Jaradia wãbʉrʉde sobiade odadrʉ

1. ¿Ʉ̃kʉrʉra sãwũã sentibʉ Daizeze bedʼea jaradia wãbʉrʉdera? (Akʉra potota).

JEOWA pʉwʉrʉdebemarãra mejãchade sobiapanʉ awurura Daizeze Bedʼea jaradia wãbʉrʉdera. Ãyara maʉ̃ta opanʉ Jeowata kãgapanʉ baera akʉza kãgapanʉ baera ẽbẽrarãbida iyita ũdukʼawuadamarẽã. Ʉ̃kʉrʉitara Daizeze Bedʼea jaradia wãira jipade yibia, ãya okĩrãne opanʉ maʉ̃ra. Mamina ʉ̃kʉrʉ mebẽrãraitara maʉ̃ oira zareabʉ, ¿kʼãrẽa? Ʉ̃kʉrʉra perapanʉ krĩchapanʉ baera ãyara Daizeze Bedʼeara biʼia jaradiabe ẽãta. Akʉza perapanʉ awuru ẽbẽraba iyi deidu jʉ̃ẽmarẽã trʉ̃ ẽ basibʉrʉ maʉ̃ne jʉ̃ẽtotoita. Adewara ʉ̃kʉrʉra perabʉ Daizeze Bedʼea iya jaradiabʉrʉde awuruba ũrĩkĩrã ẽ bai kʼarea. Mawũã ẽ bʉrʉ ʉ̃kʉrʉara jaradiasida awuru ẽbẽrarãʉ̃me yõ jʉrʉ ẽ marẽã. Maʉ̃ba naʉ̃ra mebẽrãba Jeowa mejãcha kãgapanʉmina ãyitara zarea bʉ ẽbẽra ãya ũduka Daizeze Bedʼea jaradiaira. Mawũãsidu naʉ̃ra mebẽrãbara kʼawuapanʉ kʼãrẽãba yibiata Daizeze Bedʼea jaradia wãira ẽbẽrarã, maʉ̃ kʼarea badua jaradia wãpanʉ Daizeze Bedʼeata. Ãya maʉ̃ta obʉrʉdera Jeowara mejãcha sobiabʉ.

2. Bʉa Daizeze Bedʼea jaradia wãbʉrʉde sobiade oẽ bʉrʉ, ¿kʼãrẽa sopʉa ẽ baibara?

² Bʉta Daizeze bedʼea jaradia wãbʉrʉde sobiabʉ ẽ bʉrʉ, maʉ̃ kʼarea krĩcha orãra. Bʉa krĩchabʉ baera bʉara biʼia oau ẽãta maʉ̃ta, naʉ̃ba ũdubibʉ eda krĩchabʉta, kãga ẽ baera awururaba bʉ ʉ̃rʉbʉrʉ audre ibia bedʼeamarẽã. Adewara ũdubibʉ bʉara kãga ẽãta awururaʉ̃me bedʼea kʼaita. Dayirãnebema mia abaʉba kãga ẽ bedʼea bia awurura jarabʉrʉde maʉ̃raba ũrĩkĩrã ẽ baira. Jeowabara biʼia kʼawuabʉ bʉa kʼãrẽ bedʼea zroma ũdubʉra, maʉ̃ kʼarea iya kʼarebakĩrãbʉ bʉa kʼareba nesidabʉrʉde (Is. 41:13). Naʉ̃ artikulode kʼawuadayi bedʼea juesoma dayirãba Daizeze Bedʼea jaradia wãbʉrʉde sãwũã audre sobiade oita.

DAIZEZE BEDʼEABA ZAREA DIAYI

3. ¿Kʼãrẽba kʼarebasi propeta Jeremíasba awurura jaradiamarẽã?

³ Nããbedara Daizeze ode panʉraba bedʼea zroma ũdubʉrʉdera Daizeze Bedʼeaba kʼarebabasi ãya so zarea erbamarẽã. Mawũã berabarisi propeta Jeremíasta. Jeowaba iyaʼa Daizeze Bedʼea jaradia wãmarẽã jarasidera Jeremíasʼra krĩcha osi. Iya naʉ̃ta jarasi: «Mʉ̃ra bia bedʼeabe ẽ warrara bʉ baera» (Jer. 1:6). ¿Kʼãrẽba so zarea diasi iya Daizeze Bedʼea jaradia wãmarẽã? Jeowaba iyaʼa bedʼea jaradaba kʼarebasi. Jeremíasba jarabʉ: «Iya bedʼea jaradara mʉ̃ sode pʉrea eradrʉnʉmʉta bʉwʉrʉba idu ãĩ wãbi ẽ kĩrãkʼa besi akʉza mʉ̃ra mapaesi maʉ̃ta idu ãĩ wãbi ẽ baera» (Jer. 20:​8, 9). Jeremías bʉmae ẽbẽrarãba iya jaradiabʉ ũrĩkĩrã ẽ basimina, Jeowaba iyaʼa bedʼea jaradaba zarea diasi aripe omarẽã Jeowaba zokʼadata.

4. ¿Kʼãrẽta berabari Daizeze Bedʼeata akʉpanʉbʉrʉ akʉza maʉ̃ ʉ̃rʉ krĩchapanʉbʉrʉ? (Colosenses 1:​9, 10).

⁴ Kristianorabara so zarea ũdubʉ Daizeze Bedʼeadeba. Pabloba kolosensera karta bʉ dia bʉeside, ãyaʼa jarasi ãya Jeowaba kʼãrẽta omarẽã kãgabʉ ʉ̃rʉ biʼia kʼawuapanʉbʉrʉ, naʉ̃ba kʼarebaibasita ãya nebiata odamarẽã akʉza Jeowaba kãgabʉta oita (akʉra Colosenses 1:​9, 10). Maʉ̃ra nebiarane eda bʉ Daizeze Bedʼea jaradia wãita. Dayirãba Daizeze Bedʼea akʉbʉrʉde akʉza maʉ̃ ʉ̃rʉ krĩchabʉrʉde, naʉ̃ba kʼarebayi dayirãba Jeowa ʉ̃rʉ ĩjãbʉta audre zarea erbamarẽã. Adewara audre biʼia kʼawuadayi kʼãrẽãba yibiata Daizeze Bedʼea jaradia wãita.

5. ¿Kʼãrẽba kʼarebaseabʉ Daizeze Bedʼea akʉbʉrʉde audre bia kʼawuaita?

⁵ Bʉa Daizeze Bedʼeade akʉbʉrʉdera, maʉ̃ta mesera orãra akʉza bʉa maʉ̃ ʉ̃rʉ krĩchabʉrʉdebida mesera orãra. Awuarabʉrʉ ewari jʉrʉra maʉ̃ ʉ̃rʉ pikãga krĩchaita. Adewara bʉa Daizeze Bedʼeade akʉbʉrʉde ũdura bersikulo aba bia ũrĩ ẽãta, maʉ̃ta waña berabaritotorãra awuarabʉrʉ jʉrʉra Indice de las publicaciones Watch Tower, mawũã ẽ bʉrʉ Guía de estudio para los Testigos de Jehová abʉmae. Nama bʉa ũduseabʉ maʉ̃ bersikulo ʉ̃rʉ audre bia jara ũrĩbibʉta. Mawũẽra bʉa ewarita jʉrʉbʉbʉrʉ Daizeze Bedʼea akʉbʉrʉde biʼia kʼawuaita, naʉ̃ba kʼarebayi bʉa audre ĩjãmarẽã Daizeze Bedʼeaba jarabʉra wãrĩnuta (1 Tes. 5:21). Bʉa kʼawua wã ʉ̃rʉ audre biʼia ĩjãbʉbʉrʉ naʉ̃ba kʼarebayi Daizeze Bedʼeata sobiade jaradia wãita.

DAIZEZE BEDʼEA JARADIA WÃI NÃÃ BIA KʼAWUARA KʼÃRẼ JARAITA

6. ¿Kʼãrẽa bia krĩchaibara jaradia wãi naweda?

⁶ Bʉa Daizeze Bedʼea jaradia wãi nãã bia krĩchabʉbʉrʉ kʼãrẽta oita, naʉ̃ba kʼarebayi bʉ awururaʉ̃me bedʼeabʉrʉde aduʼa baita. Jesuba kʼarebasi iyi kʼaidubemaraba jaradia wãi nãã biʼia krĩchadamarẽã kʼãrẽta oibarata (Luc. 10:​1-11). Jesu kʼaidubemarabara Jesuba jaradade osida baera, nebiata osida akʉza naʉ̃ba kʼarebasi ãyisida sobia bʼaita (Luc. 10:17).

7. ¿Kʼãrẽta oseapanʉ jaradia wãi nãã? (Akʉra potota).

⁷ Daizeze Bedʼea jaradia wãi nããra dayirãbara nãã krĩchaibara kʼãrẽta jarakĩrãpanʉta akʉza maʉ̃ta dayi bedʼeabʉde jara ũrĩbita. Adewara krĩchaseabʉ dayi bʉmae ẽbẽrarãba daya jaradiabʉrʉde sãwũã panʉseabʉta akʉza ãya panʉbʉdeba dayabida ãyaʼa kʼãrẽta jara ũrĩbiseabʉta. Akʉza zarea ora ẽbẽrarã jaradia wãbʉrʉde aduʼa bʼaita, ipidaita akʉza ãyaʼa ũdubita bʉra mia bedʼeaseabʉta.

8. ¿Pabloba jaradadebara kristianorãra kʼãrẽne abarika bʉ kʉgʉrʉme?

⁸ Pabloba yiza abaʉdeba jara ũrĩbisi dayirãba Daizeze Bedʼea jaradia wãbʉrʉde kʼãrẽta opanʉta. Iya jarasi: «Nekʼãrẽ biara wuaga erpanʉ kʉgʉrʉ egoro omane» (2 Cor. 4:7). ¿Kʼãrẽta jarakĩrãbʉ maʉ̃ nekʼãrẽ biabara? Maʉ̃bara jarakĩrãbʉ bedʼea bia Daizeze Nokʼo ʉ̃rʉ dayirãba jaradiapanʉta (2 Cor. 4:1). ¿Kãrẽta jarakĩrãbʉ kʉgʉrʉ egoro omabara? Maʉ̃bara jarakĩrãbʉ yi ẽbẽrarã maʉ̃ bedʼea bia edepanʉrãta. Pablo ewari basidera ne nedobarirãbara kʉgʉrʉta zokʼapanasi yiko edeita, bino edeita akʉza plata edeita. Abarika Jeowaba dayirãta zokʼabʉ maʉ̃ bedʼea biata ẽbẽrarã jaradia wãnamarẽã. Jeowa kʼarebadeba dayirãbara zarea erbaseabʉ naʉ̃ bedʼea bia jaradia wãita.

JEOWAʼA YIWIDʼIDA ZAREA ERBAITA

9. ¿Kʼãrẽta oseabʉ Daizeze Bedʼea ʉ̃rʉ pera ẽã jaradiaita? (Akʉra potota).

⁹ Edaʉde dayirãra pera sentiseapanʉ ẽbẽrarãʉ̃me bedʼeaita. ¿Kʼãrẽta odaibara mawũã sentida ẽ baita? Apostoleraʼa jarasidade Daizeze bedʼeata wua jaradiada ẽ marẽã aramaʉ̃ta ãyira Jeowaʼa yiwidʼisida ãyaʼa zarea diamarẽã. Jeowaba waña panʉsi ãyi bedʼeara (Hech. 4:​18, 29, 31). Bʉta ẽbẽraʉ̃me bedʼeaita perabʉbʉrʉ Jeowaʼa widida wuabema ẽbẽrata audre kãgabimarẽã, mawũã Daizeze bedʼea pera ẽã jaradiaita.

10. ¿Jeowabara sãwũã kʼarebabʉ dayirãra iyi ʉ̃rʉ jaradiaita? (Isaías 43:​10-12).

¹⁰ Jeowaba jʉrʉsi dayirãta iyi ʉ̃rʉ jaradiamarẽã, maʉ̃ kʼarea jarabʉ iyara kʼarebaita (akʉra Isaías 43:​10-12). Atia kʼawuadaya bedʼea kimare sãwũã kʼarebabʉta Daizezebara. Nããra, Jesura dayirãbawarabʉ Daizeze bedʼea jaradiapanʉnera (Mat. 28:​18-20). Yi ũmera, Jeowabara angelerata bʉ kʼãrẽ dayirãta kʼarebamarẽã (Apoc. 14:6). Yi ũbeata, Jeowabara dayirãʼa iyi jaure zareata diabʉ, mawũã kĩrãbedamarẽã dayirãba kʼawuadata (Juan 14:​25, 26). Yi kimarera, Jeowabara dayirãʼa diasi mebẽrãta, mawũã Daizeze bedʼea dayi dobaʉba jaradia wã ẽ baita. Mawũẽra Jeowa kʼarebadeba akʉza mebẽrã kʼarebadeba pera ẽã jaradiaseapanʉ Daizeze bedʼeara.

ẼBẼRARÃ Ʉ̃RɄ KRĨCHARA AKɄZA KRĨCHARA BIA OITA

11. ¿Ẽbẽrarãta deda ũdu ẽ bʉrʉ kʼãrẽta oseabʉ? (Akʉra potota).

¹¹ ¿Bʉra krĩcha obarika ẽbẽrarãta deda ũdu ẽãnera? Mawũã berabarira bʉyikʉza widiseabʉ, ¿sama duanʉba?¿Ne edade wãsidaka? ¿Traja barabʉka? mawũã bʉbʉrʉ ¿mʉ̃ara audre ũduika ode ẽbẽrarã? (Hech. 16:13). Mebẽã Joshuaba jarabʉ: «Mʉ̃ parke eda wãne, ode teide, Daizeze bedʼea ʉ̃rʉ jaradiabari». Akʉza jarabʉ yi kima Bridgetʼʉ̃meba ẽbẽrarã audre deda ũdupanʉta ũmadaʉ baedare Daizeze bedʼea jaradia wãbʉrʉde akʉza domingode kewarare jaradia wãbʉrʉde (Efes. 5:​15, 16).

12. ¿Dayirãbara sãwũã kʼawuaseapanʉ ẽbẽrarãba krĩchapanʉra?

¹² Ẽbẽraba Daizeze Bedʼeata ũrĩamabʉbʉrʉ akʉra kʼãrẽa krĩcha obʉta akʉza kʼãrẽ ʉ̃rʉ ĩjãbʉta. Joshua akʉza Bridgetʼʉ̃mebara dayirã karta zakedebemaba nãã bedʼea widibʉta zokʼapanʉ ẽbẽraʉ̃me bedʼea jʉ̃drʉita. Bari jaraita naʉ̃ta ¿Sãwũã krĩchabʉ Daizeze Bedʼea ʉ̃rʉra? Ãya naʉ̃ karta zaketa zokʼabʉrʉdera naʉ̃ta jarapanʉ: «Ʉ̃kʉrʉbara krĩchapanʉ Daizeze Bedʼeara Daizezedeba zesita, ʉ̃kʉrʉbara mawũã jarada ẽ, ¿bʉara sãwũã krĩchabʉ?». Dayirãba mawũã opanʉbʉrʉ ẽbẽraʉ̃me bedʼea jʉ̃drʉseapanʉ.

13. ¿Kʼãrẽa dayirãra ewari adua ẽ ẽbẽrarãba Daizeze Bedʼeata ũrĩkĩrã ẽãnera? (Proverbios 27:11).

¹³ Ẽbẽrarãba ũrĩkĩrã ẽ bʉrʉ maʉ̃bara jarakĩrãkʉ ẽ dayirãra ewari aduasita, awuarabʉrʉ Jeowata Jesuʉ̃me sobiabibʉ akʉza Jeowaba zokʼadata opanʉ (Hech. 10:42). Maʉ̃ba dayirãra mejãcha sobia baseapanʉ ẽbẽrarãba ũrĩna ẽ mina (akʉra Proverbios 27:11).

14. ¿Kʼãrẽa mejãcha sobiapanʉ mebẽã abaʉba ũdura ẽbẽra aba Daizeze Bedʼea kʼawuakĩrãbʉta?

¹⁴ Dayirãra mejãcha sobiaseapanʉ nejaradiabari abaʉba ũdura ẽbẽra Daizeze Bedʼea kʼawuakĩrãbʉta. Karta Jarakabʉba jarabʉ naʉ̃ra wũãwũã aduada jʉrʉbʉ kĩrãkʼabʉta. Wũãwũã aduabʉrʉdera ẽbẽra mejãchaʉba jʉrʉpanʉ mamina maʉ̃ra aba paiba ũduyi, mawũã ũdubʉrʉdera jõmaʉ̃ta mejãcha sobiadayi. Maʉ̃ kĩrãkʼabʉ ẽbẽra aba Daizeze ode wãbita. Mebẽrã kongregasionebema jõmaʉ̃ba kʼarebapanʉ akʉza mebẽrã jõmaʉ̃ta nesidapanʉ dayirã panʉmae jaradiaita. Maʉ̃ kʼarea mejãcha sobiapanʉ nekʼawuabaridebema abaʉta ãba yi jʉrebarieda zebʉrʉdera.

KRĨCHARA JEOWA KʼÃRẼÃBA KÃGABɄTA AKɄZA ẼBẼRARÃTA

15. ¿Mateo 22:​37-39 bayeda jarabʉde obʉba sãwũã kʼarebabʉ jaradiakĩrãne jaradia bʼaita? (Akʉra poto yi nããrabemata).

¹⁵ Dayirãba bia krĩchadara Jeowa kʼãrẽãba kãgabʉta akʉza wuabemara ẽbẽrarãta, naʉ̃ba kʼarebayi jaradiakĩrã jaradiaita Daizeze Bedʼea ʉ̃rʉ (akʉra Mateo 22:​37-39). Krĩchara Daizeze bedʼea jaradia wãbʉrʉde Jeowaʼa kʼãrẽãba sobia bʼaita. Adewara krĩchara ẽbẽra abaʉta Daizeze Bedʼea kʼawua jʉ̃drʉbʉrʉde iya wãrĩnuta kʼawuasi baera maʉ̃ kʼarea mejãcha sobiabʉta akʉza krĩchaseabʉ ẽbẽrarã Daizeze Bedʼea ũrĩpanʉrãra ewari jõmaʉ̃nẽ baseabʉta (Juan 6:40; 1 Tim. 4:16).

16. Nekʼãrẽ berabari kʼarea dayi dedaʉba aña wãbe ẽãnera ¿sãwũã sobiade jaradiaseapanʉ? Yizata jara ũrĩbira.

¹⁶ ¿Bʉra nekʼãrẽ berabarida kʼarea deda pikibʉka? Mawũãbʉrʉ krĩchara kʼãrẽta oseabʉta Jeowa kʼarea akʉza wuabema ẽbẽra kʼarea. COVID-19 baesidera Samuelta yi kima Daniaʉ̃me deda piki panasi. Maʉ̃ne ãya jaradiapanasi Daizeze bedʼeara kartadeba, selulardeba, adewara Daizeze Bedʼeata kʼawuabipanasi Zoomneba. Samuelʼra kanserba kayabʉ baera, iyi ospitalde bʉedara Daizeze bedʼea jaradiabasi. Iya jarabʉ: «Dayirã bedʼea zroma erbʉdera krĩcha zroma obʉba kʼãrẽ oamabʉ, maʉ̃ba dayita zarea baseabʉ daya ĩjãbʉ zarea erbaita akʉza maʉ̃ daucha awuantabaita. Maʉ̃ba dayirãra zarea odaibara Jeowade opanʉne sobia panaita». Mawũãnʉmʉne, Daniara baesi, mawũã iyira kamane aribia piki besi jedeko 6 bayeda. Tẽã iyira wãbesi siya ruedade jedeko ũbeabayeda. Daniaba jarabʉ: «Mʉ̃ara Daizeze bedʼea jaradiasi enpermera abaʉʼa iya mʉ̃ta deidu akʉ jʉ̃ẽbaside akʉza jaradiabasi ẽbẽrarã mʉ̃ deda nekʼãrẽ erjʉ̃ẽpanʉra. Maʉ̃ awuara telepononeba jaradiabasi Daizeze bedʼeata mediko nokʼoʼa». Samuelba Daniaʉ̃mebara ãya okĩrãbʉta obe ẽ basimina nekʼãrẽ jõma opanasi Daizezede odaita, mawũã ãyi mejãcha sobia panaita.

17. ¿Kʼãrẽta oseapanʉ audre sobia jaradiaita?

¹⁷ Naʉ̃ artikulode kʼawuasida bedʼea juesoma. Maʉ̃ta jõma oũdubidara naʉ̃ba mejãcha kʼarebayi dayi ʉ̃rʉ aña krĩchabʉrʉde bia krĩchaita akʉza kʼarebayi Daizeze Bedʼea jaradiabʉrʉde audre sobia bamarẽã. Naʉ̃ra dayirãba yiko oi kĩrãkʼa bʉ, newarrata bio eda bʉera jipa audre warra bayi.