Daizeze Bedʼeara jaradiakĩrãne jaradiapanadrʉ Jesúsde kĩrãkʼa

1. ¿Kʼãrẽne awuarabʉ Jeowa ode panʉrata wuabema kristianoraira?

DAYIRÃ Jeowa ode panʉrabara jaradiakĩrãne jaradiapanʉ akʉza zarea opanʉ mawũã odaita. Maʉ̃ba dayirãra awuarapanʉ wuabema kristianoraira (Tito 2:14). Mamina, edaʉde bʉitara Daizeze Bedʼea jaradiakĩrãne jaradiaira zare baseabʉ. Maʉ̃ba bʉra mebẽã aba zõrãrã kongregasionebema kĩrãkʼa sentibaribaibara. Naʉ̃ mebẽãba jarabʉ: «Edaʉde mʉ̃ara Daizeze Bedʼeara jaradia wãkĩrã ẽ».

2. ¿Kʼãrẽa edaʉde zarea baseabʉ sobiade jaradiaita Daizeze Bedʼeara?

² Edaʉde ʉ̃kʉrʉ mebẽrãbara mejãcha sobiabʉta sentiseabʉ Jeowaita nekʼãrẽ obʉde. Bari jaraita, mebẽrã neida berabaribʉrʉde kʼarebabʉde, maʉ̃ta neẽ bʉrʉ ãba yi jʉrebari deta ara obʉde. Ãyira mejãcha sobiabʉ mebẽrãbawara sobia trajabʉ baera akʉza mesera ũdubʉ baera ãya kʼãrẽ nebia odata. Mamina edaʉde jaradiakĩrãne jaradiabʉ ẽ. ¿Kʼãrẽa? Iyabaʉmae jaradiabʉta dããrabamina ẽbẽrabara ũrĩkĩrãna ẽ Daizeze Bedʼeara, adewara ẽbẽrabara bia edada ẽ. Akʉza naʉ̃ ewari jõita ara kʼaita ba baera, wuabʉrʉ ũdu wãna pẽwãpanʉta (Mat. 10:22). ¿Mamina kʼãrẽba kʼarebaseabʉ audre sobiade akʉza jaradiakĩrãne jaradia bʼaita?

3. ¿Kʼãrẽta kʼawuapanʉ Jesúsba yiza jaradadeba Lucas 13:​6-9 bayeda?

³ Jesúsʼra zarea osi Daizeze Bedʼea jaradiakĩrãne jaradia bʼaita, maʉ̃ba iyira dayirãita yiza bia. Jesúsbara jaradiakĩrãne jaradiabasi akʉza ewari berabaribʉrʉza audre zarea obasi jaradiaita (akʉra Lucas 13:​6-9). Ewari aba, Jesúsba iya Daizeze Bedʼea jaradiabʉta biʼia ũrĩbita yizata zokʼasi. Jarasi yumakẽrã abaʉba higuera bakuruta poaga ũbeabayeda biʼia akʉ erbasita, mawũãsidu maʉ̃ higuerãra zaʉ ẽ basita. Maʉ̃ kĩrãkʼa iya poaga ũbeabayeda Daizeze Bedʼea jaradiabasi judiora, mawũãsidu mejãchaʉba ĩjãna ẽ basi. Mamina Jesúsbara Daizeze Bedʼea jaradiabʉta iduaribi ẽ basi. Iyira naʉ̃ yumakẽrãba higuera zaʉyeda jʉ̃ãbada kĩrãkʼa basi. Audre zarea osi judiora jaradiaita ãya ũrĩ ẽ basimina.

4. ¿Kʼãrẽ ne kimareta kʼawuadayi Jesúsdeba?

⁴ Naʉ̃ artikulode kʼawuadayi Jesúsba sãwũã jaradiakĩrãne jaradiabasita, maʉ̃ta audre osi iyara iyi beita jedeko 6 waebʉde (akʉra nota de estudio Lucas 10:1 «Después de estas cosas»). Dayirãbida jaradiakĩrãne jaradiakĩrãpanañi Jesúsba jarada kĩrãkʼa opanʉbʉrʉ akʉza iya odade opanʉbʉrʉ. Akʉdaya kʼãrẽta kʼawuapanʉta iyideba. Jesúsdeba naʉ̃ta kʼawuaseabʉ: Nãara, Jesúsʼitara audre yibia basi Jeowaba kãgabʉ oita. Ũme, propesiaba kʼãrẽ jarabʉta biʼia ũrĩsi akʉza mama jarabʉde osi. Ũbea, ĩjãsi Jeowaba kʼarebaita. Kimare, ĩjãbasi ẽbẽrarã mejãchaʉba ũrĩnaita Daizeze Bedʼeara.

JESÚSʼRA ZAREA OSI JEOWABA KÃGABɄTA OITA

5. ¿Sãwũã ũdubisi Jesúsbara Jeowaba kãgabʉta oita audre yibia basita iyitara?

⁵ Jesúsbara bedʼea bia Daizeze Nokʼo ʉ̃rʉbemara jaradiakĩrãne jaradiabasi kʼawuabasi baera Daizezeba iya maʉ̃ta omarẽã kãgabʉta (Luc. 4:43). Jesúsʼitara audre yibia basi Daizeze Bedʼea jaradia wãita, maʉ̃ba iyi beibodoarebida idubʉ ẽ basi Daizeze Bedʼea jaradiabʉra, awuarabʉrʉ pʉwʉrʉza jaradia wãbasi Daizeze Bedʼeata awururaʼa (Luc. 13:22). Adewara Jesúsbara iyi kʼaidubemarabida jaradiasi sãwũã Daizeze Bedʼea jaradiaita (Luc. 10:1).

6. Nekʼãrẽ badu Jeowaita oira yibiamina, ¿Jeowabara sãwũã akʉbʉ dayirãba Daizeze Bedʼea jaradiabʉra? (Akʉra potota).

⁶ Idi ewadebida, bedʼea bia Daizeze Bedʼea ʉ̃rʉ jaradia wãita audre yibia Jeowaba akʉza Jesúsʼʉ̃meba kãgabʉ kĩrãkʼa (Mat. 24:14; 28:​19, 20). Dayirãba Jeowaita nekʼãrẽ badu obʉrʉdera kʼarebapanʉ jaradia wãita. Bari jaraita, dayirãba kʼarebapanʉbʉrʉ Daizeze ãba yi jʉrebari de parãita naʉ̃neba kʼarebapanʉ ẽbẽrarã dayirãba jaradiapanʉrata mainʉ jʉ̃ẽnamarẽã Jeowaʼa yiwidʼita. Adewara, Betelde mawũã ẽ bʉrʉ nekʼãrẽ awurude kʼarebapanʉbʉrʉ, maʉ̃nebida kʼarebanʉmʉ dayirãba audre jaradia wãita ẽbẽrarã. Adewara, drʉade neida berabaribʉrʉdera zarea opanʉ mebẽrã kʼarebaita ãya nesidabʉta erpanamarẽã mawũã jẽda akʉza ãba yi jʉre jʉ̃drʉdamarẽã mõbe jaradia jʉ̃drʉdamarẽã ẽbẽrarã. Naʉ̃ba ũdubibʉ Jeowaitara audre yibiata Daizeze Bedʼea jaradia wãita. Dayirãba naʉ̃ ʉ̃rʉ kʼawuaiba kʼarebabʉ dayirãbida jaradiakĩrãne jaradia wãita Daizeze Bedʼeata ẽbẽrarã akʉza naʉ̃ta nããra bʉeita. Mebẽã János zõrãrã Hungríadebemaba naʉ̃ta jarasi: «Mʉ̃yikʉza jarabʉ Jeowaita nekʼãrẽ badu obʉmina audre yibiata Daizeze Bedʼea jaradia wãita, Jeowaba naʉ̃ta omarẽã kãgabʉ baera».

7. ¿Kʼãrẽa kãgabʉ Jeowabara iyi ʉ̃rʉ ẽbẽrarã jaradiabʉta idubʉda ẽ marẽã? (1 Timoteo 2:​3, 4).

⁷ Dayirãbida ẽbẽrarãta Jeowaba akʉbʉ kĩrãkʼa akʉpanʉbʉrʉ, audre jaradiakĩrãne jaradiadayi Daizeze Bedʼeara. Jeowabara kãgabʉ ẽbẽrarã mejãchaʉba iyi bedʼeata ũrĩnamarẽã akʉza iya zokʼabʉta ojʉ̃drʉdamarẽã (akʉra 1 Timoteo 2:​3, 4). Wãrĩnu, Daizeze Bedʼea jaradiabʉba kʼarebaseabʉ ẽbẽrarã beideba ẽdrʉdamarẽã, maʉ̃ kʼarea Jeowaba dayirãʼa jaradiabʉ sãwũã bedʼeaita ẽbẽrarã Daizeze ʉ̃rʉ jaradiabʉrʉde, bari jaradaita diabʉ karta Kãgara ẽbẽrarã - Jesu kʼaidu babira. Naʉ̃ kartaba jaradiabʉ dayirã sãwũã bedʼeaseabʉta ẽbẽrarãbawara mawũã kʼarebaita naʉ̃rabida Daizeze ʉ̃rʉ kʼawua jʉ̃drʉdamarẽã. Idi ewade, dayirãba Daizeze Bedʼea jaradiabʉta ẽbẽrarãba ũrĩamapanʉmina dayirãba jaradiapanʉta idubʉda ẽ bʉrʉ, naʉ̃ba kʼarebayi zʉbʉria zroma jõi nãã ẽbẽrarãba kĩrãbedaita dayirãba kʼãrẽta jaradiadata, mõbe Jeowa ode bakĩrãnamarẽã. Maʉ̃ra berabariyi dayirãba jaradiapanʉta idubʉda ẽ bʉrʉ.

JESÚSBARA PROPESIABA KʼÃRẼ JARABɄTA BIA ŨRĨSI AKɄZA MAMA JARABɄDE OSI

8. ¿Kʼãrẽ propesiaba kʼarebasi Jesúsba iyi ewari bia zokʼaita?

⁸ Jesúsbara ũrĩsi Daizeze Bedʼeade propesia jarabʉra akʉza kʼawuabasi iyira naʉ̃ egorodera bʼaita poaga ũbeabayeda pai (Dan. 9:​26, 27). Akʉza Jesúsba kʼawuabasi propesiaba jarabʉta, sõbede akʉza sãwũã beita (Luc. 18:​31-34). Naʉ̃ba kʼarebasi iya ewari bia zokʼaita, jaradiakĩrãne jaradiaita Jeowaba zokʼadata aripe oita.

9. ¿Propesiaba jarabʉta bia ũrĩbʉba sãwũã kʼarebai jaradiakĩrãne jaradiaita?

⁹ Dayirãba krĩchapanʉbʉrʉ idi ewade propesia aripe berabarinʉmʉ ʉ̃rʉ akʉza ʉ̃rabʉrʉ berabari ʉ̃rʉ, naʉ̃ba kʼarebayi sobiade akʉza jaradiakĩrãne jaradiaita Daizeze Bedʼeara. Dayirãbara kʼawuapanʉ ewari jõbodoare panʉta. Daizeze Bedʼeabara jarasi naʉ̃ ewari jõbodoarera sãwũã bʼaita ẽbẽrarãra. Maʉ̃ra idi ewadera aripe berabarinʉmʉ. Daizeze Bedʼeabara jarasi nokʼo nortedebemata nokʼo surdebemaʉ̃me yõpanaita. Idi ewade dayirãbara bia kʼawuapanʉ maʉ̃ra aripe berabarinʉmʉta ũdupanʉ baera nokʼo Estados Unidosta akʉza nokʼo Gran Bretañata yõpanʉta nokʼo Rusiaʉ̃me akʉza pʉwʉrʉ maʉ̃are panʉrabawara (Dan. 11:40). Adewara kʼawuapanʉ Daniel 2:​43-45 bayeda nekʼãrẽ zroma jĩrʉ jarabʉra. Naʉ̃bara jarakĩrãbʉta nokʼo zroma angloamericanata, naʉ̃bara naʉ̃ drʉa jõmaʉ̃nẽ zokʼabʉ. Dayirãba propesia ʉ̃rʉ bia estudiabʉba akʉza maʉ̃ ʉ̃rʉ bia kʼawuabʉba audre ĩjãbibʉ Daizeze Nokʼobara aranʉ nokʼora nama egorodebemara jõma makenaita. Naʉ̃ propesia nama jarabʉta jõma aripe berabari wãta ũdu wãnaba dayirã ũdubibʉ Daizeze ewari zeira arakʼaitabata. Maʉ̃ba dayirãbara ewarira bia zokʼadaibara ẽbẽrarã Daizeze Bedʼea ʉ̃rʉ jaradiaita.

10. ¿Adewara sãwũã kʼarebabʉ propesia Daizeze Bedʼeadebemaba jaradiakĩrãne jaradiaita?

¹⁰ Propesiara Daizeze Bedʼeade edabʉbara bedʼea biata erbʉ, dayirãbara maʉ̃ta jaradiadaibara awurura. Mebẽã Carrie, República Dominicanane Daizeze Bedʼea jaradiabʉba naʉ̃ta jarabʉ: «Mʉ̃a krĩchabʉrʉde Daizeze Bedʼeaba kʼãrẽ bedʼea biata jarabʉ ʉ̃rʉ akʉza aranʉbai kʼãrẽ nebia weita jarabʉ ʉ̃rʉ Daizezeba, maʉ̃ta wuabemarabida jara ũrĩbikĩrãbʉ. Akʉza ũdubʉrʉde ẽbẽrarãba kʼãrẽ bedʼea zroma erbʉta maʉ̃nera krĩchabʉ ãyabida nesidapanʉta kʼawuaita Jeowaba kʼãrẽ nebiata weita aranʉbai ãyibari». Propesiara Daizeze Bedʼeadebʉba ũdubibʉ dayirãra atiara Jeowaba kʼarebanʉmʉta Daizeze Bedʼea jaradiaide, naʉ̃ba kʼarebabʉ idubʉ ẽ baita maʉ̃ opanʉta. Leila, Hungríadebemaba, naʉ̃ta jarabʉ: «Isaías 11:​6-9de jarabʉba kʼarebabʉ mʉ̃a bedʼea bia Daizeze Bedʼeadebʉ ʉ̃rʉ badu ẽbẽra jaradiaita ãya ũrĩ ẽ bʼai kĩrãkʼabʉmina, mʉ̃a kʼawuabʉ baera badu ẽbẽraba iya aña obadara idubʉseabʉta Jeowaba kʼarebabʉ baera». Mebẽã Christopher, Zambiadebemaba, naʉ̃ta jarabʉ: «Marcos 13:10ba jarabʉ kĩrãkʼa idira bedʼea biara naʉ̃ drʉa jõmaʉ̃mae jaradianʉmʉ. Mʉ̃ra mejãchade sobiabʉ kʼawuabʉ baera mʉ̃abida kʼarebanʉmʉta maʉ̃ propesia aripe berabarita». ¿Kʼãrẽ propesiara Daizeze Bedʼeadebemaba kʼarebabʉ bʉaʼa Daizeze Bedʼea jaradiakĩrãne jaradia wãita?

JESÚSBARA ĨJÃSI JEOWABA KʼAREBAITA

11. ¿Jesúsbara kʼãrẽa nesidabasi Jeowa kʼarebara jaradiakĩrãne jaradiaita? (Lucas 12:​49, 53).

¹¹ Jesúsbara kʼawuabasi akʉza ĩjãbasi yi Zeze Jeowaba kʼarebaibasita iya Daizeze Bedʼeara jaradiakĩrãne jaradia wãita. Jesúsba ẽbẽrarã jaradiabʉrʉdera jʉra kʼawua bedʼeabasi akʉza wawia ũdubibasi ẽbẽrarã. Mawũãsidu iya kʼawuabasi Daizeze Bedʼeadebema bedʼea bia jaradiabʉrʉdera mejãchaʉta kĩrʉnaibasita akʉza maʉ̃ kʼarea pẽwãnaibasita (akʉra Lucas 12:​49, 53). Bari jaradaita, nokʼora religionebemarabara kãga ẽ basi Jesúsba jaradiaira, maʉ̃ kʼarea mejãcha kĩrʉsida iyiʉ̃me maʉ̃ba edaʉde beakĩrãsida (Juan 8:59; 10:​31, 39). Mamina Jesúsbara idubʉ ẽ basi maʉ̃ kʼarea Daizeze Bedʼea jaradiabʉra. ¿Kʼãrẽa? Iya kʼawuabasi baera Jeowara iyiʉ̃mebʉta. Iya naʉ̃ta jarasi: «Mʉrã abʼa nʉmʉ ẽbaera, awuarabʉrʉ daira panʉã mʉta mʉ Zeze mʉ zokʼadʼata [ . . . ] aramaʉ̃ne mʉ Zezebara mʉrã dobʼa kenabʼari ẽã, mʉãrã ewariza obʼʉba izha krĩñata» (Juan 8:​16, 29).

12. ¿Kʼãrẽta jarasi Jesúsbara iyi kʼaidubemara Daizeze Bedʼea jaradiakĩrãne jaradiapanamarẽã pẽwãpanʉmina?

¹² Jesúsbara iyi kʼaidubemara jarabasi ĩjãnamarẽã Jeowa ʉ̃rʉ akʉza audre ĩjãnamarẽã ãyi pẽwãpanʉnera Jeowaba wãrĩnu kʼarebaita (Mat.10:​18-20; Luc. 12:​11, 12). Akʉza Jesúsbara yi kʼaidubemara jarasi jʉra kʼawuapanamarẽã ãyi pẽwãpanʉnera (Mat. 10:16; Luc. 10:3). Adewara jarasi Daizeze Bedʼeara ẽbẽra mejãchaʉba ũrĩna ẽ baita, mawũã bʉrʉdera ẽbẽrarã ajuerzade Daizeze Bedʼea ʉ̃rʉ ũrĩbi ẽ baibarata (Luc. 10:​10, 11). Adewara jarasi iyi kʼaidubemara pẽwãpanʉnera ãyira mĩrʉ wãibarata (Mat. 10:23). Jesúsbara Daizeze Bedʼea jaradiakĩrãbasimina adewara Jeowa ʉ̃rʉ ĩjãbasimina, iyita neida oita barabʉdera iyira jãpe wãbasi (Juan 11:​53, 54).

13. ¿Kʼãrẽa ĩjãseabʉ bʉara wãrĩnʉ Jeowaba kʼarebaita?

¹³ Idi ewadera mejãchaʉba pẽwãpanʉ Daizeze Bedʼea jaradiapanʉ kʼarea. Maʉ̃ba dayirãbara nesidapanʉ Jeowa kʼarebata (Apoc. 12:17). ¿Sãwũã kʼawuapanʉ Jeowaba wãrĩnu kʼarebaita? Jesúsba Juan 17de jaradadeba, iya Jeowaʼa yiwidʼibʉrʉde jarasi akʉmarẽã iyi kʼaidubemarata. Jeowabara ũrĩsi iyi bedʼeara, kʼarebasi iyi kʼaidupanʉrãra. Libro Hechosde kʼawuapanʉ Jeowabara kʼarebasita Jesús kʼaidubemarãra Daizeze Bedʼea jaradiakĩrãne jaradiapanamarẽã ãyi pẽwãpanasimina. Jesús yiwidʼiside jarasi Jeowaʼa akʉmarẽã iyi kʼaidupanʉrata adewara jari ẽbẽrarã iyi kʼaidupanʉraba jarabʉ ĩjãnarasida. Maʉ̃ne bʉ bʉsida, maʉ̃ kʼarea Jeowabara idibasidu ũrĩbʉ Jesúsba jaradara. Maʉ̃ba dayirãbara ĩjãseabʉ Jeowaba nããbema apostolera kʼarebada kĩrãkʼa, dayirãsida wãrĩnu kʼarebaita (Juan 17:​11, 15, 20).

14. ¿Sãwũã kʼawuapanʉ dayirãba bedʼea zroma ũdupanʉmina Daizeze Bedʼea jaradiakĩrãne jaradiapanaita? (Akʉra potota).

¹⁴ Naʉ̃ ewari jõbodoarera Daizeze Bedʼea jaradiaira audre zarea wã. Mamina Jesúsba jarasi Jeowaba dayirã kʼarebaita akʉza zarea diaita mawũã ẽbẽrarã Daizeze Bedʼea jaradiakĩrãne jaradiapanamarẽã (Luc. 21:​12-15). Jesús kʼaidubemaraba ẽbẽrarã jaradiabʉrʉde maʉ̃raba ũrĩkĩrã ẽãnera ajuerzade jaradia ẽ basi. Maʉ̃ kĩrãkʼa idi ewadebida dayirãbara ẽbẽrarã Daizeze Bedʼea ũrĩkĩrã ẽãra ajuerzade jaradia ẽ. Ʉ̃kʉrʉ pʉwʉrʉde Daizeze Bedʼea idu jaradiabi ẽ maera mebẽrã mejãchaʉba Daizeze Bedʼea jaradiapanʉ. Mamina maʉ̃ra mawũã opanʉ Jeowaba kʼarebabʉ baera, mawũã mebẽrãba ãyikʉza ĩjãbʉ kʼarea ẽ. Nããbema siglodera Jeowabara kʼarebasi Jesús kʼaidubemara, idi ewadebida Jeowaba kʼarebabʉ Daizeze Bedʼea jaradiakĩrãne jaradiaita iya kãgabʉde (2 Tim. 4:17). Maʉ̃ba bʉa ĩjãbʉbʉrʉ Jeowaba wãrĩnu kʼarebaita mawũãra Daizeze Bedʼeara jaradiakĩrãne jaradiabayi bʉara.

JESÚSBARA ĨJÃSI Ʉ̃KɄRɄ ẼBẼRARÃBARA ŨRĨTA

15. ¿Sãwũã ũdubisi Jesúsbara krĩchabʉta ẽbẽrarã mejãchaʉba ũrĩkĩrãnaita iyi bedʼeara?

¹⁵ Jesúsbara ewari jõmaʉ̃nẽ krĩchabasi ẽbẽrarãbara ũrĩta Daizeze Bedʼeara, naʉ̃ba kʼarebasi iya jaradiakĩrãne jaradiaita ẽbẽrarã. Maʉ̃ta poaga 30de ũdusi ẽbẽrarãbara mejãcha ũrĩbʉta Daizeze Bedʼeara, maʉ̃ kʼarea iya jarasi naʉ̃ yizata, ẽbẽrarã mejãchabʉra ne u waragabʉ kĩrãkʼabʉta (Juan 4:35). Jesúsba mawũã jaradata poaga aba berabaribʉrʉde akʉza naʉ̃ta jarasi: «Mawũã ne u jʉrepeira mejãchabʉ» (Mat. 9:​37, 38). Jesúsbara naʉ̃ bedʼeara jarada ʉ̃rʉ jarabasi, maʉ̃ba tẽã naʉ̃ta jarasi: «Wãrãnebai mʉ ũrãgʼa ĩjãnaĩrã bioa, [ . . . ] Maʉ̃ba widʼiudua Daizeze zhãrã Zhibaria, miã ũrãgʼabadata zokʼamarẽã izhidʼebema ĩjãĩta bʼema» (Luc. 10:2). Jesúsbara krĩchabasi iyi bedʼeara ẽbẽrarã mejãchaʉba ũrĩkĩrã bʼaita. Maʉ̃ba iya ũduside ẽbẽrarã mejãchaʉba wãrĩnu ũrĩbʉta iyi bedʼeara, maʉ̃nera mejãcha sobiasi (Luc. 10:21).

16. ¿Jesúsba yiza jaradiadaba sãwũã kʼarebabʉ jaradiakĩrãne jaradia wãita? (Lucas 13:​18-21 akʉza akʉra potota).

¹⁶ Jesúsbara kʼarebabasi iyi kʼaidubemaraba jaradiakĩrãne jaradiamarẽã Daizeze Bedʼeara, kʼarebabʉde krĩchadamarẽã ãya Daizeze Bedʼea jaradiabʉdeba nebia zromata berabaribasita. Maʉ̃ ʉ̃rʉ bia kʼawuaita yizata ũme jaradiasi (akʉra Lucas 13:​18-21). Nããrabemara mostaza ta ʉ̃rʉ bedʼeasi. Naʉ̃ netara jipade wikakiru, mamina iyi pãwãrabʉrʉdera bakuru zroma ba zebʉ. Jesúsba jarasi maʉ̃ kĩrãkʼa ẽbẽrarã mejãchaʉba ũrĩnaibasita Daizeze Bedʼeara akʉza ãya bedʼea zroma ũdubʉmina idubʉda ẽ baibasita Daizeze Bedʼea ʉ̃rʉ kʼawuapanʉta. Yiza ũmenebemara jara ũrĩbisi lebadura ʉ̃rʉ, maʉ̃neba ũdubita dayirãba bedʼea bia jaradiabʉra naʉ̃ drʉa jõmaʉ̃nẽ jaradiapanʉta. Yi maʉ̃ bedʼea bia ũrĩbʉrʉraba ãya nekʼãrẽ aña obadara wiña wiñane idubʉseabʉ dayirãba maʉ̃ta mesera ũdu ẽ mina. Naʉ̃neba Jesúsba kʼarebasi iyi kʼaidubemarabida krĩchadamarẽã ãya bedʼea bia jaradiabʉbara ẽbẽrarã mejãchaʉta kʼarebaita.

17. ¿Kʼãrẽa krĩchaseapanʉ jaradia wãira yibiata?

¹⁷ Dayirãba idi ewade ũdupanʉ ẽbẽrarã mejãchaʉba ũrĩkĩrãpanʉta dayirãba bedʼea bia jaradiapanʉra. Naʉ̃ ʉ̃rʉ krĩchaiba kʼarebabʉ dayirãbida ewariza jaradiakĩrãne jaradia wãnaita Daizeze Bedʼeata. Dayirãba ũdupanʉ poagaza ẽbẽra mejãchaʉta jʉ̃ẽpanʉta Jesús beida jẽda kĩrãbeita akʉza ẽbẽrarã mejãchaʉba kʼawuakĩrãbʉ Daizeze Bedʼea ʉ̃rʉ, adewara mejãchaʉta buru kʼoepanʉ. Maʉ̃ awuara, mejãchaʉba dayirãne kĩrãkʼa jaradiapanʉ Daizeze Bedʼeata. Wãrĩnubaira dayirãba kʼawua ẽ ẽbẽrarã sõbeba ũrĩkĩrãita dayirãba jaradiapanʉra. Mamina kʼawuapanʉ Jeowabara ẽbẽrarã mejãchaʉta ãba jʉredaita iya kãgabʉta odamarẽã akʉza naʉ̃ ẽbẽrarãra ẽdrʉyi zʉbʉria zroma zebʉrʉdeba (Apoc. 7:​9, 14). Jaradia wãira Jeowaba zokʼabʉ akʉza iya ĩjãbʉ ẽbẽrarã mejãchaʉba ũrĩkĩrãnaita bedʼea biara. Maʉ̃ kʼarea dayirãbara idubʉda ẽ baibara jaradia takirʉta.

18. ¿Wuabemaraba sãwũã ũdukʼawuadamarẽã panʉ dayirãra?

¹⁸ Jesús kʼaidupanʉrãra ũdukʼaude ãya ewari jõmaʉ̃nẽ Daizeze Bedʼeata jaradiakĩrãne jaradiapanʉ kʼarea. Bari jaradaita, nawedara Jesús kʼaidubemaraba jaradia wãbʉrʉdera jaradiakĩrãne jaradiapanasi, zowaĩnĩgʉata ũdubipanasi. Maʉ̃ kʼarea ẽbẽrarã mejãchaʉba ãyira ũdukʼawuapanasi Jesús kʼaidubemarata (Hech. 4:13). Idi ewadebida, dayirãba ẽbẽrarã jaradia wãbʉrʉde zowaĩnĩgʉata ũdubipanʉbʉrʉ akʉza jaradiakĩrãne jaradiapanʉbʉrʉ, ãyabida ũrĩkĩrãnañi dayirã bedʼeata akʉza ũdudayi dayirãbara Jesúsba obada kĩrãkʼa opanʉta.