Mebẽrã zõrãpanʉrãra yiza bia kongregasionʼitara

Bʉsida naʉ̃ mebẽã kĩrãkʼa berabaribʉbaibara, zõnabasi baera bʉa nãã obada kĩrãkʼa obe ẽ baibara. Maʉ̃ba krĩcha obibʉbaibara mejãchade. Mamina, ¿kʼãrẽba kʼarebai bʉ mawũã krĩcha ẽ baita?

BɄA KʼÃRẼTA OMARẼÃ JɄ̃ÃBɄ JEOWABARA

Bʉyikʉza widira: «¿Kʼãrẽta omarẽã kãgabʉ Jeowabara mʉ̃ara?». Deuteronomio 6:5de jarabʉ: «Kãgaibara bʉ Zeze Jeowara bʉ soiduba, bʉ kakua jõmaneba akʉza bʉ zarea jõmainʉba».

Naʉ̃ testoba ũdubibʉ Jeowabara jʉ̃ãbʉ ẽãta, daya obe ẽãsidu wũẽta omarẽã. Naʉ̃ kʼawuaiba kʼarebabʉ wuabemaraba obʉ kĩrãkʼa oẽ baita akʉza krĩcha ẽ baita daya nãã obadaira idira oau ẽãta.

Krĩchara naʉ̃ta, bʉ warrarabasiedara, bʉara nekʼãrẽ jõma bʉa oseabʉta osi Jeowa kʼarea. Mamina bʉara atiara zõnabasi baera, nãã obada kĩrãkʼa obʉ ẽ, mamina atiara bʉ zõnabasimina bʉa Jeowaita nekʼãrẽ oseabʉta obʉ. Naʉ̃ba ũdubibʉ bʉa warrarabasieda nekʼãrẽ bʉa oseabʉ Jeowaita soiduba odara, idibida abarika obʉta, bʉa oseabʉta obʉ baera Jeowaita.

BɄARA WABIDA NEKʼÃRẼ MEJÃCHA OSEABɄ WUABEMARA KʼAREBAITA

Bia krĩchara naʉ̃ta, atiara bʉ zõnabasi baera krĩchaseabʉ nekʼãrẽ mejãcha obe ẽãta, mamina bʉara oseabʉ bʉ warraraena bʉa nãã nekʼãrẽ obe ẽ badata. Maʉ̃ranebemata akʉdaya.

Wuabemara jaradiara bʉa kʼawuabʉta. Daizeze Bedʼeade bʉ, ʉ̃kʉrʉ yizata, maʉ̃ranebemata akʉdaya ãya kʼãrẽ jaradata:

Nokʼo Davidba jarasi: «Mʉ̃ra warrarabasi atiara mʉ̃ra zõrãrã, mamina mʉ̃ara ũduka ẽbẽra kʼẽrẽpabʉra doba amaepanʉta, mia yi wũãwũãrasida pan jʉrʉbʉta» (Sal. 37:25).

Josuéba jarasi: «Akʉra, mʉ̃ra beibodotanʉmʉ, marabara mara soiduba biʼia kʼawuabʉ akʉza jõma mara kakuaiduba Jeowaba bedʼea jarabʉra jõma aripe berabaribʉ aña jara ẽã. Maraitara maʉ̃ra jõma berabarisi. Bedʼea jaradara aripe berabaribʉ aña jara ẽã» (Jos. 23:14).

Davidʼta akʉza Josuéʉ̃mera Jeowa ode zõnabasida. Maʉ̃ba ãyara biʼia kʼawuapanasi Jeowaba sãwũã kʼarebabʉta akʉza ãyira nekʼãrẽ mejãchaʉde berabarisi. Maʉ̃ba ãya jarabʉra wuabemaraitara yibiabasi akʉza yiza biabasi ãyira. Idi bʉabida ãyide kĩrãkʼa oseabʉ, zõnabasi baera bʉra nekʼãrẽ mejãchaʉde berabarisi akʉza ũdusi sãwũã Jeowaba kʼarebabʉta, maʉ̃ba maraba jarabʉrʉra jipade yibia wuabemaraita akʉzade yiza bia.

Bʉta dããrababʉrʉ Jeowa odebʉta, wuabemara nebʉraseabʉ Jeowaba sãwũã kʼarebabʉta dayita iyiʉ̃me kʼẽrẽpabʉbʉrʉ akʉza iya sãwũã nebia diabʉta. Bʉa kĩrãbebʉbʉrʉ Jeowaba iyi pʉwʉrʉ sãwũã kʼarebabʉta, maʉ̃ta bʉa awurua nebʉraseabʉ mawũã ãyisida so zarea diamarẽã. Maʉ̃ba bʉsida sobiabi baera (Rom. 1:​11, 12).

Akʉzade nekʼãrẽ awuruta oseabʉ, ãba yi jʉrebarieda wãseabʉ bʉ wãseabʉde, mawũã obʉba kʼarebabʉ baera mebẽrãta akʉza bʉta. Connie nããbema parrapodebemaba naʉ̃ta jarabʉ: «Mʉ̃ reunionena wãiba mejãchade kʼarebabʉ abapai sentibi ẽ baera. Mʉ̃ reunion ena wãbʉrʉdera mebẽrãbara kãgata ũdubipanʉ, maʉ̃ba mʉ̃abida ãyi kʼarea nekʼãrẽ obʉ, nekʼãrẽ zaketa diabʉ. Maʉ̃ba mʉ̃ra sentibibʉ kʼãrẽ ẽ kĩrãkʼa bʉ ẽãta akʉza mʉ̃abida ãyita nekʼãrẽ obʉta».

JEOWABARA BIʼIA AKɄBɄ BɄA IYITA NEKʼÃRẼ MEJÃCHA OBɄRA

Daizeze Bedʼeade yiza biata mejãcha bʉ. Ãyara nekʼãrẽ mejãcha okĩrãpanasimina Jeowaita oauda ẽ basi. Mawũãsidu ãyira Jeowabara kãgabasi. Maʉ̃ranebemara abara Simeón, iyira Jesús tosidadera zõrãyirasi. Iyi temploeda wãbʉdera iyara ũdubasibaibara warraraba nekʼãrẽ mejãcha opanʉta Jeowaita, maʉ̃ kʼarea iya krĩchasibaibara Jeowaba iyira bia akʉbʉ ẽãta iyira zõrãrã baera. Mamina Jeowabara iyi zõnabatrʉ akʉ ẽ basi, awuarabʉrʉ akʉsi iya kʼãrẽaba ĩjãbʉta akʉza Jeowaba jarasi iyira «kʼẽrẽpabʉta», maʉ̃ kʼarea Jeowabara ũdubisi yi warra Jesús yi zake tomata akʉza jarabisi Jesúsʼra Mesíasta. Naʉ̃ba ũdubisi Jeowabara akʉbʉta iya kʼãrẽaba ĩjãbʉta akʉza iya kʼãrẽta oseabʉta. Adewara Daizeze Bedʼeaba jarabʉ Jeowa jaure zareara iyi ʉ̃rʉbasita (Luc. 2:​25-35).

Bʉabida wãrĩnu ĩjãseabʉ Jeowabara bia akʉbʉta bʉa nekʼãrẽ obʉra, nãã obada kĩrãkʼa obʉ ẽ mina. Jeowara sobiabʉ ẽbẽra abaʉba soiduba diabʉbʉrʉ «iya diabʉra yibia, diabʉ baera iya erbʉta mawũã dia ẽ iya erbʉ ẽãta» (2 Cor. 8:12).

Maʉ̃ba krĩchara bʉa kʼãrẽ oseabʉta. Bari jaraita, krĩchara bʉa sãwũã kĩrã awuara awuara jaradiaita, mejãcha jaradia ẽ mina. Adewara trʉ̃seabʉ bʉa mebẽrãta mawũã ãyi so zarea diaita, mawũã ẽ bʉrʉ kartasida bʉseabʉ. Mawũã obʉba ãyira bʉa mejãchade so zarea diaseabʉ bʉra dããraba baera Jeowaʉ̃me kʼẽrẽpabʉta.

Bʉyikʉzaʉba nekʼãrẽ mejãcha obe ẽ bʉsida bʉara Jeowaitara nekʼãrẽ mejãcha oseabʉ. Bari jaraita lera rekuadro «Ẽbẽra beikĩrãbʉta kʼarebasi». Nama ũduyi bʉa mebẽã wẽrã yõdrakiruba kʼãrẽ odata Áfricade.

Kĩrãbeidua marara Jeowa ode kʼẽrẽpabʉta zõna babʉrʉ baera yiza biata wuabemara mebẽrãitara. Maraba ũdubipanʉ baera Jeowa ode kʼẽrẽpa takeraseabʉta akʉza awuantaseabʉta. Maʉ̃ kʼarea kĩrãduaraidua Hebreos 6:10ba jarabʉta: «Daizezera jipabʉ baera maraba opanʉra kĩrãdua ẽ akʉza iyi trʉ̃ kãga ũdubipanʉsida, iyi pʉwʉrʉta kʼarebasida baera akʉza kʼarebapanʉ baera».

BɄA OSEABɄTA ORA WUABEMARA KʼAREBAITA

Ẽbẽrarã mejãcha estudiapanʉraba jarapanʉ zõrãrã wuabema kʼarea nekʼãrẽ mejãcha opanʉra, audre kaya ẽãta akʉza ãyira dããra baseabʉta maʉ̃ba akʉza mesera krĩchabʉta.

Wuabemara kʼarebaiba jarakĩrãbʉ ẽ bedʼea zroma ũdubʉra jõma berabarita, awuarabʉrʉ Jesúsba zokʼabʉrʉdebʉrʉ jõi baera kayara akʉza zõna babʉra (Rom. 5:12).

Maʉ̃ zeyeda zarea oidua wuabemara kʼarebaita Jeowata ũdukʼawuadamarẽã, maʉ̃ba zarea diai baera bʉa audre ĩjãita Jeowaba nebia diaya abʉ ʉ̃rʉ. Mebẽrã zõrãrã panʉra, kĩrãduaraidua Jeowabara maraba obʉra bia akʉbʉta akʉza marara mebẽrã kongregasionebemaraitabida yiza bia maraba ĩjãpanʉ kʼarea.