Ãyira nekʼãrẽ oma nãã sãkokode pana ẽ basi

Nabucodonosorba muñeko ʉ̃rʉ kʼãĩmokʼãrãda tẽã, zokʼasi odamarẽã nekʼãrẽ zroma oro omata. Maʉ̃ra bʉsi koribi Durade. Mama ãba yi jʉresi ẽbẽrarã yi audre yibiata akʉza yi zromarata iyi pʉwʉrʉdebamata. Maʉ̃ne eda chuasi Mesacta, Sadracta akʉza Abednegota. Nokʼoba zokʼasi: «Maraba ũrĩbʉrʉde arpata akʉza chiruta jõmaʉ̃ta sãkokode aibara iyi nãã. Yi mawũã oẽãra eda ibalbʉedayi tʉbʉ pʉreade». ¿Bʉmara maʉ̃ra ebreo ũbeapanʉrãra maʉ̃ nekʼãrẽ oma nãã sãkokode asidaka? Mawũã ẽ bʉrʉ, ¿Daizeze abapaiʼabʉrʉ yiwidʼibasika?

Aramaʉ̃ta nokʼobara jarasi trãbita trãnamarẽã. Jõmaʉ̃ta sãkokode akʼãrãpe nekʼãrẽ oma yiwidʼisida, mamina Sadracba, Mesacba akʉza Abednegoba oẽ basi. Ʉ̃kʉrʉ ẽbẽrarãba ũdusida, maʉ̃ kʼarea nokʼoʼa jarasida: «Naʉ̃ra ebreo ũbeapanʉrãra nekʼãrẽ omara yiwidʼida ẽ basi». Nabucodonosorba trʉ̃ bʉesi maʉ̃ra kʉ̃rara, jarasi: «Bedʼea aba bedʼeayi mʉ̃ra, naʉ̃ nekʼãrẽ oma yiwidʼidua, maʉ̃ta atia oda ẽ bʉrʉ tʉbʉ pʉreaeda ibalbʉeyi marara. Mia abaʉ daizezeba maʉ̃nebara ẽdrʉbibe ẽ bayi». Ãya panʉsi: «Daizezeba ẽdrʉbiseabʉ daira, mamina iya maʉ̃ta oẽ bʉsida, daira bʉ kʼãrẽ omara yiwidʼida ẽ bayi».

Nabucodonosorʼra mejãcha kĩrʉ kʼãrãpe jarasi iyi nezokʼara: «¡Tʉbʉ eda pʉreabʉra audre jʉ̃wʉrʉa oidua iyi jʉ̃wʉrʉa bʉira!». Maʉ̃ tẽã jarasi iyi gorogorora: «Naʉ̃ra yumakẽrãrata jʉ̃na kʼãrãpe eda ibalbʉeidua». Gorogororaba kʉ̃rara maʉ̃ tʉbʉ pʉreanʉmʉne eda ibalbʉeita edesidadera, mejãcha jʉ̃wʉrʉabasi baera kʼawa jʉ̃ẽbʉrʉba beisida, mõbe ebreo ũbeapanʉrãra eda bʉesida tʉbʉ pʉreade. Maʉ̃ tẽã Nabucodonosorbara eda akʉsi kʼawuai kʼãrẽ berabarinʉmʉta. Maʉ̃ne ũdusi ẽbẽrarã kimarebʉra zokʼaipanʉta maʉ̃ tebʉ pʉreade. Iyira mejãcha pera kʼãrãpe widisi yi kʼarebabarira: «¿Dayirãba ibalbʉesida ẽka yumakẽrãra ũbeara? Mʉ̃ara, atiara ũdubʉ kimare, ¡maʉ̃ranebema aba angel kĩrãkʼabʉ!».

Nabucodonosorba tʉbʉ pʉreanʉmʉne eda akʉ kʼãrãpe jʉrasi: «¡Ãĩ zeidua, Daizeze ʉ̃tʉbema ĩjãpanʉrãra!». Ãya ũduside Sadracta, Mesacta akʉza Abednegota kʼãrẽ berabari ẽãta ãya jipa ĩjã ẽ basi. Mia kʼãrẽsida bawa ẽ basi, ãyi wuara, ãyi kakuara akʉza nãrĩ ũsia ẽ basi.

Nabucodonosorba jarasi: «¡Sadrac, Mesac akʉza Abednego Daizezera jipa yi zroma! Zokʼasi angelta aba mawũã ãyi ẽdrʉbita. Neẽ awuru daizezera ãyide kĩrãkʼara».

Ebreo ũbeabʉra ãyira jipa kʼẽrẽpabasi Jeowaʉ̃me kʼãrẽ berabarisidu. ¿Bʉra ãyi kĩrãkʼa kʼẽrẽpa bakĩrãbʉka?