Badua widipanʉta / Kʼãrẽ opanʉta / ¿Kʼãrẽa ĩjãna ẽ kẽgʉde wa bʉeira?

Nebʉrata akʉza wãrĩnuta

Nebʉrata: Jeowa ʉ̃rʉ Kʼawuabipanʉrãra wãna ẽ medikoedara, ãya maʉ̃ ʉ̃rʉ ĩjãna ẽ baera.

Wãrĩnuta: Dai Jeowa ʉ̃rʉ Kʼawuabipanʉrãra medikoma wãbʉrʉdera jʉrʉpanʉ mediko biata akʉza ospital biata. Bʉ ʉ̃kʉrʉ medikota akʉza sirujanota ãya wuabemara remedio zokʼabʉrʉde akʉza operabʉrʉde wata zokʼa ẽ, ãya naena obari baera. Maʉ̃ kʼarea dayirã mebẽrã kayabʉrʉde, mawũã ẽ bʉrʉ dayi kayabʉrʉde jʉrʉpanʉ mawũãbʉra medikota. Daira sobiapanʉ ãya nekʼãrẽ mejãcha obʉda baera wa zokʼa ẽ baita. Ãya Jeowa ʉ̃rʉ Kʼawuabipanʉrã obʉda kĩrãkʼa wa zokʼa ẽ baita akʉza mawũã obʉda Jeowa ʉ̃rʉ Kʼawuabipanʉrã ẽ kʼareabida. Daya wa kẽgʉde eda bʉebʉrʉdera nekʼãrẽ mejãcha berabariseabʉ, bari jaradaita, waba kayata erbaseabʉ, wa dayima bʉebʉdara dayi waʉ̃me awuara baseabʉ akʉza ẽbẽrarãba ospitalde trajapanʉraba aña jidaseabʉ maʉ̃ wa ʉ̃rʉ, maʉ̃ba idi ewade badu ẽbẽraba jidaseabʉ wa bʉeita, mawũã ẽ bʉrʉ bʉe ẽãta.

Nebʉrata: Jeowa ʉ̃rʉ Kʼawuabipanʉrãba ĩjãta mejãcha erbʉ baera, ẽbẽrarã kayabʉra bebibʉ.

Wãrĩnuta: Daiba wãrĩnu ĩjãta ũdubibʉ kʼareara, ẽbẽrarã kayabʉra bebika.

Nebʉrata: Remedio zokʼapanʉta akʉza sirugia oita wata ede ẽ bʉrʉ mejãcha plata edebʉ.

Wãrĩnuta: Remedio zokʼapanʉta akʉza sirugia oira wa neẽã, wãrĩnu bʼaira mejãcha plata ede ẽ.a

Nebʉrata: Jeowa ʉ̃rʉ Kʼawuabipanʉrã mejãchaʉta akʉza wũãwũãrata mejãcha bei zebʉrʉ wa kẽgʉde eda bʉeita ĩjãna ẽ baera.

Wãrĩnuta: Mawũã berabari ẽ. sirujanoraba edaʉde so operaita, bʉwʉrʉ operaita, mawũã ẽ bʉrʉ nekʼãrẽ awuara operabʉrʉde opanʉ wa neẽã.b Yi ẽbẽra wa neẽã operabʉrʉra mesera jẽda biabʉ akʉza warrarasida.c Mio ẽbẽraba jarabe ẽ baita mawũã ẽ bʉrʉ beita wa bʉebʉrʉta mawũã ẽ bʉrʉ wa bʉe ẽãta.

¿Kʼãrẽa Jeowa ʉ̃rʉ Kʼawuabipanʉrãbara ĩjãna ẽ kẽgʉde wa bʉeira?

Maʉ̃ra opanʉ Daizeze Bedʼeaba mawũã omarẽã jarabʉ baera. Antiguo Testamento akʉza Nuevo Testamentoba jarabʉ wata ko ẽ bamarẽã adewara kẽgʉde bʉe ẽ bamarẽã (Génesis 9:4; Levítico 17:10; Deuteronomio 12:23; Hechos 15:28, 29). Adewara Daizezeitara wara dayi bebʉ (Levítico 17:14). Daizezeba dayirãra bebʉ diasi, maʉ̃ kʼarea wara kobe ẽ akʉza kẽgʉde bʉebe ẽ, maʉ̃ta odara iyaʼa wawiata ũdubipanʉ.

¿Maʉ̃ra ʉ̃rʉra idi ewadera kʼãrẽta krĩchapanʉ medikorãra?

Medikora yibiaraba krĩchapanasi ẽbẽra remedio zokʼaita akʉza operaita yibiabasita wa zokʼaita. Akʉza krĩchapanasi ẽbẽra abaʉba wata ĩjãna ẽ basibʉrʉ, maʉ̃ra beikĩrãbasita. Mamina idi ewadera mawũã krĩchada ẽ. Bari jaraita, karta abaʉba 2004baside jarasi: «Nekʼãrẽ mejãcha ozebʉda Jeowa ʉ̃rʉ Kʼawuabipanʉrã remedio zokʼabʉdade akʉza operabʉdade wa zokʼa ẽ baita. Maʉ̃ta aranʉbai ẽbẽrarã jõmaita zokʼadayi».d Medicina transfusional libroba jarasi 2010de: «Jeowa ʉ̃rʉ Kʼawuabipanʉrã kʼarea wa zokʼada ẽãba idi ewadera ẽbẽrarã badu operapanʉ, maʉ̃ra ẽbẽrarã meserabai wãseabʉ deda. Abarika oseabayi aranʉbai ẽbẽrarã wa neẽã operabʉrʉde, maʉ̃ta badua opanañi».

Idi ewade medikora mejãchaʉba operasion zarea obʉrʉdera wa neẽã operapanʉ, akʉza nekʼãrẽ awuara zokʼapanʉ maʉ̃ operasionʼita. Maʉ̃ nekʼãrẽra medikoba mawũã wa neẽã zokʼaira pʉwʉrʉra biodebʉ akʉza ẽbẽrarã plata neẽã bʉmebida. Adewara ẽbẽrarã Jeowa ʉ̃rʉ Kʼawuabipanʉrã ẽ bida jaraseapanʉ ãyisida mawũã operamarẽã wa neẽã.