Lepanʉraba Widipanʉta

Jesu todapeada tẽãra, ¿kʼãrẽa Joséta Maríaʉ̃mera Belénʼne besida jẽda Nazaretʼeda wãi kaude?

Daizeze Bedʼeabara jara ẽ kʼãrẽa mama panesita. Mamina jarabʉ kʼãrẽ kʼarea krĩchasidata mama bʼaita.

Angel abaʉba Maríaʼa jarasi iyira biogo beita. Angelba mawũã jarasidera Joséta Maríaʉ̃mera panasi Nazaretde, mama warisi Joséra, Nazaretʼra Galilea pʉwʉrʉdebemabasi (Luc. 1:26-31; 2:4). Tẽãne ãyi Egiptodeba zesidera Nazaretʼeda wãsi. Mama warisi Jesura, maʉ̃ba iyira Nazaretdebemabasi (Mat. 2:19-23). Maʉ̃ba Jesu ʉ̃rʉ akʉza José María ʉ̃rʉ bedʼeabʉrʉdera, krĩchapanʉ Nazaret ʉ̃rʉ.

Maríabara erbasi mebẽrãta yi trʉ̃ Elisabetʼta, maʉ̃ra Judádebasi. Iyi kimara Zacaríasbasi, maʉ̃ra saserdotebasi, Elisabetʼra Juan buru kʼoebibada papabasi (Luc. 1:5, 9, 13, 36) Maríabara Judáde akʉ jʉ̃ẽsi Elisabetʼta, mama besi jedeko ũbeabayeda. Maʉ̃ tẽã iyira jẽda zesi Nazaretʼeda (Luc. 1:39, 40, 56). Maríabara biʼia ũdukʼawuabasi Judá pʉwʉrʉra.

Tẽã juneane Joséra wãibarabasi Nazaretdeba Belénʼena mama rejistraita, mawũã nokʼoraba zokʼabadade aripe oita. Belénʼra David pʉwʉrʉbasi akʉza propesiaraba jarasi mama todaita Dayirã ẽdrʉdibarira (Luc. 2:3, 4; 1 Sam. 17:15; 20:6; Miq. 5:2). María mama tosidera, Josébara jʉ̃ã ẽ basi wũãwũã yi zake tomaena jẽda wãita Nazaretʼeda. Ãyira besida Belénʼne, maʉ̃ra Jerusalénʼneba 9 kilometrobasi. Maʉ̃ba ãyara temploeda edeseabasi wũãwũãra akʉza oprenda diaseabasi Leyba jarabʉde (Lev. 12:2, 6-8; Luc. 2:22-24).

Angelba jarasi Maríaʼa, Jeowabara yi warra Jesuʼa diaita «Davidba zokʼabadata», mawũã zokʼaita. José Maríaʉ̃mebara krĩchabasibaibara yibiabasita Jesura David pʉwʉrʉde tosida baera (Luc. 1:32, 33; 2:11, 17). Maʉ̃ba mama panasibaibara jʉ̃ãpanʉ baera Jeowaba kʼawua jaramarẽã ãya kʼãrẽ oita.

Bia kʼawuada ẽ Joséta Maríaʉ̃me sõbe ewari panasita Belénʼne chĩdaura akʉpanʉraba ãyi akʉ jʉ̃ẽside. Maʉ̃raba akʉ jʉ̃ẽsidera Joséta Maríaʉ̃mera dearadebasi, akʉza Jesura arabiachuasi, wũãwũã zake toma ẽ basi (Mat. 2:11). Mawũẽra Nazaretʼeda wãi kʼaude ãyira ariyapanesi Belénʼne, maʉ̃ta ãyi drʉabasi.

Maʉ̃ta nokʼo Herodesba jarasi wũãwũã zakera poaga ũmebʉdeba edabʉta jõma makenamarẽã (Mat. 2:16). Maʉ̃ne angel abaʉba jarasi Joséʼa wãmarẽã Belénʼneba, maʉ̃ba Josébara Maríata Jesuʉ̃me edesi Egiptoʼeda, mama mĩrʉpanasi Herodes beiyeda. ¿Kʼãrẽa jẽda wã ẽ basi Belenʼenara? Mamara zokʼabasi baera Herodes warra Arquelaoba akʉza maʉ̃ra nokʼo kayiruabasi. Adewara angel abaʉba jarasi Joséʼa biga ẽ basi mama wãira, maʉ̃ kʼarea Josébara edesi yi mebẽrãra Nazaretʼeda. Mama bia dapʉẽseabasi Jesura, mawũã iya omarẽã Jeowaba zokʼabʉta (Mat. 2:19-22; 13:55; Luc. 2:39, 52).

Joséra beisibaibara Jesu bei nãã. Maʉ̃ kʼarea iyira ʉ̃ta wã ẽ basi, awuarabʉrʉ nama egorode ẽjũã kĩrãwãreãnẽ bayi. Maʉ̃ba ẽbẽra yi egorode piradrʉibara Joséʼa widiseabʉ audre kʼawuaita kʼãrẽa Jesu toda tẽãra ariya basita Belénʼne.