ARTIKULO KʼAWUAITA 10
TRÃBI 31 Camina siempre con Jehová
Jeowaba Jesúsʼʉ̃meba krĩchabʉ kĩrãkʼa dayirãbida abarika krĩchaibara
«Jesús nama egorode basidera mejãcha zʉbʉriasi, maʉ̃ kʼarea marabida nekʼãrẽ jõma erbaidua Jesúsba krĩchabʉ kĩrãkʼa krĩchaita» (1 PED. 4:1).
KʼÃRẼTA ŨDUDAITA
Naʉ̃ artikulode kʼawuadayi Pedroba kʼãrẽta kʼawuasita Jesús sãwũã krĩcha badadeba akʉza dayirãbida kʼãrẽta kʼawuaseapanʉta.
1, 2. ¿Kʼãrẽta jarakĩrãbʉ Jeowa kãgaibara akʉza Jesúsba sãwũã ũdubisi maʉ̃ra?
JESÚSBA jara ũrĩbisi Moisés Leyba jarabʉdera kʼãrẽta audre yibiata, iya jarasi: «‹Kãgaibara bʉ Zeze Jeowara bʉ soiduba, bʉ kakua jõmanẽba, bʉ zarea jõmainʉba akʉza bʉ krĩchaiduba›» (Luc. 10:27). Naʉ̃ba ũdubibʉ dayirãbara Jeowara kãgadaibarata dayirãba nekʼãrẽ jõma erbʉdeba akʉza dayirã so jõmainʉba, maʉ̃ne edabʉ dayirãba kʼãrẽ kãgabʉta, dayirã sãwũã sentibʉta akʉza dayirã zarea jõmainʉba ũdubibarata kãgata adewara dayirã krĩcha sãwũã zokʼabʉdeba. Wãrĩnubaira dayirãnebemabara mia abaʉba Jeowa sãwũã krĩchabʉ kĩrãkʼara krĩcha ze ẽ bayi, mamina dayirãba wiña kʼawuaseabʉ Jeowa sãwũã krĩchabʉra Jesús sãwũã krĩchabada ʉ̃rʉ kʼawuabʉdeba, iyara biʼia ũdubibasi baera yi Zeze sãwũã krĩchabʉra (1 Cor. 2:16).
2 Jesúsbara Jeowara mejãchade kãgabasi iyi krĩcha jõmainʉba. Jesúsbara kʼawuabasi Jeowaba kʼãrẽta omarẽã kãgabʉta maʉ̃ kʼarea Jeowaba kãgabʉde okĩrãbasi iya maʉ̃ obʉrʉde mejãcha zʉbʉriaibarabasimina. Jesúsbara ewari jõmaʉ̃nẽ Jeowaba kãgabʉta okĩrãbasi, maʉ̃ba iduaribi ẽ basi nekʼãrẽ baduba aña krĩchabimarẽã iya maʉ̃ oita.
3. (1) ¿Kʼãrẽta kʼawuasi Pedrobara Jesúsdeba? (2) ¿Kʼãrẽta omarẽã jarasi Pedroba yi wuabemara kristianora? (1 Pedro 4:1).
3 Pedrota akʉza ʉ̃kʉrʉ Jesús kʼaidubemarãra Jesúsʼʉ̃me ãba panasi baera ãya kʼawuaseabasi Jesús sãwũã krĩchabʉta. Pedroba Corintodebemara karta nãã bʉ diabʉeside, jarasi nekʼãrẽ jõma erpanamarẽã Jesús kĩrãkʼa krĩchadaita (akʉra 1 Pedro 4:1). Pedroba nama zokʼasi bedʼea «Nekʼãrẽ jõma erbaidua» ũdubita gorogororaba ãyi yõ wãi nããra nekʼãrẽ ãya nesidabʉta jõma erbasita mawũã yõita, maʉ̃ba abarika Jeowa ode panʉrabida Jesús kĩrãkʼa krĩcha kʼawua panʉbʉrʉ ãya nekʼãrẽ jõma nesidabʉta erpanañi nemitia oita zebʉrʉa yi edebi ẽ baita (2 Cor. 10:3-5; Efes. 6:12).
4. ¿Naʉ̃ artikuloba sãwũã kʼarebai Pedroba jaradade oita?
4 Naʉ̃ artikulode kʼawuadayi Jesús sãwũã krĩchabʉta akʉza dayirãbida sãwũã iyide kĩrãkʼa krĩchaseabʉta. Nããra akʉdaya Jeowa sãwũã krĩchabʉta, mawũã jõmaʉ̃ba iyide kĩrãkʼa krĩchadaita, tẽã akʉdayi eda krĩchabʉ ũdubibarata, maʉ̃are kʼawuadayi bia krĩchaita.
JEOWA KĨRÃKʼA KRĨCHARA
5. ¿Sõbede ũdubisi Pedrobara Jeowa kĩrãkʼa krĩchabʉ ẽãta?
5 Kʼawuadayi Pedroba sõbede ũdubisita Jeowa kĩrãkʼa krĩchabʉ ẽãta. Ewari aba Jesúsba jarasi iyira Jerusalénʼena wãibarabasita mõbe mama nokʼora religionebemaraba iyira pokãrãpe beadaibasita (Mat. 16:21). Pedrobara bia ũrĩ ẽ basi Jesúsba jaradara, iya ĩjã ẽ basi sãwũã Daizezeba dayirã ẽdrʉbimarẽã jidadata mawũã beadaibasita (Mat. 16:16). Maʉ̃ kʼarea jãpe ede kʼãrãpe naʉ̃ta jarasi: «Nokʼó, mawũã bedʼearãrũã bʉzhita sozuburiarua, Daizezebara bʉra mawũãrã berabʼaribi ẽã» (Mat. 16:22). Pedrora Jeowa kĩrãkʼa krĩchaba ẽ basi baera iyira bedʼea abarika ba ẽ basi Jesúsʼʉ̃me.
6. ¿Jesúsbara sãwũã ũdubisi iyira Jeowa kĩrãkʼa krĩchabʉta?
6 Jesúsbara ũdubibasi iyira Jeowa kĩrãkʼa krĩchabʉta, maʉ̃ta ũdubisi Pedroa naʉ̃ta jaraside: «Ãĩ wãrũã mʉ kĩrãbitaubara ãtõmiã. Bʉara mʉrã bʼaebiya nʉmʉã, bʉra krĩcha ẽã Daizeze kĩrãkʼara, awuarabʉrʉ krĩcha bʼʉa beubari bʼe kĩrãkʼa» (Mat. 16:23). Jesúsba kʼawuabasi iya Jeowaba kãgabʉ oira iyira zʉbʉria kʼãrãpe beibarabasita, maʉ̃ba Pedroba iyi kʼarebakĩrãbasimina ũrĩ ẽ basi Pedroba jaradara. Pedroba naʉ̃neba kʼawuasi iyira Daizeze kĩrãkʼa krĩchaita wãẽbʉta, abarika dayirãbida nesidapanʉ Jeowa kĩrãkʼa krĩchaita.
7. ¿Pedroba tẽã sãwũã ũdubisi iyira Jeowa kĩrãkʼa krĩchakĩrãbʉta? (Akʉra yi nããrabemata).
7 Tẽã Pedroba ũdubisi iyira Jeowa kĩrãkʼa krĩchakĩrãbʉta. Jeowaba iyaʼa jarasi ẽbẽrarã judiora ẽã jaradiamarẽã, maʉ̃ ewadera judiora ẽãsida Jeowa pʉwʉrʉde edabasea basi maʉ̃ba jarasi Cornelioa jaradia wãmarẽã. Cornelioba nããra kʼawua jʉ̃drʉsi Daizeze ʉ̃rʉ ẽbẽrarã judiora ẽãnera mamina Pedroitara zarebasi, iyara kʼarebata nesidabasi, ¿kʼãrẽa? Iyi ewaridera judiorãra ãba pana ẽ basi baera ẽbẽrarã awuru pʉwʉrʉdebemaʉ̃mera. Maʉ̃ba iya nãã sãwũã krĩchabadara Pedrobara awuara krĩchaibarabasi naʉ̃ ẽbẽrarã judiora ẽã jaradiaita. Pedroba kʼawuaside Jeowaba iya kʼãrẽta omarẽã kãgabʉta, iya krĩchabadara awuara krĩchasi maʉ̃ba iyi eda jʉ̃ẽbʉdadera kʼãrẽ jara ẽã wãsi (Hech. 10:28, 29). Wãsi Cornelioidu akʉza yi mebẽrãinu jaradiade Jeowa ʉ̃rʉ mõbe naʉ̃rara buru kʼoesida (Hech. 10:21-23, 34, 35, 44-48).
8. ¿Sãwũã ũdubiseapanʉ dayirãra Jeowa kĩrãkʼa krĩchabʉta? (1 Pedro 3:8).
8 Tẽã Pedroba yi wuabemara kristianora jarasi abarika krĩchadamarẽã (akʉra 1 Pedro 3:8). Dayirã jõma Jeowa ode panʉrabara nesidapanʉ Jeowa kĩrãkʼa krĩchaita maʉ̃itara Daizeze Bedʼeaba jarabʉde odaibara. Bari jaradaita, Jesúsba jarasi dayirãbara ewari jõmaʉ̃nẽ nããra bʉeibarata Daizezedeta (Mat. 6:33). Mebẽã abaʉba maʉ̃ta bia kʼawuabʉ baera krĩchaseabʉ audre Jeowaita nekʼãrẽ oita, yi nãã edebaribaita mawũã ẽ bʉrʉ awuruta. Mawũãbʉrʉdera dayirãbara maʉ̃ mebẽãra imitia jarabe ẽ iya maʉ̃ta oita krĩchabʉ baera mawũã ẽ bʉrʉ awuara oita krĩchamarẽã awuarabʉrʉ ibia bedʼeaibara maʉ̃ mebẽã, biga diadaibara iya maʉ̃ta oita krĩchabʉ baera akʉza jʉrʉdaibara maʉ̃ mebẽã sãwũã kʼarebaita.
EDA KRĨCHABɄTA ŨDUBIRA
9, 10. ¿Jesúsba sãwũã ũdubisi eda krĩchabʉta?
9 Diamasi iyi bei nãã Jesúsba Pedroa akʉza iyi kʼaidubemara nebiata jaradiasi, jaradiasi sãwũã eda krĩchabʉta ũdubibarata. Nããra Jesúsbara Pedroa akʉza Juanʼa jarasi diamasi iyi bei nãã ãba nekoita nekʼãrẽ jõma daucha erpanamarẽã, maʉ̃ba ãyara erbaibarabasi, toayata akʉza poncherata bania eda bʉeita mawũã yi ẽbẽra zebʉrʉra jĩrʉ zʉgʉita mamina, ¿kʼaiba oibasi maʉ̃ra?
10 Nawedara ẽbẽrarã jĩrʉ zʉgʉira, de yibari nezokʼabʉrʉ obasi mamina Jesúsbara edabʉta ũdubibasi baera iya osi maʉ̃ra, iya wua ʉ̃rʉ jʉ̃bada wẽã kʼãrãpe akʉza toayata iyi kʉrrʉde jʉ̃kʼãrãpe iyi kʼaidubemara jĩrʉ jõmaʉ̃nẽta zʉgʉsi (Juan 13:4, 5). Iya maʉ̃ oira ewari edebasimina osi, iyi sewai jĩrʉinʉ zʉgʉsi Jesúsbara, maʉ̃ne Jesúsba iyi kʼaidubemara jarasi: «¿Marãbara sãwũãta kʼawuabʉdakʼa mʉã marã kʼãwũã obʉrʉdʼebema? Marãbara mʉrã jara bʼea Miã Ũrãgʼabarita, Nokʼota, mawũã jaradʼaira biga mʉrã maʉ̃ baera. Mʉta Nokʼota Miã Ũrãgʼabarita bʼʉba marã jẽrũta sʉgʉbʉrʉba, marãsidʼa abʼarika jẽrũ sʉgʉdʼaibara zhiya» (Juan 13:12-14).
Wãrĩnu eda krĩchabʉra ũdubibʉ dayirãba dayikʉza ʉ̃rʉ kʼãrẽ krĩchabʉdeba akʉza wuabema ʉ̃rʉ kʼãrẽ krĩchabʉdeba.
11. ¿Pedrobara sãwũã ũdubisi eda krĩchabʉta ũdubi kʼawuasita? (1 Pedro 5:5 akʉza akʉra potota).
11 Pedroba ũdubisi Jesúsdeba kʼawuasita eda krĩchabʉta ũdubita. Jesús ʉ̃ta wãna tẽã Pedroba ẽbẽra wãbe ẽãbʉta bebisi, maʉ̃neba ẽbẽrarã mejãchaʉba orrasida iyira (Hech. 1:8, 9; 3:2, 6-8). Pedro ewaridera ẽbẽrarã mejachaʉba kãgadebasi ãyi ʉ̃rʉ ibia bedʼeamarẽã mamina Pedroba ũdubisi iyi eda krĩchabʉta maʉ̃ba ẽbẽrarãba iyaʼa ibia bedʼeabʉrʉde ĩjã ẽ basi maʉ̃ta (Hech. 3:11). Awuarabʉrʉ idu iyi ʉ̃rʉ ibia bedʼeabi kaude jarasi iya jõma osita Jeowa akʉza Jesús kʼarebadeba, Jesús ʉ̃rʉ bedʼeabʉrʉta jarasi: «Daibara izhidʼebema ĩjã panʉã, za naʉ̃ marãba ũdukʼawua bʼeta akʉ kʼobʼera kʼãwũã bʼe dogʼoa izhi zareaba» (Hech. 3:12-16). Pedroba karta kristianoraʼa bʉdaba ũdubibasi kʼãrẽãba yibiata eda krĩchabʉ ũdubita. Pedroba jaradabara bedʼea nãã bʉdapeadadera jara ũrĩbikĩrãbasi eda krĩchabʉra wua kĩrãkʼa jʉ̃ibarata, naʉ̃ba kĩrãbebibasi Jesúsba odata, Jesúsba iyi kʉrrʉde toaya jʉ̃kʼãrãpe iyi kʼaidubemara jĩrʉ zʉgʉdata (akʉra 1 Pedro 5:5).
Pedroba miõba okata osidera ũdubisi Jeowa zareadeba mawũã osita mawũã eda krĩchabʉta ũdubisi. Dayirãbida abarika odaibara, wuabemara kʼarebabʉrʉdera jʉ̃ã ẽ baibara ãya dayirãʼa nebia diaita, mawũã obʉrʉba ũdubiyi eda krĩchapanʉta. (Akʉra parrapo 11 akʉza 12).
12. ¿Pedrode kĩrãkʼa dayirãbida sãwũã ũdubiseapanʉ eda krĩchabʉta?
12 Dayirãbida Pedrode kĩrãkʼa eda krĩchabʉta ũdubiseapanʉ. Pedroba bedʼea jaradaba ũdubibʉ wãrĩnu eda krĩchabʉra bari ũdubibʉ ẽãta dayirãba kʼãrẽ jarabʉdeba, awuarabʉrʉ dayirãba dayikʉza ʉ̃rʉ kʼãrẽ krĩchabʉdeba akʉza wuabema ʉ̃rʉ kʼãrẽ krĩchabʉdebida ũdubibʉ eda krĩchabʉta. Dayirãbara wuabema kʼarea nekʼãrẽ opanʉ Jeowata akʉza mebẽrãta kãgapanʉ baera, mawũã opanʉ ẽ wuabemaraba dayirãta bia akʉmarẽã. Mawũã obʉrʉdera eda krĩchabʉta ũdubipanʉ. Dayirãbara eda krĩchabʉta ũdubipanʉ sobiade nekʼãrẽ obʉde Jeowa kʼarea akʉza dayirã mebẽrã kʼarea, wuabemaraba maʉ̃ta ũduda ẽ mina (Mat. 6:1-4).
BIA KRĨCHARA
13. Jara ũrĩbira kʼãrẽta jarakĩrãbʉta bia krĩchaiba.
13 ¿Kʼãrẽta jara kĩrãbʉ bia krĩchaibara? (1 Ped. 4:7). Mebẽã abaʉba bia krĩchabʉta ũdubibʉdera iya nekʼãrẽ oita jidai nããra, krĩchabʉ jõma jidaita Jeowaba krĩchabʉde akʉza naʉ̃ mebẽãbara kʼawuabʉ audre yibiata Jeowa neũdukʼawua bʼaita. Akʉza iyara kʼawuabʉ jõma iya bia kʼawua chʉ ẽãta awuarabʉrʉ Jeowa kʼarebata jʉrʉbʉ Jeowaʼa yiwidʼibʉdeba.a
14. ¿Ewari aba Pedrobara sãwũã ũdubisi Jeowa ʉ̃rʉ ĩjãbʉ ẽãta?
14 Diamasi Jesús bei nãã iyi kʼaidubera naʉ̃ta jarasi: «Idi diamasi mara jõmaʉ̃ba mʉ̃ra amaenaña», maʉ̃ne Pedroba kʼãwũã jarasi: «Wuabemara jõmaʉ̃ba bʉ amaebʉrʉbʉsida, mʉ̃a bʉra jipa amae ẽ bayi». Maʉ̃ne Jesúsba iyi kʼaidubemara kʼãwũã jarasi: «Ʉrʉmapanaidua akʉza badua yiwidʼipanaidua» (Mat. 26:31, 33, 41). Mamina Pedrobara ũrĩ ẽ basi Jesúsba ũrãgʼa diadara, maʉ̃ba iyaʼa widisidade Jesús ũdukʼawuabʉ kʼawuaita maʉ̃nera jarasi ũduaduata, mõbe tẽã iya maʉ̃ jarada kʼarea jẽda krĩcha kʼãrãpe sopʉasi (Mat. 26:69-75).
15. ¿Kʼãrẽba kʼarebasi Jesús iyi bei nãã bia krĩchaita?
15 Jesúsbara Jeowara soiduba ĩjãbasi adewara Jesús nemitia okabasimina badua Jeowa yiwidʼibasi, maʉ̃ba kʼarebasi ewari jõmaʉ̃nẽ Jeowaba kãgabʉta oita (Mat. 26:39, 42, 44; Juan 18:4, 5). Diamasi iyi bei nããra Jesúsʼra mejãcha yiwidʼisi, Pedrobara Jesúsba mawũã odata kĩrãdua ẽ basi.
16. ¿Sãwũã ũdusibi Pedrobara bia krĩcha kʼawuabʉta? (1 Pedro 4:7).
16 Pedrobara audre ĩjãsi Jeowaʼa badua yiwidʼibʉdeba. Jesús jẽda piradrʉbʉrʉde Pedroa akʉza iyi kʼaidubemara jarasi ãyaʼa jaure zarea diadaita Daizeze Bedʼea jaradiadamarẽã mamina maʉ̃ zeyeda ãyara jʉ̃ãbarabasi Jerusalénʼne (Luc. 24:49; Hech. 1:4, 5). Mamina, ¿Pedrobara kʼãrẽta osi? Pedroba akʉza wuabemara kristianorabara Daizeze Jeowa yiwidʼibʉta idubʉda ẽ basi (Hech. 1:13, 14). Pedroba kristianora Corintodebemara karta nããra bʉ diabʉeside jarasi badua yiwidʼi panamarẽã Daizeze Jeowaʼa akʉza bia krĩcha panamarẽã (akʉra 1 Pedro 4:7). Pedroba ũdubisi ewariza audre Jeowa ʉ̃rʉ ĩjãbʉta akʉza iyara mejãcha kʼarebasi mebẽrã kongresionebemarata (Gál. 2:9).
17. ¿Nekʼãrẽ okʼawuabʉmina kʼãrẽ obʉta idubʉda ẽ baibara? (Akʉra potota).
17 Dayirã bia krĩchaita Jeowaʼa yiwidʼi bʼaibara akʉza ʉ̃kʉrʉ nekʼẽrã oita dayirãita zare ẽ mina, maʉ̃itabida Jeowaʼa yiwidʼi bʼaibara. Audre Jeowa yiwidʼibara nekʼãrẽ oita jidai naweda, iya kʼarebamarẽã bia jidaita akʉza dayirãbara ĩjãibara Jeowabara biʼia kʼawuabʉta saʉ̃ta bigata akʉza saʉ̃ta zeri ẽãta dayirãitara.
Pedrobara Jeowa ʉ̃rʉ audre ĩjãsi badua yiwidʼibʉdeba, dayirãbida bia krĩchabʉta ũdubiseabʉ Jeowaʼa kʼareba widibʉde akʉza audre widiseabʉ kʼarebamarẽã dayirãba nekʼãrẽ oita jidai nãã. (Akʉra parrapo 17).b
18. ¿Dayirãra sãwũã Jeowa kĩrãkʼa krĩchaseabʉ?
18 Jeowabara dayirãra parãsi iyide kĩrãkʼa odamarẽã maʉ̃ba dayirãbara iyaʼa biga diapanʉ (Gén. 1:26). Dayirãra nemitia omia baera Jeowade kĩrãkʼa jõma daucha obeda ẽ (Is. 55:9). Mamina Pedrode kĩrãkʼa zarea oseabʉ Jeowa kĩrãkʼa krĩchaita akʉza eda krĩchabʉta ũdubita adewara bia krĩchaita.
TRÃBI 30 Mi Amigo, mi Padre, mi Dios
a Audre kʼawuakĩrãbʉbʉrʉ kʼãrẽta jarakĩrãbʉta bia krĩchaiba akʉra jw. org de mawũã ẽ bʉrʉ JW Library® de «Textos bíblicos explicados» abʉmae, yi artikulo «2 Timoteo 1:7: ‹Dios no nos ha dado un espíritu de temor›», maʉ̃ne ũduyi «Buen juicio» abʉta.
b POTOBA ŨDUBIBɄTA : Mebẽã aba yiwidʼinʉmʉ iyaʼa trajo diadaita iyiʉ̃me bedʼeai naweda.