Ĩjãra Daizeze ʉ̃rʉ, ĩjãrãra bʉyikʉza

1. ¿Kʼãrẽa Pablora sobia basi iya oda kʼarea?

PABLOBA kʼawuaside iyi beadaita, maʉ̃ kʼarea mejãcha krĩcha zroma oẽ basi, iya osi baera nebiata Daizeze nãã, maʉ̃ba iya jarasi: «Mʉ̃ra wũẽbasi jõñinʉ akʉza soiduba ĩjãsi» (2 Tim. 4:​6-8). Pablobara jidasi ewari jõmaʉ̃nẽ Jeowaba zokʼabʉta obaita maʉ̃ kʼarea iyira aduʼa sentibasi iya kʼawuabʉ baera Jeowara sobiabʉta iya obʉ kʼarea. Idi ewadebida dayirãbida krĩcha biata jidaseabʉ mawũã dayirãba obʉdeba Jeowata sobiabiseabʉ. ¿Maʉ̃ra dayirãbara sãwũã oseabʉ?

2. ¿Kʼãrẽta jarakĩrãkʉasi Pablobara 2 Corintios 5:7dera?

² Pablobara iyi ʉ̃rʉ akʉza wuabema kristianora ʉ̃rʉ naʉ̃ta jarasi: «Jõma ũdupanʉ kʼarea opanʉ ẽ awuarabʉrʉ ĩjãbʉ kʼarea jõma opanʉ» (2 Cor. 5:7). Naʉ̃bara, ¿kʼãrẽta jarakĩrãbasi Pablobara? Yi nekʼãrẽ jõma ũdubʉ kʼarea jidabʉbara nekʼãrẽ jidai nãã jidabʉ iya ũrĩbʉ kʼarea, sentibʉ kʼarea akʉza iya akʉbʉ kʼarea. Kõbe yi ĩjãbʉ kʼarea jõma obʉbara nekʼãrẽ oi nãã krĩchabʉ Jeowaba kʼãrẽta kãgabʉta akʉza kʼawuabʉ Daizeze Bedʼeaba jarabʉde obʉbʉrʉ bia wãita akʉza Jeowaba tẽã iyaʼa nebiata diaita (Sal. 119:66; Heb. 11:6).

3. ¿Ĩjãbʉ kʼarea jõma opanʉbʉrʉ kʼãrẽ nebiata ũdudai? (2 Corintios 4:18).

³ Mamina dayirãbara edaʉde nekʼãrẽ kʼawua jidaibara dayirãba sentibʉdeba, akʉbʉdeba akʉza ũrĩbʉdeba. Mamina jʉra kʼawuapanaibara bari dayirãba ũrĩbʉdeba akʉza akʉbʉdeba nekʼãrẽ oita jidara tẽã bedʼea zromata ũduseabʉ baera, ¿kʼãrẽa? Naʉ̃ba dayirãra sewaseabʉ baera akʉza obiseabʉ nekʼãrẽ Jeowaba oẽ marẽã kãgabʉta (Ecl. 11:9; Mat. 24:​37-39). Kõbe ĩjãbʉ kʼarea jõma opanʉbʉrʉ, dayirãba nekʼãrẽ jidadabʉra jidadayi Jeowaba kãgabʉde (Efes. 5:10). Jeowaba jarabʉta opanʉbʉrʉ dayirãra aduʼa bayi akʉza sobia panañi (Sal. 16:​8, 9; Is. 48:​17, 18). Adewara ĩjãbʉ kʼarea jõma opanʉbʉrʉ, ewari jõmaʉ̃nẽ bayi (akʉra 2 Corintios 4:18).

4. ¿Dayirã jõmaʉ̃ba kʼãrẽta widibara?

⁴ Dayirãkʉza naʉ̃ta widiseabʉ: «¿Mʉ̃a nekʼãrẽ jidai nããra kʼãrẽneba jidabʉ? ¿Mʉ̃ara jidabʉka mʉ̃a akʉbʉdeba mawũã ẽ bʉrʉ Jeowaba ũrãgʼa diabʉdeba?». Akʉdaya sãwũã dayirãba Jeowaba jaradiabʉ ʉ̃rʉ ĩjãbʉta ũdubipanʉta naʉ̃ nekʼãrẽ ũbeade: Trajo jʉrʉide, kima jʉrʉide akʉza Jeowa organizasionba jarabʉ oide. Aba abakaʉde kʼawuadayi kʼãrẽ ʉ̃rʉ krĩchadaibarata mawũã Jeowaba kãgabʉde jidadaita.

TRAJO JIDAIDE

5. ¿Kʼãrẽta krĩchaibara dayaʼa trajo diapanʉta jidai nããra?

⁵ Jõmaʉ̃ba dayirã mebẽrãba nesidabʉta diakĩrãbʉ akʉza daya nesidabʉsida erbakĩrãbʉ (Ecl. 7:12; 1 Tim. 5:8). Bʉ ʉ̃kʉrʉ trajo dayi bia pagapanʉta, maʉ̃bara daya nesidabʉta jõma erbʉ akʉza diabʉ daya plata aorraita, mamina bʉ ʉ̃kʉrʉ trajo bari dayi nekʼoita, dayi wua edaita diabʉta. Ẽbẽra abaʉba dayaʼa jarara trajo bia diaita aramaʉ̃ta daya krĩchaseabʉ sõbe pagadaita maʉ̃ barira, maʉ̃ra kayirua ẽ mamina dayirãba krĩchapanʉbʉrʉ bari sõbe pagadaita mawũãra ĩjãbʉta ũdubida ẽ bayi awuarabʉrʉ daya akʉbʉdeba obayi.

6. ¿Sãwũã ĩjãbʉ kʼarea jõma obʉta ũdubidai trajo jidaide? (Hebreos 13:5).

⁶ Ĩjãbʉ kʼarea jõma opanʉbʉrʉ, dayirãba trajo jidai nãã krĩchadayi maʉ̃ba audre Jeowa kʼawa babibʉta mawũã ẽ bʉrʉ jĩgababibʉta. Maʉ̃ kʼarea dayirãkʉza maʉ̃ta wididaibara: «¿Maʉ̃ trajobara Jeowaba kãga ẽãta obika?» (Prov. 6:​16-19). «¿Maʉ̃ trajota ĩjãra Jeowadeta oita ewari neẽ baika? akʉza ¿maʉ̃ trajota ĩjãra mʉ̃ mebẽrãneba jĩga baika ewari bio bayeda?» (Filip. 1:10). Naʉ̃ trajoba dayirãta bia wãbi ẽ bʉrʉ biga bayi ĩjã ẽ baita, daya trajo ũduita mejãcha zareabʉmina. Ĩjãbʉ kʼarea jõma opanʉbʉrʉ ũdubidayi Jeowa ʉ̃rʉ ĩjãbʉta akʉza iya dayirãra nekʼãrẽ badudeba kʼarebaita (Mat. 6:33; akʉra Hebreos 13:5).

7, 8. ¿Mebẽã Javierbara sãwũã ũdubisi ĩjãbʉ kʼarea jõma obʉta? (Akʉra potota).

⁷ Akʉdaya sãwũã mebẽã Javiera Sudaméricadebemaba ũdubisita iyara ĩjãbʉ kʼarea jõma obʉta, iyira yi nãã edebari bakĩrãbasi, iya jarabʉ: «Empresa mʉ̃ trajabadamae basi trajo aba mʉ̃a ganabadaira ʉ̃ta pagapanʉta adewara maʉ̃ trajora mʉ̃ara kãgabasi, maʉ̃ta mʉ̃ra trʉ̃sida mʉ̃me bedʼeaita, mawũã mʉ̃a trajo diadai kʼawuaita mamina maʉ̃ trajoeda wãi nãã Jeowaʼa yiwidʼisi, mʉ̃a ĩjãbʉ baera Jeowaba kʼawuabʉta saʉ̃ta bigata mʉ̃itara. Maʉ̃ trajora mʉ̃ara kãgabasi mʉ̃a nesidabʉta jõma erbaibasi baera akʉza plata ʉ̃ta ganaibasi baera maʉ̃neba, wãrĩnubaira mʉ̃ara trajo biata erbakĩrãbasi, mʉ̃aʼa plata ʉ̃ta ganabibʉta mamina mʉ̃ara jʉrʉamabasi trajo Jeowaita okĩrãbʉta iduaribi ẽãra».

⁸ Javierba jarabʉ: «Ẽbẽra mʉ̃a trajo diaiba jarasi, naʉ̃ trajota ĩjãra ewari ʉ̃ta trajaibarata, aramaʉ̃ta mʉ̃a iyaʼa jarasi mʉ̃ra mawũã mejãcha trajabe ẽãta Daizeze Bedʼeata jaradiai baera». Mawũã, Javierbara ĩjã ẽ basi maʉ̃ trajora. Mawũã berabaridata semana ũmene iyira yi nãã edebari basi adewara iyabaʉ poagade ũdusi trajo yi nãã edebarita idu obibʉta akʉza Javierba jarabʉ: «Jeowabara panʉsi mʉ̃ yiwidʼira akʉza ũdusi trajo mʉ̃ yi nãã edebari idu obibʉta, maʉ̃ba mʉ̃ra mejãcha sobiabʉ iduaribibʉ baera Jeowadeta oita akʉza mʉ̃ mebẽrãbawara ãba baita».

9. ¿Bʉara kʼãrẽta kʼawuabʉ Trésor nebʉradebara?

⁹ ¿Kʼãrẽta oseapanʉ dayirãba trajo erbʉta biga ẽ bʉrʉ dayirãita akʉza maʉ̃ trajoba Jeowa kʼawa babibʉ ẽ bʉrʉ? Akʉdaya Trésor berabaridata, iyira Congodebema, iya jarabʉ: «Mʉ̃a trajo erbasi mʉ̃ bia pagapanʉta, maʉ̃ba bia wãbasi mʉ̃ra akʉza kãgabasi mʉ̃a maʉ̃ trajora adewara wuabemarabara mʉ̃aʼa wawia ũdubipanasi». Trésor mawũã trajabʉ baera bio aduabasi ãba yi jʉrebarieda wãbʉra akʉza jarapanasi empresade nemitia osibʉrʉ, maʉ̃ta wuabemara jara ẽ marẽã. Trésorbara maʉ̃ trajora amaekĩrãbasi mamina perabasi iya ũdu ẽ bai kʼarea awuru trajota, ¿kʼãrẽba kʼarebasi? Iya jarabʉ: «Habacuc 3:​17-19 bayeda jarabʉde mʉ̃a kʼawuasi mʉ̃ trajo aduaimina Jeowabara mʉ̃aʼa diaita mʉ̃a nesidabʉra, maʉ̃ kʼarea mʉ̃ra maʉ̃ trajodebara ãĩ wãsi». Maʉ̃neba Trésorba jarabʉ: «Nezokʼabʉbara krĩchabʉ ãya ẽbẽra abaʉʼa platata audre pagabibʉrʉ maʉ̃bara nekʼãrẽ jõma obʉta audre plata ganaña, bari jaraita amaebʉta yi mebẽrãta akʉza Jeowata. Mʉ̃ra mejãcha sobiabʉ mʉ̃a jʉrʉsi baera sãwũã audre Jeowa kʼawa bʼaita adewara akʉita mʉ̃ mebẽrãta, maʉ̃ta poaga aba berabarida tẽã Jeowaba kʼarebasi mʉ̃a trajo ũduita, mʉ̃ mebẽrã sãwũã akʉita akʉza maʉ̃ daucha Jeowadesida obibʉta. Dayirãba Jeowata nããra bʉera, edaʉde ewari biobayeda plata neẽã berabariseabʉ mamina maʉ̃nera Jeowabara ewari jõmaʉ̃nẽ akʉyi dayirãra». Jeowaba jarabʉta ũrĩpanʉbʉrʉ akʉza iya nebia diaya abʉta ĩjãpanʉbʉrʉ ũdubidayi ĩjãbʉ kʼarea nejõma obʉta akʉza mawũã odara Jeowaba nebiata diayi.

KIMA JɄRɄIDE

10. ¿Kima barai ʉ̃rʉ krĩchabʉrʉdera kʼãrẽne ũdubiseapanʉ daya ũdubʉdeba bʉta?

¹⁰ Juwa jidaira Jeowaba oda, maʉ̃ba mia kʼãĩ ʉ̃rʉ krĩchaira kayirua ẽ. Mebẽã abaʉba iya kãgabʉta ũdu erbʉbʉrʉ, maʉ̃nera krĩchaseabʉ maʉ̃ ẽbẽra biayiru kʼawuaita, sãwũã chuta, wuabemaraba kʼãrẽta krĩchabʉta iyi ʉ̃rʉ, iyi plata sãwũã gastabʉta, yi mebẽrãnebemara akʉbʉ kʼawuaita akʉza iyiʉ̃me bʉde maʉ̃ba sobiabibʉ kʼawuaitab. Maʉ̃ra ʉ̃rʉ krĩchaira kayirua ẽ, yibia maʉ̃ ʉ̃rʉ krĩchaira, mamina bari maʉ̃ra ʉ̃rʉbʉrʉ krĩchabʉbʉrʉ maʉ̃nera ũdubinʉmañi iya ũdubʉdeba bʉta.

11. ¿Sãwũã ĩjãbʉ kʼarea jõma obʉta ũdubidai kima jidaidera? (1 Corintios 7:39).

¹¹ Jeowara mejãcha sobiabʉ ũdubʉrʉde mebẽrã dobapanʉraba iya ũrãgʼa diabʉta ũrĩbʉta kima jʉrʉide, bari jaraita, aukʼara warraraena kima jʉrʉita krĩchada ẽãne, awuarabʉrʉ jʉ̃ãpanʉne audre bia krĩcha zeita mawũã ẽbẽra abaʉme bedʼea jʉ̃drʉita (1 Cor. 7:36). Adewara naʉ̃ra mebẽrãba ũdubʉdade ẽbẽra aba ãya kãgabʉta, maʉ̃nera akʉpanʉ naʉ̃ ẽbẽraba Jeowaba nebia erbaibara abʉta erbʉ kʼawuaita mawũã ãyita kima bia ba zeita (Prov. 31:​10-13, 26-28; Efes. 5:33; 1 Tim. 5:8). Akʉza ẽbẽra aba Jeowa odebʉ ẽãba ãyita kãga akʉbʉbʉrʉ, ĩjãna ẽ maʉ̃ bedʼeara awuarabʉrʉ opanʉ Jeowaba 1 Corintios 7:39de jarabʉ kĩrãkʼa (akʉra). Naʉ̃ra mebẽrãbara ũdubipanʉ nekʼãrẽ jõmaʉ̃nẽ ĩjãbʉdeba opanʉta kʼawuapanʉ baera Jeowabʉrʉ diaita ãya nekʼãrẽ nesidabʉra mawũã ãyi bia sentidamarẽã (Sal. 55:22).

12. ¿Bʉara kʼãrẽta kʼawuabʉ Rosadebara?

¹² Akʉdaya mebẽã Rosa berabaridata, iyira Colombiadebema. Iyi trajabʉ maera yumakẽrã abaʉme ãba trajapanasi, mawũã ewari biobayeda trajapanʉ baera iya maʉ̃ yumakẽrata kãgasi akʉza yumakẽrãbida iyita. Rosaba naʉ̃ta jarabʉ: «Mʉ̃mara maʉ̃ yumakẽrãra ẽbẽra bia basi, iyara kʼarebabasi komunidadebemata, kʼẽrẽpa basi akʉza mʉ̃sida bia edabasi, mawũẽra mawũãbʉ yumakẽrãta kãgabasi mʉ̃ara mamina iyira Jeowa ode ba ẽ basi». Adewara Rosaba jarabʉ: «Maʉ̃ ewaridera mʉ̃ra juwa jidakĩrãbasi baera mʉ̃itara zare basi jaraita ĩjã ẽãta iyi bedʼeata, mʉ̃a wabida kongregasionera ũdu ẽ baera kʼaiʉ̃me juwa jidaita». Mamina Rosara mawũã juwa jidakĩrãbʉa yi edebi ẽ basi, iya krĩchasi maʉ̃ yumakẽrãʉ̃me juwa jidara sãwũã zʉbʉriaita tẽã, maʉ̃ba maʉ̃me mia kʼãĩ ẽ basi akʉza iyiʉ̃me wã bedʼea ẽ basi, awuarabʉrʉ Jeowaba zokʼabʉta audre ojʉ̃drʉsi. Maʉ̃ tẽã Rosara Escuela Evangelizadorʼeda trʉ̃sida akʉza yi nãã edebari 100 ora babisida. Mawũẽra Rosaba jarabʉ: «Mʉ̃ra mejãcha sobiabʉ Jeowaʉ̃me kʼẽrẽpabʉ baera». Edaʉde zare Jeowaba jarabʉta oita dayi mia kãgabʉrʉdera, mamina maʉ̃ne Jeowaba zokʼabʉta ũrĩnara akʉza aripe odara maʉ̃ra audre yibia bayi.

JEOWA ORGANIZASIONBA JARABɄ OIDE

13. ¿Jeowa organizasionba nekʼãrẽ omarẽã zokʼabʉrʉdera kʼãrẽta krĩchaseabʉ dayirãbara maʉ̃ ʉ̃rʉra?

¹³ Badua dayirã jarapanʉ sãwũã Jeowadeta audre bia odaita, maʉ̃ra zebʉ zõrãrã kongregasionebemaneba, Beteldeba, kongregasion akʉbari zõrãrãneba akʉza Zõrãrã Burubiadeba. Mamina, ¿kʼãrẽta berabariseabʉ ãya zokʼabʉta dayirãba bia ũrĩ ẽ bʉrʉ? Ãyi ʉ̃rʉ mitia krĩcha jʉ̃drʉseabʉ akʉza krĩchaseabʉ ãya zokʼabʉra dayirãba oita zeri ẽãta.

14. ¿Kʼãrẽba kʼarebai ũrĩta Jeowa organizasionba zokʼabʉra? (Hebreos 13:17).

¹⁴ Ĩjãbʉ kʼarea jõma obʉta ũdubidara, ũdubidayi ĩjãbʉta Jeowaba zokʼabʉta iyi organizasionʼra akʉza Jeowaba kʼawuabʉta saʉ̃ta bigata akʉza saʉ̃ta zeri ẽãta, maʉ̃ba dayirãitara zare ẽ bayi jõma Jeowa organizasionba kʼãrẽta omarẽã zokʼabʉra ũrĩta (akʉra Hebreos 13:17). Dayirãba ũrĩpanʉbʉrʉ Jeowa organizasionba zokʼabʉta naʉ̃ba kʼarebayi kongregasion ãba erpanaita (Efes. 4:​2, 3). Naʉ̃ra yi nãã edepanʉrãra nemitia omiamina ãya zokʼapanʉta dayirãba ũrĩpanʉ, dayirãba ĩjãpanʉ baera Jeowaba dayirã nebia diaita ãyi bedʼeata ũrĩpanʉ kʼarea (1 Sam. 15:22). Akʉza kʼawuapanʉ nekʼãrẽta ara oibarabʉrʉ Jeowaba ara oita iya kãgabʉ ewaride (Miq. 7:7).

15, 16. ¿Kʼãrẽba kʼarebasi mebẽã aba ĩjãbʉ kʼarea Jeowa organizasionba jarabʉde oita? (Akʉza akʉra potota).

¹⁵ Akʉdaya kʼãrẽ nebiata ũduseabʉta ĩjãbʉ kʼarea opanʉneba. Akʉdaya Perúde berabaridata, mamara bedʼeapanʉ kapuria bedʼeata mamina mejãchaʉba bedʼeapanʉ ẽbẽra mamabema bedʼeata, quechuata. Poaga biobayeda mebẽrã quechua bedʼeabʉraba jʉrʉpanasi ẽbẽra quechua bedʼeabʉta ãyi pʉwʉrʉde, mamina nokʼora maʉ̃ pʉwʉrʉdebemaba jarabʉta ũrĩnaita wua mawũã oda ẽ basi (Rom. 13:1). Maʉ̃ kʼarea mebẽrã mejãchaʉba krĩchasida zare bʼaita ũduita ẽbẽrarã quechua bedʼeabʉta Jeowa organizasionba jarabʉ kĩrãkʼa jʉrʉdara mamina mebẽrãbara Jeowaba zokʼabʉta ũrĩsida baera, Jeowabara mejãchade kʼarebasi ẽbẽrarã quechua bedʼeabʉ ũduita.

¹⁶ Maʉ̃ne basi mebẽã Kevin, iyira basi kongregasion quechua bedʼeabʉde iyira krĩcha obasi, krĩchabasi baera sãwũã ũduita mawũãra ẽbẽrarã quechua bedʼeabʉra, ¿Kʼãrẽta osi aramaʉ̃ta Kevinbara? Iya jarabʉ: «Mʉ̃a kĩrãbesi Proverbios 3:5ba jarabʉta akʉza Moisés ʉ̃rʉ. Jeowaba jarasi Moisésʼa israelitarata Egiptodeba edemarẽã mar Rojo eda, mamina daya bia akʉira Jeowaba jaradara biga ẽ basi egipsioraba pẽwãseabasi baera mamina mawũãsidu Moisésbara ũrĩsi Jeowaba jaradara, maʉ̃ kʼarea Jeowaba nebiata diasi» (Éx. 14:​1, 2, 9-11, 21, 22). Kevinbara ũrĩsi Jeowa organizasionba jarabʉta, ¿kʼãrẽ nebiata ũdusi maʉ̃ kʼarea? Kevinba jarabʉ: «Mejãcha sobiabʉ Jeowaba sãwũã kʼarebasita ũdubʉ baera maʉ̃neba, nããrara daira mejãcha wãibarabasi ẽbẽra aba mawũã ẽ bʉrʉ ũme ũduita mamina atiara Jeowa organizasionba jarabʉde opanʉ baera akʉ wãpanʉ ẽbẽrarã quechua bedʼeapanʉra ãbanʉmʉta, maʉ̃ba atiara zare ẽ ẽbẽrarã quechua bedʼeabʉme bedʼeaita, ãyi jẽda akʉ wãita, Daizeze Bedʼea jaradiaita akʉza ʉ̃kʉrʉba Daizeze Bedʼea kʼawua jʉ̃drʉsida, adewara dai ãba yi jʉrepanʉmaera audre jʉ̃ẽpanʉ ebẽrarãra». Dayirãba ĩjãbʉ kʼarea nejõma opanʉbʉrʉ Jeowabara nekʼãrẽ biata mejãcha diayi.

17. ¿Kʼãrẽta kʼawuasida naʉ̃ artikulodera?

¹⁷ Naʉ̃ artikulode dayirãbara kʼawuasida nekʼãrẽ ũbeade ĩjãbʉdeba oũdubibarata mamina bari maʉ̃ne oũdubibara ẽ, nekʼãrẽ jõmaʉ̃nẽbida ũdubibara, bari jaraita daya kʼãrẽ pelikula akʉide, dayi ewari sãwũã zokʼaide, kʼãrẽ estudiaide akʉza wũãwũã sãwũã dapũẽine, nekʼãrẽ baduta jidabʉrʉdera bari jida ẽ baibara dayirãba akʉbʉ kʼarea, krĩchaibara mʉ̃ã maʉ̃ta ora mʉ̃ra audre Jeowa kʼawabʉ kʼawuaita adewara krĩchaibara Jeowaba kʼãrẽ ũrãgʼa biata diabʉta Daizeze Bedʼeadeba akʉza Jeowaba mʉ̃aʼa kʼãrẽ nebia diaita jarabʉta. Dayirãba mawũã odara ewari jõmaʉ̃nẽ Jeowa ode panañi (Miq. 4:5).