Zʉbʉria berabarinʉmʉne sãwũã kʼarebaseabʉ Job berabaridaba

1, 2. ¿Kʼãrẽa bigabʉ Job berabarida ʉ̃rʉ leita?

¿BɄA Daizeze Bedʼeade lebarika Job berabarida ʉ̃rʉ? Naʉ̃ libro bʉdapeadara dããraba 3.500 poaga ba. Mawũãsidu ẽbẽrarãbara jarapanʉ naʉ̃ librora arigʉ yibiata. Ẽbẽra bioʉba jarapanʉ naʉ̃ libro bʉda ẽbẽrabara bedʼea kĩrãwãreãta zokʼasita akʉza ẽbẽrarãba ũrĩne bʉsita, maʉ̃ba ẽbẽrarã soidu jʉ̃ẽbʉ. Naʉ̃ librora Moisésba bʉsi mamina yi bedʼeara Daizezedeba zesi (2 Tim. 3:16).

² Job berabaridadebara nekʼãrẽ mejãcha kʼawuaseapanʉ, ¿kʼãrẽa? Nããrãra, ẽbẽrarãba akʉza angeleraba ãya aba abakaʉba kʼawua jidayi Jeowata kãgapanʉ baera, iyi bedʼeata ũrĩnai kʼawuaita akʉza iyi trʉ̃ ʉ̃rʉ imitia bedʼeada ẽ bamarẽã. Akʉza jaradiabʉ Jeowaba kʼãrẽaba kãga erbʉ ʉ̃rʉ, iyi buru bia ʉ̃rʉ akʉza nejõma aripe obʉ ʉ̃rʉ, maʉ̃ awuara iyi zarea ʉ̃rʉ. Bari jaradaita Job librodera jarabʉ Jeowaba nejõma oseabʉta, maʉ̃ra ʉ̃tʉ zebʉ jarama 31 bayeda. Akʉza jaradiabʉ kʼãrẽa Daizezebara iduaribibʉta ẽbẽrarãra zʉbʉria berabarimarẽã. Maʉ̃ awuara panʉbʉ ẽbẽrarãba kʼãrẽ krĩchabʉ ʉ̃rʉ.

3. ¿Job berabarida kʼawuabʉrʉdera, dayirãra sãwũã kʼarebabʉ?

³ Job berabarida ʉ̃rʉ kʼawuabʉrʉdera katumainʉ ʉ̃tʉ wãi kĩrãkʼabʉ. Katumainʉ ʉ̃tʉ wãbʉrʉdera biʼia ũdudogo dayi audu kʼãrẽtabʉta. Job berabarida ʉ̃rʉ kʼawuabʉrʉbara dayirã bedʼea zromara katumaneba yeda akʉbʉrʉ kĩrãkʼabʉ, Jeowaba akʉbʉ kĩrãkʼa. Naʉ̃ artikulode kʼawuadayi sãwũã Job berabarida ʉ̃rʉ kʼawuabʉrʉba idi dayirãra kʼarebaseabʉta bedʼea zroma ũdubʉdade. Adewara, Job berabaridaba kʼarebasibaibara nããbema israelitarata akʉza sãwũã dayirãbara kʼarebaseabʉ wuabemarasida naʉ̃neba.

DAIZEZEBA IDUARIBISI JOB ZɄBɄRIAMARẼÃ

4. ¿Jobʼra kʼãrẽne awuarabasi ʉ̃kʉrʉ israelitara Egiptode badabawaraira?

⁴ Jobʼra Uz drʉadebemabasi, maʉ̃ ewaridera israelitarãra Egiptode egipsiora nezokʼabasi. Uz drʉara Egipto kʼaitabasibaibara. Israelitara Egipto drʉade basidera ʉ̃kʉrʉta nekʼãrẽ oma yiwidʼikʉasida, mamina Jobʼbara maʉ̃ra oẽ basi (Jos. 24:14; Ezeq. 20:8). Maʉ̃ba Daizezebara jarasi: «Naʉ̃ drʉadera mia abaʉta neẽ kaʉ̃ kĩrãkʼara»a (Job 1:8). Jobʼbara nebiata mejãcha erbasi akʉza Jobʼra jõmaʉ̃ba bia akʉpanasi, ẽbẽrarãbara wawia ũdubipanasi iyara (Job 1:3). Maʉ̃ba Diarura mejãcha kĩrʉbasi Jobʼbara Daizezeba jarabʉta jõma obasi baera.

5. ¿Kʼãrẽa Jeowabara Jobʼra idu zʉbʉria berabaribisi? (Job 1:​20-22; 2:​9, 10).

⁵ Diarubara jarasi Job bedʼea zroma ũdubʉrʉdera Daizeze bedʼeara ũrĩ ẽ baita (Job 1:​7-11; 2:​2-5). Jeowaba Job kãgabasimina iduaribisi Diaruba iya krĩchabʉta omarẽã, mawũã ũdubita Diaruba jarabʉra wãrĩnuta mawũã ẽ bʉrʉ sewidata (Job 1:​12-19; 2:​6-8). Diarubara osi Jobʼba nedʉwʉrʉ zakera erbadara, ʉ̃kʉrʉta zrʉgadamarẽã yi wuabemata makenabisi akʉza maʉ̃ awuara Jobʼba wũãwũãra 10 erbadata makenasi akʉza Jobʼsida kaya kayiruaba kayabisi, mawũãsidu Jobʼra Jeowaʉ̃me kʼẽrẽpabasi (akʉra Job 1:​20-22; 2:​9, 10). Job berabaridabara nekʼãrẽ mejãcha jaradiabʉ. Tẽã junea Jobʼra Jeowaba kʼarebasi iyi kayadeba ẽdrʉita akʉza kʼarebasi nekʼãrẽ bia erbaita jẽda, maʉ̃ awuara diasi wũãwũãrata audu 10. Mõbe osi ẽbẽrarãba iyita bia akʉdamarẽã akʉza wawia ũdubipanamarẽã. Jeowabara maʉ̃neba ʉ̃ta Jobʼra babisi 140 poagabayeda. Mawũã iya ũdusi yi warrara wũãwũãta jõma (Job 42:​10-13, 16). Akʉza Job berabaridaba, ¿sãwũã kʼarebasiba ʉ̃kʉrʉ ẽbẽrarã nãã Jeowaʉ̃me kʼẽrẽpa badarata? Idi dayirãsida, ¿sãwũã kʼarebabʉ naʉ̃bara?

6. ¿Israelitarãra sãwũã kʼarebakaʉsi ãya kʼawuapanasibʉrʉ Job berabarida ʉ̃rʉ? (Akʉra potota).

⁶ Kʼãrẽta kʼawuaseapanasi israelitarabara. Israelitarãra mejãcha zʉbʉria berabarisida Egiptode. Bari jaradaita Josuéta Calebʼʉ̃me warraraenaʉba Egiptora nezokʼabasi, maʉ̃ tẽã junea desiertode 40 poagabayeda panasi. Mama zʉbʉriasida ãyira, ʉ̃kʉrʉ israelitaraba Daizeze Bedʼeata ũrĩna ẽ basi baera. Israelitaraba kʼawuapanasibʉrʉ Job sãwũã berabaridata, naʉ̃ba kʼarebakasi ãyira kʼawuaita kʼaiba zʉbʉriabinʉmʉta. Akʉza ãya kʼawuakasi kʼãrẽa Jeowabara iduaribibʉta ẽbẽrarãra zʉbʉria berabarimarẽã. Akʉza maʉ̃ awuara ãya kʼawuakasi kʼãrẽa Jeowabara kãgabʉta ẽbẽrarã kʼẽrẽpapanamarẽã iyiʉ̃me.

7, 8. ¿Sãwũã kʼarebaseabʉ Job berabaridaba yi zʉbʉriapanʉrata? Jara ũrĩbira Hazel kʼãrẽ berabaridata.

⁷ Kʼãrẽta kʼawuaseapanʉ dayirãbara. Ʉ̃kʉrʉ ẽbẽrarãba ũdubʉrʉde ẽbẽra biara zʉbʉriapanʉta, ãyikʉzaʉba krĩchapanʉ kʼãrẽa Daizezebara iduaribibʉ zʉbʉriata berabarimarẽã. Ãyiraba kʼawua ẽ baera kʼãrẽa mawũã berabaribʉta, idubʉpanʉ Daizeze ʉ̃rʉ ĩjãita. Mawũã berabarisi wẽrã aba, iyi trʉ̃ra Hazelta,b iyira Ruandadebema. Iyi warraraena ĩjãbasi Daizeze ʉ̃rʉ, mamina tẽã nekʼãrẽ berabaribʉrʉba awuara krĩcha wãsi. Yibarirãra yi idubʉsida akʉza yi papara awuru yumakẽrãʉ̃me mia kʼãĩsi, maʉ̃ yumakẽrãbara bia eda ẽ basi Hazelʼra. Warrarabaside yumakẽrã abaʉba wawa osi. Hazelʼra wãbasi iyi religionma, mamina iya ũrĩbʉba iyi sopʉata taʉbi ẽ basi. Ewari aba iya naʉ̃ta jarasi Daizezeʼa: «Mʉ̃a bʉaʼa yiwidʼibari akʉza zarea obari nebia oita, mawũãsidu bʉara mʉ̃ ʉ̃rʉ nemitiata zebibʉ, maʉ̃ kʼarea bʉa kãgabʉta mʉ̃a wua oẽ bayi, awuarabʉrʉ mʉ̃a kãgabʉtrʉ oyi sobia bʼaita». Ẽbẽra bioʉta berabaribari Hazel kĩrãkʼa, ẽbẽrarãba jaradiapanʉ baera Daizezebʉrʉ zʉbʉriabibʉta, maʉ̃ba sopʉabibare dayirãta. Maʉ̃ kʼarea jaradiakĩrãpanʉ wãrĩnuta Daizeze ʉ̃rʉ.

⁸ Mamina dayirãba kʼawuasida Job nebʉradeba Daizezebara nemitiara zebi ẽãta, awuarabʉrʉ Diarubʉrʉ zebibʉta zʉbʉriara. Akʉza kʼawuasida ẽbẽrarãta zʉbʉria berabaribʉrʉdera, krĩchada ẽ baibarata ãyiraba nemitia obʉ kʼarea mawũã berabaribʉta. Daizeze Bedʼeaba jarabʉ: «Jõmaʉ̃ta edaʉde ewari kayirua erpanʉ baera akʉza daya kʼawua ẽãne zʉbʉria ũdupanʉ baera» (Ecl. 9:11; Job 4:​1, 8). Akʉza kʼawuasida bedʼea zroma berabaribʉrʉidu dayirãta Jeowaʉ̃me kʼẽrẽpapanʉbʉrʉ, mawũãra jõmaʉ̃ba kʼawuadayi Diarura sewa nebʉra omiata (Job 2:3; Prov. 27:11). Sobiapanʉ Daizeze Bedʼeadeba kʼawuasida baera kʼãrẽa zʉbʉriata berabaribʉta ẽbẽra biarãra. Maʉ̃neba ʉ̃ta, ¿kʼãrẽta berabarisi Hazelʼta? Iya kʼawua jʉ̃drʉsi Daizeze Bedʼeata Jeowa odebʉraʉ̃me, maʉ̃ne kʼawuasi Daizezebara zʉbʉriabi ẽãta. Iya jarasi: «Akʉza jẽda Jeowaʼa yiwidʼisi, jarasi jõma sãwũã sentibasita. Jarasimina wua yiwidʼi ẽ baita wãrĩnubaira mʉ̃ara maʉ̃ra okĩrã ẽ basi, awuarabʉrʉ maʉ̃ta jarasi wãrĩnu iyita ũdukʼawua ba ẽ basi baera. Idibʉrʉ kʼawuadogo Jeowaba mʉ̃ra mejãcha kãgata, atiara sobiabʉ». Dayirãta sobiapanʉ kʼawuasida baera kʼãrẽa Daizezebara iduaribibʉta zʉbʉriamarẽã. Atia kʼawuadayi dayirã aba abaka zʉbʉriapanʉne Job berabaridaba sãwũã kʼarebabʉta.

SÃWŨÃ KʼAREBABɄ JOB NEBɄRABA AWUANTAITA

9. Jara ũrĩbira sãwũã berabarinʉmasita Jobʼra (Santiago 5:11).

⁹ Krĩchadrʉ Jobʼra egoro ẽzadra doba jewedabʉta. Iyi kakuara yagawasi, maʉ̃ba mejãcha pʉata sentibibʉ akʉza iyira chi iasibasi, adewara iyira zarea neẽbasi akʉza jidabʉ kʉgʉrʉ todozoamata iyi isikabʉ kʉrʉita. Bari iyi pʉatrʉ jarabasi. Jobʼra bari iyi beiyeda mawũã zʉbʉrianʉma ẽ basi, awuarabʉrʉ awuantabasi Jeoware kʼẽrẽpa bʼaita (akʉra Santiago 5:11). Atia kʼawuadayi Jobʼra kʼãrẽba kʼarebasita kʼẽrẽpa bʼaita.

10. ¿Sãwũã kʼawuapanʉ Jobʼra Jeowa neũdukʼawuarabasita?

¹⁰ Jobʼbara pera ẽã bedʼeaseabasi Jeowaʉ̃me, jõma jarabasi iyi sãwũã sentibʉra (Job 10:​1, 2; 16:20). ¿Sãwũã kʼawuapanʉ maʉ̃ta? Kapitulo 3de Jobʼbara jarabasi iyi kʼãrẽaba sopʉabʉta akʉza krĩchabasi Daizezeba mawũã zʉbʉriamarẽã berabaribibʉta. Maʉ̃ tẽã akʉ zesida iyi neũdukʼawua ũbeaʉba, ãya jarasida iya nemitia oda kʼarea mawũã berabarinʉmʉta. Mamina Jobʼbara jarada ʉ̃rʉ jarasi iyira mawũã berabarinʉmʉ ẽãta nemitia oda kʼarea. Adewara iya jaradata lebʉrʉde, kʼawuapanʉ iya ewari aba krĩchabarisi iya Jeowadeira audre daucha obʉta (Job 10:​1-3; 32:​1, 2; 35:​1, 2). Jobʼba kʼawuasi iya aña bedʼea totobasita jarabaside iyara daucha obʉta (Job 6:​3, 26). Akʉza kapitulo 31ne kʼawuabibʉ Jobʼbara kãgabasita Jeowaba ũrĩpe akʉza jaramarẽã iyara nemitia oẽ basita (Job 31:35). Jobʼba Jeowaʼa kʼãrẽa mawũã bedʼeaita neẽbasi iyi zʉbʉria ʉ̃rʉ. Jobʼba Jeowaʼa sãwũã bedʼeadadeba dayirãba kʼawuatabeda iyira pera ẽã bedʼeaseabasita, maʉ̃ba ũdubibasi iyira wãrĩnu Jeowa neũdukʼawuarata, adewara iya kʼawuabasita Jeowaba iyaʼa kʼãrẽ bia obʉdeba kĩrãdua ẽãta iyira.

11. ¿Job bedʼeara sãwũã panʉsi Jeowabara?

¹¹ Jeowaba zebisi pʉãdrʉ zromata mõbe bedʼeasi Jobʼa. Mamina jara ũrĩbi ẽ basi kʼãrẽa iyira zʉbʉria berabarinʉmʉta, adewara kʼẽã ẽ basi iyi sãwũã bedʼeada kʼarea, awuarabʉrʉ iyi soidu jʉ̃ẽbita, zezeba yi wũãwũã ũrãgʼabari kĩrãkʼa jaradiasi. Maʉ̃ne Jobʼba kʼawuabasi iyara jõma biʼia kʼawuabʉ ẽãta, jarasi iyi jõma sãwũã bedʼeadara wãrĩnubaira biga ẽãta (Job 31:6; 40:​4, 5; 42:​1-6). Mõbera Job nebʉraba, ¿sãwũã kʼarebaseabasi ʉ̃kʉrʉ ẽbẽrarã nããbemara akʉza sãwũã kʼarebabʉ idi ewade dayirãta?

12. ¿Job nebʉradeba kʼãrẽta kʼawuaseapanasi Moisésba akʉza israelitaraba?

¹² Kʼãrẽta kʼawuaseapanasi israelitarabara. Krĩchadadrʉ Moisés ʉ̃rʉ, iyira israelitara nãã edebaribasi, israelitaraba nekʼãrẽ aña opanʉta jõma iya awuantaibarabasi. Adewara ʉ̃kʉrʉba ũrĩkĩrãna ẽ basi Jeowa bedʼeata, maʉ̃ba sopʉabibasi Moisésta. Bedʼea zroma zebasidera ʉ̃kʉrʉ israelitarabara Jeowa ʉ̃rʉ imitia bedʼeapanasi, mamina Moisésʼra awuarabasi, iyara Jeowa kʼarebata jʉrʉbasi jaraita iyi kʼãrẽba sopʉabʉta (Éx. 16:​6-8; Núm. 11:​10-14; 14:​1-4, 11; 16:​41, 49; 17:5). Job yizadeba kʼarebaseabasi Jeowaba Moisés ũrãgʼasidera. Bari jaraita Jeowaba diaita jarasi drʉa biata israelitara, maʉ̃ne eda wãi naweda Moisésʼra kĩrʉsi israelitarabawara, maʉ̃ba ãyi ʉ̃rʉ imitia bedʼeasi. Akʉza Moisésbara jara ẽ basi Jeowabʉrʉ kʼarebaita (Sal. 106:​32, 33). Maʉ̃ kʼarea Jeowabara iduaribi ẽ basi eda wãmarẽã iya drʉa diaya adamae (Deut. 32:​50-52). Maʉ̃ba mejãcha sopʉasibaibara Moisésʼra mamina iya Jeowa ũrãgʼata soiduba ũrĩsi. Job nebʉraba kʼarebasibaibara Moisésba bedʼea zroma ũduside akʉza ʉ̃kʉrʉ israelitarasida. Ãya krĩchapanasibʉrʉ Job nebʉra ʉ̃rʉ, kʼawuaseapanasi pera ẽã Jeowa jaraita ãyi sãwũã sentibʉra. Adewara krĩcha ẽ bʼaita Jeowaira audre kʼawuabʉta, adewara Jeowaba ũrãgʼa diabʉrʉde soiduba ũrĩta.

13. ¿Job berabaridadeba dayirãsida sãwũã kʼarebaseabʉ awuantaita? (Hebreos 10:36).

¹³ Kʼãrẽta kʼawuaseapanʉ dayirãbara. Idi ewade Jeowa odebʉrabida nesidapanʉ awuantaita (akʉra Hebreos 10:36). Bari jaraita ʉ̃kʉrʉra kayabʉbaibara, mawũã ẽ bʉrʉ krĩcha obʉbaibara akʉza beisibaibara ãyi mebẽrãta, yi neũdukawuata mawũã ẽ bʉrʉ bedʼea zromata erbʉbaibara deda, adewara awuruba dayi ʉ̃rʉ aña jarabʉ kʼarea sopʉabʉbaibara (Prov. 12:18). Mamina kʼawuasida Job nebʉradeba dayirãbara Jeowaʼa jõma jaraseabʉta dayi sãwũã sentibʉra, iya ũrĩ baera dayi yiwidʼira (1 Juan 5:14). Jeowara kĩrʉ toto ẽ bayi daya sãwũã iyaʼa bedʼeabʉ kʼarea, edaʉde aña bedʼeapanʉmina Job bedʼeada kĩrãkʼa, awuarabʉrʉ iyara diayi zareata akʉza diayi buru biata dayirãba awuantamarẽã (2 Crón. 16:9; Sant. 1:5). Job kʼarebada kĩrãkʼa, Jeowaba ũdura dayirãba ũrãgʼata nesidabʉta iyara kʼarebayi Daizeze Bedʼeadeba, iyi organizasioneba, zõrãrã kongregasionebemaraneba, mawũã ẽ bʉrʉ mebẽãdeba. Job nebʉraba dayirã jaradiabʉ Jeowaba dayirãta ũrãgʼabʉrʉdera dayirãba ũdubibarata awuantabʉta (Heb. 12:​5-7). Jobʼitara bigabasi Jeowa bedʼea ũrĩra, dayirãitabida bigabaibara Jeowaba ũrãgʼa diabʉta soiduba ũrĩta (2 Cor. 13:11). Job nebʉradeba dayirãba mejãcha nekʼawuaseapanʉ. ¿Sãwũã kʼarebaseapanʉ Job nebʉradeba awururata kʼarebaita? Kʼawuadayi.

JOB BERABARIDADEBA KʼAREBADADRɄ AWURUTA

14. ¿Sãwũã jara ũrĩbiseabʉ kʼãrẽa ẽbẽrarã zʉbʉriapanʉta?

¹⁴ Dayirã nejaradia wãbʉrʉde, ʉ̃kʉrʉ ẽbẽrarãba widipanʉ kʼãrẽa zʉbʉriapanʉta. Dayirãba jipade kãga Daizeze Bedʼeadeba jara ũrĩbita. Jara ũrĩbipanʉ jardin Edénʼne kʼãrẽ berabaridata. Diarubara jarasi sewa nebʉrata Adánʼa akʉza Evaʼa, maʉ̃ba ãyara ũrĩkĩrã ẽ basi Daizeze bedʼeara (Gén. 3:​1-6). Akʉza jara ũrĩbipanʉ Adánba Evaʉ̃meba ũrĩsida baera Diaru nebʉrata, dayirãta idi jõma zʉbʉriabʉta akʉza beipanʉta (Rom. 5:12). Adewara jaradiapanʉ Daizezebara ewarita idu berabaribinʉmʉta jõmaʉ̃ba kʼawuadamarẽã Diarura sewa nebʉra omiata akʉza ẽbẽrarãba kʼawuadamarẽã ãyira ewari jõmaʉ̃nẽ baseapanʉta (Apoc. 21:​3, 4). Naʉ̃ra yibia dayirãba jaradiaira, naʉ̃bara mejãcha kʼarebabari baera ẽbẽrarãba kʼawuaita kʼãrẽa zʉbʉriapanʉta.

15. Job berabaridadeba, ¿sãwũã jaradiaseapanʉ ẽbẽrarãba wididara kʼãrẽa zʉbʉriapanʉta? (Akʉra potorata).

¹⁵ Akʉza ʉ̃kʉrʉba dayirã widibʉrʉde kʼãrẽa zʉbʉriapanʉta jaradiaseapanʉ Job nebʉradeba. Yi maʉ̃ ʉ̃rʉ widibʉrʉʼa biga diaseapanʉ maʉ̃ta widisi baera. Jara ũrĩbiseapanʉ naweda yumakẽrã aba basita, maʉ̃ trʉ̃ra Jobʼbasi, iya iyabaʉ bedʼeata widisi iyi zʉbʉria zroma berabarimʉmaside. Iya krĩchabasi Daizezeba mawũã zʉbʉriamarẽã berabaribibʉta (Job 7:​17-21). Naʉ̃ba yi ẽbẽra maʉ̃ widibʉara krĩchabiyi naʉ̃ta: «Wãrĩnu mʉ̃abida iyaba krĩchabasi Jobʼba krĩchabada kĩrãkʼa». Dayirãba jara ũrĩbiseapanʉ Job berabarida kĩrãkʼa Daizezebara nemitia oẽãta, awuarabʉrʉ Diarubʉrʉ zʉbʉriabibʉta. Diarubara dayirãra zʉbʉriabibʉ iya jarabʉ baera dayirãba bari Daizezeba nebiata diabʉ baera iyi odebʉta, mamina dayirã zʉbʉriabʉrʉdera iyi odebʉta amaeita. Maʉ̃ tẽã dayirãba jara ũrĩbiseapanʉ Daizezeba dayirãta zʉbʉriabi ẽ mina iduaribisita Diaruba nemitiata omarẽã, Jeowaba kʼawuabasi baera ẽbẽrarãra kʼẽrẽpa bʼaita iyiʉ̃me, mawũã ũdubita Diarura sewa nebʉrʉ omiata. Akʉza jara ũrĩbiseapanʉ Jobʼta kʼẽrẽpabasi baera Jeowaba nebiata mejãcha diasita. Akʉza jara ũrĩbiseapanʉ nemitiara zeka bʼaita Daizezedeba.

16. Jara ũrĩbira Job berabaridadeba sãwũã kʼarebasita Mariora iyi zʉbʉrianʉmaside.

¹⁶ Kʼawuadadrʉ Job nebʉradeba sãwũã kʼarebasita yumakẽrã aba yi trʉ̃ra Mario. Poaga 2021ne mebẽã wẽrã abaʉba nejaradiabasi telepononeba, iya nããra trʉ̃nara Mariobasi. Maʉ̃ne iya lesi testo aba Daizeze Bedʼeadebemata akʉza jaradiasi Jeowabara nebiata diakĩrãbʉta ʉ̃ra zeide akʉza Daizezeba ũrĩbʉta dayirã yiwidʼira. Maʉ̃ jaradiada tẽã mebẽãba Marioʼa widisi iya kʼawuatabera bigabasi kʼawuaita, maʉ̃ne Mariobara jarasi iya telepono panʉi nãã bʉnʉmasita kartata, maʉ̃ne jaraita yi mebẽrãra mejãcha kãgata, maʉ̃ tẽã iyikʉza beibasita. Marioba jarasi: «Daizeze ʉ̃rʉ krĩchabʉ mʉ̃ara, mamina naʉ̃ diapeda krĩchasi Daizezeba mʉ̃ ʉ̃rʉra krĩcha ẽãta». Mebẽã wẽrãba awuru ewaride akʉza jẽda trʉ̃si, bedʼeasi Job sãwũã zʉbʉriada ʉ̃rʉ. Marioba jarasi jõma leita Job librora, maʉ̃ kʼarea mebẽãba zokʼasi enlase jw.org debemata iya jõma lemarẽã, ¿kʼãrẽ nebiata ũdusi maʉ̃neba? Marioba kʼawua jʉ̃drʉsi Daizeze Bedʼeata, kʼawuasi Daizezeba iyira mejãcha kãgata, maʉ̃ba iyira sobiabʉ.

17. ¿Bʉara kʼãrẽa biga diakĩrãbʉ Jeowaba Job berabaridata iyi Bedʼeade bʉbisi baera? (Job 34:12).

¹⁷ Daizeze Bedʼeabara wãrĩnu kʼarebabʉ ẽbẽrarã zʉbʉria berabaribʉrata (Heb. 4:12). Maʉ̃ kʼarea dayirãba mejãchade biga diakĩrãpanʉ Jeowaʼa bʉbisi baera Job berabaridata iyi bedʼeade, Jobʼba mawũã widida kĩrãkʼa (Job 19:​23, 24). Job berabaridadeba dayirãba kʼawuatabeda «Daizezebara oẽãta nekayiruara» (akʉra Job 34:12). Adewara dayirã jaradiabʉ kʼãrẽa Daizezebara iduaribibʉta zʉbʉriata berabarimarẽã akʉza sãwũã awuantaseapanʉta. Adewara naʉ̃ba kʼarebaseabʉ dayirãba wuabemara zʉbʉrianʉmʉta so zarea diaita. Wuarebema artikulode audre kʼawuaseapanʉ Job nebʉradeba, maʉ̃ne kʼawuadayi sãwũã ũrãgʼa biata diaseapanʉta wuabemara.