17). Zõrãrã ũrĩbʉbara obʉ Daizeze Bedʼeaba jarabʉta akʉza Daizeze organizasionba jarabʉta. Mawũã wuabemara ũdubibʉ yiza biata, mamina zõrãrãitara edaʉde zarea baseabʉ ũrĩta. Zõrãrãitara zarea baseabʉ iya kʼãrẽ jaradapeada oita, mawũã oũdubita. Edaʉde zõrãrãbara krĩchaseabʉ ãya jaradiabʉra wãrĩnu kʼarebabʉ kʼawuaita, mawũã ẽ bʉrʉ wãrĩnu ĩjãbʉ kʼawuaita. Edaʉde jaraseapanʉ zõrãrã nekʼãrẽ odamarẽã iyi karsel eda wãbiseabʉta. Mawũã berabaribʉrʉdera zõrãrãbara, ¿sãwũã Gedeónba oda kĩrãkʼa oseapanʉ?

11. Zõrãrãba ũrĩmarẽãra, ¿kʼãrẽba kʼarebai?

¹¹ Kĩrãkita ũrĩdua bʉa kʼãrẽ jarabʉta mõbe oũdubira. Jeowabara jarasi Gedeónʼa yi zeze altar sãwũã ãrĩta, sama odaibasita Jeowaita altar yiwidʼita akʉza kʼãrẽ nedʉwʉrʉta beaibarabasita Jeowaita sakripisio diaita. Gedeónʼra imitia bedʼea ẽ basi maʉ̃ kʼarea, awuarabʉrʉ iya zokʼadapeadara jõma osi. Idi ewadera Jeowa organizasionbara jarabʉ zõrãrã kartaraneba akʉza bedʼea jara bʉepanʉneba, maʉ̃ne ãyaʼa jara ũrĩbibʉ kʼãrẽta oibarata, kʼarebaita Jeowa pʉwʉrʉ audre Jeowa kʼawa bamarẽã. Daibara mejãcha kãga zõrãrã kongregasionebemara ãya ũrĩbʉ baera Daizeze organizasionba jarabʉta. Maʉ̃ba kongregasion jõmaʉ̃ba ũdupanʉ nebiata (Sal. 119:112).

12. ¿Zõrãrãbara sãwũã oseapanʉ Hebreos 13:17​ba jarabʉta organizasionba nekʼãrẽ awuara obʉbʉrʉ?

¹² Bʉa kʼãrẽ awuara jarabʉdamina soiduba ora. Kĩrãbeidua Jeowabara jarasi Gedeónʼa, audre eda babimarẽã iyi gorogororãra (Juec. 7:8). Maʉ̃ kʼarea iya krĩchasibaibara: «¿Wãrĩnu maʉ̃ta oibaraka? ¿Maʉ̃ta ora bia bʼaika?». Mawũãsidu Gedeónbara ũrĩsi. Idi ewadera zõrãrãbara Gedeónba oda kĩrãkʼa ũrĩpanʉ, Jeowa organizasionba nekʼãrẽ awuara ojarabʉdade (akʉra Hebreos 13:17). Bari jaraita, 2014de Zõrãrã Burubiaba awuara osi sãwũã plata ũduita ãba yi jʉrebari de oita akʉza asamblea obari de oita (2 Cor. 8:12-14). Nããra organizasionbara prestapanasi platara kongregasionʼa, mawũã ãba yi jʉrebari de oita, maʉ̃ta tẽã kongregasionʼrabara jẽda diapanasi maʉ̃ platara. Mamina idi ewadera organizasionbara mebẽrã naʉ̃ drʉa jõmaʉ̃nẽbemaba donasionta diabʉta zokʼabʉ Daizeze de oita akʉza asamblea obari de oita audre nesidabʉmae. Kongregasion odaimae plata wika diabʉmina. Joséba organizasionba maʉ̃ omarẽã zokʼaside iya krĩchasi: «Kʼãwũãra mia ababida oda ẽ bayi ãba yi jʉrebarira, mʉ̃ bʉmaera mawũã oda ẽ baera». ¿Joséra kʼãrẽba kʼarebasi ũrĩta organzasionba jarabʉta? Iya jarabʉ: «Proverbios 3:5, 6​ba mʉ̃aʼa kĩrãbebisi Jeowa ʉ̃rʉ wãrĩnu ĩjãibarata, kʼãwũã odadeba nebiata mejãcha ũdubʉrʉ, atiara audre opanʉ ãba yi jʉrebari deta akʉza kʼawuasida sãwũã awuara parãnaita, mawũã jõma daucha bamarẽã».

13. (1) ¿Gedeónbara kʼãrẽ ʉ̃rʉ wãrĩnu ĩjãbasi? (2) ¿Zõrãrãbara sãwũã Gedeónʼne kĩrãkʼa oseapanʉ? (Akʉra potota).

¹³ Zowaĩnĩgʉabʉta ũdubira Jeowaba jarada oita. Gedeónbara jõma ũrĩsi Jeowaba zokʼadara iyi perabasimina akʉza bebʉdebasimina (Juec. 9:17). Iya kʼawuaside Jeowara iyiare bʉta iya wãrĩnu ĩjãsi Jeowaba kʼarebaita iyi pʉwʉrʉ akʉmarẽã. Zõrãrã kongregasionebema bʉmae idu jaradiabida ẽ bʉrʉ Gedeónba oda kĩrãkʼa oseabʉ. Ãyara zowaĩnĩgʉata ũdubibʉ ãba yi jʉrebarima wãbʉde, deza deza jaradia wãbʉde, ãyi karselde ibalbʉedaya apanʉmina, mawũã ẽ bʉrʉ jarapanʉbʉrʉ ãyi podaita akʉza ãyi trajodeba ãĩ bʉedaita.c Zʉbʉria zroma zebʉrʉdera zõrãrãbara ũdubidaibara zowaĩnĩgʉabʉta. Bari jaradaita, dayirã jaradayi sãwũã jarakamarẽã ẽbẽrarã Jeowaba ãyira kʼawua oita akʉza dayirãra kʼãrẽta oibarata bei ẽ baita, Gog de Magogba dayirã pẽwãbʉrʉde (Ezeq. 38:18; Apoc. 16:21).

¿KʼÃRẼTA OSEABɄ ZAREABɄRɄ AWUANTAITA?

14. ¿Kʼãrẽa Gedeónʼitara zareabasi awuantaira?

¹⁴ Gedeónʼra zarea trajaibarabasi juez bʼaita. Gedeón diamasi madianitabawara yõ wãside, ãyira mĩrʉ wẽba mawãsi, aramaʉ̃ta Gedeónbara kʼaidu pẽwã wãsi Jezreelʼidubayeda, maʉ̃ audura bakuruta mejãchabasikĩrã, maʉ̃ra Jordán kʼawabasi (Juec. 7:22). ¿Iyira do Jordánʼinʉpai jʉ̃ẽ kʼãrãpe jẽda wãsika? Mawũã ẽ. Gedeónta akʉza iyi gorogorora 300 bʉta mejãcha aukʼarabasimina, dokĩrãbarida kʼãrãpe akʉza pẽwã wãsida madianitarãra mõbe ãyi juwa edre baebisida (Juec. 8:4-12).

15. ¿Kʼãrẽba mapaseabʉ zõrãrãra?

¹⁵ Edaʉde zõrãrã abaʉta mejãcha mapae sentiseabʉ, akʉbʉ baera kongregasionta akʉza yi mebẽrãta. Mawũã berabaribʉrʉdera, ¿zõrãrãbara sãwũã Gedeónʼne kĩrãkʼa oseapanʉ?

16, 17. ¿Kʼãrẽba kʼarebasi Gedeónba awuantaita akʉza zõrãrãbara kʼãrẽ ʉ̃rʉ ĩjãseabʉ? (Isaías 40:28-31, akʉra potota).

¹⁶ Wãrĩnu ĩjãra Jeowaba bʉa zarea diaita. Gedeónbara wãrĩnu ĩjãbasi Jeowaba kʼarebaita, maʉ̃ra aripe berabarisi (Juec. 6:14, 34). Ewari aba Gedeónba akʉza iyi kʼaidupanʉraba pẽwã jʉ̃ẽsida nokʼo ũme Madiánʼnebemata, maʉ̃ra kameyode bari wãbasimina (Juec. 8:12, 21). Mamina Jeowabara maʉ̃ra israelitara juwa edre baebisi nokʼorãra. Zõrãrãbida ĩjãseabʉ Jeowa ʉ̃rʉ «iyira pae ẽ» baera, iyara diayi zareara maʉ̃raba nesidabʉ ewaride (akʉra Isaías 40:28-31).

¹⁷ Krĩchara Matthew kʼãrẽ berabarida ʉ̃rʉ. Iyira Mebẽrã medikobawara bedʼeapanʉradebema, ¿kʼãrẽba awuanta zebʉrʉ iyara? Matthewba jarabʉ: «Mʉ̃a sentibʉrʉ Jeowa zareara Filipenses 4:13​ba jarabʉ kĩrãkʼa, mʉ̃a sentibaside mʉ̃a wua oẽãta akʉza mapaebʉta, Jeowaʼa yiwidʼibasi zarea diamarẽã, mawũã mebẽrã kʼarebaita. Mawũã berabaribʉba, mʉ̃a sentibʉ Jeowa jaure zareaba mʉ̃ra zarea babibʉta akʉza kʼarebabʉta awuantaita». Zõrãrãbara Gedeónʼne kĩrãkʼa akʉbʉ Jeowa pʉwʉrʉra ãyita edaʉde zareamina. Sainʉ oita kʼawuabʉta ũdubibara zõrãrãbara adewara kʼawuaibara ãyara jõma obe ẽãta, mamina ãyara ĩjãibara Jeowaba ãyira kʼarebaita ãya kʼareba widibʉra akʉza zarea diaita bedʼea zroma awuantamarẽã (Sal. 116:1; Filip. 2:13).

18. ¿Dayirãba nama kʼawuabʉ kĩrãkʼa zõrãrãbara sãwũã oseabʉ Gedeónba obada kĩrãkʼa?

¹⁸ Zõrãrãbara nekʼãrẽ mejãcha kʼawuaseabʉ Gedeón yizadeba. Zõrãrãbara ũdubibara sainʉ oita kʼawuabʉta mawũã trajo mejãcha jida ẽ baita akʉza jʉra kʼawuabaibara ãyi ʉ̃rʉ ibia bedʼeapanʉne, adewara ãyi ʉ̃rʉ imitia bedʼeapanʉne. Akʉza ũdubibara ãyira zowaĩnĩgʉabʉta akʉza ũrĩbʉta Jeowaba jarabʉta audre kʼãwũã Jeowa ewari arakʼaitaminane. Adewara wãrĩnu ĩjãibara ãyira Jeowaba kʼarebaita bedʼea zroma ũdubʉrʉde akʉza zarea diaita awuantamarẽã. Daibara arigʉ kãgapanʉ zõrãrã kʼãwũãpanʉra akʉza dayirãitara ãyira arigʉ yibia (Filip. 2:29).